Nobiembri

Uánikua kʼuiripu engaksï arhinhajka eskaksï kʼéri ambeeska, nóksï sési exesïndi ambe enga Biblia arhijka enga nema kʼéramakuarhijka. Uandasïndiksï eska sánderu kʼéri ambe exeani máteruechani, uáka eskachi no balori jukaaka ka eskajtsïni kʼuiripu no sési kámaaka. Peru ¿ambe úkuarhiski enga Noambakitiri parhakpini újka eskaksï kʼuiripuecha no uandanhiauaka máteruecha jimbo? Kʼuiripu enga imajkumindu pendienti pákuarhijka, ¿tsípikua jingoni irekasïni? ¿Imeri familia tsípikua jingoni irekasïni? ¿Ambakiti amiguechani jatsiasïni? ¿Ambakiti pájperakua ma jatsisïni Tata Diosï jingoni? Nájtsï exesïni, ¿sánderu marhuasïni ambe enga parhakpini jorhentpijka o ambe enga Tata Diosïri Karakata jorhentpijka? (1 Kor. 3:19). Imecha engaksï imani ambe újka engaksï parhakpini anapuecha jorhentpijka, ísïstiksï eska ima kʼuiripu enga miiuni nirajka nani ka máteru kʼuiripuni kurhamarhini enga májkueni tsïnchitini jámani jaka néna uá niárani lugari ma jimbo. Jesusi arini ambe uandaspti kʼuiripuecheri imeri jurhiatikuecha jimbo: “Sieguestiksï engaksï orhekupajka máteru sieguechani, ka enga ma siegu orhekupaaka máteru sieguni, tsimarhanksï” uekanheati posurhu (Mat. 15:14). Ísïsti, ambe enga parhakpini jorhentpijka, méntku no marhuasïndi para Tata Diosïni japarini. w19.05 24, 25 párr. 14-16

Ini uéxurhinicha jimbo, imecha engaksï kurhinda ka binu arhajka Miántskuarhu, sánderu ka sánderuksï uánixati. ¿Jatsipirinchi para uandanhiani i ambe jimbo? Nómbe. Jeoba “mítiasti imerichani” (2 Tim. 2:19). Jeoba mítesti néchaksï sési jimbo erakukateski, peru ima erachicha engaksï kuenta újka namuniskiksï engaksï arhajka kurhinda ka binu Miántskuarhu, nóksï mítesti. Ísï jimbo, asta imechanksï kuenta uásïndi engaksï eratsejka eskaksï erakukateska peruksï sési jimbo no jindeeni. Máru engaksï arhenga, iásïksï nóteru arhasïndia. Ka máteruechaksï uandasïndi eskaksï Jesusi jingoni niuaka juramuni jini auandarhu peru jimbokaksï pʼamenchakua ma kámasïnga éjpurhu. Ísï jimbo, nóchi míteska meru namunksï erakukatecha útasï jarhaski ixú Echerirhu. Erakukatechaksï uápurisï jauati Echerirhu jiáni enga Jesusi junguaaka para auandarhu paantani. Ísïsti eska Bibliarhu ísï kurhangukuarhesïnga eska últimu jurhiatikuecha jimbo útasïksï jauaka erakukatecha Echerirhu (Jaŋ. 12:17). Peru no arhisïndi meru namunksï pakarani jaua jiáni enga kʼéri mískuarhita uénakuarhiaka. w20.01 29, 30 párr. 11-13

Jesusi uandantaspti uájperi ma enga ísku ambenharhijka tumina para xarhatani na engajtsïni xáni xénchajka Jeoba (Luk. 15:11-32). Táti jémba enga Jesusi úrapka uandantskuarhu, méntkisï eratsespti eska imeri uájpa kʼuanhatsentapiringa. Ka enga ísï úkuarhipka, ima kánikua tsípikua jingoni jióntaspti. Engachi ma tiempu jurajkupka Jeobani peruchi iásï móantania, uákachi seguru jarhani eskajtsïni juchari Táti tsípikua jingoni jióntaaka. Juchari Táti sési péntaati iámu ambe enga xáni no sési úkuarhika Adaniri kulpa jimbo. Enga ísï no kurhandipka, Jeoba erakuaspti 144,000 kʼuiripuechani parakaksï jindeepiringa reicha ka saserdoticha auandarhu imeri Uájpa jingoni. Jimbanhi parhakpinirhu, Jesusi ka imecha engaksï imani jingoni juramuaka jarhuatauatiksï imechani engaksï kurhajchajka Jeobani paraksï perfektueni. Engaksï na xarhataakia eskaksï kurhajchasïnga Tata Diosïni jiáni engaksï últimu tsʼéjkunhaaka, Tata Diosï íntsauati tsípikua para méntkisï. Juchari Táti kánikua sési pʼikuarheraati enga exeaka eska iámu echerirhu, solu imeri uájpecha jauaka engaksï perfektueuaka. ¿A no eska kánikua ambakiti ambeuaka? w20.02 6, 7 párr. 17-19

Iáminduechachi jatsiska para kurhamarhikuarhini: “¿Néna mójtakurhixaki parani májkueni úni ambe ma eska Jesusi? ¿Solu jindeeski parajtsïni máteruecha ménderueni exeni? ¿O meru iámindu ambe jimbo mójtakurhixaki na engani jásï kʼuiripu máeka?”. Mateu 12:43-45, ejemplu ma jarhasti enga Jesusi úrapka ka enga xarhatajka ambe engachi jatsika para úni. Í ejemplu xarhatasïndi ambe ma enga kánikua jukaparhakueka: no solu uétarhisïndi nóteru eratsenia no sési jásï ambe; jatsiskachi para imani ambe eratseni jarhani enga Tata Diosï jaiapanhintajka. ¿Meruchi uá mójtakuni na engachi jásï kʼuiripu máeka? Tata Diosïri Karakata arhisïndi: “Jimbanhentantsï ísï eska Diosï na kueraajpejka, ka kaxumbini ka pímbinhaxentani ísï eska Diosï na uéjka” (Efes. 4:24, TDU). Eskachi na exekia, uákachi mójtakurhini, peru no fásilisïndi. No solu jindeesti pʼíngukuarhini para no úni o tsitini imani ambe enga no sési jaka. Jatsiskachi para mójtakuni ambe engachi eratsejka. I ambe arhikuekasïndi mójtakuni ambe engachi tsitijka, na engachi jámajka ka ambe engachi jimbo újka ambe ma. Ka parachi ísï úni, jatsiskachi para seguirini jarhani jánguarhintani. w19.06 9, 10 párr. 6, 7

Jeoba pʼamojkuspti Lotini ka axaaspti máru ánjelichani paraksï pʼímutantani imani ka imeri familiani. Peru Loti ióndaxapti. Ánjelichaksï jatsispti para jupijtani Lotini, témbani ka imeri tsimani uájpechani ka jarhuataasptiksï paraksï sïpakuarhini imani lugariri (Gén. 19:15, 16). Jimajkani, ánjelichaksï arhiaspti eskaksï juátarhisï nipiringa sïpakuarhini. Peru enbesdeksï ísï úni, Loti arhispti Tata Diosïni eska jurajkuapiringa paraksï ireta ma jimbo nirani enga jima no iauani japka (Gén. 19:17-20). Jeoba tekaantskua jingoni kurhajchaspti ka jurajkuspti para ísï úni. Tátsekua, Loti chéspti imani ireta jimbo pakarani ka niraspti juátecharhisï, meru jima enga Jeoba uénani jámani arhipka eska nipiringa (Gén. 19:30). Ísïsti, Jeoba kánikua tekaantskua xarhataspti. Májkueni eska Loti, jamberi kúnguarhikuarhu anapu erachi ma imani ambe erakuati úni enga no sési jaka ka niárani kʼérati problemechani jatsiani imani ambe jimbo. ¿Ambechi uá enga inde ambe úkuarhiska? Jamberichi uékani jauaka arhini eska jimbosï no sési nitamakuarhini jaka imani ambe jimbo enga úka, ka ísïsti (Gal. 6:7). Peruchi uáka úni ambe ma enga sánderu sési jaka: ju je ísï úni eska Jeoba na jarhuatapka Lotini. w19.06 20, 21 párr. 3-5

Engajtsïni juchari ikiatspiticha nóteru jurajkujkia úni juchari ánchikuarhitani, uékasïndiksï eskachi chéaka marhuakuni Jeobani. Jamberiksï chkuanderakua ambe uandaati juchari ambe, polisiauechani axaani juchari kʼumanchikuarhu paraksï iámindu ambe exeni, afuersajtsïni páni juesicha jingoni o astajtsïni ónhaani máru juchantsïni. Uékasïndiksï eskachi kánikua chéaka engachi exejka eskaksï ónhaaxaka máru erachichani. Engachi jurajkupiringa eskajtsïni inde ambe chérapiringa, ísïpirindi enajkichi jucha mismu no jurajpeni japirini úni juchari ánchikuarhitani. Peru nóchi uékasïnga ísïni komu ima kʼuiripuecha enga Levítico 26:36, 37 uandaajka. Ju je no jurajkuni eskajtsïni kʼuiripu chéraaka parachi nóteru májkueni marhuakunia Jeobani o astachi niárani jurajkuni. Iámu mintsita jingonchi mintsikasïnga Jeobani ka nóchi jurajkusïnga eskachi ísku pakaraaka chétapu jimbo (Is. 28:16). Kurhakusïngachi Jeobani eskajtsïni jarhuataaka. Míteskachi eska imeri jarhuajperata jingoni, ni sánderu kʼérati juramutichaksï uá eskachi nóteru marhuakuakia juchari Tata Diosïni. Enbesdejtsïni chérani, inde ambe uáti úni eskachi sánderu uékaaka marhuakuni Jeobani. w19.07 9, 10 párr. 6, 7

Nájkiruka aianhpikuarhu ísï xarharajka enajki no nema uéjki Kristueri chúxapatiini, ju je seguirini jirinhantaani imechani engaksï uékapiringa ísï úni. Ju je no mirikurhini eska Jesusi ísï terukutantaspka ini ánchikuarhitani komu kurucha pʼitamani itsïrhu. Kurucha pʼitamatichaksï kánikua ánchikuarhisïndi ka nóksï ma kurucha pʼitamani. Uánikua xanhariksï chúrikuechani ánchikuarhisïndi o xarhentku ka astaksï jatsisïndi para iauani nirani marirhu (Luk. 5:5). Májkueni, máru Testiguechaksï uápurisï ka ióni jámasïndi tekaantskua jingoni aianhpini. Ísïksï úsïndi paraksï úni sánderu kʼuiripuechani exeantani. Imecha engaksï jánguarhintajka ísï úni, sáno méntkisïksï úsïndi uandontskuarheni imani kʼuiripuechani jingoni engaksï uéjka míteni ambe engachi aianhpijka. ¿Úpirinchi ima jandora aianhpini o jimesïsï nani engachi sánderu úpiringa exentani kʼuiripuni? ¿Andisï uétarhijki tekaantskua para Bibliaeri ambe jorhentpini? Ma ambe jindesti jimboka no solu uétarhisïnga jarhuatani kʼuiripuni míteni ka tsitini ambe enga Biblia jorhentpijka. Ístuchi jatsiska para jarhuatani míteni ka xénchani Imani enga kararkuarhika Bibliani, Jeobani. w19.07 18, 19 párr. 14, 15

Jamberichi útasï no sési pʼikuarherajka imani ambe jimbo engachi ióntki no sési úpka. Engachi ísï pʼikuarherajka, ¿andichisï no jirinhantajki sánderu informasioni enga Jesusiri uarhikueri ambe uandajka? Jorhenguarhini, eratsentani ka kómarhini ini xáni ambakiti ambe jimbo, jarhuataatijtsïni nóteru no sési pʼikuarherania jimbokachi kurhanguaka ka jiókuarhini eskajtsïni Jeoba puáchintaskia engachi no sési ambe úka. Ju je exeni máteru ambe engachi jorhenguarhijka Pablueri. Máru Testiguechaksï jurajkusti imecheri ánchikuarhitani nani engaksï sési maiamunhenga paraksï sánderu marhuakuni Jeobani. Jiájkani engachi jucha indeni ambe úka, mirikurhini imani ambe enga nitamakia arhikuekasïndi no pʼamondakuarhini imani ambe jimbo engachi úpiringa jatsini (Núm. 11:4-6; Ecl. 7:10). Ístu ima “ambe enga nitamakia” úpirindi jindeeni ambe engachi xáni úkia para Jeobani marhuakuni o tsʼéjkukuecha engachi nitamakuarhiakia. Ísïsti, sánderuchi andarhierasïnga Tata Diosïni engachi miájka na engajtsïni ióntki újchakurakia ka jarhuatani. Peru nóchi jatsiska para eratseni eska sésku jarhaskia engachi iónisï sési marhuakukia Jeobani (1 Kor. 15:58). w19.08 3 párr. 5, 6

Na uéjki jatini ka nani uéjkichi jarhani, uákachi janhanharhikua jingoni kómarhini juchari Tata Diosïni. Imajtsïni méntkisï jingontku kurhajchasïndi engachi kómarhijka. Ka engachi exejka eska ima meru kurhauasïnga juchari kómarhikuechani, niárasïngachi sánderu xénchani. Salmueri karari ma uandaspti: “Xénchasïnga Jeobani, jimboka ima kurhauasïnga juchiti uandakuechani” (Sal. 116:1). Juchari Táti no solu kurhauasïndi juchari kómarhikuechani, ístu mókuantaasïndi. Apostuli Juanu uandasïndi “eska engachi kurhajkuarhiaka ma ambe eska ima na uékajka, imajtsïni kurhajchaaka” (1 Juanu 5:14, 15). Ísïsti, jamberijtsïni Jeoba no ísï mókuchintaati eskachi na erokuarhini japka. Jimboka ima míteska ambe enga sánderu sésiika para jucha, ménisïjtsïni no íntskusïndi ambe engachi kurhakujka o ménisï uékasïndi eskachi erokuarhiaka ma tiempu (2 Kor. 12:7-9). Jeobajtsïni íntskusïndi ambe engachi uétarhinchajka. Ima májkueni úsïndi eska na juramukuajka tátichani eskaksï uáka (1 Tim. 5:8). Ima íntsaasïndi imeri uájpechani ambe engaksï uétarhinchajka para úni irekani. No uékasïndi eskachi uandanhiauaka tʼirekua jimbo, xukuparhakua o nani engachi irekaaka (Mat. 6:32, 33; 7:11). Jimbokajtsïni ima xénchasïnga, ístu exestia ambe enga uáka sánderu orhepani parachi no ma ambe uétarhinchani. w20.02 5 párr. 10-12

No iáminduecha engaksï erokuarhikua jatsika para auandarhu nirani, imani grupurhuksï jarhasti enga jindeeka jántspiri enga mintsinharhikueka ka jánhastiini (Mat. 24:45-47). Májkueni eska primeru siglurhu, Jeoba ka Jesusiksï namunitu erakukatechani úraasïndi paraksï uánikuechani jorhendaani. Primeru siglurhu, namunitu erakukatechaksï úranhaspti paraksï Karakata Griegaechani karaaani. Iásï, namunitu erakukatechaksï jatsisti ánchikuarhitani paraksï jorhendaani Tata Diosïri iretarhu anapuechani. Jeoba uandastia eska íntsauaka tsípikua para méntkisï ixú Echerirhu sáno iámindu imeri marhuarichani ka tsípikua jini auandarhu namunituechani engaksï Jesusi jingoni juramukua. Tata Diosï kóndiantaasïndi iámindu imeri marhuarichani —“judiuni” ka ístu “diesi acheetichani”— ka arhiasïndi iáminduechani eskaksï ísï uáka ambe enga ima juramujka ka eskaksï no méni jurajkuaka (Zac. 8:23). Iáminduechaksï jatsisti para no méni jurajkuni ka májku kʼériksï marhuakuni imani. Ka iáminduechaksï jatsisti para jánguarhintani paraka pínandikua jauaka kúnguarhikuarhu. No ióni jimbo Noambakitiri parhakpini kʼamajkunhaatia, ísï jimbo, ju je seguirini marhuakuni Jeobani ka májku kʼéri chúxapani Kristuni. w20.01 31 párr. 15, 16

Nóchi jatsiska para afuersa uékani eskaksï juchari kʼumanchikuarhu anapuecha uékaaka jorhenguarhini Bibliaeri ambe. Peruchi uáka jarhuataani paraksï sánderu uékani kurhaani ambe enga Biblia arhijka (2 Tim. 3:14, 15). Ambakiti jángua ma xarhatani. Uánikua xanhari, juchari parientichaksï sánderu imani ambe exesïndi ambe engachi újka ka eska ambe engachi uandajka. No kuatantani. Jeoba jindesti juchari ejemplu. Méntku úndasïndi jarhuatani kʼuiripuni para jiókuarhini ambakiti ambe ka para jatsini tsípikua (Jer. 44:4). Ka apostuli Pablu arhispti Timoteuni eska seguiripiringa jarhuataani máteruechani jimboka ísï úpiringa ima mismu pʼímutantskata uérani ka ístu imecha engaksï kurhajchapiringa (1 Tim. 4:16). Jimbokachi xénchaasïnga juchari parientichani, uékasïngachi eskaksï jorhenguarhiaka Bibliaeri ambe. w19.08 14 párr. 2; 16, 17 párr. 8, 9

Jatsiskachi para miáni eska enga nema tiempu arhutajka parajtsïni jurhimberantani, jamberi jindeeti jimboka no sapichitu ambeeska ima ambe engachi úka. Engachi indeni ambe nitamakuarhijka, jamberichi uénani jámani úkua jukanchaaka jiókuarhini konsejuni. Jamberichi no sési exeaka imani engajtsïni jurhimberantaka o na engajtsïni íntskuka konseju. Peru engachi kaxumbitiska, jánguarhintaakachi mójtakurhini. Ima enga kaxumbitiika, jukaparharaasïndi konsejuechani. Ju je úrani ejemplu ma. Eranhaska je eskachi uandontskuarhexaka máru erachicha jingoni Kʼumanchikua Reinuerirhu. Jiájkani, nemajtsïni támu pásïndi ka sïpatikuarkujtsïni aianguni eskachi sïnicharhu tʼirekua pakajtsïtaska. ¿A no eskachi kʼuratsesïnga? Peruchi sési pʼikuarherasïnga engajtsïni aiangujka. Uékapiringachi eskajtsïni nema antesi aiangupiringa. Májkuenisti, jatsipiringachi para kaxumbikua jingoni diosmaiamukua arhini erachini ma enga balori jukapka parajtsïni konseju ma íntskuni jiáni engachi uétarhinchani japka. Ju je ísï exeni eska juchari amigu ma engajtsïni xénchajka, no komu nema engajtsïni ikiachijka (Prov. 27:6; Gal. 4:16). w19.09 5 párr. 11, 12

Jeoba ambakiti ánchikuarhita ma íntsaasti nándichani familiarhu ka paraksï úni arhiani sapiichani ambe engaksï uáka. Ambe engaksï nándicha újka o uandani, sapiichaksï méntkisï miáni jarhasïndi (Prov. 22:6). Ju je exeni ambe engaksï uáka jorhenguarhini nándicha Mariaeri ambe enga Jesusiri amambepka. Maria sési mítespti ambe enga arhienga Tata Diosïri Karakata. Kánikua janhanharhisïrendi Jeobani ka ambakiti pájperakua ma jatsispti imani jingoni. Ka nájkiruka imeri irekua méntku mójtakurhipiringa, úspti ambe enga Jeoba uékenga eska úpiringa (Luk. 1:35-38, 46-55). Ju je exeni máru ambe engajtsï chá nándicha uáka jorhenguarhini Mariaeri ambe. Orheta, arhinta je Bibliani ka kómarhi je parajtsï seguirini ambakiti pájperakua ma jatsini Jeoba jingoni. Tsimani úni jámani, jánguarhinta je mójtakurhini parajtsï sési pʼikuastani Jeobani. w19.09 18 párr. 17-19

Apostuli Juanu ini ambe nitamakuarhispti, Tata Diosï ambakiti ambe aianguspti jánhaskua ma jimbo enga sánderu orhepani úkuarhipiringa. Imani jánhaskua jimbo, máru ánjelichaksï arhinhasïndi eskaksï pʼínguaka tarhiatani para no no sési ambe úni parhakpinirhu astakaksï ma grupu Tata Diosïri jántspiricha mínda jatsikunhaaka (Jaŋ. 7:1-3). Ini grupu jimbo, 144,000 erachi ka pirenchichaksï jarhasti engaksï Jesusi jingoni juramuaka auandarhu (Luk. 12:32; Jaŋ. 7:4). Peru Juanu exespti máteru kʼéri grupuni enga uandapka: “Tátsekua jimbo exeaspkani uánikua kʼuiripuechani enga no nema úpka jamberi kuentuani ka engaksï kʼéri uaxantskuarhu orhepani japka Karichi sapichuni japarini [...]. Ka jindeesptiksï iámindu nasionicharhu ka iámindu tribuecharhu ka iretecharhu anapuecha ka engaksï táchani jásï idioma uandenga” (Jaŋ. 7:9-14). Kánikua sési pʼikuarherapti míteni eskaksï sánderu orhepani japiringa uánikua kʼuiripuecha engaksï kómarhini japiringa Jeobani. Ambe enga Juanu exepka jánhaskua jimbo, úspti eska imeri jakajkukua sánderu kʼépiringa. Ka juchari jakajkukua jatsisti para sánderu kʼéni jimboka ambe enga Juanu exepka, iásï kumplirikuarhixaka. Exexakachi na enga xáni uáni kʼuiripu andaparhakuerani jaka Jeobaeri iretarhu engaksï uáka tsípiti pakarani kʼéri miskuarhitarhu ka irekani para méntkisï Echerirhu. w19.09 26 párr. 2, 3

Ju je eranhaskani eska parhakpini anapu juramutichaksï iáiasï uandaskia “pínandisti ka sésichi nitamaxaka”. Jamberiksï uandani jauati eska no méni xáni pínandikua jarhaspka ka xáni sési irenhani. Ka uékaatiksï eskachi jakajkuaka eskaksï imecha úsïnga sési péntaani parhakpini anapu problemechani. Peru no ísïuati, jimbokaksï no ma ambe uáka úni para pʼínguni ambe enga tátsekua úkuarhiaka. “Kʼéri Babilonia” kʼamajkunhaati (Jaŋ. 17:5, 15-18). Tata Diosï eratsetarauaka paraksï úni ambe enga ima uéjka. ¿Ambeski enga Tata Diosï uéjka? Kʼamajkuani iámindu relijionichani engaksï no jurhimbitiika, asta imechani engaksï seguni uandajka eskaksï kristianueska peru engaksï no jorhentpijka kʼéri ambe arhini Jeobani ísï eska ima na jaiapanhintajka. Tata Diosï eratsetarauati ini ambe imani “diesi sïuanguechani” engaksï animali charhapitirika. Diesi sïuanguechaksï arhikuekaasïndi iámindu parhakpini anapu juramutichani engaksï ini animalini apoiarijka ka i animali, arhikuekasïndi paisichani engaksï kúnguarhintatini jaka (Naciones Unidas) (Jaŋ. 17:3, 11-13; 18:8). Engaksï i juramuticha uénaakia relijioni no jurhimbitini kʼamajkuni, arhikuekaati eska uénakuarhiakia kʼéri mískuarhita. Ambe máeuati enga mátirku úkuarhiaka interu parhakpinirhu ka enga meru kánikua no sési jánhaskuarhiaka. w19.10 14 párr. 1, 3

Primeru siglurhu, Diotrefesi enbidiariuasïrendi imechani engaksï kúnguarhikuani orhejtsïkuenga. Uékasïrendi sánderu kʼéri ambeeni kúnguarhikuarhu, jimbosï no sési ambe uandapti apostuli Juanueri ka máteru erachicheri ambe paraksï no janhanharhinhani (3 Juanu 10). Nájkirukachi jucha no niáraaka ísï jámani eska Diotrefesi, úpiringachi uénani enbidiarini erachini ma enga imani ánchikuarhita intsïnhaka engachi jucha uékenga, ka sánderia engachi ísï exejka eskachi juchajtu úpiringa májkueni sési úni imani ánchikuarhitani. Enbidia ísïsti eska uemberhikua: enga uénajkia mintsitarhu tsikini, úkua jukasïndi kénditani. Ka sánderu kʼésïndi enga nema uénajka kʼéramakuarhini, selosueni ka uarhisiini. Enbidia úsïndi eska nema no uékpiaka, pʼamojpini ni sési kámpini. Jatsiskachi para méntku murutani engachi uénaska exeni eska juchari mintsitarhu tsikixaka. w20.02 15 párr. 6, 7

Apostuli Pablu arhikuekaxapti eska no sési nitamakuarhixapka imeri mismu uandanhiata ma jimbo. Uandaspti eska inde uandanhiata, ísïspka komueska “Noambakitiri jántspiri” enga no sési úkuni japka. Jamberi no jindeepti Noambakiti ka imeri demoniuecha engaksï tsʼéjkuni japka. Peru engaksï exepka eska Pablu uandanhiata ma jatsispka, jamberiksï sánderu uandanhiatapti paraksï sánderu no sési pʼikuastani ka sánderuksï no sési úkuni. ¿Ambe úspi apostuli Pablu? Uénani jámani, Pablu nóteru uékasïrendia imani chekamikuani pʼikuarherani. Ima uandaspti: “Tanimu uelta kómarhiska juchiti Tatani [Jeobani] eskarini késtatachipiringa”. Nájkiruka xáni kómarhipka, seguirixapti pʼikuarherani chekamikuani. ¿I ambe arhikuekasïni eska Jeoba no mókukuantaspka imeri kómarhikuechani? Nómbe, Jeoba mókukuantaspti. Nájkiruka no kénditakupka uandanhiatani, íntskuspti uinhapikua para úni orhepani uérani ka arhispti: ‘Juchiti uinhapikua sési jimbo uinhapitisti para ima enga sánderu debilika’ (2 Kor. 12:8, 9). Jeobaeri jarhuajperata jimbo, Pablu úspti seguirini tsípikua ka pínandikua jingoni irekani (Filip. 4:4-7). w19.11 9 párr. 4, 5

Jeoba jukanchasti parachi imantku marhuakuni jimbokajtsïni ima kueraaska ka íntskuntsïni tsípikua (Jaŋ. 4:11). Peru, nájkirukachi xénchajka Jeobani ka janhanharhini, jarhasti máru ambe engajtsïni uáka ójkutani ka nóchi ísï kómarhini eska ima na jukanchaka. Biblia uandasïndi eska aiakukuarheni Tata Diosïni, arhikuekasïnga kánikua xénchani imani. Ka imantku marhuakuni, arhikuekasïndi solu imani kómarhini. Nóchi jurajkusïnga eska juchari mintsita sánderu xénchaaka nemani o ambe ma ka eska Jeobani (Éx. 34:14). Ambe engachi jorhenguarhika Jeobaeri ambe, ústi eskachi imantku marhuakuaka. Niáraskachi jorhenguarhini na enga jásï Tata Diosï máeka. Míteskachia ambe enga jaiapanhintajka ka ambe nómbe ka juchajtuchi májkueni eratsesïnga. Míteskachi ambe enga Jeoba uéjka para jucha ka jarhuatasïngachi paraka ísï úkuarhiaka engachi ísï irekajka eska ima na juramujka. Kʼéri kóntperata máesti engajtsïni Jeoba íntskujka sésikua parachi imeri amigueni (Sal. 25:14). Ambe engachi xáni jorhenguarhijka juchari Kuerajpiriri ambe, úsïndi eskachi sánderu andarhieraaka imani (Sant. 4:8). w19.10 26 párr. 1-3

Ini jurhiatikuecha jimbo, erachicha ka pirenchichaksï uánikua ambe no sési nitamakuarhisïndi. Por ejemplu, uánikuaksï no sési nitamakuarhisïndi kʼérati janikuecha jimbo, kʼérati jenchekuecha o guerrecha jimbo. Enga inde ambe úkuarhiska, jamberichi uáka paani máru erachichani juchari kʼumanchikuarhu. Jamberiksï máteruecha úpirindi tumina jingoni jarhuajpini. Peruchi iáminduecha uáka kómarhini Jeobani eska jarhuatauaka. Engachi míteska eska erachi ma kómu pʼikuarheraxaka, jamberichi no jánhaskaaka ambe arhini o ambe úni. Peruchi uáka kánikua jarhuatani, por ejemplu, uákachi imani jingoni jarhani, jingontku kurhajchani engajtsïni aiangukuarhini jauaka ambe ma ka tekstu ma arhikuntani engajtsïni juchantsïni sési pʼikuastantajka (Is. 50:4). Ambe enga sánderu jukaparhakueka, jindesti juchari amiguecha jingoni jarhani jiáni engajtsïni sánderu uétarhinchani jauaka. Ju je eratsetini jarhani sánderu amiguechani jatsiani ka méntkisï sési pájperani imecha jingoni desde iásï. I járhati amiguecha jingonchi sési pʼajperaaka no solu ini jurhiatikuecha jimbo sino para méntkisï. w19.11 7 párr. 18, 19

Ima enga uénga ini jásï kéjtsïtakuani, úsïrendi jimboka xénchasïrenga imeri Tata Diosï Jeobani. Ima enga ini kéjtsïtakuani uénga, imeri familia ka saserdotichaksï arhasïrendi animaliri kʼuiripetani. Peruksï máru animaliri particha solu jindeespti para Jeoba. ¿Náki particha? Jeoba exesïrendi eska animaliri tamakua sánderu ambakiti ambespka. Ístu uandaspti eska rinionicha ka ígadu kánikua jukaparhakua ambespka para ima (Lev. 3:6, 12, 14-16). Ísï jimbo, Jeoba kánikua tsípisïrendi enga israelita ma, rinionini, ígaduni ka tamakua kéjtsïtakupiringa. Ima israelita enga indeni ambe kéjtsïtenga, xarhatasïrendi eska mintsita jingoni uékasïrenga íntskuni Jeobani sánderu ambakiti ambe. Májkueni, Jesusi sánderu ambakiti ambe íntskuspti Táti jémbani enga iámindu mintsita jingoni marhuakupka jimboka xénchasïrenga (Juanu 14:31). Jesusi tsípikua jingoni úsïrendi ambe enga Tata Diosï uéjka (Sal. 40:8). ¡Xáni enga sési pʼikuarherapka Jeoba exeni na enga xáni sési marhuakuenga imeri Uájpa! w19.11 22, 23 párr. 9, 10

Tata Diosïri Karakata arhisïndi eska seisi jurhiatikua ísï tátsekua, Jeoba nóteru kueraaxapkia ambe ma Echerirhu (Gén. 2:2). Joperu Jeoba tsitisïndi ánchikuarhini, ísï jimbo, seguirixati máteru ánchikuarhita ambe úni (Juanu 5:17). Jeoba seisi jurhiatikua ánchikuarhispti ka jurhiatikua siete jimbo mintsikuarhispti ka májkueni arhiaspti israelitechani eskaksï mintsikuarhipiringa jurhiatikua siete jimbo. Tata Diosï uandaspti eska sábadu mínda máespka entre ima ka israelitecha. (Éx. 31:12-14). No nema jatsispti para ánchikuarhini, ni tataka sapirhaticha ni jántspiricha. Ni animalicha engaksï kʼuiripuecha jatsikuarhiapka uéni ánchikuarhini (Éx. 20:10). I ambe úsïrendi eskaksï israelitecha sánderu sési marhuakupiringa Tata Diosïni. Jesusiri jurhiatikuecha jimbo, uánikua relijioniri orhejtsïkutichaksï juramukuechani peeraaspti engaksï kánikua úkua jukapka paraksï sábaduni janhanharhini. Uandasïrendiksï eska no sésikua jarhaspka ni sikiera para semiia ambe pʼitaakuni o kʼuiripuni ma tsinani (Mar. 2:23-27; 3:2-5). Peru no i ambesï uékendi Jeoba, ka Jesusi sési mítetaraaspti ini ambe imechani engaksï kurhajchenga. w19.12 3, 4 párr. 8, 9

Engachi sánderu mítejka na enga jásï Tata Diosï máeka Jeoba, úsïngachi sánderu sési terukukuntani imani. Jimboka Dabidi sési mítespka Jeobani, sési kásïrendi máteru kʼuiripuechani ísï eska na kaapiringa imeri Táti auandarhu anapu. Ka jimboka Dabidi niáraspka kánikua sési pájperani Jeoba jingoni, rei máespti engaksï israelitecha kánikua xénchenga ka Jeoba imani úrasïrendi komu ejemplu para máteru reicha engaksï Israeli anapuepka (1 Rey. 15:11; 2 Rey. 14:1-3). ¿Ambechi jorhenguarhisïni? Jatsiskachi para májkueni úni ambe ma eska Tata Diosï. Engachi jánguarhintajka parachi ísïni eska Tata Diosï, xarhatasïngachi eskachi imeri uájpeska (Efes. 4:24). Nóchi méni kʼamaraaka Jeobaeri ambe jorhenguarhini (Ecl. 3:11). Peru ambe enga sánderu jukaparhakueka, no jindesti ambe engachi xáni míteka imeri ambe, sino ambe engachi újka imani ambe jingoni engachi mítekia. Engachi ísï uáka eskachi na jorhenguarhijka ka jánguarhintani májkueni úni ambe ma eska juchari Tata Diosï uékpiti, imajtsïni sánderu andarhieraati juchantsïni (Sant. 4:8). Imeri Karakatarhujtsïni aiangusïndi eska ima no méni jurajkuauaka imechani engaksï jánguarhintajka sési míteni imani. w19.12 20 párr. 20; 21 párr. 21, 23

Jakobu xénchaasïrendi iámindu imeri uájpechani, peru sánderu xénchasïrendi Joséni enga 17 jatiripka. ¿Nénaksï exespi ini ambe máteru imeri uájpecha? Enbidiarisptiksï Joséni ka indeni ambe jimboksï niáraspti kurhunhini. Atarantasptiksï para jántspiri máeni ka arhisptiksï táti jémbani eska animali apejpiti ma antaspka imeri sapini enga xáni xénchenga. Enbidia úspti eska familia nóteru úpiringuia sési pájperani ka kánikuaksï no sési pʼikuastaspti táti jémbani (Gén. 37:3, 4, 27-34). Enbidia kuenta úkuarhisïndi imani ukuecha jingoni engaksï xáni no sési útspijka engaksï ‘mintsita tamapuerika’ ka engaksï úpiringa úni eska kʼuiripu ma no inchaaka Tata Diosïri Juramukuarhu (Gal. 5: 19-21). Sáno méntkisï, enbidia jindesti enga újka eskaksï kʼuiripuecha no uáka sési pájperani, eskaksï uarhiperaaka ka eskaksï sóntku ikiauaka. Ambe engaksï Joséri ermanuecha úpka, xarhatasïndi na enga xáni no sési úkuajka enbidia kʼuiripuechani ka na enga újka eska familia ma nóteru sési pájperaakia. Nájkirukachi jucha no méni ísï jámapiringa eska Joséri ermanuecha, nóchi jatsiska para mirikurhini eskachi no perfektueska ka eskajtsïni mintsita ménisï támu ísï jánhastasïnga. Jimbochisï ménisï niárajka enbidiarpini. w20.02 14 párr. 1-3

Ma xanhari, Jeoba euantaspti Moisesini sáni espiritu santu, ka íntsaaspti máru Israeli anapu orhejtsïkutichani engaksï jima no iauani japka nani enga japka kʼumanchikua para tánguarhini. Ísï tátsekua, Moisesi mítespti eskaksï ístu intsïnhaspka espiritu santu tsimani orhejtsïkuticha engaksï no nípka kʼumanchikuarhu para tánguarhini ka eskaksï uénaspka profeteni jámani. ¿Ambe úspi enga Josué arhipka eska arhiapiringa ambe ma imani tsimani orhejtsïkutichani? Moisesi no enbidiariuaspti imani achamasïchani enga Jeoba erakuapka, sánderu sési, tsípispti engaksï jatsipka kóntperata paraksï profeteni (Núm. 11:24-29). ¿Ambechi jorhenguarhisïni Moisesiri ambe? Ju je eratseni orhejtsïkutini ma enga kánikua tsitijka úni imeri ánchikuarhitani kúnguarhikuarhu joperu arhinhasïndi eska arhistakuaka máteru erachini para sánderu orhepani ima úni imani ánchikuarhitani. Enga kaxumbitiika májkueni eska Moisesi, no ísï pʼikuarheraati enajki nóteru xáni janhanharhinhaaia. Sánderu sési, kánikua tsípikua jingoni jarhuataati erachini. w20.02 15 párr. 9; 17 párr. 10, 11

Pʼamenchakuechaksï kuatajkpisïndi. Úpiringachi kʼuratseni eskaksï máteruecha míteaka ambe engachi nóteru újkia úni o jimbokachi uétarhinchasïnga eskajtsïni jarhuataaka. Ka nájkirukaksï máteruecha no míteaka eskachi pʼamenchaxaka, jamberichi kʼuratsesïnga jimbokachi nóteru úsïnguia imani ambe úni engachi ióntki uénga. Engachi ini ambe nitamanchani jarhajka, Jeobajtsïni uinhaperantasïndi. ¿Néna ísï úsïni? Jeoba ústi eskaksï Bibliarhu uánikua ambakiti uandakuecha karakata jauaka engajtsïni miátantajka eska ima pendienti jarhaska juchantsïni jimbo nájkirukachi pʼamenchakua ma kámaaka (Sal. 31:19; 41:3). Imeri karakatani jimbo, Jeobajtsïni jarhuataati orhepani uérani engachi niáraska kómu pʼikuarherani pʼamenchakua ambe jimbo. Uákachi seguru jarhani eska Jeoba míteska ambe engachi nitamakuarhini jaka. Ju je kómarhini eskajtsïni jarhuataaka no jukari eratseni jarhani imani ambe engachi nitamakuarhini jaka. Ju je arhintani Bibliani parachi exeantani ambakiti uandakuechani enga Jeoba kararkuarhiaka para jucha. Ju je jingontku arhiantani imani karakatechani engaksï uandajka na enga xáni jukaparharajka Jeoba imeri marhuarichani. Engachi ísï úska, exeakachi eska Jeoba sési kaasïnga iámindu imechani engaksï sési marhuakujka (Sal. 84:11). w20.01 15, 16 párr. 9, 10; 17 párr. 12

Isaki jatsikuarhirispti, ka filisteuechaksï enbidiarisïrendi indeni ambe jimbo (Gén. 26:12-14). Xánksï enbidiarisïrendi engaksï jamberi echeri jingoni uinirantaapka imani posuechani nani enga Isaki itsï pʼitenga para animalichani itsïmataani (Gén. 26:15, 16, 27). Ini jurhiatikuecha jimbo, máru kʼuiripuechaksï ísï jámasïndi eska filisteuecha ka enbidiariuasïndiksï imani kʼuiripuechani engaksï sánderu jatsikuarherika eska imecha. Nóksï solu tsitisïndi ambe engaksï máteruecha jatsikuarheka, sino ístuksï uékasïndi eskaksï ima kʼuiripuecha no jatsiaka imani ambe. Judiuecha engaksï relijioniri orhejtsïkutipka enbidiarisïrendiksï Jesusini jimboka kʼuiripu xénchasirenga (Mat. 7:28, 29). Tata Diosï axaspti Jesusini ka ima jurhimbikua ambe jorhentpisïrendi. Nájkiruka ísïpka, relijioniri orhejtsïkutichaksï chkuanderakua ambe uandantaspti paraksï no sési pakatani Jesusini (Mar. 15:10; Juanu 11:47, 48; 12:12, 13, 19). ¿Ambechi jorhenguarhisïni íri ambe? Eskachi no jatsiska para enbidiariuani imechani engaksï sési kánhajka kúnguarhikuarhu o xénchanhani imecheri kualidadicha jimbo. Sánderu sési, jatsiskachi para jánguarhintani májkueni úni eska imecha (1 Kor. 11:1). w20.02 15 párr. 4, 5

Ju je eranhaskani eska ióntkiiska ka eskachi jini Persia irekaxaka. Ka uékasïngachi rei jingoni uandontskuarheni ambe máeri. Peru nóchi nipiringa reini exeni engajtsïni ima no íntskupiringa sésikua para ísï úni, jimbokachi úpiringa uándikunhani. Kánikuachi sési pʼikuarherasïnga enga Jeoba no ísïka komueskaksï Persia anapu reicha. Úsïngachi na uéjki jatini uandontskuarheni imani jingoni. Jeoba uékasïndi eskachi no chéaka imani jingoni uandontskuarheni. Ísïsti eskachi úsïnga arhini Jeobani, Tata Kueraajpiri, Ima enga iámu ambe újka úni ka Kʼéri Juramuti. Peru ima uékasïndi eskachi arhiaka “Táti”, sánderu uékperakua jingoni (Mat. 6:9). ¿No ísïski eskajtsïni sési pʼikuastasïnga míteni eska Jeoba uékasïnga parachi ambakiti pájperakua ma jatsini imani jingoni? Uákachi arhini Jeobani “Táti” jimbokajtsïni ima kueraaska (Uku. 17:24, 25). Jimboka ima juchari Tátiska, jatsiskachi para kurhajchani. Engachi úska ambe engajtsïni ima juramuchijka, kʼérati kóntperatechanchi jatsiauaka (Ebr. 12:9). Ma kóntperata jindeuati tsípikua para méntkisï, auandarhu o Echerirhu. w20.02 2 párr. 1-3

Ambe engachi jucha uéjka, jindesti jarhuatani jorhenguarhirini para niárani Jeobani marhuakuni (Efes. 4:13). Enga nema jiókuarhijka jorhenguarhini Bibliaeri ambe, jamberi ísï úsïndi solu eratseparini na enga marhuakuaka imani. Peru, enga niáraakia sánderu xénchani Jeobani, jamberi uénaati eratseni néna jarhuataani máteruechani, ka sánderia imechani engaksï kúnguarhikuarhu jaka (Mat. 22:37-39). Ístu, méni engachi uáka, ju je arhini eska kʼéri kóntperata máeska íntspini tumina para Reinueri ánchikuarhita. Ju je jorhendani jorhenguarhirini para orhepani uérakuani problemechani. Ejempluchi ma jatsikuaka. Bibliaeri jorhenguarhiri ma enga aianhpirikia peru enga nótki itsï atakuarhini jaka, arhisïndijtsïni eska erachi ma no sési pʼikuastaska. ¿Ambechi uá? Enbesde kuájpini nemani, ju je jorhenguarhirini jingoni exeni ambe enga Biblia arhijka. Uákachi arhini eska uáka tsimani ambe úni: puákuntani erachini, o enga no uáka mirikurhini ambe enga úkuarhika, uékperakua jingoni uandontskuarheni erachi jingoni paraksï seguirini sési pájperani (terokutanta je Mateu 18:15 jingoni). Ju je jarhuatani Bibliaeri jorhenguarhirini para prepararini ambe enga uandaaka. w20.01 5, 6 párr. 14, 15

Engachi kómarhijka Jeobani eskajtsïni puáchentaaka, jiókuarhini eskajtsïni jurhimberantaaka ka engachi jánguarhintajka parachi no ménderu májkueni no sési úni, xarhatasïngachi eskachi jukaparharasïnga engajtsïni Jeoba puáchentajka. Engachi ini ambe újka, niárasïngachi ménderu sési pʼikuarherantani. Kánikuajtsïni uinhaperantasïndi míteni eska “Jeoba imecha jingoni jarhas[ka] engaksï no sési pʼikuarhinhijka mintsitarhu” ka pʼímutantaani “imechani engaksï kómu pʼikuarherajka” (Sal. 34:18). Jimboka sánderu axúterku jarhaskia enga i parhakpini anapu ambe kʼamajkunhaaka, jamberichi sánderu uandanhiatechani jatsiauaka. Engachi indeni ambe nitamakuarhini jauaka, ju je sóntku kómarhini Jeobani parajtsïni jarhuatani ka méntkisï Bibliani estudiarini. Ístu ju je miántani ambe engajtsïni jorhendajka Aneri, apostuli Pablueri ka rei Dabidiri ejemplu. Ka ju je kurhakuni Jeobani eskajtsïni jarhuataaka míteni ambeski engajtsïni xáni uandanhiatajka (Sal. 139:23). Ju je jurajkuni eskajtsïni Jeoba jarhuataaka juchari uandanhiatechani jingoni ka sánderia imani ambe jingoni engachi no ma ambe uáka úni. Engachi ísï úska, májkuenchi pʼikuarheraaka eska salmueri karari ma enga ísï pirekupka Jeobani: “Engani uánikua uandanhiatechani jatsiapka, uinhaperantaspkarini ka sésirini pʼikuastantani” (Sal. 94:19). w20.02 24 párr. 17; 25 párr. 20, 21

Jeoba imeri espirituni úrasti paraksï ima kʼuiripuecha engaksï Bibliani karaka, imani ambe eratsepiringa enga Tata Diosï uékenga eskaksï karapiringa. Arhintani Bibliani ka eratsentani, úsïndi eska niáraaka juchari eratsekuarhu ka mintsitarhu ambe engajtsïni Tata Diosï jorhendajka. Ambe enga Tata Diosï kararkuarhika jarhuatasïndijtsïni parachi ísï irekani eska ima na uéjka (Ebr. 4:12). Peru parajtsïni espiritu santu meru jarhuatani, jatsiskachi para tiempu arhutani para Bibliani arhintani ka jingontku eratsentani ambe enga arhijka. Engachi ísï úska, Tata Diosïri Karakatajtsïni jarhuataati ambakiti ambe uandani ka úni. Ístuchi jatsiska para kómarhini Tata Diosïni imeri marhuaricha jingoni (Sal. 22:22). Jeobaeri espiritu tánguarhikuecharhu jarhasïndi (Jaŋ. 2:29). Engachi tánguarhijka juchari erachichani jingoni, kurhakusïngachi imeri espiritu santuni kómarhikua jimbo, pireasïngachi pirekuechani engaksï Bibliarhu pʼitakata jaka, ka Bibliaeri ambechi jorhendanhasïnga orhejtsïkutichani jimbo ka ístu orhejtsïkutiri jarhuajpirichani jimbo engaksï espiritu santu jimbo erakunhaka. Peru engachi uéjka eskajtsïni espiritu santu meru jarhuataaka, jatsiskachi para sési preparadu nirani tánguarhikuecharhu para mókuntskuechani íntspiani. w19.11 11 párr. 13, 14