Oktubri

Uánikua pruebechanchi jatsiaska eska ini jurhiatikuecha jimbo, Jeoba kuájchakuxaka imeri iretani. Ju je eratseni ini ambe: aianhpixakachi ka jorhentpini jurhimbikuani iámu parhakpinirhu (Mat. 28:19, 20). Ini ambe úparini, úxakachi eska xarharaaka ambe enga xáni no sési úni jaka Noambakiti. Seguru eska enga Noambakiti úpiringa, pʼíngupirindi juchari ánchikuarhitani, peru no úsïndi. Ísï jimbo, nóchi jatsiska para kánikua chérhiani demoniuechani. Engachi no jurajkuska Jeobani, demoniuechajtsïni no uáti no sési úchini para méntkisï. Peru iáminduechachi jatsiska para orhepani uérakuani demoniuechani ka mintsikani Jeobani. Engachi ísï úska, uánikua kóntperatechanchi jatsiauaka. Por ejemplu, Noambakitijtsïni no uáti chkuanderachini. Ístu, nóchi méni jurajkuaka Jeobani marhuakuni solu jimbokachi chérhiasïnga demoniuechani. Ka ambe enga sánderu jukaparhakueka, jindeesti eskachi sánderu ambakiti pájperakua ma jatsiaka Jeoba jingoni. Disipulu Santiagu karasti: “Asï jiókuarhi je Noambakitini, ka ísïksïni ima késtakuchiati. Andarhiera je Diosïni, ka imajtuksïni andarhieraati” (Sant. 4:7, 8). w19.04 24 párr. 15; 25 párr. 18

Táticha, chári sapiichaksï Tata Diosïri kóntperata máesti, “Jeobaeri intsïmperakua” ma. Chájtsï jatsiska para kuidariuani chári sapiichani. ¿Ambejtsï uá úni parakaksï chári sapiicha no ísku ambe ma úminhaaka? Orheta, sési míti je ambe engaksï újka imecha engaksï ísku ambe ma úkuajka sapiichani. Exe je na jásï kʼuiripuechaksï úsïni indeni ambe ka nénaksï enganiariuasïni sapiichani. Jingontku ja je imani kʼuiripuecha jingoni engaksï úpiringa no sési ambe úni (Prov. 22:3; 24:3). Miá je eska sáno méntkisï, kʼuiripu enga ísku ambe ma úkuajka sapiichani jindeesïnga ima enga sapi míteka ka mintsikani. Tsimani úni jámani, jánguarhinta je paraksï chári sapiicha pʼindeni chánksïni jingoni uandontskuarheni (Deut. 6:6, 7; Sant. 1:19). Miá je eska sáno méntkisï, sapiichaksï úkua jukanchasïnga uandantani ambe enga úkuarhika. Jamberiksï chéati jimbokaksï no jakajkukuauaka. O jamberi no sési úri arhini ambe ma sapini para no ma ambe uandantani. Enga chá exeni jaka eska ambe ma no sési jarhaska, uékperakua jingoni kurhamarhi je ambe ma ka tekaantskua jingoni kurhajcha je ambe engaksïni aianguaka. Tanimu úni jámani, aiangua je chári sapiichani íri ambe. Jorhendaa je ambe úni ka ambe arhiani imechani engaksï uékaaka nánderkueni pʼárhiani. w19.05 13 párr. 19-22

¿Andisï Jeoba kurhunhiajki imechani engaksï kʼéramakuarhijka? Ma ambe jindeesti eska imecha engaksï kʼéri ambe exekuarhijka ka únksï eskaksï máteruecha májkueni eratseaka, xarhatasïndiksï na enga xáni kʼéramakuarhijka Noambakiti. Xáni kʼéramakuarhisïndi enga jakajkupka eska Jesusi enga jarhuataka Tata Diosïni iámindu ambe kueraani, jatsispka para tinguixurhikuni ka kʼéri ambe arhini (Mat. 4:8, 9; Kol. 1:15, 16). Na engaksï kʼéramakuarhijka kʼuiripuecha, xarhatasïndi andisï Tata Diosï uandajki eska méntku no marhuasïnga ambe enga parhakpini jorhentpijka (1 Kor. 3:19). Joperu Biblia arhisïndi eska no no sési jarhaska uékakuarhini. Por ejemplu, Jesusi uandaspti: “Uékakari máteruni eska tʼujkumindu na uékakuarhijka” (Mat. 19:19). I ambe arhikuekasïndi eskachi jatsiska para séskisï jukaparharani juchari ambe. Peru Bibliajtsïni no jorhendasïndi eskachi sánderu kʼéri ambeska eska máteruecha, sánderu sési, arhisïndijtsïni eskachi no ma ambe uáka “embidia jimbo o tepakarakuarhikua jimbo, sino kaxumbikua jingoni, ka sánderu kʼéri ambe exeani máteruechani” (Filip. 2:3; Rom. 12:3). w19.05 24 párr. 13, 14

Ju je miáni ambe engachi xáni mójtakuka engachi jorhenguarhipka ambe enga Tata Diosïri Karakata arhijka ka engachi erakupka marhuakuni Jeobani. Uánikuechachi jatsispka para nóteru únia imani ambe enga no sési jaka (1 Kor. 6:9-11). Xáni engachi agradeserikujka Jeobani engajtsïni jarhuataka indeni ambe jurajkuni. Peru nóchi méni jatsiska para eratseni eskachi nóteru ambe ma jatsiskia para mójtakuni. Nájkirukachi nóteru újkia imani ambe engachi antede itsï atakuarhini uénga, komu kʼéri pekadu ambe, útasïchi jatsiska para jánguarhintani no úni imani ambe engajtsïni niárapiringa ménderu úrani kʼéri pekadu ambe. Jatsiskachi para tsimani ambe úni. Orheta jatsiskachi para nóteru terukukuantania parhakpini anapuechani. Tsimani úni jámani, jatsiskachi para mójtakurhini jimbanherantaparini juchari eratsekuani. Ísï mójtakurhini, sánderu ambesï arhikuekajti eska solu ménderueni xarharani. Jindesti mójtakuni iámindu ambe na engachi jásï kʼuiripu máeka. Jatsiskachi para meru mójtakuni na engachi eratsejka, i ambe jindesti ambe engachi tsitijka, na engachi jámajka ka ambe engachi mintsitarhu pʼikuarhinhijka. w19.06 9 párr. 4-6

Engachi uandanhiani jarhajka, uákachi ménderu uinhapikua jatsini engachi niraska tánguarhikuecharhu. Indeni ambe úparini, úsïngachi eskajtsïni Jeoba sánderu jarhuataaka ka sésijtsïni pʼikuastani. Tánguarhikuecharhu, úsïndijtsïni uinhaperantani imeri espiritu santu jimbo, imeri Karakata jimbo ka imeri marhuaricha jimbo. Ístu, tánguarhikuecharhuchi úsïnga uinhaperpintani ka eskachi uinhaperanhantaaka (Rom. 1:11, 12). Pirenchi ma enga Sofía arhinhajka, uandaspti: “Jeoba ka erachichajtsïni jarhuatasti orhepani uérani. Tánguarhikuechaksï sánderu jukaparhakuespti para ji. Exeska eska, engani sánderu predikarijka ka sánderu jarhuajpini kúnguarhikuarhu, sánderu no úkua jukasïndi parani orhepani uérakuani problemechani ka engani uandanhiani jarhajka”. Engachi no sési pʼikuarherani jauaka, ju je miáni eska Jeoba no solu aiatspiska eska sánderu orhepani kénditaaka kómu nitamakuani para méntkisï, sino ístujtsïni aiachisïndi eskajtsïni jarhuataaka iásï. Ima úsïndi eskachi uékaaka ka ístu parachi uinhapikua jatsini para úni orhepani uérani engachi no sési pʼikuarherani jauaka o engachi nóteru jánhaskaakia ambe úni (Filip. 2:13). w19.06 19 párr. 17, 18

Seguru eska Jesusi uékasïnga jukaparhakua ambe arhiani imeri chúxapatichani parakaksï uáka, jimbosï jirejiresï tánguarhikua ma úpti enga na tsíntapkia. Imani tánguarhikua jimbo enga Jesusi úpka primeru siglurhu, arhiaspti imeri chúxapatiichani náki ánchikuarhitanksï úpirini enga kánikua jukaparhakueka, indeni mismuni engachi iásï jucha úni jaka. Arhiaspti: “Ísï jimbo, ní je ka jorhendaa je iámindu iretecharhu anapu kʼuiripuechani. [...] Jorhendaa je iámindu imani ambe úni engaksïni ji juramuchika”. Jesusi uékasïndi eskaksï iámindu imeri chúxapaticha aianhpiaka. I juramukua no jindespti solu para onse ambakiti apostulicha. ¿Andichisï xáni seguru jaki? Jimbokaksï no solu apostulicha jarhaspka jini Galileaeri juáta jimbo jiáni enga Jesusi juramukuapka paraksï disipulu uáni. Ju je miáni eska ánjeli arhiaspka uarhiitichani eskaksï imecha exepiringa Jesusini jini Galilea. Ísï jimbo, jamberiksï imani tánguarhikuarhu ístuksï japti ambakiti uarhiiticha. w20.01 2 párr. 2-4

Jesusi uandaspti andichisï no sési kánhapirini. Uandaspti eskachi no sési kánhapiringa jimbokachi no májkueni jámapiringa eska parhakpini anapuecha. Engachi ísï no sési kánhajka, no arhikuekasïndi eskajtsïni Jeoba nóteru újchakuraxakaia. Sánderu sési, arhikuekasïndi eskachi imani ambe úxaka enga sési jaka. Kʼuiripu no uáti úni eska Tata Diosï enga iámindu ambe újka úni nóteru kʼéri ambe arhinhakia. Uánikuechaksï jánguarhintasti ísï úni ka nóksï ústi. Ju je exeni ambe enga úkuarhipka Segunda Guerra Mundial jimbo. Uánikua paisiri anapu juramutichaksï kánikua no sési kámaspti Tata Diosïri iretani. No solu Alemania anapu nasichaksï no sési kaaspti, sino ístu Australia ka Canadá anapu juramuticha ka máteru paisicha. Nájkirukaksï no sési kaani japka, úkuarhispti ambe ma Jeobaeri jarhuajperata jingoni. Uéxurhini 1939 enga uénakuarhipka guerra, 72,475 aianhpirichaksï jarhaspti interu parhakpinirhu. Peru enga guerra kʼamakurhipkia 1945, informichaksï xarhatasïndi eskaksï aianhpiricha jukari tsimani xanhari sánderu uánispkia: 156,299. w19.07 9 párr. 4, 5

Nájkirukachi iáiasï no nemani jorhendani jaka Bibliaeri ambe, uákachi máteru ambe úni para jarhuatani kʼuiripuni Kristueri chúxapatiini. Por ejemplu, enga kʼuiripu ma apenasi uénajka nirani Kʼumanchikua Reinuerirhu, uákachi sési uandajpani ka úni eska agustu pʼikuarheraaka. Engachi xarhatakuska uékperakua, jarhuataakachi seguru jarhani eskachi ambakiti kristianueska. Ka ístu, ambe engachi tánguarhikuecharhu mókuntajka nájkirukachi no uánikua ambe uandajka, jarhuataati eska mintsita ka janhanharhikua jingoni uandaaka ambe enga jakajkujka. Ístuchi uáka jimbanhi aianhpiri ma jingoni uérani aianhpini ka jarhuatani néna uá Biblia jingoni jorhentpini. Engachi ísï újka, jarhuatasïngachi úni ambe enga Kristu úpka (Luk. 10:25-28). Uánikua erachichaksï kʼéri ánchikuarhita ambe úsïndi, jimboksïsï xáni okupadu jarhajti. Peru ístuksï jánguarhintasïndi arhutani tiempu para Bibliaeri ambe jorhentpini, ambe ma enga kánikua sési pʼikuastaajka. w19.07 17 párr. 11, 13

Apostuli Pablu no jurajkuspti eska ójkutapiringa ambakiti ambe ni no sési ambe enga antesi úpka. Sánderu sési, uandaspti eska mirikurhini imani “ambe enga nitamakia” kánikua jukaparhakuespka para andani imani ambe enga orhepani japka, kʼamarhukuni kristianueri karrerani. ¿Ambe úpirini ójkutani? Orheta, enga niárapka ambakiti ambe úni komu judiu ma. Peru iámindu imani ambe ísï exesïrendi “eska basura” (Filip. 3:3-8). Tsimani úni jámani, enga no sési pʼikuarherenga jimboka no sési kaaspka kristianuechani. Peru no jurajkuspti eska i ambe ójkutapiringa. Ka tanimu úni jámani, ambakiti ambe enga úpka para Jeobani marhuakuni. Pabluni kánikua sési nikuspti aianhpikuarhu nájkiruka ónhanhapka, atanhapka ka asta tsakapkueranhani, someni no sési nikuspti marirhu ka no ma ambe jatsispti para arhani ni para jukani. Peru no méni eratsespti nóteru xáni jánguarhintania marhuakuni Jeobani (2 Kor. 11:23-27). Nájkiruka ambakiti ambe úpka ka ístu no sési nitamakuarhini, mítespti eska jatsispka para seguirini jánguarhintani. Ka juchajtuchi jatsiska para májkueni úni. w19.08 3 párr. 5

Uánikua erachichaksï imani paisicha jimbo irekasti engaksï no újka predikarini kʼumanchikuecha jimbo ni xanharu jimbo, ísï jimbo, jirinhakuntasïndiksï paraksï úni aianhpini (Mat. 10:17-20). Paisi ma jimbo, sirkuitueri orhejtsïkuti ma arhiaspti aianhpirichani eskaksï aianhpepiringa nani engaksï úpiringa, komu eskuela, ánchikuarhitarhu, aianguani parienti jémbechani, besinuechani o máteruechani engaksï míteapka. Tsimani uéxurhini jimbo, sánderuksï uáni kúnguarhikuecha jarhasptia imani sirkuitu jimbo. Nájkirukachi jucha újka agustu aianhpini, ambakiti ambechi jorhenguarhisïnga i erachicheri, eskachi jatsiska para méntkisï jánguarhintani aianhpini na engachi xáni uáka mintsikaparini eskajtsïni Jeoba íntskuaka uinhapikua parachi úni orhepani uérakuni náki uéjki ójkutakuani (Filip. 2:13). Iásï sánderu eska no méni, ju je úni ambe enga sánderu jukaparhakueka, jánguarhintani pímbinhasï jarhani, no úni eskaksï máteruecha no sési ambe uáka ka ambakiti ambechi úni. Engachi ísï úska, sánderuchi uékpiaka, ka kʼéri ambechi arhiaka Jeobani, juchari Táti uékpitini. w19.08 13 párr. 17, 18

¿No ísïski eskachi no sési pʼikuarherasïnga imecha jingoni jarhani engaksï uéjka eska méntkisï ima ambe úkuarhiaka ambe engaksï imecha uandajka ka nóksï jiókuarhini ambe engaksï máteruecha uandaaka? Peru, sésichi pʼikuarherasïnga imecha jingoni jarhani engaksï kurhangutspijka, xénchpijka, pʼamojpijka ka kaxumbitinksï (1 Ped. 3:8). Engachi jucha ísï pʼikuarherajka, máteruechajtuksï májkueni sési pʼikuarheraati juchantsïni jingoni jarhani engachi kaxumbitiska. Ístu kaxumbitiini, jarhuataatijtsïni orhepani uérakuani uandanhiatechani. Ménisïchi nitamakuarhiaka o exeni máru ambe enga no jurhimbikua jingoni úkuarhiaka. Nóksï méntkisï kʼéri ambe exenhasïndi imecha engaksï jorhenaka úni ambe ma ka ménisïksï sánderu kʼéri ambe exenhasïndi imecha engaksï no káni jorhenaka úni ambe. Peru Salomoni kurhanguspti eska sánderu sésiska jiókuarhini ambe engachi nitamakuarhini jarhajka ka no méntku imani ambe miáni jarhani engajtsïni no sési pʼikuastajka (Ecl. 6:9). Engachi kaxumbitiska, sánderuchi no úkua jukanchaaka jiókuarhini ambe engachi nitamakuarhini jauaka nájkirukachi no imani ambe uékapiringa. w19.09 4 párr. 9, 10

Imecha engaksï jatsika sáni juramukua, komueska táticha, úsïndiksï jarhuataani máteruechani. Jeoba tátichani jurhajkukuasti paraksï orhejtsïkuni familiani ka uékasïndi eskaksï jorhendauaka ka jurhimberantaani uájpechani (1 Kor. 11:3). Peruksï táticha no iámindu juramukua jatsisti. Jatsistiksï para kuenta íntskuntani Jeobani, imani enga kueraaka familiani (Efes. 3:14, 15). Engaksï táticha kʼumanchikuarhu ísï juramujka eska Jeoba na jaiapanhintajka, xarhatasïndiksï eskaksï kurhajchasïnga. Ísï juramukua je chári kʼumanchikuarhu anapuechani eska Jeobani na jaiapanhintajka. Jiókuarhi je ambe engajtsï no sési úka ka ísï ú je eskaksï Bibliaeri karakatecha na uandajka. Engajtsï ísï úska, chári uarhiiti ka sapiichaksïni janhanharhiati jimbokajtsï kaxumbitiska. Ístu, engajtsï imecha jingoni uáka kómarhikua, mintsita jingoni kómarhi je Jeobani. Ini ambe úparini, chári familia exeati na enga xáni uétarhijka Jeobaeri jarhuajperata. Ka antede máteru ambe, sánderu jukaparhara je Jeobani marhuakuni (Deut. 6:6-9). Chári ejemplu jindesti sánderu ambakiti ambe engajtsï uáka íntskuni chári familiani. w19.09 15 párr. 8; 17 párr. 14; 18 párr. 16

Markusï kánikua sési pʼikuarherasïrendi máteruechani marhuakuani. Uánikua xanhari niraspti Pabluni ka Pedruni jingoni engaksï jamberi imecha úpiringa imecheri ánchikuarhitani. Enga nirenga pámbitaani, Markusï piásïrendi tʼirekua ambe, exeni nani engaksï pakarapiringa mintsikuarhini o máteru ambe jingoni jarhuataani (Uku. 13:2-5; 1 Ped. 5:13). Pablu uandaspti eska Markusï jindespka ma enga “jarhuatani japka para aianhpini Diosïri Juramukueri ambe” ka enga kánikua uinhaperantapka (Kol. 4: 11). Markusï ka Pablu, niárasptiksï kánikua sési pájperani. ¿Andichisï ísï uandajki? Jimboka enga apostuli últimu xanhari ónhakata japka jini Roma, uéxurhini 65 jimbo, karaspti segundu Karakata para Timoteo. Indeni karakata jimbo, arhispti Timoteuni eska nipiringa Roma ka eska Markusïni pájtapiringa (2 Tim. 4:11). Pablu kánikua jukaparharasïrendi ambe enga xáni úpka Markusï, ka jimbosï uandapti eska imani jingoni pakarapiringa imani tiempu jimbo enga kánikua úkua jukapka para Pablu. Markusï mámaru ambe ústi para Pabluni jarhuatani, jamberi ima pákuendi tʼirekua o imani ambe enga Pablu úrapiringa para kartechani uáni. Na engaksï jarhuatapka ka uinhaperantani Pabluni, kánikua jarhuatapti para úni tekaantani imani jurhiatikuecha jimbo antedeksï uándikuni. w20.01 11 párr. 12, 13

Erakuskachi jurajkuni máru ambe ka kʼéri ánchikuarhita ma úni. Ka Jesusijtsïni aianguspti eskachi no sési kánhapiringa. Peru uákachi mintsikani eskajtsïni Jeoba íntskuaka uinhapikua parachi úni orhepani uérakuni náki uéjki uandanhiatani. Engachi sánderu tekaantaska, sánderuchi uinhapiti jauaka (Sant. 1:2-4). Ístuchi uáka erokuarhini eskajtsïni Jeoba íntskuaka ambe engachi uétarhinchajka, eskajtsïni Jesusi kuidariuaka ka eskajtsïni juchari erachicha uinhaperantaaka (Mat. 6:31-33; Juanu 10:14; 1 Tes. 5:11). Ima uarhiiti enga emorrajia pʼamenchani japka ka enga Jesusi tsinapka, imani mismu jurhiatikua jimbo sési pʼikuarherantaspti (Luk. 8:43-48). Peru solu enga no jurajkupiringa Jesusini ka seguirini chúxapani, úpirindi sési pʼikuarherantani para méntkisï. ¿Ambe úpi ima uarhiiti? Enga erakupka úrani Jesusiri uananchatarakuani, ambakiti kóntperata ma intsïnhati: Jesusi jingoni marhuani auandarhu. Kóntperata enga intsïnhaka, sánderu kʼéri ambesti eska ambe uéjki enga ima úka. Jiájkani, no arhiparini ambe engachi erokuarhini jaka —ia sea auandarhu irekani para méntkisï o Echerirhu—, úsïngachi sési pʼikuarherani jimbokachi jiókuarhiska arini Jesusiri pʼímarperakuani: “Ju jejtsïni andarhierani”. w19.09 25 párr. 21, 22

Enga Dabidi uétarhinchani japka jarhuajperata, acheeticha engaksï Dabidiri jántspiripka kurhakusptiksï sáni t’irekua israelitani ma enga Nabali arhinhenga. Exesptiksï eskaksï úpiringa ísï úni jimbokaksï kuájchakuaspka imeri karichichani desierturhu. Peru Nabali no sáni intsïmpitispti ka no ma ambe uékaspti íntsaani. Inde ambe kánikua ikiataspti Dabidini, enga uandapka eska uándikupiringa Nabalini ka iámindu imeri kʼumanchikuarhu anapu acheetichani (1 Sam. 25:3-13, 22). Jimajkani, Nabaliri témba, Abigaili enga sési jáxepka, úspti ambe ma. I uarhiiti enga sési eratsintenga ambe ma, balori xarhataspti jimboka niraspka Dabidini kúmuni, tinguikuatsespti ka kurhakuspti eska no jámapiringa no sési úkuntani Nabalini ka uándikuani. Iatsitakuarhu arhispti eska Jeobani jurajkukupiringa iámindu ambe. Na enga kaxumbikua jingoni uandapka ka sési eratsintaparini úni ambe, mintsitarhu niárakuspti Dabidini ka exespti eska Jeoba axaspka Abigailini (1 Sam. 25:23-28, 32-34). Abigaili ambakiti kʼuiripu máespti jimbosï Jeoba úrapti. Májkueni, Jeoba uáti úraani pirenchichani paraksï uinhaperantaani imecheri familiechani ka kúnguarhikuarhu anapuechani jimbokaksï kurhangutspisïnga ka sésiksï eratsentaparini uandani ambe ma (Titu 2:3-5). w19.10 23 párr. 10

Íksï karakatecha sánderu ambe uandasïndi enga Jeoba uéjka eskachi uáka. Iámindu ambakiti kristianuechachi jatsiska para meru uéakuntani Kʼéri Babilonia. Jamberi máru engaksï Bibliaeri ambe jorhenguarhini jaka, relijioni no jurhimbiti ma jimbo japti antedeksï jorhenguarhini jurhimbikuani. Jamberiksï tánguarhiendi imecha jingoni, úni ambe engaksï imecha uénga, oksï tumina íntspini. Antedeksï intsïnhani sésikua paraksï úni aianhpini kúnguarhikua jingoni nájkirukaksï nótki itsï atakuarhini jauaka, jatsistiksï para méntku jurajkuni imani ambe enga relijioni no jurhimbiti újka. Jatsistiksï para sïranda ma úni engaksï xarhataaka eskaksï nóteru kuenta úkuarhiakia relijioni ma jingoni enga no jurhimbitiika o enga Kʼéri Babilonia jingoni kuenta úkuarhijka. Ambakiti kristianuechachi jatsiska para sési exeni eska juchari ánchikuarhita no ma ambe jimbo jarhuatani jauaka Kʼéri Babiloniani (2 Kor. 6:14-17). ¿Andichisï méntku no uéjki indeni ambe úni? Jimbokachi no uékasïnga imani ambe úni enga relijioni no jurhimbiti újka, enga ikichakueni jásï ambeka para Tata Diosï (Is. 52:11). w19.10 12 párr. 16, 17

Jamberi Jeremiasi karaapti libruechani 1 ka 2 de Reyes ka ístu ima karaspti libruni enga Jeremías arhinhajka. I ánchikuarhita úspti eska Jeramiasi exepiringa na enga Jeoba xáni pʼamojkuajka kʼuiripuechani. Por ejemplu, niáraspti míteni eska enga rei Akabi móantapka imani no sési amberi enga úpka, Jeoba aiakuspti eska no exepiringa na enga kʼamajkuapiringa imeri kʼumanchikuarhu anapuechani (1 Rey. 21:27-29). Ístu mítespti eska, jiáni enga Manasesi arrepentirikuarhipka, Jeoba puákuntaspka nájkiruka sánderu no sési jásï ambe úpka eska Akabi (2 Rey. 21:16, 17; 2 Crón. 33:10-13). Íksï relatuecha kánikua jarhuatapti Jeremiasini para tekantskua ka pʼamojperakua xarhatakuani imeri amiguechani. Ju je eratseni ambe enga úpka Jeremiasi jiáni enga ma tiempu imeri amigu Baruki nóteru xáni sési marhuakuni japkia Jeobani. Jeremiasi no eratsespti eska nóteru úpiringuia mójtakurhini, sánderu sési jarhuataspti enga aiangupka ambe enga Jeoba uandapka para Baruki (Jer. 45:1-5). w19.11 6 párr. 14, 15

Libru de Levítico jimbo, jorhenguarhisïngachi eskaksï israelitecha úsïrenga uáni pínandikueri kéjtsïtakuechani paraksï xarhatani eskaksï agradesidu jarhasïrenga Jeobani jingoni (Lev. 7:11-13, 16-18). Nóksï úsïrendi ini kéjtsïtakuani jimboka juramukua máespka, sino jimbokaksï uékasïrenga ísï úni. Májkueni eska israelita ma enga tsípikua jingoni kéjtsïtakuenga Tata Diosïni para xarhatani eska ambakiti pájperakua ma jatsisïrenga Jeobani jingoni ka ístu para uékperakua xarhatakuni. Marhuakuni Jeobani, ísïsti komueskaksï ima kéjtsïtakuecha jimbokajtsïni no nema afuersa arhisïnga parachi xarhatani ambe engachi pʼikuarhinhijka Jeobani jimbo. Jimbokachi mintsita jingoni xénchasïnga, ambakiti ambechi úsïnga imani jimbo. Jeoba kánikua sési pʼikuarherajti exeani xáni uáni kʼuiripuechani engaksï marhuakuni jaka jimbokaksï kánikua xénchasïnga ka jukaparharaanksï imeri juramukuechani. Jeoba no solu exesïndi ambe engachi újka para marhuakuni sino andichisï marhuakujki. Por ejemplu, engachi jatirikia ka nóteruchi únia xáni marhuakuni eskachi na uékapiringa, uákachi seguru jarhani eska Jeoba no exeni jarhasïnga ambe engachi nóteru újkia úni. Jamberichi ísï pʼikuarherajka enajkichi nóteru káni marhuakujkia, peru ima exesïndi na engachi xáni jánguarhintajka jimbokachi kánikua xénchasïnga. Kánikua tsípikua jingoni jiókuarhisïndi sánderu ambakiti ambe engachi újka para marhuakuni. w19.11 22 párr. 9; 23 párr. 11, 12

Uétarhisïndi sésku ísï jukaparharani ánchikuarhitani. Rei Salomoni, espiritu santu jimbo karaspti: “Jarhasti tiempu ma [...] para mándani ánchikuarhita”, ka máru ambe enga uandapka jindesti júskani, kʼumanchikua úni, uerani, tsípini ka uarhani (Ecl. 3:1-8). Sési xarharasïndi eska ánchikuarhini ka mintsikuarhini tsimani ambeeska enga kánikua jukaparhakueka juchari irekuarhu. Jesusi sési mítespti néna úni ini tsimani ambe. Ma xanhari, imeri apostulichaksï aianhpikuarhu uératini kʼuanhatsentaspti. Xáni sési nikuaspti engaksï no jatsipka tiempu “ni sikiera para tʼireni”. Jimbosï Jesusi arhiapti iásï anapu tekstuni (Mark. 6:30-34). Ni Jesusi ni imeri chúxapatichaksï uéni méntkisï sési mintsikuarhini eskaksï na uékapiringa. Peru Jesusi mítespti eskaksï imecha uétarhinchasïrenga mintsikuarhini. Ménisï uétarhisïndi mintsikuarhini sáni o máteru ambe úni. I ambe xarharasïndi juramukua ma jimbo enga Jeoba israelitechani íntsaapka Moisesiri Lei jimbo: jatsisptiksï para mintsikuarhini mándani semana sábadu jurhiatikua. Ísïsti eskachi jucha nóteru Moisesiri Lei jimbo jarhaskia, peruchi uáka ambakiti ambe jorhenguarhini ambe enga uandajka sábadueri ambe. w19.12 3 párr. 6, 7

Jeobajtsïni aiachistia eska kuájchakuauaka imeri ambakiti marhuarichani, jimbosï uéjti kumplirini imeri aiatsperakuani (Sal. 31:1-3). Ístu, mítesti eskachi kánikua no sési pʼikuarherapiringa enga ima no uandanhiapiringa imechani jimbo engaksï imeri familia jingoni kuenta úkuarhijka. Aiachesïndijtsïni eskajtsïni íntskuaka ambe engachi xáni uétarhinchajka parachi irekani jarhani ka ístu parachi sési marhuakuni jarhani, ka no ma ambe uáti ójkutani para ísï úni (Mat. 6:30-33; 24:45). Engachi miájka andisï Jeoba kumplirijki ambe enga aiatspijka, uákachi seguru jarhani eskajtsïni jarhuataaka jiáni engachi uandanhiata ambe jatsiaka tumina jimbo. Ju je miáuani primeru siglurhu anapu kristianuechani. Engaksï Jerusaleni anapu kúnguarhikuarhu anapuecha uénapka no sési kánhani, iáminduechaksï etsandurhikuarhispti peruksï apostulicha jima pakaraspti (Uku. 8:1). Indeni ambe jimbo, jamberiksï úkua jukanchapti tumina jimbo. Jamberiksï nóteru jatsiptia kʼumanchikua ma, ánchikuarhita ka negosiuechani. Peru Jeoba no jurajkuaspti ka imechaksï méntkisï tsípikua jingoni irekaspti (Uku. 8:4; Ebr. 13:5, 6; Sant. 1:2, 3). Tata Diosï jarhuataaspti imani ambakiti kristianuechani ka májkueni uáti juchantsïni jingoni (Sal. 37:18, 19). w20.01 17, 18 párr. 14, 15

Enga Dabidi kuájpiantapka táti jémberi karichichani enga leoni ka osu ma uékenga auantani, exespti eska Jeobaeri jarhuajperata jimbo úspka uándikuani imani animali ikiminharhichani. Enga uándikupka Goliatini, exespti eska Jeoba jarhuataxapka (1 Sam. 17:37). Ka ístu exespti eska Jeoba jarhuataspka jimboka úspka sïpakuarhikuni rei Saulini (ambe enga arhijka antesde Salmo 18 uénakuarhini). Kʼuiripu ma enga kʼéramakuarhijka úpirindi eratseni eska imeri uinhapikua jimbosï úpka úni iámindu ambe. Peru Dabidi kaxumbitispti ka jimbosï úpti exeni na enga Jeoba jarhuatapka imeri irekuarhu. ¿Ambechi jorhenguarhisïni íri ambe? Eskachi no solu jatsiska para kurhakuni Jeobani eskajtsïni jarhuataaka, sino ístuchi jatsiska para jánguarhintani exeni káni ka nénajtsïni jarhuatasïni. Engachi káxumbitiika ka jiókuarhinchi eskachi no úsïnga iámindu ambe úni, sóntkuchi exeaka eskajtsïni Jeoba jarhuatasïnga úni ambe engachi no úni jauaka úni. Ka méni engachi exeaka na engajtsï jarhuatajka, niáraakachi sánderu sési pájperani Jeoba jingoni. w19.12 20 párr. 18, 19

Tata Diosïri marhuarichachi jatsiaska uánikua rasonichani para jakajkuni eskajtsïni ima jukaparharasïnga. Pʼímarhistijtsïni parachi imani andarherani ka exesti na engachi jiókuarhijka ambakiti aianhperakuani (Juanu 6:44). Engachi uénapka Jeobani andarherani, imajtujtsïni andarheraspti juchantsïni (Sant. 4:8). Ístu, ima xarhatasïndi eskajtsïni jukaparharasïnga jimboka úrasïnga tiempu ka jánguarhintasïndi parajtsïni jorhendani. Ima sési mítesti na engachi jásï kʼuiripu máeka ka ístu mítesti nénachi uá niárani sánderu ambakiti kʼuiripu máeni. Ka jurhimberantasïndijtsïni jimbokajtsïni uékasïnga. Iámindu i ambe xarhatasïndi eskajtsïni Jeoba jukaparharasïnga. Rei Dabidi mítespti eska Jeoba xénchasïrenga ka eska jarhuatasïrenga. Indeni ambe míteni, jarhuataspti para úni tekaantani jiáni engaksï máru ísï exenga enajki no ma ambe marhuaueni (2 Sam. 16:5-7). Engachi kánikua kómu pʼikuarherani jarhajka ka uandanhiata ambechi nitamakuarhini jarhani, Jeobajtsïni jarhuatasïndi ménderueni exeni ambe ma ka ístu parachi úni orhepani uérakuni náki uéjki uandanhiatani (Sal. 18:27-29). Engachi jatsika Jeobaeri jarhuajperata, no ma ambejtsïni ójkutaati parachi tsípikua jingoni marhuakuni (Rom. 8:31). w20.01 15 párr. 7, 8

Méni engachi nemani Bibliaeri ambe jorhendaaka, ju je kómarhikua jingoni uénani . Sáno méntkisï, ¿káni sánderu sési jarhaski para kómarhikua jingoni uénani ka kʼamarani jorhentperakua ma? Ísï no ióni jimbo engachi na uénaakia jorhendani kʼuiripuni ma Bibliaeri ambe. Jatsiskachi para jarhuatani jorhenguarhirini kuenta íntskukuarhini eskachi solu espiritu santu jimbo uáka kurhanguni Tata Diosïri Karakatani. Máru erachicha o pirenchichaksï úrasïndi Santiagu 1:5 para jorhenguarhiri míteni andichisï jatsi para kómarhikua úni engachi imani jingoni jorhenguarhijka, i tekstu arhisïndi: “Ka enga nema kueratajka jánhaskani ambe, kómarhie Diosïni”. Tátsekuaksï kurhamarhisïndi jorhenguarhirini: “¿Ambechi jatsiski para úni engachi uéjka jánhaskakua jatsini?”. Jamberi ima mismu exeati eskachi jatsiska para kómarhini Tata Diosïni. Ju je jorhendani jorhenguarhirini kómarhini Tata Diosïni. Jarhuata je jorhenguarhirini paraka seguru jauaka eska Jeoba uékasïnga imeri kómarhikuechani kurhauani. Nájkiruka Jeoba tʼuini mítejkia iámindu ambe engachi eratsejka o pʼikuarhinhini, ju je arhini jorhenguarhirini eskachi uáka iámu mintsita jingoni aianguni Jeobani na engachi pʼikuarherajka ka uandontskuarhekuni ima amberi engachi no nemani aiangupiringa (Sal. 139:2-4). w20.01 2 párr. 3; 5 párr. 11, 12

Jeobaesti enga uandajka káni pʼímarhini kristianuni ma para auandarhu nirani (Rom. 8:28-30). Ísï tátsekua enga Jesusi na tsíntapkia, Jeoba uénaspti pʼímarhiani kristianuechani paraksï jatsini erokuarhikua para auandarhu nirani. Primeru siglurhu, iámindu ambakiti kristianuechaksï erakukatespti. Peru uánikua uéxurhini tátsekua, uánikua kʼuiripuecha engaksï uandenga eskaksï kristianuespka, sési jimboksï no jindespti. Nájkiruka inde ambe úkuarhini japka imani jurhiatikuecha jimbo, Jeoba erakuaspti máteru namunitu ambakiti kristianuechani engaksï japka. Íchaksï ísïspti komueska ima trigu enga Jesusi uandapka eska uitsakua jingoni andarapiringa (Mat. 13:24-30). Últimu jurhiatikuecha jimbo, Jeoba seguirixati erakuani imechani engaksï kuenta úkuarhiaka 144,000 erakukatecha jingoni. Ísï jimbo, enga Tata Diosï pʼímarhiaska máru paraksï auandarhu nirani sánititu antede kʼamajkuni Noambakitiri parhakpinini, ¿néskichi jucha para kurhamarhini andisï ísï újki ambe ma? (Rom. 9:11). Nóchi uékasïnga májkueni jámani eska ima kʼuiripuecha enga Jesusi uandantskuarhu ma jimbo uandaapka, engaksï ikiapka patroni jingoni imani ambe jimbo enga ima úpka imecha jingoni engaksï últimu ora uénapka ánchikuarhini (Mat. 20:8-15). w20.01 30 párr. 14

Jeoba uékasïndi eska imeri familia tsípikua jingoni irekaaka. Nájkirukachi ménisï úkua jukanchajka, uánikua ambechi jatsiska engachi jimbo uáka tsípikua jingoni irekani iásï. Por ejemplu, sésichi mítetixaka eskajtsïni juchari Táti auandarhu anapu kánikua xénchasïnga. Sésichi míteska ambe enga Biblia jorhentpijka (Jer. 15:16). Ka kuenta úkuarhisïngachi imani familia jingoni engaksï kánikua xénchajka Jeobani, engaksï janhanharhiajka imeri juramukuechani ka nani engaksï iáminduecha xénchperajka (Sal. 106:4, 5). Ístuchi úsïnga tsípikua jingoni irekani jimbokachi seguru jarhaska eskachi sánderu orhepani uáka sánderu sési irekani. Míteskachi eska no ióni jimbo, Jeoba kʼamajkuauaka no sési úrichani ka eska imeri Reinu jimbo uáka eska Echerirhu kánikua sési jándeaka. Ístuchi erokuarhixaka eskaksï uarhiricha tsíntaaka ka eskaksï ménderu uáka imecheri familiecha jingoni jarhani (Juanu 5:28, 29). Kánikua sési jásï ambeuati, ¿a no? Ka ambe enga sánderu jukaparhakueka, jindesti eskachi seguru jarhaska eska no ióni jimbo iáminduecha, jini auandarhu ka ixú Echerirhu, uáka janhanharhini, kʼéri ambe arhini ka kómarhini juchari Táti uékpitini ísï eska ima na jukanchaka. w20.02 13 párr. 15, 16

Engachi niáraska kʼéri pekadu ma úni, ju je no jískani. Sánderu sési, ju je kómarhini Jeobani ka aiangukuarhini ambe engachi no sési úka. Engachi ísï úska, nóteruchi xáni no sési pʼikuarheraakia imani ambe jimbo engachi no sési úka. Peru engachi uéjka ménderu ambakiti pájperakua ma jatsini Jeoba jingoni, jatsiskachi para ístu máteru ambe úni. Uétarhisïndi eskachi jiókuarhiaka eskajtsïni Jeoba jurhimberantaaka. Enga Jeoba profeta Natanini axapka para uandontskuarheni rei Dabidi jingoni ima amberi enga no sési úpka Bat-Seba jingoni, Dabidi jiókuarhispti ambe enga niátapka ka no uandaspti eska no xáni no sési jarhaspka. Jirejiresï uandaspti eska ísïspka, eska no solu no sési úkuspka Bat-Sebaeri uámbani sino eska kʼéri pekadu ma úspka Jeobani japarini. Dabidi jiókuarhispti eska Jeoba jurhimberantapiringa ka Jeoba puákuntaspti (2 Sam. 12:10-14). Engachi kʼéri pekadu ma úka, jatsiskachi para uandontskuarheni orhejtsïkuticha jingoni enga Jeoba péraaka parajtsïni jarhuatani (Sant. 5:14, 15). Jatsiskachi para jiókuarhini ambe engachi úka. Engachi sóntku jiókuarhiska eskajtsïni jurhimberantaaka ka mójtakuni ambe enga uétarhiaka, sánderu kókuanchi uáka ménderu sési pʼikuarherantani ka tsípikua jingoni irekani. w20.02 24 párr. 17, 18

I “diesi acheetichaksï” imechani arhikuekaasïndi engaksï jatsika erokuarhikua para irekani méntkisï ixú Echerirhu. Íchaksï mítesti eska Jeobasï erakuajka imechani engaksï auandarhu niuaka ka kʼéri kóntperata máesti para imecha, marhuakuni Tata Diosïni erakukatecha jingoni engaksï “judiuni” arhikuekajka. Nájkiruka iásï no mítikuarhika na engaksï arhinhajka iámindu erakukatecha engaksï útasï Echerirhu irekani jaka, imecha engaksï jatsika erokuarhikua para Echerirhu irekani, úsïndiksï erakukatecha jingoni “nirani”. ¿Ambe arhikuekasïni i ambe? Iásï anapu tekstu mókuntasïndi i ambe. Exe je eska i bersikulu, máechakua judiueri uandasïnga. Peru diesi acheetichaksï ísï uandajpasïndi enajkiksï uánikue, jimbokaksï arhisïnga “chánksïni”. I ambe arhikuekasïndi eska ima “judiu” no máechakua kʼuiripueska, sánderu sési, arhikuekasïndi iámu grupuni erakukatecheri. Imecha engaksï no erakukateka, májku kʼériksï marhuakusïndi Jeobani erakukatecha jingoni. Peruksï no ísï exeasïndi komueska imecheri orhejtsïkuticha iámindu ambe jimbo, jimboka máechakuajkusï Orhejtsïkuti jaka enga jindeeka Jesusi (Mat. 23:10, TDU). w20.01 26 párr. 1, 2

Jesusi uandaspti eska kʼuiripu mítepiringa néskiksï imeri chúxapaticha, engaksï uékperakua xarhatapiringa ísï eska Jesusi na úpka. I ambe niáraspti ísï úkuarhini primeru siglurhu ka ístu ísï úkuarhixati iásï. Jimbosï xáni jukaparhakueti eskachi uékperaaka máteru ka máteruni jingoni, nájkiruka ménisï úkua jukaaka ísï úni. Ju je kurhamarhikuarhini: “¿Ambe uá jorhenguarhini ima erachicheri engaksï seguirini jaka uékperakua xarhatani nájkiruka ménisï úkua jukajka?”. Jimbokachi no perfektueska, ménisïchi úkua jukanchasïnga mintsita jingoni uékperani. Peru nájkiruka ísïka, jatsiskachi para jánguarhintani májkueni úni eska Kristu. Jesusijtsïni jorhendasti eska kánikua jukaparhakueska puátsperantani erachi ma jingoni enga jatsika ambe ma juchantsïni jingoni (Mat. 5:23, 24). Uandaspti eska, parachi úni Tata Diosïni jaiapanherantani, jatsiskachi para sési pájperani máteruecha jingoni. Jeoba sési pʼikuarherasïndi exeni eskachi kánikua jánguarhintasïnga parachi sési pájperani erachicha jingoni. No jiókuarhiati ambe engachi újka para imani marhuakuni engachi jatanhetspijka o jamberichi no uékani sési péntani ambe ma erachi o pirenchi ma jingoni (1 Juanu 4:20). w20.03 24 párr. 1-4

Noambakiti, “táti jémba chkuanderaricheri”, méntkisï támisï jánhastaasti kʼuiripuechani desdeka uénaka irenhani (Juanu 8:44). Máru imeri chkuanderakuechaksï jindesti ima jorhentperakuecha engaksï no jurhimbitika uarhiricheri ambe ka eskaksï uarhiricha tsípiti pákarasïnga máteru nani. I jorhentperakuechaksï úsïndi eskaksï uánikua pʼindekuecha jauaka ka i pʼindekuechaksï jupindaskata jarhasïndi jimbokaksï chérhiasïnga uarhiricheri espirituechani. ¿Andisï Noambakiti újki eska xáni uánikua kʼuiripu jakajkuauaka chkuanderakuechani? Jimboka míteska na enga pʼikuarherajka kʼuiripu uarhikua jimbo ka úrasïndi indeni ambe parajtsïni támisï jánhastani. Nóchi uékasïnga uarhini, jimbokachi kueraanhaska parachi méntkisï irekani (Ecl. 3:11). Para jucha, uarhikua enemigu máesti (1 Kor. 15:26). Na uéjki enga xáni jánguarhintakia, Noambakiti no úsïndi ójchakurani jurhimbikuani uarhikueri ambe. Esmasi no méni jarhaxapti xáni uáni kʼuiripu enga míteka ka aianhpini ambe enga Biblia jorhentpijka uarhikueri ambe ka erokuarhikua enga jaka para uarhiricha (Ecl. 9:5, 10; Uku. 24:15). Ambe enga Biblia jorhentpijka, sésijtsïni pʼikuastantasïndi ka jarhuatasïndijtsïni parachi no chéni ka únchi míteni ambe enga úkuarhijka enga nema uarhijka. w19.04 14 párr. 1; 15 párr. 5, 6

Jeoba xénchaasïndi imechani engaksï marhuakujka. Méntkisï ísï ústia ka méntkisï ísï uáti. Ístu, uékasïndi eska jurhimbitku úkuarhiaka ambe ma (Sal. 33:5). Jimajkani, seguruchi jarhaska tsimani ambe jimbo. Orheta, eska ima no sési pʼikuarherasïnga engaksï imeri marhuaricha kómu nitamakuarhijka jimbokaksï no jurhimbitku kánhasïnga. Ka tsimani úni jámani, eska ima uáka para jurhimbitku úkuarhini ambe ma. Ima Lei enga Jeoba Israelini íntskupka, jindeespka paraka iámindu ambe uékperakua jingoni úkuarhipiringa ka eskaksï iáminduecha jurhimbitku kánhapiringa, asta imechani engaksï no jatsipka ne enga kuájpiapiringa (Deut. 10:18). I Lei xarhatasïndi na enga xáni pendienti pájka Jeoba imechani jimbo engaksï kómarhijka. Moisesiri Lei uéxurhini 33 jimbo kʼamakurhisti, jiáni enga kúnguarhikua uénaka jarhani. ¿Inde ambe arhikuekasïni eskaksï kristianuecha no jatsipiringa lei ma enga xarhatapiringa Jeobaeri uékperakua ka úni eska jurhimbitku úkuarhipiringa ambe ma? Nómbe. Kristianuechaksï jimbanhi lei ma jatsispti enga jindeeka “Kristueri mandamientu”. Jesusi no karaaspti leichani para imeri chúxapaticha, peru kʼóru arhiaspti ambe engaksï úpiringa, íntsaaspti juramukuechani ka prinsipiuechani engaksï jatsipka para úni. “Kristueri mandamientu” iámindu ima ambesti enga Jesusi jorhentpika. w19.05 2, 3 párr. 1-3

Iámindu kʼuiripuechachi uétarhinchasïnga eskachi sési pʼikuastanhantaaka desdekachi andajpenujka ka ístuchi úni sési pʼikuastantaani máteruechani. Por ejemplu, enga sapi ma chʼanani jámani kuarhatsejka ka jurhintskuarhu atakuarhini, uiriapasïndi ueparini táti jémba o amambani jingoni. Táti jémbechaksï no úsïndi ambakerantani jima enga atakuarhika, peruksï úsïndi sési pʼikuastantani. Kurhamarhisïndiksï ambe úski, kutsunharhikusïndiksï uekua, kamanharhisïndiksï ka sési arhini, ka jamberiksï kutsumakuni ka irhimakuni. Sapi nóteru uerasïndia ka asta ménderu nirasïndi chʼanani. Tiempu jingoni, nimasïndi jima enga atakuarhipka. Peru jarhastiksï sapiicha engaksï sánderu no sési ambe nitamakuarhijka. Máru sapiichanksï niárasïndi biolariuani, ia sea ma xanharijku o ióni jamberi. Néna uéjkini, í ambe méntku no sési pʼikuastaani jarhasïndi. Máru engaksï ini xáni no sési jásï ambe újka, jupinhasïndiksï ka kastigarinhani, ka ménisï úpirindi ísï xarharani enajkiksï no méni kastigarinhaa. Peru nájkiruka no sési úri jirejiresï kastigarinhaaka, ima enga no sési ambe úminhaka seguirini jarhasïndi no sési nitamakuarhini nájkiruka kʼériuakia. w19.05 14 párr. 1, 2