Febreru

Tata Diosï Jeoba uékasïndi eskaksï imeeri marhuariicha méntkisï sési irekaaka. Ima no iauani jarhasti mándani arhini juchantsïni jingoni ka mítesïndi na engachi jatini chkétakuarhijka (Sal. 145:18, 19). Ju je exeni na enga Tata Diosï jarhuatapka profeta Elíasini. I ambakiti Tata Diosïiri marhuari jiánisï irekaspti enga no sési jánhaskuarhini japka jini ireka Israeli. Tata Diosïiri kʼérati enemiguechaksï no sési kaasïreendi imeeri marhuariichani ka Elíasinksï uékasïreendi uándikuni (1 Rey. 19:1, 2). Elíasi eratsesïreendi eska imaterkuespkia Tata Diosï Jeobaeri profeta enga pakarani japka ka jimbosï chkétakuarhipti (1 Rey. 19:10). Jirejiresï Tata Diosï Jeoba úspti ambe ma para jarhuatani Elíasini, axaspti ánjelini ma para arhini eska no jandiajku jarhaspka ka eskaksï útasï jarhaspka uánikua israeliteecha engaksï sési marhuakuni japka Tata Diosïni (1 Rey. 19:5, 18). Uékperakua jingoni Jesúsi arhiaspti imeeri chúxapatiichani eskaksï kúnguarhikuarhu anapuecha, ísïipiringa eska imeecheeri familia (Mar. 10:29, 30). Ka juchaari Tata Diosï Jeoba aiatspesïndi eska jarhuatauaka imeechani engaksï marhuakujka (Sal. 9:10). w21.06 8, 9 párr. 3, 4

Uánikua kʼuiripuechajtsïni no jiókuarhisïndi jimbokachi Biblia jingoni jorhentpisïnga eska ambe engaksï relijionicha jorhentpijka no jurhimbitkueska. Uánikua relijioniiri orhejtsïkutiichaksï jorhentpisïndi eska Tata Diosï infiernurhu kastigariuasïnga no ambarhati kʼuiripuechani ka, ini ambe jingoni, chéraasïndiksï kʼuiripuechani paraksï kurhajchaani relijioniiri orhejtsïkutiichani. Ka jucha engachi marhuakujka Jeobani, Tata Diosïni ma enga xénchpetiika, aianhpisïngachi eska i jorhenguarhikua no jurhimbitiiska. Ístu, relijionichaksï jorhentpisïndi eska alma no uarhisïnga, joperu enga i ambe ísïipiringa, no uétarhipirindi eska japiringa tsíntskua. Joperu juchachi jorhentpisïnga eska i ambe no Bibliarhu pʼitakata jarhaska. Nájkirukaksï uánikua relijionicha jakajkujka eska Tata Diosï tʼuini eratsetini jarhasïngia ambe úni juchantsïni jingoni, juchachi jorhentpisïnga eskachi uaaka erakuni ambe úni ka ístu sinchi marhuakua Tata Diosïni o nómbe. Ini ambe jimbo, relijioniiri orhejtsïkutiichaksï kánikua ikiasïndi. Engajtsï chá jukaparharajka jurhimbikuani, jatsiskajtsï para jiókuarhini ambe enga Tata Diosï uandajka (Juanu 8:45, 46). Asï májkueni ú je eska Noambakiti, sánderu sési, asï méni jurajku je jurhimbikuani ka asï méni ú je ambe enga no terukuntajka imani ambe jingoni engajtsï chá jakajkujka (Juanu 8:44). Tata Diosï erokuarhisïndi eskaksï imeeri marhuariicha májkueni uaaka eska Jesúsi, jimbosï arhiajti: “Asïmindu jáma je jiókuarhini indeni ambe enga no sésiika, sino jaiapanhenta je solu indeni ambe enga ambakitiika” (Rom. 12:9; Ebr. 1:9). w21.05 10, 11 párr. 10, 11

¿Ambechi uaa úni engachi kuenta íntskukuarheskia eskachi kʼéramakuarhisïnga o jukari uékani jatsini ambe ma? ¿Uaachi sïpakuarhini? Jo, jimboka apostoli Pablu uandaspka eska imeecha engaksï jupikanhajka Noambakitiiri tramparhu uaakaksï uéntani tramparhu (2 Tim. 2:26). Nóchi méni mirikurhiaka eska Tata Diosï Jeoba sánderu uinhapitiiska eska Satanási. Engachi jurajkuska eskajtsïni jarhuataaka uaakachi kéndikukuarhini náki uéjki tramparhu engajtsïni Noambakiti jatsikuchiaka. Ísïisti, sánderu sésisti engachi no niáraaka Satanásiiri trampecharhu eska uéntani. Ka i ambe solu Tata Diosï Jeobaeri jarhuajperata jingonchi uaaka ísï úni. Ísï jimbo, ju je pauani pauani kómarhini Tata Diosï Jeobani parakajtsïni jarhuataaka exeni sinchi ueenaskia ísï eratseni ka jámani (Sal. 139:23, 24). Ju je jánguarhintani parachi no méni niárani Satanásiiri trampecharhu. Desde iónisï, Satanási uékasïndi jupikaani kʼuiripuechani. Joperu no ióni jimbo ima jupikanhaati ka tátsekua kʼamajkunhani (Jaŋ. 20:1-3, 10). ¡Uékaxakachia eska niáraakia inde jurhiatikua! Enga jamberi inde jurhiatikua niáraaka ju je jingontku jarhani parachi no niárani imeeri trampecharhu. Jánguarhintaakachi xáni eskachi xáni uaaka parachi no niárani kʼéramakuarhini o jukari uékani jatsini ambe ma. Ju je jánguarhintani parachi no jiókuarhini Noambakitini ka imajtsïni kéndikuchiati. w21.06 19 párr. 15-17

Tata Diosï Jeoba kánikua sési pʼikuarherasïndi enga kʼuiripu ma jiókuarhijka ambe enga Biblia jorhentpijka ka enga í kʼuiripu uandontskuarhekuajka máteruechani íri ambe (Prov. 23:15, 16). Seguru eska Tata Diosï Jeoba sési pʼikuarherasïnga imani ambe jimbo enga úkuarhini jaka ini jurhiatikuecha jimbo. Pori ejemplu, nájkiruka pʼamenchakua COVID-19 japka 2020 jimbo, jorhendaaspkachi Biblieri ambe 7,705,765 kʼuiripuechani ka 241,994 niárastiksï aiakuni imeecheeri tsípikuani Tata Diosï Jeobani ka itsï atakuarhistiksï. Ka iásïksï ícha máteruechani jorhendauati Biblieri ambe ka uáuatiksï máteru Jesúsiiri chúxapatiichani (Luk. 6:40). Engachi jarhuajpejka ini ánchikuarhitarhu, kánikuachi tsíperasïnga Tata Diosï Jeobaeri mintsitani. Uétarhisïndi eskachi kánikua jánguarhintaaka parachi jarhuatani nemani xénchani juchaari Taati auandarhu anapuni, joperu Tata Diosï Jeobaeri jarhuajperata jimbochi uaaka jarhuajpeni Jesúsiiri chúxapatiichani uaani. ¿Andichisï no jatsikukuarhijki meta parachi ueenani jorhendani nemani? Méntkisï enga sési jauaka, uaakachi arhiani imeechani engachi míteaka eskachi uaaka Biblieri ambe jorhendaani. Engachi ísï úska, jamberijtsïni ísku pakataati ambe engajtsïni arhiaka. w21.07 6, 7 párr. 14-16

Rei Dabidi kánikua sentabu íntspispti ka ístu máteru ambe enga jukaparhakua ambeepka paraka templu únhapiringa (1 Crón. 22:11-16). Engajtsï chájtu jatiriikia ka nóteru xáni uinhapikua jatsinia, komu para jarhuajpeni konstruksionirhu, uaakajtsï donasioni íntspini na engajtsï xáni uaaka. Ka jorhendaa je imeechani engaksï sánderu sapichku jaka imani ambe engajtsï xáni jorhenguarhikia. Apostoli Pablu ístu xarhataspti eska intsïmpitiispka. Pʼímarhispti Timoteoni paraka pámbetapiringa iauanisï aianhpini ka jorhendaspti néna enga úpiringa aianhpini ka jorhentpini (Uku. 16:1-3). Ambe enga Pablu jorhendapka, jarhuataspti paraka imajtu ambakiti jorhentpiri máepiringa ambakiti aianhperakueri (1 Kor. 4:17). Ka Timoteo ístu úraspti ambe enga Pablu jorhendapka para máteruechani jorhendaani. w21.09 12 párr. 14, 15

¿Ambechi jorhenguarhisïni Apolosiiri ka apostoli Pablueri ambe? Tsimarhanksï kánikua mítespti Tata Diosïiri Karakateechani ka ambakiti jorhentpiriicheesptiksï. Ístu, tsimarhanksï uánikua kʼuiripuechani jarhuataspti paraksï Jesúsiiri chúxapatini. Joperuksï no méni jámaspti andaperani (Uku. 18:24). Sánisï tátsekua enga Apolosi nintapka Korintu uératini, Pablu mémindu arhispti eska kʼuanhatsentapiringa (1 Kor. 16:12). Apolosi úxapti imani ambe enga jorhenapka úni para ambakiti ambe úni: para aianhpini ambakiti ambe ka para uinhaperaantani erachiichani. Ístu, uaakachi seguru jarhani eska Apolosi kaxumbitiispka. Bibliarhu no nani arhisïndi eska ima ikiaspka enga Ákila ka Prisila ‘janhastapkaksï sánderu sési Tata Diosïiri xanharuni’ (Uku. 18:24-28). Apostoli Pablu sési mítetixapti ambakiti ánchikuarhitani enga Apolosi úni japka. Joperu no uandanhiasïreendi eskaksï kʼuiripuecha eratsepiringa eska Apolosi sánderu sési úsïreenga ambe ma. Imani ambe jingoni enga Pablu karakuapka Korintu anapuechani, úsïngachi exeni eska Pablu kaxumbitiispka ka eska kurhangutspisïreenga (1 Kor. 3:4-6). w21.07 18, 19 párr. 15-17

Jimboka Adáni ka Eba nóteruksï uékaspkia kurhajchani Tata Diosïni, petanhantasptiksï Tata Diosïiri familiarhu. Ka, ¿ambeksï úkuarhinchapirini imeeri uájpeecha? Tata Diosï Jeoba úspti ambe enga uétarhipiringa para ménderu jiókuarhiantani imeeri familiarhu imeechani engaksï kurhajchapiringa. ¿Néna úspi ísï úni? Imeeri Uájpeeri uarhikua jimbo (Juanu 3:16). Ini ambe jimbo, úspti eska Tata Diosï jiókuarhiapiringa komueska imeeri uájpeechani 144,000 ambakiti kʼuiripuechani (Rom. 8:15-17; Jaŋ. 14:1). Ístuksï uánikua kʼuiripuecha jarhasti engaksï kurhajchajka Tata Diosïni, engaksï úni jaka ambe enga ima uéjka ka engaksï ístu sánderu orhepani uaaka Tata Diosïiri familiarhu jarhani enga na nitamakia últimu tsʼéjkukua engaksï na kʼamakurhiakia mili uéxurhini (Sal. 25:14; Rom. 8:20, 21). Peru desde iásï, i kʼuiripuechaksï “Taati” arhisïndiksïa Tata Diosï Jeobani, imeecheeri kuerajpirini (Mat. 6:9). Ístu, ima kʼuiripuecha engaksï tsíntaaka, uaatiksï jorhenguarhini ambe enga Tata Diosï Jeoba uéjka eskaksï uaaka. Ka tiempu jingoni imeecha engaksï uékaaka kurhajchani Tata Diosïni, ístuksï uaati imeeri familiarhu jarhani. w21.08 5 párr. 10, 11

Apostoli Pablu arhinhaspti eska aianhpipiringa ka inde ambe sánderu jukaparhakua ambeespti para ima. Jorhentpispti ‘tánguarhikuecharhu ka ístu kʼumanchikuecharhu’ (Uku. 20:20). Ima aianhpispti na enga jatini úpiringa. Ma xanhari enga imeeri kompanieruechani eroani japka Atenasi, aianguaspti ambakiti aianhperakueri ambe máru kʼuiripuechani engaksï kʼéri ambeepka ka sési nikuspti (Uku. 17:16, 17, 34). Asta jiáni enga ónhakuarhetini japka kʼumanchikuarhu ma jimbo, uandontskuarhekuaspti imeechani engaksï nireenga exeni (Uku. 28:16-24; Filip. 1:13, 14). Pablu mítespti néna sési úrani tiempuni. Pʼindesptia pʼímarhiani máteruechani parakaksï imani jingoni nipiringa aianhpini. Pori ejemplu, enga primeru uelta nípka iauanisï aianhpini, Juanu Markusïni pʼímarhispti; ka enga ménderu nípka, Timoteoni pʼímarhispti (Uku. 12:25; 16:1-4). Kánikua jánguarhintaspti para jorhendaani ini achamasïichani néna organisariuani kúnguarhikuechani, ambakiti orhejtsïkutiicheni ka paraksï sési jorhentpini (1 Kor. 4:17). w22.03 27 párr. 5, 6

Máru kʼuiripuechaksï uandasïndi eska no jarhaska kuerajpiri ma jimbokaksï uandasïnga eskaksï imantkusï jakajkujki ambe engaksï újka exeni, joperu no ísïisti jimbokaksï jakajkusïnga ambe engaksï no újka exeni, pori ejemplu, jakajkusïndiksï eska jarhaska tarhiata. Jimbokaksï jarhaska pruebeecha. Jakajkukua enga Biblia uandajka, ístu pruebeecharhu jupindaskuarhisïndi ima ambeeri engachi no újka exeni (Ebr. 11:1). Para exeni eska inde ambe ísïiska, tiempu uétarhisïndi ka eska ma jánguarhintaaka ka uánikua kʼuiripuechaksï no uékasïndi ísï úni ka jimboksïsï no jakajkujti eska jarhaska Tata Diosï. Máru sientifikuechaksï niárasti jakajkuni eska Tata Diosï kueraaska unibersuni jimbokaksï exeaska pruebechani. Jamberiksï máru kʼuiripuecha antesi no jakajkuenga eska jarhaska Kueraajpiri ma, jimboka unibersidadirhu no jorhentperanhasïnga inde ambe, peruksï iásï niárastia míteni ka xénchani Tata Diosï Jeobani. Ka iáminduechachi uaaka sánderu jakajkuni Tata Diosïni no arhiparini asta nani engachi jamberi nika eskuela. w21.08 14 párr. 1; 16, 17 párr. 6, 7

Jesúsi ambakiti uandantskua ma uandantaspti, tumbiiri ma enga tsïnchekata japka parajtsïni jorhendani eska Tata Diosï Jeoba kánikua tsitisïnga pʼamojperakua xarhatatspeni. I tumbi, uéntaspti imeo ka “kʼamajkuntaspti iámindu imeeri jatsikuarhekuani jimboka xáni tsïnchekata irekaspka” (Luk. 15:13). Sánderu orhepatini, i tumbi móantaspti, jurajkuspti imani no sési irekua enga páni japka, mójtakurhispti ka kʼuanhatsentaspti imeo. ¿Ambe úspi taati jémba? Jesúsi uandasïndi: “Enga útasï iauani japka para niántani, eraaspti taati jémba ka uéki jimbo lástima úspti ka seguirispti uiriipani kúmantani ka kamajchakuspti ka putimukuni”. Taati jémba no no sési arhispti, pʼamojperakua xarhatakuspti, puákuntaspti ka jióntaspti ménderu imeeri kʼumanchikuarhu. I tumbi k’éri pekaduechani uaaspti, peru imeeri taati jémba puákuntaspti jimboka móantaspkia. I taati jémba xáni pʼamojpiti enga Jesúsi uandapka, Tata Diosï Jeobani arhikuekasïndi. Ini xáni ambakiti ejemplu jingoni, Jesúsi jorhentpispti eska imeeri Taati jémba uékasïnga puákuantani pekadoriichani engaksï mintsita jingoni móantajka (Luk. 15:17-24). w21.10 8 párr. 4; 9 párr. 6

Íni jurhiatikuecha jimbo, uánikua relijioniiri orhejtsïkutiichaksï jánguarhintasti mámaru ambe úni paraka no mítekuarhiaka Tata Diosïiri nombri. Kénditastiksïa Bibliecharhu ka ménisï astaksï niárasïndi jamberi uandani eskaksï no jatsiaka para úrani jiáni engaksï imeecha tánguarhijka para seguni kómarhini Tata Diosïni. Joperu xarharasïndi eskaksï Jeobaeri testiguechajkuksïsï janhanharhijti Tata Diosïiri nombrini ka eskaksï kʼéri ambe arhisïnga. No ma kúnguarhikua jarhasti enga xáni uánikua kʼuiripuechani aianguakia na enga arhinhajka Tata Diosï. Kánikuachi jánguarhintaxaka parachi úni ambe enga juchaari nombri uandajka eskachi úsïnga: Jeobaeri testigueskachi (Is. 43:10-12). Petaaskachia jukari 240 miioni Bibliechani engaksï arhinhajka Traducción del Nuevo Mundo, enga úrajka Tata Diosï Jeobaeri nombrini jima engaksï máteruecha pʼikuntakia. Ka petaasïngachi publikasionicha engaksï Bibliarhu pʼitakateejka jukari 1,000 idiomecha jimbo, nani enga úrakuarhejka Tata Diosïiri nombri. w21.10 20, 21 párr. 9, 10

Kʼéri ambechi arhisïnga Tata Diosï Jeobani engachi jarhuataajka erachiichani engaksï uétarhinchani jarhajka. Tata Diosï Jeoba aiatspespti eska kóndeantapiringa imani israeliteechani engaksï jarhuatapiringa pobrichani (Deut. 15:10). Méni engachi jarhuatajka erachini ma enga uétarhinchani jarhajka, Tata Diosï Jeoba ísï exesïndi enajkichi imani íntskuni japiringa ambe ma (Prov. 19:17). Pori ejemplu, engaksï Filipusï anapu kristianuecha axakupka ambe ma Pabluni jiáni enga ima ónhakata japka, uandaspti eska ima ambe engaksï axakupka ísïispka komueska kéjtsïtakua ma enga Tata Diosï kánikua jaiapanhentapka (Filip. 4:18). Uaakachi eratseantani juchaari kúnguarhikuarhu anapu erachiichani ka kurhamarhikuarhini: “¿Uaa jarhuatani nemani?”. Tata Diosï Jeoba sési pʼikuarherasïndi engachi úrajka juchaari tiempuni, uinhapikua, ambe engachi jorhenaka ka ambe engachi xáni jatsikuarheka para jarhuataani imeechani engaksï uétarhinchani jarhajka. Ístu, engachi ini ambe újka kʼéri ambechi arhini jarhasïnga imani (Sant. 1:27). Parachi kʼéri ambe arhini Tata Diosï Jeobani ísï eska ima na uéjka, uétarhisïndi tiempu ka eskachi jánguarhintaaka ka inde ambe no úkua jukasti (1 Juanu 5:3). ¿Andi nómbe? Jimbokachi ini ambe úsïnga jimbokachi xénchasïnga Tata Diosï Jeobani ka ístu iámindu erachiichani. w22.03 24 párr. 14, 15

Engachi uékaaka xarhatani eskachi uandanhiasïnga juchaari erachiicha jimbo ka eskachi pʼamojkuasïnga, jatsiskachi para eratseni ambe engaksï nitamakuarhini jaka. Pori ejemplu, jamberi pirenchi ma uinhamu pʼamenchani jati peru no uandantani. Jamberi uétarhini jati eska nema jarhuataaka. ¿Úpirinchi jarhuatani úmantani o kʼumanchikua limpiarikuni? O ju je eratseni eska erachi ma no jatsiska ánchikuarhita, ¿úpirinchi íntskuni sáni sentabu, nájkiruka no mítekuarhiaka, para jarhuatakuarhini asta jiáni enga jatsiaka ménderu ánchikuarhita? Engachi jucha uéjka pʼamojpitiini, nóchi jatsiaka para erokuarhini eskajtsïni juchaari erachiicha kurhacheaka jarhuajperata. Uaakachi jucha ueenani jarhuatani, ísï eska Tata Diosï Jeoba na újka. Ima pauani pauani úsïndi eska jurhiata uéraaka ka no erokuarhisïndi eskachi jucha kurhakuaka eska uaaka i ambe, ka jurhiateeri tsándu iáminduechani jarhuataasïndi, no nomasi imeechani engaksï diosmaiamukua arhijka. ¿A no eskajtsïni Tata Diosï Jeoba xarhatachesïnga eskajtsïni xénchasïnga engajtsïni íntskujka ambe engachi uétarhinchajka? ¡Xáni enga sési kámpijka ka intsïmpitini, ka xáni engachi xénchajka jucha indeni ambe jimbo! w21.09 23 párr. 12, 13

Tata Diosïiri ambakiti uékperakua úsïndi eska ima puátspentaaka. Enga Tata Diosï Jeoba exejka eska nema meru móantaskia imeeri pekaduecheeri ka eska jánguarhintaxaka mójtakurhini, Tata Diosïiri ambakiti uékperakua úsïndi eska ima puákuntaaka. Salmu ma jimbo, Dabidi i ambe uandaspti Tata Diosï Jeobaeri ambe: “Nójtsïni no sési kámasïndi eskachi na uétarhinchajka juchaari pekaduecha jimbo ka nijtujtsïni úchini ambe engachi uétarhinchajka juchaari úkuecha jimbo” (Sal. 103:8-11). Dabidi sési mítespti na enga xáni no sési pʼikuarherakuarhijka enga nemani no sési pʼikuastani jarhajka konsiensia. Peru ístu, jorhenguarhispti eska Tata Diosï Jeoba jingontku jarhaska para puátspentani. Kómarhikua ma jimbo, iásï anapu tekstu jimbo, Dabidi xarhataspti ambesï újki eska Tata Diosï Jeoba uékaaka puákuntani nemani. Ísïisti, Tata Diosï Jeoba puátspentasïndi jimboka imeeri ambakiti uékperakua kánikueska imeecha jimbo engaksï kurhakujka eska puákuantauaka. Sésisti eskachi no sési pʼikuarheraaka ka kʼuratseni engachi pekadu ma újka, jimboka i ambe uaati úni eskachi móantaaka ka eskachi jánguarhintaaka úni ambe ma parachi nóteru no sési niátania. w21.11 5 párr. 11, 12

Tata Diosï Jeoba kánikua jukaparharasïndi imeeri nombrini ka uékasïndi eskaksï iáminduecha janhanharhiaka (Is. 42:8). Joperu ma 6,000 uéxurhini ísïistia, enga imeeri nombri no sési pakatanhani jaka (Sal. 74:10, 18, 23). Iámindu i ambe ueenakuarhispti jiáni enga Noambakiti (enga arhikuekajka “ima enga chkuanderakua ambe jauatatspijka”) uandapka eska Tata Diosï no uékasïreenga íntskuni Adáni ka Ebani ambe engaksï uétarhinchani japka, paraksï tsípikua jingoni irekani (Gén. 3:1-5). Desde jiánksï ueenasti arhini Tata Diosï Jeobani eska ima no íntsaasïnga kʼuiripuechani ambe engaksï meru uétarhinchajka. Jesúsi uandanhiasïreendi eska imeeri Taatiiri nombri sánderu no sési pakatanhapiringa. Tata Diosï Jeobajkusï jatsiti sésikua para juramuni auandarhu ka Echerirhu ka ima jindeesti sánderu ambakiti juramuti (Jaŋ. 4:11). Peru Noambakiti jánguarhintasïndi parakaksï ánjeliicha ka kʼuiripuecha eratseaka eska Tata Diosï no sésikua jatsiska para juramuni. No ióni jimbo, iáminduechaksï seguru jauati eska Jeobajkusï sésikua jatsika para juramuni ka eska ima jindeeska sánderu ambakiti juramuti ka eska imeeri Juramukuajkusï uaaka eska kʼuiripuecha pínandikua jingoni irekaaka Echerirhu ka no chétapu jingoni. w21.07 9 párr. 5, 6

Familieri orhejtsïkutiichaksï kánikua uandanhiasïndi paraksï tʼirekua, xukuparhakua ka kʼumanchikua ma íntskuni imeeri témbani ka imeecheri sapiichani. ¿Úkua jukanchaxakijtsï sentabu jimbo? Nájkiruka kánikua úkua jukani jauaka, uaakajtsï úrani ini tiempuni parajtsï sánderu mintsinharhini Tata Diosïni. Kómarhi je Tata Diosï Jeobani, arhintsï je ambe enga Jesúsi uandapka jimini Mateu 6:25-34 ka eratsenta je indeni ambe. Eratseanta je iásï anapu ejempluechani engaksï xarhatajka na enga Tata Diosï Jeoba kuidariuajka imeechani engaksï jánguarhintajka imani marhuakuni (1 Kor. 15:58). Inde ambe uaati eskajtsï sánderu mintsikaaka juchaari Taati auandarhu anapuni, eskaksïni jarhuataaka ísï eska na jarhuataakia imeechani engaksï sáno májkueni jásï ambe nitamakuarhika. Ima mítesti ambe engajtsï uétarhinchajka ka mítesti na engaksïni íntskuaka indeni ambe. Engajtsï exeaka na engaksïni Tata Diosï Jeoba jarhuatani jaka, sánderujtsï mintsikaaka ka uaakajtsï orhepani uérakuani uandanhiateechani engaksï sánderu orhepatini jauaka. w21.11 20 párr. 3; 21 párr. 6

Míteni ambe enga arhikuekajka euajpintskua, úsïndi eskaksï uánikua kristianuecha sánderu mintsikaaka Tata Diosïni. Ka seguirixatiksï aianhpini nájkirukaksï no sési kánhajka ka iónisïksï tekaantastia tsʼéjkukuechani. Ju je exeni apostoli Juanueri ejempluni. Ima aianhpispti jurhimbikueri ambe tata Jesukristueri ka euajpintskueri, jamberi jukari 60 uéxurhinisï. Apostoli Juanu sáno 100 uéxurhini jatirisptia enga Roma anapu juramuti ísï exenga komueska no sési úri ma, jimboka uandantasïreenga “Diosïiri uandakuani” ka “aianhpini Jesukristueri ambe”, ka indeni ambe jimbo, isla de Patmosiksï ónhaspti (Jaŋ. 1:9). ¡Ambakiti ejemplujtsïni ma íntskusti jimboka kánikua mintsikaspka Jeobani ka tekaantani! Imani libruecha jimbo enga Juanu karaka, uandasïndi na enga xáni xénchajka Jesúsini ka na enga xáni jukaparharajka euajpintskuani. Imani libruecha jimbo, jukari 100 uelta uandasïndi euajpintskueri ambe o na engajtsïni marhuachejka (Jaŋ. 19:10). Xarharasïndi eska apostoli Juanu kánikua jukaparharasïreenga euajpintskuani. w21.04 17 párr. 9, 10

Tata Diosï Jeoba uékasïreendi eskaksï imeecha engaksï imeeri marhuariichepka sési kaapiringa imeechani engaksï nóteru ueengia uánikua ambe úni. Pori ejemplu, arhiaspti israeliteechani eskaksï no no sési arhipiringa kándini ma o arhinksï eska no sési úkuarhinchapiringa. ¡Inde ambe kánikua no sési japirindi! Jimboka no kurhaani japiringa ambe engaksï arhini japiringa, no úpirindi kuájpikuarhini. Ístu, Levítico 19:14 jimbo exesïngachi eska Tata Diosï arhispka imeeri iretani eska no jatsipiringa para peerani “ambe ma siegueri orhepani jimbo”. Libru ma ari ambe uandasïndi ima kʼuiripuecheeri engaksï uánikua ambe nóteru újkia úni: “Jini ireta Israelisï, kʼuiripuechaksï fásili exeasïreendi ka no sésiksï kaasïreendi”. Nema úpirindi ambe ma jatsini siegueri orhepani jimbo para ima kuarhatseni o paraksï teresmarhuni. ¡Xáni no sési! Joperu ambe enga Tata Diosï Jeoba uandapka Levítico 19:14 jimbo, jarhuataspti imeeri iretani para pʼamojperakua jingoni kaani imeechani engaksï uánikua ambe nóteru ueengia úni. w21.12 8, 9 párr. 3, 4

Jakobu mintsita jingoni kómarhikuarhispti Tata Diosï Jeobani, tátsekua ambakiti regalu ma axakuspti Esaúni (Gén. 32:9-15). Ka máteru ambe, engaksï na kúperapkia, Jakobu kánikua janhanharhikua xarhatakuspti Esaúni jimboka siete xanhari kʼutitsekuspka. Jimboka Jakobu kaxumbikua xarhataspka ka janhanharhini imeeri ermanu jémbani, úspti sési pájperantani imani jingoni (Gén. 33:3, 4). Ambe enga úpka Jakobu ka ambe enga arhipka imeeri ermanu jémbani jiáni engaksï exejperantapka, jorhendasïndijtsïni ambe ma. Orheta kaxumbikua jingoni kómarhispti Tata Diosï Jeobani eska jarhuatapiringa. Tátsekua ísï úspti eska na kómarhipka Tata Diosïni, jimboka jánguarhintaspka úni ambe ma para jiáni engaksï exejperantapiringa sésiksï pʼikuarherapiringa tsimarhani. Ka enga na uandontskuarhepkia imani jingoni, no uandaspti nésï no sési úni japi. Ima solu uékasïreendi sési pájperantani imeeri ermanu jémba jingoni. ¿Nénajtsï uaa májkueni úni? (Mat. 5:23, 24). w21.12 25 párr. 11, 12

Ménichanisï juchaari mintsitajtsïni úpirindi ísï jakajkutarani eskachi no ma ambe marhuasïnga o eskachi no jukanchaska eskachi xénchanhaaka (1 Juanu 3:19). Ísï jimbo, jamberichi niáraaka eratseni eska tata Jesukristueri uarhikua no uaaka maiampini juchaari pekaduechani. Engachi niáraska ísï eratseni, ju je miáni eska “Diosï sánderu kʼéris[ka] ka eska juchaari mintsita”. Nájkirukachi ísï pʼikuarheraaka eska juchaari Taati auandarhu anapu nójtsïni xénchasïnga ka nijtsïni puáchentani, imajtsïni xénchasïndi ka puáchentasïndijtsïni. Jatsiskachi para meru jakajkuni eskajtsïni Tata Diosï xénchasïnga. Ka parachi ísï úni, jatsiskachi para pauani pauani jorhenguarhini imeeri Karakatani, méntkisï kómarhini jarhani ka ístu erachiicha jingoni jarhani. ¿Andiksïsï xáni jukaparhakue i tanimu ambe? Engachi ísï úska, sánderuchi sési míteaka na enga jásï kʼuiripueka Tata Diosï ka niáraakachi exeni na engajtsïni xáni xénchajka. Engachi pauani pauani eratsentaska Tata Diosïiri Karakatani, jarhuataatijtsïni parachi imani ambe eratseni enga sési jaka (2 Tim. 3:16). w21.04 23, 24 párr. 12, 13

Engachi uéjka sánderu mintsikani Tata Diosïni, nóchi solu jatsiska para jorhenguarhini ambe ma. Jatsiskachi para eratsentani imani ambe engachi jorhenguarhini jauaka. Ju je eratsentani imani enga Salmo 77 karaka. Uandanhiaxapti jimboka eratsesïreenga eska Tata Diosï Jeoba nóteru jaiapanhentasïreengia imani ka ni máteru israeliteechani. Nóteru jamberi úsïrendia kʼuíni, jimboka jukari uandanhiasïreenga (bersikuluecha 2-8). ¿Ambe úspi? Arhispti Tata Diosï Jeobani: “Sési eratsentaaka iámu ambe jimbo engari tʼu újka ka eratsentaaka na engari újka ambe ma” (bersikulu 12). Ima sési mítespti ambe enga Tata Diosï Jeoba úpka imeeri iretani jimbo. Peru útasï kurhamarhikuarhisïreendi: “¿Mirikurhiskia Tata Diosï parajtsïni pʼamojperakua xarhatacheni, o jamberi imeeri ikiatapu ú eska nóteru pʼamojpeakia?” (bersikulu 9). Ima enga karaka ini salmuni, eratsentaspti ambe enga xáni újka Tata Diosï Jeoba ka na enga xáni pʼamojperakua xarhatakuapka ióntki (bersikulu 11). Indeni jimbo seguru jarhaspti eska Tata Diosï Jeoba no méni jurajkupiringa imeeri iretani (bersikulu 15). w22.01 30, 31 párr. 17, 18

¿Na pʼikuarherasïni Tata Diosï Jeoba, enga miántajka imeechani engaksï uarhikia ka engaksï sési marhuakuenga? Uékaxatiia ménderu exeani (Job 14:15). ¿Úsïnchi eranhaskani na enga xáni jirinhantani jaka imeeri amigu jémbani Abraánini? (Sant. 2:23). ¿O Moisésini, enga ísï uandontskuarhekuenga ‘eska kʼuiripu ma na uandontskuarhejka máteru kʼuiripu jingoni’? (Éx. 33:11). ¡Ka kánikua uékaxatiia eska Dabidi ménderu pirekuaka ka máteru salmisteecha imeecheeri sési járhati pirekuechani! (Sal. 104:33). Nájkirukaksï uarhikia, ima no mirikurhiasïndi (Is. 49:15). Tata Diosï Jeoba miásïndi na engaksï jásïipka. Niáraati jurhiatikua, enga ima tsítantauaka ka kurhauati imeecheri kómarhikuechani ka kánikua sési pʼikuarheraati engaksï ima ménderu marhuakuaka. ¿A no eska i ambejtsïni kánikua uinhaperantasïnga juchantsïni engachi uarhiranchaka nemani? Enga jardini de Edénirhu ueenakuarhipka no kurhandiranhani, Tata Diosï Jeoba mítespti eska ante de sési niántani ambe ma, sánderu no sési jánhaskuarhipiringa. Ima kurhunhisïndi ambe enga iásï úkuarhini jaka, kómu no sési kámberakua ambe, enga no jurhimbikua jingoni janhajka ka enga atajperanhajka. w21.07 10 párr. 11; 12 párr. 12

Engachi xarhatajka eskachi xénchaasïnga juchaari erachiichani, xarhatanchi jarhasïnga eskachi jukaparharasïnga euajpintskuani, jimboka Jesúsi no solu juchantsïni jimbojkusï uarhika sino ístu juchaari erachiicha jimbo. Ka ústi indeni ambe jimboka kánikua xénchaasïnga (1 Juanu 3:16-18). Na engachi kaajka juchaari erachiichani xarhatasïndi eskachi xénchaasïnga (Efes. 4:29, 31–5:2). Jarhuataasïngachi engaksï pʼamenchani jarhajka o engaksï no sési nitamakuarhini jarhajka, komu desastresi naturalesi ambe jimbo. Joperu ¿nénachi jámaa enga erachi ma úska ambe ma o uandaska ambe ma engajtsïni no sési pʼikuastaaka? ¿Jatanhekuasïnchi imeechani engajtsïni no sési pʼikuastajka? (Lev. 19:18). Enga ísïika, ju je úni ambe enga ari konseju arhijka: “Sési kámbera je máteru ka máteruni jingoni ka pʼamojperantsï ka ístu puátsperanta je máteru ka máteruni jingoni ísï eskaksïni Diosï na puáchentaka Kristuni jimbo” (Efes. 5:32). Méntkisï engachi puákuntaska erachini ma xarhatakunchi jauaka juchaari Taati auandarhu anapuni eskachi jukaparharasïnga euajpintskuani. w21.04 18 párr. 12, 13

Iámindu ánchikuarhita engachi újka Tata Diosï Jeobani jimbo ka ístu engachi jarhuatajka nemani para itsï atakuarhini, úsïndi úkuarhini Tata Diosï Jeobaeri kóntperata jimbo. Máteru ambe engachi jorhenguarhijka, jindeesti eska engachi kʼérati ánchikuarhiteechani jatsiauaka kúnguarhikuarhu, sánderuchi jatsiska para jánguarhintani paraka kúnguarhikuarhu sési pájperanhaaka ka eska márku jauaka. Orhejtsïkutiicha ka orhejtsïkutiicheeri jarhuajpiriicha i ambeksï úsïndi engaksï úrajka Tata Diosïiri Karakatani paraksï konsejuechani íntspiani ka engaksï no imeecha uéjka sési pakarani sino engaksï májkueni újka eska tata Jesukristu. ¡Xáni engachi sési pʼikuarherajka i járhati erachiichani jatsiani! (1 Kor. 4:6, 7). Tata Diosï Jeobajtsïni ambakiti kóntperatechani íntsaasti. Jamberichi ísï pʼikuarherajka enajkichi no káni jarhuajpejki. Joperu sapichitu ambe engachi uaaka paraka kúnguarhikua márku jauaka úpirindi ísïini eska takusï ma engachi sïrikuni jarhajka ka enga tátsekua niárajka sési jásï xukuparhakua máeni. Ísï jimbo, ju je jánguarhintani parachi no méni jámani andaperani ka parachi úni eska méntkisï pínandikua jauaka kúnguarhikuarhu ka eska májku kʼéri jauaka (Efes. 4:3). w21.07 19 párr. 18, 19

Chájtujtsï uaaka seguru jarhani eskajtsï ménderu exeantauaka chaari parientichani engaksï uarhikia. Enga Jesúsi uerapka jiáni enga sési pʼikuastantapka imeeri amigu jémbeechani, jorhendasïndijtsïni eska ima iámu imeeri mintsita jingoni uékasïnga tsítantaani imeechani engaksï uarhikia (Juanu 11:35). Chájtsï uaaka jarhuataani imeechani engaksï uarhiranchaka nemani. Jesúsi no solu ueraspti Marta ka Maríani jingoni, ístu kurhajchaaspti ka imani ambe arhiaspti enga sési pʼikuastantaapiringa (Juanu 11:25-27). Juchajtuchi uaaka májkueni úni imeecha jingoni engaksï uarhiranchaka nemani. Dan, orhejtsïkuti ma enga Australia irekaka, uandasïndi: “Enga juchiiti uarhiiti uarhipka, uétarhinchasïreenga eskarini nema jarhuatapiringa. Uánikua temungurhiriichajtsïni arhispti eskani úpiringa uandontskuarheni imeecha jingoni na uéjki jatini. Jurajkusïrendijtsïni eskani uénhekuarhipiringa ka eskani uerapiringa. Ka engani chkétakuarhitini jarhenga, jarhuatasïreendijtsïni ambe ma úni, komu juparhintani karruni, nirani piántani ambe ma ka tʼirekua ambe úntani. Ka somenksï kómarhisïreendi jíndeni jingoni. Xarhatasptiksï eskaksï ambakiti amiguespka ka ambakiti erachiicha para jiáni enga uandanhiata jarhajka (Prov. 17:17). w22.01 16 párr. 8, 9

Tata Diosï Jeoba uékasïndi eskajtsïni sési nicheaka (Prov. 4:20-22). Imajtsïni xarhatachesïndi eskajtsïni xénchasïnga engajtsïni konsejuechani íntskuajka Biblia jingoni, publikasionini ma úraparini o erachini ma enga sési marhuakuni jaka (Ebr. 12:9, 10). Jatsiskachi para eratsentani ambe engachi arhinhajka ka no na engachi arhinhajka. Ménichanchi úpiringa ísï exeni eska ima engajtsïni íntskuka konseju ma, nójtsïni úspka sési íntskuni konsejuni. Ísïisti, ima enga jatsika para konseju ma íntspini, jatsisti para jánguarhintani paraka máteru kʼuiripu jiókuarhiaka konsejuni (Gal. 6:1). Joperu engachi jucha intsïnhani jauaka konseju ma, jatsiskachi para eratsentani ambe engachi arhinhaaka nájkirukachi ísï exeaka eska ima engajtsïni íntskuka konseju, nójtsïni kánikua sési íntskuska. Uaakachi kurhamarhikuarhini: “Nájkirukani no tsitika na engareni íntskuka konsejuni, ¿ísïiski ambe engareni arhika? ¿Uaa no jatanhekuni imani engareni íntskuka konsejuni ka úni ambe engareni arhika?”. Sési jauati eskachi exeaka nénajtsïni uaa marhuacheni náki uéjki konseju engachi intsïnhaaka. w22.02 12 párr. 13, 14

Tata Diosï Jeoba mítesti eska tiempu uétarhisïnga ka ístu eskachi jatsiska para jánguarhintani parachi nóteru eratsenia ni úni imani ambe enga no sési jaka (Sal. 103:13, 14). Joperu ima úrasïndi imeeri Karakatani, espiritu santuni ka imeeri kúnguarhikuani parachi jánhastiini ka uinhapikua jatsini, ka ístujtsïni jarhuatasïndi parachi úni mójtakuarhini. Úra je Bibliani parajtsï exekuarhini na engajtsï jásïika. Tata Diosïiri Karakata ísïisti komueska espeju ma ka uaatiksïni jarhuatani parajtsï exekuarhini na engajtsï eratsejka, na engajtsï uandajka ka na engajtsï jámajka (Sant. 1:22-25). Ka Tata Diosï Jeoba méntkisï listu jarhasïndi paraksïni jarhuatani. No nema jarhasti engaksïni uaaka jarhuatani ísï eska ima, jimboka ima míteska ambe enga jaka chaari mintsitarhu (Prov. 14:10; 15:11). Ísï jimbo, jánguarhi je pauani pauani kómarhini Tata Diosïni ka jorhenguarhini imeeri Karakatani. Chá mismu exe je eskaksï Tata Diosï Jeobaeri juramukuecha marhuasïnga. Iámindu ambe engajtsïni Tata Diosï Jeoba arhijka, marhuachesïndijtsïni. Imeecha engaksï ísï újka eskaksï Tata Diosïiri juramukuechani na uandajka, sánderuksï sési irekasïndi, mítestiksï andiksïsï irekani jaki ka ístuksï sánderu tsípikua jingoni irekasïndi (Sal. 19:8-11). w22.03 4 párr. 8-10

Kʼéri ambechi arhisïnga Tata Diosï Jeobani engachi jarhuajpejka konstruksionirhu ka engachi kuidariuajka kʼumanchikuechani nani engachi kómarhijka Tata Diosïni. Biblia uandasïndi eska ánchikuarhita para tabernakuluni úni ka iámindu ambe enga jima japiringa, pímbinhasï ánchikuarhita máespka (Éx. 36:1, 4). Íni jurhiatikuecha jimbo, Tata Diosï Jeoba ísï exesïndi komueska pímbinhasï ánchikuarhita ma engachi uaajka Kʼumanchikuechani Reinueri ka ístu máteru kʼumanchikuechani engachi úrajka para imani kʼéri ambe arhini. Máru erachiichaksï kánikua tiempu inchajpasïndi paraksï jarhuajpeni ini ánchikuarhiteecharhu. Ka juchachi kánikua jukaparharasïnga ambe engaksï xáni újka i erachiicha paraksï jarhuajpeni Reinueri ánchikuarhitarhu. Ístuksï i erachiicha arhutasïndi tiempu paraksï aianhpini ka máruksï asta uékasïndi prekursoriini. Orhejtsïkutiichaksï xarhatasïndi eskaksï jarhuajpesïnga konstruksionirhu, engaksï jurajkujka eskaksï i erachiicha uaaka prekursoriini engaksï uaaka ísï úni. Nájkirukachi mítekuaka konstruksioniri ambe o no xáni, iáminduechachi uaaka jarhuajpeni para kuidariuani ka limpiu jatsiani ini kʼumanchikuechani. w22.03 22 párr. 11, 12