Juniu

Ana enga profeta Samueliri amambepka, jatsispti para kʼérati uandanhiatechani tekaantani. Ima no úsïrendi sapiichani kánguarhiani (1 Sam. 1:2). Uánikua israelitechaksï eratsesïrendi eska enga uarhiiti ma no uénga sapiichani kánguarhiani, jindeespka jimboka Tata Diosï no újchakuraxapka. Ini ambe jimbo Ana kánikua kʼuratsesïrendi (Gén. 30: 1, 2). Ka máteru ambe enga sánderu no sési pʼikuastenga Anani, jindeespti eska imeri acheeti máteru témbani jatsispka enga Penina arhinhenga ka i kʼóru kaasïrendi sapiichani jimbosï teresmarhuendi Anani. Uénani jámani, Ana kánikua kómu pʼikuarherasïrendi ini ambe jimbo. Xáni no sési pʼikuarherasïrendi enga jamberi niárenga uerani ka no ma ambe tʼireni. Niáraspti kánikua no sési pʼikuarherani (1 Sam. 1:7, 10). ¿Néna úspi Ana sési pʼikuarherantani? Ana mintsita jingoni aiangukuarhispti Jeobani iámindu ambe. Enga na kómarhipkia, aianguspti saserdoti Elini ambe enga nitamakuarhini japka. Eli arhispti: “Niia nintani, asteru uandanhia, ka eskakeni Tata Diosï Israeli anapu íntskuaka ambe engari kurhakuka”. ¿Ambe úkuarhispi tátsekua? Ana “nintaspti ka tʼirespti ka nóteru kómu ninharhixaptia” (1 Sam. 1:17, 18). Kómarhikua jarhuataspti paraka sési pʼikuarherantapiringa. w20.02 21 párr. 4, 5

No ióni jimbo, Jeoba kʼamajkuati Noambakitiri parhakpinini. Imechajkuksïsï tsípiti pakaraati engaksï uéjka irekani para méntkisï (Uku. 13:48). Ísï jimbo, ístuchi uékasïnga eskaksï juchari parienticha marhuakuaka Jeobani. Juchari Táti uékpiti enga auandarhu jaka no uékasïndi “eska nema tsïnchiaka sino eska iáminduecha andajkuarhiaka móantani” (2 Ped. 3:9). Ju je miáni eskachi úsïnga iatsitakuarhu aianhpini Bibliaeri ambe, peru ístu mátirku arhijpini ambe sésiski ka ambe nómbe. Por ejemplu, jamberichi iatsitakuarhu predikarikuaka nemani engachi no míteka peruchi juchari kʼumanchikuarhu anapuni ma mátirku arhini ambe sési jarhaski ka ambe nómbe. Engachi miájka na engachi aianguapka uénani jámani juchari kʼumanchikuarhu anapuechani, jamberichi uánikua jucha no sési pʼikuarherajka ka eratsenchi eskachi úpiringa ménderueni úni. Kánikua sési jauati engachi miáska ambe enga apostuli Pablu uandaka enga iásï anapu teksturhu jaka engachi predikarikuauaka juchari kʼumanchikuarhu anapuechani. Engachi no ísï úska, uákachi sánderu no sési pʼikuastaani enbesde úni eskajtsïni kurhajchaaka. w19.08 14, 15 párr. 3-5

¿Nénajtsï pʼikuarheraspi jiáni engajtsï niárapka arini jurhimbikua ambe jorhenguarhini Tata Diosïri Uájperi ambe? Jesusi jindesti enga sáno májkueni kʼéri ambeka eska Jeoba. Ima jindesti juchari Pʼímutantspiti, jimboka ima íntspiska imeri tsípikuani parajtsïni pʼímutantani. Engachi úkuecha jingoni xarhatajka eskachi jakajkusïnga ini ambe, uákachi puáminhantaani pekaduechani, ambakiti pájperakua ma jatsini Tata Diosï jingoni ka irekani para méntkisï (Juanu 3:16). Ístu Jesusi jindesti juchari Kʼéri Saserdoti jimbokajtsïni uékasïnga jarhuatani parachi kóntperatechani jatsiani imeri pʼímutantskua jimbo ka parachi ambakiti pájperakua ma jatsini Jeoba jingoni (Ebr. 4:15; 7:24, 25). Jimboka ima Reiska Tata Diosïri Reinuerirhu, Jeoba imani úraati para pímbinhajkuntani imeri nombrini, para kʼamajkuni no sési jásï ambe ka parajtsïni újchakurani para méntkisï jimbanhi parhakpinirhu (Mat. 6:9, 10; Jaŋ. 11:15). Ístu, Jesusi jindesti juchari ejemplu. Úraspti imeri tsípikuani para úni ambe enga Jeoba uéjka ka ísïjtsïni xarhatachesti ambe engachi juchajtu jatsika para úni (Juanu 4:34). Jiáni engajtsï exeaka eska ísïska ambe enga Biblia jorhentpijka Jesusiri ambe, niáraakajtsï xénchani Tata Diosïri Uájpani enga ima xáni xénchajka. Xénchani Jesusini, uáti eskajtsï uékaaka méntkisï úni ambe enga Tata Diosï uékajka, ísï eska na úpka Jesusi. w20.03 10 párr. 12, 13

Últimu jurhiatikua, Jesusi uánikua xanhari kómarhispti. Enga arhiapka imeri chúxapatichani paraksï miántani imeri uarhikuani, kómarhikua ma úspti antede íntsaani kurhinda ka ménderu kómarhikua ma úspti antede íntsaani binu (1 Kor. 11:23-25, TNM). Ístu kómarhikua ma úspti imecha jingoni antedeksï uéntani imani lugarirhu engaksï Paskuani úntapka (Juanu 17:1-26). Engaksï Olibusïri juáta jimbo niárapkia, uánikua xanhari kómarhispti (Mat. 26:36-39, 42, 44). Ka asta ambe enga últimu uandapka antede uarhini, jindeespti kómarhikua ma para Táti jémba (Luk. 23:46). Eskachi na exekia, Jesusi kómarhispti Jeobani iámindu ambe jimbo enga xáni nitamanchapka imani jurhiatikua jimbo enga xáni jukaparhakuepka. Ma ambe jimbo enga Jesusi aguantaripka, jindeespti jimboka méntku kómarhixapka Táti jémbani para kurhakuni jarhuajperata. Peruksï imeri apostulicha no ísï úspti ima chúri ka nóksï balori jukaspti engaksï niárapkia tsʼéjkunhani (Mat. 26:40, 41, 43, 45, 56). ¿Ambechi jorhenguarhisïni? Eskachi no méni jurajkuaka Jeobani solu engachi méntku úndaska kómarhini, ísï eska na úpka Jesusi. w19.04 9 párr. 4, 5

¡Jeoba kurhunhisïndi demoniuecheri ambe ka iámindu máteru jásï sïkuamikueri ambe! Ima arhiaspti israelitechani: “No jatsipirindi para jarhani tʼungini jingoni nema enga chpiri jimbo kurhiraaka imeri tatakani o nanakani, ni nema enga adibinarijka, ni nema enga majia niátajka, ni nema enga uéjka míteni ambe úkuarhia sánderu orhepatini, ni sïkuami ma, ni nema enga no sési úkuauaka máteruechani, ni nema enga sïkuamini ma úraaka para uarhirichani jingoni uandontskuarheni o nemani enga uandantajka ambe enga úkuarhiaka sánderu orhepatini, ni nema enga uarhirichani jingoni uandontskuarheaka. Jimboka iámindu imecha engaksï ini ambe újka ikichakueni jásï ambeeska para Jeoba” (Deut. 18:10-12). Kristianuechachi nóteru jatsiskia para kurhajchani Leini enga Jeoba israelitechani íntsaapka. Peru míteskachi eska seguirixaka májkueni exeni sïkuamikua ambe. Jeobajtsïni arhisïndi eskachi no jiókuarhiaka sïkuamikueri ambe, jimboka Noambakiti indeni ambe úrasïnga para no sési úkuni kʼuiripuni. Por ejemplu, úrasïndi sïkuamikuani para sánderu jakajkunhani chkuanderakua ambe, komu eskaksï uarhiricha seguirini jarhasïnga irekani máteru nanisï (Ecl. 9:5). Ístu, úrasïndi para kʼuiripuni chérani ka eskaksï jarhariaka Tata Diosïni. Noambakitiri eratsekua jindeesti eska kʼuiripu demoniuechani mintsinharhiauaka ka no Jeobani. w19.04 21 párr. 5, 6

Ísku ambe ma úkuani sapiichani kʼéri pekadu máesti. Ima enga ísku ambe ma úkujka sapini ma ióni jamberi no sési pʼikuastasïndi sapini. Nájkiruka sapi mintsinharhienga imani kʼuiripuni, kánikua no sési úkusïndi jimboka sapi nóteru seguru pʼikuarherasïngia. Ísï jimbo, jatsiskachi para kuájchakuani sapiichani ini xáni no sési jásï amberi. Ka jatsiskachi para sési pʼikuastantaani ka jarhuataani imechani engaksï ini xáni no sési jásï ambe nitamanchaka (1 Tes. 5:14). Enga kúnguarhikuarhu anapu ma ísku ambe ma úkujka sapini ma, no sési pakatasïndi kúnguarhikuani (Mat. 5:16; 1 Ped. 2:12). Méntkuchi no sáni jaiapanheantasïnga kúnguarhikuarhu imechani engaksï no sési ambe újka ka nóksï móantani ka únksï eska kúnguarhikua no sési exenhaaka. Enga kúnguarhikuarhu anapu ma no kumpliriska leini ma —por ejemplu, ísku ambe ma úkuparini sapini ma—, no janhanharhiasïndi juramutichani (terukutanta je Ukuecha 25:8 jingoni). Nájkirukaksï orhejtsïkuticha no jatsika sésikua para úni eskaksï parhakpini anapu leicha meru kumplirikuarhiaka, nóksï kuájpisïndi imani enga ísku ambe ma úkuka sapini ma enga gobiernu kástigarijka imani ambe jimbo enga úka. w19.05 9 párr. 4-7

Jeoba jindesti juchari Ambakiti Jorhentpiri. Imeri jarhuajperata jingonchi uáka orhepani uérakuani náki uéjki uandanhiatechani (Is. 30:20, 21). Imeri Karakatajtsïni iámindu ambe jorhendasïndi ambe engachi mándani arhini uétarhinchajka parakachi “no ma ambe kueratanchaaka” ka parachi sési “jorhendakata jarhani para iámindu ambakiti ambe úni” (2 Tim. 3:17). Engachi újka ambe enga Biblia arhijka, sánderuchi mímixekua jingoni jámasïnga eska imecha engaksï jaiapanhentajka parhakpini anapu jorhentperakuani (Sal. 119:97-100). Sáno méntkisï ima ambe enga parhakpini jorhentpijka úsïndi eskachi imani ambe uáka parachi juchajkumindu sési uéranchani, xáni no sési. Jamberichi jimbosï úkua jukanchajka no ísï eratseni ni ísï jámani eska parhakpini anapuecha. Ísï jimbo, Biblia arhisïndi: “Exeparini eskaksïni no nema kʼarhaaka [o enganiarini] mámaru járhati jorhenguechani jimbo ka chkuanderakua ambe jimbo enga no marhuajka, eska na jindeeka kʼuiripuecheri jorhengua” (Kol. 2:8). Ísï eska Biblia na uandarini japkia, imecha engaksï últimu jurhiatikuecha jimbo irekapiringa sánderuksï uékapirindi tsípikuarhini (2 Tim. 3:4). Xáni uánikua pʼamenchakua ambe enga niárajka kéritperanhani relasioni seksuali jimbo, por ejemplu, sida. Í ambe xarhatasïndi eska no marhuasïnga ísï irekani eska parhakpini na jorhentpijka (2 Ped. 2:19). w19.05 21 párr. 1, 2; 22 párr. 4, 5

Noambakiti úspti eskaksï israelitecha jakajkupiringa eskaksï solu ísï úpiringa ambakiti irekua ma jatsini engaksï májkueni úpiringa eska máteru iretecha engaksï no kómarhienga Jeobani. Imecha engaksï no mintsikenga Tata Diosïni, eratsesptiksï eska solu indeni ambe úparini, sóntku janipiringa, ísï jimbo, kómarhisptiksï diosï úkata Baalini. Noambakiti ístu úraspti imani ambe engaksï israelitecha tsitienga. Iretecha engaksï no marhuakuenga Jeobani, ísku jándikua ambeksï úsïrendi paraksï kʼéri ambe arhiani diosï úkatechani, máru ambe engaksï uénga, jindeespti eskaksï nanakecha ka tatakecha ísku jándikua ambe niátapiringa templurhu. Ima iretechaksï no solu jurajkusïrendi eska tataka ma ísku jándikua ambe niátapiringa máteru tataka jingoni o nanaka ma máteru nanaka jingoni ka máteru jásï ísku jándikua ambe, sino ístuksï no no sési exesïrendi (Deut. 23:17, 18; 1 Rey. 14:24). Ísïksï eratsesïrendi eska inde ambe marhuasïrenga paraksï diosï úkatecha úni eska echeri kánikua tʼirekua íntspepiringa. Uánikua israelitechaksï tsitispti ísku jándikua ambe niátani ka uénasptiksï marhuakuani diosï úkatechani. w19.06 2 párr. 3; 4 párr. 7, 8

Uánikua erachicha ka pirenchicha engaksï Beteli marhuani japka ka ístu máteruecha, jimbanhi ánchikuarhitaksï ma intsïnhasti. Jamberiksï i erachicha úkua jukanchajti jurajkuni ánchikuarhita ma Jeobaeri kúnguarhikuarhu engaksï kánikua tsitijka úni. Engajtsï chá ini ambe nitamakuarhika, ¿ambeksïni uá jarhuatani? No jurajkuni Jeobani ka parajtsï ísï úni, uétarhisïndi eskajtsï pauani pauani arhintaaka Bibliani ka eratsentani ambe engajtsï arhintaaka. Ístu, jánguarhinta je aianhpini imani kúnguarhikuarhu anapuecha jingoni engajtsï iásï jakaia. Jeoba no mirikurhiasïndi imechani engaksï seguirini jaka sési marhuakuni nájkirukaksï nóteru májkueni újkia eska antesi. Arisku sáni irekani. Ju je no jurajkuni eskajtsïni parhakpini anapu uandanhiatecha ójkutaaka parachi sési marhuakuni Jeobani (Mat. 13:22). Ju je no kurhajchaani amiguechani, parientichani o máteru kʼuiripuechani engajtsïni arhijka eskachi uétarhinchasïnga sánderu tumina andani parachi sési irekani (1 Juanu 2:15-17). Ju je mintsikani Jeobani engajtsïni aiachijka jarhuatani jiáni engachi meru uétarhinchani jauaka para juchari jakajkukua sánderu uinhapiti jarhani, parachi sési pʼikuarherani ka parachi jatsini imani ambe engachi uétarhinchani jauaka (Ebr. 4:16; 13:5, 6). w19.08 20 párr. 4; 21, 22 párr. 7, 8

¿Uandanhiatachi ma jatsiski? Uinhaperantasïndijtsïni míteni eska Jeoba kurhangusïnga ambe engajtsïni uandanhiatajka. Mítesti ambe engachi no újka úni ka asta mítesïndi ambe engachi eratsejka ka pʼikuarherani (Sal. 103:14; 139:3, 4). Engachi kurhakuska jarhuajperata Jeobani, imajtsïni jarhuataati orhepani uérakuni imani ambe engajtsïni uandanhiatajka. Méntku eratseni jarhani ambe ma, uáti eskachi imani ambe eratseaka engajtsïni no sési úchiaka ka no sésichi pʼikuarheraaka. Engachi indeni ambe nitamakuarhiska, ju je miáni eskajtsïni Jeoba jarhuataaka. ¿Néna? Imajtsïni pʼímarhisïndi eskachi aiangukuarhiaka ambe engajtsïni xáni uandanhiatajka ka aiachisïndijtsïni eskajtsïni mókuchiantauaka juchari kómarhikuechani (Sal. 5:3; 1 Ped. 5:7). Ísï jimbo, ju je someni aianguni ambe engajtsïni xáni uandanhiatajka. Nájkirukajtsïni no meru ima uandajpaaka, úraati imeri Karakatani ka imeri organisasionini. Ejempluechani engachi Bibliarhu arhiantauaka, jarhuataatijtsïni parachi sési pʼikuarherantani ka jatsinchi ma erokuarhikua. Ka ístujtsïni uinhaperantaati juchari erachicha (Rom. 15:4; Ebr. 10:24, 25). w19.06 16 párr. 7, 8

Engachi no sési kánhaaka, ju je iámindu ambe aianguni Jeobani na engachi pʼikuarherajka, ísï komueska itsï ambe tsïtani, aianguni juchari Táti uékpitini ambe engachi jimbo chéjka ka uandanhiani (Lam. 2:19). Engachi sánderu ísï kómarhiska Jeobani, sánderuchi andarhieraaka (Rom. 8:38, 39). Ju je seguru jarhani eska ambe enga uáka Tata Diosïri Reinu, meru ísï úkuarhiaka (Núm. 23:19). Engachi no xáni seguru jaka eska ísï úkuarhiaka ambe enga Tata Diosï aiatspika, sánderujtsïni fásili chéraati Noambakiti ka iámindu imecha engaksï imani jingonika (Prov. 24:10; Ebr. 2:15). Ju je arhutani tiempu para sánderu jorhenguarhini ambe enga Jeoba aiatspika imeri Reinueri ambe ka andisïchi uá seguru jarhani eska ísï úkuarhiaka. Parachi kurhanguni na enga xáni jukaparhakueka i ambe, ju je exeni ambe enga nitamakuarhipka erachi Stanley Jones enga siete uéxurhini japka ónhakata imeri jakajkukua jimbo. Erachi uandantasïndi ambe enga jarhuatapka no jurajkuni Jeobani: “Ambe engani xáni mítepka Reinueri, seguru jarhani inderi ambe ka engani no méni eratsepka sini ísïua o nómbe, jarhuatasptirini uinhapiti jarhani. Nójtsïni úspti andani”. Engachi meru seguru jauaka eska ísï úkuarhiaka ambe enga Tata Diosï aiatspejka, nóchi chéaka (Prov. 3:25, 26). w19.07 2 párr. 1; 3 párr. 6, 7

¿Andisï xáni jukaparhakue ánchikuarhita para Kristueri chúxapati uáni? Jimbokaksï solu Kristueri chúxapaticha úsïnga Tata Diosïri amigueni. Ístuksï iásï sánderu sési irekasïndi ka jatsistiksï erokuarhikua ma para sánderu orhepani, irekani para méntkisï (Juanu 14:6; 17:3). Ísïsti eskajtsïni Jesusi kʼéri ánchikuarhita ma íntskuska, peruchi no jandiajku jarhaska. Apostuli Pablu uandaspti eska ima ka máteru kristianuechaksï jindeespka “Diosïri jarhuajpiricha” (1 Kor. 3:9). Ísïsti, Jeoba ka Kristujtsïni kʼéri kóntperata ma íntskusti juchantsïni engachi no perfektueka. Ístu, kánikuachi sési pʼikuarheraaka ánchikuarhini para kʼuiripu Kristueri chúxapatiini. Ambe engachi orheta jatsika para úni, jindesti jirinhataani imechani engaksï uékajka míteni Jeobani. Xarhatasïngachi eskachi ambakiti Jeobaeri testiguecheska engachi iáminduecha jingoni uandontskuarhejka engachi xáni exeantajka. Ka xarhatasïngachi eskachi meru kristianueska engachi újka ambe engajtsïni Jesusi juramuchika, aianhpini. w19.07 14, 15 párr. 3-5

Ambe engaksï kʼuiripuecha sánderu tsitijka, jindeestiksï Bibliaeri ambakiti konsejuecha. Jini Nueva York, pirenchi ma enga imechani pʼorhembiajka engaksï chino mandarín uandajka, uandantasïndi: “Jánguarhintasïnga kurhajchaani ka jingontku jarhani kʼuiripuecha jimbo. Engani mítejka eskaksï apenasi niáraska paisirhu, arini ambe kurhamarhiasïnga, náksïni nichexaki, exentaskijtsïa ánchikuarhita ka nénaksïni kámasïni kʼuiripuecha”. Ménisï i ambe úsïndi para uénani Bibliaeri ambe uandontskuarheni. Enga pirenchi exejka eska uáka ísï úni, ístu arhiasïndi: “Nájtsï exesïni, ¿ambe uétarhijki parachi iáminduecha sési pájperani? ¿Uáksïni exerani karakata ma enga Bibliarhu jaka? Arhisïndi: ‘Uénani arhijperani, ísïsti komu kʼéri ma puerta mítani; antede uénani uarhiperakua, kéndikukuarhi’. ¿Exesïntsï eskajtsïni i konseju jarhuataaka parachi sési pájperani máteruecha jingoni?” (Prov. 17:14). Ísï uandontskuarhekuani kʼuiripuechani, jarhuataatijtsïni míteni néjtsïni uékaa kurhajchani máteru jimbo. w19.07 23 párr. 13

Imecha engaksï mótseka para jimbanhi ánchikuarhita ma úni, uétarhinchasïndiksï eskachi kurhangukuauaka ka no eskachi lastima uáuaka. Jamberi ima o imeri parienti ma pʼamenchani jauati. O no sési pʼikuarherani jarhani jimboka uarhirakuarhiska nemani enga xénchenga. Ka nájkiruka no uandantaaka, jamberi kánikua no sési pʼikuarherani jauati jimboka imeri amiguechani jirinhantaasïnga. Tiempu uétarhisïndi para nóteru xáni no sési pʼikuarherania ka sánderia enga no nani máru pʼikuarherakuarhijka. Engachi uéraska imecha jingoni aianhpini ka juchari ambakiti jángua jingoni, jarhautauakachi paraksï sóntku pʼindeni. Pirenchi ma enga ióni marhuaka máteru paisi jimbo, uandasïndi: “Nani engani antesi marhuani japka, pauani pauani jorhentpisïrenga Bibliaeri ambe. Ka iásï engani máteru nani marhuani jakaia, kánikua úkua jukanchasïrenga sikiera ma karakata arhikuantani kʼuiripuechani o bideu ma exeraani. Exeani ini ambakiti aianhpirichani eskaksï jarhuataaxapka kʼuiripuechani Jeobani marhuakuni, úspti eskani ambakiti ambe eratsepiringa. Jorhenguarhispka uénani uandontskuarheni nani engani iásï marhuani jakaia. Ini ambe jimbo, ménderuni ueentaspkia sési pʼikuarherani”. w19.08 22 párr. 10; 24 párr. 13, 14

Ísï eska Ebodia ka Síntiki na nitamakuarhipka, engachi sánderu imani ambe exeska ambe engaksï no sési újka erachicha, sánderuchi úkua jukanchaaka xénchaani. Iáminduechachi pauani pauani no sési úsïnga ambe ma. Engachi imani ambejku exeni jámaska ambe engaksï no sési újka máteruecha, tátsekuachi nóteru xénchauakia. Ju je úrani ejemplu ma. Erachi ma mirikurhisïndi jarhuatantsïni aseu úni Kʼumanchikua Reinuerirhu, ísï jimbo, ikiakusïngachi. Peru engachi uénaska imani ambe miántani ambe enga no sési úka, sánderuchi ikiakuaka ka nóteruchi xáni xénchania. ¿Ini ambechi nitamakuarhixaki? Jiájkani, ju je miáni eska Jeoba exesïnga ambe engachi jucha no sési újka ka ístu imani ambe enga juchari erachi no sési újka, perujtsïni seguirixati xénchani iáminduechani. Ísï jimbo, ju je májkueni uékpini eska Jeoba ka imani ambe exeni ambe engaksï sési újka máteruecha. Engachi jánguarhintajka xénchaani erachichani, sánderuchi májku kʼéri jarhasïnga imecha jingoni (Filip. 2:1, 2). w19.08 9 párr. 7, 8

Jeoba xénchaasïndi imechani engaksï kaxumbitiika. Solu imecha engaksï mintsita jingoni xarhatajka kaxumbikua, úsïndiksï imeri amigueni. Peru, no jiókuarhiasïndi “imechani engaksï teparakuarhijka” (1 Ped. 5:5). Iáminduechachi uékasïnga sési pʼikuastani Jeobani ka míteni na engajtsïni xáni xénchajka, ísï jimbo, jatsiskachi para jorhenguarhini kaxumbitiini. Kaxumbikua méntku ménderuenisti eska kʼéramakuarhini ka sési exekuarhini. Biblia uandasïndi eska nema enga kaxumbitika jiókuarhisïnga eska Jeoba iauani sánderu kʼéri ambeeska eska ima ka eska iámindu kʼuiripu sánderu sési úsïnga ambe ma ka eska ima (Filip. 2:3, 4). Máru kʼuiripuechaksï ísï xarharasïndi enajkiksï kaxumbitii. Jamberiksï no xáni uandarijti o astaksï janhanharpeni ka sési kámpeni jimbokaksï ísï jorhendanhaska desde sapichuetini, peru jiniksï mintsitarhu uératini kʼéramakuarhini, ka niárasïndiksï xarhatani na engaksï jásï kʼuiripueka (Luk. 6:45). w19.09 2 párr. 1, 3, 4

“Ambakiti aianhperakuani enga juchari Tata Jesukristueri ambeeka” iámindu jurhimbikua ambesti enga Jesusi jorhentpika. Ka kumplirisïngachi indeni ambe engachi ísï újka juchari irekuarhu. I ambe arhikuekasïndi eskachi sánderu jukaparharaaka Jeobani marhuakuni, ísï úni eskaksï imeri juramukuecha na uandajka ka uandantani Tata Diosïri Reinueri ambe (Mat. 6:33; 24:14). Ístu arhikuekasïndi jarhuataani erakukatechani engaksï Kristueri ermanueka engaksï jamberi imecha úni jauaka imecheri ánchikuarhitani (Mat. 25:31-40). No ióni jimbo, imechaksï ambakiti ambe íntsantauati “máteru karichichani” jimbokaksï jarhuataaska (Juanu 10:16). ¿Nénaksï uá indeni ambe? Antede uénakuarhini Armajedoni, iámindu imecha engaksï 144,000 erakukatecha jingoni kuenta úkuarhijka tsíntaatiksï komueska espirituecha engaksï no méni uarhiaka. Imani ánjelicha jingonksï jauati engaksï kʼamajkuauaka kʼuiripuechani engajtsïni uéjka no sési úchini ka kuájchakuauatiksï “uánikua kʼuiripuechani” engaksï ísïka komueska karichicha, kaxumbitinksï (Jaŋ. 2:26, 27; 7:9, 10). Kʼéri kóntperata máeuati para uánikua kʼuiripuecha engaksï jarhuataapka Jeobaeri erakukatechani jiáni engaksï Echerirhu japka. w19.09 12, 13 párr. 16-18

¿Andichisï mintsikuastanhajki o sési pʼikuarherani engachi imani ánchikuarhitani újka engajtsïni Jesusi íntskuka? Jimbokachi sánderu ambakiti orhejtsïkutichani jatsiaska. Nájkiruka Jeoba jindeeka sánderu kʼéri orhejtsïkuti, no no sési kámpisïndi ka jukaparharasïndi ánchikuarhitani engachi újka (Ebr. 6:10). Ka íntskusïndijtsïni uinhapikua parachi úni indeni ánchikuarhitani engajtsïni ima íntskuka (2 Kor. 4:7; Gal. 6:5). Juchari Rei Jesukristujtsïni xarhatachesti sánderu ambakiti ejemplu na engachi jatsika para kámpini (Juanu 13:15). Ka kúnguarhikuarhu anapu orhejtsïkuticha engajtsïni kuidarijka, jánguarhintasïndiksï májkueni úni eska Jesusi enga ‘kʼéri karichi erangutika’ (Ebr. 13:20; 1 Ped. 5:2). Jánguarhintasïndijtsïni uinhaperantani ka sési kámani ka balori jingontsïni jorhendani ka kuájchakuni. Ístu, sánderu ambakiti kʼuiripuecha jingonchi ánchikuarhisïnga. No nema jatsisti ánchikuarhita ma enga xáni sési pʼikuastpijka niksï xáni sési pájperani máteruecha jingoni ísï eska jucha. Ju je eratseni arini ambe: kʼéri kóntperata máesti imani kʼuiripuecha jingoni ánchikuarhini engaksï májkueni kurhajchaajka Tata Diosïri juramukuechani eska jucha, peruksï no sánderu kʼéri pʼikuarherasïndi eskaksï máteruecha. Imechaksï eratsesïndi eskaksï máteruecha sánderu kʼéri ambeeska eska imecha. Nójtsïni solu ísï exesïndi komueska imecheri kompanieruecha, sino komueska amiguecha. Ka kánikuajtsïni xénchasïndi engaksï jamberi uéjka íntspini imecheri tsípikua juchantsïni jimbo. w19.09 20 párr. 1; 23 párr. 12-14

Ambe enga apostuli pablu uandapka Jeobaeri jurhiatikueri ambe (1 Tes. 5:1-6). Ini karakata jimbo, arhikuekasïndi imani tiempuni enga uénaaka kʼamajkunhani “Kʼéri Babilonia” —engaksï interu parhakpini anapu no jurhimbiti relijionicheka— ka Armajedoni jingoni kʼamakurhiati (Jaŋ. 16:14, 16; 17:5). Ístu, Pablu uandasïndi ambe engachi jatsika para úni parachi listu jarhani Jeobaeri jurhiatikua jimbo. Nóchi jatsiska para kʼuíni jarhani ísï “eska máteruecha”, sino tsínharhitini ka jingontku jarhani parachi no inchamukuni politikarhisï ka uénanchi apoiarini indeni ambe. Engachi indeni ambe úpiringa, uénapiringachi parhakpini anapuecha jingoni kuenta úkuarhini (Juanu 15:19). Míteskachi eska solu Tata Diosïri Reinu uáka eska pínandikua jauaka interu parhakpini. I ambe arhikuekasïndi, jarhuataani míteni ambe enga arhijka Biblia eska úkuarhiaka ini parhakpini jingoni. Enga na uénakuarhiakia kʼéri mískuarhita, nóteru tiempueuatia paraksï kʼuiripuecha andarhierani Jeobani, jimbosï uétarhijti eskachi niuaka aianhpini. w19.10 8 párr. 3; 9 párr. 5, 6

Engaksï jatsipkia para mítetarpini ambe enga roiiurhu karakata japka, Jeremiasi imeri amigu Barukini mintsikaspti para arhintani (Jer. 36:5, 6). Baruki balori jukaspti ka úspti imani ánchikuarhitani enga xáni úkua jukapka. ¿Eranhaskasïnchi na enga xáni sési pʼikuarherapka Jeremiasi enga Baruki templurhu nípka ka iretani japarini arhintani roiiuni? (Jer. 36:8-10). Engaksï Judá anapu prinsipecha mítepka ambe enga Baruki úpka, arhisptiksï eska imechantu arhikuantaapiringa (Jer. 36:14, 15). Jimajkani, eratsesptiksï aianguni rei Jeoiakimini ambe enga Jeremiasi uandapka. Enga rei Jeoiakimi mítepka ambe enga Jeremiasi karapka, xáni ikiaspti enga jamberi kurhirapka roiiuni ka úni eskaksï ónhapiringa profetani ka Barukini. Peru Jeremiasi pʼíkuspti máteru roiiuni ka Barukini íntskuspti ka arhipaspti para karani ambe enga Jeoba uandapka. Ísï jimbo, Baruki karantaspti iámindu uandakuechani engaksï roiiurhu karakata japka enga rei Jeoiakimi chpirirhu kurhirapka (Jer. 36:26-28, 32). w19.11 3, 4 párr. 4-6

Jeoba niárasïndi jindeeni ambe enga xáni uétarhini jauaka para úkuarhini ambe enga ima uéjka. Niárasti jindeeni jorhentpiri, Táti enga sési pʼikuastpintajka ka ístu ambakiti ambe aianhpisïndi (Is. 48:17; 2 Kor. 7:6; Gal. 3:8). Nájkiruka újka indeni ambe úni, ístu úraasïndi kʼuiripuechani para imani ambe úni enga ima uéjka (Mat. 24:14; 28:19, 20; 2 Kor. 1:3, 4). Jeoba úsïndi eska né uéjki jucha jánhaskatiuaka ka jatsini uinhapikua parachi niárani úni ambe enga uétarhini jauaka para úkuarhini ambe enga ima uéjka. Ísï eskaksï na uandajka máru jorhenaticha, í ma ambesti ambe enga xáni arhikuekajka Jeobaeri nombri. Iáminduechachi uékasïnga eskajtsïni Jeoba úraaka, peru jamberiksï máru no seguru jati eska Jeoba úraaxaka. ¿Andiksïsï ísï eratsejki? Ísïksï exesïndi eskaksï nóteru xáni uákia úni ambe engaksï uékapiringa jimbokaksï jatiriskia, imani ambe jimbo engaksï nitamakuarhijka o eskaksï no uáka ísï úni. Máteruechaksï jamberi konformi jarhajtia ambe engaksï újka ka nóksï exeni eska uétarhisïnga sánderu marhuakuni Jeobani. w19.10 20 párr. 1, 2

Jatsikuarhikuekani, uáti eskachi nóteru xáni jukaparharaakia mintsikani Jeobani ka eskachi nóteru xáni marhuakuakia. Apostuli Pablu uandaspti: ‘No ma soldadu jámasïndi máteru ambe ánchikuarhini’, “sino solu úni jarhasïndi ambe enga jaiapanhintajka ima enga pʼirajka para soldadueni” (2 Tim. 2:4). Roma anapu soldaduechaksï no jurajkunhasïrendi negosiu ambe jatsini. Ísï eska ambakiti soldadu ma, juchajtuchi májkueni jánguarhintasïnga eskajtsïni jaiapanhintaaka juchari komandanticha engaksï jindeeka Jeoba ka Kristu. Sánderuchi jukaparharasïnga ini ambe ka eska ambe uéjkini enga jaka Noambakitiri parhakpinirhu. Jánguarhintasïngachi sési úrani juchari tiempuni ka uinhapikuani parachi Jeobani marhuakuni ka parachi kuidarini juchari kuájpikuarhitarakuani ka iámindu uarhipetarakuarhu anapu xukuparhakuani enga Tata Diosïrika. Jatsiskachi para méntkisï jingontku jarhani. ¿Andi? Apostuli Pablu uandaspti eska “imecha engaksï jatsikuarhikuekajka”, niáraakaksï támu peerani “jakajkukuani”, o nóteruksï mintsikania Jeobani (1 Tim. 6:9, 10, TDU). w19.11 17 párr. 12, 14; 18 párr. 15

Antede Jeobaeri jurhiatikua uénakuarhini uandanhaati “pínandisti ka sésichi irekaxaka” (1 Tes. 5:1-6). Ixú 1 Tesalonika 5:2, uandasïndi Jeobaeri jurhiatikua para kʼéri mískuarhitani arhikuekani (Jaŋ. 7:14, TNM). ¿Nénachi uá míteni na enga jatini uénaaka kʼéri mískuarhita? Biblia arhisïndi eska uandanhaaka ambe ma engachi jimbo uáka míteni. Parhakpini anapu juramutichaksï uandaati “pínandisti ka sésichi irekaxaka”. ¿Inchaparakuaksï relijioniri orhejtsïkuticha? Jamberi jo. Peru enga inde ambe uandanhaaka jindeuati máteru demoniuecheri chkuanderakua. Ka í, kʼéri chkuanderakua máeuati jimboka uáka eska kʼuiripu eratseaka eskaksï sési irekaxakaia, meru jiáni enga uénakuarhiaka sánderu kʼéri mískuarhita enga no méni úkuarhini japka. ¿Ka ambe úkuarhia Tata Diosïri ambakiti marhuaricha jingoni? Jimbokaksï no míteska káni meru uénakuarhia kʼéri mískuarhita, jamberiksï ísku pakaraati enga uénaaka inde ambe úkuarhini, peruksï listu jauati. w19.09 9 párr. 7, 8

Engachi erakuni jámaaka úni ambe ma, ju je sési míteni ambechisï uá. I ambejtsïni jarhuataati kʼamarani ambe engachi uénakia úni. Por ejemplu, engachi eratsekia uénani pauani pauani arhintani Bibliani, peruchi nótki úni jarhani programa ma, jamberichi no uáka ísï úni. O máteru ejemplu, ma kúnguarhikuarhu anapu orhejtsïkutichaksï uandasti paraksï sánderu pʼorhembiani erachichani peru nitamasti tiempu ka nóksï úsïndi ísï úni. Ambe ma enga úpiringa jarhuataani paraksï úni ambe engaksï eratsetini japkia, jindesti arini ambe kurhamarhikuarhini: “¿Exeskichia náki erachichani o pirenchichani sánderu jarhuataapirini parachi nirani pʼorhembiani? ¿Uandaskichia na jatinchi niua pʼorhembiani?”. Ístu, ju je jiókuarhini eskachi no úsïnga iámindu ambe úni. No nema jatsisti tiempu, tumina ni uinhapikua para iámindu ambe úni eska ma na uékapiringa. Jimbochisï jatsika para miántani ka jiókuarhini eskachi no úsïnga iámindu ambe úni. Jamberichi mójtakuaka ambe ma engachi exeaka eskachi no uáka úni. w19.11 29 párr. 11, 12

Isaías 65:21-23, xarhatasïndi néna irekanhaa paraisurhu ixú Echerirhu. Jeobaeri marhuarichaksï no méni ísku jauati. Sánderu sési, Biblia arhisïndi eskaksï tsípikua jingoni ánchikuarhiaka ka eskaksï uáka ambe enga marhuauaka. Uákachi mintsikani eska jiáni enga na nitamaakia mili uéxurhini, kueraakata “nóteru juramuminhaaka uarhikuani jimbo sino jimbanheranhantani, jimajkani engaksï Diosïri uájpecha xarhantaaka tʼíntskua jingoni” (Rom. 8:21). Jeoba úspti eskaksï israelitecha jatsipiringa tiempu para ánchikuarhini ka ístu para mintsikuarhini ka májkueni uáti imeri marhuaricha jingoni jiáni enga tata Jesukristu Juramuni jauaka Mili Uéxurhini. Ísï jimbo, íchaksï jatsiati tiempu para Jeobani kómarhini. Jimboka inde ambe kánikua jukaparhakueska para úni tsípikua jingoni irekani iásï ka ístu jimbanhi parhakpinirhu. Iámindu kʼuiripuecha engaksï kurhajchaaka Jeobani, sésiksï pʼikuarheraati jimbokaksï tsípikua jingoni ánchikuarhiaka ka jimbokaksï Jeobani marhuakuni jauaka. w19.12 13 párr. 15, 17, 18

Uandakua jorhendaani, arhikuekasïndi úni eska nema imeri eratsekuarhu pakataaka uandakua ma, someni repetiriparini. Paraksï tátiicha ísï úni, jatsistiksï para someni arhutani tiempu para sapiicha jingoni jarhani. Nájkirukaksï táticha niáraaka kuatarani engaksï méntku úndaska repetirikuani ambe ma imecheri sapiichani, uátiksï ísï exeni eskaksï jarhuataaxaka kurhanguni Tata Diosïri Karakatani ka paraksï ísï úni eska jimini na arhijka. Ísï jimbo, sési mítea je chári sapiichani. Salmo 127 jimbo arhisïndi eskaksï sapiicha ísïska komu flechecha (Sal. 127:4). Ísï eskaksï flechecha na no májkueni úkata jarhajka niksï májkueni kʼéni, ístuksï sapiicha mámaru jásïsïndi. Ísï jimbo, tátichaksï jatsisti para exeni nénaksï kʼuiriperaa mándani sapini. Temungurhiri ma engaksï jini Israel anapueka, uandantasïndiksï ambe enga jarhuataapka paraksï úni eskaksï imecheri tsimani sapiicha niárapiringa Jeobani marhuakuni: “Mándani juchari sapiichanchi táchanisï jorhendaasïrenga Bibliaeri ambe”. Peru, tátichaksïsï jatsiti para exeni sini uétarhia ísï úni o sinksï uá ísï úni. w19.12 26, 27 párr. 18-20

Engachi no sési ambe nitamakuarhini jarhajka, mintsita jingonchi jaiapanhikuantasïnga imechani engajtsïni jarhuatajka. Juan, enga ma repentku uarhiranchapka táti jémbani aksidenti ma jimbo, uandasïndi: “Jiáni engari kómu nitamakuarhini jarhajka, ísïri pʼikuarherasïnga enajkiri no uá úni imani ambe engari pauani pauani újka. Kánikuari jukaparharasïnga engaksïni máteruecha jarhuatajka, nájkiruka ísï xarharajka enajki no ma ambee”. Ju je méntkisï exeni na enga xáni jarhuataaka nemani enga no sési nitamakuarhini jauaka ambe engachi uáka imani jimbo, nájkiruka sapichitu ambeuaka. Makusï enga primeru siglurhu irekapka, seguru eska uánikua ambe uénga. Nájkiruka xáni uánikua ambe jatsipka para úni, arhutaspti tiempu para apostuli Pabluni uinhaperantani ka Pablu mintsinharhisïrendi para jarhuajperata kúrhakuni. Engaksï Ángelaeri mama kʼérini uandikupka, ima kánikua jukaparharaspti engaksï imecha engaksï uinhaperantapka májkueni úpka eska Markusï. Ángela uandantasïndi: “Engaksïni erachicha meru uéjka jarhuatani, no úkua jukasïndi andarhieraani. Méntkisïksïni jarhuatasïndi ka tsípikua jingoni”. Ísï jimbo, ju je kurhamarhikuarhini: “¿Ísïjtsïni exesïni máteruecha eskani jingontkuni jarhasïnga parani sési pʼikuastantaani erachichani?”. w20.01 12 párr. 14-16

¿Néna úpirini erakukata ma arhani kurhinda ka binu peru no jukanchani para ísï úni? Enga apiringa kurhindani ka binuni peru no ísï irekani eska Jeobaeri juramukuecha na uandajka (Ebr. 6:4-6; 10:26-29). Erakukatechaksï mítesti eskaksï jatsiska para no méni jurajkuni Jeobani engaksï uéjka ‛andani indeni premiuni enga jimbo Diosï ióarhiaka auandarhu uératini Jesukristuni jimbo’ (Filip. 3:13-16). Jeobaeri espiritu santu úsïndi eskaksï kʼuiripuecha sánderu kaxumbitiuaka ka no eskaksï sánderu kʼéramakuarhiaka (Efes. 4:1-3; Kol. 3:10, 12). Jimboksïsï erakukatecha no ísï pʼikuarherajti enajkiksï sánderu kʼéri ambee ka eska máteruecha. Mítestiksï eska no solu jimbokaksï erakukateska, Jeoba sánderu espiritu santu íntsaasïnga ka eska máteru imeri marhuarichani. Níjtuksï eratsejka eskaksï sánderu sési míteska Bibliaeri ambe eska máteru kʼuiripuecha. Ka nóksï méni arhipirindi nemani: “Tʼújturi erakukateska, jatsipiringari para kurhinda ka binu arhani Miántskuarhu”. Sánderu sési, kaxumbikua jingonksï jiókuarhisïndi eska Jeobajkusï újka pʼímarhini nemani para auandarhu nirani. w20.01 27, 28 párr. 4, 5

Jeoba uékasïndi eskachi andarhieraaka ka eskachi méntkisï kómarhiaka. Arhisïndijtsïni eskachi méntkisï kómarhiaka ka ima méntkisï jingontku jarhasïndi parajtsïni kurhajchani (Rom. 12:12). No méni kuataraati o kuatantani parajtsïni kurhajchani. ¿Ka nénachi kurhajchaa jucha imani? Ma ambe engachi uáka úni, jindesti arhintani imeri Karakatani ka publikasionichani engajtsïni jarhuatajka kurhanguni Bibliani. Ístuchi kurhajchasïnga engachi jingontku kurhaajka tánguarhikuecharhu. Sánderuchi andarhieraaka Jeobani engachi someni kómarhiska. Ima uékasïndi eskachi ísï uáka (Sal. 62:8). Jimbosï xáni sésiiti eskachi kurhamarhikuarhiaka: “¿Someni ma ambejkuni kómarhini jarhasïni Jeobani? ¿O ísï kómarhisïni Jeobani komueskani na uandontskuarhejka amigu ma jingoni engani iámu ambe aiangukuarhijka?”. Ísïsti, kánikuachi xénchajka Jeobani ka uékasïngachi méntkisï imani jingoni jarhani. Ka para ísï úni, jatsiskachi para someni kómarhini. Ju je mintsita jingoni aiangukuarhini ambe engajtsïni sési pʼikuastajka ka imani ambe engajtsïni uandanhiatajka. Ju je seguru jarhani eskachi uáka imani kómarhini parajtsïni jarhuatani. w20.02 8, 9 párr. 4, 5

Jeoba orhejtsïkutichani jurajkukuasti ánchikuarhita paraksï imeri marhuarichani kuidariuani. Orhejtsïkutichaksï uáti uánikua ambe jorhenguarhini juramuti Neemiasiri ambe na enga kámapka Tata Diosïri iretani. Jimboka juramutispka Juda, kʼéri ambeespti (Neh. 1:11; 2:7, 8; 5:14). Ju je exeni ambe enga nitamakuarhipka. Mítespti eskaksï Judiuecha ikichakueni jásï ambe úspka templurhu ka eskaksï no ntsaaxapka lebitechani tumina eska na uandenga Lei. Ístuksï no jukaparharasïrendi jurhiatikua sábaduni ka máruksï máteru paisirhu anapuecha jingoni tembuchaspti. Ísï jimbo Neemiasi jatsispti para úni ambe ma (Neh. 13:4-30). Neemiasi no úraspti imeri juramukuani para úni eskaksï judiuecha afuersa kurhajchapiringa. Sánderu sési, mintsita jingoni kómarhispti Jeobani eska jarhuatapiringa ka jorhendaaspti kʼuiripuechani ambe enga Tata Diosïri Lei arhienga (Neh. 1:4-10; 13:1-3). Ístu, kaxumbitispti ka asta májku kʼéri ánchikuarhispti judiuecha jingoni paraksï ménderu uántani Jerusaleni anapu bardechani (Neh. 4:15). w19.09 15, 16 párr. 9, 10