Marsu

Ísïsti, nóchi uékasïnga eskachi no xénchanhaaka o eskachi no sési kánhaaka juchari jakajkukua jimbo. Jiájkani, ¿nénachi úpirini tsípikua jingoni irekani nájkirukachi kurhunhinhaaka? Ju je exeni tanimu ambe. Orheta, jimboka engachi tekaantajka Tata Diosïjtsïni jaiapanhentasïnga (1 Ped. 4:13, 14). Tsimani úni jámani, jimbokachi sánderu mintsikasïnga Tata Diosïni (1 Ped. 1:7). Ka últimu, jimbokachi k’éri kóntperata ma pʼiuaka enga jindeeka tsípikua para méntkisï (Rom. 2:6, 7). Ísï tátsekua, enga Jesusi na tsíntapkia, apostulichaksï kánikua tsípispti ísï eska ima na arhiapka, nájkirukaksï atanhapka ka juramuminhanksï eskaksï nóteru aianhpipiringia, imaksï tsípixapti “jimboka Diosï íntsaaspka sésikua no sési arhinhanksï Kristueri nombri jimbo” (Uku. 5:40-42). Sánderuksï xénchasïrendi imecheri Jorhentpirini ka eska chérhiani imecheri ikiatspitichani ka xarhatasptiksï indeni uékperakuani engaksï no jurajkupka aianhpini ambakiti aianhperakuani. Ini jurhiatikuechani jimbo, juchari erachichajtuksï seguirisïndi marhuakuni Tata Diosïni nájkirukaksï no sési kánhaaka, mítestiksï eska Jeoba no méni mirikurhiaka imecheri ánchikuarhitani ni indeni uékperakuani engaksï xarhataka imeri nombri jimbo. w21.03 25 párr. 18, 19

Erakukatechaksï no andajpenusïndi imani erokuarhikua jingoni paraksï auandarhu nirani irekani, Jeobasï jatsijti para íntskuani indeni erokuarhikuani. Eratsentasïndiksï imani erokuarhikuani engaksï jatsika, uandasïndiksï inderi ambe imecheri kómarhikuecharhu ka tsípikua jingonksï erokuarhixati eskaksï intsïnhaaka imecheri kóntperatani auandarhu. Nóksï jamberi úsïni eranhaskani na enga jáxeaka imecheri kuerpu enga espiritu máeuaka, joperuksï erokuarhixatiia auandarhu anapu Reinurhu jarhania (Filip. 3:20, 21; 1 Juanu 3:2). Máteru karichichaksï erokuarhixati imani ambe engaksï kánikua tsitijka kʼuiripuecha: irekani para méntkisï Echerirhu. Kánikuaksï uékasïndi eska niáraakia ima jurhiatikua paraka interu parhakpini paraisu máeuaka ka únksï úkuarhiani kʼumanchikuechani, ikarani ambe ma ka sésiksï irekani imecheri familiecha jingoni no ma pʼamenchakua jingoni (Is. 65:21-23). Kánikuaksï uékaxatiia iámu parhakpini jimbo nirani, exeani juátechani ka marichani ka sánderu sési míteni Jeobaeri ambakiti kueraakata ambe. Joperu ambe enga sánderu sési pʼikuastajka, jindeesti míteni eskaksï sánderu sési pájperaaka Jeobani jingoni ka eskaksï pauani pauani uáka sánderu andarhierani. w21.01 18, 19 párr. 17, 18

Engaksï Babilonia anapuecha na kʼamajkupkia iámindu ambe imani echeri jimbo, imecha engaksï jimesïsï nitamenga ini ambejkuksï uandasïrendi: “No ma ambe jarhasti, no ma kʼuiripu irekasti niksï animalicha jaki ka kaldeuecheri jájki jimbo jarhasti” (Jer. 32:43). Ma dosientu uéxurhini ísï tátsekua enga Joeli ini profesiani uandapka, Jeoba úspti eska Jeremiasi sánderu ambe uandapiringa i profesieri ambe: eskaksï soldaduecha meru jámapiringa jirinhantaani israelita no sési úrichani ka iáminduechanksï jupiapirindi. Jeremías 16:16, 18 uandasïndi: “Pʼitarkuarhiauaka uánikua kurucha pʼitamatichani —ísï uandasïndi Jeoba—, ka imaksï ísï jupiauati komueska kuruchechani. Tátsekua, uánikua imechani pʼitarkuarhiauaka engaksï animalichani jupiajka, ka imaksï jirinhantauati iámindu juátecharhu ísï paraksï jupiaani asta jimesïsï engaksï kʼerendecha arhakurhika”. Ka ístu uandasïndi: “Íntsauaka ambe engaksï jukanchaka imani ambe jimbo engaksï no sési úka ka imecheri kʼamanharhintskua jimbo”. Ni marirhu ni juátarhu ísïksï úpirini jirikuarhini israelitecha engaksï no móantapiringa. Babilonia anapu soldaduechaksï exeantapirindi. w20.04 5 párr. 12, 13

Ma jurhiani, Loti no jirejiresï kurhajchaspti Tata Diosïni ka indeni ambe jimbo, sáno uarhispti. Jamberichi eratsejka eska Loti no kasu úsïrenga o no uékasïrenga úni ambe enga arhinhani japka. Peru Jeoba no kuatantaspti. Sánderu sési, pʼamojkuspti, ka jimboksïsï ánjelicha jupijkuapti iáminduechani ka jirejiresïksï petantaaspti imani ireta jimbo (Gén. 19:15, 16). ¿Andisï Jeoba pʼamojkupi Lotini? Uánikua ambe jimboepti. Jamberi Loti no jirejiresï uérapti kʼumanchikuarhu jimboka chérhiasïrenga kʼuiripuechani engaksï Sodoma ísï japka. Peru ístu jarhaspti máteru ambe enga jimbo Loti chénga. Seguru eska Loti niárapka míteni ambe enga úkuarhipka jima no iauani, tsimani reichaksï uékanhespti posuecharhu engaksï xunhandeni jásï (alquitrán) jatapka (Gén. 14:8-12). Ístu, jamberi uandanhiendi témbani ka imeri uátsïchani jimbo. Ístu jatsikuarhirispti, ka jamberi ambakiti kʼumanchikua ma jatsipti (Gén. 13:5, 6). Ísïsti, no jatsispti para indeni ambe jimbo no jirejiresï kurhajchani Jeobani. Peru Jeoba no imani ambejkusï exepti ambe enga Loti no sési úpka, sino exespti eska kʼuiripu máespka “enga jurhimbitku jámenga” (2 Ped. 2:7, 8). w20.04 18 párr. 13, 14

Tumbi, jamberi imecha engaksïni desde sapichku míteka, uátiksï úkua jukanchani exeni eskari kʼéskia. Joperu asï mirikurhi eska Jeoba no imani ambejkusï exejka eska ma na xarharajka, imakeni sési mítesti ka ístu ambe engari uáka úni (1 Sam. 16:7). Jánguarhinta sánderu sési pájperani imani jingoni. Dabidi úspti ísï úni, jimboka exesïrenga ambe enga Jeoba kueraapka ka eratsentasïrendi ambe enga jorhendenga inde ambe Jeobaeri (Sal. 8:3, 4; 139:14; Rom. 1:20). Ka máteru ambe, jatsiskari para Jeobani kurhakuni eskakeni íntskuaka uinhapikua. Por ejemplu, engaksïni eskuelarhu anapu kompanieruecha teresmarhuska jimbokari Testigueska, kómarhi Jeobani eskakeni jarhuataaka parari tekaantani. Ístu, jánguarhi ísï úni eskaksï na arhijka ambakiti konsejuecha engaksï Bibliarhu jaka, juchari publikasionicharhu ka bideuecharhu. Méntkisï engari exeaka eskakeni Jeoba jarhuataska uandanhiata ma jingoni, sánderuri mintsikaaka imani. Ka engaksï máteruecha exeska eskari mintsikasïnga Jeobani, imajtuksïni mintsikaati. w21.03 4 párr. 7

Ambakiti amiguechaksï tsitisïndi aianhperani ambe ma ka ístu na engaksï pʼikuarherajka. Májkueni ambe úkuarhisïndi juchari ambakiti pájperakua Jeoba jingoni. Ima úrasïndi imeri Karakatani parajtsïni uandajpani ka indeni jimbojtsïni aiangusïndi ambe enga eratsejka ka pʼikuarherani. Ka juchachi kómarhikua jimbo uandajpasïnga imani. Engachi kómarhijka, úsïngachi aianguni ambe engachi eratsejka ka ambe engachi pʼikuarhinhejka mintsitarhu. Ima, amigu máesti engajtsïni xénchajka, jimbosï no solu kurhauajti juchari kómarhikuechani, ístu mókuantasïndi. Ménisïjtsïni sóntku mókucheantasïndi kómarhikuechani. Peru ménisïchi jatsisïnga para méntku kómarhini jarhani. Néna uéjkini, uákachi mintsikani eskajtsïni Jeoba mókuchentaaka jiáni engachi uétarhinchani jauaka ka na enga ima sési exeaka. Jamberi mókuntskua no jindeuati ima engachi jucha erokuarhini japka. Por ejemplu, jamberijtsïni no kénditachiati tsʼéjkukua ma, perujtsïni íntskuati jánhaskakua ka uinhapikua parachi úni tekaantani (1 Kor. 10:13). ¿Nénachi uá xarhatani eskachi jukaparharasïnga ini kʼéri intsïmperakuani enga jindeka kómarhikua? Arini ambe úparini engajtsïni Tata Diosï arhijka: “Méntku jauena je kómarhini” (1 Tes. 5:17). w20.05 27, 28 párr. 7, 8

Imecha engaksï karrerarhu ma jimbo uiriini jaka, méntkisïksï orhepani ísï eraani jarhasïndi paraksï no téksarhutani. Engaksï kuarhatsejka, jauarasïndiksï ka ménderuksï uéntasïndi uiriini. Nóksï masi arhisïndi eratseni andiksïsï téksarhuta, sánderu sési, uékasïndiksï karrerani kʼamarani ka andani ambe engaksï intsïnhaaka. Ini karrera jimbo engachi kristianuecha nirani jaka, jamberichi someni téksarhutaaka ambe ma jimbo engachi uandaaka o no sési úni, o jimboka erachi ma no sési ambe uáka ka no sésijtsïni pʼikuastani. Nóchi jatsiska para no sési exeni ini ambe, jimbokachi iáminduecha kʼamanharhintstiska ka imani xanharu jimbochi uiriixaka enga no kórhuraka ka enga tsípikuarhu pájpijka. Ísï jimbo, ménisïchi no úsïnga sési pájperani máteruecha jingoni ka ístujtsïni ménisï juchari erachicha niáraati no sési pʼikuastani (Kol. 3:13). Peru ju je no imantku ambe eratseni ambe engachi no sési exeka, sino kóntperatani engachi intsïnhaaka ka ménderu uéntani uiriini. Ju je no kuarhatsetini pakarani, no sési pʼikuarheraparini ni uandauandamiparini jimbokachi ísï no uáka kʼamarani karrerani ni andani kóntperatani. Ka jamberichi úpiringa ójkutaani imechani engaksï jánguarhintani jaka uiriini imani xanharu jimbo enga tsípikuarhu pájpijka. w20.04 26 párr. 1; 28 párr. 8, 9

Profeta Danieli kʼéri monumentueri ambe uandasïndi enga mámaru jásï tiámu jingoni úkata jaka. Mándani parti i monumentueri, arhikuekaasïndi parhakpinirhu anapu juramukuechani engaksï niárapiringa no sési kámani Tata Diosïri iretani. Jantsiricha tiámueri ka atsïmueri, arhikuekasïndiksï últimu juramukuani: Gran Bretaña ka Estados Unidos. Profesia uandasïndi eskaksï útasï juramuni jauaka jiánisï enga Tata Diosïri Reinu kʼamajkuaka iámindu parhakpinirhu anapu juramukuechani. Ístu apostuli Juanu uandasïndi máru juramukuecheri engaksï niárapka no sési kámani Jeobaeri iretani. Imeri profesiecha ísï xarhataasïndi ini juramukuechani komueska animali ma enga siete éjpuechani jukaaka. Éjpu siete i animaliri, arhikuekasïndi Gran Bretaña ka Estados Unidos engaksï kánikua juramukua jatsika interu parhakpinirhu. I ambe jukaparhakua ambesti jimboka i jindeska últimu éjpu, nóteru jauatia máteru. Éjpu siete útasï juramuni jauati jiáni ísï enga Kristu ka iámu imeri ejersitu auandarhu anapu ánjelicheri kʼamajkuaka ini éjpuni ka iámindu animalini (Jaŋ. 13:1, 2; 17:13, 14). w20.05 14 párr. 11, 12

Míteskachi eska Tata Diosï kueraaska tsípikuani, joperu i namunitu uandakuechajtsïni miátantasïndi eska uékperakua imani jimboeska. Jeobajtsïni xénchasïndi, ka imeri uékperakua úsïndi eskachi seguru pʼikuarheraaka, tsípini ka eskachi sési pʼikuarheraaka. Para kristianuecha, juramukua máesti uékperakua xarhatani, no ambe ma engaksï uáka erakuni úni (Mat. 22:37-40). Engachi sánderu mítejka Jeobani sánderuchi no úkua jukanchasïnga úni ambe enga uandajka primeru juramukua ka úsïngachi úni ini ambe jimboka Jeoba perfektueska ka méntkisïjtsïni sési kámasïndi ka xarhatachesïndijtsïni eska uandanhiasïnga juchantsïni jimbo. Joperuchi úpiringa sánderu úkua jukanchani kurhajchani segundu juramukuani. ¿Andi? Jimboka erachicha ka pirenchichaksï no perfektueska ka úpirindiksï úni o uandani ambe ma engajtsïni no sési pʼikuastaaka. Ini ambe eratseparini, Jeoba ústi eskaksï máru engaksï Bibliani karaka uandapiringa néna ka andisï uétarhijki uékperakua xarhatatsperani. Ma jindeespti apostoli Juanu (1 Juanu 3:11, 12). w21.01 8 párr. 1, 2

No arhiparini engachi ióni o sánititu páni jaka Jeobani marhuakuni, jatsiskachi para kurhamarhikuarhini: “¿Jánguarhintaxaki orhepani uérani paraka Noambakiti no uáka eska juchiti mintsita tsimani ambe jimbo antsitakuarhiaka?”. Por ejemplu, ¿ambechi úsïni engachi exejka telebisionirhu o Internetirhu o pelikula ma jimbo enga uérajka ambe ma enga uáka úni eskachi ísku jándikueri ambe eratseni jauaka? Jamberichi úpiringa eratseni eska inde ambe no ísku jándikueri ambeska. Peru, ¿úpirini Noambakiti úrani jarhani indeni ambe parachi no iámu mintsita jingoni janhanharhini Jeobani? I ambe sáno májkuenisti komueska jacha ma enga nema úrajka para chkari arhakuni. Jamberi sánhani arhiati arhakuni ka ísï jámani, chkari niáraati arhukurhini. Uákachi terukutantani jacha ma jingoni ini ikichakueni járhati imajenichani. Jamberi uénani jámani, uáti ísï xarharani eska no no sési jarhaska exeani ini járhati imajenicha, joperu sóntkuksï uáti eskachi no sési jásï ambe niátaaka ka únksï eskachi nóteru jatsiakia ambakiti pájperakua ma Jeoba jingoni. Ísï jimbo, ju je no jurajkuni eska juchari mintsitarhu ikichakueni jásï ambe jauaka. Ju je jánguarhintani parachi iámu juchari mintsita jingoni janhanharhini Jeobaeri nombrini. w20.06 11, 12 párr. 14, 15

Engaksï na kʼuanhatsentajkia, ima erachicha engaksï jarharipka kúnguarhikuani, útasïksï uétarhinchani jarhasïndi eskachi jarhuatauaka ka uinhaperantaani (Luk. 15:17-24). Jamberiksï útasï kánikua no sési pʼikuarherani jauati, ísï komueska ima uájpa enga tsïnchintapka enga Jesusi uandantapka. Ka jimbokaksï Noambakitiri parhakpini jimbo junguaxaka, nóksï jatsisïndi ambakiti pájperakua ma Jeoba jingoni. Ísï jimbo, jatsiskachi para jarhuataani paraksï ménderu uénani mintsikani Jeobani. Jesusi uandasïndi eska enga karichi eranguti exentajka imani karichini enga tsïtapka, kamanharhisïndi ka máteru karichicha jingoni pántasïndi. Karichi eranguti úrastia tiempu ka uinhapikua para jirinhantani. Peru ístu mítesti eska jatsiska para jarhuatani jimboka ima no uáka jandiajku kʼuanhatsentani (Luk. 15:4, 5). Jamberichi jatsiaka para kánikua tiempu ka uinhapikua úrani parachi jarhuataani imechani engaksï jarharika kúnguarhikuani paraksï ménderu ambakiti pájperakua ma jatsini Jeoba jingoni. Ísï jimbo, engajtsïni orhejtsïkuticha arhiaka parachi jarhuatani nemani enga jarharika kúnguarhikuani, ju je tsípikua jingoni ísï úni. w20.06 28 párr. 14, 15

Iáminduechachi jatsiska para xarhatani imani uékperakuani engaksï jimbo mítenhantajka jurhimbiti kristianuecha. Peru ístuchi uétarhinchasïnga “míteni ambe enga ísïka ka enga sésika para úni” (Filip. 1:9). Engachi no ísï úska, úpiringachi jurajkutakuarheni eskachi “sánisï ambe jimbo umbarhinhaaka ka jakajkutaranhanchi nákinterku ma jásï jorhenguani engaksï kʼuiripuecheri eratsekua jimbo úkateka”, por ejemplu apostatecheri (Efes. 4:14). Primeru sigluni engaksï uánikua Jesusiri chúxapaticha jurajkupka Jesusini, apostuli Pedru uandaspti eska Jesusi jatsiaspka “uandakuechani engaksï jindeka para tsípikua méntkisï jatsini” (Juanu 6:67, 68). Nájkiruka jiánisï Pedru nótki sési kurhanguenga ambe engaksï xáni arhikuekenga ima uandakuecha, no jurajkuspti Jesusini jimboka kurhangusïrenga ambe enga ísïpka Kristueri ambe. Engachi juchajtu jánguarhintaaka sánderu seguru jarhani eska ísïska ambe enga Biblia jorhentpijka, méntkisïchi mintsikaaka Jeobani nájkirukachi tsʼéjkukua ambe jatsiaka ka jarhuatauakachi máteruechani paraksï imechajtu kʼéri jakajkukua ma jatsini (2 Juanu 1, 2). w20.07 8 párr. 2; 13 párr. 18

Uákachi jarhuataani erachichani paraksï jurhimbikuarhu jarhani engachi pʼamojpitiska (1 Juanu 3:10, 11, 16, 17). Jatsiskachi para iáminduecha xénchperani jiáni engachi sési nitamakuarhini jauaka ka ístu engachi no sési nitamakuarhini jauaka. Por ejemplu, ¿míteskichi erachini o pirenchini ma enga uarhiranchaka nemani ka uétarhinchani jarhani parachi sési pʼikuastantani o parachi máteru ambe jingoni jarhuatani? ¿Míteskichi eska nani no sési ambe úkuarhiska ka erachichaksï uétarhinchani jarhani jarhuajperata para ménderu uántani imecheri kʼumanchikuechani o Kʼumanchikuechani Reinueri? Ambakiti uékperakua ka pʼamojperakua engachi erachichani jimbo pʼikuarherajka, xarhatasïngachi úkuecha jingoni ka no solu uandakuecha jingoni. Engachi xarhatajka eskachi uékperasïnga, májkuenchi úni jarhasïnga eska juchari Táti auandarhu anapu enga xáni uékpitika (1 Juanu 4:7, 8). Ma ambe engachi uáka úni para xarhatani uékperakua, jindesti puátspentani. Por ejemplu, engajtsïni nema no sési pʼikuastajka, uékperakua uáti eskachi puákuntaaka ka mirikurhini ambe enga úka (Kol. 3:13, TNM). w20.07 24, 25 párr. 14, 15

¿Táchanisïchi jorhendaua kʼuiripuechani engaksï tsíntaaka ísï eskachi iásï na jorhendajka nemani Bibliaeri ambe? ¿Axanhaaksï kúnguarhikua ma jimbo ka arhistaminhaaksï paraksï ístu máteruechani jorhendaani engaksï tátsekua tsíntaaka? Jatsiskachi para erokuarhini para indeni ambe míteni. Ambe engachi kʼóru míteka, jindesti eska enga Jesusi kʼamarani jauakia Juramuni Mili Uéxurhini, iámu ‘echeri meru uiniati Jeobaeri mímixekua’ (Is. 11:9). ¡Kánikua ánchikuarhitachi jatsiaka imani mili uéxurhini jimbo! Imani mili uéxurhini jimbo, iámindu Jeobaeri marhuarichaksï jatsiati para seguirini jarhani mójtakurhini paraksï jaiapanherantani Jeobani. Ísï jimbo, kurhangukuauatiksï imechani engaksï tsíntaaka jiáni engaksï jarhuataani jauaka paraksï nóteru no sési ambe eratsenia ni úni ka ísïksï irekani eska Jeoba na uéjka (1 Ped. 3:8). Engaksï i kʼuiripuecha exeaka eskaksï Jeobaeri marhuaricha kaxumbitiska ka eskaksï ístu jánguarhintaxaka mójtakurhini para Jeobani jaiapanherantani, imechajtuksï uékaati kʼéri ambe arhini Tata Diosïni (Filip. 2:12). w20.08 16 párr. 6, 7

Engachi úska ambe enga apostoli Pablu uandaka ka engachi jánguarhintaaka exeni ambe engachi újka, jamberichi uénaaka exeni eskachi úsïnga úni ambe ma engaksï máteruecha no újka úni. Por ejemplu, jamberi kúnguarhikuarhu anapu orhejtsïkuti ma no újti xáni sési arhijtsïkpini eska máteruecha, peru kʼóru jarhuataasïndi kʼuiripuechani paraksï Jesusiri chúxapatini. O jamberi no xáni sési újti ambe ma ísï eskaksï máteru orhejtsïkuticha, peru kʼóru ísï mítekateni eska uékpitiska ka orhejtsïkuti máeni engaksï erachicha újka andarhierani paraksï Bibliaeri konseju ma kurhakuni. O jamberi ísï mítekateni eska sési kaasïnga iáminduechani (Ebr. 13:2, 16). Engachi sési mítetini jauakia ambe engachi újka sési úni, sésichi pʼikuarheraaka imani ambe jimbo engachi kúnguarhikuarhu újka. Ka ístu, nóchi enbidia pʼikuarheraaka imani ambe jimbo engaksï máteruecha sési újka ka jucha nómbe. Náki uéjkichi ánchikuarhita úni kúnguarhikuarhu, iáminduechachi jatsiska para jánguarhintani sánderu sési marhuakuni Jeobani ka sánderu sési jorhentpini. w20.08 24 párr. 16-18

Erachi Joseph Rutherford, ambakiti arhijtsïpkerata ma nitamataraspti enga arhinhenga “La grande muchedumbre”, kʼéri tánguarhikuarhu ma jimbo jini Washington (Estados Unidos) 1935 jimbo. Imeri arhijtsïkperata jimbo, erachi Rutherford uandaspti néksï jindeepirini ima ‘uánikua kʼuiripuecha’ enga Jaŋaskuecha 7:9 arhijka. Asta ima jurhiatikua jamberi, Bibliaeri jorhenguarhirichaksï eratsesïrendi eskaksï i grupueri kʼuiripuecha, ístuksï auandarhu nipiringa peru eskaksï no xáni sési marhuaxapka eska erakukatecha. Erachi Rutherford úraspti Bibliani para xarhatani eska inde uánikua kʼuiripuecha nóksï erakukateska paraksï auandarhu nirani, sánderu sési, eskaksï jindeeska máteru karichicha Kristueri engaksï tsípiti pakaraaka kʼéri mískuarhitarhu ka engaksï Echerirhu irekaaka para méntkisï (Jaŋ. 7:14). Jesusi i ambe aiatspespti: “Ístuni jatsiaska máteru karichichani engaksï no ini korraliru anapueka, ka uétarhisïndi eskani imechantu juanguauaka. Ka kurhaatiksï juchiti uandakuani, ka ísïksï májku úkuarhintaati iáminduecha, ka ístu solu máechakua karichi eranguti jauati” (Juanu 10:16). I grupu jindeestiksï Jeobaeri testiguecha engaksï sési marhuakujka Tata Diosïni ka engaksï erokuarhini jaka Echerirhu irekani para méntkisï enga na paraisu máeuakia (Mat. 25:31-33, 46). w21.01 14 párr. 1, 2

Kristianuechachi jatsiska para kánikua jánguarhintani engachi uéjka tekaantani asta kʼamarani juchari ánchikuarhitani (Mat. 28:19, 20). Kʼuiripuechachi no pʼindeska jandiajku jánguarhintani, sino imani ambechi úsïnga enga no xáni úkua jukajka. Para ma jandiajku jánguarhintani, uétarhisïndi eskachi pʼíngukuarhiaka. Ísï jimbo, engachi uéjka úni imani ambe engachi úkua jukanchajka, uétarhinchasïngachi jarhuajperata. Ka Jeobajtsïni jarhuatasïndi imeri espiritu santu jimbo (Gal. 5:22, 23). Apostuli Pablu kʼuiripu máespti enga jandiajku jánguarhintenga, peru uandaspti eska jatsisïrenga para kastigarini imeri kuerpuni para imani ambe úni enga sési jaka (1 Kor. 9:25-27). Arhiaspti kristianuechani eskaksï kánikua jánguarhintapiringa ka eskaksï úpiringa “iámindu ambe eska na terukuntajka ka eska namindu jindeka” (1 Kor. 14:40). I ambesï uétarhijti para Tata Diosïni marhuakuni ka méntkisï uérani aianhpini ka jorhentpini (Uku. 2:46). w20.09 6 párr. 15-17

Ini jurhiatikuecha jimbo, úsïngachi uápurisï aianhpini. Engachi paisi ma jimbo irekani jaka nani engachi sésikua jatsika ini ambe úni, ju je kurhamarhikuarhini: “¿Jánguarhintaxaki na engani xáni uáka aianhpini?”. Ini últimu jurhiatikuecha jimbo, Jeobaeri kúnguarhikua kánikua jánguarhintaxati aianhpini, ísï eska no méni. ¡Xáni ambakiti ambe, kánikuachi ánchikuarhita jatsiska Jeobaeri marhuaricha! Engachi irekani jaka jurhiatikuecha jimbo enga pínandikua jaka, ¿nénachi uá sési úrani ini tiempuni? (2 Tim. 4:2). Ju je sési eratsentani sini jucha o juchari familiarhu anapu ma úpirini sánderu jánguarhintani aianhpini asta prekursori úkuarhini. No tiempuesti para tumina o jatsikuarhekua ambe tánani jarhani jimboka i ambe no marhuauaka kʼéri mískuarhitarhu (Prov. 11:4; Mat. 6:31-33; 1 Juanu 2:15-17). Uánikua aianhpirichaksï máteru idioma jorhenguarhisti paraksï aianguani ka jorhendaani máteru kʼuiripuechani Tata Diosïri ambe. Ka paraksï úni ini ambe úni, Jeobaeri kúnguarhikua petaaxati sánderu ka sánderu uánikua publikasionichani engaksï Bibliarhu pʼitakateka. w20.09 16 párr. 9-11

Ambakiti soldadu ma mintsinharhikuesïndi. Kánikua jánguarhintasïndi kuájchakuni nemani enga xénchajka o imani ambe enga jukaparharajka. Pablu pʼímarhispti Timoteuni paraka Tata Diosïntku kómarhipiringa, i ambe arhikuekasïndi eska xénchapiringa ka méntkisï janhanharhini (1 Tim. 4:7). Engachi jánguarhintaska sánderu xénchani Tata Diosïni, sánderuchi no méni uékaaka jurajkuni jurhimbikuani (1 Tim. 4:8-10; 6:6). Ístu, ambakiti soldadu ma jatsisti para jánguarhintani enga uéjka úni imeri ánchikuarhitani. Ka Timoteu úspti ambe enga Kristueri soldadu ma jatsika para úni, jimboka kurhajchaspka Pabluni, jánguarhintaspti ambakiti kristianu máeni, erachicha jingoni kúnguarhini ka no úni imani ambe enga no sési jaka. (2 Tim. 2:22). Ka para ísï úni, jatsispti para kánikua jánguarhintani. Ka juchajtuchi jatsiska para kánikua jánguarhintani parachi no úni ambe enga no sési jaka (Rom. 7:21-25). Ístu, jatsiskachi para jánguarhintani engachi uéjka jurajkuni ambe engachi antesi uénga parachi úni jimbanhi kʼuiripu máeni (Efes. 4:22, 24). Ka jiáni engachi kuataratini jarhajka jimbokachi chúskutaska ánchikuarhini, jamberichi jatsiaka para kánikua jánguarhintani tánguarhikuarhu nirani (Ebr 10:24, 25). w20.09 28 párr. 9-11

Tekaantskua uétarhisïndi para jarhuatani jorhenguarhirini ma paraka niáraka aiakukuarheni Jeobani ka itsï atakuarhini. Peru ístuchi jatsiaka para exeni sini jorhenguarhiri uékasïni marhuakuni Jeobani o nómbe. ¿Xarharasïni eska jánguarhintaxaka ísï úni eskajtsïni Jesusi na juramuchika? ¿O solu jorhenguarhixaki jimboka ambakiti ambe jorhenguarhisïnga Bibliarhu? Ju je exeni sini jorhenguarhiri úxaki ambe ma para Jeobani marhuakuni. Por ejemplu, ¿uandasïni ambe enga pʼikuarherajka Jeobani jimbo? ¿Kómarhisïni? (Sal. 116:1, 2). ¿Tsitisïni arhintani Bibliani? (Sal. 119:97). ¿Sáno méntkisï nirasïni tánguarhikuecharhu? (Sal. 22:22). ¿Jánguarhintaxaki úni ambe enga jorhenguarhini jaka para mójtakurhini? ¿Uénaxakia aianguni imeri familiani ka amiguechani ambe enga jorhenguarhini jaka? (Sal. 9:1). Ka ambe enga sánderu jukaparhakueka, ¿uékasïni Jeobaeri testigueni? (Sal. 40:8). Enga no úni jaka ini ambe, ju je iatsitakuarhu kurhamarhini andisï no ísï úni jaki ka uékperakua jingoni uandontskuarhekuni inderi ambe joperu jurhimbikua jingoni. w20.10 18 párr. 14, 15

Jesusiri Táti jémba enga auandarhu jaka, méntkisï sési erakusti úni ambe ma ka imeri táticha parhakpinirhu anapuecha ístuksï sési erakuspti úni ambe ma. Joperu eska na kʼépani japkia Jesusi, imajtu jatsispti para erakukuarhini ambe enga úpiringa (Gal. 6:5). Májkueni eska jucha, Jesusi úsïrendi erakukuarhini ambe enga uékapiringa úni. Úpirindi erakuni úni ambe enga ima uékapiringa úni, peru erakuspti sési pájperakua ma jatsini Jeoba jingoni. Enga Jesusi kurhangupka ambe enga jimbo Tata Diosï axapka, jiókuarhispti ísï úni (Juanu 6:38). Mítespti eska uánikua kʼuiripu kurhunhipiringa ka seguru eska inde ambe no xáni sési pʼikuastapka. Joperu erakuspti Jeobani kurhajchani. Enga itsï atakuarhipka, uéxurhini 29 jimbo, ambe enga sánderu jukaparhakuepka para ima, jindespti úni ambe enga imeri Táti jémba uékenga (Ebr. 10:5-7). Indeni ambesï erakupti úni, asta jiáni jamberi enga uarhini japkia chaparhatakata (Juanu 19:30). w20.10 29 párr. 12; 30 párr. 15

¿Míteskichi eska kúnguarhikuarhu anapu ma erachi no sési nitamakuarhixaka pʼamenchakua ma jimbo, uandanhiata ambe jimbo o jimboka uarhirakuarhiska nemani? Engachi míteska eska nema no sési nitamakuarhixaka, uákachi kurhakuni Jeobani eskajtsïni jarhuataaka parachi imani ambe arhini enga sési pʼikuastantaaka o úni ambe ma para jarhuatani. Inde ambe uáti uinhaperantani (1 Ped. 4:10). Míteskachi eskajtsïni Jeoba jarhuataaka. Ka para ísï úni, Jesusini ka ánjelichani úraasïndi. Ístu, enga terukuntaaka imani ambe jingoni enga Jeoba uéjka, uáti imechani úraani engaksï juramukua jatsika. Ka eskachi na exekia, Jeoba úrasïndi imeri espiritu santuni para úni eskaksï imeri marhuaricha uékaaka jarhuataani erachichani. Ísï jimbo, májkueni eska apostoli Pablu, uákachi mintsikaparini uandani: Jeoba “jindesti juchiti jarhuajpiri, ísï jimbo ji no sáni chéaka ambe engajtsïni kʼuiripuecha uékaaka úchini” (Ebr. 13:6). w20.11 17 párr. 19, 20

Apostulichaksï sési mítespti eska Jeoba imecha jingoni jarhaspka, jimboka íntsaaspka uinhapikua paraksï milagruechani uáni (Uku. 5:12-16; 6:8). Nájkirukajtsïni iásï Jeoba no íntskujka uinhapikua parachi milagruechani uáni, uékperakua jingontsïni arhisïndi imeri Karakatarhu eskajtsïni jaiapanhentaaka ka íntskuntsïni imeri espiritu jiáni engachi no sési kánhaaka jimbokachi jurhimbitku úsïnga ambe ma (1 Ped. 3:14; 4:14). Ísï jimbo, nóchi jatsiska para méntku eratseni jarhani ambe úni jiáni engachi no sési kánhaaka sánderu orhepani, sánderu sésisti eskachi iásï exeaka ambechi uá úni parachi sánderu mintsikani Jeobani eskajtsïni jarhuataaka ka pʼímutantani. Jatsiskachi para miáni ambe enga Jesusi aiatspejka: “Arhistachiaka[ksïni] uandakuechani, ka mámaru ambeksïni mítetarani para eskaksïni iámindu chári ikiatspiticha no uáka andani ka nijtuksïni ambe arhini”. Ístujtsïni arini ambe aiachisïndi: “Chári tekaantskua jimbo chájtsï andajkuarhiaka pʼímutantaani chári almechani [o tsípikuani]” (Luk. 21:12-19). Ka ju je no mirikurhini eska enga imeri marhuari ma uarhijka, Jeoba iámindu ambe miásïndi imeri ambe ka tsítantaati. w21.01 4 párr. 12

Antede apostoli Pablu, Jobu uandaspti eska mintsikasïrenga eska Tata Diosï miápiringa imani ka eska tsítantapiringa (Job 14:7-10, 12-15). Tsíntskua, jindesti “uénani anapu ambe” engaksï kristianuecha jatsika para jakajkuni (Ebr. 6:1, 2). Pablu íri ambe uandaspti ixú 1 Korintu kapitulu 15 jimbo. Ambe enga uandapka, seguru eska kánikua uinhaperantaapka kristianuechani engaksï primeru siglurhu irekapka ka ístujtsïni uáti uinhaperantani juchantsïni no arhiparini na engachi xáni ióni jakajkukia eska jauaka tsíntskua. Jesusiri tsíntskua jimbo úsïngachi seguru jarhani eskaksï tsíntaaka iámindu imecha engachi uarhiranchaaka. I jindeespti ma parti ‘ambakiti aianhperakueri’ enga Pablu aianguapka Korintu anapuechani (1 Kor. 15:1, 2). Niáraspti jamberi arhiani eska no marhuakuapiringa jakajkukua jatsini engaksï no jakajkupiringa eska Jesusi tsíntaska (1 Kor. 15:17). w20.12 2 párr. 2-4

¿Ambe jarhuataspi apostoli Pedruni para sési pʼikuarherantani? Miántaspti eska Jesusi arhispka eska kómarhijpikuspka paraka ima seguiripiringa mintsikani Tata Diosïni. Jeoba mókukuntaspti indeni kómarhikuani. Ísï tátsekua, Jesusi xarhakuspti, jamberi para uinhaperantani (Luk. 22:32; 24:33, 34; 1 Kor. 15:5). Máteru xanhari, Jesusi xarhakuaspti apostulichani jiáni engaksï imecha erantskutapkia ka nóksï ma kurucha pʼímani. Jima, Jesusi jurajkuspti eska Pedru xarhatakupiringa eska xénchasïrenga ka ístu xarhatakuspti imeri amigu jémbani eska puákuntaspkia jimboka sánderu ánchikuarhita íntskuspka (Juanu 21:15-17). Na enga Jesusi kámapka Pedruni xarhatasïndi eska pʼamojpitiska, ísï eska imeri Táti. Ísï jimbo, engachi niáraaka no sési ambe úni, nóchi jámaaka eratseni eskajtsïni Jeoba no méni puáchentaaka. Ju je no mirikurhini eska Noambakiti uékasïnga eskachi ísï eratseaka. Sánderu sési, ju je eratsentani na engajtsïni xáni xénchajka Jeoba ka eskajtsïni kurhanguchisïnga eskachi no úsïnga iámindu ambe sési úni ka eskajtsïni uékasïnga puáchentani. Juchajtuchi jatsiska para májkueni úni eska ima engaksï máteruecha újka ambe ma engajtsïni no sési pʼikuastajka (Sal. 103:13, 14). w20.12 20, 21 párr. 17-19

Uákachi jorhenguarhini imecheri ambe engaksï no úpka orhepani uérakuani uandanhiatechani ka ni engaksï mintsikapka Jeobani. Jorhenguarhiani i ejempluechani jarhuataatijtsïni no májkueni ambe úni eska imecha. Por ejemplu, enga Asá uandanhiatechani jatsiauenga, Jeobani jarhuajperata kurhakusïrendi. Joperu tátsekua, nóteru ísï úsptia, sánderu sési, ima erakusïrendia néna úni ambe ma (2 Crón. 16:1-3, 12). Enga Asá asiriuechani jarhuajperata kurhakuapka para Israeli jingoni nirani uarhiperani, úpirindi xarharani eska ambakiti ambespka. Joperu tiempu jingoni xarharaspti eska no ísïspka. Jeoba profetani ma axaspti para arhiani: “Jimbokari mintsikaska Siria anapu juramutini ka no chíti Tata Diosï Jeobani, nóteruri chíti jájki jimbo jatsiskia Siria anapu juramutiri ejersituni” (2 Crón. 16:7). Juchajtuchi jatsika para jingontku jámani parachi no mintsinharhikuarhini na engachi újka ambe ma ka nóchi jirinhani Jeobaeri jarhuajperatani imeri Karakatarhu. Ménisï jauati ambe ma enga jimbo uétarhiaka sóntku eratseni ambe úni. Joperu sánderu sésijtsïni nicheati engachi no xáni uandanhiauaka ka engachi mintsinharhiska Jeobani. w21.01 6 párr. 13-15

Iáiasï máru Jeobaeri marhuarichaksï no jatsisti ambe tʼireni jimbokaksï no jatsikuarheska sentabu o no sési ambe úkuarhini jarhani jimesïsï engaksï irekaka ka guerra ambe jimbo. Máteruechaksï ónhakata járhasti imecheri jakajkukua jimbo. Joperu grupu uánikua kʼuiripuecheri, sésiksï pʼikuarherasïndi míteni eska jiáni engaksï tsípiti pakaraaka enga Noambakitiri parhakpini kʼamajkunhaaka, méntkisïksï jatsiaka kánikua tʼirekua ka eska Jeoba jorhendaauaka. Jiáni enga Jeoba kʼamajkuaka Noambakitiri parhakpinini, kuájchakuati grupuni uánikua kʼuiripuecherini imeri ikiatapueri enga ísïka komueska kánikua aparhikuarhini jarhani. Enga na nitamaakia kʼéri mískuarhita, Jesusi paauati imechani engaksï tsípiti pakaraaka “jima enga uérajka itsï tsípikueri” (Jaŋ. 7:17). Eranhaska je ini xáni ambakiti erokuarhikuani engaksï jatsika i grupu uánikua kʼuiripuecheri: Iámindu ima kʼuiripuecheri engaksï xáni irekakia ixú Echerirhu, íjkuksï uáti jindeeni engaksï no méni uarhiaka (Juanu 11:26). I máteru karichicha, kánikuaksï diosmaiamukua arhisïndi Jeobani ka Jesusini ini xáni ambakiti erokuarhikua jimbo. w21.01 17 párr. 11, 12

Últimu chúrikua jimbo enga Jesusi Echerirhu japka, eratsespti iámindu uandanhiatechani engaksï úpiringa jatsiani imeri chúxapaticha. Jimboka xénchasïrenga, kurhakuspti Táti jémbani eska kuájchakuapiringa Noambakitiri (Juanu 17:14, 15). Mítespti eska enga ima níntapiringa auandarhu, Noambakiti seguirini japiringa no sési kaani né uéjkini enga uékapiringa Jeobani marhuakuni. Ísï jimbo, Jeobaeri ireta uétarhinchasïndi eska kuájchakunhaaka. Iásï sánderuchi uétarhinchasïnga eskajtsïni Jeoba kuájchakuaka, jimboka Noambakiti petanhantaska auandarhu uératini ka “kánikua ikiaxati” (Jaŋ. 12:12). Noambakiti úsïndi eskaksï máru eratseaka eskaksï Tata Diosïni marhuakuxaka engajtsïni no sési kámajka (Juanu 16:2). Ka imecha engaksï no jakajkujka Tata Diosïni, no sésijtsïni kámasïndi jimbokachi no úsïnga imani ambe engaksï i parhakpini anapuecha újka. Ambe uéjki jimbo engajtsïni no sési kámajka kʼuiripuecha nóchi chésïnga, ísï eska na uandajka iásï anapu teksturhu. w21.03 26 párr. 1, 3

Jeoba iámindu ambe uékperakua jimbo úsïndi. Ima xarhatachesïndijtsïni eskajtsïni xénchasïnga ka eska uékasïnga eskachi imeri amigueuaka. Uékperakua jimbo, Jeoba íntspispti imeri Uájpani parajtsïni pʼímutantani ka Jesusijtsïni xáni xénchasïndi enga uékapka uarhini juchantsïni jimbo (Juanu 3:16; 15:13). No ma ambe uáti eska Jeoba ka Jesusi nóteru xénchauakia imechani engaksï no méni jurajkujka (Juanu 13:1; Rom. 8:35). Ka májkuenisti, familieri orhejtsïkuti ma, jatsisti para uékperakua jimbo úni iámindu ambe. ¿Andisï jukaparhakue? Apostuli Juanu uandasïndi: “Ima enga no uékajka ermanu jémbani [o imeri familiani] enga exejka, ¿néna uá uékani Diosïni enga no méni exeka?” (1 Juanu 4:11, 20). Ísï jimbo, acheeti ma enga xénchajka imeri familiani ka enga uéjka májkueni úni eska Jeoba ka Jesusi, jánguarhintasïndi paraka imeri familia ambakiti pájperakua ma jatsiaka Jeoba jingoni, eskaksï sési pʼikuarheraaka ka eskaksï no ma ambe kueratanchaaka (1 Tim. 5:8). Jorhendauati ka jurhimberantani imeri sapiichani. Ístu, seguirini jauati jorhenguarhini néna sánderu sési erakuni úni ambe ma enga kʼéri ambe arhiaka Jeobani ka enga marhuakuaka imeri familiani. w21.02 5 párr. 12, 13

Juchari Táti auandarhu anapu engajtsïni xáni xénchajka, mítesti eska iámindu ima ambe engachi ióntki no sési nitamakuarhika úsïnga eskachi juchajkumindu no sési pʼikuarheraaka. Joperu ístu exesïndi juchari ambakiti kualidadichani, nájkirukachi jucha no újka exeni indeni ambe (1 Juanu 3:19, 20). Enga nema kánikua jánguarhintani jaka jurajkuni imani ambe enga no sési jaka, joperu ménderu ueentani úni ini ambe, kánikua no sési pʼikuarherasïndi. Ísïsti, no no sési jarhasti engachi no sési pʼikuarherajka engachi kʼamanharhintskua ambe újka (2 Kor. 7:10). Joperuchi no jatsipiringa para xáni no sési pʼikuarherani ka niárani ísï eratseni eskachi “no ma ambe jukaparhaska ka eskajtsïni Jeoba no méni niáraaka puáchintani”. No sési jarhasti ísï eratseni ka uáti eskachi jurajkuaka Jeobani. Sánderu sési, ju je sési peentani ambe ma Jeobani jingoni kómarhiparini eskajtsïni puáchintaaka (Is. 1:18). Ima exeati eskachi mintsita jingoni móantasïnga ka puáchintaatijtsïni. Ístu, ju je orhejtsïkuticha jingoni uandontskuarheni ka imajtsïni tekaantskua jingoni jarhuataati parachi ménderu sési jarhani Tata Diosï jingoni (Sant. 5:14, 15). w20.12 23 párr. 5, 6

Jesusi janhanharhiasïrendi nanakechani. No ísïspti eska fariseuecha, engaksï no jukaparharauenga nanakechani, niksï uandontskuarhieni imecha jingoni kʼuiripuni japarini ka menusia paraksï aianguani Karakateri ambe. Joperu Jesusi kánikua ménderuenispti, uandontskuarhespti tatakecha ka nanakecha jingoni jukaparhakua ambe karakatecheri (Luk. 10:38, 39, 42). Ístu, jurajkuspti eskaksï uánikua nanakecha nipiringa pámbeni enga ima aianhpini jámani jarhenga (Luk. 8:1-3). Ka ístu, máru imechani íntsaaspti kʼéri kóntperata paraksï aianguani apostulichani eska ima tsíntaspkia (Juanu 20:16-18). Apostuli Pablu arhispti Timoteuni eska janhanharhiapiringa nanakechani. Pablu uandaspti eska amamba ka imeri mama kʼéri, jindeespka engaksï jorhendapka “pímbinhasï karakatani” (2 Tim. 1:5; 3:14, 15). Ístu, enga Pablu karta axakuapka Roma anapuechani, uandajperata axakuaspti pirenchichani ka nombri jimbo arhiaspti. Ima kuenta íntskukuarhesïrendi ambe engaksï xáni uénga ima pirenchicha ka uandaspti na enga xáni jukaparharenga imecheri ánchikuarhitani (Rom. 16:1-4, 6, 12, TDU; Filip. 4:3). w21.02 15 párr. 5, 6