Juliu

Ambe ma engajtsïni uáka uandanhiatani jindesti eskajtsïni nema no sési arhiaka o no sésijtsïni kámani ka sánderia enga ambakiti amigu máeuaka o kʼumanchikuarhu anapu ma. Parachi no xáni uandanhiani, uákachi uánikua ambe jorhenguarhini Aneri ejemplu jingoni. Biblia uandasïndi eska imeri acheeti máteru témbani jatsispka enga teresmarhuenga Anani (1 Sam. 1:12). Májkueni eska Ana, juchajtuchi uáka ióni uandontskuarhekuni Jeobani ka aiangukuarhini ambe engajtsïni uandanhiatajka ka ambe enga újka eskachi chéaka. Engachi kómarhijka, no uétarhisïndi eskachi sési járhati uandakuechani úrauaka. Jamberichi ménisï kánikua kómu pʼikuarheraparini o ueparini kómarhiaka. Perujtsïni Jeoba no méni kuatantaati kurhajchani. Aparte de juchari uandanhiatecheri ambe aiangukuarhini, jatsiskachi para miáni imani konsejuechani ambe engaksï Filipusʌ 4:6, 7 jimbo jaka. Ixú, apostuli Pablu uandaspti eska engachi kómarhiaka, jatsiskachi para diosmaiamukua arhini Tata Diosïni. Ka jarhasti uánikua ambe engachi jimbo uáka ísï úni. Por ejemplu, tsípikua jimbo, ambe enga xáni kueraaka, imeri ambakiti uékperakua jimbo ka imani erokuarhikua jimbo engajtsïni íntskuka. w20.02 21 párr. 3, 6

Jeobaeri intsïmperakua máesti engachi jucha újka uandani (Éx. 4:10, 11; Jaŋ. 4:11). Imeri Karakata jimbo, jorhendasïndijtsïni parachi sési úrani ini intsïmperakuani. Méntkisïchi jatsiska para uandantani Jeobaeri ambe ka imeri Reinueri (Mat. 24:14; Rom. 10: 14). Engachi ísï újka, májkuenchi úni jarhasïnga eska Jesusi. Ma ambe jimbo enga Jesusi jupka Echerirhu, jindespti para jurhimbitku ambe uandantani imeri Tátiri ambe (Juanu 18: 37). Peru ístu, jatsiskachi para miáni eska kánikua jukaparhakueska exeni na engachi uandajka. Ísï jimbo, engachi aianhpini jauaka Jeobaeri ambe, jatsiskachi para “kaxumbikua [...] ka janhanharhikua jingoni” aianhpini ka no no sési pʼikuastpini imani ambe jimbo engaksï kʼuiripuecha jakajkujka (1 Ped. 3:15). Engachi ísï úska, nóchi ísku uandani jauaka, sino jorhendauakachi kʼuiripuechani ka jamberichi mintsitarhu niárakuani. Engaksï orhejtsïkuticha exejka eska erachi o pirenchi ma uétarhinchaxaka konseju ma, nóksï jatsisti para pínasku pakarani. Peru orhetaksï jatsiati para exeni na jatinksï uá konseju íntskuni, jamberi jiáni engaksï uáka erachi o pirenchi jingontku uandontskuarheni paraksï no ísku jatini kʼuratsetani. w20.03 18, 19 párr. 2-4

¿Ambe jimbochi kómarhia? Uákachi kurhakuni Tata Diosïni parachi sánderu jakajkuni imani (Luk. 17:5; Juanu 14:1). Uétarhinchasïngachi jimboka Noambakiti tsʼéjkuauaka iámindu Jesusiri chúxapatichani (Luk. 22:31). ¿Nénajtsïni jarhuataa jakajkukua? Engachi na uákia iámindu ambe engachi jucha uáka úni, mintsikani Jeobani, uáti eskachi imani jurajkukuaka ambe engajtsïni uandanhiatani jauaka. Míteni eska ima sánderu sési úsïnga úni ambe ma, uáti eska juchari eratsekua ka mintsita no uandanhiauaka (1 Ped. 5:6, 7). Kómarhikuajtsïni jarhuatasïndi seguirini jarhani pínandikua jatsini ambe uéjkichi nitamakuarhini jarhani. Ju je exeni ambe enga Robert nitamapka, ambakiti orhejtsïkuti ma enga jukari 80 jatirikia. Ima uandasïndi néna úsïni para seguirini jarhani pínandikua jatsini: “Desde iónisïa, ambe enga Filipusʌ 4:6, 7 arhijka, jarhuatasïndirini orhepani uérakuani uánikua uandanhiatechani. Jatsiaspka problemechani tumina jimbo, ka ma tiempu jurajkuspka orhejtsïkutini”. Ístu uandasïndi: “Jirejiresï kómarhisïnga engani uénajka uandanhiani. Ísï exesïnga eska engani mintsitarhu uératini kómarhijka ka sánderu someni, sánderuni jatsisïnga pínandikua”. w19.04 9, 10 párr. 5-7

Ima enga ísku ambe ma úkuajka sapiichani, no janhanharhisïndi Jeobani. Enga kʼuiripu ma no sési úkujka máteruni, ístu no sési úkusïndi Jeobani. Ju je exeni ejemplu ma enga imani Lei jimbo jaka enga Jeoba ireta Israelini íntskupka. I lei uandasïrendi eska ima enga sïpapiringa o euakuarpeni ambe ma, no janhanharhisïrenga Jeobani (Lev. 6:2-4). Kúnguarhikuarhu anapu ma enga ísku ambe ma úkujka sapini ma, úparini eska sapi nóteru seguru pʼikuarherakia, no janhanharhini jarhasïndi Jeobani ka no sési pakatasïndi imeri nombrini. Ísï jimbo, no sési úkuni nemani, kʼéri pekadu máesti engachi méntku no sáni jaiapanhintajka. Rebistecharhu Aianhpiri ka ¡Tsínharhi!, uérastiksï artikuluecha engaksï uandajka nénaksï uá orhepani uérani imecha engaksï kánikua no sési pʼikuarherani jarhajka jimbokaksï biolarinhaska, nénaksï uá máteruecha jarhuataani ka sési pʼikuastantaani ka nénaksï uá táticha kuájchakuani imecheri sapiichani. Ístuksï orhejtsïkuticha intsïnhasïndi informasioni enga Bibliarhu pʼitakateka para ambe engaksï jatsika para úni enga nema ísku ambe ma úkujka sapini ma. Jeobaeri organisasioni someni exeni jarhasïndi ambe engaksï jatsijka para úni orhejtsïkuticha enga sapi ma ísku ambe ma úminhajka. w19.05 9, 10 párr. 8, 9

Tata Diosïri Karakata ísïsti komu espada uarhomukukata ma enga újka iauani jamberi inchani parachi míteani Noambakitiri chkuanderakuechani (Efes. 6:17). Por ejemplu, Biblia arhisïndi eskaksï uarhiricha no úsïnga kʼuiripuecha jingoni uandontskuarheni (Sal. 146:4). Ístujtsïni miátantasïndi eska Jeobajkusï újka uandani ambe enga meru úkuarhiaka sánderu orhepani (Is. 45:21; 46:10). Engachi pauani pauani arhintaska ka eratsentani ambe enga arhijka, jingontkuchi jauaka para no jiókuarhini ka kurhunhini demoniuecheri chkuanderakua ambe. Ísï jimbo, ju je no ma ambe úni enga sïkuamikueri ambeka. Ambakiti kristianuechachi no nirasïnga sïkuamicha jingoni, nichi jámajki uarhiricha jingoni uandontskuarheni. Nóchi uásïnga imani pʼindekuechani enga xáni únhajka jiáni enga nema uarhijka, komu ima ambe engaksï jakajkujka eskaksï uarhiricha seguirini jarhasïnga tsípiti jarhani máteru nanisï. Nijtuchi uéjki míteni ambe enga úkuarhiaka sánderu orhepani úrapariani oroskopuechani o exerkuarhiparini. Nóchi jatsiska para ini ambe kámani ni máteru ambe enga sáno májkueni jáxeaka. Míteskachi eska i ambe kánikua no sési útspesïnga ka eska ini ambe jingonchi uáka Noambakiti ka demoniuecha jingoni jarhani. w19.04 21, 22 párr. 8, 9

Kʼuiripuecha engaksï jaiapanhentajka ambe enga parhakpini jorhentpijka, no sésiksï exeasïndi juramukuechani engaksï Bibliarhu jaka ka uandasïndiksï eska iásï ménderueniskia. Jamberiksï kurhamarhikuarhijti, ¿andijtsïnisï Tata Diosï ísï kueraa parachi uékani relasioni seksuali jatsini ka jinijtsïni arhini eskachi pʼíngukuarhiaka indeni ambe jimbo? Ísï eratseni no sési jarhasti, jimbokaksï kʼuiripuecha imani ambejkusï uéjka úni ambe engaksï imecha tsitijka. Peru Biblia méntku máteru ambe arhisïndi. Uandasïndi eskachi uáka pʼíngukuarhini parachi no ikichakueni jásï ambe úni, ka ísïchi janhanharhinhaaka (Kol. 3:5). Ístu, Tata Diosï ústi temungurhirikuani para acheeti ka uarhiiti úni relasioni seksuali jatsini ísï eska ima na jaiapanhentajka (1 Kor. 7:8, 9). Bibliajtsïni jorhendasïndi na engachi jatsika para exeni seksueri ambe ka no ísï eska parhakpini anapuecha na exejka. Uandasïndi eska relasioni seksuali jatsini ambe máeska enga sési pʼikuastpijka (Prov. 5:18, 19). Peru ístujtsïni arini konseju íntskusti: “Eskajtsï jorhenguarhiaka pʼíngukuarhini paraka chári kuerpuecha pímbinhaxeaka janhanharhikua jingoni, ka nójtsï jurajkutakuarheni para ísku ambe úni” (1 Tes. 4:4, 5). w19.05 22, 23 párr. 7-9

Tata Diosï no jurajkuati eskaksï kʼuiripuecha kʼamajkuauaka imeri marhuarichani, jimbokaksï imecha tsípikua jingoni aianhpisïnga imeri nombrini ka kurhajchasptiksï Tata Diosïni enga juramukuapka paraksï Kʼéri Babilonia uéntani (Uku. 15:16, 17; Jaŋ. 18:4). Ístuksï jánguarhintasti jarhuataani máteruechani paraksï májkueni úni. Ísï jimbo, nóksï ‘kastigarhinhaati’ ísï eska Kʼéri Babilonia (Ezeq. 38:2, 8). Engaksï relijioni no jurhimbiticha na iámu kʼamajkunhaakia, Tata Diosïri ireta ísï jandiajku pakaraati komueska anhatapu ma enga na nitamajkia kʼéri janikua ma. Peru Noambakiti kánikua ikiani jauati. Ísï jimbo, imani ambe úraati enga demoniuecherika —“noambakitiri espirituecha engaksï uájka milagruechani”— paraksï úni eska grupu ma nasionicheri engaksï kúnguarhintaaka, no sési kámaaka Jeobaeri iretani (Jaŋ. 16:13, 14). I iretecha engaksï kúnguarhintaaka, arhinhasïndi ‘Gog enga Magog anapu echerirhu anapueka’. Engaksï kʼuiripuecha uénaakia no sési kámani Tata Diosïri iretani, niáraatiksïa jima enga arhinhajka Armajedoni (Jaŋ. 16:16). w19.09 11 párr. 12, 13

Ióntki anapu Israeliri jurhiatikuecha jimbo, Noambakiti úraspti relijioni no jurhimbitini para úni eska japiringa ísku jándikua ambe. Iásïjtu májkueni úsïndi. Relijioni no jurhimbiti no no sési exesïndi ísku jándikua ambe ka asta úsïndi eska no no sési xarharaaka. Ísï jimbo, uánikua engaksï uandajka marhuakuni Tata Diosïni, nóksï ísï úsïndi eskaksï imeri juramukuecha na uandajka. ¿Ambe niáraski úkuarhini? Ima ambe niárasti úkuarhini enga apostuli Pablu Roma anapuechani karakuapka (Rom. 1:28-31). Máru ambe “enga nómindu terukuntajka”, jindesti ísku jándikua, ístu enga tataka ma nanakeni jámajka o nanaka ma tatakeni jámani (Rom. 1:24-27, 32; Jaŋ. 2:20). Ísïsti, kánikua jukaparhakuesti eskachi imani ambe uáka enga Biblia jorhentpijka. Ambe enga kʼuiripu jorhentpijka, no terukuntasïndi Tata Diosïri juramukuecha jingoni engaksï jurhimbitiika. Nóksï úsïndi eskaksï xarharaaka ambe enga Jeobaeri espiritu úrpijka, sino ambe enga mintsita tamapu újka, o no sési jásï ambe (Gal. 5:19-23). Kʼéramakuarhini ka kánikua sési exekuarhini, í ambe úsïndi eska kʼuiripu jandiajkumindu pendienti pákuarhiaka (2 Tim. 3:2-4). Ísï jámani méntku no sáni terukuntasïndi eska na uéjka Jeoba eskachi kaxumbitiuaka (2 Sam. 22:28). w19.06 5, 6 párr. 12-14

Eliasi jiánisï marhuakuspti Jeobani enga no sési jánhaskuarhini japka ka uáni problemechani nitamakuarhiaspti. Jeoba arhispti Eliasini eska máru ánchikuarhita ambe iásï Eliseu úpiringuia. Ísï, amiguni ma íntskuspti enga úpiringa jarhuatani jiáni enga no sési pʼikuarherani japiringa. Májkueni, engachi jatsika amiguni ma engachi mintsikajka, imajtsïni uáti jarhuatani engachi no sési nitamakuarhini jauaka (2 Rey. 2:2). ¿Ka engachi ísï exejka eskachi no nemani jatsiska engachi uáka aiangukuarhini juchari uandanhiatechani? Jimajkani ju je kómarhini Jeobani eskajtsïni jarhuataaka exentani ambakiti erachini o pirenchini ma engajtsïni jarhuataaka jiáni engachi uétarhinchani jauaka. Jeoba jarhuataspti Eliasini paraka úpiringa orhepani uérakuani imeri uandanhiatechani ka para ióni jamberi sési marhuakuni. Ambe enga Eliasi nitamakuarhipka, úsïndi eskachi juchajtu uáka orhepani uérani. Jamberiksï jauati jurhiatikuecha engachi kánikua uandanhiani jauaka engajtsïni kuatajkuaka ka no sési pʼikuastani. Peru engachi mintsikaska Jeobani, imajtsïni íntskuati uinhapikua parachi seguirini jarhani marhuakuni (Is. 40:28, 29). w19.06 15 párr. 4; 16 párr. 9, 10

Nirani uandantani ambakiti ambe Tata Diosïri Reinueri, jarhuataatijtsïni sánderu balori jukani. ¿Andi? Jimboka nirani aianhpini, uáka eskachi mintsikaaka Jeobani ka no chérhini kʼuiripuni. Májkueni eska juchari kuerpu na uinhapiti jarhajka engachi ejersisiu újka, sánderuchi balori jatsisïnga engachi kʼumanchikuecharhu aianhpijka, xanharu jimbo, nani uéjkisï ka jimesïsï enga ataranhantajka ambe ma. Engachi balori jingoni aianhpiska iásï, listuchi jauaka para seguirini jarhani ísï úni, nájkirukachi nóteru jurajkunhaakia úni juchari ánchikuarhitani (1 Tes. 2:1, 2). Uánikua ambechi jorhenguarhisïnga ambakiti pirenchiri ma enga kánikua balori xarhatapka. Jindeesti Nancy Yuen. Ima ma metru ka terujkaniskusï (5 pies) iójtarhapti, peru no fásili chésïrendi. Jimboka no uékaspka jurajkuni aianhpini Reinueri ambe, beinte uéxurhinisï ónhakata jarhaspti jini China. Gobiernueri ánchikuarhiricha engaksï kurhamarhikuechani úkuapka, uandasptiksï eska paisirhu no nema jarhaspka enga sánderu inchandimienga eska pirenchi. w19.07 5 párr. 13, 14

Máruksï uékaxati míteni Bibliaeri ambe. Peruksï máteruecha no interesi xarhatasïndi uénani jámani ka jamberichi jatsiaka para jirinhakuntani ambechi uá úni paraksï tsitini jorhenguarhini. Parajtsïni sési nicheni, jatsiskachi para sési míteni amberi uandontskuarhekuni kʼuiripuni. Ju je exeni ambeksï uékapirini kurhaani ka eratseni nénachi úpirini aianguani. Por ejemplu, úpiringachi arhiani: “Uékapiringa míteni ambejtsï eratsesïni ariri ambe. Ini jurhiatikuecha jimbo iápurisïchi no sési nitamakuarhisïnga. ¿Exesïntsï eska uétarhisïnga juramukua ma enga interu parhakpinirhu sési peentaaka ambe?”. Tátsekuachi úpiringa arhintani Daniel 2:44 ka uandani inderi ambe. Ochi jamberi úpiringa arhini: “Chá na exesïni, ¿néna uétarhijki jorhendaani sapiichani paraksï ambakiti kʼuiripuecheni?”. Jimajkani úpiringachi exerani Deuteronomio 6:6, 7. Meruchi kánikua tsípisïnga jarhuatani nemani Kristueri chúxapatiini. w19.07 15 párr. 4, 6, 7

Lejano Oriente anapu erachi ma enga ióni páni jakaia predikarikuani imechani engaksï no tsitijka relijioniri ambe, uandantasïndi: “Sáno méntkisï enga ixú nema uandajka eska no jakajkusïnga Tata Diosïni, arhikuekasïndi eska no uétarhisïnga kómarhiani imecheri diosïchani. Kasi méntkisï arhiasïnga eskani jíjtuni májkueni eratsesïnga, eskaksï sáno iámindu diosïcha no jurhimbitiska, sino eskaksï kʼuiripuecha uáska. Arhikuantasïnga Jeremías 16:20 ka kurhamarhiasïnga nénachi úpirini míteni nákiski Tata Diosï jurhimbiti ka nákiskiksï diosïcha enga kʼuiripu uáka. Jingontkuni kurhajchaasïnga ambe engaksï uandaaka ka arhikuantasïnga Isaías 41:23: ‘Aiangujtsïni je ambe úkuarhia sánderu orhepani parachi úni míteni eskajtsï cha diosïska’. Tátsekua exerasïnga ambe enga uandakia Jeoba eska uáka sánderu orhepani”. Máteru erachi ma uandasïndi: “Exeraasïnga ejempluechani na enga xáni marhuajka Biblia, profesiauechani engaksï kumplirikuarhikia ka ístuni uandontskuarhekuasïnga echeriri ambe, parhakpiniri ka jóskuecheri ambe. Tátsekua, jarhuataasïnga kurhanguni eska iámindu i ambe xarhatasïnga eska jarhaska Kuerajpiri ma enga tsípitiika ka jánhastiini. Enga kʼuiripu uénani jarhajkia jakajkuni eska Tata Diosï jarhaska, jiájkani exerasïnga ambe enga Biblia uandajka Jeobaeri ambe”. w19.07 23, 24 párr. 14, 15

Máru ambe enga jukaparhakueka jindesti eska Tata Diosïri nombri pímbinhajkunhantaaka, eska kumplirikuarhiaka ambe enga ima uéjka ka eskaksï kúnguarhikuarhu anapuecha májku kʼéri jauaka ka pínandikua jingoni (Mat. 6:9, 10; Juanu 13:35). Engachi sánderu jukaparharajka ini ambe juchari irekuarhu, xarhatasïngachi eskachi xénchasïnga Jeobani. Pablu ístu uandaspti eskachi no uáka ambe ma engachi jimbo no jaiapanhenhantaaka. I ambe no arhikuekasïndi eskachi méntkisï sési uáka ambe ma. Jeobajtsïni pímbinhasï exeati engachi jánguarhintaska sánderu ka sánderu uékpini ka imani ambe úni enga sánderu jukaparhakueka. Ma ambe engachi uáka úni para xarhatani uékperakua, jindesti no no sési ambe niátataraani máteruechani. Kánikua jukaparhakuesti ari konseju parachi no úni eskaksï máteruecha no sési ambe uáka. Ambe engachi jingoni tsípikuarhijka, na engachi xukuparhajka o asta juchari ánchikuarhita uáti eskaksï máteruecha no sési ambe uáka. Jamberichi no no sési ambe niátaaka, peru kánikua no sési japirindi eska imani ambe jimbo engachi erakuaka úni no sési pʼikuastapiringa nemani ka eska no sési ambe úpiringa (Mat. 18:6). w19.08 10 párr. 9-11

Desde 1935 uératini, Jeobaeri testiguechachi jakajkusïnga eskaksï ima uánikua kʼuiripuecha enga Juanu jánhaskua jimbo exeapka, jindeeskaksï ima ambakiti kristianuecha engaksï irekaaka para méntkisï ixú Echerirhu (Jaŋ. 7:9, 10). Paraksï úni tsípiti pakarani enga kʼéri miskuarhita úkuarhiaka ka ‘sïpakorhenksï enga xáni ambe úkorheaka’, íksï kristianuecha jatsisti para míteani Jeobaeri juramukuechani ka xarhatani eskaksï kʼéri jakajkukua ma jatsiska antede Jesusi uénani Juramuni Mili Uéxurhini (Luk. 21:34-36, TDU). Ambe engaksï erokuarhini jaka ima uánikua kʼuiripuecha, úsïndi eskaksï tsípikua jingoni irekaaka. Kurhangusïndiksï eska Jeobasï uandajka sini imeri ambakiti marhuari ma auandarhu irekaa o Echerirhu. Erakukatecha ka ístu uánikua kʼuiripuecha, kurhangusïndiksï eska imecheri kóntperata, jindeeska jimboka Jeoba íntspiska Jesusiri tsípikuani para úni pʼímutaantani, nájkirukaksï no jukanchaka indeni ambe (Rom. 3:24). w19.09 28 párr. 10; 29 párr. 12, 13

¿Jimbanhi ánchikuarhitajtsï ma intsïnhaski? Jánguarhinta je sési úni. Ju je no eratseni eska engachi iásï máteru ánchikuarhita jatsikia Jeobaeri kúnguarhikuarhu jindeeska jimbokachi no sési úspka ambe ma o eskachi iásï nóteru xáni ambakiti erachi o pirenchi máeskia. Ju je jánguarhintani exeni nénajtsïni jarhuataxaki Jeoba ka seguirini aianhpini. Ju je májkueni úni eska primeru siglu anapu erachicha engaksï seguirini japka “uandantani ambakiti eianhperakuani nani engaksï nirenga” (Uku. 8:1, 4). Engachi seguiriska aianhpini, jamberijtsïni sési nicheati. Por ejemplu, engaksï máru prekursoricha petanhantapka paisi ma jimbo, imechaksï máteru paisi jimbo mótsispti nani enga ístu uétarhini japka aianhpinhani imani idioma jimbo engaksï prekursoricha jorhenapka uandani. Máru mesicha jimbo, grupuechaksï niáraspti jarhani engaksï sóntku uánini japka. Ambakiti pájperakua ma jatsi je Jeoba jingoni. Ísï jimbo, ju je no jurajkuni Tata Diosïni, mintsikani eskajtsïni jarhuataaka, arhistachiaka ka úni eskachi jánhaskatiuaka. Ju je miáni eska ambe enga úpka eskachi tsitipiringa imani ánchikuarhitani engachi antesi uénga, jindeespka jimbokachi mintsita jingoni uékasïrenga jarhuataani kʼuiripuechani. Jeobajtsïni jarhuataati parachi májkueni pʼikuarherani iásï engachi mintsita jingoni úska jimbanhi ánchikuarhitani Jeobaeri kúnguarhikuarhu (Ecl. 7:10). w19.08 24, 25 párr. 15, 16

Jatsiskachi para Jeobani kurhajchani. Ima jindesti juchari Kuerajpiri ka jimbojtsïnisï újti arhini ambe engachi jatsika para úni (Jaŋ. 4:11). Peru sánderu jukaparhakua ambe engachi jimbo jatsika para kurhajchani, jindesti jimboka ima sánderu ambakiti juramuti máeska. Desde iónisïa, uánikua kʼuiripuechaksï juramukuastia máteruechani. Peru no ma jarhasti enga ísïka eska Jeoba, enga sánderu jánhaskatiika, uékpitiini, ka pʼamojpitiini (Éx. 34:6; Rom. 16:27; 1 Juanu 4:8). Kurhajchasïngachi Jeobani engachi jánguarhintajka iámindu ambe ísï úni eska ima na uandajka ka no imani ambe engachi jucha eratsejka eska sési jarhaska (Prov. 3:5). Engachi mítejka na enga jásï Tata Diosï máeka, sánderu fásilisïndi kurhajchani, jimboka iámindu ambe enga ima újka xarhatasïnga na enga jásïka (Sal. 145:9). Engachi sánderu sési mítejka Jeobani, sánderuchi xénchasïnga. Ka engachi xénchajka, nóchi uétarhinchasïnga eskachi uánikua ambe arhinhaaka ambe engachi jatsika para úni ka ambe nómbe. w19.09 14 párr. 1, 3

Noambakiti no sési pʼikuastaasïndi kʼuiripuechani chkuanderakuecha jingoni enga újka eskaksï no jánhaskaaka ambe úni. Por ejemplu, uékasïndi eskachi jakajkuaka eskajtsïni Jeoba no puáchintasïnga engachi no sési ambe újka ka eskachi no jukanchaska parachi xénchanhani. I ambe kʼéri chkuanderakua máesti ka meru no sési pʼikuastpesïndi (Juanu 8:44). Engachi andarhierajka Kristuni, Jeobajtsïni puáchintasïndi imani ambe engachi no sési niátaka (Mat. 11:28). Ka kánikuajtsïni xénchasïndi (Rom. 8:32, 38, 39). Ánchikuarhita engajtsïni Jesusi pʼímarhijka para úni, no májkuenisti eska máteru jásï ánchikuarhita ambe engachi újka. Por ejemplu, engachi na kʼamarajkia ánchikuarhini ma jurhiatikua, no soluchi kuatarasïnga, ístuchi no konformi pakarasïnga. Peru marhuakuni Jeobani ka Jesusini, úsïndi eskachi kánikua sési pʼikuarheraaka. Jamberichi kuataratini jauaka ka jatsinchi para jánguarhintani nirani tánguarhikuarhu. Peru, ¿a no eskachi kánikua sési pʼikuarheraparini nintasïnga kʼumanchikuarhu ka uinhapikua jingoni? Ka májkueni úkuarhisïndi engachi jánguarhintajka nirani aianhpini o jatsini máeri jorhenguarhikua. Kóntperata engachi intsïnhajka, úsïndi eskachi sési pʼikuarheraaka engachi jánguarhintajka úni ambe ma. w19.09 20 párr. 1; 23, 24 párr. 15, 16

Ini sánititu tiempu enga pakarani jaka antesi de janoni “Tateeri jurhiatikua”, Jeoba erokuarhisïndi eskachi okupadu jauaka aianhpikuarhu. Jatsiskachi para exeni eskachi ‘méntku jauenaxaka úni Diosïri úkuani’ (1 Kor. 15:58). Enga Jesusi uandapka ambe enga xáni úkuarhipiringa últimu jurhiatikuecha jimbo, uandaspti: “Peru uétarhisïndi eska orheta iápuru nasionicharhisï eianhpinhaaka ambakiti eianhperakua” (Mar. 13:4, 8, 10; Mat. 24:14). Ju je eratseni arini ambe: méni engachi nirajka aianhpini, jarhuajpisïngachi paraka kumplirikuarhiaka ambe enga Biblia uandajka. Mándani uéxurhini enga nitamajka, sánderu uáni kʼuiripu kurhaasïndi ambakiti aianhperakua Reinueri. Ju je exeni na engaksï sánderu uánikia Reinueri aianhpiricha ini últimu jurhiatikuecha jimbo. Uéxurhini 1914 jimbo, 5,155 aianhpirichaksï jarhaspti43 paisicha jimbo. Iásïchi ma 8,500,000 aianhpiricheskia240 paisicha ka territoriucha jimbo. Peru juchari ánchikuarhita nótki kʼamakurhisïndi. Jatsiskachi para seguirini uandantani eska solu Tata Diosïri Reinu kénditaaka iámindu uandanhiata ambe engaksï kʼuiripuecha jatsijka (Sal. 145:11-13). w19.10 8 párr. 3; 10 párr. 7, 8

Jeoba, Barsiláini úraspti para rei Dabidini jarhuatani. Enga rei ka acheeticha engaksï imani jingonipka Dabidiri uájpani ma sïpakuarhikuni japka, Absalonini, kuatarasptiksïa, kʼarhimani ka kʼarhichani. Nájkiruka Barsilái kánikua jatiripkia, niraspti máteruecha jingoni pákuani ambe nájkirukaksï úpiringa no sési úkuarhinchani. Barsilái no eratsispti eska nóteru úpiringuia marhuakuni Jeobani jimboka jatirispkia, sánderu sési, niáraspti intsïmbini ka úrani ambe enga jatsipka para jarhuataani Tata Diosïri marhuarichani engaksï kómu nitamakuarhini japka (2 Sam. 17:27-29). ¿Ambechi jorhenguarhisïni? Eska no arhiparini na engachi xáni jatiriuakia, Jeobajtsïni uáti úrani para jarhuataani nani uéjki anapu erachichani para íntsaani imani ambe enga meru uétarhijka (Prov. 3:27, 28; 19:17). Asta engachi no úska jucha mismu jarhuataani, uákachi tumina íntspini para ánchikuarhita enga interu parhakpini úkuarhijka parachi úni jarhuajpini jiáni ka nani enga meru uétarhini jauaka (2 Kor. 8:14, 15). w19.10 21 párr. 6

Engajtsïni ménisï nema no sési ambe úchika, jamberichi úkua jukanchajkia aianguani máteruechani na engachi pʼikuarherajka (Prov. 18:19). Ístuchi úpiringa ísï exeni enajkichi nóteru uáia ambakiti amiguechani jatsiani ochi no jatsini tiempu para ísï úni. Peruchi no jatsiska para ísï eratseni. Engachi uéjka eskajtsïni juchari erachicha o pirenchicha jarhuataaka jiáni engachi tsʼéjkukua ambe jatsiaka, jatsiskachi para desde iásï mintsikaani ka aianguani ambe engachi eratsejka ka pʼikuarherani. Ísï úni, kánikua jukaparhakuesti para ambakiti amiguechani jatsiani (1 Ped. 1:22). Jesusi xarhataspti eska mintsikaasïrenga imeri amiguechani jimboka iámindu amberi uandontskuarhikuasïrenga (Juanu 15:15). Uákachi májkueni úni engachi aiangukuarhiska nemani ambe engajtsïni sési pʼikuastajka, uandanhiatajka o engajtsïni máteru nema no sési pʼikuastaka. Peru ístu, jatsiskachi para jingontku kurhajchani nemani engajtsïni aiangukuarhini jauaka ambe ma, jamberichi ísï uáka míteni eskaksï imechajtu májkueni pʼikuarherasïnga ka eratseni eska jucha ka eskachi májkueni ambe uékasïnga úni. Ju je jucha uénani mintsita jingoni uandontskuarhikuani máteruechani ka uékperakua jingoni (Prov. 27:9). w19.11 4 párr. 8, 9

Jamberichi máteru ambe aianhpiakia kʼéri mískuarhita jimbo. Ini jurhiatikuecha jimbo, ambakiti ambechi aianhpixaka Reinueri ka jánguarhintaxakachi Jesusiri chúxapatichani uáni. Peru jamberichi jiáni máteru ambe aianhpiakia. Biblia uandasïndi eska ambe engachi aianhpiaka, ísïuaka komueska tsakapuecha xanuateri (Jaŋ. 16:21). Jamberichi aianhpiaka eska Noambakitiri parhakpini kʼamajkunhaakia. Sánderu tátsekuachi niáraka míteni ambe engachi aianhpiaka ka nénachi úa. ¿Seguirinchi jaua májkueni aianhpini, ochi ménderueni uáia? Parachi indeni ambe míteni, jatsiskachi para erokuarhini. Néna uéjki, peekachi intsïnhaaka kʼéri kóntperata parachi no chéparini aianhpini eska Jeoba jusgarpeaka (Ezeq. 2:3-5). Jamberi ima ambe engachi aianhpini jauaka, uáti eskajtsïni juramuticha jánguarhintaaka pʼínguni. Ísï eskachi iásï na mintsikajka Jeobani aianhpikuarhu, ístuchi májkueni mintsikaaka jiáni. Uákachi seguru jarhani eskajtsïni Jeoba íntskuaka uinhapikua parachi úni ambe enga ima uéjka (Miq. 3:8). w19.10 16 párr. 8, 9

Uandakua ‘támu peerani’, arhikuekasïndi eskachi uáka nóteru mintsikania Jeobani engachi sánhani arhiska sánderu jukaparharani jatsikuarhikua ambe. Juchari mintsita úpirindi uénani tsitini mámaru ambe enga no marhuajka ka ístu enga no sési útspijka (1 Tim. 6:9). Ísï jimbo ju je no jurajkuni eska juchari mintsita uénaka jatsikuarhikua ambe tsitini. Ju je no mirikurhini eska Noambakiti uékasïnga eskachi tsitiaka jatsikuarhikua ambe para úni eskachi nóteru xáni mintsikakia Jeobani. Peru ju je eranhaskani eskachi jatsiska tumina para uánikua ambe piákuarhini. ¿No sésichi úni jaua engachi piáska ambe engachi tsitijka nájkirukachi no meru uétarhinchajka? Jamberi nómbe. Peru ju je eratseantani arini kurhamarhikuechani: Nájkirukachi uáka piáni ambe ma, ¿jatsiskichi tiempu ka uinhapikua para úrani ka kuidarini jarhani? ¿Ístuchi úpirini kánikua pʼinderhini jatsikuarhikua ambe? Xáni pʼindeni jatsikuarhikua ambe jingoni, ¿úpirintsïni májkueni ójkutani eska imani tumbini enga no jiókuarhipka Jesusiri pʼímarperakuani para sánderu marhuakuni Tata Diosïni? (Luk. 18:18-23). Sánderu sésisti arisku sáni irekani ka úrani juchari tiempu ka uinhapikua para úni ambe enga Jeoba uéjka. w19.11 18 párr. 15, 16

Jeobajtsïni uáti íntskuni uinhapikua parachi úni ambe engachi eratsekia (Filip. 2:13). Ísï jimbo, ju je kómarhini eskajtsïni íntskuaka espiritu santu parachi uinhapikua jatsini engachi uétarhinchajka. Ju je seguirini kómarhini nájkiruka ísï xarharaaka enajkijtsïni ióndani jaki mókuchentani. Jesusi uandaspti: “Kurhajkuarhi je ka intsïnhaakajtsï [espiritu santu]” (Luk. 11:9, 13). Ístu, ju je sési eratseni ambe engachi xáni uáka. Engachi uéjka ambe ma úni, orhetachi sési eratsisïnga ambechi xáni uá ka tátsekuachi jánguarhintasïnga ísïmindu úni. Májkuenisti, engachi eratseni jauaka ambe ma úni, ju je exeni ambe ka ambechi uá. Ka engachi sánhani arhiska úni ambe ma enga úkua jukaka, nóchi ióndaaka exeni imani ambe engajtsïni sési uérachini jaka. Apostuli Pablu arhiaspti Korintu anapuechani eskaksï arhutapiringa tumina primeru jurhiatikua mándani semaneri paraksï no meru jiáni jámani tántani enga ima niárapiringuia (1 Kor. 16:2). Ístujtsïni jarhuataati no ísï pʼikuarherani enajkichi no ma ambe úni jaki engachi sánhani arhiska úni imani ambe enga úkua jukaaka. w19.11 29 párr. 13, 14

Jamberichi eratsijka eskachi míteska Jeobani jimbokachi jorhenguarhiskia na enga arhinhajka o máru ambe enga ima uandaka ka úni. Peru sési míteni Jeobani, sánderu ambe arhikuekasïndi. Jatsiskachi para tiempu arhutani para imeri ambe jorhenguarhini ka imeri sési járhati kualidadicheri ambe. Solu jiájkanchi uáka kurhanguni andisï uandajki ambe ma ka úni. Ka inde ambejtsïni jarhuataati míteni sini ima tsitisïni ambe engachi eratsijka ka úni. Ka engachi na kurhangujkia ambe enga Jeoba uéjka eskachi uáka, jatsiskachi para ísï úni. Jamberijtsïni máru kʼuiripuecha teresmarhujti jimbokachi uékasïnga Jeobani marhuakuni, ka jamberijtsïni sánderu ójkutaati engaksï exeaka eskachi uénaxakaia nirani tánguarhikuecharhu. Peru engachi mintsikaaka Tata Diosïni, imajtsïni no méni jurajkuati. Ísï úparini, uénakachi ambakiti pájperakua ma jatsini imani jingoni enga jindeuaka para méntkisï. ¿Meruchi ua sési míteni Jeobani? Jo. w19.12 16, 17 párr. 3, 4

Jamberiksï ménisï táticha úpirindi ísï pʼikuarherani eska kánikua úkua jukaska sapiichani kʼuiriperaani, peruksï sapiicha Jeobaeri intsïmperakua máesti. Jeoba méntkisï listu jarhasïndi para tátichani jarhuataani. Jingontku kurhauasïndi imecheri kómarhikuechani ka mókukuantaasïndi Biblia jingoni, publikasionicha ka máteru ambakiti táticheri ejemplu ka konsejuecha jingoni engaksï kʼuiriperaakia sapiichani. Máru kʼuiripuechaksï uandasïndi eska ma 20 uéxurhinisï uétarhisïnga paraksï táticha sapiichani kʼuiriperaani, peru ambe enga kʼóru ísïka, jindesti eskaksï táticha no méni kʼamaraaka tátiini. Sánderu ambakiti ambe engaksï uáka íntsaani uájpechani jindesti uékperakua, tiempu ka Bibliaeri ambe jorhendaani. Nóksï iámindu sapiicha májkueni jiókuarhisïndi ambe engaksï jorhendanhajka. Peru uánikuecha engaksï ima táticha tʼarhexeraaka engaksï xénchajka Jeobani, ísïksï pʼikuarherasïndi eska Joanna Mae, Asia anapu pirenchi ma enga uandajka: “Jaiapanhikuantasïnga juchiti tátichani engajtsïni jurhimberantaka ka jorhendani xénchani Jeobani, no solujtsïni íntskusti tsípikua, ístujtsïni jorhendasti tsípikua jingoni irekani” (Prov. 23:24, 25). Uánikua Jeobaeri marhuarichaksï májkueni pʼikuarherasïndi. w19.12 27 párr. 21, 22

No úkua jukasti míteni náki erachi o pirenchi uétarhinchaxaki parachi sési pʼikuastantani. Jatsiskachi para exeni néna jarhuataani máteruechani engaksï no sési nitamakuarhini jauaka, nájkirukachi no seguru pʼikuarheraaka. Por ejemplu, jamberichi chéjka no jánhaskani ambe uandani o ambe úni nemani jimbo enga no sési nitamakuarhini jaka. Ísï jimbo, uákachi sési pʼikuastaani máteruechani engachi xarhatakuaska eskachi jukaparharaasïnga. Jimboka nóteru ióni kueratasïnguia para kʼamajkunhani i parhakpini, sánderu no sési jánhaskuarhini jauati ka sánderu úkua jukaati orhepani uérani (2 Tim. 3:13). Ístuchi no perfektueska ka ménisïchi no sési ambe uáka. Ini ambe jimbo, uétarhinchanchi jauaka eskachi sési pʼikuastanhantaaka. Apostuli Pablu úspti tekaantani asta jiáni jamberi enga uarhipka jimbokaksï erachicha uinhaperantaspka. Parachi májkueni úni eska imecha, ju je jarhuataani juchari erachichani paraksï no méni jurajkuni Jeobani (1 Tes. 3:2, 3). w20.01 12, 13 párr. 17-19

Erakukatechaksï nó erokuarhisïndi eskaksï sánderu sési kánhaaka eska máteruecha (Filip. 2:2, 3). Mítestiksï eska jiáni enga Jeoba erakuapka, úspti eskaksï no iáminduecha mítepiringa. Ísï jimbo, kristianu ma enga erakukateka, no no sési exesïndi enga máteru kʼuiripu úkua jukanchaaka kurhanguni eska Tata Diosï erakuska. Biblia jorhentpisïndi eskachi no jirejiresï jakajkukuauaka iáminduechani engaksï uandajka eska Tata Diosï ambakiti ánchikuarhita ma íntsaaska. Ístu, jiáni engaksï nemani mítejka nóksï aiangusïndi eskaksï erakukateska, jimbokaksï no uékasïnga eskaksï kʼéri ambe exenhaaka. Ka ístuksï no méntku jámani jarhasïndi uandani eskaksï erakukateska (1 Kor. 4:7, 8). Erakukatechaksï no jámasïndi uandajpaani máteru erakukatechani paraksï uandontskuarheni na enga jindeka erakukateni, ni paraksï grupuechani uáni para imechajku jorhenguarhini Bibliaeri ambe (Gal. 1:15-17). Engaksï indeni ambe úpiringa, nóksï jarhuajpini japirindi para kúnguarhikua májku kʼéri jarhani. Nóksï imani ambe úni japirindi enga espiritu santu úrpijka, enga újka eska Tata Diosïri iretarhu májku kʼéri jauaka ka pínandikua jingoni (Rom. 16:17, 18). w20.01 28 párr. 6, 7

Niáraati ima jurhiatikua engaksï kʼuiripuecha, engaksï exeka na engaksï kʼamajkunhaka imecheri relijionicha, kánikua ikiauaka jimboka Jeobaeri testiguecheri relijioni no kʼamajkunhaska. I ambe uáti eskachi iápurisï no sési exenhaaka, asta Internetirhu ísï. Kʼuiripuecha ka imecheri juramuti enga jindeeka Noambakiti, kánikuajtsïni kurhunhiati jimboka solu juchari relijioniterku jauakia. Nóksï uáti kʼamajkuni relijionini ixú Echerirhu. Ísï jimbo, solujtsïni juchantsïnterkusï exeni jauatia. Jiájkani, iámindu parhakpini anapu juramuticha engaksï kúnguarhintaaka, niáraatiksï jindeeni Gog de Magog. Kúnguarhintaatiksï paraksï no sési kámani Tata Diosïri iretani ka paraksï méntku kʼamajkuni (Ezeq. 38:2, 14-16). Jimbokachi no míteska iámindu ambe, jamberichi uandanhiauaka imani ambe jimbo enga kʼéri mískuarhitarhu úkuarhiaka. Peruchi uáka seguru jarhani eskachi no jatsiska para chéni kʼéri mískuarhitarhu jimbokajtsïni Jeoba arhiaka ambe engachi uáka parachi no uarhini (Sal. 34:19). w19.10 16 párr. 10, 11

Nóchi solu eratsesïnga eskachi agradesidueska. Ístuchi xarhatakusïnga Jeobani uandakuecha ka úkuecha jingoni. I ambe úsïndi eskachi no májkueniuaka eskaksï iásï anapu kʼuiripuecha. Irekaxakachi parhakpini ma jimbo engaksï kʼuiripuecha no agradeserijka iámindu ambe enga Tata Diosï újka imecha jimbo. Ka ma ambe enga xarhatajka eskachi “últimu jurhiatikuechani jimbo” irekaxaka, jindeesti eskaksï kʼuiripuecha no agradeserisïnga ambe ma (2 Tim. 3:1, 2). ¡Nóchi méni uékasïnga ísïni eska i kʼuiripuecha! Jeoba uékasïndi eskaksï imeri uájpecha sési pájperaaka. Uékperakua engachi xarhatatsperajka, xarhatasïndi eskachi jurhimbiti kristianueska (Juanu 13:35). Tata Diosïri marhuari ma, karaspti: “¡Exe je! ¡Na enga xáni sésiika ka sési pʼikuarherakuarhini eskaksï erachicha májku kʼéri jauaka!” (Sal. 133:1). ¿A no eskachi májkueni pʼikuarherasïnga eska i salmueri karari? Engachi xénchaajka juchari erachichani, ístuchi xarhatasïnga eskachi xénchasïnga Jeobani (1 Juanu 4:20). Kuenta úkuarhini familiarhu ma nani engaksï iámindu erachicha sési kámberajka ka ístu pʼamojperani, meru kánikua ambakiti ambesti (Efes. 4:32). w20.02 9 párr. 6, 7

Ambe enga uandanhiatenga Anani, no jirejiresï kʼamakurhispti. Ima seguirispti májku kʼéri irekani Penina jingoni. Ka Biblia no nani uandasïndi eska Penina mójtakurhispka. Ísï jimbo, jamberi Ana seguirini japti tekaantani na enga xáni no sési arhienga Penina. Peru Ana nóteru xáni no sési pʼikuarherasïrendia. Enga na iámindu ambe Jeobani jurajkukupkia, ima nóteru uandanhiasptia. Jurajkuspti eska Jeoba uinhaperantapiringa ka sési pʼikuastantani. Ka tátsekua, Jeoba mókukuntaspti kómarhikuani ka ima kánguarhiaspti sapiichani (1 Sam. 1:2, 6, 7, 17-20). Uákachi sési pʼikuarherantani nájkiruka ima ambe engajtsïni uandanhiatani jauaka no kʼamakurhiaka. Jamberichi útasï seguirini jauaka jatsiani problemechani nájkirukachi someni kómarhini jauaka ka méntkisïchi nirani tánguarhikuecharhu. Peru ambe enga Ana nitamakuarhipka, jorhendasïndijtsïni eska no ma ambe ójkutaaka Jeobani parajtsïni sési pʼikuastantani. Imajtsïni no méni jurajkuati, ka niáraatijtsïni kóndentani engachi méntkisï mintsikaska (Ebr. 11:6). w20.02 22 párr. 9, 10

Orhejtsïkutichaksï jirejiresï exeraasïndi erachini o pirenchini Bibliaeri konsejuechani engaksï jarhuatauaka imani ambe úni enga sési jaka. ¿Andisï xáni jukaparhukue eskaksï ísï uáka? Ju je exeni ambe enga nitamakuarhipka kʼéri saserdoti Eli. Ima, tsimani uájpechani kaasïrendi enga kánikua xénchauenga. Peru íchaksï no janhanharhisïrendi Jeobani. Kʼéri ánchikuarhitaksï úsïrendi tabernakulurhu jimbokaksï saserdotispka. Peruksï ícha no sési úrasïrendi imani juramukuani engaksï jatsipka, nóksï janhanharhisïrendi ambe enga kʼuiripu pákuenga Jeobani ka nóksï sáni kʼuratseparini ísku jándikua ambeksï niátasïrendi (1 Sam. 2: 12-17, 22). Seguni Moisesiri Lei, íchaksï jatsipirindi para uándikunhani, peru Eli ísku exeasïrendi. Iatsitakuarhu arhiaspti ambe engaksï no sési úni japka ka jurajkuspti eskaksï útasï tabernakulurhu marhuani japiringa (Deut. 21: 18-21). ¿Na exespi ini ambe Jeoba? Kurhamarhispti Elini andisï sánderu janhanharhiani japi imeri uájpechani ka eska Jeobani. Ísï jimbo, kʼamajkuaspti ini tsimani acheeti no sési úrichani (1 Sam. 2:29, 34). w20.03 19 párr. 4, 5