Agostu

Jesusi seguirixapti pínandikua jatsini, asta jiáni engaksï no sési kámapka. ¿Andi? Jimboka mítespka eska sési pʼikuastaxapka Táti jémbani. Kurhandiraspti asta jiáni enga sánderu no sési nitamakuarhini japka. Iámindu ambe enga uénga, jindeespti para Jeobani marhuakuni jimboka xénchasïrenga. Antede Echerirhu jurhani, Tata Diosïri ánchikuarhiri jánhasti máespti (Prov. 8:30). Ka enga ixú jupka, tsípikua jingoni jorhentpespti jurhimbikua ambe Táti jémberi (Mat. 6:9; Juanu 5:17). I ánchikuarhita kánikua sési pʼikuastaspti (Juanu 4:34-36). Engachi kurhajchajka Jeobani, ísïchi úsïnga eska Jesusi ka méntkuchi jauenani “úni Diosïri úkuani” (1 Kor. 15:58). Kristianu enga “mintsita jingoni” úni jaka ánchikuarhitani aianhpikuarhu, ménderueni exeasïndi imeri uandanhiatechani (Uku. 18:5). Ma ambe jimbo jindesti, jimbokaksï ima kʼuiripuecha engachi jingoni uandontskuarhejka sánderuksï kʼérati problemechani jatsiasïnga eska jucha. Peru engaksï niárajka xénchani Jeobani ka únksï ambe engaksï jorhenguarhijka, niárasïndiksï sánderu sési irekani ka tsípikua jingoni. Méni enga ísï úkuarhijka, sánderuchi mintsikasïnga eskajtsïni Tata Diosï kuidariuaka. w19.04 10, 11 párr. 8, 9

Efesu anapuechaksï úspti ambe engaksï jatsipka para úni paraksï úni orhepani uérakuani demoniuechani. Nájkirukaksï kánikua jukaparhapka ima libruecha engaksï majiaeri ambepka, kurhiraasptiksï enbesi deksï intsïkuarpiani o ataraantani. Sánderuksï jukaparharaspti Jeobani jaiapanherantani ka eska na engaksï xáni jukaparhapka ima libruecha. ¿Nénachi uá májkueni úni eska imecha? Engachi jatsika ambe ma enga sïkuamikueri ambeka komu amuletuechani, talismanichani o máteru ambe enga jindeeka para kuájchakukuarhini no sési amberi o demoniuecheri ambe, mejoristi eskachi kʼuanikuaka indeni ambe (1 Kor. 10:21). Ju je jingontku exeni ambe engachi jingoni tsípikuarhijka. Ju je kurhamarhikuarhini: “¿Ambe engani jingoni tsípikuarhijka jukaraski sïkuamikueri ambe?”. Ju je seguru jarhani eska iámindu ima ambe engachi erakuaka úni, no ima ambeuaka enga Tata Diosï kurhunhijka. Jánguarhintasïngachi xáni eskachi xáni uáka para juchari konsiensia no no sési jarhani Jeobani japarini (Uku. 24:16). w19.04 22, 23 párr. 10-12

Uánikua ambe jarhasïndi engaksï orhejtsïkuticha jatsijka para jingontku exeni. Peru ambe engaksï sánderu jukaparharajka, jindeesti eska Tata Diosïri nombri pímbinhasï jauaka (Lev. 22:31, 32; Mat. 6:9). Ístuksï jánguarhintasïndi parakaksï erachicha seguirini jauaka marhuakuni Jeobani ka jarhuataani imechani engaksï no sési ambe úminhaka. Ístu, enga uáka ísï úkuarhini, orhejtsïkutichaksï jánguarhintasïndi jarhuatani imani enga kʼéri pekadu ma úka para seguirini jarhani sési pájperani Jeoba jingoni (Sant. 5:14, 15). Kristianu enga jurajkutakuarhika eska sánderu tsitiaka ikichakueni jásï ambe ka kʼéri pekadu ma úni, ísïsti komu nema enga pʼamenchani jarhajka. I ambe arhikuekasïndi eska no jatsiska ambakiti pájperakua ma Jeoba jingoni. Enga i ambe úkuarhijka, orhejtsïkutichaksï ísïsti komu doktoricha engaksï jánguarhintajka jarhuatani imani enga pekadu úka. Imecheri konsejuecha engaksï Bibliarhu pʼitakateka, uátiksï jarhuatani imani enga pekadu úka para ménderu úni ambakiti pájperakua ma jatsini Jeoba jingoni. Peru i ambe solu marhuauati enga no sési úri mintsita jingoni móantaaka (Uku. 3:19; 2 Kor. 2:5-10). w19.05 10 párr. 10, 11

Jeoba úsïndi eskachi uékaaka úni ambe ma. Jamberichi niárajka míteni eska uétarhixaka para máteru nani marhuani o juchari kúnguarhikuarhu. Ka jamberichi kurhamarhikuarhijka ambechi uá úni para jarhuajpini. Ochi kʼéri ánchikuarhita ma intsïnhani ka kurhamarhikuarhinchi sinchi uá ísï úni. O engachi na arhintakia Bibliaeri karakata ma, jamberichi eratsejka nénachi uá úrani indeni ambe para máteruechani jarhuataani. Enga Jeoba exejka eskachi uékaxaka sánderu marhuakuni, úsïndi eskachi ísï uáka. Ístu, Jeobajtsïni íntskusïndi uinhapikua parachi úni ambe ma (Is. 40:29). Imeri espiritu santuni úraparini, úsïndi eskachi sánderu sési uáka imani ambe engachi jorhenakia (Éx. 35:30-35). Ka imeri organisasioni jimbojtsïni jorhendasïndi na engachi jatsika para úni ambe ma. Ka engachi no míteka néna úni ma ambe, ju je nemani kurhakuni parajtsïni jarhuatani. Ístu, ju je no chéni andarhierani juchari Táti auandarhu anapuni enga intsïmbitiika ka ju je kurhakuni “uinhapikua enga xáni kʼéri ambeka” (2 Kor. 4:7; Luk. 11:13). w19.10 21 párr. 3, 4

Kʼuiripuechaksï jukari uékakuarhisïndi. Libru ma arhisïndi eska uéxurhini 1970 ísï, “kánikuaksï mítekuarhispka libruecha para ma jandiajku jarhuatakuarhini”. Máru i libruechaksï “arhiasïrendi imechani engaksï arhiantauenga eskaksï mítepiringa ka jiókuarhini na engaksï jásï kʼuiripuepka, ka paraksï kʼéramakuarhini”. Por ejemplu, ma i libruecheri arhisïrendi kʼuiripuni eska xénchakuarhipiringa, jimboka sánderu sési jánharhispka, sánderu jukaparhakueni, sánderu sési pʼikuastpini ka sánderu sési jáxeni ísï eska no nema. Ístu i libru arhisïndi eska májkusï jatsika para exeni néna jámani, imani ambe úni enga exeaka eska sési jarhaska ka eska marhuakuaka. Jamberijtsïni i ambe miátantajti ambe ma. Satanasi sáno májkueni jásï ambe arhispti Ebani eska úpiringa. Arhispti eska úpiringa ísïni eska Tata Diosï, míteparini ambe sésiski ka ambe nómbe (Gén. 3:5). Ini jurhiatikuecha jimbo, uánikua kʼuiripuechaksï xáni kʼéramakuarhisïndi engaksï eratsejka eska no nema uáka arhiani ambe sési jarhaski ka ambe nómbe, ni sikiera Tata Diosï. Ka ísï eratseni, úsïndi eska uánikua kʼuiripu no jukaparharaaka temungurhirikuani. w19.05 23 párr. 10, 11

Rei Dabidi ístu kánikua no sési nitamakuarhispti. Ju je exeni máru ambe. Ísï pʼikuarheraspti enajki nóteru úpirinia orhepani uérani uánikua imani ambe jimbo enga no sési úpka (Sal. 40:12). Jatsispti para orhepani uérani jiáni enga uájpa Absaloni nóteru uékapkia kurhajchani, enga tátsekua niárapka uarhini imani ambe jimbo enga úpka (2 Sam. 15:13, 14; 18:33). Ístu, Dabidiri sánderu ambakiti amigu ma jurajkuspti para Absaloni jingoni úkuarhini (2 Sam. 16:23–17:2; Sal. 55:12-14). Uánikua salmuechani enga karaapka, xarhatasïndiksï na enga no sési pʼikuarherani japka, peru ístuksï xarhatasïndi na enga xáni mintsikenga Jeobani (Sal. 38:5-10; 94:17-19). Tátsekua, salmueri karari ma enga jamberi Asáfiri desendientipka ka enga Tata Diosïri pímbinhasï templurhu marhuauenga, kánikua no sési pʼikuarheraspti. Uénaspti tsitini na engaksï irekani japka no sési úricha ka inde ambe úspti eska nóteru tsípikua jingoni irekapiringia ka kómu pʼikuarherani. Asta uénaspti nóteru xáni jukaparharaani kóntperatechani engaksï Tata Diosïri marhuaricha intsïnhaajka (Sal. 73:2-5, 7, 12-14, 16, 17, 21). w19.06 17 párr. 12, 13

Noambakiti imani ambe úrasïndi engachi jucha tsitijka. No no sési jarhasti ánchikuarhini para úni tumina andani para jucha ka para juchari familia. Ka uékasïngachi jorhenguarhini úni ambe ma para ísï úni (1 Tim. 5:8). ¿Nénachi úsïni konseguirini? Sáno méntkisï, jatsisïngachi para eskuela nirani ka ambakiti jorhenguarhiricheni. Peru jatsiskachi para jingontku jámani. Uánikua paisicha jimbo, eskuelechaksï no solu jorhentpisïndi ambakiti ambe enga marhuatspiaka, sino ístu ambe engaksï kʼuiripuecha eratsejka. Úsïndiksï eska no jakajkunhaaka eska jarhaska Tata Diosï ka nóksï jiókuarhisïndi Bibliani. Arhiasïndiksï estudiantichani eska sánderu ambakiti jorhentperakua jindeeska eska kʼuiripuni no nema kueraaska, eska ísku niáraska úkuarhini (Rom. 1:21-23). Íksï jorhentperakuecha méntku no terukuntasïndi Tata Diosïri mímixekua jingoni (1 Kor. 1:19-21, TDU; 1 Kor. 3:18-20). Eskachi méntkisï erakuaka no méni jurajkuni eskajtsïni Noambakitiri parhakpini arhiaka ambe úni “mámaru járhati jorhenguechani jimbo ka chkuanderakua ambe jimbo enga no marhuajka” (Kol. 2:8). Ju je méntkisï kuájchakukuarhini Noambakitiri (1 Kor. 3:18). Ju je no méni jurajkuni eskajtsïni Noambakiti mirikutaaka néski Jeoba ka na enga uéjka eskachi marhuakuaka. Ju je kumpliriuani Tata Diosïri ambakiti juramukuechani engaksï uandajka na engachi jatsika para jámani. Ka ju je no jurajkuni eska Noambakiti uáka parachi no kurhajchaani Jeobaeri konsejuechani. w19.06 5 párr. 13; 7 párr. 17

Náki uéjkichi tema erakuni, ju je eratseani imani kʼuiripuechani engachi jingoni uandontskuarheaka. Ju je eranhaskani na enga xáni marhuakuauaka míteni ambe enga meru jorhentpijka Biblia. Engachi kʼuiripuecha jingoni uandontskuarheni jauaka, uétarhisïndi eskachi jingontku kurhajchauaka ka respetarini na engaksï eratsejka. Ini ambe úparini, sánderuchi sési kurhangukuauaka ka imechajtsïni sánderu uékaati kurhajchani. Antede kʼuiripu uékani Bibliaeri ambe jorhenguarhini, jamberichi jatsiaka para tiempu úrani ka jánguarhintani uánikua xanhari pʼorhembintani. ¿Andi? Uénani jámani, jimboka jamberi no jauaka imeo engachi niuaka pʼorhembintani o no úni uandontskuarheni juchantsïni jingoni. Ístu, jamberi uétarhiati eskachi uánikua xanhari pʼorhembintaaka paraka kʼuiripu agustu pʼikuarheraaka juchantsïni jingoni ka jiókuarhini Bibliaeri ambe jorhenguarhini. Ju je miáni eska tsïtsïki ma uáka kʼéni engachi someni jatsikuaka itsï. Májkueni, kʼuiripu sánderu xénchaati Jeobani ka Kristuni engachi someni uandontskuarhekuaka Tata Diosïri Karakateri ambe. w19.07 14 párr. 1; 15, 16 párr. 7, 8

¿Ambeksï arhikuekasïni i uandakuecha? Jesusi no arhikuekaxapti eskachi imeri chúxapaticha tsitisïnga no sési kánhani, sino imani ambesï uandendi enga ísïpka. Kʼuiripujtsïni kurhunhisïndi jimbokachi no úsïnga imani ambe engaksï parhakpini anapuecha újka, imani ambechi úsïnga enga Jesusi jorhentpika ka nirasïngachi aianhpini ambe enga ima uandantapka (Juanu 15:18-21). Uékasïngachi Jeobani sési pʼikuastani. Engajtsïni kʼuiripu ikiachejka jimbokachi xénchasïnga juchari Tátini, imecheri problemesti. Nóchi jatsiska para eratseni eskachi no ma ambe jukaparhaska engachi no mítekateuaka. Nóchi míteska na jatinchi no sési kánhaa o juramutichaksï káni uandaa eskachi nóteru uákia juchari ánchikuarhitani. Ambe engachi kʼóru míteka, jindesti eskachi uáka iásï uénani prepararikuarhini engachi jánguarhintaska sánderu ambakiti pájperakua ma jatsini Jeoba jingoni, jánguarhintaska sánderu balori jukani ka míteni ambe úni engachi no sési kánhaaka. Prepararikuarhini iásï, jarhuatatijtsïni parachi no chéni sánderu orhepani. w19.07 6 párr. 17, 18; 7 párr. 21

Engachi imani kʼuiripuechani jorhendani jaka engaksï no jatsika relijioni ma, jatsiskachi para seguirini jarhani jarhuataani jakajkuni eska Tata Diosï jarhaska. Ístuchi jatsiska para jarhuataani mintsikani ambe enga Biblia arhijka. Para ísï úni, uétarhiati eskachi uánikua xanhari jorhendauaka májku ambe. Méni engachi jorhendaaka Bibliaeri ambe, jamberichi jatsiaka para exeni máru ambe enga xarhatajka eska Biblia Tata Diosïri Karakateska. Uákachi exeraani profesiauechani engaksï kumplirikuarhikia, na enga xáni sési terukuntajka Biblia siensia ka istoria jingoni o ambakiti konsejuechani engaksï jimini jaka. Engachi xénchaajka kʼuiripuechani, ia seaksï tsitini relijioniri ambe o nómbe, jarhuataasïngachi Kristueri chúxapatiini (1 Kor. 13:1). Ambe engachi uéjka engachi jorhendajka Bibliaeri jurhimbikueri ambe, jindesti eskaksï niáraaka kurhanguni eskajtsïni Tata Diosï xénchaasïnga ka eska uékasïnga eskachi xénchaaka. Mándani uéxurhini, uánikua kʼuiripu itsï atakuarhisïndi engaksï antesi no o kasi no sáni uékenga relijioniri ambe peruksï niárasti xénchani Tata Diosïni. Ísï jimbo, ju je ambakiti ambe eratseni, uékperakua xarhatakuani ka eskachi meru uandanhiasïnga iámindu jásï kʼuiripu jimbo. Ju je jingontku kurhajchaani ka jánguarhintani kurhangukuani. Ju je juchari ejemplu jingoni jorhendaani imani ambe úni enga Kristu úka. w19.07 24 párr. 16, 17

Salum uájpechaksï jindeespti máru enga Jeoba úraapka paraksï Jerusaleniri bardechani uántaani (Neh. 2:20; 3:12). Nájkiruka Salum juramuti máepka, imeri nanakechaksï uékaspti imani ánchikuarhitani úni enga kánikua úkua jukapka ka peligru jarhani (Neh. 4:15-18). Ini jurhiatikuecha jimbo, jarhastiksï pirenchicha engaksï tsípikua jingoni aiakukuarhijka paraksï jarhuajpini ambakiti ánchikuarhita úni paraksï Tata Diosïni marhuakuni: kʼumanchikuechani uáni para Jeoba kʼéri ambe arhinhani ka kuidariuani imani kʼumanchikuechani engaksï jindeeka para Jeobani kómarhini. Na engaksï xáni sési ánchikuarhijka, tsípikua jingoni ka engaksï no kuatantajka, kánikua jarhuajpisïndi paraka inde ánchikuarhita uáka sési uérani. Jeoba úspti eska Tabita ‘ambakiti ambe úpiringa’ ka intsïmbiani ambe ma imechani engaksï no jatsikuarhiripka, sánderia tsïndichani (Uku. 9:36). Jimboka Tabita kánikua intsïmbitispka ka ambakiti kʼuiripueni, uánikuechaksï ueraspti enga ima uarhipka. Peruksï kánikua tsípispti enga apostuli Pablu tsítantapka (Uku. 9:39-41). ¿Ambechi jorhenguarhisïni Tabiteri ambe? Eska no arhiparini na uéjkichi xáni jatirini, sinchi tatakeski ochi nanakeski, iáminduechachi uáka jarhuajpini imani ambe úparini enga marhuakuauaka juchari erachichani. w19.10 23 párr. 11, 12

¿Nénachi úpirini nemani pekadu ambe úrani? Ju je exeni nénachi úpirini inde ambe úni. Eranhaska je eska nema enga Bibliani jorhenguarhini jaka úsïnga ióni jimbo ka kánikua jánguarhintaparini jurajkuni kauikua ambe. Exesindi eska no jatsiska ni para sanititu arhani alkoli, mójtakurhisïndi ka itsï atakuarhini. Ma jurhiani, erachi ma imeo pʼímarhisïndi imani ka máteru erachichani. Erachi no no sési ambe eratsiparini arhisïndi: “Engari úska ísï úni, uákari sésku ísï arhani”. Úsïngachi eranhaskani ambe enga úkuarhipiringa enga ima erachi enga apenasi itsï atakuarhika kasu úkuska máteru erachini. Tánguarhikuechajtsïni jarhuatasïndi ísï úni ambe enga arhijka iásï anapu karakata. Miátantasïndijtsïni ambe enga sánderu jukaparhakueka para Jeoba ka néna úni imani ambe engachi arhistaminhajka ka ísïchi pímbinhasï jarhani. Ístujtsïni arisïndi parachi xénchani Tata Diosïni ka erachichani. Engachi iámu mintsita jingoni ísï újka jánguarhintasïngachi xáni eskachi xáni uáka parachi no no sési ambe úrani nemani. w19.08 10 párr. 9; 11 párr. 13, 14

Kʼuiripuecha engaksï seguru jarhajka ambe engaksï újka o engaksï mátirku arhijpijka ambe ma, no meru arhikuekasïndi eskaksï kʼéramakuarhisïnga (Juanu 1:46, 47). Joperu no arhiparini na engachi jásï kʼuiripu máeka, iáminduechachi jatsiska para jánguarhintani mintsita jingoni kaxumbitiini. Ju je exeni apostuli Pablueri ejemplu. Jeoba imani úraspti para uápurisï uaxastaani kúnguarhikuechani. Jamberi no ma Jesusiri apostuli xáni uánikua ambe úpti aianhpikuarhu eska Pablu. Nájkiruka indeni ambe úpka, no ísï exespti eska sánderu kʼéri ambespka eska imeri ermanuecha. Ima uandaspti eska Jeobaeri amiguespka peru no jimboka kʼéri ambepiringa o uánikua ambe úni, sino jimboka Tata Diosï ambakiti uékperakua xarhatakuspka (1 Kor. 15:10). Ísïsti, ambakiti ejemplu ma xarhataspti jiáni enga Korintu anapuechani karakuapka, nájkirukaksï máru imani kúnguarhikuarhu anapuecha arhinchenga (2 Kor. 10:10). w19.09 2, 3 párr. 5, 6

Ma ambe jimbo engachi úkua jukanchajka kurhajchani Jeobani, jindesti jimbokachi no perfektueska. Jimbochisï pʼindeka no kurhandirani. Engaksï Adani ka Eba no kurhajchapka Jeobani ka imani frutanksï arhani enga Tata Diosï arhiapka eskaksï no apiringa, imechaksï jandiajku erakuspti ambe enga sési jaka ka ambe nómbe (Gén. 3:22). Iásï, ístu sáno iámindu kʼuiripuechaksï májkueni no kurhajchasïndi Tata Diosïni ka imechaksï mismu uandani ambe sési jarhaski ka ambe nómbe. Asta jucha engachi míteka Jeobani ka xénchani, jamberichi úkua jukanchajka iámindu ambe ísï úni eska Jeoba na uéjka. I ambesï nitamakuarhipti apostuli Pablu (Rom. 7:21-23). Májkueni eska Pablu, imani ambechi uékasïnga úni enga Jeoba jaiapanhintajka. Peru jatsiskachi para jánguarhintani jimboka sánderu fásiliska para jucha imani ambe úni enga no sési jaka. Ístuchi uáka úkua jukanchani kurhajchani Jeobani imani ambe jimbo engachi desde sapichuetini jorhendanhaka. Uánikua ambe enga kʼuiripu eratsejka méntku no terukuntasïndi imani ambe jingoni enga Jeoba uandajka, ka jamberichi méntkisï jánguarhintani jauaka parachi nóteru ísï eratsenia eska na eratsejka kʼuiripu. w19.09 15 párr. 4-6

Jatsiskachi para jiókuarhini ka kurhanguni eskachi niárasïnga kuatarani. Ísï jimbo, ju je eratseni nénachi úraxaki juchari uinhapikuani. Por ejemplu, uákachi ísku úrani jarhani parachi jánguarhintani sánderu jatsikuarheni ambe. Ju je exeni ambe enga arhipka Jesusi tumbini ma enga jatsikuarhiripka enga kurhamarhipka ambe úpirini úni para jatsini tsípikua para méntkisï. Ambakiti kʼuiripu máespka, jimboka Markusʌri Ebanjeliu uandasïnga eska Jesusi xénchaspka. Jesusi pʼímarhispti ini tumbini para imeri chúxapatiini, peru úkua jukanchaspti jurajkuni imani ambe enga jatsikuarhipka (Mar. 10:17-22). Indeni ambe jimbo, no jiókuarhispti uananchatarakuani enga Jesusi aiakupka ka seguirispti jántspirini ‘jatsikuarhikueri’ ambe (Mat. 6:24). ¿Ambechi úpirini jucha? Sésisti eskachi ménisï eratsintaaka ambe engachi orheta peerani jaka juchari irekuarhu. ¿Andi? Jimbokachi ísï uáka seguru jarhani eskachi sési úraxaka juchari uinhapikuani. w19.09 24 párr. 17, 18

Seguirinchi jauaka aianhpini astaka Jeoba uandaaka eska i ánchikuarhita nóteru úkuarhiakia. ¿Na xánteru tiempu jatsiski kʼuiripu para míteni Jeobani ka Jesusini? (Juanu 17:3). Nóchi míteska. Ambe engachi kʼóru míteka, jindesti eska ima kʼuiripu enga uéjka tsípikua para méntkisï jatsini, uáka jorhenguarhini ambakiti aianhperakuani iásï enga nótki uénakuarhini jaka kʼéri mískuarhita (Uku. 13:48). ¿Nénachi jarhuataua indeni kʼuiripuechani iásï enga útasï tiempu jaka? Jeobajtsïni íntskuxati ambe engachi xáni uétarhinchajka para jorhendaani kʼuiripuechani jurhimbikua ambe. Por ejemplu, mándani semanajtsïni jorhendasïndi tánguarhikuecharhu engaksï semana jimbo jarhajka, nani engachi jorhenguarhijka néna uénani uandontskuarheni kʼuiripu jingoni ka engachi ménderu pʼorhembintaska. Ka engachi uandontskuarheska nema jingoni enga uéjka sánderu ambe míteni ka jurajkukunchi tratadu o rebista ma, ima kʼuiripu uáti sánderu ambe arhintani ima amberi engachi uandontskuarhekuka astakachi ménderu pʼorhembintaaka. Mándani arinchi jatsiska para seguirini jarhani ánchikuarhini aianhpikuarhu mándani kutsï. w19.10 10 párr. 7, 9, 10

Jeoba aiakuspti ambakiti acheetini ma enga jatiripkia enga Simeoni arhinhenga eska antede uarhini, exepiringa Mesiasini. I aiatsperakua kánikua sési pʼikuastantapti, jimboka ióni erokuarhispkia eska Mesiasi janopiringa. Jeoba indeni ambe kóndintaspti imeri jakajkukua ka tekaantskua jimbo. Ma jurhiani, Simeoni templurhu niraspti espiritu santueri jarhuajperata jimbo ka jima exespti Jesusini. Jimajkani, Jeoba, Simeonini úraspti para uandani ambe enga tʼuini uandakata japkia ini tataka sapichueri ambe, eska i jindeepiringa Kristu (Luk. 2:25-35). Jamberi, nájkiruka Simeoni tʼuini uarhipkia enga Jesusi aianhpini jámapka, kánikua jukaparharaspti imani kóntperatani enga intsïnhapka. Ka niáraati ambakiti ambe intsïnhani enga exeaka na engaksï ujchakuranhaaka iámindu familiaecha engaksï Echerirhu irekani jauaka enga Jesusi juramuni jauakia jimbanhi parhakpinirhu (Gén. 22:18). Juchajtuchi uáka kánikua sési pʼikuarherani engajtsïni Jeoba mámaru úrajka. w19.10 22 párr. 7; 23 párr. 12

Nájkirukachi sánititu o kánikua ambe jatsikuarhiaka, jatsiskachi para kuájchakuni mintsitani. ¿Nénachi uá ísï úni? No jukari tsitini jatsikuarhikua ambe ka no sánderu jukaparharani juchari ánchikuarhitani ka eska Jeobani marhuakuni. Parachi exeni sinchi no indeni ambe úxaki, ju je kurhamarhikuarhini: “¿Someni eratseni jarhasïni ánchikuarhiteri ambe engani tánguarhikuarhu jarhajka o aianhpikuarhu? ¿Méntkuni uandanhiani jarhasïni sini jatsia tumina sánderu orhepani? ¿Niárasïni arhijperani juchiti uarhiiti o acheeti jingoni tumina jimbo ka jatsikuarhikua ambe jimbo? Parani úni sánderu marhuakuni Jeobani, ¿uékapirini úni ánchikuarhita ma engaksï máteruecha no tsitijka?” (1 Tim. 6:9-12). Engachi ini ambe kurhamarhikuarhiska, ju je miáni eskajtsïni Jeoba uékasïnga ka arini ambe aiakuasïndi imechani engaksï mintsita jingoni marhuakujka: “Jíkini no méni késtakuchiaka ka níjtukini méni jurajkuni jandiajku”. Ini ambe jimbo, apostuli Pablu uandaspti: “Asï jáma je jatsikuarhikuekani” (Ebr. 13:5, 6). w19.10 29 párr. 10

Engachi jarhuataajka erachichani ka exenchi eskaksï ambakiti kʼuiripueska, jorhenguarhisïngachi imecheri ambe ka niárasïngachi sánderu sési pájperani. Por ejemplu engachi erachi o pirenchi ma jingoni uérajka aianhpini ka exenchi na enga no sáni chéparini uandantajka ambe enga jakajkujka o mintsita jingoni uandantani Jeobaeri ambe ka ambe enga ima aiatspejka, jamberichi sánderu xénchaaka imani erachini o pirenchini. Adeline pirenchi máesti enga 23 jatirika ka arhispti imeri amiga Candiceni eskaksï nipiringa tsimarhani aianhpini lugari ma jimbo enga iauani ménisï aianhpinhajka. Adeline uandantasïndi: “Uékasïrengachi sánderu aianhpini ka tsípikua jingoni. Tsimarhanchi uétarhinchaxapka ambe engajtsïni jarhuatapiringa sánderu sési marhuakuni Jeobani”. ¿Néna jarhuataaspi engaksï tsimarhani nipka aianhpini? Adeline uandasïndi: “Chúrikuechanchi uandontskuarhisïrenga na engachi pʼikuarherani jarhenga, na engajtsïni sési pʼikuastenga uandontskuarheni kʼuiripuecha jingoni ka na engachi exenga Jeobaeri jarhuajperata. Tsimarhanchi tsitisïrenga imeri ambe uandontskuarheni enga kánikua jukaparhakueka ka niáraskachi sánderu sési mítperani”. w19.11 5 párr. 10, 11

Ióntki, soldadu ma kʼuratsesïrendi enga guerrarhu jurajkupiringa kuájpikuarhitarakuani. Roma anapu Tácito enga istorieri ambe exenga, karaspti: “Kánikua kʼuratsekua ambeespti guerrarhu jurajkuni kuájpikuarhitarakuani”. Jimboksïsï soldaduecha jánguarhintendi uinhamu jupikatini kámani. Parachi úni méntkisï mintsikani Jeobani, jatsiskachi para no kueratani tánguarhikuecharhu ka aianguani kʼuiripuechani Tata Diosïri nombriri ambe ka imeri Reinueri (Ebr. 10:23-25). Ístu, jatsiskachi para pauani pauani arhintani Bibliani ka kómarhini Jeobani eskajtsïni jarhuataaka úni ambe engajtsïni ima jorhendajka ka ístu eskachi méntkisï úrauaka imeri konsejuechani (2 Tim. 3:16, 17). Engachi ini ambe úska, Noambakitijtsïni no uáti no sési úchini para méntkisï (Is. 54:17). Kánikua mintsikani Jeobani, kuájchakuatijtsïni. Nóchi chéparini marhuakuaka Jeobani juchari erachicha jingoni. Ka nóchi solu uáka pauani pauani orhepani uérakuani tsʼéjkukuechani, ístuchi jatsiaka kʼéri kóntperata parachi Jesusi jingonini jiáni enga ima méntku kʼamajkuaka Noambakitini ka imechani engaksï imani jingonika (Jaŋ. 17:14; 20:10). w19.11 19 párr. 18, 19

Karani ambe engachi xáni eratsekia úni, jarhuataatijtsïni kumplirini (1 Kor. 14:40). Por ejemplu, kúnguarhikuarhu anapu orhejtsïkutichaksï arhinhasïndi paraksï orhejtsïkutini ma erakuni para karani ambe engaksï uékani jaka úni, né enga uáka ka káni enga jatsika para úni. Orhejtsïkuticha engaksï ísï újka, nóksï xáni úkua jukanchasïndi kumplirini ambe engaksï karapka. Juchajtuchi uáka májkueni jásï ambe úni. Por ejemplu, uákachi pauani pauani karani ambe engachi xáni jatsika para úni ka orheta peerani ambe engachi orheta uéjka úni. I ambejtsïni no solu jarhuataati kʼamarani ambe engachi uénakia úni, sino parachi sánderu uánikua ambe úni ka no xáni tiempu úrani. Joperuchi jatsiska para jánguarhintani. Uétarhisïndi eskachi kánikua jánguarhintaaka parachi ísïmindu úni eskachi na eratsekia ka kʼamarani ambe engachi uénakia úni (Rom. 12:11). Apostuli Pablu arhispti Timoteuni eska seguiripiringa jánguarhintani para sánderu sési jorhentpini ka eska no kuatantapiringa. I konsejujtsïni jarhuataati náki uéjki ánchikuarhita jimbo engachi uáka para Jeobani marhuakuni (1 Tim. 4:13, 16). w19.11 30 párr. 15, 16

Enga Jeoba arhipka Moisesini eska nipiringa petaantani israelitechani jini Ejiptu, ima no seguru pʼikuarheraspti ka someni arhispti eska no úpiringa úni imani ánchikuarhitani. Peru Jeoba pʼamojperakua xarhatakuspti ka jarhuataspti (Éxodo 4:10-16). Indeni ambe jimbo, Moisesi úspti aianguni faraonini ambe enga úkuarhinchapiringa. Tátsekua exespti na enga Jeoba úrapka imeri uinhapikuani enga pʼímutantaapka israelitechani ka mari Charhapitirhu kʼamajkuni faraonini ka imeri ejersituni (Éx. 14:26-31; Sal. 136:15). Enga Moisesi petantaapkia israelitechani Ejiptu uératini, imechaksï uánikua xanhari no sési ambe uandaspti. Peru Moisesi méntkisï exespti na enga Jeoba kánikua tekaantskua xarhatakuapka imani kʼuiripuechani enga pʼímutantaapka (Sal. 78:40-43). Ístu exespti na enga xáni kaxumbitika Jeoba, jimboka kurhajchaspka Moisesini enga kurhakupka eska no kʼamajkuapiringa israelitechani (Éx. 32:9-14). Enga na uéakuntapkia Ejiptu, Moisesi niáraspti jatsini ambakiti pájperakua ma Jeoba jingoni enga ísïpka enajki exeni jarheni imeri Táti auandarhu anapuni (Ebr. 11:27). w19.12 17 párr. 7-9

Sáno iámindu Jesusiri chúxapatichaksï Galilea anapuespti. Ísï jimbo, Galileaeri juáta ma, ambakiti lugari máepirindi parakaksï úpiringa xáni uáni kʼuiripuecha tánguarhini ka no kʼumanchikuarhu ma jini Jerusaleni. Ístu, ísï tátsekua enga Jesusi tsíntapkia, tánguarhintaspti imeri 11 apostulicha jingoni kʼumanchikua ma jimbo jini Jerusaleni. Enga ima uékapiringa solu imeri apostulichani juramukuani eskaksï aianhpepiringa ka jorhentpini, úpirindi ísï úni jini Jerusaleni ka no arhiani ménderu apostulichani, ka ístu uarhiitichani ka máteru imeri chúxapatichani eskaksï tánguarhintapiringa imani jingoni jini Galilea (Luk. 24:33, 36). Jesusi no primeru siglurhu anapu kristianuechankusï juramukuapti paraksï kʼuiripuechani jorhendaani. ¿Nénachi míteski? Imani ambe jimbo enga Jesusi ultimu arhiapka imeri chúxapatiichani: “Ji chánksïni jingoni jauaka pauani pauani astaka na kʼamaraaka ambe enga úkuarhini jaka parhakpinirhu” (Mat. 28:19, 20, TNM). Ini jurhiatikuecha jimbo, ánchikuarhita para jorhentpini sánderu úkuarhixati, eska na xarhatajka ari ambe. Mándani uéxurhini, sáno 300,000 jimbanhi Jesusiri chúxapatichaksï itsï atakuarhisïndi paraksï Jeobaeri testigu úkuarhini. w20.01 3 párr. 5, 6

Tumbini ma, aiangusptiksï eskaksï kʼéri pʼamenchakua ma exekuntaspka enga sánhani arhijka chkerpini. Ístu, erachi ma enga jatirikia no exentasïndi ánchikuarhita. Engachi na jatiripajkia, jamberichi ísï pʼkuarherajka eskachi nóteru uáka xáni marhuakuni Jeobani. Engachi ini ambe nitamakuarhini jaka, jamberichi ísï eratsejka eskachi nóteru ambe ma marhuasïnguia. I ambe uáti úni eskachi no tsípikua jingoni irekaaka, no uékakuarhiaka ka eskachi nóteru sési pájperakia máteruecha jingoni.Parhakpini anapu kʼuiripuechaksï no jukaparharasïndi tsípikuani ísï eska Noambakiti. Méntkisïjtsïni ísï kámasïndi enájkichi no sáni jukaparhakue. No sési ambe eratsiparini, arhispti Ebani eska úpiringa libreni enga no kurhajchapiringa Tata Diosïni, peru Noambakiti sési mítetixapti eska enga Eba indeni ambe úpiringa, uarhipiringa. Méntkisï, Noambakiti juramukusti parhakpinini. Ini ambe jimbo, nójtsïni ísku pakatasïndi engachi exejka eskaksï kʼuiripuecha nóksï jukaparharasïnga tsípikuani niksï exeni na engaksï pʼikuarherajka máteruecha. Peru Jeoba uékasïndi eskachi juchajkumindu sési pʼikuarheraaka, ka jarhuatasïndijtsïni engachi imani ambe nitamakuarhini jarhajka engajtsïni ísï pʼikuastajka enajkichi no ma ambe marhuajki (Rom. 12:3). w20.01 14 párr. 1-4

Jeremiasi, kuarenta uéxurhinisï irekaspti imani kʼuiripuecha jingoni engaksï no kurhajchenga Jeobani, komu imeri besinuecha ka jamberi máru imeri parienticha engaksï Anatoti anapuepka nani enga ima andajpenupka (Jer. 12:6). Peru no jurajkuaspti amigu jémbechani. Asta aianguspti Barukini, imeri ambakiti jarhuajpiri, na enga pʼikuarherenga ka i ambe karakata pakarasti jimbochisï asta jucha jamberi míteka ambe enga Jeremiasi pʼikuarherenga (Jer. 8:21; 9:1; 20:14-18; 45:1). Jamberi imani tiempu jimbo enga Baruki iámindu ambe karani japka ambe enga xáni Jeremiasi nitamakuarhipka, úpti eskaksï tsimarhani kánikua sési pájperapiringa ka janhanharperani (Jer. 20:1, 2; 26:7-11). Jeremiasi no sáni chéparini aianguaspti israelitechani ambe enga Jerusaleni úkuarhipiringa (Jer. 25:3). Últimu xanhari enga Jeoba úpka ambe ma paraksï kʼuiripuecha móantani, arhispti Jeremiasini eska roiiu ma jimbo karapiringa ambe enga úpiringa (Jer. 36:1-4). Jeremiasi ka Barukiksï májku kʼéri ánchikuarhispti, jamberi uánikua kutsïcha jimbo, paraksï úni ambe enga Tata Diosï arhiapka. Seguru eska imani tiempu jimbo, imecheri jakajkukua sánderu kʼépka imani ambe jimbo engaksï uandontskuarhienga. w19.11 2, 3 párr. 3, 4

¿Nénachi jatsiski para kaani erachichani ka pirenchichani engaksï erakukateka? No sési jarhasti jukari kʼéri ambe exeni kʼuiripuni ma, nájkiruka erakukata máeuaka enga jindeka Kristueri ermanu ma (Mat. 23:8-11). Enga Biblia orhejtsïkuticheri ambe uandajka, arhisïndi: “Jánguarhi je ísï mintsikani Diosïni eskaksï imecha”, peru no arhisïndi eskachi kʼuiripueri ma chúxapatiuaka (Ebr. 13:7). Ísïsti, Biblia ístu uandasïndi eskaksï máru kristianuecha uétarhinchasïnga “tsimani uelta sánderu janhanharhinhani”. Peru no jindesti jimbokaksï erakukateska, sino jimbokaksï sési orhejtsïkusïnga kúnguarhikuani ka ístuksï sési “uandajtsïkpini ka jorhentpini” (1 Tim. 5:17). Úpiringachi no sési pʼikuastaani erakukatechani engachi jukari sési ambe arhiaska o jukari sési kaani o sánderu no sési ambe, úpiringachi úni eskaksï jukari arhikuarhiaka jimbokaksï erakukateska (Rom. 12:3). ¿A no eskachi no uékasïnga úni eska erakukata ma no sési ambe niátaaka? (Luk. 17:2). w20.01 28 párr. 8

Apostuli Pablu uánikua ambe jatsispti enga jimbo úpiringa uandanhiani. Uandanhiasïrendi engaksï erachicha nitamakuarhinchenga ambe ma (2 Kor. 2:4). Máru kʼuiripuechaksï ataspti ka ónhani. Máteru ambe enga ístu uandanhiatenga, jindeespti eska jatsispka para sántku jingoni irekani (Filip. 4:12). Ka jimboka tanimu xanhari no sési nitamakuarhispka marirhu, úsïngachi eranhaskani na enga xáni chénga méni enga barkuni ma jataenga (2 Kor. 11:23-27). ¿Ambe jarhuataspi Pabluni para no xáni uandanhiani? Pablu méntkisï miáni jarhasïrendi ambe engaksï nitamakuarhini jarhenga imeri ermanuecha, peru miásïrendi eska no úpiringa jandiajku jarhuataani. Arhiaspti máteru kristianuechani eskaksï jarhuatapiringa pendienti jarhani kúnguarhikuarhu anapuecha jimbo. Arhiaspti máru erachichani engaksï mintsinharhikuepka, komu Timoteuni ka Tituni eskaksï uápiringa máru ánchikuarhitechani kúnguarhikuarhu. Ambe engaksï i erachicha úpka, úspti eska Pablu nóteru xáni uandanhiapiringia (Filip. 2:19, 20; Titu 1:1, 4, 5). w20.02 22, 23 párr. 11, 12

Jeoba uékasïndi eskachi jucha imani kurhajchaaka. Jatsiskachi para kurhajchani jimbokajtsïni ima kueraaska, ístu úsïndi eskachi tsípiti jauaka ka imajkusï jindeeti Táti enga sánderu jánhastiika. Peru ambe engachi jimbo sánderu kurhajchajka Jeobani, jindeesti jimbokachi xénchasïnga (1 Juanu 5:3). Ísïsti eska uánikua ambe jarhaska engachi jimbo jatsika para kurhajchani, peru Jeoba no uékasïndi eskachi afuersa ísï uáka. Imajtsïni íntskusti sésikua parakachi uáka erakuni ambe úni ka kánikua sési pʼikuarherasïndi engachi uékperakua jimbo kurhajchajka. Tátichaksï uékasïndi eskaksï imecheri sapiicha sési irekaaka. Ísï jimbo, arhiasïndiksï ambe engaksï jatsika para úni. Sapiicha engaksï kurhanderajka, xarhatasïndiksï eskaksï mintsikaasïnga táti jémbechani ka eskaksï janhanharhiasïnga. Jiájkani, engaksï sapiicha ísï újka, juchachi jatsiska para sánderu jánguarhintani míteni ambe enga juchari Táti auandarhu anapu juramujka ka ísï irekani eskajtsïni ima na arhijka. Engachi ísï újka, xarhatasïngachi eskachi xénchasïnga Jeobani ka janhanharhini. Ka inde ambe úsïndi eskachi sési irekaaka (Is. 48:17, 18). Peru imecha engaksï no újka ambe enga Jeoba juramujka, jandiajkuksï no sési úkuarhinchasïndi (Gal. 6:7, 8). w20.02 9, 10 párr. 8, 9

Májkueni eska Abigaili, jatsiskachi para balori jingoni uandani engachi exeni jauaka eska nema no sési ambe uáka (Sal. 141:5). Jatsiskachi para janhanharhikua xarhatani peru ístu balori jingoni ísï úni. Engachi uékperakua jingoni íntskujka konseju ma nemani enga uétarhinchani jaka, xarhatasïngachi eskachi ambakiti amigueska (Prov. 27:17). Uétarhisïndi eskaksï orhejtsïkuticha balori xarhataaka para uandontskuarheni imecha jingoni engaksï no sési ambe úka (Gal. 6:1). Orhejtsïkutichaksï kaxumbitisti ka mítestiksï eskaksï imechajtu ma jurhiani úpiringa uétarhinchani konseju ma jimbokaksï no perfektueska. Peruksï no jurajkusïndi eska i ambe ójkutauaka para jurhimberantani nemani enga uétarhinchani jaka (2 Tim. 4:2; Titu 1:9). Engaksï konseju ma íntskujka nemani, jánguarhintasïndiksï para sési jorhendani ka tekaantskua jingoni. Xénchaasïndiksï erachichani ka jimboksïsï uéjti jarhuataani (Prov. 13:24). Peru ambe engaksï sánderu uéjka, jindesti kʼéri ambe arhini Jeobani, jimboksïsï jánguarhintajti paraka úkuarhiaka ambe enga ima juramujka ka kuájchakuasïndiksï kúnguarhikuarhu anapuechani (Uku. 20:28). w20.03 20 párr. 8, 9

Jeoba úspti eska Moisesi pʼímutantapiringa ireta Israelini. ¿Peru káni niáraspi Jeoba úrani Moisesini? ¿Jiáni úraspi enga Moisesi exepka eska listu jarhaspkia jimboka sési jorhendanhaspka “iámindu Ejiptu anapu jorhenguani”? (Uku. 7:22-25). Nómbe, Jeoba jiáni úraspti Moisesini enga na jorhendapkia kaxumbitiini (Uku. 7:30, 34-36). Ka úspti eska Moisesi no chépiringa para nirani Ejiptu anapu sánderu kʼéri juramuti jingoni (Éx. 9:13-19). Ini ambe jingonchi exesïnga eska Jeoba imechani úraasïnga engaksï jánguarhintajka xarhatani na enga jásïka ima ka engaksï Jeobaeri uinhapikua jimbo újka ambe ma. Desde xáni iónia, Jeoba mámaru úraastia imeri marhuarichani. ¿Ka juchantsïni néna uá úrani? Inde ambe juchari jájki jimbo jarhasti na engachi xáni uéjka jánguarhintani (Kol. 1:29). Engachi uéjka eskajtsïni Jeoba úraaka, ima uáti eskachi tsípikua jingoni aianhpiaka, sési jorhentpiaka, eskachi míteaka néna sési pʼikuastantaani máteruechani, eskachi sési uáka juchari ánchikuarhitani, eskachi amigu máeuaka enga jarhuajpijka o jindeeni ambe uéjki enga uétarhini jauaka para imeri eratsekua kumplirikuarhini. w19.10 21 párr. 5; 25 párr. 14

Ambakiti amiguechajtsïni jarhuataati no méni jurajkuni Jeobani. Ka ambe engajtsïni jarhuataaka ambakiti amiguechani jatsiani, jindesti eskachi jucha ambakiti amigu máeuaka (Mat. 7:12). Por ejemplu, Bibliajtsïni arhisïndi eskachi jarhuatauaka máteruechani nani engachi jamberi jucha uáka ka sánderu imechani engaksï uétarhinchajka (Efes. 4:28). Engachi jarhuataaska máteruechani, jamberi sánderu segurueuati eskachi sési pʼikuarheraaka (Uku. 20:35). Amiguechani engachi jatsiauaka, juchantsïni jingonksï jauati engachi uandanhiata ma jatsiaka ka jarhuataatijtsïni pínandikua jatsini. Májkueni eska Eliu na kurhajchapka Jobuni enga ima aiangukuarhini japka ambe ma, juchari amiguechajtsïni májkueni kurhajchaati engachi aiangukuarhiani jauaka juchari uandanhiatechani (Job 32:4). Ísïsti, nochi erokuarhiaka eskaksï imecha erakuaka ambe ma juchantsïni jimbo, peruchi mímixetiuaka engachi ísï úska ambe engajtsïni arhiaka Biblia jingoni (Prov. 15:22). Ka engachi uétarhinchani jauaka ambe, ju je ísïni eska rei Dabidi, enga no jurajkupka eska kʼéramakuarhini ójkutapiringa para jiókuarhini amigu jémbecheri jarhuajperata (2 Sam. 17:27-29). Seguru eskaksï i járhati amiguecha Jeobaeri intsïmperakueska (Sant. 1:17). w19.04 11 párr. 12; 12, 13 párr. 14, 15