Eneru

Timoteueri jakajkukua uaxastakata jarhaspti imani ambe jimbo enga jorhenguarhienga Tata Diosïri Karakatarhu enga uénga eska sánderu ambakiti pájperakua ma jatsipiringa Jeoba jingoni. Juchajtuchi jatsiska para jorhenguarhini ambe enga Biblia uandajka Jeobaeri ambe ka sési eratsentani parachi exeni eska ísïska ambe engachi jorhenguarhini jaka. Uénani jámani, jatsiskachi para seguru jarhani ari tanimu amberi engaksï kánikua jukaparhakueka. Orheta, eska Jeoba jindeska Kuerajpiri iámindu amberi (Éx. 3:14, 15; Ebr. 3:4; Jaŋ. 4:11). Tsimani, eska Biblia uandasïnga ambe enga Tata Diosï uéjka eskaksï kʼuiripuecha míteaka (2 Tim. 3:16, 17). Ka tanimu, eska Jeoba kúnguarhikua ma jatsiska enga imani kómarhijka, engaksï jindeka Jeobaeri testiguecha, ka enga Kristu orhejtsïkujka (Is. 43:10-12; Juanu 14:6; Uku. 15:14). Parachi ini ambe úni, no uétarhisïndi eskachi uánikua ambe míteaka Bibliaeri ambe. Ambe engachi kʼóru jatsika para úni, jindesti sési eratsentani iámu ambe parachi seguru jarhani eska ísïska ambe engachi jakajkujka (Rom. 12:1). w20.07 10 párr. 8, 9

Ini profesia jimbo uandasïndi uánikua chochuecheri engaksï kʼuiripuecheri kánharhikua jukaka ka éjpurhuksï jukajtsïspti kanakueni jásï ma tiripitiri (Jaŋ. 9:7). Íksï chochuecha no sési pʼikuastaasïndi “kʼuiripuechani [o Jeobaeri ikiatspitichani] engaksï nómbe jukaka Diosïri míndani tsérhukuarhu” ka ísïksï úsïndi sinku kutsï jimbo, na engamindu xáni ióni irekajka chochu ma (Jaŋ. 9:4). I profesia kʼóru ísï xarharasïndi eska Jeobaeri erakukatecheri ambe uandaxaka, jimbokaksï no sáni chéparini uandantasïnga eska Jeoba kʼamajkuaka iámindu no sési jásï ambe enga parhakpinirhu úkuarhini jaka, ka i ambe kánikua no sési pʼikuastaasïndi uánikua kʼuiripuechani. I ambe arhikuekasïndi eskaksï ima chochuecha enga Joel 2:7-9 uandaajka nóksï májkueniska imani chochuecha jingoni enga Jaŋaskuecha uandaajka. I ambejtsïni no jatsisti para ísku pakatani jimboka ménisï Bibliarhu úrasïnga ambe ma para mámaru ambe arhikuekani seguni nani enga úrakuarhiaka. Por ejemplu, Jaŋaskuecha 5:5, uandasïndi eska Jesusi jindeska Leoni “tribu Judarhu anapu” ka 1 Pedru 5:8, uandasïndi eska Noambakiti ísïska komueska “leoni apejpiti” ma. w20.04 3 párr. 8; 5 párr. 10

Agari enga Sarairi jántspiri máepka, no sáni jánhaskakua jingoni jámaspti enga na Abraniri témbepkia. Jiáni enga embarasada japkia, uénaspti no sési kámani Saraini enga no káuenga sapiichani. Indeni ambe jimbo, Sarai no sési kámaspti Agarini ka i sïpakuarhispti (Gén. 16:4-6). Jamberichi eratsejka eska Agari imani ambe nitamakuarhispka jimboka kʼéramakuarhisïrenga. Joperu Jeoba no indeni ambe exespti Agariri. Ánjelini ma axakuspti paraka jarhuatapiringa mójtakurhini ka para újchakurani. Agari kuenta íntskukuarhispti eska Jeoba exexapka ka eska sési mítespka ambe enga nitamakuarhini japka. Ísï jimbo, ima niáraspti uandani eska Jeoba, Tata Diosï máeska enga jingontku exejka (Gén. 16:9-11, 13). ¿Ambe exespi Jeoba, Agariri ambe? Mítespti ambe enga Agari xáni nitamakuarhipkia. Ísïsti, Jeoba no sési exespti enga Agari no janhanharhipka Saraini, peru ístu kurhangukuspti na enga pʼikuarherenga Agari ka ambe enga nitamakuarhini japka. w20.04 16 párr. 8, 9

Apostuli Pablu uandaspti eskachi iámindu jurhimbiti kristianuecha uiriixaka karrerarhu ma jimbo (Ebr. 12:1). No arhiparini na engachi xáni jatirika o na engachi xáni uinhapika, iáminduchi jatsiska para tekaantani kʼamarukuarhu jamberi engachi uéjka jatsini ambe engajtsïni Jeoba aiachijka (Mat. 24:13). Pablu úspti íri ambe uandani jimboka ima kʼamaraspkia karrerani (2 Tim. 4:7, 8). ¿Peru náki karrerani arhikuekaxapi Pablu? Para jukaparhakua ambe jorhentpini, ménisï Pablu úraaspti komu ejemplu imani chʼanakuechani engaksï ióntki Gresia úkuarhienga (1 Kor. 9:25-27; 2 Tim. 2:5). Pablu, someni terukutantaspti kristianueri irekua, karrera ma jingoni (1 Kor. 9:24; Filip. 2:16). Kʼuiripu ma uénasïndi ini karrerarhu uiriini enga aiakukuarhejka Jeobani ka itsï atakuarhini (1 Ped. 3:21). Ka jiáni andasïndi enga Jeoba íntskujka tsípikua para méntkisï (Mat. 25:31-34, 46; 2 Tim. 4:8). w20.04 26 párr. 1-3

“Mintsinharhikuesti juchari Tata engaksïni uinhaperantaaka ka kuájpinksïni para Noambakitini jingoni” (2 Tes. 3:3). Jeobajtsïni íntskusïndi xukuparhakua ma uarhiperakueri engajtsïni uáka kuájchakuni engajtsïni Noambakiti uékaaka no sési úchini (Efes. 6:13-17). I xukuparhakua uiuinhaxesti ka marhuasïndi, joperujtsïni solu jiáni uáti kuájchakuni engachi iámindu ambe jukarini jauaka i xukuparhakueri. Por ejemplu, jónguarhikua o sinturoni jurhimbikueri arhikuekasïndi jurhimbikua ambe enga Tata Diosïri Karakatarhu jaka, Bibliarhu. Jatsiskachi para ini sinturonini jukarini jarhani, jimboka Noambakiti jindeeska “tátemba chkuanderaricheri” (Juanu 8:44). Desde iónisïa Noambakiti chkuanderastia ka támisï jánhastaxati “iámindu parhakpini anapuechani” (Jaŋ. 12:9). Joperu jurhimbikua ambe enga Biblia jorhentpijka uátijtsïni kuájchakuni Noambakitiri chkuanderakuecheri. Engachi jorhenguarhiska jurhimbikua ambe Jeobaeri, mintsita jingoni ka jurhimbikua jingonchi kómarhini ka engachi iámindu ambe jimbo jurhimbitku jámaska, ísïsti komu eska sinturonini jukantani jarhani (Juanu 4:24; Efes. 4:25; Ebr. 13:18). w21.03 26, 27 párr. 3-5

Ambe enga uénga eska ima echeri sánderu sési jándepiringa, jindespti jimboka jima kómarhinhasïrenga Jeoba. Joperu Pentekostesirhu uéxurhini 33 jimbo uératini, ima “Echeri” no meru lugarinisï ma arhikuekajti. Ka no uáti ísïni jimbokaksï Jeobaeri marhuaricha interu parhakpinirhu jarhaska. Sánderu sési, ini jurhiatikuecha jimbo ima Echeri enga “Kánikua Sési Jándeka”, arhikuekasïndi iámindu ambe enga Jeobaeri ireta újka, por ejemplu, kómarhini tánguarhikuecha jimbo ka aianhpikua jimbo. Ini últimu jurhiatikuecha jimbo, nortirhu anapu rei méntku inchaakuxati imani “Echeri jimbo enga Kánikua Sési Jándeka”. Por ejemplu, enga Alemania jindepka nortirhu anapu rei, sánderia jiáni enga úkuarhini japka Segunda Kʼéri Uarhiperakua Interu Parhakpinirhu, inchaakuspti imani “Echeri jimbo enga Kánikua Sési Jándeka” jimboka no sési kaaspka ka uándikuani Tata Diosïri marhuarichani. Enga na nitamapkia Segunda Kʼéri Uarhiperakua jiáni enga Unión Soviética jindepkia nortirhu anapu rei, inchaakuspti imani echeri jimbo, jimboka no sési kaaspka imechani engaksï Jeobani kómarhienga ka enga ísï chútaapka. w20.05 13, 14 párr. 7, 8

Ju je uandaani máru Tata Diosïri amiguechani engaksï irekapka ante de Jesusi uarhini. Abraani, kʼéri jakajkukua ma jatsispti. Nájkiruka jukari mili uéxurhini ísï nitamapkia enga Abraani uarhipka, Jeoba uandaspti eska imeri amiguespka (Is. 41:8). Ísï jimbo, nájkirukaksï kʼuiripuecha uarhijkia, Jeoba útasï ísï exeani jarhasïndi komueska imeri amiguecha. Jeoba útasï miáxati Abraanini (Luk. 20:37, 38). Máteru ambakiti ejemplu jindesti Jobu. Ma xanhari enga Jeoba ánjelicha jingoni tánguarhintatini jápka, uandaspti na enga xáni mintsikenga Jobuni. Ísï uandaspti imeri ambe: “I achamasï ambakiti kʼuiripuesti ka iámindu ambe jurhimbitku úsïndi, kurhajchasïndi Tata Diosïni ka jánguarhintasïndi iámindu ambe sési úni” (Job 1:6-8). ¿Ka ambe eratsesïrendi Jeoba, Danieliri ambe enga sési marhuakupka ma ochenta uéxurhinisï paisi ma jimbo engaksï kʼuiripuecha diosï úkatechani kómarhiauenga? Enga Danieli kánikua jatiripkia, ánjelichaksï tanimu xanhari arhispti eska Tata Diosï kánikua jukaparharasïrenga (Dan. 9:23; 10:11, 19). Sésichi mítetixaka eska Jeoba tsípikua jingoni erokuarhixaka jiáni enga tsítantauaka imeri amiguechani (Job 14:15). w20.05 26, 27 párr. 3, 4

Jamberi ambakiti jorhenguarhiri ma uáti míteni ambe enga juramujka Tata Diosï ka exeni eska sési jarhaska ambe enga ima juramujka. Peru ¿kurhajchaa Jeobani jimboka xénchasïnguia? Ju je miáni ambe enga Eba úpka. Ima mítespti Tata Diosïri juramukuani, peru no xénchasïrendi Jeobani mintsita jingoni ka ístuchi májkueni ambe uáka uandani Adaniri ambe (Gén. 3:1-6). Ísï jimbo, no solu uétarhisïndi eskachi jorhentpiaka ambe engajtsïni Tata Diosï juramuchijka. Jeobaeri juramukuechaksï ambarhatisti ka marhuachesïndijtsïni (Sal. 119:97, 111, 112). Peru jorhenguarhiri jiáni niáraati ini ambe ísï exeni enga na kurhanguakia eskajtsïni Jeoba uékperakua jimbosï juramuchijka ambe ma. Ísï jimbo, úpiringachi kurhamarhini: “Nári exesïni, ¿andijtsïnisï Tata Diosï arhijki eskachi uáka ambe ma ka máteru ambe nómbe? ¿Ambekini jorhendasïni i ambe Tata Diosïri?”. Engachi jarhuataaka paraka ima Jeobani eratseaka ka xénchani imeri nombrini enga xáni kʼéri ambeka, sánderuchi mintsitarhu niárakuaka. Ini ambe úparini, ima no solu jukaparharauati juramukuechani, sino ístu xénchaati Jeobani. Niáraati sánderu mintsikani Jeobani ka uáti tekaantani enga tsʼéjkukuechani jatsiauaka (1 Kor. 3:12-15). w20.06 10 párr. 10, 11

Uétarhisïngachi tekaantskua xarhatani, jimboka kʼuiripu ma kánikua tiempu uétarhinchaaka para ménderu ambakiti pájperakua ma jatsini Jeoba jingoni. Uánikua erachicha engaksï ióni jarharipka kúnguarhikuani, uandasïndiksï eska ante deksï kʼuanhatsentani Jeobaeri kúnguarhikuarhu, orhejtsïkuticha ka máteru kúnguarhikuarhu anapu erachichaksï uánikua xanhari niraspti pʼorhembiani. Asia anapu pirenchi ma enga Nancy arhinhajka, uandasïndi: “Kúnguarhikuarhu anapu pirenchi ma enga juchiti amigueka, kánikuarini jarhuatasti. Ísïreni xénchasïrendi enajki ji jindepirini imeri jingonikua kʼéri. Imarini miátantasïrendi ambakiti ambe engachi márku nitamakuarhipka. Engani aiangukuarhienga na engani pʼikuarherenga, tekaantskua jingondini kurhajchasïrendi ka arhistachesïrendini ambe engani úpiringa úni. Ambakiti amiga maéspti ka méntkisïrini jarhuataspti”. Kurhangukuani máteruechani, ísïsti komueska sïpiata ambe engajtsïni jarhuatajka jiáni engachi no sési pʼikuarherani jarhajka. Máruksï jarharisti kúnguarhikuani jimboka kúnguarhikuarhu anapu erachi ma no sési pʼikuastaspka ka útasïksï ikiaxati ka no sési pʼikuarherani. Jimboksïsï no uéjti Jeoba jingoni kʼuanhatsentani. Jamberiksï eratsejti eskaksï no sési kánhaska. Ka jamberiksï uétarhinchajti eska nema kurhajchauaka ka kurhangukuani na engaksï pʼikuarherajka. w20.06 26 párr. 10, 11

Engari sánderu uánikua tsʼéjkukuechani úska orhepani uérakuani, sánderu fásiliuati parari úni ambe enga sési jaka. Asï mirikurhi eska Noambakitisï újka eska kʼuiripu no no sési exeaka ísku jándikua ambe. Ísï jimbo, andasïngari Noambakitini engari no niárajka ísï eratseni eska kʼuiripu enga no marhuakujka Jeobani. Míteskachi eska Jeobajkusï újka uandani ambe enga no sési jaka. Ka juchachi kánikua jánguarhintasïnga parachi no indeni ambe úni. Peru engachi niárajka kʼamanharhintskua ambe úni, kómarhikua jimbochi aiangusïnga Jeobani (1 Juanu 1:9). Ka enga kʼéri kʼamanharhintskua máejka, orhejtsïkutichanchi kurhakuasïnga eskajtsïni jarhuataaka, jimboka Jeoba imechani erakuaska parajtsïni jarhuatani (Sant. 5:14-16). Peru nóchi jatsipiringa para méntku no sési pʼikuarherani jarhani imani ambe jimbo engachi antesi no sési úka. ¿Andi? Jimboka juchari Táti uékpiti, íntspiska imeri Uájpani parachi úni puáminhantaani juchari kʼamanharhintskuechani. Jeoba ísï úsïndi enga uandajka eska puákuantauaka imechani engaksï no sési ambe úka peru engaksï móantakia. Ísï jimbo, uákachi sési marhuakuni Jeobani (1 Juanu 2:1, 2, 12; 3:19, 20). w20.07 22, 23 párr. 9, 10

Jarhaspti ma tiempu enga Jeoba jandiajku irekapka, joperu no méni jandiajku pʼikuarheraspti. Méntku no ma ambe uétarhinchasïrendi. Peru ístu uékasïrendi eskaksï máteruecha niárapiringa tsípikua jingoni irekani. Ísï jimbo, uékperakua úspti eska uénapiringa kueraani ambe ma (1 Juanu 4:19). Orheta, Jeoba imeri Uájpani kueraspti, Jesusini. Tátsekua, Jesusini úraparini “iámendu ambe [...] kueranhasti” ka ístu uánikua ánjelicha (Kol. 1:16, Táta Diósïri Uandakua Tata Jesukristueri Aiatsperakua [TDU]). Jesusi kánikua sési pʼikuarheraspti imeri Táti jingoni ánchikuarhini (Prov. 8:30). Ka ánjelichajtuksï kánikua tsípispti, jimbokaksï exespka na enga Jeoba ka imeri ambakiti ánchikuarhiri, Jesusi, kueraapka auandani ka Echerini. ¿Nénaksï xarhataspi eskaksï tsípispka? Biblia uandasïndi eskaksï ‘kʼéri ambe arhispka uinhachaparini’, ka seguiriptiksï kʼéri ambe arhini Jeobani iámu ambe jimbo enga kueraapka ka sánderia enga kueraapka kʼuiripuni (Job 38:7; Prov. 8:31). Iámu ambe enga Jeoba kueraaka, xarhatasïndi eska uékpitiska ka jánhastini (Sal. 104:24; Rom. 1:20). w20.08 14 párr. 1, 2

Jeobajtsïni kueraasti parachi xénchpeni ka parachi xénchanhani, ísï jimbochisï no sési p’ikuarherajka ka astajtsïni chérani engachi kurhunhinhajka. Erachi ma karaspti: “Engajtsïni soldaduecha atapka ka no sésijtsïni arhini ka arhintsïni eskajtsïni no sési úchipiringa jimbokani Testiguespka, kánikua chéspka ka ísï pʼikuarheraspka enajkini no ma ambe jukaparhapi”. Nájkirukajtsïni i ambe kánikua no sési pʼikuastajka nójtsïni ísku pakatasïndi engachi kurhunhinhajka, jimboka Jesusi uandaspka eska i ambe úkuarhipiringa. Parhakpini anapuechajtsïni kurhunhisïndi jimbokachi májkueni eska Jesusi nóteruchi parhakpini anapueskia (Juanu 15:17-19). Ísï jimbo, nájkirukachi janhanharhiajka juramutichani nóchi k’éri ambe arhiasïnga imechani, ni imecheri símboluechani, Jeobantkuchisï k’éri ambe arhijka. Juchachi apoiarisïnga eska Tata Diosïjkusï jatsika sésikua para juramukuni kʼuiripuni. Joperu Satanasi ka imeri chúxapatichaksï no jiókuarhisïndi imeri juramukuani (Gén. 3:1-5, 15). Aianhpisïngachi eska Tata Diosïri Juramukuajkusï uáka sési peentani ambe ma ixú parhakpinirhu ka eska nóteru ióndania kʼamajkuauaka imeri ikiatspitichani (Dan. 2:44; Jaŋ. 19:19-21). Íksï ambakiti aianhperakuesti para ima kʼuiripuecha engaksï kaxumbitiika, joperu para no sési úricha nómbe. w21.03 20 párr. 1, 2

Jeoba kánikua jukaparharasïndi ambe engaksï pirenchicha újka kúnguarhikuarhu. Biblia ambakiti ambe uandasïndi uánikua nanakecheri engaksï jaiapanherantapka Tata Diosïni jimbokaksï jánhastispka, mintsikasïrendiksï Jeobani, nóksï chésïrendi, intsimpitisptiksï, ambakiti ambeksï úsïrendi ka tsípikua jingonksï marhuakusïrendi (Luk. 8:2, 3; Uku. 16:14, 15; Rom. 16:3, 6; Filip. 4:3; Ebr. 11:11, 31, 35). Ístu, kóntperata máesti jatsiani uánikua erachichani engaksï jatirikia. Ka jamberiksï iáminduecha úkua jukanchani jati pʼamenchakua ambe jimbo, nájkiruka ísïka, jánguarhintasïndiksï aianhpini na engaksï xáni uáka ka ístuksï jánguarhintasïndi jarhuataani ka arhistakuani máteruechani. ¡Ka uánikua ambechi jorhenguarhisïnga imecheri ambe! Ísïsti, Jeoba kánikua jukaparharaasïndi ka ístu jucha (Prov. 16:31). Ístu, ju je sáni eratsentani uátsïcheri ka tumbiicheri ambe. Para imecha kánikua úkua jukasti orhepani uérakuani tsʼéjkukuechani i parhakpiniri nani enga Noambakiti juramuni jaka. Peru kánikuajtsïni sési pʼikuastasïndi exeani engaksï mókuntajka tánguarhikuecharhu, engaksï uérajka aianhpini ka engaksï no chéjka kuájpini ambe engaksï jakajkujka. Uátsïcha ka tumbiicha, chájtsï kánikua jukaparhakueska Jeobaeri kúnguarhikuarhu (Sal. 8:2). w20.08 22 párr. 9-11

Engachi uénajka aianhpini ka uandani eskachi Jeobaeri testigueska, úpirindi uénani no sési jánhaskuarhini, i ambe arhikuekasïndi eskajtsïni juchari familia ikiacheaka, juchari amiguechajtsïni teresmarhuni ka kʼuiripu no uékani kurhaani ambe engachi aianhpijka. ¿Ambeksïni jarhuataa no chéni? Orheta, miá je eska Jesusi auandarhu uératini orhejtsïkuxaka ini ánchikuarhitani (Juanu 16:33; Jaŋ. 14:14-16). Ístu, jánguarhinta je sánderu mintsikani eskaksïni Jeoba kuidariuaka ísï eskaksïni na aiachika (Mat. 6:32-34). Engajtsï sánderu mintsikaaka Jeobani, sánderujtsï no chéaka. Chájtsï mintsïnharhikua xarhataspka engajtsï aianguapka chári familiani ka amiguechani eskajtsï uénaspkia jorhenguarhini Bibliaeri ambe Jeobaeri testiguecha jingoni ka tánguarhikuecharhu nirani. Ka jamberijtsï uánikua ambe mójtakukia chári irekuarhu parajtsï úni ambe enga Jeoba juramujka. Indeni ambe úparini, xarhataskajtsï eskajtsï mintsikasïnga ka no chéni. Engajtsï seguiriska jánguarhintani no chéni, uákajtsï mintsikani eska Jeoba chánksïni jingoni jauaka nani uéjkijtsï nirani (Jos. 1:7-9). w20.09 4, 5 párr. 11, 12

Rei Asá, ambakiti ejemplujtsïni ma xarhatachesti, jimboka sési úska enga mintsita jingoni mintsikapka Jeobani. Ima no solu jiáni marhuakuspti Jeobani enga kánikua úkua jukapka, sino ístu jiáni enga iámu ambe sési japka. Desde sapichuetini, “Asá, méntkisï marhuakuspti Jeobani iámu mintsita jingoni” (1 Rey. 15:14). Ka xarhataspti ini ambe jimboka úspka eskaksï Juda anapuecha nóteru kómarhiapiringuia diosï úkatechani. Biblia uandasïndi eska kénditaaspka “altarichani diosïcheri engaksï máteru nani ísï anapuepka ka ístu imani lugarichani nani engaksï kómarhiauenga, kʼamajkuaspti pilarichani engaksï kómarhiauenga ka kuáskuaspti postichani” (2 Crón. 14:3, 5). Asta úspti eska imeri mama kʼéri, Maaká, nóteru reinepiringuia jimboka diosïni ma úspka paraka ireta kómarhipiringa (1 Rey. 15:11-13). Asá no solu úspti eskaksï Juda anapuecha nóteru kómarhiapiringuia diosï úkatechani, ístu jarhuataaspti parakaksï ménderu uéntapiringa kómarhini Jeobani. Ka Tata Diosï újchakuraspti Asáni ka úspti eska Juda pínandikua japiringa. Jiáni enga ima juramuni japka, diesi uéxurhini pínandikua jarhaspti imani lugari jimbo (2 Crón. 14:1, 4, 6). w20.09 14 párr. 2, 3

Enga nema jatsijka ambe ma enga kánikua jukaparharajka, ménisï máteru kʼuiripuni patsarasïndi. Por ejemplu, jamberi bankurhu ma patsaati imeri tuminani para no tsïtani o nema sïpakuni. Apostuli Pablu miátantaspti Timoteuni eska jukaparhakua ambe intsïnhaspka: jurhimbikua ambe míteni ambe enga Tata Diosï uéjka úni kʼuiripuecha jimbo. Jeoba ístu mintsikaspti Timoteuni paraka aianhpepiringa “Diosïri ambakiti aianhperakuani” (2 Tim. 4:2, 5). Pablu arhispti Timoteuni eska jukaparharapiringa ambe enga intsïnhapka. Ístu, Jeobajtsïni íntskusti jukaparhakua ambe. Pʼamojperakua jimbo, Jeobajtsïni mítetarasti jurhimbikua ambe enga Bibliarhu jaka. Kánikua jukaparhakuesti i ambe míteni, jimbokajtsïni jorhendasïnga nénachi uá Jeobaeri amigueni ka néna tsípikua jingoni irekani. Engachi niárajka jorhenguarhini ini ambe ka ísï úni, nóteruchi jakajkusïnguia chkuanderakua ambe níteruchi ísku jándikua ambe úni (1 Kor. 6:9-11). w20.09 26 párr. 1-3

Jukaparhakuesti eska jorhenguarhiri exeaka na engachi tsitijka ka jakajkuni ima ambe engachi Bibliaeri ambe jorhentpijka. Inde ambe jimbo jorhenguarhiri sánderu tsitiati ambe enga jorhenguarhini jaka. Jamberichi úpiringa aianguni na engajtsïni marhuacheka Bibliaeri karakatecha juchari irekuarhu. I ambe jarhuataati paraka exeaka eska imantu uáka marhuakuni. Jiáni engachi jorhenguarhini jauaka, ju je aianguni na engaksï máru erachicha úka orhepani uérakuani xarhati uandanhiatechani enga jorhenguarhiri jatsiaka. ¿Úpirini marhuakuni ejemplu ma erachiri enga kúnguarhikuarhu jaka? Jiájkani ju je kurhakuni erachini eskajtsïni pámbetaaka jorhenguarhikuarhu. Engachi ísï úska, jorhenguarhiri exeati na enga xáni sésika ísï úni na engaksï Bibliaeri karakatecha arhijka. Enga kʼuiripu tembuchatini o uambuchatini jaka ka imeri acheeti o uarhiiti no jorhenguarhini jarhani Bibliaeri ambe, ¿andichisï no pʼímarhijki paraka imajtu jorhenguarhiaka? Ístu, ju je pʼímarhini jorhenguarhirini eska aianguaka imeri familiani ka amiguechani ima amberi enga jorhenguarhini jaka (Juanu 1:40-45). w20.10 16 párr. 7-9

José ka Maria, úsptiksï jarhuatani Jesusini paraka jaiapanherantapiringa Tata Diosïni jimbokaksï ísï úspka ambe enga Jeoba arhiajka tátichani eskaksï uáka (Deut. 6:6, 7). José ka Maria, kánikuaksï xénchasïrendi Jeobani ka ambe enga sánderu jukaparhakuepka para imecha, jindespti jarhuataani imecheri sapiichani parakaksï imechajtu májkueni xénchapiringa Tata Diosïni. José ka Maria, erakusptiksï káni engaksï úpiringa Tata Diosïri ambe. Imecheri sapiicha jingoni, mándani semanaksï nirasïrendi sinagogarhu jini Nasareti ka mándani uéxurhinksï nirasïrendi Jerusaleni para Paskuani miántani (Luk. 2:41; 4:16). Jamberi engaksï Jerusaleni nirani jarhenga, jorhendani jarhendiksï Jesusini ka imeri ermanu jémbechani Jeobaeri ireteri ambe ka engaksï xanharu jimbo nirani jarhenga, jamberiksï niárendi imani lugaricharhu engaksï Karakatecharhu uandajka. Engaksï sánderu uánini japka imeri familiarhu, sánderu úkua jukapti para José ka Maria Tata Diosïri ambe úni eskaksï na pʼinderini japka. Joperu engaksï ísï orheta peerapka Jeobaeri ambe, marhuakuaspti jimboka imecheri familia kánikua sési marhuakuxapka Tata Diosïni. w20.10 28 párr. 8, 9

Engachi niuaka pámbetani nemani enga Bibliaeri ambe jorhentpiaka, sési jauati eskachi sési prepararikuarhiakia imani ambe jingoni engachi jorhenguarhiaka. Dorín, prekursori espesiali ma, uandasïndi: “Kánikua sési pʼikuarherasïnga enga ima engareni nirajka pámbetani sési prepararikuarhijka, ísï úsïndi uandani ambe ma enga marhuakuaka jorhenguarhirini”. Ístu i ambe ambakiti ejemplu ma íntskuati jorhenguarhirini, jimboka kuenta íntskukurhiaka eskajtsï sési preparadu nirasïnga. Engajtsï no úska sési jorhenguarhini imani jorhenguarhikuani engajtsï exeaka, tiempu arhuta je parajtsï exeni náki sánderu jukaparhakua ambeski ima jorhenguarhikueri. Kómarhikua kánikua jukaparhakuesti engachi jorhentpini jauaka. Ísï jimbo, jukaparhakuesti eskachi sési eratseakia ambe engachi uandaaka engachi arhinhaaka parachi jucha kómarhikua úni. Ísïchi uáka imani ambe uandani enga jorhenguarhiri uétarhinchaaka (Sal. 141:2). Hanae pirenchi ma enga Japón anapueka miásïndi kómarhikuechani enga pirenchi ma uénga enga pámbetenga imeri jorhentpirini. Uandasïndi: “Exesïrenga eska ambakiti pájperakua ma jatsispka Jeoba jingoni ka ji uékasïrenga ísïni eska ima. Ístu, enga uandenga juchiti nombrini imeri kómarhikuecharhu, úsïrendi eskani sési pʼikuarherapiringa”. w21.03 9, 10 párr. 7, 8

Jesusi aiakuspti apostoli Pabluni eska niárapiringa Roma. Joperuksï máru judiuecha Jerusaleni anapuecha eratsesïrendi jakutsekuni paraksï uándikuni. Jiáni enga Klaudio Lisiasi enga Roma anapu soldaduechani orhejtsïkuauenga mítepka indeni ambe, niraspti jarhuatani. Jirejiresï úspti eskaksï soldaduecha pápiringa Pabluni jini Sesarea. Enga jima japkia, gobernadori Féliksi “juramuspti eskaksï peerapiringa Erodesiri palasiurhu” paraksï kuájchakuni jarhani. Ísï jimbo, judiuecha engaksï uékenga uándikuni Pabluni, nóksï úspti ísï úni (Uku. 23:12-35). Peru iásï Festu niárasptia juramutini jima enga Féliksi japka. Ka jimboka Festu uékasïrenga sési pakarani judiuecha jingoni, kurhamarhispti Pabluni: “¿Uékasïndi níntani Jerusaleni parari jini jusgarinhani iámindu ini ambe jimbo jíndeni japarini?”. Peru Pablu mítespti eska enga Jerusaleni nipiringa úpirindiksï uándikuni. Ísï jimbo uandaspti: “Niuaka aiangukuarhini Sésarini”. Ka Festu arhispti: “Tʼuri uandasïnga eskari Sésarini aiangukuarhiaka jimajkani niuakari Sésarini andarhierani”. Enga Festu Roma axapka Pabluni, imeri ikiatspitichaksï nóteru ambe ma úsptia úkuni (Uku. 25:6-12). w20.11 13 párr. 4; 14 párr. 8-10

Iáminduechachi ménisï jukari no sési pʼikuarherasïnga. Ka ménisï imani ambe jimboesïndi engachi úka antedechi míteni jurhimbikuani o engachi no sési jásï ambe úka jiáni engachi na itsï atakuarhipkia (Rom. 3:23). Ísïsti, nájkirukachi jánguarhintajka méntkisï sési ambe úni, ménisïchi “mámaru ambe jimbo pekadu úsïnga” (Sant. 3:2; Rom. 7:21-23). Nóchi tsitisïnga jukari no sési pʼikuarherani jarhani, peru ísï pʼikuarherani marhuachisïndijtsïni. ¿Andi? Jimbokajtsïni jarhuataaka parachi jurhimbitku jámani ka parachi méntku eratsetini jarhani nóteru méni no sési ambe niátani (Ebr. 12:12, 13). Peruchi útasï úpiringa jukari no sési pʼikuarherani jarhani, nájkirukachi móantakia ka Jeobajtsïni xarhatachenia eskajtsïni puáchintaskia. Jukari no sési pʼikuarherani uátijtsïni kánikua no sési úchini (Sal. 31:10; 38:3, 4). Jimbosï xáni jukaparhakueti eskachi no jukari no sési pʼikuarheraaka. Noambakiti kánikua tsípipirindi engachi ísï eratsepiringa eskachi nóteru uákia marhuakuni Jeobani, joperujtsïni Jeoba no ísï exesïndi (terukutanta je 2 Korintu 2:5-7, 11 jingoni). w20.11 27 párr. 12, 13

Lebita ma niáraspti kánikua kómu pʼikuarherani jimboka uénaspka exeni eska sési nikuasïrenga no sési úrichani ka imechani engaksï kʼéramakuarhenga. No jimboka uékasïrenga no sési jásï ambe úni, sino tsitisïrendi ísï irekani eska imecha (Sal. 73:2-9, 11-14). Ísïksï xarharasïrendi enajkiksï iámindu ambe jatsipi: jatsikuarhekua ambe, tsípikuarhita ambe ka nóksï jatsiani uandanhiatechani. Para lebita nóteru enbidiarpinia ni kómu pʼikuarherani, jatsispti para ísï exeni ambe ma eska Jeoba. Enga ísï úpka, niáraspti pínandikua jatsini ka tsípikua jingoni jámani. Enga Jeobani uandontskuarhekuni japka uandaspti: “Echerirhu, no ma ambe uékasïnga, solu tʼungintku” (Sal. 73:25). Májkueni eska ima, nóchi jatsiska para enbidiariuani no sési úrichani engaksï ísï xarharajka enajkiksï sési irekani jaki. Imecheri tsípikuarhita kʼamakurhiati (Ecl. 8:12, 13). Engachi enbidiariuaska, kómu pʼikuarheraakachi ka astachi jamberi tsïtani juchari pájperakua Jeobani jingoni. Jiájkani, engachi niáraaka ísï pʼikuarherani eska lebita, ju je ísï úni eska ima: ju je imani ambe úni engajtsïni juchari Tata Diosï uékpiti arhijka ka ju je imecha jingoni jarhani engaksï imani marhuakujka. Engachi xénchaska Jeobani sánderu eska máteru ambe, sésichi pʼikuarheraaka ka imani xanharu jimbochi jámaaka enga pájpijka tsípikuarhu para méntkisï (1 Tim. 6:19). w20.12 19, 20 párr. 14-16

Engajtsï kómarhini jauaka Jeobani parajtsï aianguni ambe engaksïni uandanhiatani jaka, jukaparhakuesti diosmaiamukua arhini imani ambakiti ambe jimbo engajtsï jatsika. Eratsentani indeni ambe marhuachiatijtsïni nájkirukachi uandanhiatechani jatsiauaka. Ménisï úkua jukaati aiangukuarhini na engachi xáni no sési pʼikuarherani jauaka. Miá je eskaksïni Jeoba uáka mókuchintani nájkirukajtsï solu uandaaka: “¡Jimboetakua, jarhuatarini!” (2 Crón. 18:31). Mintsika je Jeobani ka no chájkumindu. Jiánisï enga profeta Isaiasi irekapka, ireta Judá kánikua chéxapti eskaksï asiriuecha ataapiringa ka eskaksï niárapiringa imecheri jántspirini, jimboksïsï jarhuajperata kurhakupti Ejiptu anapuechani (Is. 30:1, 2). Jeoba arhiaspti eska indeni ambe jimbo engaksï úpka no sési nikuapiringa (Is. 30:7, 12, 13). Isaiasini jimbo, Jeoba arhiaspti na engaksï úpiringa kuájchakukata jarhani. Isaíasi uandaspti: “Chájtsï uinhapiti jauaka engajtsï no sáni chéska ka engajtsï mintsinharhikua xarhataska” Jeobani jimbo (Is. 30:15b). w21.01 3, 4 párr. 8, 9

Ambe engaksï intsïnhajka erakukatecha jimbokaksï no méni jurajkuska Jeobani, jindeesti paraksï juramutini ka saserdotini Kristuni jingoni auandarhu (Jaŋ. 20:6). Jeoba, Jesusi ka ánjelichaksï kánikua tsípini jauati engaksï 144,000 erakukatecha intsïnhaakaksï tsípikua auandarhu. Enga apostoli Juanu na uandaajkia 144,000 juramutichani ka saserdotichani, ístu exeasïndi máteru ‘uánikua kʼuiripuechani’ engaksï tsípiti pakarajka Armajedonirhu. I grupu no májkuenisti eska primeru grupu, i grupu sánderu kʼésti ka no mítenhasti namuniskiksï (Jaŋ. 7:9, 10). Niraxatiksï “xukuparhakua urapiti jukarini”, i ambe arhikuekasïndi eskaksï no “kʼamanharhintskua jatsi[ska] parhakpini anapu ambe jimbo” enga Noambakitirika ka eskaksï ístu no jurajkuska Jeobani ka Jesusini (Sant. 1:27). Uinhachaparinksï uandasïndi eskaksï pʼímutantskata uéraska imani ambe jimbo enga Jeoba úka ka Jesusi, Tata Diosïri Karichi sapichu. Ístu, jájkirhuksï pásïndi palmeri chkurhi enga xarhatajka eskaksï tsípikua jingoni jiókuarhisïnga imani enga Jeoba erakuka para Juramutiini, Jesusini (terukutanta je Juanu 12:12, 13 jingoni). w21.01 15, 16 párr. 6, 7

Acheeti ma uáti jorhenguarhini ambakiti familieri orhejtsïkuti máeni enga májkueni úraska juramukuani eska Jeoba ka Jesusi. Pori ejemplu, exe je na engaksï xarhatajka kaxumbikua. No nema jarhasti enga xáni jánhastiika eska Jeoba, joperu kurhaasïndi ambe engaksï imeri marhuaricha arhijka (Gén. 18:23, 24, 32). Nájkiruka Jeoba perfektueka, no erokuarhisïndi eskachi jucha perfektueuaka. Sánderu sési, jarhuataasïndi imeri marhuarichani, nájkirukaksï no perfektueka para sési nikuani (Sal. 113:6, 7). Biblia uandasïndi eska Dabidi arhispka Jeobani: “Tʼuri jindeeska engareni jarhuatajka” (Sal. 27:9; Ebr. 13:6). Dabidi mítespti eska iámindu ambe úspka úni, jimboka Jeoba kaxumbitiska ka jarhuataspka. Ju je exeni Jesusiri ejemplu. Jesusi jupandukuaspti imeri chúxapatichani, nájkiruka imecheri Jorhentpiripka. Jesusi uandaspti: “Jimbokaksïni ji íntskuska ejemplu para eska ambe engani ji úka, chájtujtsï ísï uáka” (Juanu 13:12-17). Nájkiruka Jesusi kánikua juramukua jatsipka, no erokuarhisïrendi eskaksï máteruecha marhuakupiringa, sino ima marhuakuasïrendi máteruechani (Mat. 20:28). w21.02 3, 4 párr. 8-10

Tumbiicha, chájtsï uánikua ambe uáka úni. Uánikuajtsï uinhapitiska ka nójtsï sóntku kuatarasïnga. Kánikuajtsï jarhuajpesïnga kúnguarhikuarhu, seguru eskajtsï uánikuecha uéjka marhuani komu orhejtsïkuticheri jarhuajpiricha. Joperujtsï máru úpiringa ísï pʼikuarherani eskaksïni máteruecha ísï exesïnga eskajtsï jukari sapirhatiska o eskajtsï no míteska néna úni ánchikuarhita ma enga jukaparhakueka. ¿Ísïri pʼikuarherasïni? Nájkirukari sapichku jaka, jarhastiksï máru ambe engari uáka úni desde iásï uératini paraksïni kúnguarhikuarhu anapuecha mintsikani ka janhanharhini. Májkueni eska Dabidi, uánikua tumbi sapirhatichaksï mítesti úni ambe ma enga uáka jarhuataani kúnguarhikuarhu anapuechani. Por ejemplu, uánikua erachicha engaksï jatirikia jukaparharasïndiksï enga nema jarhuatajka tabletani úrani o máteru aparatuechani paraksï jandiajku jorhenguarhini Bibliaeri ambe ka paraksï prepararikuarhini tánguarhikuecha jingoni. Ambe engari tʼu mítekuka ini aparatuecheri ambe uáti kánikua jarhuataani. Jánguarhinta paraka chíti Táti auandarhu anapu sési pʼikuarheraaka tʼungini jimbo. w21.03 2 párr. 1, 3; 7 párr. 18

Nájkiruka uarhiiti jindeeka enga sánderu nika eskuela, acheetisï jatsiti para orhejtsïkuni familiaeri jorhenguarhikuani ka para jarhuatani Jeobani marhuakuni (Efes. 6:4). Uarhiiti jatsisti para janhanharhini uámberi juramukuani, joperu imasï mismu jatsiti para jánguarhintani sánderu mintsikani Jeobani. Jatsisti para tiempu arhutani para jandiajku jorhenguarhini Bibliaeri ambe ka para eratsentani ambe enga jorhenguarhijka. I ambe jarhuataati paraka seguiriuaka xénchani ka janhanharhini Jeobani ka tsípikua jingoni irekaati enga seguiriuaka kurhajchani uámbani. Uarhiiticha engaksï janhanharhijka uámberi juramukuani jimbokaksï xénchasïnga Jeobani, sánderuksï tsípikua jingoni irekaati ka eska imecha engaksï no janhanharhijka juramukuani. Ístu, ambakiti ejempluksï ma íntsaasïndi acheetichani ka uarhiitichani engaksï sánderu sapirhatiika ka jarhuajpisïndiksï paraka sánderu ambakiti pájperakua ma jauaka imecheri familiarhu ka ístu kúnguarhikuarhu (Titu 2:3-5). Ini jurhiatikuecha jimbo sánderuestiksï nanakecha engaksï Jeobani marhuakujka (Sal. 68:11). w21.02 13 párr. 21-23

Apostuli Pablu ambakiti ejemplu ma íntspispti ambeski balori jukani ka tekaantani, ménisï chkéni pʼikuarheraspti, peru úspti tekaantani jimboka mintsikasïrenga eska Jeoba íntskupiringa uinhapikua enga ima uétarhinchenga (2 Kor. 12:8-10; Filip. 4:13, TNM). Juchajtuchi uáka ísï uinhapeni ka balori jatsini engachi kaxumbikua jingoni jiókuarhiska eskachi uétarhinchasïnga Jeobaeri jarhuajperata (Sant. 4:10). Uákachi seguru jarhani eskajtsïni Jeoba no tsʼéjkusïnga. Jimbosï Karakata Santiagueri uandajti: “Enga nema terongutanhani jarhajka, asï tantiarie eska Diosïsï teronguntajka, jimboka Diosï no úsïnga teronguntanhani para no sési úni, ka nijtu ima újki terongutpini” (Sant. 1:13). Engachi meru jakajkuska ini ambe sánderuchi andarheraka juchari Táti auandarhu anapuni enga xáni uékpitika. Jeoba no mójtakurhisïndi “níjtu méni ménderueni eratseni” (Sant. 1:17). Ísï eska Jeoba na jarhuataapka primeru siglurhu anapu kristianuechani paraksï orhepani uérakuani tsʼéjkukuechani, juchantsïntu májkueni jarhuataati iásï. Ju je mintsita jingoni kómarhini Jeobani eskajtsïni íntskuaka jánhaskakua, balori ka parachi sánderu mintsikani imani. Jeoba mókuantauati juchari kómarhikuechani. w21.02 31 párr. 19-21

Méntkisï enga Biblieri jorhenguarhiri niuaka tánguarhikuecharhu, ju je xarhatani eskachi uékasïnga jarhuatani ka ísïchi uinhaperantaaka (Filip. 2:4). No inchakukuparini imeri irekuarhu, uákachi sánderu sési míteni engachi kurhamarhiska imeri familieri ambe, imeri ánchikuarhiteri ambe o na enga nikuni jaka imeri jorhenguarhikuarhu. Ístuchi uáka felisitarini engachi exeaka eska mójtakuskia máru ambe. Ísïchi uáka sánhani arhini imeri amigueni ka jarhuatani paraka niáraaka marhuakuni Jeobani ka itsï atakuarhini. Enga jorhenguarhiri mójtakurhini jauakia, ju je jarhuatani paraka kuenta úkuarhiaka kúnguarhikua jingoni. Uákachi ísï úni engachi pʼímarhiska juchinio (Ebr. 13:2). Enga jorhenguarhiri ma uérajkia aianhpini, uákachi pʼímarhini paraka juchantsïni jingoni uéraaka aianhpini. Brasil anapu erachi ma enga Diego arhinhajka, uandasïndi: “Uánikua erachichajtsïni pʼímarhispti parani imecha jingoni uérani aianhpini, ísï úspka sánderuni sési míteani ka sánderuni sési aianhpini. Uánikua ambe jorhenguarhispka ka sánderuni andarhieraspka Jeobani ka Jesusini”. w21.03 12 párr. 15, 16

Jesusijtsïni arhispti eskachi jatsiska para xénchaani juchari ikiatspitichani (Mat. 5:44, 45). Úkua jukasti para ísï úni, joperu Tata Diosïri espiritu santuni jingoni uáti ma ísï úni. Peru ambe enga espiritu santu újka, jindeesti para uékpini ka ióni tekaantani ka sési kámpini ka kaxumbitiini ka pʼíngukuarhini, i ambejtsïni jarhuataati parachi úni tekaantani engachi no sési kánhani jarhajka (Gal. 5:22, 23). Uánikuecha engajtsïni no sési kámenga niárastiksï mójtakukuarhini, jimboka imeri uámba o imeri témba o imeri uájpa o besinu jémba ini kualidadichani xarhataaspka ka uánikuaksï niáraspti Testigu úkuarhini. Ísï jimbo, engachi úkua jukanchani jaka xénchani imechani engajtsïni kurhunhijka juchari jakajkukuecha jimbo, ju je kurhakuni Jeobani eskajtsïni íntskuaka imeri espiritu santuni (Luk. 11:13). Uákajtsï seguru jarhani eska méntkisï sánderu sésiska ísï úni eska Tata Diosï na uandajka (Prov. 3:5-7). Kurhunhperakua kánikua uinhapikua jatsisti, joperu uékperakua sánderu. Kurhunhperakua úsïndi kánikua no sési útspini peru uékperakua úsïndi eskachi sánderu xénchanhaaka. Engachi xarhatajka uékperakua Tata Diosï tsípini pʼikuarherasïndi, ísï jimbo, nájkirukajtsïni ikiatspiticha seguiriuaka kurhunhini juchachi uáka tsípikua jingoni irekani. w21.03 23 párr. 13; 24 párr. 15, 17

Joeliri profesia jimbo, kurhangusïngachi eska profeta, soldaduecheri ambe uandaxapka engaksï uarhipepiringa (Joel 2:1, 8, 11). Jeoba uandaspti eska kʼéri ejersituni ma úrapiringa (Babilonia anapu soldaduechani) para kastigariuani israelitechani engaksï nóteru kurhajchenguia imani (Joel 2:25). Ístu, i profesia uandasïndi eska kʼéri ejersitu enga iretarhu inchakupiringa, norti uératini jurhasïnga, jimbokaksï Babilonia anapuecha jima uératini jupiringa paraksï Israeli inchaakuni (Joel 2:20). Ini soldaduechanksï uánikua chochuecha jingoni terukutantaasïndi engaksï sési organisadu jaka. Joeli arini ambe uandasïndi soldaduecheri: “Mándani acheeti imeri xanharu jimbo nirasïndi. [...] Iámu iretarhuksï inchakusïndi. Karhanharhikuasïndiksï kʼumanchikuechani, bentanecharisïksï inchasïndi komueska sïpari ma” (Joel 2:8, 9). ¿Úsïnchi eranhaskani? Iápurisïksï soldaduecha jarhasti. No nema úsïndi jirikuarhini paraksï Babilonia anapu soldaduecha no uándikuani espada jimbo. Babilonia anapu soldaduechaksï (o kaldeuecha) ísï inchaakuspti Jerusaleni komueska chochuecha, uéxurhini 607 jimbo ante de Jesusi. Biblia arini ambe uandasïndi ambe enga xáni úpka kaldeuecheri rei jini Jerusaleni: “No pʼamojkuaspti tumbiichani ni uátsïchani, jatirichani ni imechani engaksï no uinhapipka” (2 Crón. 36:17). w20.04 5 párr. 11, 12