Juliu

Irekaxakachi “jurhiatikuechani jimbo” enga kánikua “peligru” jaka ka sánhani arhiati no sési jánhaskuarheni ante de ísïini komu jimbanhi jurhiatikua ma jarhani nani enga ménderu pínandikua jauaka Echerirhu (2 Tim. 3:1). Ísï jimbo, sési jarhasti kurhamarhikuarhini: “¿Naniasïchi eraasïni juchari éskuecha jingoni?”, o sea, ¿nénchi andarherasïni parajtsïni jarhuatani ka orhejtsïkuni? Ióntki, salmueri karari ma uandaspti na enga xáni uétarhijka Jeobani eraani o andarherani parajtsïni jarhuatani engachi no sési nitamakuarhini jauaka (Sal. 123:1-4). Ini ambe ísï terokutantaspti komueska imani ambe enga jántspiri ma újka. Enga uandapka eska jántspiriri éskuechaksï pendienti jarhasïnga ambe enga imeri patroniri jájki újka, no solu arhikuekasïrendi eska mintsikasïrenga eska patroni jemba íntskuaka tʼirekua ka eska kuájchakuaka. Ístu, arhikuekasïrendi eska jatsispka para méntku exeni jarhani imeri patronini para kuenta íntskukuarhini ambe enga uéjka ka jaiapanherantani. Májkueni, uétarhisïndi eskachi pauani pauani estudiariuaka Bibliani parachi mítini o jánhaskani ambe enga Jeoba uéjka ka úni ambe engajtsïni arhiaka. Solu ísïjtsïni íntskuati imeri jarhuajperata. w18.07 12 párr. 1, 2

Enga Jesusi uandapka “engaksïni Diosïri Uájpa euajpintaaka, jimajkani kʼóru sési jimbo nóterujtsï jántspiriuaka”, arhikuekaxapti eska kʼuiripu nóteru jántspiripiringuia pekadueri, enga újka eska kánikua kómu nitamakuarhinhaaka (Juanu 8:34). Pekadujtsïni no solu no sési ambe úrasïndi, sino ístujtsïni no jurajkusïndi imani ambe úni engachi mítika eska sési jarhaska o úni ambe engachi xáni úpiringa. Ini ambe jimbochisï pekadueri jántspiriika. Ka i ambe úsïndi eskachi sufririuaka, eskachi jatsiauaka uandanhiatechani ka eskachi uarhiaka (Rom. 6:23). Astachi jiáni uákia ima jásï libertadi jatsini engaksï Adani ka Eba tsïtaka, engachi nóteru pekadoricheuakia. Enga Jesusi uandapka eskachi úpiringa ambe enga ima uandapka, arhikuekaxapti eskachi jatsiska para kumplirini máru ambe parajtsïni ima úni euajpintani (Juanu 8:31). Kristianuechachi nóteru úsïnguia ambe engachi jucha uéjka ka jiókuarhiasïngachi imani límitechani enga Jesusi íntsaajka imeri chúxapatichani (Mat. 16:24). Ísï eska na aiatspika, meruchi libreuaka sánderu orhepani engachi pʼiuauakia kóntperatechani imeri uarhikua jimbo. w18.04 7 párr. 14-16

Jeoba exesïndi na engaksï pʼikuarherani jarhajka imeri marhuaricha asta engaksï imani ambe eratsini jauaka enga no ísïjka. Ju je exeni ambe enga nitamakuarhipka Jonasi enga profeta máepka. Jeoba arhispti eska nipiringa Nínibe anapuechani aianguani eskaksï kʼamajkunhapiringa. Peru jima anapuechaksï moantaspti, jimbosï Tata Diosï puákuantapti. I ambe no sési pʼikuastaspti Jonasini enga niárapka kánikua ikiani jimboka no ísï úkuarhispka eska ima na aianhpipka. Peru Jeoba tekantskua xarhatakuspti imeri profetani ka jarhuataspti para ménderueni eratsini (Jon. 3:10–4:11). Tiempu jingoni, Jonasi kurhanguspti ambe enga úkuarhipka ka asta Tata Diosï úspti eska Jonasi karapiringa ambe enga nitamakuarhipka parajtsïni juchantsïni jarhuatani (Rom. 15:4). Ambe enga Jeoba úpka ini ka máteru ejempluecha jingoni, úsïngachi seguru jarhani eska Jeoba kurhangukuasïnga imeri marhuarichani. Pendienti jarhasïndi mándani arhini juchantsïni jimbo engachi no sési nitamakuarhini jarhajka. Kurhanguchisïndijtsïni iámindu ambe engachi pʼikuarherajka, ístu imani ambe engachi no újka úni. Ka aiachisïndijtsïni eska no jurajkuaka eskachi sánderu tsʼéjkunhaaka engachi no úaka tekaantani (1 Kor. 10:13). ¿A no eskajtsïni sési pʼikuastantasïnga mítini ini ambe? w19.03 16 párr. 6, 7

Moisesiri Lei uandasïrendi eskaksï orhejtsïkuticha no solu jatsisïrenga para jarhuataani israelitechani Tata Diosïri ambe jingoni, sino ístu engaksï problema ambe jatsipiringa oksï nemani uándikuni. Exea je máru ejempluechani. Enga israelita ma uándikupiringa nemani, no jirejiresï uándikunhantasïrendi. Iretarhu anapu orhejtsïkutichaksï jatsisïrendi paraksï sési exeni iámindu ambe, antedeksï uandani eska jatsispka para uarhini (Deut. 19:2-7, 11-13). Máteru ambe, ístuksï orhejtsïkuticha jatsisïrendi paraksï mámaru járhati uandanhiatecha jingoni jarhuajpini, komu jatsikuarhikueri ambe ka asta temungurhiricheri ambe (Éx. 21:35; Deut. 22:13-19). Engaksï orhejtsïkuticha jurhimbitku úenga iámindu ambe ka israelitechaksï úni ambe enga lei uandenga, iáminduechani marhuakuasïrendi ka ireta kʼéri ambe arhisïrendi Jeobani (Lev. 20:7, 8; Is. 48:17, 18). Ini ambe jingonchi exesïnga eska Jeoba iámindu ambe jimbo pendienti jarhasïnga ambe engachi nitamakuarhini jarhajka. Uékasïndi eskachi uékperakua ka jurhimbikua jingoni kaauaka máteruechani. Ka exesïndi ambe engachi újka ka uandani, asta engachi jandiajku jarhajka kʼumanchikuarhu. w19.02 23 párr. 16-18

Engachi uandanhiani jarhajka, úkua jukasïndi kaxumbiitini. Jamberichi úaka no sési pʼikuastaani máteruechani juchari uandakuecha jingoni ochi no sési kaani. Engachi ménisï niáraka jukari uandanhiani, ju je eratsintani Jesusiri ambe. Últimu mesicha jimbo enga ixú japka Echerirhu, jatsispti para kánikua tekantani. Mítispti eska uándikunhapiringa ka eska kánikua no sési kánhapiringa (Juanu 3:14, 15; Gal. 3:13). Máru mesi ante de uarhini, uandaspti eska kánikua uandanhiaxapka (Luk. 12:50). Ka máru jurhiatikuecha ante de uándikunhani, uandaspti: “Mískuarhini pʼikuarheraxati juchiti mintsita”. Úsïngachi exeni na enga xáni kaxumbitipka ka kurhajchani Tata Diosïni, jimboka mintsita jingoni kómarhispka (Juanu 12:27, 28). Enga niárapkia ima jurhiatikua, balori xarhataspti ka jurajkuspti eskaksï Tata Diosïri enemiguecha jupikapiringa, engaksï kánikua no sési kámapka ka kʼuratsetani astakaksï uándikupka. Nájkiruka xáni uánikua uandanhiatechani jatsiapka ka no sési kánhani, Jesusi kaxumbikua xarhataspti ka úspti ambe enga Tata Diosï uéjka. Jo, ima jindesti sánderu ambakiti ejemplu para kaxumbitini nájkirukachi uánikua uandanhiatechani jatsiauaka. w19.02 11 párr. 14, 15

Ménisï jarhajti ambe ma enga újka eskachi no úaka iámindu tánguarhikuecharhu nirani. Enga ísïka, balorichi uétarhinchasïnga. Máru erachichaksï pʼamenchasïndi, kánikuaksï kómu pʼikuarherani o desanimadu jarhani. Máteruksï kánikua tekantaxati engaksï imecheri familiaricha no sési kájka o gobiernuecha. Ju je eratsiani imani erachichani engaksï imecheri jakajkukua jimbo ónhakata jaka. ¿Ménisïchi eratsispi eska juchari ejemplu úaka jarhuataani? (Ebr. 13:3). Engaksï erachicha mítijka eskachi seguirixaka Jeobani marhuakuni nájkirukachi uandanhiata ambe jatsijka, úsïndi eskaksï seguiriuaka jakajkuni, balori jukani ka no jurajkuni Jeobani. Enga Pablu Roma ónhakata japka, kánikua tsípisïrendi enga méni kurhauenga eskaksï imeri ermanuecha seguirixapka Jeobani marhuakuni no sáni chéparini (Filip. 1:3-5, 12-14). Enga sánderku kueratani japkia o ísï no ióni jimbo enga nóteru ónhakata japkia, karta ma karakuaspti Ebreuechani. Imani karta jimbo, arhiaspti imeri ermanuechani eskaksï no jurajkupiringa tánguarhini ka ístu arhiaspti: “Méntku jauena je uékperani komueska májku ermanuecha” (Ebr. 10:25). w19.01 28 párr. 9

Satanasi no úsïndi ambe enga Jeoba juramujka, solu imeri ambejku uékasïndi konseguirini ka uékasïndi eskachi májkueni jámaaka ka eratsini eska ima. Úraasïndi imani kʼuiripuechani enga támisï pákia ka uékasïndi eskachi niáraaka májkueni eratsini ka jámani eskaksï imecha (1 Kor. 15:33). Satanasi ístu jánguarhintasïndi parachi imani ambe tsitini enga no sési jaka, úparini eskachi jakajkuaka ambe enga kʼuiripu jorhentpijka ka no ambe enga Tata Diosï eratsijka (Kol. 2:8). Por ejemplu, úsïndi eskaksï kʼuiripuecha eratsiaka eska ambe enga sánderu jukaparhakueka, jindeska riku úkuarhini. ¿Andisï xáni peligrosue ísï eratsini? Jimboka, ia sea niáranksï riku úkuarhini o nómbe, imecha engaksï ísï eratsijka, úatiksï xáni jánguarhintani para tumina andani engaksï jamberi niáraaka no jukaparharani imecheri kuerpuni, familiani ka imecheri pájperakua Tata Diosïni jingoni (1 Tim. 6:10). Xáni engachi agradesidu jaka, engajtsïni juchari Táti jánhasti auandarhu anapu jarhuatajka no xáni jukaparharani tuminani (Ecl. 7:12; Luk. 12:15). w19.01 15 párr. 6; 17 párr. 9

Ante de Jesusi jurhani Echerirhu ka ambakiti ejemplu ma íntspini, Jeobaeri marhuarichaksï tʼuini kurhangusïrendia na enga xáni jukaparhakuepka uinhaperantaani máteruechani. Ju je exeni ambe enga úpka rei Esekiasi. Engaksï asiriuecha uékenga kʼamajkuni Judani, Esekiasi tántaaspti ejersituecheri jefechani ka iretani ka uinhaperantaaspti máru uandakuecha jingoni (2 Crón. 32:6-8). Iásï ju je Jobueri ambe uandania. Ima kómu pʼikuarheraxapti ka uétarhinchaxapti eska uinhaperanhantapiringa, peru ima engaksï nípka jarhuatani, imani ambeksï arhispti enga sánderu kómu pʼikuastapka, jimbosï masi úpti Jobu jorhendaani nénasï uétarhijki uinhaperpentani. Arhiaspti eska enga ima jarhuataani jámapiringa, imani ambe arhiapiringa enga uinhaperantaapiringa ka sési pʼikuastantaani (Job 16:1-5). Tátsekuaksï Eliu ka Jeoba uinhaperantasptia Jobuni (Job 33:24, 25; 36:1, 11; 42:7, 10). w18.04 16 párr. 6;17 párr. 8, 9

Isaiasi uandasptia na enga Jeoba uinhaperantapiringa imeri iretani. Uandaspti eska Jeoba mísmu jupiringa komu nema enga kánikua uinhapika, ka eska imeri jájki juramukupiringa imeri iretani (Is. 40:10). Biblia someni úrasïndi uandakuani jájki para uinhapikuani arhikuekani. Ísï jimbo, Isaiasiri uandakuechajtsïni miátantasïndi eska Jeoba Rei máeska enga uinhapitiika. Ióntki, Tata Diosï úraspti imeri uinhapikuani para jarhuataani ka kuájpiani imeri marhuarichani. Iásï, seguirixati uinhaperantaani ka kuájchakuani imechani engaksï imani mintsikajka (Deut. 1:30, 31; Is. 43:10). Jeobajtsïni méntkisï íntskusïndi uinhapikua, peru sánderu jiáni engajtsïni juchari enemiguecha no sési kámajka. Máru lugaricharisï, kʼuiripuechaksï jánguarhintaxati parachi nóteru aianhpinia o para juchari organisasioni nóteru jatsinia sésikua para ánchikuarhini. Peru engajtsïni ísï no sési kámajka, nójtsïni jukari uandanhiatasïndi. Jeobajtsïni aiachesïndi ambe ma engajtsïni uinhaperantajka ka engajtsïni jarhuatajka parachi seguru pʼikuarherani. Uandasïndi: “No ma arma enga únhaaka parakini no sési úcheni úati ísï úni” (Is. 54:17). w19.01 5, 6 párr. 12, 13

Juchachi no májkueni kueraanhaska eska animalicha, jimbochisï uétarhinchajka mítini Tata Diosïri ambe ka solu juchari Kuerajpirijtsïni uáti jorhendani imeri ambe (Mat. 4:4). Engachi kurhajchajka ambe engajtsïni arhijka, úsïngachi jatsini jánhaskakua, mímixekua ka felisinchi. Jeoba úsïndi eska chíti jakajkukua sánderu uinhapiti jauaka, úraparini imeri Karakatani ka “jántspiri[ni] enga mintsinharhikueka ka [enga jánhastika]” parajtsïni íntskuni informasioni enga Bibliarhu pʼitakateka (Mat. 24:45; Is. 65:13, 14). Ambe engakini Jeoba jorhendajka imeri ambe, uáti eskari jánhaskatiuaka ka eskari sési eratsiaka ka inde ambekini mámaru ambe jimbo kuájchakuati (Prov. 2:10-14). Por ejemplu, jarhuatatikini parari no jiókuarhini chkuanderakua ambe komu eska Tata Diosï no jarhaska o eska para úni felisini uétarhisïnga kánikua tumina ka jatsikuarhikua ambe jatsini. Ístukini jarhuataati parari no tsitini o úni imani ambe engakini no sési úchiaka. Ísï jimbo, jánguarhintsï xáni eskari uáka parari úni ísï jánhaskani eska Tata Diosï ka sésiri eratsini. w18.12 20 párr. 6, 7

I profesia uandasïndi eskachi xáni ióni irekaaka komueska “anhatapu ma”. Máru anhatapuechaksï úsïndi mili uéxurhinicha jimbo durarini. Kʼuiripuechachi uétarhinchapiringa no méni pʼamenchani parachi úni xáni ióni irekani. Ísï irekani eska Isaiasi na uandapka, úpirindi ísï xarharani komueska tsánharhikua ma. Pero no ísïsti. I profesia kumplirikuarhiati. Ju je eratsintani na engaksï iámindu i profesiecha xarhatajka eska jauaka paraisu ma sánderu orhepani. Tata Diosï újchakuraauati iámu parhakpini anapu kʼuiripuechani. No nema chérhiauati animalichani ni kʼuiripu no sési úrini. Imecha engaksï siegueka, kándini ka kojueni, tsinakuarhiatiksï. Kʼuiripuechaksï úkuarhiauati kʼumanchikuechani ka ikaraatiksï ambe ma enga áspiaka ka sési útspini. Kʼuiripuechaksï sánderu ióni irekaati eska anhatapuecha. Ísïsti, Biblia meru xarhatasïndi eskachi ísï irekaaka sánderu orhepani. Peru ¿ambechi mókuntapirini engajtsïni nema arhipiringa eskachi támisï kurhanguxaka ambe engaksï arhikuekajka i profesiaecha? ¿Andichisï uá jakajkuni eska paraisu ma jauaka Echerirhu? Achamasï enga desde iónisï sánderu mítikateka, íntskustijtsïni ambakiti rasoni ma (Luk. 23:43, TNM). w18.12 5 párr. 13-15.

Juchari eratsikua úsïndi mójtakurhini ka uákachi seguirini jarhani mójtakuni na engachi eratsijka. Ísïchi mójtakuaka juchari eratsikuani seguni ambe engachi jurajkuska eska niáraaka ka eska jima pakaraaka. Engachi imantku ambe eratsiska enga Tata Diosï uékajka, exeakachi eska sési jarhaska na enga ima eratsijka. Indeni ambe úparini, nochi úkua jukanchaaka ísï eratsini eska Jeoba. Ju je exeni eska para ménderueni eratsini, uétarhisïnga eskachi jurajkuakia ísï eratsini eska kʼuiripuecha. O sea, nochi jatsiska para kʼuiripuecheri eratsikua jiókuarhini enga méntku no terokuntajka Tata Diosïri eratsikua jingoni. I ambe kánikua jukaparhakuesti. Parachi kurhanguni andisï jukaparhakue, ju je jatsikuni ejemplu ma. Eranhaska je eska kʼuiripu ma enga uéjka kuidarini imeri kuerpuni, uénasïnga imani ambe arhani enga sési úkuaka. Peru ¿néna úpirini ísï úni enga seguirini japiringa imani ambe arhani enga nóteru marhuajkia? Májkueni, no ma ambe marhuauati engachi Tata Diosïri ambe eratsini jauaka, peru seguirini jarhani jiókuarhini kʼuiripuecheri eratsikuani. w18.11 21 párr. 14, 15

Ju je pauani pauani ísï irekani eska na terokuntajka jurhimbikua jingoni. Sési jónguarhitini jarhani jurhimbikuani komu sinturoni ma. Bibliaeri tiempuecha jimbo, soldaduechaksï sinturoni ma jónguarhisïrendi enga kuájchakuauenga guerrarhu. Peruksï jatsisïrendi para uinhamu jónguarhitini jarhani para úni marhuakuani. ¿Néna jimbo Bibliaeri jurhimbikua ambe ísïski komueska sinturoni ma? Engachi sési jónguarhitini jarhaska jurhimbikuani komueska sinturoni ma ochi no jurajkuni, kuájchakuatijtsïni chkuanderakua ambe jimbo ka jarhuatatijtsïni ambakiti ambe erakuni úni. Ka engachi tsʼéjkukua ma jatsiaka, uáti eskachi imani ambe erakuaka úni enga sési jaka. Soldadu ma no méni nipirindi guerrarhu ka no jónguarhini imeri sinturonini. Májkueni, juchajtuchi no méni jatsiska para chkerani o jurajkuni jurhimbikuani enga ísïka komueska sinturoni ma. Sánderu sési, ju je ísï úni eska na arhijka Biblia. w18.11 12 párr. 15

Para Tata Diosïri Karakateri ambe jorhenguarhini, uétarhisïndi kánikua jánguarhintani. Jatsiskachi para jurajkuni ambe enga xáni uétarhiaka. Ísï eska na uandapka ima enga Proberbiuechani karaapka, engachi na jorhenguarhiakia jurhimbikuani, jatsiskachi para jingontku jámani para no íntspikuarhini o jurajkuni. Ju je exeni ambe arhikuekasïni piáni jurhimbikuani ka jamberichi “ambe xáni” jatsia para úni parachi konseguirini. Asta engachi gratisi aiaminhajka ambe ma, jamberichi jatsiaka para úni o íntspini ambe ma. Ixú Proverbios 23:23 jimbo uandakua ebreu enga tradusirikuarhika “piá”, ístu uáti arhikuekani “pʼi” o “konseguiri”. Iámindu i uandakuechaksï arhikuekasïndi jatsini ambe ma, jánguarhintaparini o mójtakuni ambe ma jingoni enga jukaparhaka. Por ejemplu, ju je eranhaskani eska merkadu ma jimbo letreru ma arhisïnga eska fruta gratisiska. ¿Jandiajku niáraa fruta juchari mesarhu? Nómbe. Nájkiruka gratisika, jatsiskachi para jánguarhintani ka tiempu úrani parachi merkadurhu nirani ka konseguirini. Májkueni, parachi piáni jurhimbikuani nochi jatsiska para tumina íntspini, peru kʼóruchi jatsiska para úni ambe ma para konseguirini. w18.11 4 párr. 4, 5

Jesusi arhispti Pedruni, Santiagu ka Juanuni eskaksï pámbepiringa kʼéri juáta ma jimbo. Imechaksï jánhaskakua ma exespti enga ísku pakataapka. Jesusiri kanharhikua tʼintskaxapti ka imeri xukuparhakua meremerejkuxapti. Ka ísï xarharasïrendi enajki Moisesipi ka Eliasi engaksï uandontskuarheni japka Jesusi jingoni imeri uarhikueri ka tsíntskueri ambe (Luk. 9:29-32). Tátsekua, ójchakuraaspti nubi meremeresï ma ka jima uératini kurhakuarhispti Tata Diosïri uandakua. Ima jánhaskakua xarhataspti na enga kʼéri ambepiringa Jesusi ka uinhapikua jatsini jiáni enga reipiringia Tata Diosïri Reinueri jimbo. Seguru eska jarhuatapka ka uinhaperantani Jesusini para enga no sési kánhapiringa ka uándikunhani. Ístu, úspti eska imeri chúxapaticheri jakajkukua sánderu kʼépiringa ka íntsaaspti uinhapikua paraksï no méni jurajkuni jiáni engaksï tsʼéjkukuechani jatsiapiringa ka paraksï kʼéri ánchikuarhitani úni engaksï sánderu orhepani úpiringa. Ma treinta uéxurhinisï tátsekua, apostuli Pedru uandaspti ambe engaksï exepka jánhaskakua jimbo, inde ambe arhikuekasïndi eska útasï sési miáxapka (2 Ped. 1:16-18). w19.03 10 párr. 7, 8

¿Ambe jimboksï ménderueniski kristianu jurhimbiticha imecha jingoni engaksï relijioni no jurhimbitirhu jaka? Eskachi Tata Diosïri marhuaricha jurhimbitku uandantasïnga (Efesu 4:25). Nochi chkuanderasïnga kʼéri ni sapichu ambe ma jimbo, sino jurhimbitku ambechi eianguasïnga imechani engachi no mítiaka, ánchikuarhitarhu anapu kompanieruechani, amiguechani ka imechani engachi uékaajka. Engari tumbika o uátsïni, normalisti eskari uékaaka paraksï chíti kompanieruecha tʼungini jingoni kúnguarhini, peru asï méni tsimani jásï irekua pá. Komu familia jingoni ka kúnguarhikuarhu, ísï jámani enajkiri ambakiti kristianu máe, peruri kánikua ménderueni jámani engari máteru tumbicha o uátsïcha jingoni jarhajka engaksï no kristianueka o engari redesi sosiali ambe úrani jarhajka. Inde ambe jindesti puru chkuanderani jámani: chkuanderakuani tátichani, erachichani ka Tata Diosïni (Sal. 26:4, 5). Peru Jeoba mítisïndi engachi uandakuecha jingontku kʼéri ambe arhijka ka juchari mintsita iauani jarharitini jarhani (Mar. 7:6). Jimbosï sánderu sésiiti eskari uáka ambe enga i proberbiu arhijka: “Eska chíti mintsita no enbidiariuauaka pekadorichani; sánderu sési, chúskuta janhanharhi Jeobani” (Prov. 23:17). w18.10 9 párr. 14, 15

Tata Diosïri ireta familia espirituali máesti engaksï kánikua uékperajka (1 Juanu 4:21). Sáno méntkisï, inde uékperakua no solu jiáni xarharasïndi engachi jatsiaka para kuájchakuni nemani ambe ma jimbo, sino someni úkuecha jimbo engaksï sapichitu ambeka, komu uékperakua jingoni uandajpini ka sési kámpini. Engachi sési kaaska máteruechani ka kurhangukuani, ‘terokukuntasïngachi Diosïni komueska imeri uájpecha enga ima xáni uéajka’ (Efes. 5:1). Jesusi májkueni jámaspti eska imeri Táti. Méntkisï uékperakua jingoni kámaspti kʼuiripuni. Uandaspti: “Ju jejtsïni andarhierani cha engajtsï xáni kuatarajka ka mískuarhintsï, ka jíksïni mintsikuastaaka” ka ístu uandaspti: ‘Kaxumbitiska ka no teparakuarhini juchiti mintsitarhu’ (Mat. 11:28, 29). Engachi Jesusiri ejempluni seguirijka ka kurhangukuni “imani enga no xáni jatsikuarherika”, juchari Táti auandarhu anapu jaiapanhintasïndijtsïni ka felisisïngachi (Sal. 41:1). Ísï jimbo, engachi kurhangukuajka familiarhu anapuechani, kúnguarhikuarhu ka aianhpikuarhu, xarhatakuasïngachi uékperakua. w18.09 28 párr. 1, 2

Enga no sési ambe úkuarhijka, oportunidadi máesïndi paraksï Tata Diosïri marhuaricha ánchikuarhini Jeobani jingoni, jarhuatapariani erachichani imani ambe úparini engaksï uétarhinchani jauaka. Por ejemplu, úsïndiksï tumina íntspini para imecha engaksï no sési nitamanchaka (Juanu 13:34, 35; Uku. 11:27-30). Ístuksï uáti ánchikuarhini para limpiarini ka kʼumanchikuechani sési péntaani. Pirenchi ma jini Polonia anapu enga Gabriela arhinhajka, tsïtaspti imeri kʼumanchikuani iorhentpikua ma jimbo. Peru kánikua sési pʼikuarherantaspti engaksï nípka jarhuatani erachicha kúnguarhikuecheri engaksï jimajkisï japka. Gabriela uandantasïndi: “No uékasïnga ima amberi uandani engani tsïtaka, nochka solu jatsikuarhikua ambejkueskandi. Sánderu sési, ima amberi uékasïnga uandani na engani xáni andaka. Ambe engani nitamakuarhika, xarhatachestirini eska Jeobaeri kúnguarhikuarhu jarhani, kʼéri kóntperata máeska ka tsípikuarhita ma”. Uánikua erachicha engaksï jarhuajperata intsïnhaka enga no sési ambe úkuarhijka, uandasïndiksï eska ima jarhuajperata kánikua uinhaperantaaska. Ka ima engaksï Jeoba jingoni ánchikuarhijka jarhuatapariani máteruechani, kánikuaksï sési pʼikuarherasïndi (Uku. 20:35; 2 Kor. 9:6, 7). w18.08 26 párr. 12

Parachi úni kuájchakuni juchari mintsitani, jatsiskachi para sóntku exeni enga peligru ma jauaka ka jirejiresï úni ambe ma. Uandakua “kuájchaku”, kuárichantsïni miátantaasïndi engaksï rei Salomoniri jurhiatikuecha jimbo japka. Imechaksï bardecharhu karhakua jarhasïrendi paraksï iretani kuáni ka engaksï exenga peligru ma, jirejiresïksï uandantasïrendi. I ambejtsïni jarhuatasïndi kurhanguni ambe engachi jatsika para úni, parachi no imani ambe eratsini enga Satanasi uéjka. Ióntki, kuárichaksï jarhuataasïrendi imechani engaksï ireteri puertarhu jarhenga (2 Sam. 18:24-26). Májku kʼériksï kuájchakusïrendi iretani, sési míkaapariani puertechani enga enemigu ma jurhani japiringa (Neh. 7:1-3). Juchari konsiensia enga Biblia jimbo jorhendakata jaka, úati májkueni marhuani komueska kuári ma. ¿Néna? Jirejiresïjtsïni eianguparini enga Satanasi uékaaka támisï páni juchari mintsitani, o sea, enga jánguarhintaaka eskachi májkueni eratsiaka, pʼikuarheraaka, tsitini o úni ambe ma ísï eska ima. Méntkisï engajtsïni konsiensia peligru ma aianguni jauaka, jatsiskachi para kasu úkuni ka jánguarhintani eskachi xáni úaka para no úni imani ambe enga no sési jaka. w19.01 17 párr. 10, 11

Orhejtsïkutichaksï no jatsisti para jusgariuani tumbichani seguni eskaksï na exeauaka o iretarhu anapu pʼindekuecha jimbo, sino seguni eska Biblia na uandajka (2 Tim. 3:16, 17). Engaksï pʼindekuecha jimbo jupindaskuarhiska enbesi de Biblia jimbo, jamberiksï no rekomendariuajti erachichani engaksï kumpliriuajka rekisituechani paraksï orhejtsïkutiri jarhuajpirini o orhejtsïkutini. Paisi ma jimbo, ambakiti orhejtsïkutiri jarhuajpiri ma, kʼérati responsabilidadichani jatsiaspti kúnguarhikuarhu. Nájkirukaksï orhejtsïkuticha de akuerdu japka eska jánguarhintaxapka para kumpliriuani Bibliaeri rekisituechani para orhejtsïkuti máeni, nóksï rekomendarispti. Solu máru orhejtsïkuticha engaksï jatiripkia, inchandimixaptiksï eska ima erachi jukari sapichu xarharasïrenga para orhejtsïkutini. Ka nóksï rekomendarispti erachini solu imani ambe jimbojku na enga xarharenga, xáni no sési. Informichaksï xarhatasïndi eskaksï uánikua orhejtsïkuticha uápurisï anapuecha ísï eratsisïnga. Kánikua jukaparhakuesti eskachi Bibliarhu jupindaskuarhiaka ka no ambe engachi jucha eratsiaka. Solu ísï úparini, kurhajchaakachi Jesusini ka nóteruchi jusgarpiakia seguni eska na xarharaaka nema (Juanu 7:24). w18.08 12 párr. 16, 17

Jirejiresï axantaani korreu elektronikuechani ka mensajichani, peligru máesti. Máru lugaricha jimbo, nóchi úsïnga agustu eianhpini o asta meru nochi úni. Jamberi jimaksï juchari enemiguecha chkuanderakua ambe etsakujti parachi chéni ochi no mintsinharperani. Ju je eratsintani ambe enga úkuarhipka ióntki jini Unión Soviética. Polisia sekreta (ísï mítikata komu KGB) chkuanderakua ambe uandaspti, eskaksï uánikua erachicha engaksï kánikua mítikatepka, traisionariuaspkaksï Jeobaeri marhuarichani. Uánikuechaksï jakajkuspti ka jurajkusptiksï Tata Diosïri organisasionini. Uánikuaksï kʼuanhatsentaspti, peruksï máteruecha no méni kʼuanhatsentaspti, jimboka imecheri jakajkukua chkespka (1 Tim. 1:19). ¿Ambechi uá úni parachi no májkueni úkuarhinchani? Ju je no méni reenbiariuani notisiauechani engaksï no jurhimbitkueka o engaksï ísku jatini uandanhajka. Ju je no tontueni ni jakajkuni iámindu ambe engachi kurhajka. Ju je asegurarikuarhini de jatsini iámu informasioni. w18.08 5 párr. 8

Ióntki anapu karakatecha griegu jimbo, no méntkisï úrakuarhisïrendi koma. Ísï jimbo, ambe meru arhikuekaspi Jesusi: ¿sési jimbomindukinisï arhini jaka: iásï jíndini jingoniri jauaka paraisurhu?, o ¿sési jimbomindukinisï arhini jaka iásï: jíndini jingoniri jauaka paraisurhu? Ju je miántani tsimani ambe enga Jesusi antesi arhiapka imeri chúxapatichani: ‘Uájpa Achatiri echerirhu inchatsitini jauati tanimu jurhiatikua ka tanimu chúrikua’ (Mat. 12:40; 16:21; 17:22, 23; Mar. 10:34; Uku. 10:39, 40). Ísï jimbo, Jesusi no ma paraisurhu niraspti ima jurhiatikua enga ima ka no sési úri uarhipka. Biblia arhisïndi eska máru jurhiatikuecha jimbo, Jesusi sepulturarhu jarhaspka astaka Jeoba tsítantapka (Uku. 2:31, 32). Ima no sési úri no erakunhaspti para auandarhu nirani. Ima no mítispti eska Jesusi pakatperakua ma úspka imeri apostulicha jingoni paraksï auandarhu juramuni imani jingoni (Luk. 22:29). Ístu no itsï atakuarhitixapti (Juanu 3:3-6, 12). Ísï jimbo, Jesusi paraisuni masï arhikuekani japka ixú echerirhu enga sánderu orhepani jauaka. w18.12 6 párr. 17, 18, 20, 21

Israelitechaksï no ióndaspti beserru oruerini ma kómarhini. Mítitixaptiksï eska ini ambe jingoni, nóksï kurhajchaxapka Tata Diosïni, peruksï jandiajku enganiarikuarhispti ka eratsini eskaksï útasï Jeoba jingoni jarhaspka. Aaroni asta uandaspti eska kʼuínchikua máespka para Jeoba. Peru Tata Diosï kánikua no sési pʼikuarheraspti. Arhispti Moisesini eskaksï israelitecha no sési ambe úspka ka eskaksï nóteru seguirixapkia imani ambe úni enga Jeoba juramukuapka. Jeoba kánikua ikiaspti imecha jingoni ka asta eratsispti kʼamajkuani (Éx. 32:5-10). Komu Jeoba kánikua pʼamojpitiika, no kʼamajkuaspti israelitechani (Éx. 32:14). Nájkiruka Aaroni úpka beserruni, moantaspti ka lebitecha jingoni niáraspti engaksï xarhatapka eskaksï Jeoba jingoni jarhaspka. Imecha engaksï Jeobaeri parti jimbo japka aiaminhasptiksï eskaksï újchakuranhapiringa (Éx. 32:26-29). w18.07 20 párr. 13-16

¿Nénchi uékasïni eskajtsïni mítiaka? Nochi uékasïnga mítikateni parhakpinirhu komu eskuelarhu, negosiuecharhu ochi uékani famosueni. Sánderu sési, imani ambechisï uéjka enga Pablu uandapka: “Iásïjtsï mítiskia Diosïni, o paraksïni sánderu jurhimbitku arhini, Diosïksïni mítistia chánksïni. Jimajkani, ¿andijtsïsï kʼuanhatsintani jaki parajtsï janhanharhini uénani anapu jorhenguani enga débiliika ka enga nómindu marhuajka, ka engajtsï cha uékani jaka jántspikuni?” (Gal. 4:9). ¡Xáni kʼéri pribilejiu ma para jucha, niárani mítikateni Tata Diosïni jimbo, Juramuti iámindu amberi! Ima uékasïndi juchari amigueni. Ísï eska na uandapka kʼuiripu ma enga Bibliaeri ambe exejka, “imajtsïni niárasïndi jaiapanhintani ka kuidarini”. Engajtsïni Jeoba niárajka exeni komueska imeri amiguecha, niárasïngachi kumplirini ambe engachi jimbo kueraanhaka (Ecl. 12:13, 14). w18.07 7 párr.3; 8 párr. 4

Parajtsïni Jeobaeri leicha marhuachini, jatsiskachi para jukaparharaani ka kumpliriuani (Amós 5:15). Ma ambe engajtsïni jarhuataaka ísï úni, jindesti ísï exeni ambe ma eska Jeoba na exejka. Ju je eranhaskani eska sáni ióniskia engachi no újka sési kʼuíni. Doktorijtsïni arhisïndi eskachi dieta ma uáka, ejersisiu úni ka mójtakuni máru ambe engachi uénga. Engachi exejka eskajtsïni marhuachisïnga ima ambe engajtsïni doktori arhipka, ¿no ísïski eskachi jukaparharasïnga doktorini ka imeri konsejuechani? Májkuenisti Jeoba jingoni, juchari Kueraajpirijtsïni íntsaasti leichani engajtsïni kuájchakujka parachi no no sési ambe úkuarhinchani pekadu jimbo ka úni eskachi sési irekaaka. Por ejemplu, ju je eratsintani na engajtsïni xáni marhuachijka enga Biblia arhijka eskachi no jatsiska para chkuanderani, enganiarpini, sïpani, ísku jándikua ambe úni, uarhipeni ka sïkuamikua ambe úrani (Prov. 6:16-19; Jaŋ. 21:8). Engachi exejka na engajtsïni xáni marhuachijka kurhajchani Jeobani, juchari uékperakua engachi imani jimbo pʼikuarherajka ka imeri juramukuecha jimbo, sánderu kʼésïndi. w18.06 17 párr. 5, 6

Mientrasi enga juramukuarhu japka, ma ambe enga sánderu uandanhiatenga Pilatuni, jindespti eska problema ambe japiringa politikarhu. Ísï jimbo, jamberi chéni japti eska Jesusi úpiringa eskaksï kʼuiripuecha nóteru kurhajchapiringuia. Peru Jesusi arhispti: “Juchiti juramukua no ini parhakpini [anapuesti]” (Juanu 18:36). Jesusi no inchamukupirindi politikarhisï, jimboka imeri Reinu, auandarhu anapu gobiernu máepiringa. Ístu arhispti eska imeri ánchikuarhita ixú Parhakpinirhu jindespka “para uandantani ambe enga [jurhimbikueka]” (Juanu 18:37). Jesusi sési mítitixapti imani ánchikuarhitani enga úpiringa. Engachi juchajtu sési mítitini jaka imani ánchikuarhitani engachi jatsika para úni, nóchi jámaaka politika ambe apoiarini, ni sikiera indeni ambe eratsini jarhani. Inde ambe uáti úkua jukani. Sirkuitueri orhejtsïkuti ma uandasïndi: “Kʼuiripu i lugari anapu engachi jaka, sánhani arhixati jandiajku uékani juramukuarhini. Ísï pʼikuarherasïndi enajki imeri paisi sánderu ambakitii, ka uánikuaksï eratsisïndi eska politika ambe uáka ambakiti irekua ma íntsaani. Peru diosmeiamu Tata Diosïni, erachichaksï májku kʼéri jarhasti jimbokaksï eianhpixaka ambakiti ambe Reinueri. Mintsikasïndiksï eska Jeoba kʼamajkuaka no jurhimbikua ambe ka máteru problemechani engachi jatsiajka”. w18.06 4, 5 párr. 6, 7

“Tájpanharikpiti” solu tanimu libruecharhu Karakata Ebreaecheri jimbo jarhasti: 1 Crónicas, Job ka Zacarías. ¿Andisï Jeoba no kánikua informasioni íntspepi i enemigueri ante de Mesiasi jurhani? Jeoba no uánikua ambe uandantasïndi Satanasiri ambe ka ambe enga xáni újka, Karakata Ebreaecharhu. Rasoni sánderu kʼéri enga jimbo kararkuarhipka Karakata Ebreaechani, jindespti jarhuatani kʼuiripuni paraksï úni mítintani ka chúxapani Mesiasini (Luk. 24:44; Gal. 3:24). Enga Mesiasi janopkia, Jeoba imani úraspti ka imeri disipuluechani para uánikua ambe mítitarpini ambe engachi mítikia Satanasiri ambe ka espirituecheri engaksï imani jingoni úkuarhika. Ka inde ambe sési jarhasti, jimboka Jeoba Jesusini úraaka ka erakukatechani para kʼamajkuni Satanasini ka imeri chúxapatichani (Rom. 16:20; Jaŋ. 17:14; 20:10). Ju je miáni eska imeri uinhapikua límite ma jatsiska. Juchachi Jeobaeri jarhuajperata jatsiska, Jesusiri ka ambakiti ánjilicheri. Imecheri jarhuajperata jingoni, uákachi orhepani uérakuni Noambakitini. w18.05 22, 23 párr. 2-4

Para Jeoba exeni eskachi marhuakuxaka, jatsiskachi para jukani frutu (Mat. 13:23; 21:43). Ísï jimbo, ilustrasionirhu enga Juanu 15:1-5 jaka, jukani frutu no uáti arhikuekani disipulu uaani (Mat. 28:19). ¿Andi? Jimbokaksï ima erachicha engaksï jánguarhintajka eianhpini peru engaksï no nemani jarhuatakia para Jesusiri disipulueni, ísïpiringaksï eska ima ramecha engaksï no jukajka frutu. Peru i ambe no uáti ísïini, jimbokachi no uáka afuersa úni eska kʼuiripu Jesusiri disipulu úkuarhiaka. Ka ístu, Jeobajtsïni xénchasïndi ka nójtsïni méni no jaiapanhintapirindi jimbokachi no úska úni ambe ma enga difisilika para jucha. Imajtsïni no méni kurhachesïndi ambe ma engachi no uáka úni (Deut. 30:11-14). Jimajkani, ¿ambe arhikuekasïni ima frutu engachi jatsika para jukani? Jatsisti para jindeni ambe ma engachi iáminduecha uáka úni. ¿Náki ánchikuarhitajtsïni íntskuski? Eianhpini Reinueri ambe (Mat. 24:14). w18.05 14 párr. 8, 9

Pastoricha o saserdoticha, na uéjkiksï arhinhani iásï, parhakpinirhuksï jarhasti uánikua relijioniri orhejtsïkuticha engaksï no jurhimbitku jámajka. Májkueni eskaksï fariseuecha, nóksï jorhentpesïndi Tata Diosïri Karakateri “ambe enga ísïka” ka mójtakustiksï Jeobaeri jurhimbikua ambeni chkuanderakua ambe jingoni (Rom. 1:18, 25, TDU). Chkuanderakua ambeksï jorhentpesïndi, komu infiernueri ambe, eskachi alma ma jataska enga no uarhijka ka imani eratsikuani eska Tata Diosï jiókuarhisïnga imani kʼuiripuni enga omosexualika ka eska tataka ma uáka tataka ma jingoni tembuchani o nanaka ma nanaka ma jingoni. Politikuechajtuksï úrasïndi chkuanderakuani para kʼuiripuni enganiarini. Ma kʼéri chkuanderakua engaksï uandaaka no ióni jimbo, jindesti eskaksï iásï kʼóru konseguiriskia pínandikua ka seguridadi. Peru “jimajkaniminduksï no sési úkuarhinchaati”. Ju je no jurajkuni eskajtsïni enganiariuaka engaksï jánguarhintani jaka jískani na enga xáni no sési jaka parhakpini. Juchachi sési mítitixaka eska Jeobaeri “jurhiatikua ma repentkueuaka komueska ma kuárhukpiti enga chúrikua jimbo inchatspijka” (1 Tes. 5:1-4). w18.10 7, 8 párr. 6-8

Irekaxakachi jurhiatikuechani enga kánikua no sési jánhaskuarheka, jimbosï fásiliti eskachi kómu pʼikuarheraaka. Perujtsïni Jesusi uinhaperantasïndi ‘prínsipechani’ úrapariani, engaksï jindeka orhejtsïkuticha, tanto erakukatecha komu engaksï máteru karichicha jingoni kuenta úkuarhijka. I orhejtsïkutichaksï no ‘juramukuasïndi’ imeri ermanuechani, sánderu sési, jarhuataasïndiksï paraksï tsípini pʼikuarherani. Imajtsïni uékasïndi jarhuatani parachi felisiini ka nochi jurajkuni Jeobani (Is. 32:1, 2; 2 Kor. 1:24). Orhejtsïkutichaksï sési úsïndi engaksï májkueni újka eska apostuli Pablu. Ima arini ambe karakuaspti Tesalonika anapu kristianuechani engaksï no sési kánhenga: “Engaksïni xáni kánikua tsípijka exeni, jucha ísï pʼikuarherasïrenga enajkiksïni no solu eiangupirini Diosïri ambakiti eianhperakuani, sino asta juchari tsípikuanksï jamberi íntspini chánksïni jimbo, jimbokaksïni xáni mintsita jingoni uékasïnga” (1 Tes. 2:8). Pablu arhiaspti ambe enga iásï anapu tekstu uandajka para xarhatakuani Efesu anapu orhejtsïkutichani eska no solu uétarhisïnga uandakuecha jimbo uinhaperpintani. w18.04 21, 22 párr. 6-8

Engachi uéjka eskajtsïni i libertadi marhuachiaka, jatsiskachi para andarhientani Jeobani. I ambe arhikuekasïndi ambakiti pájperakua ma jatsini imani jingoni (2 Kor. 3:16). Engaksï israelitecha desierturhisï jámani japka, nóksï májkueni exesïrendi ambe ma eska Jeoba. Ísïspti komu enajki takusï ma ójchakurani japi imecheri mintsitani ka eratsikuani. Uékasïrendiksï úrani imani libertadini engaksï jatsipka nomasi paraksï úni ambe engaksï uékenga (Ebr. 3:8-10). Ima libertadi enga Jeobaeri espiritu íntspijka, no solu úsïndi eska ma libreuaka para nóteru jántspirinia. Ístu úsïndi eskachi nóteru jántspiriuakia pekadueri ni uarhikueri ka ni relijioni no jurhimbitiri ka ni imeri pʼindekuecheri. Ambe ma enga kʼuiripu no méni uáka úni (Rom. 6:23; 8:2). Xáni enga sésiika i jásï libertadi jatsini, jimboka asta ima uáka jatsini enga jántspirika o enga ónhakata jaka (Gén. 39:20-23). w18.04 9 párr. 3-5