Maiu

¿Ambeksï uá úni táticha paraksï jorhendaani sapiichani Jeobani xénchani? Kómarhini Jeobani eskaksïni jarhuataaka ísï eska Manoa na úpka. Ístu, jorhendaa je chári ejemplu jingoni. Táticha, kánikua jukaparhakuesti ambe engajtsï arhiajka chári sapiichani. Peru jamberi sánderu marhuakuauati ambe engajtsï újka. Uákachi seguru jarhani eskaksï Jose ka Maria ambakiti ejemplu íntsaaspka imecheri sapiichani, asta Jesusini. Jose no solu jánguarhintaspti kánikua ánchikuarhini para imeri familiani kéndani, sino ístu jarhuataaspti paraksï jukaparharani Jeobani kómarhini (Deut. 4: 9, 10). Ima “mándani uéxurhini” pásïrendi imeri familiani jini Jerusaleni paraksï Paskua úntani (Luk. 2:41, 42). Jamberi máru táticha engaksï Joseri jurhiakuecha jimbo irekapka, ísïksï exendi eska Jerusaleni nirani familia jingoni kánikua úkua jukaspka, iauanini ka kánikua tumina uétarhini. Peru Jose jukaparharasïrendi Tata Diosïri ambe ka jorhendaaspti uájpechani paraksï májkueni úni. Ístu Maria sési mítespti Karakateri ambe. Ísï jimbo, jorhendaapti imeri uandakuecha ka úkuecha jingoni paraksï sapiicha jukaparharani Tata Diosïri Karakatani. w19.12 24, 25 párr. 9-12

Ma ambe enga xarhatajka na engajtsïni xáni xénchajka Jeoba jindesti ambe enga úpka jiáni enga Adani nóteru kurhajchapkia. Imani ambe jimbo enga Adani úpka, ima ka imeri uájpechaksï nóteru úsptia Jeobaeri familia jingoni kuenta úkuarhini (Rom. 5:12). Peru Jeoba úspti ambe ma para Adaniri uájpechani jarhuataani. Nájkiruka Jeoba kastigaripka Adanini, erokuarhikua ma íntsaaspti imeri uájpechani. Jirejiresï aiatspespti eskaksï imecha engaksï kurhajchapiringa, úpiringaksï ménderu Jeobaeri familia jingoni kuenta úkuarhini (Gén. 3:15; Rom. 8:20, 21). Ka úspti ísï úni Jesusiri uarhikua jimbo, imeri uájpa enga xáni xénchajka. Enga ísï íntspipka Jesusini, xarhataspti na engajtsïni xáni xénchajka (Juanu 3:16). Ima jindesti sánderu ambakiti Táti engachi uáka jatsini. Kurhauasïndi juchari kómarhikuechani ka íntskusïndijtsïni ambe engachi uétarhinchajka parachi úni irekani ka parachi no méni jurajkuni imani. Jarhuatasïndijtsïni ka arhistachini. Ka ístu, ambakiti kóntperatechantsïni íntsauati sánderu orhepani. ¿A no eskajtsïni kánikua sési pʼikuastasïnga míteni eskajtsïni juchari Táti xénchasïnga ka pendienti jarhani juchantsïni jimbo? w20.02 6 párr. 16, 17; 7 párr. 20

¿Niáraskichi ménisï kánikua uandanhiani jarhani ambe ma jimbo? Jamberi jindeepti jimboka nema úska o uandani ambe ma engajtsïni no sési pʼikuastaka. O imani ambe jimbo engachi jucha mismu úka o uandani. Jamberichi pekadu ma úka ka uandanhiani jarhani eskajtsïni Jeoba no méni puáchentaaka. O ístu, jamberichi eratsejka eskachi ísï pʼikuarherasïnga jimbokachi no mintsikasïnga Jeobani jimbokachi no ambarhati kʼuiripueska. Joperu ju je exeani máru Bibliaeri ejempluechani. Ana enga profeta Samueliri amambepka, kánikua mintsikasïrendi Jeobani. Peru nájkiruka ísïpka, kánikua no sési pʼikuarherasïredi jimboka imeri kʼumanchikuarhu anapu ma kánikua no sési kámasïrenga (1 Sam. 1:7). Apostuli Pablujtu kʼéri jakajkukua ma jatsispti peru kánikua uandanhiasïrendi iápuru anapu kúnguarhikuechani jimbo (2 Kor. 11:28). Jeoba kánikua xénchasïrendi rei Dabidini jimboka ima kánikua mintsikasïrenga (Uku. 13:22). Peru nájkiruka ísïpka, niáraspti kánikua no sési pʼikuarherani imani pekaduecha jimbo enga uápka (Sal. 38:4). Iámindu imechani, Jeoba uinhaperantaaspti ka sési pʼikuastantaani. w20.02 20 párr. 1, 2

Aiakukuarheni, jindesti iámu mintsita jingoni kómarhini Jeobani eskajtsï cha marhuakuaka para méntkisï. Enga nema aiakukuarhejka Jeobani, nóteru irekasïndia para imajkumindu sino para Jeoba. Jiáni uératini, Jeobaerisïndia, inde ambe kʼéri kóntperata máesti (Rom. 14:8). Enga nema aiakukuarhejka Jeobani, arhisïndi eska jiáni uératini ambe enga sánderu jukaparhakueuaka, jindeuaka Jeobani marhuakuni ka no úni ambe enga ima kʼuiripu uéjka. Aiakukuarheni Tata Diosïni, kánikua jukaparhakua ambesti. Jeoba no afuersa uékasïndi eskachi ísï uáka, peru engachi na aiakukuarhejkia, ima erokuarhisïndi eskachi uáka ambe engachi aiakukia (Sal. 116:12, 14). Aiakukuarheni, ambe máesti engajtsï chájku mítejka ka Jeoba. Peru itsï atakuarhini, ambe máesti engajtsï uánikuechani japarini újka, sáno méntkisï jiáni úkuarhisïndi i ambe enga kʼéri tánguarhikua ma úkuarhijka. Jiáni engajtsï itsï atakuarhijka, xarhatasïngajtsï iáminduechani japarini eskajtsï aiakukuarheskia Jeobani. Ojtsï xarhatakuani jarhasïnga máteruechani eskajtsï iámu mintsita, eratsekua ka uinhapikua jingoni xénchasïnga Jeobani ka eskajtsï erakuskia marhuakuni para méntkisï (Mar. 12:30). w20.03 9 párr. 4, 5

Noambakiti úsïndi eska kʼuiripu úkua jukanchaaka míteni Jeobani. Engaksï na uarhipkia Jesusiri apostulicha, máru engaksï uandenga eskaksï kristianuespka uénasptiksï chkuanderakua ambe jorhentpini (Uku. 20:29, 30). Ima kʼuiripuechaksï sánhani arhispti úni eska no niárapiringa mítenhani néski Tata Diosï. Por ejemplu, nóteruksï úrasptia Bibliarhu imeri nombrini ka ísïksï úrani komu “Tata”, oksï máteru uandakuechani úraania. Indeni ambe jimbo, ima enga arhintenga Bibliani úkua jukanchasïrendi kurhanguni néspi Jeoba ka néspiksï máteru diosïcha enga Biblia uandaajka (1 Kor. 8:5). Úrasptiksï májku uandakua, “Tata”, paraksï Jeobani ka Jesusini arhikuekani, i ambe úspti eska úkua jukapiringa kurhanguni eska Tata Diosï ka imeri Uájpa no májkueniska ka eskaksï táchani jásï ánchikuarhita úsïnga (Juanu 17:3). Enga nóteru mítenhapkia jurhimbitku ambe, úspti eska uénapiringa jakajkunhani eskaksï tanimu kʼuiripuecha máechakua diosïska, ambe ma enga Biblia no jorhentpijka. Ini ambe jimbo, uánikuaksï eratsesïndi eska ma no uáka míteni Tata Diosïni ka eska no mítekuarhiska na enga jásï kʼuiripu máeka. ¡Í ambe kʼéri chkuanderakua máesti! (Uku. 17:27). w19.06 4 párr. 11

Ma ambe engachi uáka úni para sánderu sési úni juchari ánchikuarhitani aianhpikuarhu, jindeesti sánderu jorhenguarhini para sési jorhentpini. (Prov. 1:5; 1 Tim. 4:13, 15). Kʼéri kóntperata máesti engajtsïni Jeoba jurajkujka parachi jindeeni imeri “jarhuajpiricha” (1 Kor. 3:9). Engachi asegurarikuarhijka imani amberi “enga sánderu ámbakitika [o jukaparhakueni]” ka orhetachi peerani aianhpikuani, tsípikua jingonchi marhuakusïnga Jeobani (Filip. 1:10; Sal. 100:2). Tata Diosïri marhuarichachi seguru jarhaska eskajtsïni ima íntskuaka uinhapikua engachi uétarhinchajka parachi sési úni juchari ánchikuarhitani aianhpikuarhu, no arhiparini náki uéjkichi problema ma jatsini o máteru ambe (2 Kor. 4:1, 7; 6:4). Ia sea engachi újka kánikua tiempu úrani para aianhpini o sánititu, marhuakuni Tata Diosïni iámindu mintsita jingoni, úsïndi eskachi sési pʼikuarheraaka (Gal. 6:4). Engachi jánguarhintajka sési úni juchari ánchikuarhitani aianhpikuarhu, xarhatasïngachi eskachi xénchasïnga Jeobani ka kʼuiripuni. Ka Biblia arini ambe uandasïndi eska niáraaka úkuarhini: “Jimboka engari ísï úska, tʼu mismu pʼímutantskateaka, ka ístu imecha engaksïni kurhajchaaka” (1 Tim. 4:16). w19.04 7 párr. 15; 17

Ma ambe enga Noambakiti ka demoniuechaksï sánderu úrajka para kʼuiripuni támisï páni, jindeesti sïkuamikueri ambe. Imecha engaksï ini ambe úrajka, uandasïndiksï eskaksï míteska ka únksï kámani imani ambe engaksï máteru kʼuiripuecha no újka míteni ni kámani. Por ejemplu, máruksï uandasïndi eskaksï meru úsïnga exeni ambe enga úkuarhiaka sánderu orhepani, jimbokaksï úraasïnga oroskopuechani o adibinasioni. Máteruksï jamberi ísï újti enajkiksï uarhiricha jingoni uandontskuarhejki. Ka jarhastiksï máteruecha engaksï sïkuamikua o majia ambe úrajka ka jamberiksï úni ka uandani ambe ma para sïkuani máteruechani. Enkuesta ma únhaspti 18 paisicha jimbo engaksï America Latina jaka ka Caribe, nani enga tanimu kʼuiripuecheri,ma kʼuiripu jakajkujka majiaeri ambe ka sïkuamikueri ambe ka sáno iáminduechaksï jakajkusïrendi eska nema úsïnga uandontskuarheni espirituecha jingoni. Máteru enkuesta jimbo engaksï 18 paisicha jimbo úpka jini África, jukari terujkani engaksï kurhamarhinhapka, jakajkusïrendiksï sïkuamikueri ambe. Ísïsti, no arhiparini nani uéjkichi irekani, jatsiskachi para kuájchakukuarhini. w19.04 20, 21 párr. 3, 4

Jeoba kurhunhisïndi iámindu no sési jásï ambe (Sal. 5:4-6). Ísï jimbo, kurhunhisïndi engaksï sapiicha ísku ambe ma úminhajka, ambe ma enga kánikua no sési jásï ambeka ka ikichakueni jásïini. Májkueni eska Jeoba, imeri Testiguechachi kánikua no sési exesïnga engaksï sapini ma ísku ambe ma úkujka ka méntkuchi no sáni uékasïnga eska inde ambe úkuarhiaka kúnguarhikuarhu (Rom. 12:9). Ísku ambe ma úkuni sapini ma meru no sáni terukuntasïndi “Kristueri mandamientu” jingoni, enga jindeeka ambe enga Jesusi jorhentpika uandakuecha ka úkuecha jingoni (Gal. 6:2). Kristueri mandamientu uékperakua jimbo uaxastakata jarhasti ka úsïndi eska iámindu ambe jurhimbitku úkuarhiaka. Jimbokachi ambakiti kristianuecha kumplirisïnga ini leini, ísïchi kaasïnga sapiichani engaksï niárajka seguru pʼikuarherani ka eskaksï meru xénchanhasïnga. Peru ima enga ísku ambe ma úkujka sapini ma, méntku no sáni pʼamojpisïndi ka no ambakiti kʼuiripu máeni enga újka eska sapi no seguru pʼikuarheraaka ka eratseni eska no nema xénchasïnga. Astaksï ambakiti kristianuecha no sési nitamakuarhisïndi ini ambe jimbo, xáni no sési. ¿Andi? Jimbokaksï ini jurhiatikuecha jimbo uánikua jarhaska “engaksï malueka” ka máru i járhati kʼuiripuechaksï uékaati kúnguarhikuarhu jarhani (2 Tim. 3:13). Ka, máru engaksï uandajka eskaksï tánguarhisïnga juchantsïni jingoni, jurajkutakuarhistiksï para ikichakueni jásï ambe úni ka niáranksï no sési úkuni sapini ma relasioni seksuali ambe niátaparini. w19.05 8 párr. 1-3

Ima enga kómu pʼikuarherani jaka, jamberi ísï pʼikuarherajti eska no jukanchaska para kómarhini Jeobani. Engachi uéjka jarhuatani, ju je imani jingoni kómarhini, úraparini imeri nombrini. Ju je arhini Jeobani na engachi xáni xénchajka jucha ka ístu kúnguarhikuarhu anapuecha imani enga no sési pʼikuarherani jaka. Ka kurhakunchi eska jarhuataaka imeri marhuarini sési pʼikuarherantani ka uinhaperantani. Ísï kómarhini Jeobani, uáti kánikua uinhaperantani. Ju je orheta eratseni antede uandani. No eratseparini uandani no sési pʼikuastpisïndi, peru uékperakua jingoni uandani, sési pʼikuastpintasïndi (Prov. 12:18). Ísï jimbo, ju je kómarhini Jeobani eskajtsïni jarhuataaka ambakiti ambe arhiani imechani engaksï no sési pʼikuarherani jaka paraksï sési pʼikuarherantani ka nóteruksï xáni uandanhiania. Ju je miáni eska ambe enga sánderu mintsitarhu niárakuauaka, jindeeska Biblia, jimboka Jeobaeriska (Ebr. 4:12). Engachi uinhaperantaajka máteruechani, miátantaasïngachi eska Jeoba Tata Diosï máeska enga uékpijka. Ka nóchi méni jatsiska para mirikurhini eska ístu jindeeska Tata Diosï ma enga jurhimbitku újka ambe ma. Ima exesïndi enga kʼuiripu ma ísku ambe ma úkujka nemani. Iámindu ambe exesïndi, ka asegurarikuarhisïndi eska kastigarinhaaka ima enga ísku ambe ma útspijka ka no móantani (Núm. 14:18). w19.05 18 párr. 18; 19 párr. 19, 21

Noambakiti uékasïndi eskachi no kurhajchaaka Jeobani. Jimbosï uékajti eskachi ménderueni eratseaka. Meru jánguarhintasïndi parachi ísï eratseni eska ima na uéjka. Úrasïndi imani ambe engachi jucha tsitijka parajtsïni támisï jánhastani ka úni eskachi imani ambe uáka enga ima uéjka (Kol. 2:4). ¿Meru kánikua no sésiski eskajtsïni Noambakiti támisï jánhastaaka? Jo, kánikua no sésisti. Ju je miáni eska ambe enga Pablu karapka Kolosasi 2:8 jimbo, no jindeespka para imecha engaksï no kristianuepka, sino para imecha engaksï espiritu santu jimbo erakunhapka (Kol. 1:2, 5). Imani jurhiatikuecha jimbo, imechaksï úpirindi no sési ambe úkuarhinchani, ka sánderia jucha ini jurhiatikuecha jimbo (1 Kor. 10:12). ¿Andi? Jimboka Noambakiti Echerirhu kʼuanijpanhaska ka ima uékasïndi támisï paani Tata Diosïri ambakiti marhuarichani (Jaŋ. 12:9, 12, 17). Ístu, irekaxakachi ini tiempu jimbo enga kʼuiripu no sési úri “sánderu ka sánderu no sési jáma[ni]” jaka (2 Tim. 3:1, 13). w19.06 2 párr. 1, 2

Enga reina Jesabeli arhipka eska uandikupiringa, Eliasi chéspti. Ísï jimbo, Beer-seba niraspti sïpakuarhini. Xáni no sési pʼikuarheraxapti enga uékenga uarhini. ¿Andisï ísï pʼikuarherapi? Jimboka kʼuiripu máespka enga no perfektuepka “enga májku jásïpka eska jucha” (Sant. 5:17). Jamberi niárapti kánikua uandanhiani jimboka méntku eratsexapka ambe ma ka kuataratini jarhani. Peeka niárapka eratseni eska no ma ambe marhuaspka ambe enga xáni úpka kómarhikua jurhimbiti jimbo, eska Israeli májkueni jánhaskuarhixapka ka eska imaterkusï marhuakuni japkia Jeobani (1 Rey. 18:3, 4, 13; 19:10, 14). Jeoba kurhangukusïrendi ka no xukaspti Eliasini enga aiangupka na enga pʼikuarherenga, sánderu sési, jarhuataspti para ménderu uinhapikua jatsini (1 Rey. 19:5-7). Tátsekua, uékperakua jingoni jurhimberantaspti, xarhatakuparini na enga xáni uinhapika Jeoba. Ístu, aianguspti eskaksï 7.000 israelitecha jarhaspka engaksï no kómarhienga Baalini (1 Rey. 19:11-18). Jeoba xarhatakuspti Eliasini eska xénchasïrenga. w19.06 15, 16 párr. 5, 6

Ju je méntkisï ísï úni ambe engachi arhinhaaka. Engachi ísï úska ambe engajtsïni arhiaka erachicha engaksï orhejtsïkujka ka mintsinharhikueni, nóchi jatsiauaka uandanhiatechani. Ju je exeni ejemplu ma. Paisi ma jimbo engachi no újka úni juchari ánchikuarhitani, erachichaksï arhinhaspti eskaksï no íntspiapiringa publikasionichani aianhpikuarhu. Peru prekursori ma eratsespti eska ima sánderu sési mítespka úni ambe ka no kasu úspti ambe enga arhinhapka. ¿Ambe úkuarhispi? Ma jurhiani engaksï xanharu ísï aianhpini japka, polisia kurhamarhikua úkuaspi imani ka máteru erachichani. Peekaksï gobiernueri ánchikuarhiricha chúxapaapka ka iámindu publikasionichanksï kaaxapti engaksï imecha íntspiapka. ¿Ambechi jorhenguarhisïni? Eskachi jatsiska para úni ambe engachi arhinhaaka, nájkirukachi eratseaka eskachi jucha sánderu sési míteska úni ambe ma. Jeobajtsïni újchakuraati engachi méntkisï kurhajchaaska imani erachichani enga ima erakuaka parajtsïni orhejtsïkuni (Ebr. 13:7, 17). w19.07 12 párr. 17

Ima chúrikua antede uarhini, Tata Jesukristu uandaspti eskaksï kʼuiripuecha kurhunhiapiringa iámindu imechani engaksï uékapiringa imeri chúxapatiini (Juanu 17:14). Jiáni uératini, imecha engaksï no kómarhijka Jeobani, no sésiksï kaasïndi ambakiti kristianuechani. Ka niáraati jurhiatikua engachi sánderu no sési kánhaaka enga sánderu axuterku jauakia para i parhakpini kʼamajkunhani (Mat. 24:9). Parachi listu jarhani jiáni engachi no sési kánhaaka, ¿ambechi jatsiski para úni iásï? Nóchi jatsiska para iámindu ambe eranhaskani ambe engachi xáni uáka nitamakuarhini. Engachi inde ambe eratsepiringa, jamberichi niárapiringa nóteru marhuakunia Jeobani, asta antedechi meru tsʼéjkukua ma jatsini, jimbokachi niárapiringa xáni chéni ka uandanhiani (Prov. 12:25; 17:22). “Ikiatspiti enga jindeeka Noambakiti”, jánguarhintasïndi parajtsïni chérani, jimboka i ambe kánikua marhuakusïnga (1 Ped. 5:8, 9). Jimbosï xáni jukaparhakueti eskachi desde iásï uénaaka jánguarhintani sánderu ambakiti pájperakua ma jatsini Tata Diosï jingoni. w19.07 2 párr. 1-3

Apostulichaksï kánikua tsípini japti engaksï tánguarhintapka terujkanikuarhu juáta ma jimbo. Enga Jesusi tsíntapkia arhiaspti eskaksï jima exejperantapiringa imani jingoni (Mat. 28:16). Jamberi jiánipti enga xarhakuapka jukari “kinientosi ermanuechani engaksï májku japka” (1 Kor. 15:6). ¿Andisï Jesusi úpi indeni tánguarhikuani? Para arini ambakiti ánchikuarhita íntsaani imeri chúxapatichani: “Ísï jimbo ni je ka iámindu iretechani jorhenguarhiri uá je” (Mat. 28:18-20, TDU). Imecha engaksï kurhajchapka Jesusini, niárasptiksï kúnguarhikua jingoni kuenta úkuarhini primeru siglurhu. Ambe engaksï orheta jatsipka para úni, jindeespti eskaksï jarhuataapiringa máteruechani paraksï Kristueri chúxapatiini. Ini jurhiatikuecha jimbo, uánikua kúnguarhikuechaksï jarhasti interu parhakpinirhu engaksï jurhimbiti kristianuecherika ka seguirixatiksï úni indeni ánchikuarhitani enga xáni jukaparhakueka. w19.07 14 párr. 1, 2

Noruega anapu erachi ma enga sirkuitueri orhejtsïkutika uandasïndi eska imecha engaksï no uéjka Tata Diosïri ambe uandontskuarheni, sáno méntkisïksï imeri ambe uékasïnga uandani enga parhakpinirhu úkuarhini jaka. Enga erachi na saludarijkia kʼuiripuni, kurhamarhisïndi: “¿Exesïntsï eska sánderu orhepani sési jánhaskuarhintaaka? ¿Ne uá ísï úni? ¿Politikuecha, sientifikuecha o máteru nema?”. Enga kurhajchaajkia, arhintasïndi o uandani karakata ma enga imani xáni sési jásï amberi uandajka enga sánderu orhepani úkuarhiaka. Máruksï kánikua tsitisïndi kurhaani aiatsperakuani eska Echeri no kʼamajkunhaaka ka eskaksï ambakiti kʼuiripuecha irekaaka ixú para méntkisï (Sal. 37:29). Sésichi úsïnga engachi no májkueni uénajka uandontskuarheni iáminduecha jingoni. Ambe enga ma kʼuiripu tsitipiringa kurhaani, máteru no uékapirindi. Máruksï uékasïndi uandontskuarheni Tata Diosïri ambe o Bibliaeri. Peruksï máteruecha uékasïndi Bibliaeri ambe kurhaani engachi orheta máteru amberi uandontskuarhekuajka. No arhiparini na engachi uénaaka uandontskuarheni, jatsiskachi para jánguarhintani iáminduechani predikarikuani (Rom. 1:14-16). Ka nóchi méni mirikurhiaka eska Jeobasï újka eska imecha engaksï uéjka jurhimbikuani, mintsitarhu niárakuauaka ima ambe enga ísïka (1 Kor. 3:6, 7). w19.07 22, 23 párr. 10, 11

Na engajtsïni xáni xénchajka Tata Diosï, úsïndi eskachi xénchauaka erachichani (1 Juanu 4:20, 21). Jamberichi eratsejka eskachi no úkua jukanchaaka uékaani erachichani jimbokachi Jeobanisï marhuakuni jaka ka jánguarhintasïngachi ísïni eska ima. Ístu, májkuenchi úsïnga eska Jesusi, engajtsïni xáni uékani íntspika imeri tsípikuani juchantsïni jimbo. Peruchi ménisï kánikua úkua jukanchasïnga uékperani máteru ka máteruni jingoni. Ebodia ka Síntiki tsimani pirenchichesptiksï engaksï májku kʼéri marhuapka apostuli Pablu jingoni. Peru jamberiksï arhijperapti ambe ma, jimboksïsï nóteru sési pájperendia. Pablu nombri jimbo arhiasïndi imeri kartarhu ka ambakiti konseju ma íntsaasïndi. Arhiaspti eskaksï májku ambe eratsepiringa (Filip. 4:2, 3). Ístu, apostuli exespti eska uétarhisïrenga arini ambe arhiani iámindu kúnguarhikuarhu anapuechani: “Ú je iámindu ambe nómbe uandauandamiparini ka níjtu arhijperaparini” (Filip. 2:14). w19.08 9 párr. 6, 7

Jarhastiksï uánikua kúnguarhikuecha ka ístu mándani arhini erachicha engaksï jánguarhintajka jarhuataani imechani engaksï tiempu kompletueri marhuani jaka paraksï seguirini ísï úni. Por ejemplu, arhiasïndiksï eskaksï seguiriuaka marhuani nani engaksï jaka, tuminaksï íntsaasïndi o máteru ambe engaksï imecha uétarhinchajka, oksï kuidariuani imecheri familiarichani. ¿Ambechi uá úni enga juchari kúnguarhikuarhu niáraska nema enga tiempu kompletueri marhuani japka? Ju je no eratseni eska iásï máteru ánchikuarhita intsïnhaskia jimboka no sési úska imeri ánchikuarhitani enga antesi uénga o eska no sési ambe niátaska. Sánderu sési, uákachi jarhuatani para no xáni úkua jukanchani pʼindeni. Ju je uékperakua jingoni erokani ka sési jásï ambe arhini iámindu ánchikuarhita jimbo enga úka, nájkiruka iásï nóteru xáni uákia jarhuajpeni imeri pʼamenchakua jimbo. Ístuchi jánguarhintani sánderu sési míteni. Ju je jorhenguarhini iámindu ambe enga ima xáni míteka, arhistaminhaka ka na enga xáni sési jorhenaka úni ambe ma. Uénani jámani, jamberi erachi uétarhinchaati jarhuajperata para exeni nani irekaa, néna uá nirani nani, ambe ánchikuarhia ka máteru ambe enga meru uétarhijka. w19.08 23, 24 párr. 12, 13

Gog kʼuiripuechani mintsinharhiauati engaksï jindeeka ejersiturhu anapuecha (2 Crón. 32:8). Peruchi jucha Tata Diosï Jeobani mintsinharhiaka. Kʼuiripuechaksï ini ambe ísï exeati eska no marhuauaka, jimboka Kʼéri Babiloniani, enga uinhapikua jatsipka, imeri diosïchaksï no jarhuataspka enga ‘animali’ ka “diesi sïuanguecha” no sési kámapka (Jaŋ. 17:16). Gog eratseati eska fásiliuaka andani. Ísï uékaati no sési úkuni Jeobaeri iretani komueska nubecha engaksï paisini ma ónharhikujka. Peru sóntku kuenta íntskukuarhiati eska trampa máeska. Ísï eska faraoni na úkuarhinchapka mari Charhapitirhu, kuenta íntskukuarhiati eska Jeobani jingonisï uarhipeni jaka (Éx. 14:1-4; Ezeq. 38:3, 4, 18, 21-23). Kristu ka imeri ánjelichaksï kuájpiauati Tata Diosïri marhuarichani ka kʼamajkuauatiksï iámindu imechani engaksï xáni Gog jingoni jaka (Jaŋ. 19:11, 14, 15). ¿Ka ambe úkuarhia Jeobaeri sánderu kʼéri ikiatspiti jingoni enga jindeeka Noambakiti enga chkuanderakua ambe jingoni úka eskaksï kʼuiripuecha Armajedonirhu jamberi niárapiringa? Jesusi kʼuaninhaati Noambakitini ka demoniuechani kʼéri posurhu ma enga kánikua jauanhika, nani engaksï mili uéxurhini ónhakata jauaka (Jaŋ. 20:1-3). w19.09 11, 12 párr. 14, 15

No no sési jarhasti engachi uékani jakaia eska úkuarhiaka ambe enga Tata Diosï aiatspika. Jo, juchajtuchi uáka nóteru xáni jánguarhintania engachi ísï exejka enajki ióndani jaki kumplirikuarhini ima ambe engachi erokuarhini jaka. Asta jamberichi uáka chkeni (Prov. 13:12). I ambe úkuarhispti uéxurhinisï 1914. Imani jurhiatikuecha jimbo, uánikua erachicha engaksï erakukatepka erokuarhixaptiksï auandarhu nirani indeni uéxurhini jimbo. ¿Ambeksï úspi ambakiti erachicha enga no ísï úkuarhipka ambe engaksï erokuarhini japka? Imechaksï seguirispti karrerarhu enga tsípikuarhu pájpijka, jimbokaksï uékasïrenga méntkisï marhuakuni Jeobani ka no jimbokaksï uékenga andani ambe ma. Eratsitixaptiksï tekaantskua jingoni marhuani. Meruchi uékaxakaia exeni enga Jeoba pímbinhajkuntaaka imeri nombrini ka xarhatani eska imajkusï újka sési juramuni ka eska kumpliriuaka iámindu ambe enga aiatspeka. Uákachi seguru jarhani eska iámindu ambe úkuarhiaka jiáni enga Jeoba exerini jakaia. Enga jamberi ísï úkuarhiaka, ju je seguirini marhuakuni Jeobani ka no méni jurajkuni eskachi chkeaka o nóteru májkueni jánguarhintania jimbokachi ísï exesïnga enajki ióndani jaki kumplirikuarhini ambe engachi erokuarhini jaka. w19.08 4, 5 párr. 9, 10

Ju je kurhamarhikuarhini: “¿Ísï mítenhaski komueska kʼuiripu ma enga no sóntku ikiajka ka kaxumbitiini? ¿Uékaa imani ánchikuarhita ambe úni enga no xáni kʼéri ambeka parani máteruechani jarhuataani? ¿Sési kaasïni kʼuiripuechani?”. Jesusi úspti eskaksï imeri chúxapaticha pínandikua jatsipiringa ka sésiksï pʼikuarherani ka ima tsípikua jingoni jorhendaasïrendi (Luk. 10:1, 19-21). Úspti eskaksï imeri chúxapaticha kurhamarhipiringa ambe ka jingontku kurhajchaasïrendi ambe engaksï uandenga (Mat. 16:13-16). Ísï eskaksï plantecha na ójchakuranhajka para no ataani iauakua ka únksï fruta jukani, Jesusi májkueni úspti imeri chúxapaticha jingoni, imechaksï jorhenguarhispti ambe enga Jesusi arhistakuapka ka ambakiti ambeksï úspti. Engachi jatsika sésikua para juramukuani máteruechani, ju je kurhamarhikuarhini: “¿Néna kaasïni ánchikuarhitarhu o kʼumanchikuarhu anapuechani? ¿Úsïni eskaksï iáminduecha sési pʼikuarheraaka? ¿Úsïni eskajtsïni máteruecha kurhamarhiaka ambe ma? ¿Listu jarhasïni parani kurhajchaani ambe engaksï uandajka?”. Ju je no méni ísïni eskaksï fariseuecha, engaksï ikiauenga enga nema kurhamarhiapiringa ambe ma ka no sésiksï kaani imechani engaksï méntku máteru ambe uandenga eska imecha (Mar. 3:1-6; Juanu 9:29-34). w19.09 20 párr. 1; 21 párr. 9; 23 párr. 10, 11

Parhakpini anapu juramutichaksï ménisï úrasïndi indeni uandakuani paraksï arhikuekani eskaksï jánguarhintaxaka sánderu sési pájperani iámindu paisicha jingoni. Peru enga Biblia arhijka eska uandanhaaka “pínandisti ka sésichi nitamaxaka”, no májkueniuati. ¿Andi? Jimboka enga indeni ambe uandanhaaka, uánikua kʼuiripu eratseati eskaksï juramuticha iásï kʼóru úskia paraksï kʼuiripuecha sánderu seguru irekani echerirhu. Peru no ísïuati, sino jimajkaniminduksïsï no sési úkuarhinchaati (Mat. 24:21). Peru jarhasti máru ambe engachi no míteka, ambe uá eskaksï juramuticha indeni ambe uandaaka. Ístuchi no míteska sinksï ma ambejku aianhpia o uánikua ambe. Néna uéjkiini, jarhasti ambe ma engachi kʼóru míteka: eskachi no jatsiska para indeni ambe jakajkuni ka eratseni eskaksï juramuticha uáka para interu parhakpinirhu pínandikua jarhani. Sánderu sési, inde ambe xarhataati eska Jeobaeri jurhiatikua uénakuarhiakia (1 Tes. 5:2). w19.10 8, 9 párr. 3, 4

Armajedoni jimbo méntku kʼamajkunhaati i parhakpini. Peruchi no jatsiska para chéni, jimboka Tata Diosïsï uarhipeaka (Prov. 1:33; Ezeq. 38:18-20; Zac. 14:3). Na enga jatini Jeoba uandaaka, Jesusi orhejtsïkuati uarhiperakuani. Jesusi jingonksï jauati erakukatecha engaksï tsíntaakia ka uánikua ánjelicha. Iáminduechaksï májku kʼéri uarhiperaati Noambakiti ka demoniuecha jingoni ka ístu uánikua kʼuiripu parhakpinirhu anapuecha jingoni (Jaŋ. 6:2; 17:14). Jeobajtsïni arini ambe aiachesïndi: “No ma arma enga únhaaka parakini no sési úcheni úati ísï úni” (Is. 54:17). ‘Uánikua kʼuiripuecha’ engaksï Tata Diosïri marhuarika, tsípitiksï pakaraati kʼéri mískuarhitarhu ka seguiriuatiksï marhuakuni Tata Diosïni (Jaŋ. 7:9, 13-17). ¿No ísïski eskajtsïni Biblia uánikua ambe aiangusïnga parachi úni mintsikani ambe enga úkuarhiaka sánderu orhepani? Míteskachi eska ‘Jeoba kuájchakuasïnga imechani engaksï méntkisï marhuakujka’ (Sal. 31:23). Iáminduecha engachi xénchajka ka kʼéri ambe arhini Jeobani kánikuachi tsípikua jingoni irekaaka enga Tata Diosï pímbinhajkuntaakia imeri nombrini (Ezeq. 38:23). w19.10 18, 19 párr. 17, 18

Jamberichi sánderu no sési ambe nitamakuarhiaka engaksï ‘últimu jurhiatikuecha’ kʼamakurhini jauakia (2 Tim. 3:1). Por ejemplu, paisi ma jimbo enga África jaka, uarhiperanhaspti enga na jimbanhi juramuti ma japkia. Jukari seisi kutsï jimboksï kánikua no sési nitamakuarhispti erachicha ka pirenchicha engaksï no úpka imani lugari jimbo uéakuntani. ¿Ambe jarhuataaspi jiáni enga xáni no sési ambe úkuarhini japka? Máruksï máteru erachicheri kʼumanchikuarhu niraspti pakarani, nani engaksï úpiringa sánderu sési kuájchakukata jarhani. Erachi ma uandaspti: “Enga inde ambe úkuarhini japka, kánikua sési pʼikuarheraspka jimbokani amiguecha jingoni jarhaspka. Iáminduechachi uinhaperperantasïrenga”. Enga kʼéri mískuarhita uénakuarhiaka, sésichi pʼikuarheraaka jatsiani amiguechani engajtsïni uékaaka (Jaŋ. 7:14). Jimbosï xáni jukaparhakueti eskachi jatsiauaka ambakiti amiguechani iásï ( 1 Ped. 4:7, 8). ¿Andi? Jimbokaksï juchari ikiatspiticha jánguarhintaaka parachi no májku kʼéri jarhani úraparinksï mámaru jásï chkuanderakua ambe. Jánguarhintaatiksï parachi no jarhuajperani ni eskachi mintsikperaaka. Peruksï no uáti ísï úni. Nóksï uáti úni eskachi nóteru xénchperaakia juchari erachicha ka pirenchicha jingoni. Ambe uéjkiksï úni, nójtsïni uáti jarharitani juchari amiguechani jingoni. w19.11 2 párr. 1, 2; 7 párr. 19

Noambakiti enga jindeeka “táti jémba chkuaderaricheri”, imechani úraasïndi enga imeri jájki jimbo jatsiaka paraksï chkuanderakua ambe uandani Jeobaeri ka juchari erachicheri ambe (Juanu 8:44). Por ejemplu, apostatechaksï úrasïndi Internetini, telebisioni o máteru ambe paraksï chkuanderakua ambe uandani Jeobaeri kúnguarhikueri. Íksï chkuanderakuecha ístu jindesti Noambakitiri ‘lansecha engaksï chpiririka’. ¿Ambechi jatsiski para úni engajtsïni nema uénaska chkuanderakua ambe aianguni? Nóchi jatsiska para indeni ambe kurhaani. ¿Andi? Jimbokachi mintsikasïnga Jeobani ka juchari erachichani. Nóchi jatsiska para apostatecheri ambe exeni o kurhaani. Ju je no jurajkuni eska nema o ambe ma uáka parachi uékani imecha jingoni uandontskuarheni, ni sikiera para sáni ambe míteni imecheri ambe ni parachi nóteru xáni mintsikania Tata Diosïni. ¿Úspijtsï no kurhajchani apostatecheri chkuanderakuechani ni uandontskuarheni imecha jingoni? Kánikuajtsï sési úska. Peruchi jatsiska para méntkisï jingontku jarhani jimboka Noambakiti ístu máteru ambe úrasïnga parajtsïni no sési úchini. w19.11 15 párr. 8; 16 párr. 11

Engajtsï erakujka úni ambe ma, eratsi je andijtsïsï uéjki indeni ambe úni. Jeoba erokuarhisïndi eskachi iámindu ambe jimbo jurhimbitku jámaaka. Ísï jimbo, engachi erakuni jámaaka ambe ma úni, nóchi jatsiska para enganiarikuarhini ni máteruechani enganiariuani. Engachi no jurhimbitku jámaska iámindu ambe jimbo, jamberichi uáka úkua jukanchani kʼamarani ambe engachi uénakia. Ju je eranhaskani eska tumbi ma prekursori úkuarhiska peru nitamasïndi tiempu ka no úsïndi andangutaani orechani ni tsípikua jingoni jámani aianhpikuarhu. Jamberi eratsepti prekursori úkuarhini jimboka uékasïrenga sési pʼikuastani Jeobani. Peru úpirindi ísï úni jarhani solu para táti jémbechani sési pʼikuastaani o máteru nemani. Ju je exeni máteru ejemplu, kʼuiripu ma enga Bibliaeri ambe jorhenguarhini jaka, uandasïndi eska nóteru uékasïnguia itsutani, uénani jámani kánikua jánguarhintasïndi ka ma o tsimani semanecha jimbo nóteru ísï úsïndia, peru ménderu uéntasïndi itsutani. Joperu tátsekua úsïndi méntku jurajkuni. Ka ústi ísï úni jimboka niáraska kánikua xénchani Jeobani ka uékani sési pʼikuastani (Kol. 1:10; 3:23). w19.11 27 párr. 9; 29 párr. 10

Apostuli Pablu seguru jarhaspti eska kʼamarhukupiringa karrerani ka eska niárapiringa andani. Jimboka ima erakukata máespka, erokuarhixapti andani indeni premiuni enga jimbo Tata Diosï ióarhipka auandarhu uératini. Peru mítespti eska para úni indeni ambe andani, jatsispka para jánguarhintani (Filip. 3:14). Ambakiti ejemplu ma úraspti para jarhuataani Filipusi anapuechani paraksï no jámani kuatantani. Pablu miátantaaspti Filipusi anapuechani eskaksï imecha auandarhu anapuespka (Filip. 3:20). ¿Andisï xáni jukaparhakuepi eskaksï no mirikurhipiringa indeni ambe? Jimboka imani jurhiatikuecha jimbo kánikua sésisïrenga Roma anapueni. Peru kristianuecha engaksï erakukatepka sánderuksï ambakiti lugari ma jimbo anapuespti, jimbokaksï úpiringa sánderu ambe jatsini. Roma anapueni, no xáni kʼéri ambespti eska auandarhu anapu juramukuarhu anapueni. Iásï, erachicha engaksï erakukateka ambakiti ejempluksï máesti jimbokaksï seguirixaka jánguarhintani paraksï úni andani tsípikua para méntkisï jini auandarhu. w19.08 6, 7 párr. 14, 15

Inde pʼímutantskua sánderu kʼéri ambesti ka eska ima enga jiáni úkuarhienga engaksï israelitecha Pʼímutantanhenga (Lev. 25:8-12). Por ejemplu, ima kʼuiripu enga jurajkunhenga para nóteru jántspirinia, úpirindi ménderu jántspiri únhani. Ístu, niárapirindi uarhini. Pentekostesi jimbo uéxurhini 33, Jeoba espiritu santu jimbo erakuaspti apostulichani ka ístu máteru ambakiti kʼuiripuechani. Ka jiókuarhiaspti paraksï jindeeni imeri uájpecha, ísï jimbo, sánderu orhepatini niárapirindi tsítantaani paraksï auandarhu nirani juramuni Jesusi jingoni (Rom. 8:2, 15-17). Íksï orheta pʼímutantanhaspti ísï eska Jesusi na uandapka sinagogarhu jini Nasareti (Luk. 4:16-19, 21). Nóteruksï jántspirisptia no jurhimbiti jorhenguarhikuecheri engaksï relijioniri orhejtsïkuticha jorhentpenga ka ni imecheri pʼindekuecheri engaksï no terukuntenga Tata Diosïri Karataka jingoni. Ístu, para Tata Diosï, imaksï pʼímutantskata jarhasptia pekadueri enga uarhikuarhu pájpijka. Ambe enga Jeoba úni jaka para pʼímutantspini, jiáni uénasti engaksï tata Jesukristueri chúxapaticha erakunhaka uéxurhini 33 jimbo ka jiáni kʼamaraati enga na nitamakia Juramukua Mili Uéxurhiniri Jesusiri. w19.12 11 párr. 11, 12

Táticha, jarhuataa je chári sapiichani paraksï ambakiti amiguechani jatsiani. Tátichaksï jatsisti para míteni né jingonksï kúnguarhisïni uájpecha ka ambe engaksï újka. Ístuksï jatsisti para míteni nécha jingonksï uandontskuarhesïni telefonu ka redesi sosialicha jimbo. Amigu jémbechaksï uáti úni eska chári uájpa ísï jámaaka ka eratseni eska imecha. Uánikua tátichaksï kánikua jánguarhintasïndi parakaksï imecheri sapiicha kúnguarhiaka imecha jingoni engaksï ambakiti ejemplu máeka para Jeobani marhuakuni. Ísïksï úspti N’Déni ka Bomine, temungurhiri ma engaksï Costa de Marfil anapueka. Imechaksï pʼindespti sirkuitueri orhejtsïkutini pʼímarhini para imecho pakarani. N’Déni uandasïndi: “I ambe kánikua marhuakuspti juchari sapini. Prekursori úkuarhispti ka iásï marhuaxati komu sirkuitueri orhejtsïkutiri jarhuajpiri”. Sánderu sési jauati engajtsï no ióndaska jorhendaani chári sapiichani (Prov. 22:6). Ísïksï úspti Timoteueri amamba Eunise ka nanita jémba Loida, engaksï jiáni uénapka jorhendani Timoteuni Jeobaeri ambe desde enga andajpenupka (2 Tim. 1:5; 3:15). w19.12 25 párr. 14; 26 párr. 16, 17

¿Nénachi uá mintsinharhikueni ísï eska Tíkiku? Ma ambe engachi uáka úni, jindesti jarhuajpini ísï eskachi na aiatspikia (Mat. 5:37; Luk. 16:10). Imecha engaksï uétarhinchajka jarhuajperata, kánikuaksï sési pʼikuarherasïndi engaksï mítejka eskajtsïni uáka mintsikani. Pirenchi ma uandasïndi andi: “Sésiri pʼikuarherasïnga jimbokari míteska eskakini ima kʼuiripu meru jiáni jarhuataaka engari uétarhinchani jauaka, ísï eskakini na aiachika”. Imecha engaksï tsʼéjkukua ma nitamakuarhini jarhajka, kánikuaksï sési pʼikuarherasïndi engaksï uandontskuarhejka nemani jingoni enga mintsinharhikueka. Joperu, parachi úni mintsinharhikueni, jatsiskachi para tekaantstiini. Por ejemplu, ¿ambe jarhuataspi Sarani enga kómu pʼikuarherani japka jimboka imeri uámba jurajkuspka? Uandontskuarheni imeri amigu jémbecha jingoni na enga pʼikuarherani japka. Ima uandasïndi: “Nájkirukani jamberi someni aiangukuarheapkia ambe ma, imechajtsïni tekaantskua jingoni kurhajchasïrendi”. Juchajtuchi ambakiti amiguecheuaka engachi jingontku kurhajchaaska máteruechani. w20.01 10, 11 párr. 9-11

Bibliarhu, uánikua kʼuiripuecheri uandasïndi engaksï intsïnhapka espiritu santu, peruksï no jatsispti erokuarhikua para auandarhu nirani. Por ejemplu, Dabidi uánikua ambe úspti espiritu santu jimbo (1 Sam. 16:13). Espiritu santu jarhuataspti para uánikua ambe kurhanguni Jeobaeri ambe nájkiruka úkua jukapka ka ístu jarhuataspti para uánikua Bibliaeri partichani karaani (Mar. 12:36). Nájkiruka inde ambe úpka, apostuli Pedru uandaspti eska Dabidi ‘no kenchintaspka auandarhu’ (Uku. 2:34). Ka ístu, Juanu el Bautista uinirhixapti “espiritu santu” (Luk. 1:13-16). Ka Jesusi mismu uandaspti eska “no méni kánguarhinhaska ma enga sánderu kʼéri ambeka ka eska Juanu [el] Bautista”. Peru uandaspti eska Juanu no japiringa auandarhu anapu Juramukuarhu (Mat. 11:10, 11). Jeoba imeri espiritu santuni úraspti para uinhapikua íntsaani ini kʼuiripuechani paraksï kʼéri ambe úni, peru no para erakuani paraksï auandarhu nirani. ¿Í ambe arhikuekasïni eskaksï no xáni sési marhuakuspka Jeobani? Nómbe, solu arhikuekasïndi eska Jeoba Paraisurhu tsítantauaka ixú Echerirhu (Juanu 5:28, 29; Uku. 24:15). w20.01 23 párr. 15

Jeobajtsïni ambakiti pʼímarperakua ma úchisti: uékasïndi eskachi imeri familia jingoni kuenta úkuarhiaka. Ini familia jimbo, jarhastiksï ima kʼuiripuecha engaksï aiakukuarhekia Jeobani ka engaksï imeri Uájperi uarhikuani mintsikajka. Familia máeskachi engachi tsípikua jingoni irekajka. Míteskachi andichisï irekani jaki, ka kánikuajtsïni sési pʼikuastasïndi míteni eskachi sánderu orhepani uáka irekani para méntkisï auandarhu o ixú Echerirhu nani enga kánikua sési jándeaka. Uékperakua jimbo, Jeoba íntspisti imeri Uájpani parachi jucha úni imeri familiani jingoni kuenta úkuarhini (Juanu 3:16). Biblia uandasïndi eskachi jucha “piántskata jarhaska” (1 Kor. 6:20). Pʼímutantskua jimbo, Tata Diosï ústi eskachi úpiringa ambakiti pájperakua ma jatsini imani jingoni. Kʼéri kóntperata máesti para jucha, arhini Táti, imani enga sánderu kʼéri ambeka eska iámindu ambe enga jaka. Ka ima jindesti sánderu ambakiti Táti engachi uáka jatsini. Jamberichi juchajtu májkueni kurhamarhikuarhijka eska Bibliaeri karari ma enga uandapka: “¿Néna meiamuntaa Jeobani iámu ambakiti ambe enga úka jíndeni jimbo?” (Sal. 116:12). No ma ambe jingonchi uáka maiamuntani juchari Táti auandarhu anapuni. Peru, imeri uékperakua úsïndi eskachi juchajtu xénchaaka. w20.02 8 párr. 1-3