Maiu

Enga Jesusi tumbi sapichuepka, kurhajchaaspti táti jémbechani. Úsïrendi ambe engaksï imecha arhienga ka no méni eratsespti eska sánderu jorhenaspka eska José ka Maria. Eska na jimbo ima sánderu kʼéripka, jánguarhintasïrendi paraka imeri familia no ma ambe kueratanchapiringa. Ka ístu jánguarhintaspti jorhenguarhini táti jémberi ánchikuarhitani para kéndani imeri familiani. Jamberiksï táti jémbecha aiangupti eska milagru ma jimbo kánguarhinhaspka ka ambe engaksï uandapka ánjelicha imeri ambe (Luk. 2:8-19, 25-38). Joperu Jesusi uékasïrendi sánderu ambe míteni. Ístu xarharasïndi eska imajtu jandiajku jorhenguarhisïrendi Karakatecheri ambe. ¿Nénachi míteski eska ima ambakiti jorhenguarhiri máespka Tata Diosïri Karakateri? Jimboka enga útasï tumbi sapichuepka, Jerusaleni anapu jorhentpiricha “eratsentanksï pakarasïrendi indeni jimbo enga ima xáni mítekupka ka enga xáni jurhimbitku mókukuarhienga” (Luk. 2:46, 47). Nájkiruka apenasi 12 jatiripka, Jesusi sési mítetixapti eska Jeoba jindespka imeri Táti jémba (Luk. 2:42, 43, 49). w20.10 29, 30 párr. 13, 14

Jakajkuni eska Jesusi tsíntaska, uáti eskachi jakajkuaka eskaksï ístu tsíntaaka imecha engachi uarhiranchaaka. Enga Pablu karapka tsíntskueri ambe, tanimu ambe uandaspti: “eska Kristu uarhispka juchari pekaduechani jimbo”, “eska jatsinhantaspka” “ka tanimu jurhiatikua jimbo tsíntani eska námindu karakata jaka” (1 Kor. 15:3, 4). ¿Ambe arhikuekasïni para jucha enga Jesusi uarhika, jatsinhantani ka tsíntani? Profeta Isaiasi uandasptia eska Mesiasi uándikunhapiringa “echerirhu engaksï tsípiticha jaka” ka eska intsïnhapiringa “tumba ma no sési úricha jingoni”. Ístu Isaiasi uandaspti: eska Mesiasi kénditapiringa “pekaduechani uánikuecheri”. ¿Néna úski i ambe? Enga íntspika imeri tsípikuani parajtsïni pʼímutantani (Is. 53:8, 9, 12; Mat. 20:28; Rom. 5:8). Ísï jimbo, enga Jesusi uarhika, jatsinhantani ka tsíntani, úsïndi eskachi seguru jauaka eskachi nóteru pekadu jukaraakia ni uarhini ka eskachi ménderu exeantauaka imechani engachi uarhiranchaaka. w20.12 2, 3 párr. 4-6; 5 párr. 11

Apostoli Pablu someni aianhpisïrendi judiuecheri sinagoguecharhisï. Por ejemplu, sinagogarhu enga Tesalonika japka, Pablu uandontskuarhespti judiuecha jingoni ka “tanimu semana jámaspti arhistakuani [...] Diosïri Karakatani jimbo” (Uku. 17:1-3). Ima kánikua sési pʼikuarherendi sinagogarhu, jimboka ísï kʼuiripespka eska judiu ma (Uku. 26:4, 5). Pablu kurhangukuasïrendi judiuechani ka jimbosï uéni sési uandontskuarheni imecha jingoni (Filip. 3:5). Engaksï imeri ikiatspiticha chúntapka Pabluni Tesalonika uératini ka ísï tátsekua jini Berea, ima Atenasi niraspti. Enga jini japkia, ménderu uénaspti “arhistakuani imechani engaksï janhanharhienga Diosïni ka ístu Israeli anapuechani [sinagogarhu]” (Uku. 17:17). Peru enga merkadurhu ísï aianhpienga, jima máteru jásï kʼuiripuechani exeantasïrendi. Jimesïsïksï jarhasïrendi kʼérati jorhenaticha ka ístu no judiuecha engaksï no méni kurhaani japka ambe enga Pablu aianhpienga. Arhisptiksï Pabluni: ‘I ambe engari tʼu uandajka iatiru ménderueni kurhangukuarhisïndi para jucha’ (Uku. 17:18-20). w20.04 9 párr. 5, 6

Ju je no eratseni eskachi no méni uáka mójtakurhini. Jimbokachi iáminduecha niárasïnga no sési ambe úni, uétarhinchasïngachi Jeobaeri kóntperatani engajtsïni íntskuka Jesusiri uarhikua jimbo (Efes. 1:7; 1 Juanu 4:10). Ka engachi uétarhinchajka parachi uinhaperanhantani, uákachi kúnguarhikuarhu anapu erachicha ka pirenchicha jingoni nirani. Imajtsïni kurhajchaati ka uinhaperantani jiáni engachi uétarhinchaaka (Prov. 12:25; 1 Tes. 5:14). Nigeria anapu pirenchi ma enga Julia arhinhajka ka enga jánguarhintani jaka para no chketakuarhini, uandasïndi: “Enga no erachicha jimboepiringa, no úpiringa jandiajku orhepani uérani. Inde ambe xarhatasïndi eska Jeoba kurhauasïnga juchiti kómarhikuechani. Astajtsïni jorhendasti néna sési pʼikuastantaani imechani engaksï kómu pʼikuarherani jarhajka”. Ísïsti, erachichaksï no méntkisï kuenta íntskukuarhiati engachi uétarhinchani jauaka eskajtsïni uinhaperantaaka. Ísï jimbo, jatsiskachi para jucha uénani andarhieraani erachichani o pirenchichani engaksï eratsekua jukarika parajtsïni jarhuatani. w20.12 24 párr. 7, 8

Sáno méntkisï, parakaksï tsimani kʼuiripuecha niáraaka amigueni, jatsistiksï para májku kʼéri kúnguarhini ka uandontskuarheni imeri ambe engaksï eratsejka, na engaksï pʼikuarherajka ka ambe engaksï nitamakuarhijka. Peru engachi eratsentajka Jesusiri amigueni, jamberichi exejka eska sánderu úkua jukaaka jimbokachi no méni niáraska exeni Jesusini. Uánikua erachicha primeru siglurhu anapuechajtuksï no méni niáraspti exeni. Nájkiruka ísïpka, apostuli Pedru arhiaspti: “Ima jindesti engajtsï cha xáni uékajka nájkirukajtsï no méni exeka, ka mintsikasïngajtsï nájkirukajtsï iásï no exeni jaka” (1 Ped. 1:8). Ísï jimbo, no uétarhisïndi eskachi exeaka Jesusini parachi niárani imeri amigueni. Ístu, nóchi úsïnga Jesusi jingoni uandontskuarheni. Jeobanchi uandajpasïnga engachi kómarhikua újka. Ísïsti eskachi Jesusiri nombrini úrasïnga, peruchi no imanisï uandontskuarhikujka. Ka Jesusi no uékasïndi eskachi imani kómarhiaka, jimboka ístuchi kómarhikua jingoni kʼéri ambe arhisïnga Jeobani ka imantkuchisï jatsika para kómarhini (Mat. 4:10). Peru ístuchi uáka xarhatani eskachi xénchasïnga Jesusini. w20.04 20 párr. 1-3

Ióntki jini Gresia, imecha engaksï karrerarhu ma uirienga, jatsisïrendiksï para jánguarhintani nájkirukaksï kuatarapiringa ka pʼamerhikuarheni. Peru ambe engaksï imecha uénga, jindespti mintsikani ambe engaksï arhistaminhenga ka imecheri uinhapikuani. Májkueni eska imechani, juchajtuchi arhistaminhasïnga parachi uiriini ini karrera jimbo o ísï irekani eska Jeoba na juramujka. Peru juchachi jatsiska sánderu ambakiti jarhuajperata ma: Jeobajtsïni íntskusïndi uinhapikua enga no méni kʼamakurhijka. Engachi imani mintsikaska, imajtsïni aiachesïndi eskajtsïni jarhuataaka ka eskajtsïni sánderu uinhapiti uáka. Apostuli Pablu jatsispti para uánikua ambe tekaantani. No solu tekaantaspti engaksï máteruecha no sési arhienga ka no sésiksï kámani, ístu, ménisï ísï pʼikuarherasïrendi enajki nóteru jatsipia uinhapikua ka kʼéri mískuarhita ma jatsispti imeri kuerpurhu komueska chekamikua ma (2 Kor. 12:7). Peru inde ambe no úspti eska nóteru uékapiringuia marhuakuni Tata Diosïni, sánderu sési, úraspti indeni ambe para xarhatani eska mintsikasïrenga Jeobani (2 Kor. 12:9, 10). Ini ambe jimbo, Jeoba méntkisï jarhuataspti. w20.04 29 párr. 13, 14

Jatsiskachi máteru jatsikuarhekua ambe enga no xarharajka: májku kʼéri ánchikuarhini Jeoba, Jesusi ka ánjelicha jingoni (2 Kor. 6:1). Imajtsïni jarhuatasïndi méni engachi nirajka jorhendaani kʼuiripuechani. Pablu arini ambe uandaspti imeri ambe ka máteru aianhpiricheri: Jindeskachi “Diosïri jarhuajpiricha” (1 Kor. 3:9). Engachi nirajka aianhpini, ístuchi ánchikuarhisïnga Jesusi jingoni. Ju je miáni eska ísï tátsekua enga Jesusi na juramukuapkia imeri chúxapatichani eskaksï nipiringa “jorhendaani iámindu kʼuiripuechani”, arhiaspka eska imecha jingoni japiringa (Mat. 28:19, 20). ¿Ka nénajtsïni jarhuatasïni ánjelicha? Kánikuachi jukaparharasïnga engajtsïni ánjelicha orhechipajka jiáni engachi aianguani jarhajka “ambakiti aianhperakuani enga jindeka para méntkisï [...] iámindu kʼuiripuechani” (Jaŋ. 14:6). Engachi aianhpijka Tata Diosïri Reinueri ambe, máru kʼuiripuecha engaksï ambakiti mintsita ma jukaka, uékasïndiksï sánderu ambe míteni (Mat. 13:18, 23). ¿Né úsïni eskaksï i kʼuiripuecha uékaaka sánderu ambe míteni ka niárani Jeobani marhuakuni? Jesusi uandantasïndi i ambe iásï anapu teksturhu. w20.05 30 párr. 14, 15

Iásï uánikua temungurhirichaksï diborsiarikuarhistia, tátichaksï no úsïndi sési pájperani ka sapiichaksï ísï pʼikuarherasïndi enajki no nema xénchaajki. Ka ístuksï jarhasti familiecha engaksï seguirini jaka márku irekani, joperuksï no uandajperani. Kʼuiripu ma enga i járhati familiechani jarhuataajka, uandasïndi: “Nándi, táti ka sapiicha nóksï uandontskuarhesïndi, sánderuksï komputadora, tableta, telefonu o bideojueguechani ambe úrani jarhasïndi. Nájkirukaksï márku irekani jaka, sántkuksïsï mítperajti”. Nóchi uékasïnga nóteru xénchpenia eska iásï anapu kʼuiripuecha. Sánderu sési, jatsiskachi para sánderu xarhatatsperani uékperakua no solu juchari familiarhu anapuechani jingontku, sino ístu kúnguarhikuarhu anapu erachichani jingoni (Rom. 12:10). ¿Na jásïski i uékperakua? Ima jásïsti engachi familiarhu anapuecha jimbo pʼikuarherajka engachi ambakiti pájperakua ma jatsijka ka engachi sési pʼikuarherajka imecha jingoni ka xénchperani. Ka inde ambechisï jatsika para pʼikuarherani juchari kúnguarhikuarhu anapu erachichani jimbo. Engachi xarhatatsperaaka i jásï uékperakua, jarhuajperasïngachi parachi seguirini májku kʼéri marhuakuni Jeobani (Miq. 2:12). w21.01 20 párr. 1, 2

Ma ekipurhu anapuecha engaksï futboli chʼanajka, sésiksï nikuauati engaksï márku ánchikuarhiaka. Ka juchari mintsita ísïuati eska i ekipu engachi iámu eratsekua ka mintsita jingoni marhuakuska Jeobani. Ju je miáni eska Noambakiti kánikua tsitipiringa engachi no iámu mintsita jingoni marhuakupiringa Jeobani. Uékasïndi eskachi úkua jukanchaaka úni ambe enga Jeoba uéjka, imani ambe jimbo engachi jucha tsitijka. Engachi uéjka marhuakuni Jeobani, jatsiskachi para iámu mintsita jingoni ísï úni (Mat. 22:36-38). Ju je no méni jurajkuni eska Noambakiti uáka eskachi no iámu mintsita jingoni marhuakuaka Jeobani. Ju je kómarhini Jeobani májkueni eska Dabidi: “Ú eskani iámu mintsita jingoni janhanharhiaka chíti nombrini”. Ka ju je jánguarhintani ísï úni. Ka eska ima ambe engachi erakujka úni, no arhiparini sini sapichitu ambeski o kʼéri ambeeni, xarhataaka eskachi mintsita jingoni janhanharhisïnga Tata Diosïri pímbinhasï nombrini. Engachi ísï úska, jukanchaakachi para arhinhani eskachi Jeobaeri testigueska (Prov. 27:11). Ka iáminduechachi uáka májkueni uandani eska profeta Mikeasi: “Juchachi Jeobaeri nombri jimbo jámaaka enga juchari Tata Diosïka para méntkisï” (Miq. 4:5). w20.06 13 párr. 17, 18

Ambe enga nortirhu anapu rei ka máteru parhakpinirhu anapu juramukuecha uékaaka úkuni Tata Diosïri iretani, uáti eska Jeoba kánikua ikiauaka ka uénakuarhiati kʼéri uarhiperakua enga jindeka Armajedoni (Jaŋ. 16:14, 16). Enga i ambe uénakuarhiakia, nortirhu anapu rei “niáraati kʼamajkunhani, ka no nema jauati enga uáka jarhuatani” (Dan. 11:45). Daniel 12:1 sánderu ambe uandasïndi na enga kʼamajkunhaaka nortirhu anapu rei ka máteru juramukuecha ka ístu uandasïndi na engachi pʼímutantanhaaka. ¿Ambe arhikuekasïni i bersikulu? Juchari Rei Jesukristu, ístu Migueli arhinhasïndi. Jiáni uératini enga uaxastanhaka Tata Diosïri Reinu auandarhu, 1914 jimbo, ima anhandetixati para Tata Diosïri iretani kuájpini. No ióni jimbo “jauaraati”, i ambe arhikuekasïndi eska kʼamajkuauaka imeri ikiatspitichani imani uarhiperakua jimbo enga Armajedoni arhinhajka. I uarhiperakua jingoni, kʼamakurhiatiksï ima jurhiatikuecha enga Danieli uandapka eskaksï kánikua uandanhiakuarhipiringa (Jaŋ. 6:2; 7:14). w20.05 15, 16 párr. 15-17

Enga José jántspiri máepka ka enga ónhakuarhitini japka, no ma ambe úpirindi úni para sési peentani ambe ma. ¿Ambe jarhuataspi paraka ambakiti ambe eratsepiringa? Jánguarhintaspti sési úni imeri ánchikuarhitani enbesde eratseni jarhani imani ambe enga no uénga úni. Jánguarhintaspti méntkisï orheta peerani Tata Diosïri ambe imeri tsípikuarhu, ísï jimbo ima újchakurasïrendi iámindu ambe enga José uénga (Gén. 39:21-23). Ambe enga nitamakuarhipka José, miátantasïndijtsïni eska ini parhakpini jimbo enga xáni no sési jánhaskuarhika, jauaka kʼuiripuecha engajtsïni no jurhimbikua jingoni kámaaka. Asta jamberijtsïni juchari erachi ma úpirindi no sési kámani. Joperu engachi ísï exeska Jeobani komueska juchari kuájchakukua, nóchi no sési pʼikuarheraaka ka seguiriuakachi marhuakuni (Sal. 62:6, 7; 1 Ped. 5:10). Ístu, ju je miáni eska José tumbi máespka enga Jeoba tsánharhitapka. Í ambe sési xarharasïndi eska Jeoba mintsikaasïnga uátsïchani ka tumbiichani engaksï imani marhuakujka. Ini jurhiatikuecha jimbo, uánikuechaksï jarhasti engaksï ónhakuarhitini jaka jimbokaksï no jurajkusïnga Tata Diosïni (Sal. 110:3). w20.12 16 párr. 3; 17 párr. 5, 7

Kʼéri kóntperata máespti para apostuli Pedru ka Juanu engaksï no sési kánhenga jimbokaksï Jesusiri chúxapatispka ka jimbokaksï aianhpisïrenga ambe enga Jesusi jorhentpipka (Uku. 4:18-21; 5:27-29, 41, 42). Primeru siglurhu anapu kristianuechaksï no jatsispti ambe jimbo kʼuratseni, jimbokaksï ima chúxapaticha engaksï xáni kaxumbitipka, sánderu ambakiti ambeksï úspka kʼuiripuecha jimbo ka eska imecheri ikiatspiticha. Por ejemplu, ima karakatecha engaksï Tata Diosïri jarhuajperata jimbo karaapka, asta iásï jamberiksï uánikua kʼuiripuechani marhuakuaxati ka úsïndiksï eskaksï erokuarhikua ma jatsiaka. Ka ima Reinu engaksï imecha aianhpienga, ini jurhiatikuecha jimbo úkuarhixati ka no ióni jimbo iámu Echerirhu juramuati (Mat. 24:14). Peru ima kʼéri juramukua enga xáni no sési kaapka ióntki anapu kristianuechani, nóteru ambe ma parakarastia. Ístu, ima ambakiti Jesusiri chúxapatichaksï iásï auandarhu juramuxatia. Peru imecheri ikiatspitichaksï uarhistia; ka engaksï ma repentku niáraska tsíntani, ima Reinu juramukuauati engaksï kristianuecha aianhpienga ka engaksï imecha xáni kurhunhiauenga (Jaŋ. 5:10). w20.07 15 párr. 4

Jimboka Abraani xáni mintsikasïrenga ambe enga Tata Diosï aiakupka, ísïspti enajki exepirini Tata Diosïri Erakukatani o Mesiasini enga Reipiringa Tata Diosïri Reinurhu. Jimbosï Jesusi arhiapti judiuechani: “Chári táti Abraani tsípesïrendi jimboka exepiringa juchiti jurhiatikuani, ka exestia ka tsípisti” (Juanu 8:56). Xarharasïndi eska Abraani mítespka eskaksï imeri uájpecha japiringa Juramukuarhu ma jimbo enga Jeoba uaxastapiringa ka ima eratsetixapti erokuarhini astaka Jeoba úpiringa ambe enga aiakupka.¿Néna xarhataspi Abraani eska erokuarhixapka imani iretani —o Reinuni— enga Tata Diosï uaxastaka? Orheta, jimboka no niáraspka parhakpini anapu reinu ma jingoni kuenta úkuarhini. No niáraspti irekani ma lugari jimbojku ni niárapi juramutini ma jingoni jámani. Ístu, ima no méni eratsespti juramukua ma uaxastani. Sánderu sési, méntkisï kurhajchaspti Jeobani ka erokuarhispti eska ima úpiringa ambe enga aiakupka. Ísï xarhataspti eska kánikua mintsikasïrenga Tata Diosïni. w20.08 3 párr. 4, 5

Jeoba aiatspesïndi eska Kristueri juramukua jimbo, no nema uandaaka: “Pʼamenchaxaka” (Is. 33:24). Ísï jimbo, enga Tata Diosï ménderu íntsantauaka tsípikua imechani engaksï uarhikia, nóteruksï ambe ma pʼamenchaatia. Peru i ambe no arhikuekasïndi eskaksï jirejiresï perfektueuaka, jimboka enga ísïpiringa, imeri familiarichaksï jamberi no míteantapirindi. Peekaksï iámindu kʼuiripuecha sánhani arhiaka perfektueni imani Mili Uéxurhini jimbo enga tata Jesukristu Juramuaka. Enga na nitamakia i mili uéxurhini, Jesusi íntskuntaati juramukuani imeri Tátini. Jiájkani, kʼamaraatia úkuarhini ambe enga jimbo uaxastanhapka i juramukua ka ístu úni eska kʼuiripu perfektueuaka (1 Kor. 15:24-28; Jaŋ. 20:1-3). Ju je eranhaskani nénachi pʼikuarheraa ménderu exeáni imechani engachi uarhiranchaka. ¿Tsípiachi? ¿Ueraachi xáni tsípini? ¿Xánchi tsípia engachi jamberi pirekuaka Jeobani? Ambe engachi kʼóru pʼikuarheraaka, jindesti eskachi kánikua xénchaaka juchari Táti uékpitini ka ístu imeri Uájpani enga xénchpijka jimbokaksï úska eska jauaka tsíntskua. w20.08 16, 17 párr. 9, 10

Apostoli Pablu arhiaspti kristianuechani eskaksï exepiringa sinksï úpirini no tembuchani o uambuchani para Jeobani marhuakuni (1 Kor. 7:8, 9). Ísïsti, Pablu méntkisï jukaparharaaspti imechani engaksï no tembuchatipka o uambuchatini. Asta jamberi erakuspti Timoteuni enga no tembuchatini japka para kʼéri ánchikuarhita ambe úni kúnguarhikuarhu (Filip. 2:19-22). Ísï jimbo, no sési japirindi eratseni eska erachi ma no uáka sési úni o eska sánderu sési uáka imeri ánchikuarhitani solu jimboka tembuchatiska o nómbe (1 Kor. 7:32-35, 38). Jesusi ka Pablu nóksï jorhentpespti eska kristianu ma jatsiska para tembuchani o uambuchani o nómbe. Jiájkani, ¿ambechi uá uandani temungurhirikueri ambe ka imecheri engaksï no tembuchatika o uambuchatini? Rebista La Atalaya 1 de oktubri 2012 anapu, i ambe arhisïrendi: “Sési jimbo, Tata Diosïri intsïmperakua máesti tembuchatini o uambuchatini jarhani o nómbe. [...] Jeoba no exesïndi eska no tembuchani o uambuchani, jindeska para no sési pʼikuarherani ni kʼuratseni”. Ísï jimbo, jatsiskachi para kánikua jukaparharaani kúnguarhikuarhu anapu erachichani ka pirenchichani engaksï no tembuchatika ni uambuchatini. w20.08 28 párr. 8, 9

Maru paisicharhu kʼuiripuechaksï tsitisïndi kurhaani ambakiti ambe Reinueri. Ka indeni ambeksïsï uétarhinchani japti kurhaani. Peru máteru nanisï kʼuiripuechaksï no tsitisïndi uandontskuarheni Tata Diosïri ambe o Bibliaeri. Ia sea kʼuiripuecha kurhaani o nómbe, Jeoba uékasïndi eskachi seguiriuaka aianhpini astaka ima exeaka eskachi nóteru uákia ini ánchikuarhitani. Enga niárakia ima jurhiatikua enga Jeoba exerini jakaia, nóteruchi aianhpiakia ka “jimajkani kʼamaraati i tiempu” (Mat. 24:14, 36). Jesusi uandaspti ambe enga úkuarhini japiringa últimu jurhiatikuecha jimbo ka na engaksï jásïpiringa kʼuiripuecha. Ístu uandaspti eska i ambe úpiringa úni eska imeri chúxapaticha no orheta peerapiringa aianhpikuani. Ísï jimbo arhiaspti: “Méntkisï jingontku je” (Mat. 24:42). Noeri jurhiatikuecha jimbo, jarhaspti uánikua ambe enga úpka eskaksï kʼuiripuecha no kasu úpiringa ambe enga Noe aianhpienga ka iásï májkueni úkuarhixati (Mat. 24:37-39; 2 Ped. 2:5). Jimbochisï uéjka méntkisï orheta peerani ini ánchikuarhitani engajtsïni Jeoba íntskuka. w20.09 8 párr. 1, 2, 4

Noambakiti ‘kánikua ikiaxati’, ka no sési japirindi eratseni eskajtsïni ima no niáraaka tsʼéjkuni (Jaŋ. 12:12). Nóteru ióndani, iámindu kristianuechachi niáraaka tsʼéjkunhani juchari jakajkukua jimbo. No ióni jimbo jauati “kʼéri mískuarhita ma”. Biblia uandasïndi eska jauaka ma “kʼéri mískuarhita enga nótki méni jarhani jaka desde enga parhakpini kueraanhaka asta iásï jamberi” (Mat. 24:21). Imani tiempu jimbo, jamberijtsïni juchari familiaricha no sési kámaati ka juramutichajtsïni nóteru jurajkunia úni juchari ánchikuarhitani (Mat. 10:35, 36). Ju je kurhamarhikuarhini: “¿Ísïua eska rei Asá ka mintsikaa eskarini Jeoba jarhuataaka ka kuájchakuni? Jeoba uékasïndi eskachi listu jauaka imani ambe jimbo engachi sánderu orhepani nitamakuarhiaka. Ísï jimbo, úxati eskachi sánderu mintsikaaka imani. Úraxati jántspirini “enga mintsinharhikueka” ka jánhaskatini parajtsïni íntskuni imani ambe engajtsïni jarhuataaka orhepani uérakuani tsʼéjkukuechani (Mat. 24:45). Peru juchachisï jatsika para jánguarhintani sánderu mintsikani Jeobani (Ebr. 10:38, 39). w20.09 18 párr. 16-18

Enga ambe ma terukuntajka imani ambe jingoni enga Jeoba uékajka, ima úrasïndi imeri espiritu santuni enga kánikua uinhapitika para úni eskaksï imecha engaksï juramukua jatsika uáka ambe enga ima uéjka. Kʼuiripuechaksï úsïndi iurhekuani ma jirukukuni paraksï itsïni jimesïsï páni nani engaksïsï uékaaka. Sáno májkueni, Jeoba úrasïndi imeri espirituni paraksï juramuticha úni ambe enga ima uéjka. Ka enga ísï újka, juramutichaksï imani ambe úsïndi enga marhuakuaka Tata Diosïri iretani (terukutanta je Esdras 7:21, 25, 26 jingoni). ¿Ambechi uá úni jucha? Uákachi kómarhijpikuani “reicha ka iámindu juramutichani” jiáni engaksï jatsiaka para uandani ambe enga úkuarhiaka imani ambe jingoni engachi kristianuecha újka (1 Tim. 2:1, 2; Neh. 1:11). Májkueni eskaksï na úpka erachicha primeru sigluru, juchajtuchi mintsita jingoni kómarhisïnga Jeobani juchari erachicha jimbo engaksï ónhakata jaka (Uku. 12:5; Ebr. 13:3). w20.11 15 párr. 13, 14

Kánikuachi sési pʼikuarherasïnga enga itsï atakuarhijka nema engachi jorhendaka Bibliaeri ambe (1 Tes. 2:19, 20). Imecha engaksï apenasi itsï atakuarhijka ísïsïndiksï komueska ambakiti karakata ma enga sési ambe uandajka imeri ambe enga Bibliaeri ambe jorhendaka ka ístu iámindu kúnguarhikueri (2 Kor. 3:1-3). Kánikuachi tsípisïnga enga últimu tʼámu uéxurhinicha jimbo, interu parhakpinirhu, mándani kutsï, ma 10,000,000 Bibliaeri jorhenguarhikuechani únhaaska. Ka ini mismu tiempu jimbo, mándani uéxurhini jukari 280,000 kʼuiripuechaksï itsï atakuarhisti. Eskachi na exejka, útasïksï uánikua jorhenguarhiricha jarhasti engaksï uáka itsï atakuarhini. ¿Nénachi uá jarhuataani? Jeoba tekaantstisti ka íntsaaxati kʼuiripuechani tiempu paraksï niárani tata Jesukristueri chúxapati úkuarhini. Sánderkusï tiempu pakarani jatiia, jimbochisï uéjka jánguarhintani na engachi xáni uáka para jarhuataani parakaksï niáraaka marhuakuni Tata Diosïni ka itsï atakuarhini (1 Kor. 7:29a; 1 Ped. 4:7). w20.10 6 párr. 1, 2

Rei Sauli no kurhajchaspti Jeobani. Enga profeta Samueli arhipka eska no sési úspka, Sauli no jiókurhispti. Sánderu sési kuájpekuarhispti uandaparini eska no xáni kʼéri ambespka ka eska kʼuiripusï arhipka eska ísï úpiringa (1 Sam. 15:13-24). Joperu no jiáni uénaspti ísï jámani (1 Sam. 13:10-14). Kánikua no sési úspti jimboka jurajkuspka eska imeri mintsita kʼéramakuarhipiringa. Jeoba xukaspti ka nóteru jaiapanhentasptia jimboka no mójtakuspka imeri eratsekuani. Nóchi uékasïnga ísïni eska Sauli, ísï jimbo ju je kurhamarhikuarhini: “¿Jirinhakuntasïni parani no ísï úni eskaksï Bibliaeri konsejuecha na arhijka? ¿Eratsesïni eskarini no xáni no sési nicheaka imani ambe jimbo engani uáka? ¿Uandasïni eskajtsïni máteruecha pájtamasïnga parani no sési ambe úni?”. Engachi máru ini kurhamarhikuechani mókuanta eska jo, jatsiskachi para mójtakuni na engachi eratsejka ka jámani. Engachi no ísï úska, juchari mintsita úpirindi xáni kʼéramakuarhini enga Jeoba no uékapirindi juchari amigueni. w20.11 20 párr. 4, 5 

Uátsïcha ka tumbiicha eraku je néni marhuakuni. Jatsiskari para tʼujkumindu exeni né jindeski Jeoba, ambesï uéjki úni ima ka nénari uá tʼu imani ambe úni (Rom. 12:2). Solu ísïri uáka erakuni ambe enga sánderu jukaparhakueka engari uáka úni: niárani Jeobani marhuakuni (Jos. 24:15). Engari no jurajkuska arhintani ka jorhenguarhini Bibliaeri ambe, sánderuri xénchaaka Jeobani ka sánderuri mintsikaaka. Orheta peera ambe enga Jeoba uékajka. Satanasiri parhakpini aiatspesïndi eska engari úska ambe engari jorhenaka úni parari tʼujkumindu sési uéranchani, eskari tsípikua jingoni irekaaka. Joperu imecha engaksï jánguarhintajka jatsikuarhekua ambe tánani, mámaru járhati uandanhiatechanksï jatsiasïndi (1 Tim. 6:9, 10). Joperu engari Jeobani kurhajchaska ka erakuni úni ambe enga ima uéjka, sésikeni nicheati chíti irekuarhu ka “mímixekua jingondi jámaaka” (Jos. 1:8). w20.10 30, 31 párr. 17, 18

Primeru siglurhu Jesusi erokuarhikua ma íntsaaspti iámindu kʼuiripuechani imani ambe jingoni enga jorhentpipka. Juramukuaspti imeri chúxapatichani eskaksï seguiripiringa imani ánchikuarhitani úni enga ima uénapka ka eskaksï aianhpepiringa “asta jima enga sánderu iauanika” (Uku. 1:8). Ísïsti, nóksï úpirindi imecheri uinhapikua jingontku úni, uétarhinchapirindiksï espiritu santu, “jarhuajpiri” enga Jesusi aiakuapka (Juanu 14:26; Zac. 4:6). Jesusiri chúxapatichaksï intsïnhaspti espiritu santu Pentekostesiru uéxurhini 33 jimbo. I espiritueri jarhuajperata jimbo, jirejiresïksï uénaspti aianhpini ka no ióni jimboksï uánikua kʼuiripuecha jiókuarhispti ambakiti aianhperakuani (Uku. 2:41; 4:4). Ka engaksï uénapka no sési kánhani nóksï chéspti. Sánderu sési, kurhakusptiksï Tata Diosïni jarhuajperata ka kómarhisptiksï: “Íntskujtsïni uinhapikua juchantsïni engachi jindeka chíti jántspiricha, ka eskachi uáka uandantani chíti uandakuani no sáni chéparini”. Jimajkani, intsïnhasptiksï espiritu santu ka seguirisptiksï uandantani Tata “Diosïri uandakuani no sáni chéparini” (Uku. 4:18-20, 29, 31). w20.10 21 párr. 4, 5

¿Andichisï uaa seguru jarhani eska Jeoba tsítantaska Jesusini? Uánikuaksï exespti Jesusini enga ima tsíntapkia (1 Kor. 15:5-7). Primeru enga uandapka apostoli Pablu, jindespti Sefasini, enga jindeeka apostuli Pedru. Ístu, máru Jesusiri chúxapatichaksï uandaspti eska Pedru exespka Jesusini enga tsíntapkia (Luk. 24:33, 34). Ístuksï exespti “iámindu apostulicha”. Ka ísï tátsekua xarhakuaspti “sánderu ka eska kinientosi ermanuechani engaksï májku japka”, jamberi i ambe Galilea úkuarhipti ka jindeepti enga uandanhantajka Mateu 28:16-20 jimbo. Ístu xarhakuspti Santiaguni, enga Jesusiri mediu ermanuepka ka enga jiánisï, no jakajkuenga eska Jesusi jindeespka Mesiasi (Juanu 7:5). Joperu jiáni jakajkuspti enga na exepkia Jesusini eska tsíntaspka. Kánikua jukaparhakuesti eska jiánisï enga Pablu karapka ini kartani, uéxurhini 55 jimbo ísï, uánikuecha engaksï exepka Jesusini eska tsíntaspka útasïksï tsípiti jarhaspka. Ísï jimbo, imecha engaksï no jakajkuenga úpirindiksï ícha jingoni uandontskuarheni. w20.12 3 párr. 5, 7, 8

Úkua jukasïndi eskachi sési pʼikuarheraaka jiáni engachi pʼamenchani jarhajka ka sánderia engachi ióni ísï jarhajkia. Ju je Jeobaeri jarhuajperata jirinhani. Ísïsti, Jeobajtsïni no milagru ma úchiati parachi ambakentani, joperujtsïni sési pʼikuastantaati ka uinhaperantani parachi úni tekaantani (Sal. 94:19). Por ejemplu, uáti úni eskajtsïni máru erachicha ka pirenchicha jarhuataaka ambe ma jingoni juchari kʼumanchikuarhu ojtsïni ánchperata ambe nirani úchini o eskajtsïni kómarhijpichiaka. Ístujtsïni Jeoba uáti miátantani ambe engajtsïni arhijka imeri Karakatarhu engajtsïni sési pʼikuastantajka, komu ima ambakiti tsípikua engachi jatsiaka jimbanhi parhakpinirhu nani engachi nóteru pʼamenchakia nijtu no sési pʼikuarherani (Rom. 15:4). Joperu, jamberichi úpiringa no sési pʼikuarherani jimbokachi no úsïnga xáni aianhpini eskachi xáni uékapiringa jimbokachi pʼamenchakua ambe kánguarhisïnga o jimbokachi jatiriskia. Pirenchi ma enga arhinhajka Laurel, 37 uéxurhini jarhaspti mákinarhu ma inchanhikurhitini enga jarhuatenga para jirejtani. Ístu, kánseri pʼiraspti, uánikua operasionichani úminhaaspti ka uánikua pʼamenchakuechani jatsiaspti pieliru. Peru no méni jurajkuspti aianhpini. Uandontskuarhekuasïrendi enfermeruechani ka imechani engaksï nirenga exeni. Jarhuataaspti ma 17 kʼuiripuechanisï Jeobaeri ambe jorhenguarhini. w20.12 24 párr. 9; 25 párr. 12

Uéxurhini 56 jimbo ísï jini Jerusaleni uánikua kʼuiripuechaksï antsikuspti apostoli Pabluni templurhu uérakua ka uékasïrendiksï uándikuni. Pauandikua, engaksï Sanedrinirhu pápka, imeri ikiatspitichaksï sáno uándikuspti (Uku. 21:30-32; 22:30; 23:6-10). Enga Pablu ini ambe nitamakuarhipka, jamberi kurhamarhikuarhipti: “¿Na xánderuni uá tekaantani engani xáni no sési kánhani jaka?”. Meru uétarhinchaxapti jarhuajperata. ¿Néna jarhuatanhaspi Pablu? Ima chúri enga na jupinhapkia, Tata —enga tata Jesukristueka— xarhakuspti ka arhini: “Uinhapikuarhinta Pablu, jimboka uétarhisïnga eskari ístu uandantaaka juchiti ambe Roma, eskari na uandantakia Jerusaleni” (Uku. 23:11). Pablu meru ini ambesï uétarhinchani japti. Jesusi sési ambe arhispti Pabluni jimboka aianhpispka jini Jerusaleni ka aiakuspti eska sési niárapiringa Roma nani enga ístu aianhpepiringa. Enga Jesusi ini ambe aiakupka, Pablu ísï kuájchakukata pʼikuarherapti komueska sapi ma enga imeri táti jémba jingoni jarhajka. w20.11 12 párr. 1; 13 párr. 3, 4

Erokuarhini jarhani ambe enga juaaka Tata Diosïri Reinu “ísïsti para juchari almecha komueska ma ankla”, engajtsïni jarhuatajka jiáni engachi uandanhiatechani jatsiajka ka engachi no sési pʼikuarherani jarhajka. Eratsenta je eska Jeoba aiatspesïnga eska sánderu orhepani nóteru nema uandanhiauakia (Is. 65:17). Eranhaska je eskajtsï jimbanhi parhakpinirhu jarhaskia, nani enga pínandikua jauaka ka nóteru úkuarhini no sési jásï ambe (Miq. 4:4). Máteru ambe engaksïni jarhuataaka no mirikurhini aiatsperakuani, jindeesti aianguani máteruechani indeni ambe. Ísï jimbo, jánguarhintsï je aianhpini ka Jesusiri chúxapatichani uáni. Engajtsï ísï uáka “asta kʼamarhutani jamberi” andajkuarhiakajtsï “pʼirani indeni ambe engajtsï erokani jaka” (Ebr. 6:11). Enga na axuterku jauakia para kʼamajkunhani i parhakpini, sánderu problemechani ka uandanhiatechanchi jatsiauaka ka úpiringachi sánderu no jánhaskani ambe úni. Uákachi orhepani uérakuani problemechani ka no xáni uandanhiani engachi mintsikaska Jeobani ka no juchari uinhapikua jimbo. Eskachi iáminduecha xarhataaka juchari úkuecha jimbo eskachi mintsikaxaka ambe engajtsïni Jeoba aiachijka: “Chájtsï uinhapiti jauaka engajtsï no sáni chéska ka engajtsï mintsinharhikua xarhataska” (Is. 30:15). w21.01 7 párr. 17, 18

Ju je exeni eska Salmo 103:8 aparte de xénchperakua uandasïnga eska Jeoba pʼamojpitiska (Éx. 34:6). Ma ambe jimbo engajtsïni Jeoba xarhatachejka ini kualidadini jindesti engajtsïni puáchentajka jiáni engachi no sési ambe újka (Sal. 51:1). Ka Biblia ístu arhisïndi eska pʼamojperakua pʼikuarhinhekua máeska enga újka eska ma jarhuataaka nemani enga kómu nitamakuarhini jarhajka. Biblia uandasïndi eska ambe enga Jeoba pʼikuarherajka parajtsïni jarhuatani, sánderu kʼéska ka eska ambe enga nándi ma pʼikuarherajka imeri sapini jimbo (Is. 49:15). Jeobaeri pʼamojperakua úsïndi eskajtsïni jarhuataaka engachi kómu nitamakuarhini jarhajka (Sal. 37:39; 1 Kor. 10:13). Juchajtuchi uáka májkueni xarhatani pʼamojperakua engachi puákuantaska juchari erachichani ka engachi no jatanhekuaska engajtsïni no sési pʼikuastaaka (Efes. 4:32). Ma ambe jimbo engachi xarhatajka eskachi pʼamojkuasïnga jindeesti jarhuataani jiáni engaksï no sési nitamakuarhini jauaka. Ísïchi májkueni úni jarhasïnga eska Jeoba, enga jindeeka sánderu ambakiti ejemplu para xarhatatspini uékperakua (Efes. 5:1). w21.01 21 párr. 5

Para famileri orhejtsïkuti jarhasti ambe ma enga no jatsika para úni. No jatsisti para jukari tiempu úrani ánchikuarhitarhu enga jamberi nóteru uákia Tata Diosïri ambe jorhendani imeri familiani niteru úni imeri familia jingoni jarhani. Jatsisti para jorhendaani ka jurhimberantaani. Jeobajtsïni jorhendasïndi ka jurhimberantani jimboka ima míteska ambe sánderu sésiska para jucha (Ebr. 12:7-9). Májkueni eska Táti jémba, Jesusi uékperakua jingoni jorhendaaspti ka jurhimberantaani imechani engaksï imeri juramukua jimbo japka (Juanu 15:14, 15). Ima mátirku arhiasïrendi ambe ma, joperu uékperakua jingoni (Mat. 20:24-28). Mítesti eskachi no perfektueska ka eskachi úsïnga ambe ma enga no sési jaka (Mat. 26:41). Familieri orhejtsïkuti ma enga májkueni újka eska Jeoba ka Jesusi, méntkisï miásïndi eska témba no perfektueska ka ni uájpecha ka no ikiasïndi imecha jingoni (Kol. 3:19). Sánderu sési, úsïndi ambe enga uandajka Galasia 6:1 ka jánguarhintasïndi “kaxumbikua jingoni” jurhimberantaani miáparini eska imajtu no perfektueska. Májkueni eska Jesusi, familieri orhejtsïkuti ma mítesti eska jatsiska para ejemplu jingoni jorhentpini. w21.02 6, 7 párr. 16-18

Pʼímutantskua jimbo, Jeoba piántasti iámindu imecheri tsípikuani engaksï kúnguarhikuarhu jaka ka iámindu imani kʼuiripuecheri engaksï jakajkujka Jesusini (Mar. 10:45; Uku. 20:28; 1 Kor. 15:21, 22). Jimboka Kristu uarhiska juchantsïni jimbo, jimbosï Jeoba imani erakuti para kúnguarhikueri orhejtsïkutini. Ini ambe jimbo, Jesusi jatsisti juramukua para uandani ambe engaksï uáka kʼuiripuecha, familiarhu anapuecha ka iámindu kúnguarhikuarhu anapuecha ka eskaksï ísï uáka (Gal. 6:2). Joperujtsïni Jesusi no solu juramuchisïndi ambe engachi jatsika para úni, sino ístujtsïni kuidarisïndi ka xénchani (Efes. 5:29). Pirenchichaksï xarhatasïndi eskaksï janhanharhisïnga Kristueri juramukuani, engaksï ísï újka eskaksï na uandajka erachicha enga Jesusi erakuaka paraksï kuidarini kúnguarhikuani. Erachichaksï xarhatasïndi eskaksï kurhangusïnga eska Jeoba íntsaaska sáni juramukua máteruechani engaksï janhanharhiajka ka jukaparharaani pirenchichani. Engaksï iámindu kúnguarhikuarhu anapuecha, kurhangujka ka janhanharhini imani juramukuani enga Jeoba íntsaaka sánisï máteruechani, iámu kúnguarhikua sési jarhasïndi. Ka enga sánderu jukaparhakueka kʼéri ambechi arhini jarhasïnga juchari Tátini auandarhu anapuni enga xáni xénchpitika, Jeobani. w21.02 18, 19 párr. 14-17

Ma xanhari enga Dabidi ka imeri soldaduecha jirikuarhikuni jámani japka rei Saulini, jurajkuasptiksï imecheri familiechani paraksï nirani uarhipeni. Joperu máru imecheri enemiguecha, niárakuasptiksï imecheri kʼumanchikuecharhu ka paasptiksï imecheri familiechani. Dabidi úpirindi eratseni eska jimboka sési mítekuspka uarhipeni, úpiringa úni ambe ma para pʼímutantaani. Joperu no ísï úspti, Jeobani kurhakuspti jarhuajperata. Dabidi kurhamarhispti Jeobani: “¿Niua andanguani ini kʼuiripuechani engaksï sïpatspeni jámajka?”. Jeoba arhispti eska nipiringa ka eska sési nikupiringa (1 Sam. 30:7-10). ¿Amberi uá jorhenguarhini i amberi? Konseju kurhajkuarhi antederi úni ambe ma. Tumbiicha ka uátsïcha uandontskuarhi je chaari táticha jingoni o orhejtsïkuticha jingoni engaksïni uáka jarhuatani. Imaksïni uáti ambakiti konsejuechani íntsaani. Jeoba mintsikaasïndi orhejtsïkutichani ka tʼujturi uáka ísï úni. Jindestiksï ‘intsïmperakuecha’ enga Jeoba kúnguarhikuani íntskuka (Efes. 4:8). Ambakiti amberi uáka erakuni úni engari ísï mintsikaska Tata Diosïni eska imecha ka engari kurhajchaaska imecheri ambakiti konsejuechani. w21.03 4, 5 párr. 10, 11

Jesusi uandasti eska engachi no uáka imani ambe engachi jorhenguarhijka ísïuakachi komueska acheeti ma enga imeri kʼumanchikuani kutsarirhu újka. Joperu no marhuasïndi na enga xáni jánguarhintajka, jimboka jiáni enga janiaka, tarhiani ka iorhentpeni, xerhentaaka imeri kʼumanchikuani (Mat. 7:24-27). Májkueni, engachi no úska ambe engachi jorhenguarhijka, no ma ambe marhuauati ima ambe engachi xáni úkia ka jiáni engachi uandanhiata ambe jatsiaka juchari jakajkukua no xáni uinhapiti jauati. Joperu engachi ísï úska eskachi na jorhenguarhika, uákachi ambakiti ambe erakuni úni, sánderuchi pínandikua jatsiaka ka sánderuchi mintsikaaka Tata Diosïni (Is. 48:17, 18). Parachi no méni jurajkuni Jeobani jatsiskachi para kómarhini mintsinharhikua jingoni ka jánguarhintani pauani pauani jorhenguarhini Bibliaeri ambe. Nóchi méni jatsiska para mirikurhini eska ambe enga sánderu jukaparhakueka jindeeska k’éri ambe arhini Tata Jeobani. Uákachi seguru jarhani eskajtsïni ima no méni jurajkuaka ka eska no nema uáka úni eskajtsïni ima nóteru xénchaakia (Ebr. 13:5, 6). w21.03 15 párr. 6; 18 párr. 20