Marsu

Ima “karichicha” enga Mateu 25:31-36 jimbo uandaajka, imani kʼuiripuechani arhikuekasïndi engaksï jurhimbikua jingoni jámajka últimu jurhiatikuechani jimbo ka engaksï erokuarhini jaka Echerirhu irekani. Mintsita jingonksï jarhuataasïndi tata Jesukristueri erachiichani engaksï erakukateeka parakaksï uaaka aianhpini ka jorhentpini iámu parhakpinirhu (Mat. 24:14; 28:19, 20). Mándani uéxurhini enga na niárani jarhajkia Miántskua, máteru karichichaksï xarhatasïndi eskaksï jarhuataasïnga Kristueri erachiichani. ¿Néna? Engaksï jánguarhintajka pʼímarhiani kʼuiripuechani paraksï nirani Miántskuarhu. Iámu parhakpinirhu, kúnguarhikuechaksï listu jatsisïndi iámindu ambe paraksï Miántani tata Jesukristueri Uarhikuani. Máteru karichichaksï sési pʼikuarherasïndi jarhuataani Kristueri erachiichani, jimbokaksï míteska eskaksï Jesúsinisï jarhuatani jarhajka (Mat. 25:37-40). w22.01 22 párr. 11, 12

Engachi májkueni jámajka eska Jesúsi ka májkueni kámpini, ísïchi úni jarhasïnga eska Jeoba. Pori ejemplu, uékperakua jingoni jarhuataspti kʼuiripuni ma enga lepra pʼamencheenga ka kurhangukuspti uarhiitini ma enga kʼéri pʼamenchakua ma kámeenga ka kánikua pʼamojkuaspti imeechani engaksï uarhirakuarhipka nemani (Mar. 1:40, 41; 5:25-34; Juanu 11:33-35). Engachi sánderu jánguarhintaska ísï jámani eska Jeoba, sánderuchi sési pájperaaka imani jingoni. Engachi májkueni úska eska Jesúsi nóchi jurajkuaka eskajtsïni i parhakpini ójkutaaka. Últimu chúrikua jimbo enga Jesúsi ixú Echerirhu japka, úspti uandani: “Ji andaska parhakpinini” (Juanu 16:33). Ambe enga arhikuekani japka, jindeesti eska parhakpini anapu ambe, no úspka eska úpiringa o eratseni o ísï jámani eska parhakpini anapuecha. Ima jánguarhintaspti para no mirikurhini eska jurhaspka ixú Echerirhu: Para pímbinhajkuntani Jeobaeri nombrini. ¿Ka juchaia ambechi uaa úni? Uánikua ambe jarhasti engajtsïni úpiringa ójkutani. Joperu engachi jucha jánguarhintaska imani ambe úni enga Jeoba uékajka májkueni eska Jesúsi, juchajtuchi uaaka májkueni “andani parhakpinini” (1 Juanu 5:5). w21.04 3, 4 párr. 7, 8

Apostoli Pablu mítespti eska Jesúsi aiatspespka eska “nákinterku nema enga imani jakajkuaka”, jatsiaka tsípikua para méntkisï (Juanu 3:16; Rom. 6:23). Uaakachi seguru jarhani eska Pablu mintsikasïrenga euajpintskuani. Ístu, mintsikasïreendi eska Jeoba uékasïnga puákuantani imeechani jamberi engaksï kʼéri pekadu ma úka ka no sésiksï pʼikuarherani indeni ambe jimbo engaksï úka (Sal. 86:5). Pablu mintsikasïreendi eska Tata Diosï kánikua xénchasïreenga jimboka axaspka Jesúsini para uarhini imani jimbo. Ju je exeni na enga ambakiti uandakuechani jingoni kʼamarhukujka Galasia 2:20, Pablu uandaspti: “Diosïiri Uájpani engareni xáni kánikua uékajka ka enga tsípikua íntspika jíndeni jimbo”. Pablu no ísï eratsesïreendi eska jukari no sési úriispka paraka Tata Diosï nóteru xénchaapiringia. No uandaspti: “Kurhangusïnga eska Jeoba xénchaasïnga juchiiti erachiichani, joperu jíndeni, nóreni méni uaati xénchani”. Asta miátantaspti i ambe Roma anapuechani: ‘Kristu uarhisti juchantsïni jimbo engachi útasï pekadoriipka’ (Rom. 5:8). Tata Diosïiri xénchperakua no méni kʼamakurhisïndi. Pablu seguru jarhaspti na enga xáni uinhapitiika Tata Diosïiri uékperakua. Ima mítespti na enga Jeoba xáni tekaakuantapka ireta Israeli anapuechani. w21.04 22 párr. 8-10

Engachi Biblieri ambe jorhentpini jauaka, ju je jarhuatani jorhenguarhirini paraka xénchaaka Tata Diosï Jeobani. Ju je exeni na engachi jatini uaaka uandontskuarhekuni na enga jásïika Tata Diosï Jeoba. Ju je jarhuatani jorhenguarhirini paraka exeaka eska Tata Diosï Jeoba felisiiska ka eska méntkisï imeecha jingoni jarhasïnga engaksï xénchajka (1 Tim. 1:11, TNM; Ebr. 11:6). Ju je exerani na enga marhuakuaka enga ísï úska eska na jorhenguarhini jaka. Ka eska i ambe xarhatasïnga eska Tata Diosï Jeoba xénchasïnga (Is. 48:17, 18). Enga sánderu xénchaaka Tata Diosï Jeobani, sánderu uékaati mójtakurhini. Paraka jorhenguarhiri ma niáraaka itsï atakuarhini, jatsisti para jurajkuni máru ambe. Jamberi máru jorhenguarhirichaksï jatsiati para jurajkuni jatsikuarhekua ambe. Jamberiksï jatsiati para nóteru kúrhiania imani kʼuiripuechani engaksï no xénchajka Tata Diosï Jeobani. Ka máteruechanksï jamberi imeecheri parienticha nóteru xénchauatia jimbokaksï no uékaasïnga Jeobaeri testiguechani. Joperu Jesúsi uandaspti eska Tata Diosï Jeoba kóndentaapiringa imeeri marhuariichani familiani ma jingoni enga xénchpetika imeeri kúnguarhikuarhu (Mar. 10:29, 30). w21.06 4 párr. 8, 9

Apostoli Pablu uandaspti eska Jesúsiiri chúxapatiichani uaani, ísïiska komueska plantechani tsikiraani ka ísï xarhataspti eska no solu uétarhisïnga semiia jatsikuni. Ari ambe miátantaaspti Korintu anapuechani: ‘Ji jindeeska engani júskaka, ka Apolosi jindeesti enga itsï jatsikuka ka chá jindeeska Tata Diosïiri tarheta enga ima ánchikuarhijka’ (1 Kor. 3:6-9). Jucha engachi Tata Diosïiri tarhetarhu ánchikuarhijka, nóchi solu júskaasïnga semiiechani, sinochi itsï jatsikuasïnga ka jingontkuchi exeani jarhasïnga parakaksï uaaka kʼéni. Ístu, jatsiskachi para miántani jarhani eska Tata Diosï újka eska kʼéaka. Kʼéri kóntperata máesti aianhpini ka jorhentpini jurhimbikua ambe. Ánchikuarhita máesti engajtsïni kánikua tsíperajka. Apostoli Pablu enga uánikua Tesalónika anapuechani jarhuataapka parakaksï Jesúsiiri chúxapatiipiringa, uandaspti na enga pʼikuarherapka: “¿Ambeeski enga jucha mintsikani jaka? ¿Ka ambeeski juchaari tsípikuarhita ka kanakua enga jimbo jucha sési korhokaaka enga junguaka juchaari tata Jesukristu? Chámindu jindeeska enga jimbo jucha tsípini pʼikuarherajka ka sési korhokani” (1 Tes. 2:19, 20; Uku. 17:1-4). w21.07 3 párr. 5; 7 párr. 17

Tata Diosï Jeobasï úti eskachi jucha andaparhakuerapiringa imeeri kúnguarhikua jimbo (Juanu 6:44). Ju je eratsentani ambe arhikuekasïni i ambe. Enga Jeoba jingontku exeani japka iámindu kʼuiripuechani engaksï ini parhakpini jimbo irekaka, exespti ambe ma juchaari incharini: ambakiti mintsita ma enga úpiringa xénchani imani (1 Crón. 28:9). Jeobajtsïni mítesti, kurhanguchisïndijtsïni ka xénchasïndijtsïni. ¿A no eskajtsïni i ambe kánikua sési pʼikuastasïnga? Tata Diosï Jeoba, kánikuaksïni xénchasïndi ka ístu kánikua xénchaasïndi mándani juchaari erachiichani. Jesúsi uandantasti ambe ma, parachi jucha úni kurhanguni i ambe. Enga karichi eranguti ma 100 karichichani kaajka ka tsïtani ma, ¿ambe uaa? Jesúsi uandaspti: “¿No jurajkuapirini máteru nobentainuebe karichichani korralirhu para nirani juátarhisï jirinhantani imani enga tsïtapiringa?”. Enga exentaaka, no ikiauati imani jingoni, sánderu sési, sési pʼikuarheraati. ¿Ambe arhikuekasïni? Eska para Tata Diosï Jeoba, mándani karichi jukaparhakueska. Jesúsi uandasti: “Chaari Taati auandarhu anapu nómindu uékasïndi eska ma íni jásï sapichu tsïnchiaka” (Mat. 18:12-14). w21.06 20 párr. 1, 2 

Engachi eratsentajka eska Tata Diosïiri xénchperakua no méni kʼamakurhisïnga, sánderuchi xénchasïnga Tata Diosï Jeobani ka sánderuchi sési pájperasïnga imani jingoni (Rom. 8:38, 39). Jimbokajtsïni jarhuatasïnga parachi májkueni úni eska Jesúsi (1 Ped. 2:21). Imani jurhiatikuecha jimbo ante de Miántskua úkuarhini, arhintasïngachi ambe enga Biblia uandajka últimu semaneeri enga Jesúsi Echerirhu japka, imeeri uarhikueri ka ístu enga tsíntapka. Ka ima chúrikua enga Miántskua úkuarhijka, arhijtsïkperatajtsïni miátantasïndi na engajtsïni xáni xénchajka Jesúsi (Efes. 5:2; 1 Juanu 3:16). Engachi arhintajka ambe enga jimbo xáni no sési nitamakuarhipka ka engachi eratsentajka indeni ambe úsïndi eskachi “ísï jámaaka eska ima na jámapka” (1 Juanu 2:6). Jimbokajtsïni jarhuatasïnga parachi seguiriini Tata Diosïiri xénchperakuarhu jarhani (Jud. 20, 21). Engachi jánguarhintajka kurhajchani Tata Diosïni, pímbinhajkuntani imeeri nombrini ka tsíperani imeeri mintsitani, seguiriini jarhasïngachi imeeri xénchperakuarhu jarhani (Prov. 27:11; Mat. 6:9; 1 Juanu 5:3). Nirani Miántskuarhu úsïndi eskachi uinhapikua jatsiaka parachi juchaari úkuecha jingoni pauani pauani arhini Tata Diosï Jeobani: “¡Para méntkisï uékasïnga chiiti amigueni!”. w22.01 23 párr. 17; 25 párr. 18, 19

Tata Diosï Jeobajtsïni jurajkusti parachi úni erakuni ambe engachi uékaaka úni. Ini ambe jimbo, úsïngachi erakuni ambe engachi uaaka úni juchaari tsípikua jingoni. Juchaari Tata Diosï enga kánikua uékpitiika, kánikua tsípisïndi engachi erakujka imani marhuakuni (Sal. 84:11; Prov. 27:11). Uánikua ambe jarhasti engachi uaaka sési erakuni úni. Jesúsi imani ambe erakuspti úni engaksï máteruecha uétarhinchani japka ka juchajtuchi uaaka májkueni úni. Ma xanhari, ima ka imeeri apostoliichaksï kánikua kuataratixapti, ísï jimboksïsï nípti mintsikuarhini jima enga no nema japka. Joperuksï no úspti ísï úni, jimbokaksï uánikua kʼuiripuecha ueenaspka niárani jima paraksï kurhaani Jesúsiiri jorhentperakuechani. Joperu Jesúsi no ikiaspti, pʼamojkuaspti ka “seguirispti mámaru ambe jorhendaani” (Mar. 6:30-34). Engachi úraska juchaari tiempuni ka uinhapikuani ísï eska Jesúsi parachi jarhuataani máteruechani, kʼéri ambechi arhini jarhasïnga juchaari Taati auandarhu anapuni (Mat. 5:14-16). w21.08 3 párr. 7, 8

Tata Diosï Jeoba tsitisïndi eska mámaru jásï ambe jauaka, ísï eska na xarharajka imeeri kueraakata jimbo, astachi kʼuiripuecha táchani jarhaska. Nóksï jarhasti tsimani kʼuiripuecha engaksï májkueni járhatiika, ísï jimbojtsïnisï Tata Diosï Jeoba no méni terukutantajti máteruecha jingoni. Ima exesïndi ambe enga mintsitarhu jaka ka na engachi járhatiika incharinisï (1 Sam. 16:7). Ístu exesïndi ambe engachi újka úni, ambe engachi no újka úni ka na engachi tʼarhexeka. Ka nójtsïni kurhachesïndi sánderu ambe ka eskachi xáni uaaka úni. Jatsiskachi para májkueni úni eska ima ka ísï exekuarhini eskajtsïni ima na exejka. Engachi ísï úska, xarhatanchi jauaka eskachi “kaxumbikua” jingoni eratsesïnga ka nóchi jámaaka eratseni eskachi sánderu kʼéri ambeeska o eskachi menusiska (Rom. 12:3). No no sési jarhasti exeni na enga sési aianhpijka erachi ma (Ebr. 13:7). Inde ambejtsïni uaati jarhuatani parachi sánderu ambakiti jorhentpiricheni (Filip. 3:17). Joperu no májkuenisti ambakiti ejempluni exeni nemeerini para ma ísï úni ka eska exeni sinchi sánderu sési úxaki ambe ma eska ima o sánderu no sési. w21.07 20 párr. 1, 2

Engachi jingontku exeaska animaliichani, plantechani ka jóskuechani sánderuchi jakajkuaka Kueraajpirini (Sal. 19:1; Is. 40:26). Engachi sánderu jorhenguarhiska ícheeri ambe, sánderuchi jakajkuaka eska Tata Diosï Jeoba jindeeska Kueraajpiri. Engachi jorhenguarhini jauaka Tata Diosïiri kueraakateri ambe, ju je exeni ambe engajtsïni jorhendajka imeeri ambe (Rom. 1:20). Pori ejemplu, Jurhiata no solu jarhuajpesïndi paraka tsándiaka ka jorheperpintani paraka uaaka tsípikua jarhani Echerirhu, sino ístu, tsánda jukasti ambe ma engajtsïni úpiringa no sési úchini. ¿Nénachi kuájchakukata jarhaski kʼuiripuecha? Ma uirhipandani Echerirhu, gasi ma jarhasti engajtsïni kuájchakujka parajtsïni tsánda no no sési úchini. Enga niárajka sánderu tsándini, gasijtu niárasïndi sánderu úkuarhini parajtsïni kuájchakuni. ¿No ísïiski eska engachi ini ambe exejka, úsïngachi jakajkuni eska jarhaska Kueraajpiri ma enga kánikua jánhastiika ka xénchpetiini? w21.08 17 párr. 9, 10

Enga nema itsï atakuarhiaka, jatsiskachi para seguiriini jarhani xénchani ka janhanharhini (1 Juanu 4:20). Pori ejemplu, ju je no sóntku no sési exeni enga nema no sési uaaka, ni eratseni eska uékanisï ísï úka o eska imajku uandanhiakuarhisïnga. Sánderu sési, ju je xarhatakuni eskachi jukaparharasïnga ka eratseni eska ima sánderu kʼéri ambeeska eska jucha (Rom. 12:10; Filip. 2:3). Jatsiskachi para pʼamojkuani ka sési kaani iáminduechani. Engachi uéjka Tata Diosï Jeobaeri familiarhu jarhani para méntkisï, jatsiskachi para ísï irekani eska Biblia na jorhentpijka. Pori ejemplu, Jesúsi jorhentpispti eskachi jatsiska para pʼamojkuani ka sési kaani iámindu kʼuiripuechani, asta imeechani engajtsïni ikiachejka (Luk. 6:32-36). Jamberichi ísï exejka eska úkua jukasïnga. Engachi ísï exejka, jatsiskachi para jorhenguarhini ísï eratseni ka jámani eska Jesúsi. Engachi jánguarhintajka ísï kurhajchani Tata Diosï Jeobani ka májkueni jámani eska Jesúsi, xarhatakunchi jarhasïnga juchaari Taati auandarhu anapuni eskachi uékasïnga imeeri familiarhu jarhani para méntkisï. w21.08 6 párr. 14, 15

Jorhenguarhi je mintsikani Tata Diosï Jeobani. Engachi mintsikaska imani ka engachi jánguarhintaska marhuakuni, imajtsïni aiachisïndi eskajtsïni uánikua kóntperatechani íntsauaka. Biblia uánikua ejempluechani jatsiasti imeecheri engaksï jánguarhintapka eskaksï xáni úpka paraksï marhuakuni Tata Diosï. Uánikua xanhari imeechaksï ueenaspti marhuakuni Tata Diosïni ante de ima íntsaani uánikua kóntperatechani. Pori ejemplu, Tata Diosï újchakuraspti Abraánini enga ima na jurajkupkia imeeri kʼumanchikuani nájkiruka no mítepka “nani enga niárapiringa” (Ebr. 11:8). Ístu, Jakobu intsïnhaspti kóntperata ma, asta ísï tátsekua enga na ánjeli ma jingoni uarhiperapkia (Gén. 32:24-30). Ka enga ireta Israeli inchapiringia imani Echeri jimbo engaksï Aiaminhapka, ireta solu úspti parhikuni riu Jordánini ísï tátsekua engaksï saserdotiicha inchamipkia kʼéri iórhekuarhu (Jos. 3:14-16). Ístuchi uaaka jorhenguarhini iásï anapu Testiguecheri engaksï mintsikajka Tata Diosï Jeobani ka engaksï jirinhakuntajka nénateruksï sánderu marhuakuni. w21.08 29, 30 párr. 12-14

Erachiicha ka pirenchiicha engajtsï jatiriikia, chájtsï exeskia néna enga úkuarhienga ióntki ambe ma, joperujtsï ístu exesïnga eska kánikua jukaparhakueska ísï úni ambe ma eska na mójtakurhikia. Ka enga nótki xáni ióniika engajtsï itsï atakuarhika, útasterujtsï uaaka kánikua jarhuajpeni. Ka imeecha engaksï sánderu sapichku jaka, kánikuaksï tsitiaka kurhaani imani ambe engajtsï chá nitamanchaka ka ambe engajtsï jorhenguarhika. Engajtsï pʼindeka íntspini ima ambeeri engajtsï xáni jorhenguarhikia iásï jamberi, Tata Diosï Jeobaksïni kánikua kóndentaati (Luk. 6:38). Engaksï jatiriicha andarhierajka sánderu sapichkuechani, úsïndiksï jarhuajperani (Roma 1:12). Mándani arini jatsisti ambe ma enga jukaparhakua ambeeka, enga máteru no jatsika. Kʼératiichaksï jatsisti jánhaskakua ka imani ambe engaksï desde iónisï jorhenguarhikia. Ka tumbiichaksï jatsisti uinhapikua. Engaksï tumbiicha ka kʼératiicha jarhuajperajka eska amiguecha, kʼéri ambeksï arhisïndi juchaari Taati auandarhu anapuni enga xáni uékpitiika ka kʼéri kóntperataksï máesïndi kúnguarhikuarhu. w21.09 8 párr. 3; 13 párr. 17, 18

¿Andiksïsï judiuecha no sési exepi na enga uándikunhapka Jesúsi? Jimboka enga Jesúsi cháparhatanhapka ka ísï uándikunhani komueska no sési úri ma, nóksï úsïreendi jakajkuni eska ima Mesíasispka (Deut. 21:22, 23). Judiuecha engaksï no xéncheenga Jesúsini, nóksï uékaspti jiókuarhini eska ima no ma ambe no sési niátaspka, eskaksï chkuanderakua ambe jauatakuspka ka eskaksï no sési kámaspka. Nóksï sáni jurhimbikua jingoni jusgarispti. Judá anapu juesichaksï sóntku tánguarhintaspti ka nóksï ísï úspti eska na uandeenga lei (Luk. 22:54; Juanu 18:24). Enbesi deksï kurhajchani ka inbestigarini sini ísïispi ambe enga arhinhani japka Jesúsi, masi úsptiksï jirinhaantani “testiguechani engaksï chkuanderakua ambe kʼamanharhitantapiringa paraksï úni uándikutarkuarhini Jesúsini” (Mat. 26:59; Mar. 14:55-64). Ka enga Jesúsi na tsíntapkia, íksï no ambarhati juesiicha “kánikua tumina plateriksï” maiamuaspti Roma anapu sondaduechani engaksï tumbani kuáni japka paraksï chkuanderakua ambe uandantani enga Jesúsiiri kuerpu ísï nóteru japkia tumbarhu (Mat. 28:11-15). w21.05 11 párr. 12, 13

¡Kánikuajtsïni marhuachesïndi na enga xáni tekaantani jaka Tata Diosï Jeoba! Iámindu Adáni ka Eba uájpeechachi pekadu jingoni andajpenusïnga. Joperujtsïni Tata Diosï Jeoba xénchasïndi ka kuidarini, ka ístujtsïni aiachistia eska kʼamajkuaka iámindu no sési ambe enga iásï úkuarhini jaka (1 Juanu 4:19). Ka ima uandastia káni enga kʼamajkuaka iámindu ambe enga újka eskaksï kʼuiripuecha kómu nitamakuarhiaka. ¿A no eska Tata Diosïiri uékperakua uaaka eskachi tekaantaaka xáni eska xáni uétarhiaka? Tata Diosï Jeobajtsïni sánderu ambakiti ejemplu íntskusti para tekaantani. Ka Jesúsi májkueni úspti eska ima. Enga Echerirhu japka, tekaantaspti enga no sési arhinhapka, no sési kánhapka ka enga cháparhatanhapka chkarirhu ma juchantsïni jimbo (1 Ped. 2:21-24). Taati jémbeeri ejemplu, jarhuataspti Jesúsini paraka tekaantapiringa. Ka juchantsïntu uaati uinhaperantani. w21.07 12, 13 párr. 15-17

Juchaari Taati auandarhu anapu, pauani pauantsïni puáchiantasïndi pekaduechani (Sal. 103:10-14). Májkueni, nájkiruka Jesúsiiri chúxapatiicha imperfektuepka, ima méntkisï tekaakuantasti. Niáraspti jamberi íntspini imeeri tsípikuani parachi jucha úni puáminhantani juchaari pekaduechani (1 Juanu 2:1, 2). Engachi tekaatspintajka, sánderuchi sési pájperasïnga juchaari erachiicha jingoni (Efes. 4:32). Jo ísïisti, ménisï úkua jukasti úni tekaakuantani máteruechani, peruchi jatsiska para jánguarhintani ísï úni. Pirenchi ma uandasïndi na enga jarhuatapka jorhenguarhikua ma rebisteri La Atalaya enga arhinhajka “Perdónense liberalmente unos a otros”. Ima ini ambe karasti: “I jorhenguarhikua uandasïreendi eska tekaakuantani máteruechani no arhikuekasïnga eskachi jiókuarhixaka ima no sési ambe enga úka o eskachi no xáni kʼéri ambe exexaka ambe enga úkuarhika. Peru kʼóru arhikuekasïndi eskachi no uékasïnga ikiani pakarani kʼuiripuni jingoni ka eskachi uékasïnga sési pʼikuarhinheni”. Engachi tekaakuantajka juchaari erachiichani, xarhatakuasïngachi eskachi xénchaasïnga ka eskachi uékasïnga májkueni úni eska juchaari Taati Jeoba. w21.09 24 párr. 15, 16

Jesúsi kánikua jukaparharasïreendi jurhimbikuani, jurhimbikua Tata Diosïiri ambe ka ambe enga ima eratseni jaka úni. Ísï irekaspti eska na uandeenga jurhimbikua ka mítetaraaspti máteruechani (Juanu 18:37). Imeecha engaksï iásï chúxapajka Jesúsini, ístuksï kánikua jukaparharasïndi jurhimbikuani (Juanu 4:23). Apostoli Pedru uandaspti eska relijioni kristiana, jindeespka “xanharu enga ísïika [o jurhimbitiini]” (2 Ped. 2:2). Primeru siglurhu anapu kristianuechajtuksï kánikua jukaparharasïreendi jurhimbikuani jimboksïsï no jiókuarhiendi ambe engaksï relijionicha jorhentpienga, kʼuiripuecheri pʼindekuechani ka ambe engaksï kʼuiripuecha uandeenga ka enga no terukuntenga jurhimbikua jingoni (Kol. 2:8). Májkueni, iásï anapu kristianuechajtuksï jánguarhintasïndi jámani “indeni uandakuani jingoni enga ísïika” (3 Juanu 3, 4). ¿Nénaksï úsïni i ambe? Méntkisïksï jánguarhintasïndi paraka ima ambe engaksï ima jakajkujka ka na engaksï irekajka terukuntaaka imani ambe jingoni enga Tata Diosï Jeobaeri Karakata arhijka. Jeobaeri testiguechaksï no uandasïndi eskaksï iámindu ambe sési kurhangusïnga Biblieri. Ménisïksï no úsïndi iámindu ambe kurhanguni ambe enga Biblia uandajka o na enga jatsika para ánchikuarhini kúnguarhikua. Peru engaksï na niárakia sési kurhanguni ambe ma, jirejiresïksï ueenasïndi ísï úni. w21.10 22 párr. 11, 12

Biblieri jurhiatikuecha jimbo, kʼérati bardecha engaksï uirhipandeenga iretani ma, kuájchakuasïreendi kʼuiripuechani imeecheeri enemiguecheeri. Sáno májkueni, ima ambe enga Tata Diosï Jeoba újka imeeri ambakiti uékperakua jimbo, ísïisti komueska kʼéri barda ma engajtsïni uirhipandajka para kuájchakuni juchaari pájperakua imani jingoni. Ístu, imeeri ambakiti uékperakua jingoni, Tata Diosï Jeobajtsïni andarhiterasïndi imani jingoni (Jer. 31:3). Salmista Dabidi ístu úraspti máteru ambe para xarhatani na enga Tata Diosï Jeoba kuájchakujka imeeri iretani. Karaspti: “Tata Diosï jindeesti juchiiti kuájchakukua enga segurueka, Tata Diosï engareni ambakiti uékperakua xarhatachejka”. Ka ístu uandaspti: “Ima jindeesti juchiiti ambakiti uékperakua, juchiiti uinhapikua, nani engani újka kuájchakukuarhini ka imarini pʼímutantasïndi, imarini kuájchakusïndi ka imarini sési pʼikuastantasïndi” (Sal. 59:17; 144:2). ¿Andisï Dabidi terukutantapi Tata Diosï Jeobaeri ambakiti uékperakuani, kuájchakukua ma jingoni? Jimboka no arhiparini nani engachi irekaaka parhakpinirhu, engachi seguiriuaka marhuakuni Tata Diosï Jeobani, imajtsïni méntkisï kuájchakuati parachi jucha seguiriini sési pájperani imani jingoni. w21.11 6 párr. 14, 15

Ma xanhari Jesúsi ka imeeri chúxapatiichaksï barku ma jimbo niraxapti ka ueenaspti uinhamu janini ka tarhiani. Jesúsi úraspti i ambe para jorhendaani imeeri chúxapatiichani eskaksï jatsispka para sánderu mintsikani Tata Diosïni (Mat. 8:23-26, TNM). Xáni uinhamu janixapti ka tarhiani engaksï oleecha ueenapka ójchakurani barkuni, peru Jesúsi ma agustu kʼuíxapti. Kánikua chéparini, Jesúsiiri chúxapatiichaksï nirasïndi tsínharhitani ka arhisïndiksï eska pʼímutantauaka. No sáni chéparini, Jesúsi arhiasïndi: “Achamasïicha engajtsï xáni sántku mintsikajka, ¿andijtsïsï xáni chéni jaki?”. ¿Kʼéri uandanhiatajtsï ma jatsiski? Jamberijtsï no sési nitamakuarhini jaka desastre naturali ma jimbo. O jamberi jimbokajtsï uinhamu pʼamenchani jaka ka indeni ambe jimbojtsï uandanhiani jarhani ka nójtsï míteni ambe úni. Jamberijtsï ménisï kánikua uandanhiajka, joperu asï jurajku je eska inde ambe uaaka eskajtsï nóteru mintsikaakia Tata Diosï Jeobani. Imani jingoni uénhekuarhi je. Parajtsï úni sánderu mintsikani Tata Diosï Jeobani, eratsenta je na engaksïni jarhuatakia (Sal. 77:11). Uaakajtsï seguru jarhani eskaksïni ima no méni jurajkuaka iásï ni sánderu orhepani. w21.11 22 párr. 7, 10

Nema úpirindi kurhanguni eska para kurhajchani ini mandamientuni solu uétarhisïreenga no méni pʼikutspini ambe ma, peru úpirindi ménderueni sïpani jarhani. Pori ejemplu, enga komersianti ma úrapiringa baskuleechani ka peseechani engaksï no sési tsʼeriteenga para enganiarpini, sïpani japirindi. Levítico 19:13 uandasïndi eska sïpani ístu jindeeska no jurhimbitku jámani negosiuecharhu, jimboka jimini uandasïnga: “Asï sïpaku máteruni”. Ísï jimbo, enga nema no jurhimbikua jingoni jámaska negosiuecharhu, sïpani jauati. Mandamientu ochu juramusïreendi eska ma no sïpapiringa, joperu ambe enga Levítico uandajka jarhuatasïndijtsïni parachi kurhanguni na engachi jatsika para ísï úni eska i lei na arhijka. Sési japirindi eskachi eratsentaaka na enga exejka Tata Diosï Jeoba enga nema no jurhimbikua jingoni újka ambe ma o enga sïpajka. Ju je kurhamarhikuarhini: “Indeni ambe jimbo enga Levítico 19:11-13 uandajka, ¿sési japirini eskani mójtakupiringa na engani uaajka negosiuechani ka na engani ánchikuarhijka?”. w21.12 9, 10 párr. 6-8

Engachi kómarhini jauaka Jeobani, ju je eratsentani imani ambe engachi no sési úka imani jurhiatikua jimbo, ka ju je kurhakuni eskajtsïni puáchentaaka. Joperu engachi sánderu k’éri ambe no sési úka, ju je kurhakuani orhejtsïkutiichani eskajtsïni jarhuataaka. Imajtsïni kurhajchaati, ka uékperakua jingoni konsejujtsïni íntskuati Biblia jingoni. Ístuksï kómarhikua uaati juchantsïni jingoni parakajtsïni Jeoba puáchentaaka tata Jesukristueri uarhikua jimbo parakachi ménderu sési pájperantaaka Jeobani jingoni (Sant. 5:14-16). Ístu, kánikuajtsïni jarhuataati engachi eratsentaska euajpintskueri ambe. Úpiringachi kánikua no sési pʼikuarherani engachi eratsentaska na enga xáni no sési nitamakuarhipka Tata Diosïiri Uájpa. Joperu engachi sánderu eratsentaaka ambe enga úpka tata Jesukristu juchantsïni jimbo sánderuchi xénchaaka imani ka imeeri Taati jémbani. Mándani uéxurhinchi nirasïnga miántani tata Jesukristueri uarhikuani ka tsípikua jingonchi pʼímarhiasïnga máteruechani paraksï májkueni úni. ¡Xáni enga k’éri kóntperata máeka engajtsïni Jeoba íntskuka sésikua parachi jorhendaani máteruechani imeeri Uájpeeri ambe! w21.04 18, 19 párr. 13-16

Ju je eratsentani ambe enga úpka Jesúsi jiáni engaksï uánikua kʼuiripuecha nípka exeni juátarhu ma. Jesúsi erantskutaspti kómarhini Tata Diosïni, ísï jimbo kuataratini japti. Peru enga exeapka iámindu imani kʼuiripuechani, pʼamojkuaspti pobrichani ka pʼamenchatiichani. No solu tsinaaspti pʼamenchatiichani, sino ístu íntspispti ambakiti arhijtsïkperata ma enga ísï mítekateeka komueska Sermón del Monte (Luk. 6:12-20). Ístu, Jesúsi uékaspti máteruecha jingoni jarhani. Ju je eranhaskani ambe enga úkuarhipka ma xanhari: Jesúsi kʼamaraspti míteni eskaksï uándikuspka imeeri amigu jémba Juanuni enga itsï atauenga kʼuiripuechani. Biblia uandasïndi: “Enga na mítepka Jesúsi, késtakuspti jima ka ma tepari jimbo parhikuspti japonda para niárani jima enga no nema irekapka” (Mat. 14:10-13). Joperu jima enga niárapiringa, tʼuini uánikua kʼuiripuechaksï jarhasptia (Mar. 6:31-33). Kuenta íntskukuarhespti eskaksï kánikua uétarhinchaxapka Tata Diosïiri ambe míteni ka jimbosï sóntku jarhuataapti (Luk. 9:10, 11). w22.02 21 párr. 4, 6

¿Ambechi jatsiski para úni engachi no sési pʼikuastaka erachini ma? Jatsiskachi para mintsita jingoni kómarhikuarhini Tata Diosï Jeobani eskajtsïni jarhuataaka parachi úni sési pájperantani erachi jingoni. Ístuchi jatsiska para exeni na engachi jásï kʼuiripueka jucha. Uaakachi kurhamarhikuarhini: “¿Uékasïni ji tsïtani uérani ka kaxumbikua jingoni arhini erachini eskarini puáchentaaka parani sési pájperantani imani jingoni? ¿Nénaksï pʼikuarheraa Tata Diosï Jeoba ka Jesúsi engani ji ueenaska úni ambe ma parani sési pájperantani erachi o pirenchi ma jingoni?”. I ambejtsïni jarhuataati parachi úni Jesúsini kurhajchani ka parachi kaxumbikua jingoni uandontskuarheni juchaari erachi jingoni parachi sési pájperantani. Engachi uandontskuarheska erachi ma jingoni parachi sési peentani ambe ma, jatsiskachi para kaxumbitiini (Efesu 4:2, 3). Jatsiskachi para uandontskuarheni erachi jingoni enga ikiani jaka juchantsïni jingoni parachi sési pʼikuastantani. Ju je miáni eska sánderu jukaparhakueska sési pájperantani erachini jingoni ka eska exeni nésï no sési ú (1 Kor. 6:7). w21.12 26 párr. 13-16

Jesúsi kánikua kómu pʼikuarheraxapti jimbokaksï uánikua judiuecha no jiókuarhipiringa ambe enga ima aianhpepiringa Reinueri ambe. Indeni jimbo, Jerusaléni kʼamajkunhapirindi ka judiuecha engaksï tsípiti pakarapiringa presuksï pánhapirindi (Luk. 21:20-24). Ka ísï eska Jesúsi na uandapkia, uánikua kʼuiripu no jiókuarhispti. Jima engajtsï chá irekaka, ¿kʼuiripuechaksï uékasïni jorhenguarhini Reinueri ambe? Engajtsï chá jánguarhintani jaka jorhentpini jurhimbikueri ambe ka namunitkuksï uékani kurhaani, ¿ambejtsï uaa jorhenguarhini Jesúsiiri ambe enga ima ísï uerapka? Tata Diosï Jeoba xénchaasïndi kʼuiripuechani. Enga Jesúsi uerapka, miátantasïndijtsïni na enga pendienti pájka Tata Diosï Jeoba kʼuiripuecha jimbo. “Jimboka no uékasïnga eska nema tsïncheaka sino eska iáminduecha andajkuarhiaka móantani” (2 Ped. 3:9). Juchajtuchi xarhatasïnga eskachi xénchaasïnga kʼuiripuechani engachi jánguarhintajka paraka ambakiti aianhperakua mintsitarhu niárakuauaka (Mat. 22:39). w22.01 16 párr. 10-12

Niáraakachi sánderu mintsikani Tata Diosïni engachi eratsentaska ambe enga úpka iámu imeeri iretani jimbo ka ambe enga úka juchantsïni jimbo. Joperu sánderu jukaparhakua ambe, jindeesti eskachi niáraaka sánderu xénchani Tata Diosï Jeobani. Inde jindeesti sánderu jukaparhakua ambe. ¿Andi? Jimboka xénchperakua úsïndi eskachi kurhajchaaka Tata Diosï Jeobani, eskachi uaaka ambe enga ima jaiapanhentajka ka eskachi tekaantaaka náki uéjki tsʼéjkukua ma (Mat. 22:37-39; 1 Kor. 13:4, 7; 1 Juanu 5:3). No jarhasti máteru ambe enga sánderu jukaparhakueka eska niárani Tata Diosï Jeobaeri amigueni (Sal. 63:1-7). Ju je miáni eskachi kʼéri ambe arhisïnga Tata Diosïni engachi kómarhijka, jorhenguarhijka ka engachi eratsentajka. Ju je májkueni úni eska Jesúsi ka exeni nani ka na jatinchi uaa Tata Diosï Jeoba jingoni jarhani. Ju je no jurajkuni eskajtsïni ójkutaaka ima ambe enga no jukaparhakueka. Ka engachi Tata Diosïiri ambe úni jauaka, ju je kurhakuni Tata Diosï Jeobani eskajtsïni jarhuataaka parakajtsïni no ma ambe ójkutaaka. Engachi jánguarhintaska sési úrani juchaari tiempuni, Tata Diosï Jeoba uaati eskachi irekaaka para méntkisï jimbanhi parhakpinirhu (Mar. 4:24). w22.01 31 párr. 18-20

Juchachi imani ambesï újka ambe engachi eratsejka. Ísï jimbojtsïnisï Jesúsi jorhendati eskachi jatsiska para kénditani náki uéjki eratsekuani engajtsïni no sési ambe úraaka (Mat. 5:21, 22, 28, 29, TNM). Jimbokachi uékasïnga jaiapanherantani juchaari Taati auandarhu anapuni, uétarhisïndi eskachi méntku no jámaaka imani ambe eratseni enga no sési jaka. Jesúsi uandaspti: “Ambe enga ma kʼuiripueri penchumikuarhu uérajka, mintsitarhusï uérajti” (Mat. 15:18). Ísïisti, ambe engachi uandajka xarhatasïndi na engachi jásï kʼuiripueka. Ísï jimbo, kurhamarhikuarhi je: “¿Méntkisï jurhimbitkuni uandasïni nájkirukarini no sési nicheaka? Engani tembuchakia o uambuchani, ¿jingontkuni jámasïni parani no koketiarikuni máteru nemani enga no juchiiti témbeuaka o uámbeeni? ¿Jánguarhintasïni parani no uandontskuarheni ísku jándikueri ambe? ¿Jánguarhintasïni no no sési mókukuarhini engareni nema ikiatajka?”. Arhuta je tiempu ka eratseanta je ini ambe. Engajtsï chá jánguarhintaska no no sési jásï ambe uandaani, sánderu fásiliuati eskajtsï nóteru ísï jámaakia eska ióntki. w22.03 5 párr. 12-14

Imeecha engaksï arhijka nemani eska íntskuaka konseju ma, sáno méntkisïksï sánderu sési marhuakusïndi Tata Diosïni. Ísï jimbo, ju je jucha ueenani arhini nemani eskajtsïni konseju ma íntskuaka. ¿Kánchi úpirini konseju ma kurhakuni kúnguarhikuarhu anapuni ma? Ju je exeani máru ejempluechani. 1) Pirenchi ma arhisïndi máteru aianhpirini eska pámbetaaka Biblieri ambe jorhentpini ka tátsekua kurhamarhisïndi ambe uaa úni para sánderu sési jorhentpini. 2) Uátsï ma, pantaloniichani máru uékasïndi piáni, ísï jimbo kurhamarhisïndi pirenchini ma enga sési marhuakuni jaka Tata Diosïni na exeasïni imani pantaloniichani enga erakuakia. 3) Erachi ma, primeru xanhari arhijtsïkpiati kúnguarhikuarhu ka arhisïndi erachini ma enga sési arhijtsïkpijka eska jingontku kurhajchaaka enga nitamatarani jauaka paraka tátsekua íntskuauaka máru konsejuechani. Asta imeecha engaksï ióni páni jakaia arhijtsïkpini, sésiksï úsïndi engaksï arhiajka máteru erachiichani eskaksï konseju ma íntskuauaka ka engaksï ísï újka eskaksï na arhinhajka (Prov. 19:20). w22.02 13 párr. 15-17

Tata Diosï Jeobajtsïni májkueni xarhatachesïndi uékperakua eska na xarhatakupka imeeri Uájpani enga ixú Echerirhu jámani japka (Juanu 5:20). Jarhuataspti paraka Jesúsi no jurajkupiringa imani, paraka sési pʼikuarherapiringa ka paraka jatsikuarhepiringa ambe enga uétarhinchapiringa. Ka méntkisï arhispti na enga xáni xéncheenga ka eska jaiapanhentasïreenga (Mat. 3:16, 17). Jesúsi no méni jandiajku pʼikuarheraspti, mítespti eska imeeri Taati auandarhu anapu enga xáni xéncheenga, méntkisï imani jingoni jarhasïreenga. Májkueni eska Jesúsi, iáminduecha mémindu pʼikuarheraskia eskajtsïni Jeoba xénchasïnga. Ju je eratseni i ambe: Jeoba ústi eskachi andarhierapiringa imani ka intsïkuarhestijtsïni familia ma interu parhakpinirhu enga marhuakuni jaka imani ka engajtsïni xénchajka ka enga újka eskachi jucha tsípikua jingoni irekaaka ka eskachi sési pʼikuarheraaka (Juanu 6:44). Ístujtsïni íntskusïndi ambe engachi jucha uétarhinchajka parachi úni sánderu mintsinharhini imani. Ka jarhuatasïndijtsïni parachi pauani pauani jatsikuarheni ambe engachi uétarhinchajka (Mat. 6:31, 32). Engachi eratsentajka na engajtsïni xáni xénchajka Tata Diosï Jeoba, juchajtuchi sánderu xénchasïnga imani. w21.09 22 párr. 8, 9

¿Nénajtsï jámasïreeni ante dejtsï Biblieri ambe jorhenguarhini Jeobaeri testiguecha jingoni? Uánikuechachi no tsitisïnga indeni ambe miántani, jimbokachi jamberi ísï jámasïreenga ka ísï eratseni eskaksï parhakpinirhu anapuecha na jámajka. Engachi ísï jámeenga, nóchi ma erokuarhikua jatsispka ka nijtuchi jatsipi Tata Diosïni (Efes. 2:12). Joperu engajtsï chá na jorhenguarhipani japka Biblieri ambe, chájtsï niáraska jorhenguarhini eskajtsï jatsiska Taatini ma enga auandarhu jaka ka engaksïni kánikua xénchajka. Ístujtsï kurhanguspka eska engajtsï uékeenga Tata Diosï Jeobani jaiapanherantani ka imeeri familia jingoni kuenta úkuarhini, jatsispkajtsï para mójtakurhini ka iásï ménderueni eratsenia. Ka ístu eskajtsï jatsipiringa para janhanharhiani Tata Diosïiri juramukuechani (Efes. 5:3-5). Jimboka Tata Diosï Jeoba jindeeska juchaari Kuerajpiri ka juchaari Taati auandarhu anapu, sésikua jatsisti para uandani nénaksï jatsiski para jámani imeecha engaksï uéjka imeeri familiarhu jarhani. Ka ini ambe arhiasïndi imeechani engaksï uéjka itsï atakuarhini: “Nóterujtsï ísï jámaakia eskajtsï ióntki na jámeenga”. w22.03 2 párr. 1-3

Máteru karichiichaksï tsípikua jingoni nirasïndi Miántskuarhu paraksï exeni ambe enga jima úkuarhijka ka paraksï eratsentani imeecheeri erokuarhikuani. Uékani jarhasïndiksï kurhaani Miántskueri arhijtsïkperatani, jimboka jima imeeri ambe uandasïnga enga Kristu ka 144,000 erakukateecha uaaka kʼuiripuecha jimbo Mili Uéxurhini jimbo engaksï imeecha juramuaka. Í juramutiicha ka tata Jesukristu enga Reiika ka enga íchani orhekupajka, jarhuajpeatiksï paraka Echeri Paraisu máeuaka ka paraksï ima kʼuiripuecha engaksï kurhajchaaka Tata Diosïni niáraaka perfektueni. K’éri tsípikuarhita máesti para ima xáni uánikua kʼuiripuecha engaksï nirajka Miántskuarhu, jimbokaksï úsïnga eranhaskani ima jurhiatikuani engaksï ari profesiecha úkuarhiaka, Isaías 35:5, 6; 65:21-23 ka Jaŋaskuecha 21:3, 4. Engaksï eranhaskajka imeecheeri parienticha jingoni jarhani jimbanhi parhakpinirhu, sánderuksï mintsikasïndi ambe enga úkuarhiaka sánderu orhepani ka sánderuksï uékasïndi marhuakuni Tata Diosï Jeobani (Mat. 24:13; Gal. 6:9). w22.01 21 párr. 5-7

¿Ambeeski euajpintskua? Jindeesti ambe enga Jesúsi maiampika para euajpintani ambe enga Adáni tsïtapka (1 Kor. 15:22). ¿Andichisï uétarhinchajki? Jimboka eska na uandeenga Moisésiiri Lei, Jeoba erokuarhisïreendi eska maiampinhapiringa “tsípikua, tsípikua jimbo” (Éx. 21:23, 24). Adáni nóteru perfektuesptia. Ísï jimbo, para ísï úni eska Jeoba na kurhajkuarhipka, Jesúsi jatsispti para íntspini imeeri tsípikuani enga perfektuepka (Rom. 5:17). Ini ambe úparini, niárasïndi jindeeni “Taati para Méntkisï” iáminduecheeri engaksï xáni mintsikajka euajpintskuani (Is. 9:6; Rom. 3:23, 24). Jesúsi uékaspti íntspini imeeri tsípikuani jimboka kánikua xénchasïnga Taati jémbani ka ístu juchantsïni (Juanu 14:31; 15:13). Inde mismu uékperakua úspti eska no méni jurajkupiringa Taati jémbani asta uarhikuarhu jamberi ka eska úpiringa ambe enga Taati jémba uékeenga. Ka indeni ambe jimbo niárasti ísï úkuarhini eska Tata Diosï na eratsetini japka para kʼuiripuecha ka ístu para Echeri. w21.04 14 párr. 2, 3