Abrili

¿No sési ambechi nitamakuarhixaki? Jamberijtsïni kúnguarhikuarhu anapu erachi ma no sésijtsïni pʼikuastati (Sant. 3:2). O jamberijtsïni eskuelarhu o ánchikuarhitarhu anapu kompanieru ma teresmarhuntsïni jimbokachi marhuakuxaka Jeobani (1 Ped. 4:3, 4). O jamberi juchari familia uékani jarhani eskachi nóteru niuakia tánguarhikuecharhu o parachi nóteru aianhpinia Jeobaeri ambe (Mat. 10:35, 36). Engajtsïni i ambe kánikua no sési pʼikuastani jaka ka ísïchi pʼikuarherani jarhani enajkichi nóteru uáia, uákachi seguru jarhani eskajtsïni Jeoba íntskuaka uinhapikua ka jánhaskakua parachi úni orhepani uérakuni náki uéjki uandanhiata ma. Jeobajtsïni aiangusïndi imeri Karakatarhu na engaksï nitamakuarhipka máru kʼuiripuecha ka aiangusïndijtsïni parachi jorhenguarhini imecheri ambe, i ambesï karapti apostuli Pablu. I ambejtsïni uinhaperantasïndi ka erokuarhikuajtsïni ma íntskusïndi, no soluchi jatsiska para arhintani Bibliani, sino jurajkuni eska mójtakuaka juchari eratsekuani ka eskajtsïni niárachiaka juchari mintsitarhu. w21.03 14 párr. 1, 2

¿Ísïchi exeasïni imani kʼuiripuechani engachi Tata Diosïri ambe aianguajka enajkiksï listu jakiia para uarhotanhani? Enga ísïka, jatsiskachi para tanimu ambe úni. Orheta, sánderuchi jánguarhintaaka aianhpini. Jimboka no káni tiempu jarhasïnga para pʼikuntskua o uarhotani ambe ma, jatsiskachi para sési úrani tiempuni. Tsimani úni jámani, sésichi pʼikuarheraaka engachi jánguarhintaska ini ánchikuarhitani úni. Biblia arhisïndi eska kʼuiripu tsípisïnga jiáni enga tiempueka para pʼikuntskua (Is. 9:3). Ka tanimu úni jámani, jatsiskachi para ísï exeni kʼuiripuni eska sánderu orhepani niáraaka Jesusiri chúxapatini, ísï jimbo, jatsiskachi para ísï aianguani Tata Diosïri ambe seguni ambe engaksï imecha tsitijka. Jesusi no méni eratsespti eskaksï Samaria anapuecha no méni niárapiringa imeri chúxapatini, ísï eskaksï jamberi na eratsepiringa máru imeri chúxapaticha. Sánderu sési, eratsespti eskaksï sánderu orhepani niárapiringa imeri chúxapatini. Juchajtuchi jatsika para ísï exeani jima anapu kʼuiripuechani nani engachi aianhpijka. Apostuli Pablu ambakiti ejemplu máesti parachi juchajtu májkueni úni. Ima mítespti ambe engaksï jakajkuenga ima kʼuiripuecha enga aianguauenga, exesïrendi ambe engaksï tsitienga ka exesïrendi eskaksï ima kʼuiripuecha úpiringa Jesusiri chúxapatini. w20.04 8, 9 párr. 3, 4

Ju je jánguarhintani kurhanguni na enga pʼikuarherajka kʼuiripu ma ka no no sési ambe eratseni jarhani imani ambe jimbo enga újka. Jeobajkusï jindeti engajtsïni meru sési kurhanguchijka. Ísï jimbo, ju je kurhakuni eskajtsïni jarhuataaka ísï exeani máteruechani eska ima na exeajka ka parachi míteni néna xarhatakuani pʼamojperakua. Nóchi uáka jucha uandani náki erachini xarhatakuni pʼamojperakua ka nákini nómbe. Iáminduechaksï jatsiasïndi uandanhiatechani ísï eska Jonasi, Eliasi, Agari, ka Loti. Ka ménisï, imechaksï jandiajku jirinhakuarhiasïndi uandanhiatechani. Peru sési jimbo, iáminduechachi ménisï niáraska jirinhakuarhiani uandanhiatechani. Jimbojtsïnisï Jeoba arhijti eskachi kurhangutsperaaka (1 Ped. 3:8). Engachi kurhajchajka, jarhuajpisïngachi parachi májku kʼéri jarhani iámindu erachicha interu parhakpini anapuecha jingoni engachi xáni mámaru jásïka. Ísï jimbo, ju je jánguarhintani kurhangukuani ka pʼamojkuani juchari erachichani ka pirenchichani. w20.04 18, 19 párr. 15-17

Jesusijtsïni ambakiti ejemplu xarhatachesti. Ísï jimbo, parachi úni ambe enga Jeoba uandajka, jatsiskachi para jánguarhintani Jesusini terukukuntani iámindu ambe jimbo (Juanu 8:29). Parachi no méni jurajkuni jurhimbikuani, jatsiskachi para seguru jarhani eska Jeoba jindeska Tata Diosï enga méntkisï jurhimbitku ambe uandajka, ka ísï jimbo, iámindu ambe engajtsïni imeri Karakata jimbo arhijka, jurhimbitkuesti. Ístuchi jatsiska para seguru jarhani eska Jesusi jindeska Mesiasi enga aiatspinhapka. Ini jurhiatikuecha jimbo, uánikuechaksï no jakajkusïndi eska Jesusi erakunhaska para Reini Tata Diosïri Reinurhu. Juanu uandaspti eskaksï japiringa uánikuecha engaksï támisï jánhastaapiringa imechani engaksï no seguru japiringa ambe enga jurhimbitkueka Jeobaeri ka Jesusiri ambe (2 Juanu 7-11). Juanu karaspti: “Jimajkani, ¿né jindeski chkuanderari? ¿No jindeski ima enga uandajka eska Jesusi no jindeska Diosïri míndakata?” (1 Juanu 2:22). Parachi no jurajkuni eskajtsïni támisï jánhastaaka, jatsiskachi para arhintani Tata Diosïri Karakatani. Solu ísïchi uáka sési míteni Jeobani ka Jesusini (Juanu 17:3). Ka ísïchi niáraaka seguru jarhani eskachi míteska ambe enga jurhimbitkueka. w20.07 21 párr. 4, 5

Engachi no uéjka ójkutaani juchari erachichani engaksï ístu uiriini jaka kristianuecheri karrera jimbo, nóchi jatsiska para uékani eska iámindu ambe ísï úkuarhiaka eskachi jucha na uéjka (Rom. 14:19-21; 1 Kor. 8:9, 13). Méntku ménderuenisti karrera ma jimbo. Imeecha engaksï uiriijka no uandanhiasïndi máteruecha jimbo. Ísï jimbo, jánguarhintasïndiksï máteruechani kénditaani paraksï imecha orhepani niárani. Peru juchachi no uékasïnga andaani juchari erachichani (Gal. 5:26; 6:4). Ambe engachi uéjka, jindesti máteruechani jarhuataani parakaksï andaaka ini karrerani ka májkueni eska jucha, jatsinksï tsípikua para méntkisï. Jimbochisï jánguarhintajka úni ambe enga Biblia uandajka, eskachi no solu pendienti paaka juchari ambe jimbo, “sino ístu pendienti páni para máteruecha” (Filip. 2:4). Uékperakua jimbo, Jeoba aiatspesïndi eska iámindu imecha engaksï kʼamaraaka ini karrerani intsïnhaakaksï tsípikua para méntkisï, auandarhu o Paraisurhu ixú Echerirhu. w20.04 28 párr. 10; 29 párr. 12

Uánikua kristianuechaksï tsípiti pakaraati ka irekaatiksï jimbanhi parhakpinirhu. Íksï kʼuiripuecha uáti exeni na enga andanhaaka uarhikua: engaksï tsíntaaka xáni uánikua kʼuiripuecha engaksï ióntki uarhikia. ¡Kʼéri tsípikuarhita máeuati! (Uku. 24:15). Ka iámindu imecha engaksï no méni jurajkuaka Jeobani, ístuksï andaati uarhikuani enga Adani jimbo juka ka uátiksï irekani para méntkisï. Iámindu kristianuecha engachi iásï tsípiti jaka, kánikuachi jukaparharasïnga na engajtsïni xáni uinhaperantajka ambe enga Pablu karakuapka Korintu anapuechani tsíntskueri ambe. Ambakiti ambe jarhasti engachi jimbo jatsika parachi ísï úni eskajtsïni Pablu na arhijka: “Méntku jauena je úni Diosïri úkuani” (1 Kor. 15:58). Engachi no méni jurajkuska Jeobani ka jánguarhintanchi na engachi xáni uáka úni ini ánchikuarhitani, tsípikua jingonchi irekaaka sánderu orhepani, iauani sánderu sési ka eskachi na eranhaskajka. Jiájkani, exeakachi eska no ískueska na engachi xáni ánchikuarhijka Tata Diosïni jimbo. w20.12 13 párr. 16, 17

Péringaksï mismu jurhiatikuecheri ambe uandajka profesiecha engaksï ini karakatecha jimbo jaka Ezequiel 38:10-23; Daniel 2:43-45; 11:44–12:1; ka Jaŋaskuecha 16:13-16, 21. Enga i ambe ísïka, uákachi erokuarhini eska ari ambe úkuarhiaka. Enga na uénakuarhiakia kʼéri mískuarhita, na uéjki jatini iámindu “parhakpini anapu” juramutichaksï kúnguarhintaati (Jaŋ. 16:13, 14). Biblia ísï arhisïndi ini kúnguarhikuani ‘Gog enga Magog anapu echerirhu anapueka’ (Ezeq. 38:2). Íksï juramuticha engaksï kúnguarhintaaka, uékaatiksï iámu Tata Diosïri iretani no sési úkuni ka jánguarhintaatiksï méntku kʼamajkuni. Íri ambe uandaparini, apostuli Juanu exespti na enga Tata Diosïri ikiatspitichani kʼérati xanuata uékorhikuapka. I kʼéri xanuata jamberi arhikuekajti imani ambe engaksï Jeobaeri marhuaricha aianhpiaka, eska Tata Diosï jusgariaka Satanasiri parhakpinini ka i aianhperakuasï uáti eska Gog Magog anapu uékaaka no sési úkuni Tata Diosïri iretani para méntku kʼamajkuni (Jaŋ. 16:21). w20.05 15 párr. 13, 14

Jatsikuarhekua ma enga no xarharajka ka engachi jatsika para kánikua jukaparharani, jindesti Tata Diosïri espiritu santu. Uákachi sánderu jukaparharani espiritu santuni engachi eratsentaaka imani ambe enga úni jaka ini jurhiatikuecha jimbo. Ante de Jesusi auandarhu karhanchentani, arhiaspti imeri chúxapatichani: “Chájtsï intsïnhaaka uinhapikua espiritu santueri enga juuaka paraksïni jukaratini jarhani, ka uandantaakajtsï juchiti ambe [...] iápuru parhakpinirhu asta jima enga sánderu iauanika” (Uku. 1:8). Espiritu santueri jarhuajperata jimbo, ma ocho miioni ka terujkani iápurisï anapuechaksï marhuakuxati Jeobani. Ístu, iámindu Jeobaeri ireta májku kʼéri jarhasti jimbokajtsïni espiritu santu jarhuatasïnga parachi uékpini, tsípini, pínandikua jatsini, ióni tekaantani, sési kámpini, ambakini, Tata Diosïni mintsikani, kaxumbini ka pʼíngukuarhini. Espiritu santujtsïni jarhuatasïndi parachi iámindu ini ambe xarhatani (Gal. 5:22, 23). Ísïsti, espiritu santu intsïmperakua máesti enga kánikua jukaparhakueka. w20.05 29 párr. 10, 13

Uánikua ambe jarhasti engachi jimbo eratsejka eskaksï kʼuiripuecha uáka míteantani imechani engaksï tsíntaaka. Por ejemplu, exeparini imani kʼuiripuecheri enga Biblia uandajka eskaksï tsíntaspka, xarharasïndi eska Jeoba ísï tsítantauaka na engaksï jáxepka, na engaksï uandenga ka eratseni ante deksï uarhini. Ístu, ju je miáni eska Jesusi uandaspka eska uarhini ísïska komueska kʼuíni jarhani ka eska tsíntani ísïska komu tsínharhini (Mat. 9:18, 24; Juanu 11:11-13). Engaksï kʼuiripuecha tsínharhijka, májkuenksï jáxesïndi, májkuenksï uandasïndi ka útasïksï miáni jarhani ambe engaksï eratseni japka ante deksï nirani kʼuíni. Ju je exeni Lasarueri ambe. Ante de Jesusi tsítantani, ima tʼámu jurhiatikua páxaptia uarhirini, ísï jimbo, imeri kuerpu uénasptia tereni. Peru enga tsíntapkia, imeri pirembechaksï jirejiresï mítentaspti ka imajtu jirejiresï míteantaspti (Juanu 11:38-44; 12:1, 2). w20.08 14 párr. 3; 16 párr. 8

Para Tata Diosï májkuenksï jukaparhakuesti erakukatecha ka ístu máteru karichicha. Májkueni xénchaasïndi tsimani grupuechani. Jimboka májkueni maianhpeska erakukatecha ka ístu máteru karichicha jimbo, imeri Uájperi tsípikua jingoni enga ima xáni xénchajka. Ambe engaksï jimbo no májkuenika, jindeesti eskaksï máru auandarhu niuaka irekani ka máteruecha Echerirhu, joperuksï tsimarhani jatsisti paraksï no méni jurajkuni Tata Diosïni ka ístu tata Jesukristuni (Sal. 31:23). Ka nóchi mirikurhiaka eska Tata Diosï úsïnga úni eska imeri espiritu santu májkueni jarhuatauaka iámindu imeri marhuarichani. Jeoba uáti íntskuni imeri espiritu santuni mándani kʼuiripuni eska na uétarhinchaaka, no arhiparini enga erakukateuaka o máteru karichiricherini. Jeoba ambakiti erokuarhikua ma íntsaasti mándani imeri marhuarichani engaksï itsï atakuarhikia (Jer. 29:11). Jesusiri uarhikueri Miántskua, jindeesti nani engachi iáminduecha uáka kʼéri ambe arhini Tata Diosïni ka Kristuni inde ambe jimbo engaksï úka parachi úni irekani para méntkisï. Miántskua jindeesti tánguarhikua enga sánderu jukaparhakueka mándani uéxurhini para jurhimbitku kristianuecha. w21.01 18 párr. 16; 19 párr. 19

Sáno iáminduecha engaksï nirajka Miántskuarhu erokuarhixatiksï irekani Echerirhu. Jimajkani, ¿andiksïsï nirajki? Imani mismu ambe jimbo engaksï uánikua kʼuiripuecha nirajka enga amigu ma tembuchajka. Nirasïndiksï jimbokaksï uékasïnga xarhatakuani nobiuechani eskaksï xénchaasïnga ka eskaksï uékasïnga imecha jingoni jarhani. Májkueni, máteru karichichaksï nirasïndi Miántskuarhu jimbokaksï uékasïnga xarhatakuni Kristuni ka erakukatechani eskaksï xénchaasïnga ka eskaksï imecha jingoni jarhaska. Ísïksï xarhatasïndi eskaksï jukaparharasïnga Jesusiri uarhikuani enga újka eskaksï uáka irekani para méntkisï Echerirhu. Máteru jukaparhakua ambe engaksï jimbo máteru karichicha nirajka Miántskuarhu, jindeesti para kurhajchani Jesusiri juramukuani. Enga ima uaxastapka Miántskuani imeri apostulicha jingoni, arhiaspti: “Ísïjtsï uáka jintsïni miántsparini” (1 Kor. 11:23-26). Ísï jimbo, máteru karichichaksï nirani jauati Tateeri Senarhu asta jiáni jamberi engaksï útasï jauaka erakukatecha ixú Echerirhu. w21.01 17, 18 párr. 13, 14

Enga kʼuiripu ma xénchajka máteruni, jatsisti para úkuecha jingoni xarhatani eska meru xénchasïnga (terukutanta je Santiagu 2:17, 26 jingoni). Por ejemplu, Jeobajtsïni xénchasïndi (1 Juanu 4:19). Ka xarhatachesïndijtsïni sési járhati uandakuecha jingoni engaksï Bibliarhu jaka (Sal. 25:10; Rom. 8:38, 39). Joperuchi míteska eskajtsïni Tata Diosï xénchasïnga no solu imani ambe jimbo engajtsïni arhijka, sino ístu imani ambe jimbo enga újka. Jeoba jurajkuspti eska imeri Uájpa enga ima xáni xénchajka no sési nitamakuarhipiringa ka eska uarhipiringa juchantsïni jimbo (Juanu 3:16). Ísï jimbochisï seguru jaka eskajtsïni ima xénchasïnga. Ka jucha xarhatasïnga eskachi xénchasïnga Jeobani ka Jesusini engachi kurhajchaajka (Juanu 14:15; 1 Juanu 5:3). Ka Jesusijtsïni juramuchisti eskachi uékperaaka máteru ka máteruni jingoni (Juanu 13:34, 35). Jiájkani jatsiskachi para arhiani juchari erachichani eskachi xénchaasïnga ka ístu úkuecha jingoni xarhatakuani (1 Juanu 3:18). w21.01 9 párr. 6; 10 párr. 8

Kristianuecha engaksï erakukateka espiritu santu jingoni, erokuarhixatiksï Jesusi jingoni jarhani para méntkisï ka imani jingonksï juramuni Tata Diosïri Reinurhu. Exeatiksï, imani jingonksï uandontskuarheati ka imani jingonksï jauati (Juanu 14:2, 3). Ka imechani engaksï Echerirhu pakaraaka irekani, Jesusi xénchperakua jingoni kuidariauati. Nájkirukaksï no exeaka, imecheri pájperakua Jesusi jingoni sánderu kʼéati jiáni enga Jeoba ka Jesusi íntsauaka ambakiti irekua ma (Is. 9:6, 7). Engachi jiókuarhijka Jesusiri amigueni, uánikua kóntperatechanchi jatsiasïnga. Por ejemplu, imajtsïni jarhuatasïndi ka xénchani ini jurhiatikuecha jimbo. Ístu, uákachi irekani para méntkisï. Ka ambe enga sánderu jukaparhakueka, jindesti eska Jesusiri amigueni, uáka eskachi ambakiti pájperakua ma jatsiaka imeri Táti jingoni, Jeoba. Xáni enga kʼéri kóntperata máeka Jesusiri amigueni. w20.04 25 párr. 15, 16

Apostoli Pablu karakuaspti Korintu anapu kristianuechani engaksï erakukatepka ka engaksï auandarhu tsíntapiringa. Imechaksï jindeespti engaksï “pímbinhajkuntskateka Kristuni Jesusini jimbo ka erakukatenksï para pímbinhasïni”. Pablu ístu uandaaspti imechani engaksï “Kristuni jakajkuparini uarhikia” (1 Kor. 1:2; 15:18; 2 Kor. 5:17). Máteru libru jimbo Bibliaeri, Pablu karaspti: “Engachi jucha májku jásï jatsinhantaka Kristuni jingoni terukukuntsparini imeri uarhikua jingoni, ístuchi májkuentstini jauaka imeri tsíntskuarhu” (Rom. 6:3-5). Jesusi tsíntasti komueska espiritu ma ka auandarhu níntasti ka májkueni ambeksï erokuarhisïndi imecha engaksï jindeeka erakukatecha. Pablu karaspti eska Kristu jindeeska enga “uéna[ka] tsíntani ka eska iámindu imecha engaksï uarhikia” (1 Kor. 15:20). Jesusi jindeespti enga uénaka tsíntani komueska espiritu ma ka enga intsïnhaka tsípikua para méntkisï. w20.12 6 párr. 15, 16

Ini jurhiatikuecha jimbo engaksï erakukatecha uarhijka jirejiresïksï tsíntasïndi auandarhu. ¿Nénachi míteski? Imani ambe jimbo enga apostuli Pablu uandapka ixú 1 Korintu 15:51, 52. Engaksï na tsíntaakia, i Kristueri ermanuechaksï kʼéri tsípikuarhita jatsiati. Biblia uandasïndi ambe engaksï uáka imecha engaksï méntku ménderueni jáxentajka ísï “eska ma na xáni kókani eskantajka”. Jesusi arhiasïndi: “Ima enga andapiti uéraaka ka patsaani juchiti mandamientuechani asta kʼamarhutani jamberi, ji íntsauaka sésikua juramukuani kʼuiripuechani májku jásï eskani ji na juramukua intsïnhaka juchiti Tátini jimbo, ka juramukuauati tsirikuarhita tiámueri jimbo, ka ísï xereantauati komueska ma tsuntsu echeri[ri]” (Jaŋ. 2:26, 27). w20.12 12 párr.14, 15

Enga apostoli Pablu arhipka Jesusini eska ima jindespka enga “uénaka”, xarhataxapti eskaksï japiringa máteruecha engaksï tsíntapiringa paraksï auandarhu nirani (1 Kor. 15:18). Sánderu orhepani apostulicha ka ístu máteru kristianu erakukatecha tsíntapirindiksï, para ísï eska Jesusi auandarhuksï nirani irekani. Enga Pablu karakuapka Korintu anapuechani, nótki uénasïrendi úkuarhini tsíntskua para kristianuecha engaksï erakukateka paraksï auandarhu nirani irekani. Xarhataspti eska sánderu orhepani úkuarhipiringa i ambe. Pablu uandaspti eska Kristu uénapiringa tsíntani, ka tátsekua imecha engaksï Kristuerika, jiáni enga Jesusi juramuni jauakia auandarhu (1 Kor. 15:23; 1 Tes. 4:15, 16). Eskachi na exejka, apostulicha ka máteru erakukatecha jatsisptiksï para erokuarhini asta jimajkani enga Jesusi juramuni japiringuia auandarhu paraksï úni auandarhu nirani ka ‘májkuentstini jarhani imeri tsíntskuarhu’. Iásïchi irekaxaka indeni jurhiatikuecha jimbo enga Biblia arhijka eska Jesusi juramuxakaia auandarhu (Rom. 6:5). w20.12 5 párr. 12; 6 párr. 16, 17

Apostuli Pablu imechani arhikuekaaxapti engaksï kuerpu espiritueri ma jingoni tsíntaaka (1 Kor. 15:43; 1 Kor. 15:44, TNM). Enga Jesusi Echerirhu japka imeri kuerpu kʼuiripiterispti. Joperu enga na tsíntapkia jindesptia espiritu ma “enga tsípikua íntspijka” ka kʼuanhatsentaspti auandarhu. Májkueni, erakukatechaksï tsíntaati komueska espiritu ma. Pablu uandaspti: “Jucha engachi terukukuntajka imani enga tʼupuririka, tambientuchi terukukuntaaka imani enga auandarhu anapueka” (1 Kor. 15:45-48, TDU; 1 Kor. 15:49). Ju je miáni eska Jesusi no kuerpu kʼuiripiteri ma jingoni tsíntaska. Pablu uandaspti eska “kʼuiripita ka iurhiri no úsïnga Diosïri juramukuarhu anapueni” jini auandarhu (1 Kor. 15:50). Apostulicha ka máteru erakukatechaksï ístu no úpirindi auandarhu nirani kuerpu ma jingoni enga kʼuiripiteripiringa ka úniri engaksï terejka. w20.12 10, 11 párr. 10-12

Tata Diosï imeri espiritu santuni úraparini, úspti eskaksï máru Jesusiri chúxapaticha karapiringa eska jauaka tsíntskua jini auandarhu. Apostuli Juanu uandaspti: “Diosïri uájpe[skachi], ka útasï nótki xarharasïndi ambe engachi jindeuaka, peru míteskachi eska jimajkani enga ima junguaka, jucha terukukuntaaka imani” (1 Juanu 3:2). Ísï jimbo, erakukatechaksï no mítesti nénaksï irekaa jini auandarhu ka kuerpu espiritueri ma jingoni. Joperu ambe engaksï kʼóru míteka jindesti eska engaksï intsïnhakia kóntperatani exeakaksï Jeobani. Biblia máru ambejkusï uandajti na enga úkuarhiaka tsíntskua auandarhu. Por ejemplu, apostuli Pablu uandaspti eskaksï erakukatecha tata Jesukristu jingoni jauaka jiáni enga ima kʼamajkuauaka “iámindu juramutichani ka iámindu imechani engaksï kánikua uinhapikua ka juramukua jatsika”, ka ístu últimu ikiatspitini enga jindeeka uarhikua. Últimu, Jesusi ka imecha engaksï imani jingoni juramuaka ka iámindu máteru ambe, Jeobaeri juramukua jimboksï jauati (1 Kor. 15:24-28). ¡Xáni ambakiti ambe enga úkuarhiaka! w20.12 8 párr. 2

Ima kristianuecha engaksï no méni jurajkuaka Jeobani peru engaksï no jatsika erokuarhikua paraksï auandarhu nirani, imajtuksï erokuarhixati tsíntskuani. Míteskachi i ambe jimboka Biblia uandasïnga eska apostoli Pablu ka máteruecha engaksï auandarhu niuaka erokuarhixaptiksï para tsítanhantani “uénani anapu tsíntskuarhu” (Jaŋ. 20:6). ¿A no eska i ambe xarhatajka eska japiringa máteru tsíntskua sánderu orhepani? I ambe sési terukuntapirindi imani ambe jingoni enga Jobu uandapka eska úkuarhipiringa sánderu orhepani (Job 14:15). “Engaksï Kristuerika”, Jesusi jingonksï jauati auandarhu jiáni enga ima kʼamajkuauaka “juramutichani ka iámindu imechani engaksï kánikua uinhapikua ka juramukua jatsika”. Jimajkani, “últimu ikiatspiti enga andanhaaka jindeati uarhikua”. Xarharasïndi jiájkani eska imecha engaksï auandarhu tsíntaaka nóksï méni uarhiaka. (1 Kor. 15:23-26). Imecha engaksï erokani jaka irekani Echerirhu uátiksï májkueni uandani eska Pablu na uandapka iásï anapu teksturhu. Auandarhu, no ma uáti jarhani enga no míteka Jeobani, jimboksïsï i uandakuecha arhikuekajti tsíntskua enga úkuarhiaka sánderu orhepani Echerirhu. w20.12 7 párr. 18, 19

Úpiringachi kurhamarhikuarhini: “¿Néna uá seguru jarhani eska Jeoba exesïnga eskani útasï uáka sési marhuakuni?”. Úpiringachi uandani, eskachi ini kurhamarhikuani sánisï mókuntaskia. ¿Andichisï ísï uandajki? Iónistia enga rebista La Atalaya uandapka na engachi uáka pʼikuarherani engachi ióntki no sési jásï ambe niátenga ka engaksï iásï ménderuni májkueni úni jakaia. Jorhenguarhikua uandasïrendi: “Asï eratsi je eskajtsï úska ambe ma engaksïni Jeoba no méni uáka puáchintani. Inde ambesï tsitipirindi Noambakiti eskajtsï ísï eratsepiringa. Engajtsï cha no sési pʼikuarherajka ka ikiantsï cha mismu jingoni, arhikuekasïndi eskajtsï uáka puáminhantani. Asï méni kuatanta je, kaxumbi je ka mintsita jingoni kurhaku je Tata Diosïni eskaksïni puáchintaaka parajtsï sési pʼikuarherantani ka paraksïni jarhuatani nóteru no sési ambe niátania”. Apostuli Pablu no sési jásï ambe niátaspti antede kristianueni. Miásïrendi ambe enga úpka (1 Tim. 1:12-15). Peru ima, ísï exesïrendi Jesusiri uarhikuani komueska intsïmperata ma enga Tata Diosï imani úkupka. Enga apostuli Pablu ísï úpka, nóteru xáni no sési pʼikuarherasptia ka sánderu sési jánguarhintaspti sési marhuakuni Jeobani jima para orhepani. w20.11 27 párr. 14; 29 párr. 17

Noambakitijtsïni uánikua ambe jingoni tsʼéjkusïndi. ¿Ambechi uá jucha? Jamberichi úpiringa eratseni ka uandani: “No xáni no sési ambe niátaaka, no expulsarinhaaka engani ini ambe úska”. Kánikua no sési jarhasti ísï eratseni. Sánderu sésisti arini ambe kurhamarhikuarhini: “¿Úraxaki Noambakiti ini ambe para úni eskani no iámu mintsita jingoni janhanharhiaka Jeobani? ¿No sési pakataa Jeobaeri nombrini engani ikichakueni jásï ambe úska? ¿I ambe uá eskani sánderu andarhieraaka Jeobani o eskani jurajkuaka?”. Ju je ini kurhamarhikuechani eratseantani. Ju je kómarhini Jeobani eskajtsïni íntskuaka jánhaskakua parachi úni jurhimbitku mókuantaani ini kurhamarhikuechani. Ísï úni, kánikuajtsïni kuájchakuati. Jarhuataatijtsïni parachi no no sési ambe niátani ka májkuenchi uandani eska Jesusi enga uandapka: “Késtakuchirini Satanasi” (Mat. 4:10). No sési jarhasti engachi no iámu mintsita jingoni janhanharhiska Jeobani. w20.06 12, 13 párr. 16, 17

Jeobaeri marhuarichachi kaxumbitiska ka kurhajchasïngachi ambe engajtsïni ima juramuchijka jimbokachi kurhangusïnga eska ima sési míteska ambe enga sánderu sésiika para jucha (Efes. 4:22-24). Kaxumbikua úsïndi eskachi uáka ambe enga ima uéjka ka no ambe engachi jucha uéjka ka eratseni eskaksï máteruecha sánderu kʼéri ambeska eska jucha. I ambe úsïndi eskachi ambakiti pájperakua ma jatsiaka Jeoba jingoni ka juchari erachicha jingoni (Filip. 2:3). Peru engachi no jingontku jarhaska, uákachi ísï jámani eska kʼuiripu enga Noambakitiri parhakpinirhu jaka engaksï kʼéramakuarhijka ka nóksï pendienti páni máteruecha jimbo. Peekaksï máru primeru siglurhu anapu kristianuecha úpiringa indeni ambe úkuarhinchani jimboka apostuli Pablu arini konseju íntsaaspka Roma anapu kúnguarhikuarhu anapuechani: “Jíksïni iáminduechani arhisïnga eskajtsï no jámaaka sánderu kʼéri ambe exekuarhini ka eskajtsï na jindeka, sino eska mándani arhini kaxumbikua jingoni eratsentaaka imeri mismu ambe”. Eskachi na exejka, Pablu uandaspti eskachi jatsiska para sánisï jukaparharakuarhini. Peru kaxumbikuajtsïni jarhuataati parachi no kʼéri ambe exekuarhini. w20.07 2 párr. 1, 2

Pínandikua engaksï Juda anapuecha jatsipka Asáeri jurhiatikuecha jimbo, niáraspti kʼamakurhini jimboka Etiopía anapu ejersitu ma engaksï ma miioni soldaduechepka, niraspkaksï imecha jingoni uarhipeni. Séra, enga orhejtsïkuni japka imani ejersituni, seguru jarhaspti eska kʼamajkupiringa Judani. Peru Asá mintsikasïrendi Jeobani, jimbosï kómarhipti: “Jarhuatajtsïni Jeoba, juchari Tata Diosï, jimbokaksïni tʼunguini mintsikasïnga, ka chíti nombri jimbochisï juka uarhipeni ini xáni uánikua kʼuiripuecha jingoni” (2 Crón. 14:11). Ka nájkiruka Etiopía anapu ejersitu tsimani uelta sánderu kʼépka eska Juda anapu, Asá mítetixapti eska Jeoba jatsispka uinhapikua para jarhuatani imeri iretani. Ka ísï úkuarhispti. Jeobaeri jarhuajperata jingoni, kʼamajkusptiksï Etiopía anapu ejersituni (2 Crón. 14:8-13). Nóchi míteska ambe engachi meru nitamakuarhiaka sánderu orhepani, peru kʼóruchi míteska eska i pínandikua engachi iáiasï jatsika, no jindeska para méntkisï. Ju je miáni eska Jesusi uandaspka eska últimu jurhiatikuechani jimbo, iámindu kʼuiripuechaksï no xénchaapiringa imeri chúxapatichani (Mat. 24:9). w20.09 17, 18 párr. 14-16

No nema uékasïndi eska no sési arhinhaaka. Peru engachi jukari uandanhiaska engajtsïni juchari ikiatspiticha no sési arhijka, niáraakachi no sési pʼikuarherani (Prov. 24:10). Jimajkani, ¿ambechi jatsiski para úni engajtsïni imecha no sési arhiska? Uákachi májkueni úni eska apostoli Pablu ka tsípini engachi no sési arhinhaaka. ¿Andi? Jimboka engachi no sési arhinhajka ka no sési kánhani, xarhatasïndi eskachi sési jimbo Jesusiri chúxapatiska (1 Ped. 4:14). Jesusi uandaspti eskaksï imeri chúxapaticha no sési kánhapiringa (Juanu 15:18-20). Ka inde ambesï úkuarhipti primeru siglurhu. Por ejemplu, imecha engaksï májkueni eratsenga eska grieguecha, ísïksï exeasïrendi kristianuechani enajkiksï no ma ambe mítepi ka nóksï kʼéri ambeeni. Ka para judiuecha, kristianuechaksï ‘no káni mítekuspti ka níjtuksï xáni jorhenani’ ísï eskaksï na arhiapka apostulichani Pedruni ka Juanuni (Uku. 4:13). Uánikua kʼuiripuechaksï eratsesïrendi eskaksï kristianuecha no kʼéri ambespka jimbokaksï no jatsispka juramukua politikarhu ni ejersiturhu ka jimboksïsï no xénchanhendi. Ióntki anapu kristianuechaksï seguirispti marhuakuni Tata Diosïni nájkirukaksï imecheri ikiatspiticha no sési ambe uandenga imecheri ambe. w20.07 14, 15 párr. 3, 4

Apostuli Juanu kánikua xénchaasïrendi erachichani ka uékasïrendi eska imecheri jakajkukua méntkisï sési japiringa. Ka inde ambe sési xarharasïndi imani konsejuecha jimbo enga karaapka imani tanimu kartechani jimbo. Xáni engajtsïni sési pʼikuastantajka míteni eskaksï májkueni pʼikuarherasïnga eska Juanu, ima acheeticha ka uarhiiticha engaksï Kristu jingoni juramuaka auandarhu (1 Juanu 2:27). Ju je jukaparharaani ini konsejuechani enga ima íntspepka. Ju je méntkisï eratsetini jarhani jurhimbikuarhu jarhani ka iámindu ambe jimbo kurhajchani Jeobani. Ju je arhintani Bibliani ka mintsikani ambe enga uandajka. Ju je sánderu mintsikani Jesusini, ístu, no jiókuarhini ambe engaksï kʼuiripuecha jorhentpijka ni kurhaani ambe engaksï apostatecha uandajka. Ju je jánguarhintani parachi no tsimani ambe úni jarhani: Jeobani marhuakuni ka ístu no sési ambe úni jarhani. Ju je jurajkuni eskajtsïni Jeoba arhiaka ambe engachi jatsika para úni imeri ambakiti juramukuecha jingoni. Ka ju je jarhuataani juchari erachichani paraksï méntkisï jurhimbikuarhu jarhani puákuntapariani imechani engajtsïni no sési pʼikuastajka ka ístu jarhuatapariani imechani engaksï uétarhinchajka. Jiájkani, no arhiparini náki uéjki tsʼéjkukuachi jatsini, méntkisïchi jurhimbikuarhu jauaka. w20.07 24, 25 párr. 15-17

Uékperakua jingoni, Jeoba kánikua jukaparharasïndi mándani arhini imeri marhuarini. Nájkirukachi iáminduecha mámaru jásï ánchikuarhita ambe újka, iáminduechachi jukaparhakueska ka uétarhinchasïngachi iáminduecheri jarhuajperata. Apostuli Pablu uandaspti eskachi no jatsiska para i ambe erataseni máteru erachicheri: “Jíkini no uétarhinchasïnga” (1 Kor. 12:21). Paraka pínandikua jauaka kúnguarhikuarhu, jatsiskachi para iáminduechani jukaparharaani ka ístu jarhuajperani (Efes. 4:16). Enga kúnguarhikua májku kʼéri jarhajka, erachichaksï pʼikuarherasïndi eskaksï xénchanhasïnga ka iámu kúnguarhikua sési jarhasïndi. Iámindu orhejtsïkutichaksï Jeobaeri espiritu santu jimbo erakunhasïndi, peru mándani arhiniksï mámaru ambe úsïndi úni (1 Kor. 12:17). Jamberiksï máru apenasi erakunhati para orhejtsïkutini ka nótkiksï míteni uánikua ambe, ka jamberiksï máteruecha pʼamenchakua jimbo o jimbokaksï jatiriskia, nóteruksï úsïndia uánikua ambe úni. Joperu no ma orhejtsïkuti jatsisti para i ambe eratseni máteru orhejtsïkuticheri: “Jíkini no uétarhinchasïnga tʼunguini”. Sánderu sési, iáminduechaksï jatsisti para úni ambe enga Pablu uandapka ixú Roma 12:10 jimbo. w20.08 26 párr. 1, 2; 27 párr. 4

Jeoba imeri kúnguarhikuani úrasïndi enga ixú parhakpinirhu jaka parajtsïni orhechepani imani xanharu jimbo enga tsípikuarhu pájpijka. Engajtsïni Tata Diosïri kúnguarhikua aiangujka eskaksï mójtakuska na engaksï kurhanguenga Bibliaeri jorhenguarhikua ma o engajtsïni arhijka na engachi jatsika para jámani, jirejiresïchi jiókuarhisïnga. Joperu, ¿ambechi úsïni enga ambe ma mójtakukuarhijka ka juchantsïni jamberi pájtamani, komu enga ataranhantajka ima Kʼumanchikua Reinueri engachi nirajka tánguarhini? Ambe ma engajtsïni jarhuataaka parachi seguirini tsípikua jingoni jámani, jindesti miáni eskachi ánchikuarhisïnga para Jeoba ka eska ima orhejtsïkuxaka imeri kúnguarhikuani (Kol. 3:23, 24). Rei Dabidi, ambakiti ejemplujtsïni ma íntskusti enga tumina íntspipka para templu únhani. Uandaspti: “¿Néski ji ka néski juchiti ireta, paraksïni úni mintsita jingoni íntskuni kéjtsïtakuechani? Jimboka iámindu ambe tʼunguini jimbo jurhasïnga, ka ambe engaksïni íntskujka jindesti ima ambe engajtsïni tʼu íntskujka” (1 Crón. 29:14). Engachi íntspijka tumina, juchajtuchi imani ambe íntskuni jarhasïnga Jeobani engajtsïni ima íntskujka. Joperu Jeoba jukaparharasïndi tiempuni, uinhapikuani ka tuminani engachi íntspijka para jarhuajpini imani ánchikuarhita jingoni enga ima uéjka eskachi uáka (2 Kor. 9:7). w20.11 22, 23 párr. 14-16

Jeobaeri testiguechachi no exesïnga na engachi xáni jánguarhintani jaka seguni na engachi xáni uánikua kʼuiripuechani jarhuataajka andaparhakuerani Tata Diosïri kúnguarhikuarhu (Luk. 8:11-15). Peru engachi no jurajkuska aianhpini ambakiti ambe ka jorhendaani máteruechani, Jeoba sési pʼikuarheraati juchari ánchikuarhita jimbo. ¿Andi? Jimbokachi kurhajchaxaka imani ka imeri Uájpani (Mar. 13:10; Uku. 5:28, 29). Ka iásï jatsiskachi para sánderu jánguarhintani, jimboka nóteru ióni jimbo kʼamajkunhakia i parhakpini anapu ambe. Nóteru ióni pakaraxatiia para ini ánchikuarhita úni enga pʼímutantspijka. Asï eratsi je eska parajtsï ini ánchikuarhitani úni, jatsiskajtsï para erokuarhini eska méntku iámu ambe sési jauaka chári irekuarhu. Iásïsti engajtsï jatsika para tsípikua jingoni aianhpini, sánderu jorhenguarhini Bibliaeri ambe parajtsï úni aianhpini, no chéni ka jandiajku jánguarhintani. Kuenta úkuarhi je jukari ochu miioni kʼuiripuecha jingoni engaksï aianhpini jaka Tata Diosïri ambe iámu parhakpinirhu ka niárajkajtsï pʼikuarherani “tsípikuarhita enga Jeobani jimbo jurhajka” (Neh. 8:10; Luk. 5:10). Aianhpi je na engajtsï xáni uáka astaka Jeoba uandaaka eska nóteria. w20.09 7 párr. 18-20

Nóchi jatsiska para sánderu tsitini jatsikuarhekua ambe uékani jatsini. Jatsikuarhekua ambe úpirindi úni eskachi nóteru xénchapiringuia Jeobani, nóteru jukaparharania imeri Karakatani ka ni uékani aianguani máteru kʼuiripuechani Bibliaeri ambe (Mat. 13:22). Engachi uéjka útasï imani ambe jatsini engajtsïni Jeoba íntskuka, jatsiskachi para jirejiresï úni ambe ma engachi exeaka eskajtsïni ambe ma uáka no sési úchini. Ju je antesi exeni ambechi uá úni enga ma repentku uéraaka Internetirhu, pelikularhu o telebisionirhu informasioni engaksï apostatecha petajka o enga ísku jándikueri ambe xarharaaka o atajperakueri ambe. Engachi tʼuini listu jauakia, jirejiresïchi míteaka ambe úni parachi kuájchakuni juchari pájperakua Jeoba jingoni ka eskajtsïni Jeoba seguirini jauaka jaiapanhentani (Sal. 101:3; 1 Tim. 4:12). Kristianuechachi jatsiska para kuájchakuni jukaparhakua ambe engajtsïni Jeoba íntskuka: ambakiti ambe enga Biblia uandajka ka kʼéri kóntperata para máteruechani jorhendaani indeni ambe. Engachi jukaparharaska indeni ambe, juchari konsiensia sési jauati, tsípikua jingonchi irekaaka ka sésichi pʼikuarheraaka máteruechani jarhuataani míteni Jeobani. w20.09 30 párr. 16-19

Engachi itsï atakuarhikia, arhikuekasïndi eskachi uánikuechani japarini xarhataskia eskachi mintsikasïnga Jeobani ka eskachi uékasïnga marhuakuni imeri kúnguarhikua jingoni. Ini jurhiatikuecha jimbo, na enga orhejtsïkujka Jeoba imeri kúnguarhikuani, xarhatasïndi na enga jásïka ima, ambe enga eratsetini jaka úni ka na enga uéjka eska úkuarhiaka ambe ma. Exe je tanimu ambe enga Jeoba újka ka enga imeri kúnguarhikua xarhatajka. Uénani jámani,‘Tata Diosï no nani kʼuetsapesïndi’ (Uku. 10:34). Uékperakua úspti eska Jeoba íntspepiringa imeri Uájpani para iáminduechani pʼímutantaani (Juanu 3:16; 1 Tim. 2:6). Parachi úni uánikua kʼuiripuechani jarhuataani paraksï pʼímutantskata uérani, Jeoba imeri iretani úrasïndi para ambakiti ambe aianguani iámindu kʼuiripuechani engaksï uékaaka kurhaani. Tsimani úni jámani, Jeoba Tata Diosï máesti enga uékajka eska iámindu ambe sési úkuarhiaka ka eska pínandikua jauaka (1 Kor. 14:33, 40). Ísï jimbo, erokuarhisïngachi eska imeri ireta marhuakuaka Jeobani sési úparini ambe ma ka pínandikua jingoni. Tanimu úni jámani, Jeoba jindesti “Ambakiti Jorhentpiri” (Is. 30:21). Ísï jimbo, Jeobaeri kúnguarhikua kánikua jánguarhintasïndi Bibliaeri ambe jorhentpini kúnguarhikuarhu ka ístu aianhpikuarhu. w20.10 20 párr. 1-3