Febreru

Ju je sánderu sési míteani erachichani. Ju je uandontskuarheni imecha jingoni ante de tánguarhikua uénakuarhini ka enga na kʼamakurhiakia, májku kʼéri uérani aianhpini, ka engachi uáka ísï úni, ju je pʼímarhiani parachi tʼireni. Engachi indeni ambe uáka, jamberichi kuenta íntskukuarhiaka eska pirenchi ma enga ísï xarharajka enajki no nema jingoni uéjki kúnguarhini, jindeska jimboka chésïnga máteruecha jingoni jarhani, eska erachi ma enga kánikua tumina jatsika no tsitisïnga jatsikuarhikua ambe, sino eska tsitisïnga sési kámpini o intsïmpini ambe ma, o eska nema enga sáno méntkisï ióndajka tánguarhikuecharhu niárani, jindeska jimboka imeri familia no uékasïnga eska ima Jeobani marhuakuaka (Job 6:29). Ísïsti, jatsiskachi para sési míteani erachichani ka ambe engaksï nitamakuarhijka. I ambejtsïni jarhuataati parachi sánderu sési kurhangukuani. Peru nóchi jatsiska para méntku ‘iápurisï uékani inchaakurhani’ imecheri irekuarhu (1 Tim. 5:13, TDU). Engachi niáraska sánderu sési míteni erachini o pirenchini ma, uákachi sánderu sési kurhangukuni nájkirukachi no káni tsitiaka na enga jásïka o ambe enga újka. No fásilisti ini ambe úni. Peru engachi újka ambe engajtsïni Biblia arhijka eskachi jatsiska para iáminduechani mintsita jingoni xénchaani, májkuenchi úsïnga eska Jeoba enga xénchaajka ‘iámindu kʼuiripuechani’ (1 Tim. 2:3, 4; 2 Kor. 6:11-13). w20.04 16, 17 párr. 10-12

Ima chúrikua antede Jesusi uarhini, miátantaaspti imeri chúxapatichani eskaksï uékperapiringa máteru ka máteruni jingoni. Ima mítespti eska inde ambe jarhuataapiringa paraksï májku k’éri úkurhintatini jarhani ka únksï tekaantani engaksï parhakpini anapuecha kurhunhiapiringa. Por ejemplu, Tesalonika anapu kúnguarhikua enga desde jiáni uénapka no sési kánhani, enga uénani japka kúnguarhikua úkuarhini, imaksï kristianuecha niáraspti ambakiti ejemplu máeni uékperakueri ka tekaantskueri. Pablu arhiaspti eskaksï seguiripiringa sánderu ka sánderu uékperani (1 Tes. 4:9, 10). Inde uékperakua jarhuataapirindi paraksï sési pʼikuastantaani imechani engaksï kómu pʼikuarherani japiringa ka jarhuatani imechani engaksï no xáni uinhapiti japiringa (1 Tes. 5:14). Ka imaksï kasu úkuspti, jimbosï Pablu ísï ma uéxurhini tátsekua karakuaspti ka arhiaspti eskaksï sánderu ka sánderu uékperaxapkia (2 Tes. 1:3-5). Imecheri uékperakua jarhuataspti parakaksï úpiringa tekaantani imecheri uandanhiatechani ka engaksï no sési kánhani japka. w21.03 22 párr. 11

Parachi úni intsïnhani tsípikua para méntkisï, jatsiskachi para imani xanharu jimbo jámani enga sési jaka o ísï irekani eska Tata Diosï na juramujka (Uku. 20:24; 1 Ped. 2:21). Peru Noambakiti ka imecha engaksï májkueni újka eska ima, uékasïndiksï eskachi jurajkuaka Tata Diosïni ka eskachi imecha jingoni jámaaka (1 Ped. 4:4). Teresmarhusïndijtsïni na engachi irekajka jucha ka uandasïndiksï eska sánderu sésiska ísï irekani eska imecha jimbokaksï úsïnga ambe engaksï imecha uéjka. Peru inde ambe no ísïsti (2 Ped. 2:19). Kánikua jukaparhakuesti eskachi imani xanharuni erakuaka enga sési jaka. Noambakiti uékasïndi eskachi jurajkuaka xanharuni enga no kórhuraka enga tsípikuarhu pájpijka ka eskachi imani xanharu jimbo niuaka enga kórhuraka nani enga sáno iámindu kʼuiripu nirani jaka. Ini xanharu jimbo nirani, sánderu fásilisti peru tsïnchikuarhu pájpisïndi (Mat. 7:13, 14). Engachi no uéjka eskajtsïni támisï paaka imecha engaksï no újka ambe enga Jeoba juramujka, jatsiskachi para mintsikani Jeobani ka kurhajchani. w20.04 26 párr. 1; 27 párr. 5, 7

Ini últimu uéxurhinicha jimbo, Rusia ka juramuticha engaksï imani jingonika, ístuksï inchaakusti imani “Echeri jimbo enga Kánikua Sési Jándeka” (Dan. 11:41). ¿Néna? Uéxurhini 2017 jimbo, Rusia nóteru sésikua íntsaastia Jeobaeri testiguechani paraksï marhuakuni Tata Diosïni ka ónhaasti máru erachichani. Ístu, nóteru jurajkuastia paraksï imprimiriuani ka etsakuani juchari publikasionichani ni Bibliani, Traducción del Nuevo Mundo. Ístu, euantaasti Betelini enga Rusia jaka, Kʼumanchikuechani Reinueri ka Kʼumanchikuechani engaksï Kʼéri Tánguarhikuecha úkuarhijka. Uéxurhini 2018 jimbo, ísï tátsekua enga i ambe úkuarhipka, Grupu enga Orhejtsïkuajka iámindu kúnguarhikuechani niárasti kuenta íntskukuarhini eska Rusia ka juramuticha engaksï imani jingonika, jindeska nortirhu anapu rei. Peru nájkirukajtsïni juramuticha kánikua no sési kámajka, Jeobaeri testiguechachi no ma juramuti jingoni uarhiperasïnga nichi uéjki eska máteru nema juramuaka. Sánderu sési, úsïngachi ambe enga Biblia uandajka, eskachi jatsiska para kómarhijpikuani juramutichani ka sánderia jiáni engaksï imecha eratseni jauaka sintsïni íntskua sésikua parachi Jeobani kómarhini o nómbe. w20.05 14 párr. 9

Táticha, parakaksï chári sapiicha seguru jauaka eska ísïska ambe engaksï jakajkujka, uétarhisïndi eskaksï imecha ambakiti pájperakua ma jatsiaka Tata Diosï jingoni ka eskaksï seguru jauaka eska ísïska ambe enga Biblia jorhentpijka. Engajtsï cha uéjka jorhendaani chári sapiichani Tata Diosïri jurhimbikueri ambe, jatsiskajtsï para cha uénani ambakiti jorhenguarhiricheni Bibliaeri. Arhuta je tiempu parajtsï eratsentani imani ambe engajtsï jorhenguarhijka. Ísïjtsï uáka jorhendaani chári sapiichani paraksï májkueni úni. Exeraa je néna úrani ambe engachi xáni jatsika para Bibliani jorhenguarhini ísï eskajtsï na újka imani kʼuiripuecha jingoni engajtsï Bibliaeri ambe jorhendaajka. Engajtsï ísï uáka, jarhuataantsï jauaka chári sapiichani paraksï xénchani Jeobani ka eskaksï mintsikaaka jántspirini enga mintsinharhikueka ka jánhastiini enga Jeoba úrajka parajtsïni jorhendani ambe ma (Mat. 24:45-47). Asï solu jorhendaa je chári sapiichani ambe enga ma orheta jatsika para jorhenguarhini Bibliaeri ambe. Seguni na engaksï xáni jatirika ka na engaksï xáni uáka jorhenguarhini, jarhuataa je paraksï Tata Diosïri ambe míteni “asta imani jamberi enga sánderu úkua jukaka”, ísï úparini, imechaksï niáraati kʼéri jakajkukua ma jatsini (1 Kor. 2:10). w20.07 11 párr. 10, 12, 13

Ini jurhiatikuecha jimbo, uánikua kʼuiripuecha engaksï kʼamanharhintstika, jatsistiksï ambakiti pájperakua ma Jeoba jingoni. Íksï kʼuiripuecha úsïndi ambakiti pájperakua ma jatsini Jeoba jingoni jimbokaksï mintsikasïnga Jesusiri uarhikuani. Euajpintskua jimbo, Jeobajtsïni íntskusïndi sésikua parachi úni aiakukuarheni imani ka itsï atakuarhini. Engachi ini ambe újka enga xáni jukaparhakueka, úsïngachi imani kristianuecha jingoni kuenta úkuarhini engaksï aiakukuarhikia ka itsï atakuarhini ka engaksï ambakiti pájperakua ma jatsika imani jingoni enga sánderu kʼéri ambeka iámu parhakpinirhu. ¿Nénachi uá xarhatani eskachi jukaparharasïnga ambakiti pájperakua ma jatsini Jeoba jingoni? Májkueni úparini eska Abraani ka Jobu. Imaksï sési marhuakuspti Jeobani jukari sieni uéxurhini jimbo. No arhiparini na engachi xáni ióni páni jakaia Jeobani marhuakuni ini parhakpini jimbo, juchajtuchi jatsiska para májkueni úni. Ístuchi jatsiska para sánderu jukaparharani juchari ambakiti pájperakua Jeoba jingoni ka eska juchari tsípikuani, májkueni eska Danieli (Dan. 6:7, 10, 16, 22). Jeobaeri jarhuajperata jimbo, uákachi tekaantani náki uéjki tsʼéjkukuani ka seguirinchi ambakiti pájperakua ma jatsini Jeoba jingoni (Filip. 4:13, TNM). w20.05 27 párr. 5, 6

Rei Dabidi exespti eska jikuaxapka Bat-Seba enga máteru acheetiri témbepka. Ima mítespti arini Tata Diosïri juramukuani: “Asï tsiti máteru acheetiri uarhiitini” (Éx. 20:17). Peru ima méntku jarhaspti exeni Bat-Sebani. Nóteru iámu mintsita jingoni chénharhixaptia Jeobani. Ima uékasïrendi jatsini imani uarhiitini. Peru ístu uékasïrendi kurhajchani Jeobani. Nájkiruka ióni xénchapkia ka ístu janhanharhini Jeobani, Dabidi úspti ambe enga ima uékapka. Ka indeni ambe jimbo niáraspti kánikua no sési jásï ambe úni. No sési pakataspti Jeobaeri nombrini ka kánikua no sési úkuaspti kʼuiripuechani engaksï no kulpa jatsipka, asta imeri familiani (2 Sam. 11:1-5, 14-17; 12:7-12). Jeoba jurhimberantaspti Dabidini ka ima ménderu úspti ambakiti pájperakua ma jatsini imani jingoni (2 Sam. 12:13; Sal. 51:2-4, 17). Dabidi no méni mirikurhispti na enga xáni no sési nitamakuarhipka ka uandanhiatechani enga niárapka jatsiani enga ísï no iámu mintsita jingoni chénharhipka Jeobani. Ambe enga ima uandapka Salmo 86:11 jimbo, ístu arhikuekasïndi: “Íntskurini mintsita ma enga no tsimani ambe jimbo antsitakuarhiaka”. ¿Mókukuntaspi Jeoba? Jo, jimboka sánderu orhepani Biblia uandasïnga eska Dabidi iámu mintsita jingoni marhuakuspka Jeobani, imeri Tata Diosï (1 Rey. 11:4; 15:3). w20.06 11 párr. 12, 13

Biblia uandasïndi eska Jeoba imeri uékperakuani úrasïnga parachi andarhierani. ¿Néna úsïni i ambe? Ju je ejemplu ma peerani. Eranhaska je eskajtsï kʼéri posurhu ma uekanheska. Posu xáni jauanhesti engajtsï no uáka jandiajku uénhintani. Jiántkujtsïsï uáka uénhintani engaksïni nema sïndari ma jingoni pʼínhantaaka ka jimaksïni páni nani engajtsï uáka sési jarhani. Eska na uandajka iásï anapu tekstu, Jeoba arhiaspti israelitechani engaksï jarharipka eska ima uékperakua jingoni úspka eskaksï ménderu andarhientapiringa. Jeoba májkueni ambe pʼikuarherasïndi imecha jimbo engaksï nóteru marhuakujkia ka engaksï uánikua uandanhiatechani jatsiajka ka no sésiksï pʼikuarherani. Ísïsti enajkiksï imecha posurhu ma uekanhetini jaki enga kánikua jauanhika. Jeoba uékasïndi eskaksï imecha míteaka eska ima kánikua xénchaasïnga ka uékasïndi eskaksï ménderu andarheraaka imani. Ka imajtsïni uáti úrani parachi xarhatakuani imeri uékperakua. Kánikua jukaparhakuesti eskaksï erachicha engaksï jarharika kúnguarhikuani míteaka eska Jeoba xénchaasïnga ka juchajtu ísï. w20.06 27 párr. 12, 13

Enga disipulu Estebani uándikunhapka, uánikua kristianuechaksï sïpakuarhispti Jerusaleni uératini ka “etsandurikuarhispti[ksï] máru para Judea ísï ka máteruecha para Samaria ísï”. Máruksï niáraspti jamberi asta Chipre ka máteruecha asta Antiokia (Uku. 7:58–8:1; 11:19). I kristianuechaksï uánikua uandanhiatechani jatsiaspti. Peruksï útasï seguirispti kánikua tsípikua jingoni aianhpini jimesïsï engaksï niárenga ka jarhuajpesptiksï paraksï jimesïsï jimbanhi kúnguarhikuecha úkuarhini (1 Ped. 1:1). Joperuksï no ixú kʼamakurhispti kristianuecheri uandanhiatecha. Uéxurhini 50 jimbo ísï, Klaudiu Roma anapu juramuti, uandaspti eska nóteru ma judiu úpiringa Roma irekani. I ambe úspti eskaksï judiuecha engaksï kristianu úkuarhipka, jurajkuapiringa imecheri kʼumanchikuechani ka eskaksï nipiringa máteru nanisï irekani (Uku. 18:1-3). Uéxurhini 61 jimbo ísï, apostuli Pablu karaspti eskaksï uánikua erachichani no sési arhiaspka máteruechani japarini, eskaksï ónhaaspka ka eskaksï euakuarhispka ambe engaksï jatsikuarhepka (Ebr. 10:32-34). Ka májkueni eska máteru kʼuiripuecha, máru kristianuechajtuksï pobrispti ka ístuksï pʼamenchasïrendi (Rom. 15:26; Filip. 2:25-27). w21.02 26, 27 párr. 2-4

Enga juchari jakajkukua sési uaxastakata jauaka, ambe uéjki Noambakiti úni o imecha engaksï imani jingonika, no uáti eskachi jurajkuaka jurhimbikuani (2 Juanu 8, 9). Míteskachi eskajtsïni parhakpini anapuecha kurhunhiaka (1 Juanu 3:13). Juanujtsïni miátantasïndi “eskaksï iámindu parhakpini anapuecha Noambakitiri juramukua jimbo jarhaska” (1 Juanu 5:19). Nóteru ióni kuerataxatia paraka kʼamajkunhaaka ambe enga xáni úkuarhini jaka parhakpinirhu, jimbosï Noambakiti sánderu ikiani jati. No solu úrasïndi ísku jándikua ambe ka apostatecheri chkuanderakuechani, sino ístu úsïndi eskachi no sési kánhaaka. Ima mítesti eska no ióni jimbo kʼamajkunhaakia, jimbosï sánderu ka sánderu jánguarhintani jati paraka nóteru aianhpinhaakia Jeobaeri ambe ka eskachi nóteru mintsikaakia Tata Diosïni. Ísï jimbo, nójtsïni ísku pakatasïndi engajtsïni máru paisicharhu nóteru sésikua íntskujkia parachi Jeobani kómarhini. Peru nájkiruka ísïka, juchari erachicha engaksï imani paisicha jimbo jaka, tekaantaxatiksï. Xarhataxatiksï eskachi uáka méntkisï Jeoba jingoni jarhani ambe uéjki engajtsïni Noambakiti úchiaka. w20.07 24 párr. 12, 13

Jeoba uékasïrendi eskaksï kʼuiripuecha irekapiringa para méntkisï sési jásï planeta ma jimbo enga kueraapka. Peru engaksï Adani ka Eba nóteru kurhajchapkia imecheri Táti uékpitini, iámu Echerirhu niáraspti jarhani pekadu ka uarhikua (Rom. 5:12). ¿Ambe úspi Jeoba? Jirejiresï aianhpispti na enga pʼímutantapiringa kʼuiripuni (Gén. 3:15). Eratsespti eska íntspepiringa imeri Uájperi tsípikuani para pʼímutantaani Adaniri ka Eberi uájpechani pekadueri ka uarhikueri. Ini ambe úparini, ústi eska mándani kʼuiripu erakuaka sini marhuakua Jeobani ka irekani para méntkisï o nómbe (Juanu 3:16; 1 Kor. 15:21, 22). Jeoba tsítantauati uánikua kʼuiripuechani imeri Uájpani úraparini. Joperu jamberi nóksï iáminduecha májku tiempu jimbo tsíntaati. ¿Andi? Jimboka no sési ambe úkuarhipiringa enga Echerirhu mátirku niárapiringa uánikua kʼuiripu jarhani. Ka Jeoba uékasïndi eska iámu ambe sési úkuarhiaka. Mítesti eska paraka pínandikua jauaka, uétarhisïnga eska iámindu ambe sési úkuarhiaka (1 Kor. 14:33). w20.08 14 párr. 3; 15 párr. 5

Ima kʼuiripu engachi jorhendani jaka Biblieri ambe jatsisti para kurhanguni eskachi jorhendaxaka paraka niáraaka Jeobaeri testigueni. Jorhenguarhiri jatsisti para uánikua ambe úni enga uékaaka itsï atakuarhini. Orheta, jatsisti para míteni, xénchani ka mintsikani Jeobani (Juanu 3:16; 17:3). Tátsekua, Jeobaeri amigu úkuarhisïndi ka ístu kúnguarhikuarhu anapu erachicha ka pirenchicha jingoni (Ebr. 10:24, 25; Sant. 4:8). Tiempu jingoni nóteru úsïndia no sési jásï ambe ka móantasïndi imeri ambe enga no sési úka (Uku. 3:19). Ístu, aianguasïndi máteru kʼuiripuechani ambe enga ima jakajkujka (2 Kor. 4:13). Ka últimu, aiakukuarhesïndi Jeobani ka itsï atakuarhisïndi (1 Ped. 3:21; 4:2). Inde jurhiatikua, kʼéri tsípikuarhita máesïndi para iáminduecha. Enga jorhenguarhiri imani ambe úni jarhajka enga jarhuataaka para itsï atakuarhini, ju je felisitarini ka pʼímarhini paraka seguirini jauaka ísï úni. w20.10 18 párr. 12, 13

Engachi terukukuarhintaaka máteru erachicha jingoni, jamberichi no uáka exeni eskachi jukaparhakueska. Máru erachichaksï sési jorhentpisïndi, sésiksï úsïndi ambe ma, oksï sési orhejtsïkuni kúnguarhikuani. Ka jamberichi eratsejka eskachi jucha no xáni sési úsïnga ambe ma eska imecha. Inde ambe xarhatasïndi eskachi kaxumbitiska ka eskachi miásïnga eskachi no iámindu ambe úsïnga úni (Filip. 2:3). Peru ju je jingontku jámani. Engachi méntkisï terukukuarhintaska imecha jingoni engaksï ísï mítekateka eskaksï sési úsïnga ambe ma, niáraakachi kánikua no sési pʼikuarherani. Ísï eska na uandapka apostuli Pablu, jamberichi eratseaka eskachi no ma ambe úsïnga úni para kúnguarhikuani jarhuatani. Jeoba íntsaaspti máru primeru siglurhu anapu kristianuechani espiritu santueri uinhapikua paraksï mámaru ambe úni (1 Kor. 12:4-11). Iáminduechaksï jukaparhakuespti. Ísïsti eskachi iásï nóteru intsïnhaskia espiritu santueri uinhapikua para milagruechani uáni, peru no mójtakurhixati ambe enga jimini uandajka. Jamberichi no iáminduecha májkueni ambe újka úni, peru Jeobajtsïni iáminduechani jukaparharasïndi. w20.08 23 párr. 13-15

Engajtsï chá kómarhijka Jeobani parajtsï no chéni. Imaksïni mókuchentaati ka nóksïni méni jurajkuati (Uku. 4:29, 31). Méntikisï jima jauati paraksïni jarhuatani. Eratsenta je na engaksïni Jeoba jarhuatakia parajtsï orhepani uérakuani uandanhiatechani ka jarhuatanksïni parajtsï úni mójtakurhini. Enga Jeoba úpka eska imeri ireta parhikupiringa mari Charhapitini, ístu mintsika je eskaksïni uáka jarhuatani parajtsï Kristueri chúxapatini (Éx. 14:13). Májkueni mintsika je eska salmueri karari enga uandapka ambe enga arhijka iásï anapu tekstu. Jeoba ístu uáti jarhuatani jimbanhi aianhpirini ma. Ju je exeni ambe enga nitamakuarhika pirenchi ma enga Tomoyo arhinhajka. Ima jurhiatikua enga uénapka aianhpini kʼumanchikuecha jimbo, uarhiiti ma uéraspti primeru kʼumanchikuarhu ka uinhachakuspti: “¡No ma ambe uékasïnga míteni Jeobaeri testiguecheri ambe!”, ka uinhamu mikantaspti puertani. Joperu Tomoyo no no sési pʼikuarheraspti ka arhispti imeri kompanierani: “¿Exeskiri? No ma ambe uandaska ka uarhiiti tʼuini mítesptia eskani Jeobaeri testigueska. ¡Xáni sési!”. Iásï, Tomoyo prekursora regularistia. w20.09 6 párr. 13, 14

Asá arhiaspti iretarhu anapuechani eska Jeobaespka enga “pínandikua” íntsaapka iápurisï (2 Crón. 14:6, 7). Peru Asá no eratsespti eska indeni ambe jimbo nóteru xáni jánguarhintapiringuia. Sánderu sési, uénaspti iretechani uáni, kʼérati bardechani, torrechani ka puertechani. Arhiaspti Juda anapuechani: “Paisi útasï juchari jájki jimbo jarhasti”. ¿Ambe arhikuekaspi? Eskaksï úpiringa nani uéjkisï jámani imani echeri jimbo enga Tata Diosï íntsaapka ka konstruirini no sáni chérhiapariani imecheri ikiatspitichani. Ísï jimbo, arhispti iretani eska sési úraapiringa imani jurhiatikuechani enga iámindu ambe sési japka. Ístu imani tiempu jimbo, Asá úspti eska imeri ejersitu sánderu kʼépiringa (2 Crón. 14:8). Peru ¿úspi indeni ambe jimboka no mintsikasïrenga Jeobani? Nómbe, mintsikasïrendi Jeobani. Peru mítespti eska komu rei, jatsispka para úni eska ireta listu japiringa para jiáni enga no sési ambe úkuarhipiringa. Mítespti eska Juda no méntkisï iámu ambe sési japiringa. Ka ísï úkuarhispti. w20.09 15 párr. 4, 5

Orhejtsïkuti ma úpirindi uandani ambe enga úkuarhiaka para kuájchakuani Tata Diosïri karichichani. Joperu kánikua ménderuenisti orhejtsïkuticheri juramukua familieri orhejtsïkuticheri jingoni. Ma jindesti eska Jeoba orhejtsïkutichani íntsaaska ánchikuarhita paraksï ísïni komueska juesicha ka petaantani kúnguarhikuarhu imechani engaksï no móantaaka (1 Kor. 5:11-13). Jeoba familieri orhejtsïkutichani íntsaasti juramukua máru ambe jimbo engaksï orhejtsïkuticha no újka úni. Ma jindesti, eskaksï úsïnga juramuni ambe engaksï jatsika para úni imeri familiarhu anapuecha ka úni eska ísï úkuarhiaka (Rom. 7:2). Por ejemplu, familieri orhejtsïkuti jatsisti sésikua para uandani na engaksï jandora jatsika para niántani uájpecha imeo chúrikua ka ístu jatsisti juramukua para jurhimberantaani engaksï no kurhandiraaka (Efes. 6:1). Familieri orhejtsïkuti ma, jatsisti para uandontskuarheni imeri uarhiiti jingoni antede uandani ambe enga úkuarhiaka, jimbokaksï tsimarhani jindeeska “máechakua kuerpu” (Mat. 19:6). w21.02 16-18 párr. 10-13

Jurhimbikua ambe enga Bibliarhu jaka, jukaparhakuesti jimboka Jeoba imani kʼuiripuechani aianguasïndi engaksï kaxumbitika ka engaksï ambakiti mintsita ma jukaka (Uku. 13:48, TNM). Íksï kʼuiripuecha engaksï kaxumbitika jakajkusïndiksï ambe enga jántsipiri enga mintsinharhikueka ka jánhastini jorhentpijka Bibliaeri ambe ini jurhiatikuecha jimbo (Mat. 11:25; 24:45). Nóchi úpiringa jandiajku jorhenguarhini indeni ambe. Niárani sési kurhanguni jurhimbikua ambe, sánderu jukaparhakuesti eska ambe uéjki (Prov. 3:13 ). Ístu, Jeobajtsïni íntskusti kʼéri kóntperata para máteru kʼuiripuechani jorhendaani imeri ambe ka ambe enga eratseni jaka úni (Mat. 24:14). No ma ambe sánderu jukaparhasti eska i ambe engachi aianhpijka, jimboka jarhuataasïnga kʼuiripuechani paraksï Jeobaeri familia jingoni úkuarhini ka paraksï úni jatsini tsípikua para méntkisï (1 Tim. 4:16). No arhiparini sinchi kánikua aianhpisïni o sánititu, jarhuajpixakachi ini ánchikuarhitani úni enga xáni jukaparhakueka ini jurhiatikuechani jimbo (1 Tim. 2:3, 4). ¡Kʼéri kóntperata máesti Tata Diosï jingoni ánchikuarhini! (1 Kor. 3:9). w20.09 26, 27 párr. 4-5

Enga Roma nirani japka, Jeoba uánikua xanhari jarhuataspti apostoli Pabluni imeri erachichani úrapariani. Pori ejemplu, tsimani Pablueri amigu jémbecha Aristarku ka Lukasï, nirasptiksï pámbetani Roma. Biblia no arhisïndi eska Jesusi aiakuaspka eskaksï sési niárapiringa Roma, peruksï uékaspti Pabluni jingoni nirani nájkirukaksï mítepka eskaksï úpiringa no sési ambe úkuarhinchani. Astaksï jiáni mítespti eskaksï tsípiti pakarapiringa enga xáni kʼéri janini japkia. Ka engaksï na niárapkia kʼéri ireta jimbo jini Sidoni, Julio íntskuspti “sésikua para nirani uandajpaani amigu jémbechani, parakaksï imecha intsïmbipiringa ambe ma enga ima uétarhinchenga” (Uku. 27:1-3). Ka ísï tátsekua, jini ireta Puteoli, Pablu ka imecha engaksï pámbetani japka, erachichanksï máru exeantaspti engaksï arhiapka eskaksï imecha jingoni pakarapiringa ma semana. Engaksï i erachicha jarhuatani japka Pabluni ka imechani engaksï pámbetani japka, kánikuaksï sési pʼikuarherapti imani ambe jimbo enga Pablu aianguapka (terukutanta je Ukuecha 15: 2, 3 jingoni). w20.11 15, 16 párr. 15-17

Taaticha xarhatakua je chári sapiichani imani ambe jingoni engajtsï uandajka ka úni, eskajtsï mintsita jingoni xénchasïnga Jeobani. Ka sánderu ambakiti intsïmperakua engajtsï uáka íntsaani, jindesti jarhuataani paraksï xénchani Jeobani. Ma ambe enga kánikua jukaparhakueka para jorhendaani, jindesti néna engaksï uáka Bibliaeri ambe jorhenguarhini, kómarhikua úni, tánguarhikuecharhu nirani ka Tata Diosïri ambe nirani aianhpini (1 Tim. 6:6). Ísïsti, jatsiakajtsï para íntsaani imani ambe engaksï uétarhinchajka (1 Tim. 5:8). Joperu miá je: ambe enga jarhuatauaka chári sapiichani paraksï tsípiti pakarani ini parhakpinirhu ka únksï jimbanhi parhakpinirhu irekani, jindesti ambakiti pájperakua ma jatsini Jeoba jingoni ka no jatsikuarhekua ambe (Ezeq. 7:19). Kánikuachi tsípisïnga exeani xáni uánikua tátichani engaksï sési erakujka úni ambe ma, parakaksï imecheri familia sánderu andarhieraaka Jeobani. Sáno méntkisï, imecha engaksï ini járhati familiecha jimbo tʼarhexeka, nóksï mirikurhiasïndi imani ambakiti jánguechani engaksï sapichuetini jorhendanhaajka ka kánikuaksï jukaparharasïndi indeni ambe (Prov. 10:22). w20.10 28, 29 párr. 10, 11

Apostuli Pedru ménisï no eratseparini uandasïrendi ka úni ambe ma ka tátsekua pʼamondakuarhini jarhasïrendia. Pori ejemplu, enga Jesusi arhiapka imeri apostulichani eska no sési kánhapiringa ka uándikunhani, Pedru arhispti ambe enga uandajka iásï anapu tekstu (Mat. 16:21-23). Jesusi arhispti eska no ísï eratsepiringa. Engaksï uánikua kʼuiripuecha nípka Jesusini jupikani, Pedru no sáni eratseparini, kʼéri saserdotiri jántspirini ma kutsïkua pʼikuspti (Juanu 18:10, 11). Jesusi ménderu arhispti eska inde ambe no sési jarhaspka. Ístu, Pedru uandaspti eska ima no méni jurajkupiringa Jesusini nájkirukaksï máteruecha kʼóru jurajkupiringa (Mat. 26:33). Joperu Pedru jukari mintsinharhikuarhispti, imani chúrikua jimbo kánikua chéspti ka tanimu xanhari uandaspti eska no mítespka Jesusini. No sési pʼikuarheraparini uéakuntaspti ka kánikua komu pʼikuarheraparini ueraspti (Mat. 26:69-75). Seguru eska kurhamarhikuarhipka sini Jesusi ménisï puákuntapirini. Joperu Pedru seguirispti marhuakuni Jeobani nájkiruka inde ambe no sési pʼikuastapka. Nájkiruka no sési úpka, sési pʼikuarherantaspti ka seguirispti orhepani uérani máteru apostulicha jingoni (Juanu 21:1-3; Uku. 1:15, 16). w20.12 20 párr. 17, 18

Familieri orhejtsïkuti ma, mámaru ambe jimbo uáti xarhatani eska kaxumbitiska. Por ejemplu, no erokuarhisïndi eska imeri témba ka sapiicha iámindu ambe sési uáka. Kurhajchaasïndi ambe engaksï uandaaka iámindu imeri familieri anapuecha, nájkiruka no uékani jauaka eska ísï úkuarhiaka ambe engaksï uandaaka. Ístu, acheeti ma enga kaxumbitika, jarhuajpisïndi úni ambe ma kʼumanchikuarhu, nájkiruka jima enga irekaka, ísï eratsenhaaka eska inde ambe uarhiitisï jatsika para úni. I ambe uáti kánikua úkua jukani. ¿Andi? Pirenchi ma enga Rachel arhinhajka, uandasïndi: “Jima engani anapueka, enga acheeti jarhuataaka témbani jupanhantani o limpiarini, besinuecha ka familiaricha úpirindiksï eratseni eska ima ‘no tatakeska’. Uandapirindiksï eska no úsïnga juramukuni témbani”. Enga májkueni eratsenhajka jima enga chá irekaka, miá je eska Jesusi jupandukuaspka imeri chúxapatichani, nájkiruka ísï exenhenga eska inde ánchikuarhita jántspiricherispka. Familieri orhejtsïkuti ma uandanhiasïndi paraka imeri familia sési jauaka no para sési pakarani máteruecha jingoni. w21.02 2 párr. 3; 4 párr. 11

Ambakiti ambe miántani Jeobaeri intsïmperata máesti; peru, nájkirukachi ambakiti ambe irekuarhika, juchari irekua jimbanhi parhakpinirhu sánderu ambakitiuati. Uátijtsïni nema no sési pʼikuastani, peru engachi puákuntaska uákachi orhepani uérani. Ístu, jukari no sési pʼikuarherani uáti eskachi no tsípikua jingoni marhuakuaka Jeobani. Ísï jimbo, májkueni eska apostoli Pablu jatsiskachi para jakajkuni eskajtsïni Jeoba puáchintaskia (1 Tim. 1:12-15). Jimbanhi parhakpini jimbo engachi erokuarhini jaka, nani engachi irekaaka para méntkisï, nóteruchi méni miáuakia no sési jásï ambe. Biblia uandasïndi eska jiáni, “nóteru miánhantaatia no sési jásï ambe enga ióntki japka” (Is. 65:17). Máruchi ióni páxakaia Jeobani marhuakuni ka jatirinchia; peru eranhaska je, jimbanhi parhakpini jimbochi ménderu sapichkuentaakia (Job 33:25). Ísï jimbo, ju je jánguarhintani no tátsepanisï eraani ka ju je iásï irekani eratseparini ambe enga úkuarhia sánderu orhepani. w20.11 24 párr. 4; 29 párr. 18, 19

¿Ambe úkuarhia sánderu orhepani? K’éri mískuarhitarhu, Jeoba tsimani ambe úraati parajtsïni pʼímutantani. Orheta, pʼímutantauati imeri ambakiti marhuarichani, jiáni enga uáka eskaksï parhakpini anapu reicha kʼamajkuaka k’éri Babiloniani, engaksï jindeeka iámindu relijioni no jurhimbiticha (Jaŋ. 17:16-18; 18:2, 4). Ka máteru, pʼímutantaati imeri iretani jiáni enga kʼamajkuaka Armajedonirhu iámindu Noambakitiri ambe (Jaŋ. 16:14, 16). Engachi no jurajkuska Jeobani, Noambakitijtsïni no uáti imani ambe úchini enga Jeoba no uáka sési peentani. Jeoba kʼamajkuati Noambakitini para méntkisï (Rom. 16:20). Ísï jimbo, ju je jukantani iámindu ambe uarhipetarakueri anapu xukuparhakuani ka ju je no méni pʼíntani. Ju je arhiani erachichani eskajtsïni jarhuataaka ka úni ambe engajtsïni Jeoba arhijka ka no jandiajku uékani orhepani uérani. Engachi ísï úska, uákachi seguru jarhani eska juchari Táti auandarhu anapu enga xáni uékpitiika uinhaperantakajtsïni ka kuájchakuni (Is. 41:10). w21.03 30 párr. 16, 17

¿Nénachi uá xarhatani eskachi mintsinharhisïnga Jeobani? Úparini ambe engajtsïni ima arhijka. Bibliarhuksï uánikua ejempluecha jarhasti, ambarhati ka no ambarhaticha engaksï xarhatajka na enga xáni jukaparhakueka no xáni uandanhiani ka méntkisï mintsinharhini Jeobani. Engajtsï ambakiti ejempluechani jorhenguarhiani jauaka, exe je ambe enga jarhuataapka paraksï no xáni uandanhiani nájkirukaksï no sési nitamakuarhini japka. Apostulichaksï no chérakuarhispti engaksï Judá anapu juesicha juramukuapka eskaksï nóteru jámapiringia aianhpini. Sánderu sési, no sáni chéparinksï uandaspti: “Uétarhisïndi eska jucha sánderu janhanharhiaka Diosïni ka eska kʼuiripuechani” (Uku. 5:29). Nóksï chéspti nájkirukaksï ataapka. ¿Andi? Jimbokaksï mítespka eska Jeoba imecha jingoni jarhaspka ka eska jaiapanheantasïrenga. Ísï jimbo, seguirisptiksï ambakiti ambe aianhpini (Uku. 5:40-42). Májkueni, jiáni engaksï uandikuni japka Estebanini, ima no chéxapti ni uandanhiani ka “ísï eranharhikukuarhisïrendi eska ma ánjeli” (Uku. 6:12-15). ¿Andi? Jimboka seguru jarhaspka eska Jeoba jaiapanhentasïrenga. w21.01 4 párr. 10, 11

I ambe arhikuekasïndi eskaksï no ma kʼamanharhintskua exeminhantaska ka eska Jeoba jaiapanhentaaska (Is. 1:18). Kristianuestiksï engaksï aiakukuarhekia Jeobani, itsï atakuarhini ka engaksï kánikua jakajkujka Jesusiri uarhikuani ka Jeobaeri amiguestiksï (Juanu 3:36; 1 Ped. 3:21). Iámindu ini ambe jimbo úsïndiksï Tata Diosïri orhepani jimbo jarhani “ka marhuakunksï jarhani chúrikua ka jurhiakua” ixú Echerirhu (Jaŋ. 7:15). Iásïksï jánguarhintaxatiia tsípikua jingoni aianhpini ka Jesusiri chúxapatichani uáni, jimboka Tata Diosïri Reinu jindeeska sánderu jukaparhakua ambe para imecha (Mat. 6:33; 24:14; 28:19, 20). Imecha engaksï grupuerika uánikua kʼuiripuecheri seguruksï jarhasti eska Tata Diosï seguirini jauaka kuidariuani enga na nitamaakia kʼéri mískuarhita jimboka Biblia arhisïnga eska “ima enga uaxakatini jaka kʼéri uaxantskuarhu, méntku jauati irekani imecha jingoni”. Ka ístu úkuarhiati i ambe engaksï xáni ióni erokuarhikia máteru karichicha: Tata Diosï “kutsunharhikuauati iámindu uekua” (Jaŋ. 21:3, 4). w21.01 16 párr. 9, 10

Kánikuachi tsípisïnga Jeobaeri kúnguarhikua jingoni kuenta úkuarhini ka jánguarhintasïngachi janhanharhiani imechani enga Jeoba juramukua sáni íntsaaka. Biblia uandasïndi eska para Jeoba tatakecha ka nanakecha májkueni jukaparhakueska. Por ejemplu, uandasïndi eska primeru siglurhu, Jeoba espiritu santu íntsaaspka tatakechani ka nanakechani parakaksï úpiringa milagruechani uáni, komu idiomecha jimbo uandani (Uku. 2:1-4, 15-18). Imani grupuni jimbo engaksï Kristuni jingoni juramuaka, jarhastiksï tatakecha ka nanakecha (Gal. 3:26-29). Májkueni, Jeoba íntsaauati tatakechani ka nanakechani tsípikua para méntkisï ixú Echerirhu (Jaŋ. 7:9, 10, 13-15). Ka Jesusi juramukuaspti tatakechani ka nanakechani paraksï aianhpini ka jorhentpini ambakiti ambe (Mat. 28:19, 20). Por ejemplu, libru Ukuecha jimbo, uandasïndi pirenchiri ma enga Prisila arhinhenga. Ima ka imeri uámba Ákila, sánderu sésiksï aianguspti jurhimbikueri ambe acheetini ma enga kánikua jánhastipka enga Apolosi arhinhenga (Uku. 18:24-26). w21.02 14 párr. 1, 4

Orhejtsïkuticha chájtsï ambakiti ánchikuarhita jatsiska, jorhendaani jorhentpirichani parakaksï ambakiti aianhpiricheuaka ka ambakiti jorhentpiricheni. Enga nema no seguru pʼikuarheraaka jorhendani nemani Bibliaeri ambe jimbokajtsï chá jima jauaka, arhi je eskajtsï chá uáka jorhendani jorhenguarhirini. Orhejtsïkutichaksï kánikua uáti jarhuajpeni para uinhaperaantani ka jarhuataani jorhentpirichani paraksï no kuatantani (1 Tes. 5:11). Nájkirukachi iásï no nemani jorhendani jaka Bibliaeri ambe, uákachi jarhuajpeni paraka nema sánderu andarhieraaka Jeobani. No kánikua uandaparini uákachi jarhuatani jorhentpirini engachi sési eratseska ambe engachi uandaaka jiáni engachi jorhentpini jauaka Bibliaeri ambe. Engaksï jorhenguarhiricha niuaka Kʼumanchikua Reinuerirhu, ju je imecheri amigu úkuarhini ka ambakiti ejemplu máeni para imecha. Ka orhejtsïkutichaksï uáti uinhaperantani jorhenguarhirichani engaksï tiempu arhutaska para imecha jingoni jarhani ka engaksï jorhendaaska ka felisitariuani jorhentpirichani. Kánikuachi sési pʼikuarherasïnga engachi újka sáni jarhuatani nemani paraka niáraaka xénchani ka marhuakuni Jeobani. w21.03 13 párr. 18, 19

Dabidi xarhataspti eska méntkisï úsïrenga ambe enga arhinhenga ka eska mintsinharhikuespka. Por ejemplu, enga tumbi sapichuepka, arhinhaspti eska kuidariuapiringa táti jémberi karichichani ka ima jánguarhintaspti sési úni i ánchikuarhitani, nájkiruka peligrosuepka. Sánisï tátsekua, arhispti rei Saulini: “Ji juchiti tátiri karichichani eranguasïnga. Ma xanhari leoni ma jurhaspti ka páspti karichini ma ka ménderu osu ma jurhaspti ka ístu páspti karichini ma. Ji niraspka andanguani ka ataaspka, ka euamukuantaspka karichichani” (1 Sam. 17:34, 35). Dabidi mítespti eska jatsipka para kuidariuani karichichani. Tumbi sapirhatichaksï uáti májkueni úni engaksï sési úska náki uéjki ánchikuarhita ma engaksï intsïnhaaka. Ístu, desdeka Dabidi tumbi sapichuepka, ambakiti pájperakua ma jatsispti Jeoba jingoni. I ambe sánderu jukaparhakuespti eska imeri balori o na enga xáni sési kústenga arpani. Para Dabidi, Jeoba no solu imeri Tata Diosïspti, sino ístu imeri sánderu ambakiti amigu. Tumbi sapirhaticha, sánderu jukaparhakua ambe engajtsï uáka úni, jindeesti sánderu ambakiti pájperakua ma jatsini chári Táti auandarhu anapu jingoni. w21.03 3 párr. 4, 5