Septiembri

Jeobaeri ejemplu ka Jesusiri, ¿xarhatasïni eskachi no jatsiska para mintsikuarhini? Nómbe. Jeoba no méni kuatarasïndi, ísï jimbo no uétarhinchasïndi mintsikuarhini ísï eska jucha. Peru Biblia uandasïndi eska ísï tátsekua enga Jeoba úpkia auandani ka echerini niáraspka nóteru ánchikuarhinia ka mintsikuarhini (Éx. 31:17). Peekaksï i uandakuecha arhikuekajka eska nóteru ambe ma kueraaspkia ka eska arhutaspka tiempu para tsípikuarhini imani ambe jimbo enga kueraapka. Ka Jesusi, nájkiruka kánikua ánchikuarhipka enga Echerirhu japka, ístu arhutaspti tiempu para mintsikuarhini ka tsitisïrendi imeri amiguecha jingoni tʼireni (Mat. 14:13; Luk. 7:34). Biblia arhiasïndi imechani engaksï Tata Diosïni marhuakujka eskaksï ánchikuarhiriuaka, no xépitiini (Prov. 15:19). Jamberijtsï kánikua ánchikuarhijka parajtsï chári familiani kéndani ambe ma. Ka iámindu kristianuechachi jatsiska ánchikuarhita ma, aianhpini ambakiti aianhperakuani. Peruchi ístu jatsiska para sési mintsikuarhini. w19.12 3 párr. 4, 5

Ju je no uandaantani istoriechani engaksï demoniuecheri ambeka. Ini ambe jimbo, jatsiskachi para ísï úni eska Jesusi. Enga auandarhu japka, uánikua ambe exespti Noambakitiri ka demoniuecheri ambe. Peru enga Echerirhu jupka, no jámaspti imecheri ambe uandantani. Jesusi Jeobaeri ambe uékasïrendi aianhpini ka no eska Noambakiti sánderu mítenhapiringa. Májkueni eska Jesusi, juchachi no uékasïnga uandantani jarhani demoniuecheri ambe. Enbesi de indeni ambechi úni, juchari uandakuecha jingonchi xarhatasïnga eska juchari mintsita kánikua sési pʼikuarherasïnga ambakiti ambe jimbo, enga jindeeka jurhimbikua (Sal. 45:1). Ju je no kánikua chérhiani demoniuechani. Ini parhakpini jimbo, iáminduechachi uáka no sési jásï ambe nitamakuarhini. Engachi no erokuarhini jarhajka, uákachi no sési ambe úkuarhinchani, pʼamenchanchi o astachi uarhini. Peru, ¿eratseachi eska demoniuecheri kulpeska? Biblia arhisïndi eskachi iáminduecha uáka nitamakuarhini “ambe ma enga ma no erokuarhi[ni]” jarhajka (Ecl. 9:11). Peru ístu, Jeoba xarhatasti eska kánikua sánderu uinhapiska eska demoniuecha. w19.04 23, 24 párr. 13, 14

¿Orhejtsïkutichaksï úraasïni leichani para denunsiariuani imechani engaksï ísku ambe ma úkuajka sapiichani? Jo. Imani lugaricha jimbo engaksï inde leicha jaka, orhejtsïkutichaksï úraasïndi. Íksï juramukuecha terukuntasïndi Tata Diosïri juramukuecha jingoni (Uku. 5:28, 29). Ísï jimbo, engaksï orhejtsïkuticha niárajka míteni eska inde ambe úkuarhiska, jirejiresïksï kurhajkuarhisïndi jarhuajperata Beteli paraksï exeni ambeksï jatsiski para úni paraksï leicha kumplirikuarhini engaksï demandariska nemani jimboka ísku ambe ma úkuska sapini ma. Orhejtsïkutichaksï aianguasïndi imechani engaksï indeni ambe nitamakuarhika, táti jémbechani o máteru nemani enga míteka eska inde jásï ambe úkuarhiska, eskaksï uáka denunsiarini no sési úrini juramuticha jingoni. ¿Peru enga no sési úri kúnguarhikuarhu anapu máeuakia ka uánikuaksï mítenia ambe enga úkuarhika? ¿Jatsipirini para ima erachi enga demanda incharaka eratseni eska no sési pakataska Tata Diosïri nombrini? Nómbe. Imasï no sési pakatati Tata Diosïri nombrini enga ísku ambe ma úkuka sapini. w19.05 10, 11 párr. 13, 14

Biblia arhiasïndi temungurhirichani eskaksï jatsiska para janhanharperani ka kumplirini imani ambe engaksï jiáni aiatsperaka engaksï tembuperapka. Ístu miátantaasïndi eskaksï no méni jatsiska para jurajperani. Jimbosï arhiajti: “Achati jurajkuati imeri táti jembani ka imeri amambani para kúnguarhini imeri uarhiiti jingoni, ka imaksï tsimarani májku kuerpueuati” (Gén. 2:24). Peru imecha engaksï jaiapanhentajka parhakpini anapu ambe, máteru ambeksï jorhentpisïndi ka uandasïndiksï eska uarhiiti o acheeti jatsiska para imeri ambejku pendienti páni. Libru ma enga diborsiueri ambe uandajka arhisïndi: “Jiáni engaksï máru tembuperajka, enbesi deksï aiatsperani májku kʼéri irekani astakaksï uarhiaka, aiatsperasïndiksï májku kʼéri irekani astakaksï nóteru uékperakia”. Ísï exeni temungurhirikuani, úsïndi eskaksï uánikua temungurhiricha jurajperaaka ka ístu eska familia kánikua no sési pʼikuarheraaka. Ísïsti, no ma ambe marhuasïndi engaksï parhakpini anapuecha újka eskaksï kʼuiripuecha no jukaparharaaka temungurhirikuani. w19.05 23 párr. 12

Apostuli Pablu uandanhiasïrendi jimbokaksï máru kristianuecha uénaspkia ísï eratseni eska ima kʼuiripuecha engaksï Noambakitiri jájki jimbo japka (Efes. 4:17-19). Juchajtuchi uáka indeni ambe úkuarhinchani. Noambakiti enga juramuni jaka ini parhakpinirhu, kánikua jánguarhintaxati mámaru ambe úraparini parachi jarharini Jeobani. Ma ambe enga úrajka, jindesti eskachi meru tsitiaka úni ambe ma parachi juchajkumindu sési uéranchani o kʼéri ambeni. Asta uáti úrani imani ambe engachi nitamakuarhika, nani engachi anapueka ka jorhentperakuani engachi eskuela intsïnhaka para úni eskachi ísï eratseaka eska Noambakiti na uéjka. ¿Uáchi meru nóteru eratseni imani ambe engachi kánikua pʼindeka eratseni o úni? (2 Kor. 10:4). Ju je exeni Pablueri mókuntskua: “Xereanta[xakachi] kʼuiripuecheri eratsekuechani ka iámindu teparakuarhikua ambe engaksï jimbo nómindu uékajka míteni Diosïni, ka ístu para úni eska kʼuiripuecha janhanharhiaka Kristuni iámindu ambe ma jimbo engaksï eratsejka” (2 Kor. 10:5). Jo ísïsti, Jeobaeri jarhuajperata jingoni, uákachi kénditaani no sési járhati eratsekuechani. w19.06 8 párr. 1-3

Nájkirukaksï kánikua uandanhiani japka, Ana, Dabidi ka salmueri karari ma, kómarhisptiksï Jeobani paraka jarhuataapiringa. Aiangukuarhisptiksï na engaksï pʼikuarherani japka kómarhikua jimbo. Jurhimbitkuksï aianguspti andiksïsï xáni uandanhiani japi. Ka méntkisïksï nirasïrendi jima engaksï Jeobani kómarhienga (1 Sam. 1:9, 10; Sal. 55:22; 73:17; 122:1). Juchari Tata Diosï pʼamojpiti, mókukuantaspti iámindu imechani. Ana nóteru no sési pʼikuarherasptia (1 Sam. 1:18). Dabidi karaspti: “Uánikua ambe jimbo no sési nitamakuarhisïndi ima enga jurhimbitku jámajka, peru Jeoba iámindu ambe jimbo jarhuatasïndi” (Sal. 34:19). Ka salmueri karari ísï pʼikuarheraspti enajki Jeoba jájki jurhijkandani jimbo jupijtapi ka jarhuatani imeri ambakiti konsejuecha jingoni (Sal. 73:23, 24). ¿Ambechi jorhenguarhisïni ini ejempluecheri? Eska ménisïchi kánikua uandanhiauaka problemecha ambe jimbo. Peruchi orhepani uéraaka engachi eratsentaska na enga Jeoba jarhuataaka máteruechani, engachi kómarhiska ka kurhajchani iámindu ambe jimbo (Sal. 143:1, 4-8). w19.06 17, 18 párr. 14, 15

Ju je no méni kʼuratseni engachi Jeobaeri testigueka ambe uéjki uandani o úni kʼuiripu (Miq. 4:5). Ju je jorhenguarhini ambe engaksï xarhatapka apostulicha jini Jerusaleni ísï no ióni jimbo enga kʼuiripu na uandikupkia Jesusi. Mítesptiksï na engaksï relijioniri orhejtsïkuticha xáni kurhunhiauenga (Uku. 5:17, 18, 27, 28). Peruksï pauani pauani nirasïrendi templurhu ka arhiasïrendiksï kʼuiripuechani eskaksï Jesusiri chúxapatispka (Uku. 5:42). Nóksï pʼíngukuarhispti chétapu jimbo. Juchajtuchi no chéaka engachi méntkisï uandantaska eskachi Jeobaeri testigueska, ia sea ánchikuarhitarhu, eskuela o nani engachi irekani jaka (Uku. 4:29; Rom. 1:16). Apostulichaksï tsípixapti jimbokaksï mítespka andiksïsï kʼuiripuecha kurhunhiaueni. Ístu, kʼéri kóntperata máespti para imecha engaksï ísï no sési kánhenga jimbokaksï úsïrenga ambe enga Jeoba uéjka (Luk. 6:23; Uku. 5:41; 1 Ped. 2:19-21). Engachi sési mítetini jaka eskajtsïni kʼuiripu ikiachisïnga jimbokachi imani ambe úsïnga enga sési jaka, inde ambe no úsïndi úni eskachi nóteru marhuakuakia Jeobani. w19.07 7 párr. 19, 20

Jesusi ka imeri chúxapaticha engaksï judiuepka mintsikuarhisïrendiksï sábadu, jimbokaksï úsïrenga ambe enga Moisesiri Lei uandenga. Peru Jesusi xarhataspti ima ambe jimbo enga úpka ka uandani, eska uétarhisïrenga kurhangutspini ka eska ima jurhiatikua jimbo sésikua jarhaspka para ambakiti ambe úni. (Mat. 12:9-11). No ísï exesïrendi eska ambakiti ambe úni jindespka no kurhajchani sábadu anapu juramukuani. Ambe enga ima úpka, xarhataspti andisï xáni jukaparhakuepi no ánchikuarhini ima jurhiatikua. Jimbokaksï israelitecha no úsïrenga imani ambe engaksï pauani pauani uénga, mintsikuarhisïrendiksï ka úsïrendiksï sánderu sési úni imani ambe enga Tata Diosïri ambepka. Jesusiri familia úrasïrendi sábadu jurhiatikuani para Tata Diosïni kómarhini, ísï eska na xarhatajka ambe engachi arhintajka ima amberi enga Jesusi úpka jini ireta Nasareti. Biblia arhisïndi: “Eska na jindepka imeri pʼindekua, ima mintsikuarhikueri jurhiatikua jimbo niraspti tiostarhu ka jauaraspti para arhintani ma karakata” (Luk. 4:15-19). Ístu, Jesusiri chúxapatichaksï xáni janhanharhisïrendi sábadu anapu juramukuani engaksï niárapka jurajkuni imani ambe engaksï úni japka para tata Jesukristueri kuerpuni atarhini para máteru jurhiatikua (Luk. 23:55, 56). w19.12 4 párr. 10

Iámindu kristianuecha engachi aianhpirika, jarhuajpesïngachi exeantani imani kʼuiripuechani engaksï ambakiti mintsita ma jukaka. Úpiringachi ísï terukutantani juchari ánchikuarhitani komu tataka sapichuni ma jirinhantani enga tsïnchitini jaka. ¿Andichisï uá ísï terukutantani? Ju je exeni ejemplu ma enga meru ísï úkuarhipka. Para tataka sapichuni ma jirinhantani enga tanimu uéxurhini jatiripka, ma kinientu kʼuiripu ísï jarhuajpespti. Beinte ora ísï nitamasptia enga tataka sapichu tsinchipka astaka kʼuiripu ma exentapka jima enga tsíri jatsinhajka. Ima kʼuiripu no uandaspti eska ima exentaspka, sino uandaspti: “Úskachi exentani uánikua kʼuiripuecheri jarhuajperata jingoni”. Uánikua kʼuiripu májkueni tsinchikata pʼikuarherasïndi eska ima tataka sapichu. Nóksï mítesti eska sánderu orhepani ambakiti ambe jauaka, peruksï uékasïndi eskaksï jarhuatanhaaka. Jukari ochu miioni Jeobaeri testiguechachi jámaxaka jirinhantaani indeni kʼuiripuechani. Jamberichi jaka aianhpiricha engachi no exeantajka kʼuiripuechani engaksï uékapiringa Bibliaeri ambe jorhenguarhini, peru máteru aianhpiricha engaksï imani mismu territoriurhu aianhpijka, exeantasïndiksï. Enga erachi ma niárajka jarhuatani kʼuiripuni ma Kristueri chúxapati úkuarhini, iáminduechachi kánikua tsípisïnga. w19.07 16 párr. 9, 10

Apostuli Pablu miátantaaspti Filipusi anapu kristianuechani eskaksï seguiripiringa tekantskua jingoni uiriani. Desdeka Filipusi uénapka jarhani kúnguarhikua imecheri ikiatspitichaksï kánikua no sési kaaspti. Inde ambe uéxurhini 50 jimbo ísï úkuarhispti, jiáni enga Pablu ka Silasi indeni ireta jimbo niárapka engaksï na jiókuarhipkia Tata Diosïri pʼímarperakuani para Masedonia nirani (Uku. 16:9). Filipusiksï uarhiitini ma exentaspti enga Lidia arhinhenga ka Jeoba úspti eska uékapiringa kurhaani ambakiti aianhperakuani (Uku. 16:14). Ísï tátsekua, itsï atakuarhisptiksï Lidia ka iáminduecha engaksï imeo irekapka. Peru Noambakiti no ísku pakaraspti. Imani iretarhu, máru acheetichaksï antsikupaaspti Pabluni ka Silasini paraksï juramuticha jingoni paani ka uandasptiksï eskaksï imecha no sési ambe úxapka, ambe ma enga no ísïpka. Ini ambe jimbo, Pabluni ka Silasinksï ataaspti, ónhaani ka arhiasptiksï eskaksï uéakuntapiringa iretarhu (Uku. 16:16-40). ¿Kuatantaspiksïa? Méntku nómbe. ¿Ka ima erachicha engaksï imani kúnguarhikuarhu japka enga apenasi úkuarhipka? Ískujtsïni pakatasïndi jimbokaksï imechajtu tekaantaspka, ambakiti ejempluksï máesti. Seguru eska Pablueri ka Silasiri ambakiti ejemplu uinhaperantaapka. w19.08 2 párr. 1, 2

Seguruchi jarhaska eskaksï “ambarhati úkuecha” ístu arhikuekasïnga xénchani Jeobani ka imeri iretani. Ístu aianguani máteruechani eskachi jakajkusïnga Jesusini ka ambakiti ambe engachi erokuarhini jaka. Ambakiti ambechi úsïnga engachi kánikua ánchikuarhijka indeni ambe jimbo enga xáni jukaparhakueka parachi Jesusiri chúxapatichani uáni (Mat. 28:18-20). Ambe uéjkichi nitamakuarhini jarhani, uákachi meremerejkuni komu ima ambe enga erajkutarpijka. Ménisï ima ambe engajtsïni úpiringa ójkutani parachi predikarini, uátijtsïni jarhuatani parachi ísï úni. Apostuli Pablu indeni ambe nitamakuarhispti. Enga Filipusi anapu kúnguarhikuani karakupka kartani, kʼumanchikua ma jimbo ónhakata jarhaspti jini Roma. Peru no jurajkuspti eskaksï kadenecha ójkutapiringa para no úni tsípikua jingoni aianguani soldaduechani ka imechani engaksï nirenga pʼorhembini. Imeri ejemplu úspti eskaksï kristianuecha uinhapikuarhintapiringa paraksï uandantani Tata “Diosïri uandakuani nómbe chéparini” (Filip. 1:12-14; 4:22). w19.08 12 párr. 15, 16

Ambe engachi jimbo jatsika para kaxumbitiini, jindesti eskachi sési pʼikuastasïnga Jeobani, ísï eska na uandapka apostuli Pedru ini karakatarhu enga iásï anapu tekstueka. Ambe enga Pedru uandapka, libru “Ven, sé mi seguidor” kapitulu 3, párrafu 23 jimbo, arhisïndi eska kʼéramakuarhini kánikua no sési útspisïnga. Asta ima kʼuiripu enga sési jorhenaka úni ambe ma joperu kʼéramakuarhini, para no ma ambe marhuakusïndi Jeobani. Peru ima kʼuiripu enga kaxumbitiika, kánikua sési marhuakusïndi Jeobani. Ístu libru arhisïndi eskajtsïni Tata Diosï tsípikua jingoni kóndintaaka engachi kaxumbitiuaka. ¿A no eskachi iáminduecha exesïnga eska no jarhaska sánderu ambakiti ambe ka eska Jeobaeri mintsitani sési pʼikuastani? (Prov. 23:15). Kaxumbitiini, sésichi pʼikuastasïnga Jeobani, ka ístujtsïni juchantsïni mismu marhuachisïndi. Úsïndi eskaksï máteruecha uékaaka juchantsïni jingoni jarhani. Parachi úni kurhanguni andichisï ísï uandajki, ju je eratseni na jásï kʼuiripuecha jingonchi uékasïni jarhani (Mat. 7:12). w19.09 4 párr. 8, 9

Orhejtsïkutichaksï kánikua ánchikuarhisïndi paraksï erachichani jarhuataani. Ka nóksï sánderu kʼéri pʼikuarherasïndi jimbokaksï juramukua jatsiska, sánderu sési, uékperakua jingonksï kaasïndi kúnguarhikuarhu anapuechani (1 Tes. 2:7, 8). Na engaksï uandajpaajka máteruechani xarhatasïndi na engaksï xáni xénchpijka ka kaxumbitinksï. Andres enga ióni orhejtsïkutikia, uandasïndi: “Kuenta íntskukuarhiska eskaksï erachicha sési pʼikuarherasïnga engaksï orhejtsïkuticha sési kaajka ka xarhatakuanksï eskaksï mintsita jingoni xénchaasïnga. I ambe úsïndi eskaksï erachicha méntkisï uékaaka jarhuataani orhejtsïkutichani”. Ka Tomasi, enga ístu ióni páni jakaia orhejtsïkutini, uandasïndi: “Jánguarhintasïnga ísï úni eska Filipusʌ 2:3 na arhijka ka méntkisï máteruechani ísï exeani eskaksï sánderu kʼéri ambeeska eska ji. I amberini jarhuatasïndi parani no afuersa uékani eskajtsïni máteruecha kurhajchaaka”. Orhejtsïkutichaksï jatsisti para kaxumbitiini, ísï eska Jeoba. Nájkiruka ima Juramutiika iámindu amberi, kʼutitsesïndi para ‘tʼupurirhu uératini jauatantani kaxumbitini’ (Sal. 18:35; 113:6, 7). Kurhunhisïndi enga nema kʼéramakuarhijka. w19.09 16, 17 párr. 11, 12

Parachi sési pʼikuarherani no jurajkuparini Jesusiri uananchatarakuani, jatsiskachi para exeni ánchikuarhitani engachi újka. Jeobaeri ánchikuarhitanchi úsïnga, ísï jimbo, jatsiskachi para ísï úni eskajtsïni ima na arhijka. Juchachi ánchikuarhiriska ka ima Patronisti (Luk. 17:10). Engachi ísï uékaaka úni imeri ánchikuarhitani eskachi jucha na uéjka, niáraakachi no sési úkuarhinchani. Peru engachi ísï úska eskajtsïni Jeoba na arhistachijka, uákachi ambakiti ambe úni ka orhepani uérakuani ójkutakuechani. Ju je miáni eska no nema uáka ójkutani para no úkuarhini ambe enga ima uéjka úni (Rom. 8:31; 1 Juanu 4:4). Ambe engachi uéjka, jindesti kʼéri ambe arhini juchari Táti Jeobani enga uékpitiika. Primeru sigluni, jarhasptiksï kʼuiripuecha engaksï úpka ambe ma solu paraksï sánderu jatsikuarhirini. Inde ambe jingoni, nóksï tsípikua jingoni irekaspti ka jurajkusptiksï Jesusiri uananchatarakuani (Juanu 6:25-27, 51, 60, 66; Filip. 3:18, 19). Peruksï ístu jarhaspti máteruecha engaksï uékperakua jimbo úpka ambe ma para Tata Diosï ka para máteruecha, no ma ambe erokuarhiparini. Íchaksï tsípikua jingoni úspti ánchikuarhitani engaksï jamberi irekaka ixú Echerirhu ka erokuarhispitksï para májku kʼéri marhuani Jesusi jingoni auandarhu. Juchajtuchi sési pʼikuarheraaka engachi úraska Jesusiri uananchatarakuani ambakiti eratsekua ma jingoni. w19.09 20 párr. 1; 24, 25 párr. 19, 20

Ju je eratsintani na engachi xáni uáni kóntperatechani jatsiakia jimbokachi nóteru jántspiriskia no jurhimbiti jorhenguarhikuecheri engachi desde iónisï jakajkuapka. Sésichi pʼikuarherasïnga engachi ísï pʼímutantanhaka. Sánderu orhepatini, sánderu kʼéri pʼímutantskua ma jauati. No ióni jimbo, Jesusi kʼamajkuati no jurhimbiti relijionini ka ístu juramutichani engaksï no jurhimbikua jingoni újka ambe ma. Tata Diosï kuájchakuauati “uánikua kʼuiripuechani” engaksï imeri marhuarika ka uánikua kóntperatechani íntsauati ixú Echerirhu paraisurhu ma (Jaŋ. 7:9, 14). Ístu, uánikua kʼuiripuechani tsítaantauati, imecha engaksï uékaaka marhuakuni Jeobani nóteruksï pʼamenchaatia, tʼarhepini ni uarhini (Uku. 24:15). Imani Mili Uéxurhini jimbo enga Jesusi Juramuaka, ima ka imecha engaksï imani jingoni juramuaka, jarhuataatiksï kʼuiripuni paraksï nóteru méni pʼamenchania ka paraksï ambakiti pájperakua ma jatsini Tata Diosï jingoni. Israelitechaksï kánikua sési pʼikuarherasïrendi imani Uéxurhini jimbo engaksï Pʼímutantanhenga, peruksï kʼuiripuecha sánderu sési pʼikuarheraati engaksï kʼamakʼamasï pʼímutantanhaaka jiáni enga tata Jesukristu Juramuni jauaka Mili Uéxurhini jimbo. Iámindu imecha engaksï marhuakuni jauaka Jeobani perfektueuatiksï. Nóteruksï jántspiriuatia pekadueri. w19.12 12, 13 párr. 14-16

Primeru sigluni, Jose (enga imeri apeidu jindeepka Bernabé) acheeti ma enga intsïmbitipka, listu jarhaspti para Jeoba úrani (Uku. 4:36, 37). Enga Saulu kristianuepkia, uánikua erachichaksï chérhisïrendi andarhierani, jimbokaksï mítespka eska Saulu no sési kaaspka kúnguarhikuarhu anapuechani. Peru Bernabé jarhuataspti Sauluni (Uku. 9: 21, 26-28). Ísï tátsekua, Jerusaleni anapu orhejtsïkutichaksï mítespti eskaksï Antiokía anapu erachicha uétarhinchaxapka uinhaperanhantani. ¿Ka nénksï axaspi? Bernabéni. Kánikuaksï sési úspti engaksï Bernabeni axapka, jimboka Biblia uandasïnga eska pʼímarhiaspka iáminduechani paraksï méntku jauenani “mintsita jingoni chúxapani juchari Tatani” (Uku. 11:22-24). Ini jurhiatikuecha jimbo, ístujtsïni Jeoba uáti jarhuatani parachi sési pʼikuastantaani erachichani, por ejemplu, imechani engaksï nemani uarhirakuarhika. O jamberi úni eskachi niuaka pʼorhembini o uandajpani nemani enga pʼamenchani jaka o kómu pʼikuarherani ka imani ambe arhini enga sési pʼikuastantaaka. ¿Listuchi jaua parajtsïni Jeoba úrani ísï eska Bernabéni? (1 Tes. 5:14). w19.10 22 párr. 8

Engachi erachicha jingoni aianhpijka, ménisïchi no solu ambakiti ambejku exekuasïnga sino ístu ambe engaksï no sési újka. ¿Ambejtsïni jarhuataa enga ísï úkuarhiska? Sési jimbo, nóchi uáka erokuarhini eskaksï erachicha iámu ambe sési uáka. Ísï jimbo, ju je jánguarhintani méntkisï sési pájperani juchari amiguecha jingoni. Enga juchari amigu ma no sési ambe úska, jamberichi jatsiaka para jurhimbitku arhini ambe enga no sési úka peru uékperakua jingoni ka konseju ma íntskuni Bibliani úraparini (Sal. 141:5). Ka jatsiskachi para puákuntani engajtsïni juchantsïni no sési úchiaka. Ka engachi puákuntakia, nóchi jatsiska para miántani jarhani ambe engajtsïni úchika. Kánikua jukaparhakuesti eska ini jurhiatikuecha jimbo enga xáni úkua jukaka, nóchi masi arhini jauaka imani ambe exeni ambe engaksï no sési újka erachicha ka pirenchicha, sino ambakiti ambe engaksï újka. Ini ambe úparini, sánderuchi sési pájperaaka. Ka meru uétarhisïndi eskachi ísï uáka, jimbokachi kʼéri mískuarhitarhu uétarhinchauaka ambakiti amiguechani. w19.11 6 párr. 13, 16

Engachi Bibliaeri ambe jorhentpijka, jatsiskachi para jánguarhintani Jesusiri chúxapatichani uáni ka jorhendaani úni iámindu ambe enga Jesusi juramuka. Jatsiskachi para jarhuataani kurhanguni eska kánikua jukaparhakueska marhuakuni Jeobani ka apoiarini imeri Reinuni. I ambe arhikuekasïndi eskachi jánguarhintaaka jarhuataani paraksï ísï úni eskaksï na jorhenguarhini jaka, eskaksï aiakukuarhiaka Jeobani ka itsï atakuarhinksï. Soluksï ísï uáti tsípiti pakarani Jeobaeri jurhiatikua jimbo (1 Ped. 3:21). Nóteru xáni ióni kuerataxatia para i parhakpini kʼamajkunhani. Ísï jimbo, no jarhasti tiempu para imechani jorhendaani jarhani Bibliaeri ambe engaksï no uéjka Kristueri chúxapatiini (1 Kor. 9:26). Meru uétarhisïndi eskachi niuaka aianhpini, jimboka útasï uánikua kʼuiripu jarhaska enga jatsika para míteni Reinueri ambe antede nóteru jarhania tiempu. w19.10 12 párr. 14, 15

Mándani uéxurhini, jarhaspti ma Jurhiatikua enga Jeoba Puátspintenga. Ima jurhiatikua jimbo, ireta Israeli tánguarhintasïrendi ka kʼéri saserdoti, animalichani kéjtsïtaasïrendi. Ima kéjtsïtakuechaksï miátantaasïrendi israelitechani eskaksï uétarhinchasïrenga pímbinhasï jarhani Jeobani japarini. Orheta, kʼéri saserdoti kurhirasïrendi insiensuni ka úndasïrendi sési jájkundeni iámu kuarturhu. ¿Ambechi jorhenguarhisïni íri ambe? Bibliarhu uandasïndi eska Jeoba ísï jaiapanhiantasïnga imeri marhuaricheri kómarhikuechani komueska insiensu (Sal. 141:2; Jaŋ. 5:8). Kʼéri saserdoti kánikua janhanharhikua jingoni pásïrenga insiensuni Jeobaeri orhepani jimbo. Májkueni, juchajtuchi kánikua janhanharhikua jingoni uandajpasïnga Jeobani kómarhikua jimbo. Kánikuachi jukaparharasïnga engajtsïni Kuerajpiri íntskujka sésikua parachi andarhierani, ísï eska sapi ma na újka táti jémbani jingoni (Sant. 4:8). Jiókuarhisïndijtsïni parachi imeri amigueni (Sal. 25:14). Ka i ambe kʼéri kóntperata máesti, jimbochisï no uéjka imani ambe úni enga no sési pʼikuastaaka. w19.11 20, 21 párr. 3-5

¿Nénaksï exesïni ánchikuarhita sáno iámindu kʼuiripuecha jima engajtsï irekaka? Uánikua paisicha jimbo, kʼuiripuechaksï jukari ánchikuarhisïndi. Ka ini ambe jimbo, uánikuaksï jukari ánchikuarhisïndi engaksï no jamberi tiempu jatsijka para mintsikuarhini, imecheri familia jingoni jarhani ni para Tata Diosïri ambe jorhenguarhini (Ecl. 2:23). Peruksï jarhasti máteru kʼuiripuecha engaksï ménderu no tsitijka ánchikuarhini ka mámaru ambeksï jirinhakuntasïndi paraksï no ánchikuarhini (Prov. 26:13, 14). Jarhastiksï uánikua kʼuiripuecha engaksï jukari ánchikuarhijka ka máteruecha engaksï no tsitijka. Peru eratsinta je na engaksï exejka Jeoba ka Jesusi ánchikuarhitani. Míteskachi eska Jeoba tsitisïnga ánchikuarhini. Jesusi sési xarhataspti ini ambe enga uandapka: “Juchiti Táti méntkisï ánchikuarhisïndi asta i jurhiatikueri jamberi, ka jíjtuni jatsiska para ísï ánchikuarhini” (Juanu 5:17). Ju je eranhaskani na enga xáni uánikua ánjelichani kuerauaka ka iámindu ambe enga xáni auandarhisï jaka ka iámindu ambe enga ixú juchari parhakpinirhu jaka enga xáni sési jáxeka. w19.12 2 párr. 1, 2

¿Ambe úspi Dabidi para ambakiti pájperakua ma jatsini Jeoba jingoni? Dabidi niáraspti jorhenguarhini Jeobaeri ambe kueraakata ambe exeparini. Jiáni enga tumbipka, ióni jámaspti táti jemberi karichichani kuidarikuani juátarhu ísï. Jamberi jiánipti enga uénapka eratsintani ambe enga xáni úka Jeoba. Por ejemplu, enga eranchenga chúrikuechani, no solu exeasïrendi uánikua jóskuechani, sino exesïrendi na enga jásï kʼuiripu máeka ima enga jóskuechani kuerauaka. (Sal. 19:1, 2). Ístu enga eratsintenga na engaksï úkata jaka kʼuiripuecha, exesïrendi na enga xáni jánhastiika Jeoba (Sal. 139:14). Ka enga jánguarhintenga kurhanguni na enga xáni kʼéri ambe úka Jeoba, ísï pʼikuarherasïrendi enajki ima no ma ambepi (Sal. 139:6). ¿Ambechi jorhenguarhisïni? Uákachi jingontku exeni na enga Jeoba xáni sési kueraaka parhakpinini. Ju je pauani pauani eratsintani ambe engajtsïni jorhendajka Tata Diosïri ambe iámindu ima ambe engachi xáni exejka komu: tsïtsïkicha, animalicha ka kʼuiripuecha. Ísï úparini, pauani pauanchi uánikua ambe exentaaka para jorhenguarhini juchari Táti uékpitiri ambe (Rom. 1:20). Ka niáraakachi sánderu xénchani. w19.12 19, 20 párr. 15-17

Moisesi ísï úspti eska na jorhenguarhipka. Enga Moisesi ma 40 ísï jatiripka, enbesi de ísï mítekateni “eska rei faraoniri uájperi uájpespka”, ima erakuspti israelitecha jingoni úkuarhini engaksï jindepka Tata Diosiri ireta, ebreuecha. Moisesi iámindu ambe jurajkuspti para Jeobani marhuakuni. Enga Moisesi jarhuataapka israelitechani engaksï Ejiptu jántspiripka, mítespti eska faraoni kánikua ikiapiringa, rei ma enga kánikua juramukua jatsipka ka enga ísï exenhenga komueska diosï ma. Ísï úparini, Moisesi xarhataspti eska kʼéri jakajkukua ma jatsispka, ka eska mintsikasïrenga Jeobani. Inde jásï mintsinharhikuasï uétarhijti para ambakiti pájperakua ma jatsini Jeoba jingoni enga no méni kʼamakurhiaka (Prov. 3:5). ¿Ambechi jorhenguarhisïni? Májkueni eska Moisesi, iáminduechachi jatsiska para erakuni sinchi marhuakua Jeobani ka imeri ireta jingoni úkuarhini o nómbe. Jamberi para marhuakuni Jeobani jatsiakachi para jurajkuni ambe engachi sánderu tsitijka ka no sési nitamakuarhini engajtsïni ójkutaaka imecha engaksï no míteka Jeobani. Peru engachi mintsikaska juchari Táti auandarhu anapuni, seguruchi jauaka eskajtsïni ima jarhuataaka. w19.12 17 párr. 5, 6

Nájkirukajtsïni Jeoba tʼupuri jingoni kueraaka, kánikuachi sánderu jukaparhakueska ka eska ma kunujkurhakua echeri. Ju je exeani máru rasonichani engachi jimbo míteka eskajtsïni Jeoba jukaparharasïnga. Por ejemplu, ísïjtsïni kueraasti parachi úni xarhatani na enga jásï Tata Diosï máeka ima (Gén. 1:27). Ísï, ústi eska kʼuiripu sánderu ambakiti ambepiringa ka eska máteru ambe enga kueraaka ixú echerirhu ka juchantsïni jurajkuchisti Echerini ka animalichani parachi kuidariuani (Sal. 8:4-8). Nájkiruka Adani pekaripkia, Jeoba seguirixapti jukaparharaani kʼuiripuechani. Xánchi jukaparhakueska para ima, enga jamberi íntspika imeri Uájpa Jesusini komu kéjtsïtakua ma juchari pekaduecha jimbo (1 Juanu 4:9, 10). Pʼímutantskua jimbo, Tata Diosï tsítantauati imechani engaksï Adaniri pekadueri kulpa jimbo uarhika, imechani engaksï ambarhatika ka ístu imechani engaksï no úka míteni Jeobani (Uku. 24:15). Imeri Karakata jimbojtsïni aiangusïndi eskajtsïni kánikua jukaparharasïnga, peru no jimbokachi no pʼamenchasïnga, tumina ambe jimbo o na engachi xáni jatirika (Uku. 10:34, 35). w20.01 15 párr. 5, 6

No jimboka familiarhu anapu ma erakukateskia, arhikuekasïnga eskaksï máteruechajtu erakukateska, Tata Diosïsï erakuajti (1 Tes. 2:12). Nochi jatsiska para kurhamarpini ambe ma enga no sési pʼikuastpiaka. Por ejemplu, nóchi méni kurhamarhiaka erakukateri témbani ma néna pʼikuarherasïni enga eratsejka eska irekaaka para méntkisï Echerirhu peru no uámba jingoni. Jimbokachi sési mítetixaka eska jimbanhi parhakpinirhu, Jeoba uáka eska iámu kueraakata jatsiaka ambe enga uétarhinchaaka para tsípikua jingoni irekani (Sal. 145:16). Ístu, engachi no ísï kaajka erakukatechani enajkiksï sánderu jukaparhakuepirini eskaksï máteruecha, juchachi mismu kuájchakukuarhisïnga. ¿Néna? Biblia uandasïndi eskaksï máru erakukatecha úpiringa jurajkuni Jeobani (Mat. 25:10-12; 2 Ped. 2:20, 21). Peru engachi no kʼéri ambe exeajka kʼuiripuechani, nóchi méni jindeuaka kʼuiripuecheri chúxapaticha, nájkirukaksï erakukateuaka, kánikua mítekateni oksï ióni marhuakunia Jeobani (Jud. 16). Jiájkani, engaksï imecha niáraaka jurajkuni Jeobani o kúnguarhikuani, juchachi seguirini jauaka mintsikani Jeobani ka marhuakuni. w20.01 29 párr. 9, 10

Jimbokachi Jeobaeri uájpeska “enga ima xáni uéajka”, kánikuachi jánguarhintasïnga para ísïni eska ima. Májkuenchi úsïnga eska ima engachi xénchpejka, sési kámpini ka puátspintani. Engaksï kʼuiripuecha engaksï no míteka Tata Diosïni exejka juchari jánguani, jamberi inde ambe uáti eskaksï imecha uékaaka sánderu míteni Jeobaeri ambe (1 Ped. 2:12). Táticha engaksï kristianueka, ambakiti rasoni maksï jatsisti paraksï májkueni kaani uájpechani ísï eskajtsïni Jeoba na kámajka juchantsïni. Engaksï ísï úska, jamberiksï uájpechajtu uékaati amigueni juchari Táti uékpitiri. Juchachi kʼéri ambe exesïnga juchari Táti auandarhu anapuni ka uékasïngachi eskaksï máteruechajtu míteaka. Májkuenchi pʼikuarherasïnga eska rei Dabidi enga karapka: “Kánikua sési pʼikuarheraaka Jeobaeri ambe uandantani” (Sal. 34:2). Peru jamberichi máru chéjka Jeobaeri ambe uandantani. ¿Ambejtsïni jarhuataa parachi no chéni? Eratsentani eska engachi uandantaska imeri ambe, uákachi kánikua tsíperani Jeobani ka na enga xáni marhuakuauaka imechani engaksï niáraka míteni imani. Imajtsïni íntskuati balori engachi uétarhinchajka. Ka jarhuataatijtsïni ísï eska na jarhuataapka primeru siglurhu anapu erachichani (1 Tes. 2:2). w20.02 11 párr. 12, 13

Uánikuecha engaksï Bibliaeri ambe jorhenguarhijka, niárasïndiksï itsï atakuarhini. Peruksï jarhasti máru engaksï chéjka Jesusiri chúxapati úkuarhini. Tsitisïndiksï ambe engaksï jorhenguarhijka, peruksï no jánguarhintasïndi paraksï niárani itsï atakuarhini. Seguruchi jarhaska eskaksï imecha engaksï Bibliaeri ambe jorhentpejka, uékasïngaksï jarhuataani jorhenguarhirichani paraksï ísï úni eskaksï na jorhenguarhini jaka ka niáranksï Jesusiri chúxapati úkuarhini. Jeoba uékasïndi eskaksï kʼuiripuecha uékperakua jimbo marhuakuaka. Ísï jimbo, ambe engachi uéjka, jindesti eskaksï jorhenguarhiricha kurhanguaka eska Jeoba uandanhiasïnga mándani imechani jimbo ka eska kánikua xénchaasïnga. Uékasïngachi eskaksï ísï exeaka Jeobani komueska Táti ma para uerandujupindicha ka eska kuájchakuasïnga tsïndichani (Sal. 68:5). Engaksï jorhenguarhiricha niárajka kurhanguni na enga xáni xénchaajka Jeoba, jamberiksï niáraati sánderu xénchani imani. Ísï jimbo, ju je jarhuataani jorhenguarhirichani kurhanguni eska juchari Tata Diosï uékpiti, uékasïnga eskaksï jatsiaka tsípikua para méntkisï ka eska jarhuatauaka paraksï niárani ísï úni. w20.01 3 párr. 7, 8

Apostuli Pablu kaxumbitispti jimbosï jurajkuendi eskaksï imeri amigu jémbecha sési pʼikuastantapiringa. No kʼuratsesïrendi eskaksï máteruecha mítepiringa eskaksï erachicha sési pʼikuastantaspka jiáni enga no sési nitamakuarhipka (Kol. 4:7-11). Engachi kaxumbikua jingoni jiókuarhiska eskachi uétarhinchasïnga eskajtsïni nema uinhaperantaaka, erachichajtsïni tsípikua jingoni jarhuataati. Pablu mítespti eska Tata Diosïri Karakata úpiringa sési pʼikuastantani (Rom. 15:4). Ka ístu jarhuatapirindi para jánhaskatiini para náki uéjki uandanhiatani orhepani uérakuni (2 Tim. 3:15, 16). Enga tsimani úni jámani ónhakata japkia jini Roma, mítespti eska no ióni jimbo uarhipiringuia. ¿Ambe úspi enga xáni no sési ambe nitamakuarhini japka? Arhispti Timoteuni eska kókuani nipiringa exeni ka eska pákuapiringa “karakatechani” (2 Tim. 4:6, 7, 9, 13, TDU). ¿Andisï indeni ambe kurhakupi? Jimboka imani karakatecha jimbo, jamberiksï karakata japti máru particha Karakata Ebreauecheri enga ima úpiringa úraani para sánderu ambe jorhenguarhini. Engachi juchajtu méntkisï estudiariska Bibliani ísï eska Pablu, Jeoba indeni ambe úraati parajtsïni sési pʼikuastantani náki uéjki uandanhiatanchi nitamakuarhini jarhani. w20.02 23 párr. 14, 15

Elifasi, Bildadi, ka Sofari noksï úraspti tiempuni para eratsentani ambe engaksï arhipiringa Jobuni. Sánderu sési, eratsexaptiksï néna xarhatani eska Jobu no sési ambe úspka. Máru ambe ísïspti ambe engaksï uandapka, peru sáni no iámindu ambe engaksï uandapka Jobueri ka Jeobaeri ambe, no ísïspti ka no sésiksï pʼikuastaspti Jobuni. Ístuksï arhispti Jobuni eska no ambakiti kʼuiripu máespka (Job 32: 1-3). ¿Néna exespi ini ambe Jeoba? Kánikua ikiaspti ini tanimu acheeticha jingoni. Arhiaspti eskaksï tontuespka ka ístu eskaksï kurhakupiringa Jobuni eska kómarhijpikuapiringa (Job 42:7-9). Ambe engaksï no sési úpka Elifasi, Bildadi ka Sofari, uánikua ambejtsïni jorhendasïndi. Orheta, eskachi no jatsiska para juchari erachichani jusgariani (Mat. 7:2-5). Sánderu sési, ante dechi uandani jatsiskachi para jingontku kurhajchaani. Solu ísïchi uáka kurhangukuani ambe engaksï nitamakuarhini jaka (1 Ped. 3:8). Máteru ambe engachi jorhenguarhijka, jindesti eskachi jatsiska para exeni eska ambe engachi uandaaka, no no sési pʼikuastpiaka ka eska jurhimbikua ambeuaka (Efes. 4: 25). Ka para kʼamarani, eska Jeoba kánikua jukaparharasïnga ambe engachi arhiajka máteruechani. w20.03 22, 23 párr. 15, 16

Niárasïngachi sánderu sési míteni Jeobani engachi imeri ambe jorhendaajka máteruechani. Por ejemplu, exesïngachi na enga xáni pʼamojpijka engajtsïni jarhuatajka imani kʼuiripuechani jirinhaantani engaksï ambakiti mintsita ma jukaka (Juanu 6:44). Exesïngachi na enga xáni uinhapika Tata Diosïri Karakata engaksï ima kʼuiripuecha engachi Bibliaeri ambe jorhendaajka, jurajkuajka pʼindekuechani engaksï no sési jaka ka iásïksï uénania ménderueni jámani (Kol. 3:9, 10). Ka exesïngachi eska Jeoba tekaantskua xarhatakuasïnga kʼuiripuechani engachi jucha predikarikuajka jimbokajtsïni uánikua xanhari axasïnga parachi jarhuataani imeri ambe jorhenguarhini ka eskaksï pʼímutantskata uéraaka (Rom. 10:13-15). Méntkisïchi jatsiska para jukaparharani juchari pájperakua Jeoba jingoni no arhiparini na engachi xáni ióni marhuakukia. Ka ma ambe engachi uáka úni parachi xarhatani eskachi jukaparharasïnga, jindesti kómarhini Jeobani. Nema niárasïndi kánikua sési pájperani máteru nema jingoni engaksï méntku uandontskuarheni jarhajka. Ísï jimbo, ju je andarhierani Jeobani someni kómarhiparini, no sáni chéparini aianguni ambe engachi eratsijka ka pʼikuarherani. w19.12 19 párr. 11, 13, 14

¡Kánikuajtsïni sési pʼikuastantasïndi míteni i ambe! Máteru ambe, ambakiti ambechi erokuarhixaka míteparini eska Jesusi jindeeska Rei Tata Diosïri Reinurhu ka eska kénditaaka iámindu kómu nitamakua ambe enga Satanasiri ka imeri parhakpiniri kulpa jimbo jaka (Is. 65:17; 1 Juanu 3:8; Jaŋ. 21:3, 4). Ka ístu, balorichi jukasïnga míteparini eskajtsïni Jesusi jarhuataxaka ini últimu jurhiatikuecha jimbo úni ánchikuarhitani engajtsïni ima juramuchika (Mat. 28:19, 20). ¿A no eska kánikua jukaparhakueska sési pʼikuarherani, ambakiti ambe erokuarhini ka balori jukani parachi pínandikua jatsini? Ísï jimbo, ¿nénachi uá no uandanhiata ambe eratseni jarhani engachi no sési nitamakuarhini jauaka? Májkueni úparini eska Jesusi. Uénani jámani, kómarhini méntkisï. Tsimani úni jámani, ju je kurhajchani Jeobani ka tsípikua jingoni aianhpini nájkirukachi kánikua úkua jukanchaaka. Ka últimu, ju je jurajkuni eskajtsïni juchari amiguecha jarhuataaka. Jiájkani, Tata Diosïri pínandikua kuájchakuati juchari eratsekuani ka mintsitani (Filip. 4:6, 7). Ka májkueni eska Jesusi, uákachi orhepani uérakuni náki uéjki tsʼéjkukuani ma (Juanu 16:33). w19.04 13 párr. 16, 17