Abrili

Jesúsijtsïni xarhatachesti eskajtsïni xénchasïnga jimboka uékaska uarhini juchantsïni jimbo (Juanu 15:13). Ísïisti eskachi no méni uaaka maiamuantani Jeobani ka Jesúsini iámindu ambe engaksï uékperakua jimbo úka juchantsïni jimbo, joperuchi uaaka xarhatakuani eskachi agradesidu jarhaska imani ambe jingoni engachi pauani pauani újka juchaari tsípikuarhu (Kol. 3:15). Erakukateechaksï kánikua jukaparharasïndi euajpintskuani, jimbokaksï ini jimbosï újti jatsini imeecheeri erokuarhikuani (Mat. 20:28). Ka jimbokaksï mintsikasïnga Kristuni, Tata Diosï Jeoba ísï exeasïndi komueska kʼuiripuecha engaksï jurhimbikua jingoni jámajka ka jiókuarhiasïndi komueska imeeri uájpeecha (Rom. 5:1; 8:15-17, 23). Ka máteru karichichajtuksï májkueni mintsikasïndi euajpintskuani jimboka Kristueri iurhiri jimbo imeechaksï uaati jaiapanherantani Tata Diosïni ka tsípitiksï pakarani “k’éri mískuarhitarhu” (Jaŋ. 7:13-15). Engaksï i tsimani grupuecha nirajka Miántskuarhu mándani uéxurhini, xarhatasïndiksï eskaksï agradesidu jarhaska euajpintskuani jimbo. w22.01 23 párr. 14, 15

Para tata Jesukristu sánderu no sési jarhaspti ambe enga jimbo uándikunhapka. Arhisptiksï eska no sési ambe uandaspka Tata Diosïiri ambe ka imeeri nombriiri (Mat. 26:64-66). Tata Jesukristu kánikua no sési pʼikuarherasïreendi ini ambe jimbo jimbokaksï kʼuiripuecha arhisïreenga eska no sési ambe uandaspka Tata Diosïiri ambe ka erokuarhixapti paraka Taati jémba úpiringa ambe ma paraka ima no ísï uarhipiringa eska no sési úri ma (Mat. 26:38, 39, 42). Tata Jesukristu jatsispti para cháparhatanhani paraka judiuechani nóteru no sési nikuapiringia (Gal. 3:10). Niárasptiksï no sési nikuani jimbokaksï aiatspespka kurhajchani Tata Diosïiri Leini, joperuksï no ísï úspti. Ka ístu imani kʼamanharhintskua jimbo enga Adáni kéritaapka (Rom. 5:12). Lei uandasïreendi eska enga kʼuiripu ma no sési jásï ambe úpiringa enga jimbo jatsipiringa para uándikunhani, eska jatsipiringa para ísï úkuarhini ka ménisïksï chkarirhu ma cháparhataasïrendi (Deut. 21:22, 23; 27:26). Ísï jimbo, enga tata Jesukristu cháparhatanhapka chkarirhu ma, marhuakusïreendi imani mismu iretani enga no jiókuarhipka imani. w21.04 16 párr. 5, 6

Ju je eranhaskani na enga nitamakuarhipka tata Jesukristu últimu jurhiatikua jimbo ixú Echerirhu. Roma anapu sondaduechaksï jupikaspti ka no sési kámaspti (Mat. 26:52-54; Juanu 18:3; 19:1). Kʼuikirhisptiksï látigu ma jingoni enga pʼikurhienga kʼuiripetani. Tátsekua, chkariksï ma páraspti nájkiruka ima iurhiri uéparhani japka. Tata Jesukristu ueenaspti antsikuni chkarini asta jima jamberi nani enga uándikunhapiringa. Joperu tátsekua, sondaduechaksï acheetini ma arhispti eska jarhuatapiringa Jesúsini imani chkarini páni (Mat. 27:32, TNM). Engaksï na niárapkia jima engaksï uándikupiringa, sondaduechaksï chándukuspti ka chájkuni, ka imeeri kʼuétsapikua jimbo, imeeri kʼuiripeta sánderu mítakuarhixapti jima engaksï chátapka. Engaksï tata Jesukristueri amiguecha ka amamba uerani japka ka no sési pʼikuarherani, Judea anapu juramutiichaksï teresmarhuxapti tata Jesukristuni (Luk. 23:32-38; Juanu 19:25, TNM). Ióni jarhaspti no úni uarhini. Enga ísï cháparhakata japka, úkua jukanchaxapti jirejtani, ísï jimbo, imeeri mintsita ka pulmonichaksï jatsispti para kánikua ánchikuarhini. Míteparini eska no jurajkuspka Jeobani, kómarhispti. Tátsekua tʼénksataspti ka uarhispti (Mar. 15:37; Luk. 23:46; Juanu 10:18; 19:30). ¡Xáni enga kómu uarhipka tata Jesukristu, kánikua pʼameraparini ka iatsitakuarhu! w21.04 16 párr. 4

Jesúsi arhiaspti jimbanhi pakatperakueri ambe ka pakatperakua Reinueri imeeri 11 apostoliichani engaksï no jurajkupka (Luk. 22:19, 20, 28-30). Ini pakatperakuecha jimbo apostoliicha ka máteru namunitu kristianuecha úpirindiksï reiini ka saserdotiini jini auandarhu (Jaŋ. 5:10; 14:1). Erakukateecha engaksï útasï Echerirhu pakarani jaka ini tsimani pakatperakuechani jimboksï jarhasti, ísï jimboksïsï újti arhani kurhindani ka binuni Miántskuarhu. Tata Diosï Jeoba ambakiti erokuarhikua ma íntsaasti: nóksï méni niárani uarhini, ni tereni auandarhu, marhuauatiksï tata Jesukristu jingoni ka máteru erakukateecha jingoni, ka sánderu ambakiti ambe, uaatiksï Tata Diosï Jeobaeri orhepatini jimbo jarhani (1 Kor. 15:51-53; 1 Juanu 3:2). Erakukateechaksï mítesti eskaksï jatsiska para no méni jurajkuni Tata Diosïni asta uarhikuarhu jamberi (2 Tim. 4:7, 8). w22.01 20, 21 párr. 4, 5

Jesúsi jingonksï cháparhatanhaspti tsimani no sési úriicha (Luk. 23:40, 41). Máechakua eratespti ka arhispti: “Miárini engari chiiti reinurhu inchaaka” (Luc. 23:42, TNM). Jesúsi úspi ini ambe aiakuni no sési úrini jiáni enga uarhini japkia jimboka mítespka eska imeeri Taati jémba pʼamojpitiiska (Sal. 103:8; Ebr. 1:3). Jeobajtsïni uékasïndi puáchentani ka pʼamojperakua xarhatacheni engachi no sési pʼikuarheraska imani no sési jásï ambe jimbo engachi úka ka engachi mintsikaska tata Jesukristueri uarhikuani (1 Juanu 1:7). Joperu ¿ambechi uaa úni engachi ménisï úkua jukanchaska jakajkuni eskajtsïni Jeoba puáchentaaka imani ambe jimbo engachi úka? Ju je eratseni ini ambe: antede uarhini, Jesúsi pʼamojperakua xarhatakuspti no sési úrini ma enga jiáni uénapka mintsikani. Ísï jimbo, Jeoba sánderu pʼamojperakua xarhatakuauati imeeri ambakiti marhuariichani (Sal. 51:1; 1 Juanu 2:1, 2). w21.04 9 párr. 5, 6

¿Ambe ka ambe úspi Jesúsi enga ísï no méni jurajkupka Jeobani asta uarhikuarhu jamberi? Orheta xarhataspti eska Noambakiti chkuanderari máeska, jimboka xarhataspka eska kʼuiripu perfektu ma uaaka no méni jurajkuni Tata Diosïni nájkiruka Noambakiti jánguarhintajka tsʼéjkuni. Máteru ambe, íntspispti imeeri tsípikuani parajtsïni euajpintani. Ka enga ísï uarhipka, úspti eskaksï kʼuiripuecha úpiringa ambakiti pájperakua ma jatsini Jeoba jingoni ka únksï irekani para méntkisï nájkirukaksï kʼamanharintstiika. Ka últimu, Jesúsi xarhataspti eska Jeoba ambakiti juramuti máeska ka pímbinhajkuntasti taati jémbeeri arhinhakuani. Ju je ísï irekani pauani pauani enajki i jindee últimu jurhiatikua parachi sési marhuakuni Jeobani. Engachi ísï úska, nájkirukachi niáraka uarhini, uaakachi arhini Jeobani: “Úska na engani xáni úka úni, parakeni no méni jurajkuni, parani xarhatani eska Noambakiti chkuanderari máeska ka parani xarhatani eskari ambakiti juramuti máeska ka pímbinhajkuntani chiiti arhinhakuani”. w21.04 12 párr. 13, 14

Ísï tátsekua engaksï na uandapkia chkuanderakua ambe Jesúsiiri ka uándikutarkuarhinksï, teresmarhusptiksï imeecha engaksï ikiakuenga Jesúsini, no sésiksï kámaspti ka cháparhatasptiksï chkarirhu ma. Engaksï imeeri jájkiicha ka jantsiriicha cháparhatakata japka, méni enga jirejtenga ka uandani kánikua pʼamerasïreendi. Joperu no pínasku pakaraspti jimboka jukaparhakua ambe jatsispka para uandani. Últimu ambe enga Jesúsi uandapka ambakiti ambejtsïni jorhendasïndi. Miátantasïndijtsïni eskachi jatsiska para puákuantani máteruechani ka mintsikani eskajtsïni Jeoba puáchentaaka. Kʼéri kóntperata máesti jatsiani erachiichani ka pirenchiichani engajtsïni jarhuatajka. Joperu, engachi jarhuajperata uétarhinchani jauaka jatsiskachi para kurhajkuarhini. Míteskachi eskajtsïni Jeoba jarhuataaka tekaantani na uéjki jásï tsʼéjkukua ma. Kurhangusïngachi eska kánikua jukaparhakueska pauani pauani ísï irekani enajki i jindee últimu jurhiatikua parachi xarhatakuni Jeobani eskachi no méni jurajkuaka ka seguruchi jarhaska eskajtsïni Jeoba tsítantaaka engachi niáraska uarhini. w21.04 8 párr. 1; 13 párr. 17, 18

Engachi ísï jámaska eska Jesúsi na jámapka, uaakachi irekani para méntkisï. Enga tumbi jatsikuarheri ma kurhamarhipka Jesúsini ambe jatsispi para úni para irekani para méntkisï, ima arhispti: “Júreni chúxapuni” (Mat. 19:16-21). Jesúsi i ambe arhiaspti máru judiuechani engaksï no jakajkuenga eska ima Kristuespka: “Juchiiti karichichajtsïni [...] chúxapusïndi, ka ji íntsaasïnga tsípikua para méntkisï” (Juanu 10:24-29). Engachi ísï úska eska Jesúsi na jorhentpipka imeeri uandakuecha jimbo ka imeeri úkuecha jimbo, xarhatanchi jauaka eskachi mintsikasïnga imani ka nóchi kéndikuni jauaka imani xanharurhu enga pájpijka tsípikuarhu enga jindeeka para méntkisï (Mat. 7:14). Parachi úni seguiriini ísï jámani eska Jesúsi na jámapka, orhetachi jatsiska para míteni. Imani míteni arhikuekasïndi seguiriini jarhani jorhenguarhini imeeri ambe. Pori ejemplu, na enga jásïika, na enga eratsejka ka imeeri juramukuechani. Iá sea engachi ióni páni jakaia marhuakuni Jeobani o nótki xáni, jatsiskachi para jánguarhintani seguiriini jarhani míteni Jeobani ka imeeri Uájpani. w21.04 4 párr. 9, 10

Seguru eska apostoli Pablu ménichanisï no sési pʼikuarhereenga imani ambe jimbo enga antesi úpka. Ima uandaspti eska ima jindeespka “sánderu kʼéri” pekadori jimboka antede míteni jurhimbikuani, uánikua ireteecha jimbo no sési kaaspka kristianuechani (1 Tim. 1:15). Ónhatarkuarhiaspti ka jurajkuspti parakaksï máteruecha uándikunhapiringa (Uku. 26:10, 11). Eranhaska je eska Pablu apoiarispka paraksï uándikuni temungurhirini ma engaksï kristianuepka ka tátsekua niárani míteni imeecheeri uájpani ma. ¿Néna pʼikuarherapirini? Pablu pʼamondakuarhisïreendi imani ambe jimbo enga no sési úpka. Mítespti eska no úpiringa mójtakuni imani ambe enga antesi úpka. Joperu seguru jarhaspti eska Kristu uarhispka imani jimbo, jimbosï úpti ísï karani: “Peru Diosïiri kóntperatani jimbo, andajkuarhiska ísï jindeeni eskani na jindeekia” (1 Kor. 15:3, 10). ¿Ambechi jorhenguarhisïni? Eskachi jatsiska para seguru jarhani eska Kristu uarhiska mándani arhini juchantsïni jimbo ka indeni jimbochisï újka ambakiti pájperakua ma jatsini Jeoba jingoni (Uku. 3:19). Ambe enga jukaparhakueka para Tata Diosï, jindeesti ambe engachi uaaka iásï ka sánderu orhepatini, no imani ambe engachi ióntki no sési úpka (Is. 1:18). w21.04 23 párr. 11

Nájkirukaksï uánikua judiuecha no erokuarhienga eska Mesíasi uarhipiringa, ju je exeni ambe enga karakata japkia: “Íntspispti imeeri tsípikuani uarhikuarhu jamberi ka ísï exenhaspti eska no sési úri ma; kénditaaspti uánikua kʼuiripuecheri pekaduechani ka kuájpiaspti kʼamanharhintstichani” (Is. 53:12). Ísï jimbo, enga Jesúsi ísï uarhipka komueska kʼamanharhintsti ma, inde ambe no jatsispti para ójkutaani judiuechani. Ini jurhiatikuecha jimbo, ambe ma engajtsïni jarhuataaka parajtsïni no ma ambe ójkutani, jindeesti kurhanguarhini ambe enga meru úkuarhijka. Enga Jesúsi juátarhu arhijtsïkpipka, uandaspti eskaksï máru kʼuiripuecha “mámaru jásï chkuanderakua ambe” uandapiringa imeeri chúxapatiicheri ambe (Mat. 5:11). Iámindu i chkuanderakua ambe Noambakitiriisti. Ima úsïndi eskaksï juchaari ikiatspitiicha mámaru jásï chkuanderakua ambe uandaaka juchaari ambe engachi jukaparharajka jurhimbikuani (Jaŋ. 12:9, 10). Asï jakajkua je indeni chkuanderakuechani ka asï jurajku je eskaksïni chéraaka ka eskajtsï nóteru mintsikaakia Tata Diosïni. w21.05 12 párr. 14, 16

Jarhuata je imani engajtsï Biblieri ambe jorhendani jaka paraka mintsikaaka Tata Diosï Jeobani. Jesúsi arhiaspti imeeri chúxapatiichani eska Tata Diosï Jeoba xénchaasïreenga ka eska jimbosï jarhuataapiringa (Mat. 10:19, 20, 29, 30). Ju je miátantani jorhenguarhirini eska ístu Tata Diosï Jeoba imani jingoni jauaka. Uaakachi jarhuatani paraka mintsikaaka Tata Diosï Jeobani engachi kómarhiska imani jingoni ambe enga uéjka úni jorhenguarhiri. Franciszek enga Polonia irekaka, uandasïndi: “Enga juchiiti jorhentpiri kómarhikuechani uaauenga, uánikua xanhari uandasïreendi ambe engani ji uékeenga úni. Engani exepka eska Tata Diosï Jeoba mókukuntasïreenga, jíjtuni jirejiresï ueenaspka kómarhini. Ka exespka na engareni Tata Diosï Jeoba jarhuatapka jiáni engani permisu kurhajkuarhipka jimbanhi ánchikuarhitarhu parani nirani tánguarhikuecharhu ka k’éri tánguarhikuarhu”. Joperu engachi iásï no nemani jorhendani jakaia Biblieri ambe, uaakachi jarhuataani jorhenguarhirichani parakaksï niáraaka itsï atakuarhini engachi pámbetaaska máteruechani Biblieri ambe jorhentpini. Ísïisti, Tata Diosï Jeoba kánikua uandanhiasïndi imani kʼuiripuechani jimbo engaksï jorhenguarhini jaka Biblieri ambe. Ístu, jukaparharasïndi engachi jarhuataajka jorhenguarhirichani andarhierani imani ka kánikuajtsïni xénchasïndi indeni ambe jimbo (Is. 52:7). w21.06 7 párr. 17, 18

Uaakachi xarhatani eskachi jukaparharasïnga Tata Diosïiri Karakatani engachi pauani pauani arhintaska. Nóchi uaaka jiántku arhintani engachi uaaka o engachi eratseaka eskachi tiempu jatsiska. Engachi orariu ma jatsiska para jorhenguarhini Biblieri ambe, uaakachi seguiriini jakajkuni Tata Diosïni. Juchaari jakajkukua no ísïisti eska i parhakpini anapu jorhenaticheeri ka engaksï mítekuka, jimboka juchaari jakajkukua Bibliarhu jupindaskata jarhaska (Mat. 11:25, 26). Bibliajtsïni mítetarasti andisï i parhakpini xáni no sési jánhaskuarhipani jaki ka ambe enga uaaka Tata Diosï Jeoba paraka sési peentaaka iámindu ambe. Ísï jimbo, ju je eratsetini jarhani eskachi seguiriuaka sánderu jakajkuni Tata Diosïni ka jarhuataani xáni uánikua kʼuiripuechani eskachi xáni uaaka parakaksï imeechajtu niáraaka mintsikani juchaari Kueraajpirini (1 Tim. 2:3, 4). Ka ju je seguiriini tsípikua jingoni erokani imani jurhiatikuani enga iámindu imeecha engaksï Echerirhu irekaaka, k’éri ambe arhiaaka Tata Diosï Jeobani arini uandakuecha jingoni engaksï Jaŋaskuecha 4:11 jimbo jaka: “Juchaari Tata [Diosï Jeoba], jukanchaskari [...] arhinhani eskari kʼéri ambeeska [...], jimboka tʼu kueraaska iámindu ambe”. w21.08 19 párr. 18-20

Orhejtsïkutiichaksï jatsisti para konseju íntskuani imeechani engaksï uétarhinchajka. Jatsistiksï para jánguarhintani íntspiani ambakiti konsejuechani engaksï uinhaperpintaaka ka engaksï sési pʼikuastantajka mintsitani (Prov. 27:9). Orhejtsïkutiichaksï kánikua xénchaasïndi erachiichani, jimboksïsï ménichani jatsijti para konseju íntskuni nemani enga no káni sési jámani jarhajka (Gal. 6:1). Enga orhejtsïkuti ma konseju íntskuaka máteru nemani, jatsipirindi para eratsentani máru ambe enga apostoli Pablu uandapka xénchperakueri ambe: “Ima enga uékpijka, tekaantasïndi ka sési útspini. [...] Iámindu ambe tekaantasïndi, iámindu ambakiti ambe jakajkusïndi, méntkisï ambakiti ambejku erokasïndi, ka iámindu ambe jimbo uinhapikuarhisïndi para úni tekaantani” (1 Kor. 13:4, 7). Enga orhejtsïkuti eratseantauaka ini bersikuluechani, jarhuataati para exeni sini uékperakua jimboeski enga íntspiaka konsejuni. Sánderu fásiliisti eska nema jiókuarhiaka konsejuni ma enga exeska eska ima enga íntskujka konsejuni, uandanhiasïnga imani jimbo. w22.02 14 párr. 3; 15 párr. 5

Tata Diosï Jeoba perfektu uaasti ánjeliichani ka kʼuiripuechani. Peru ánjeli ma enga nóteru uékaakia kurhajchani enga arhinhajka Satanási (enga arhikuekajka “tájpanharhikpeti”) úspti eska Adáni ka Eba, engaksï ístu perfektuepka, nóteru kurhajchapiringia Tata Diosï Jeobani. Ístu, máteru ánjeliicha ka máteru kʼuiripuechajtuksï nóteru kurhajchasptia (Jud. 6). Jimbosï Tata Diosï Jeoba, no sési pʼikuarherapti indeni ambe jimbo. Joperu ima seguirixati tekaantani, astaka niáraaka ima jurhiatikua enga ima kʼamajkuauaka iámindu no kurhandiichani. Kánikuaksï sési pʼikuarheraati Tata Diosï Jeobaeri ambakiti marhuariicha engaksï imani jingoni seguiriini jaka tekaantani xáni no sési jásï ambe enga parhakpinirhu úkuarhini jaka. Satanási uandaspti eska Jobu, ka ístu máteru ambakiti Tata Diosïiri marhuariicha interesi jimbojkuksïsï marhuakujka Tata Diosïni (Job 1:8-11; 2:3-5). Ka asta iásï jamberi, Noambakiti ísï uandasïndi (Jaŋ. 12:10). Engachi tekaantaska jiáni engachi uandanhiatechani jatsiauaka ka engachi uékperakua jingoni no méni jurajkuska Tata Diosï Jeobani, uaakachi xarhatani eska Noambakiti chkuandera máeska. w21.07 9 párr. 7, 8

Apostoli Pablu ejemplu ma úraspti parajtsïni jarhuatani kurhanguni eskachi jatsiska para mójtakukuarhini. Uandaspti eskachi jatsiska para cháparhatani chkarirhu imani ambe engachi ueenga (Rom. 6:6). Jesúsi jurajkuspti eskaksï cháparhatapiringa chkarirhu jimboka uékasïreenga jaiapanherantani Tata Diosï Jeobani. Májkueni, engachi juchajtu uéjka jaiapanherantani Tata Diosïni, jatsiskachi para mójtakukuarhini ka nóteru únia ambe enga ima kurhunhijka. Engachi uaaka ini ambe, ambakiti konsiensiachi ma jatsiaka ka uaakachi irekani para méntkisï (Juanu 17:3; 1 Ped. 3:21). Tata Diosï Jeoba no mójtakuauati imeeri juramukuechani nomasi parajtsïni komforme jatsini. Sánderu sési, juchachisï jatsika para mójtakukuarhini ka ísï úni eskaksï imeeri juramukuecha na uandajka (Is. 1:17, 18; 55:9). Nájkirukajtsï itsï atakuarhikia, jatsiskajtsï para jánguarhintani no tsitini imani ambe enga no sési jaka. Asï mintsinharhikuarhi je, jurajku je eskaksïni Tata Diosï jarhuataaka imeeri espiritu santu jingoni (Gal. 5:22; Filip. 4:6). Parajtsï nóteru ísï jámania eska ióntki, jatsiskajtsï para kánikua jánguarhintani. w22.03 6 párr. 15-17

Tata Diosï Jeobajtsïni aiachisïndi eska engachi orheta peeraska imeeri Juramukuani ka engachi kurhajchaska imeeri ambakiti juramukuechani, imajtsïni íntskuati tʼirekua, xukuparhakua ka kʼumanchikua (Mat. 6:33). Ísï jimbo, ju je no eratseni eska i parhakpini anapu jatsikuarhekua ambe uaakajtsïni kuájchakuni ka eskajtsïni uaaka jarhuatani parachi sési pʼikuarherani. Míteskachi eska ambe enga uaaka eskachi meru sési pʼikuarheraaka, jindeeska úni ambe enga Tata Diosï uékajka (Filip. 4:6, 7). Asta engachi uaaka uánikua ambe piáni, jatsiskachi para eratseni sinchi jatsiski tiempu ka uinhapikua parachi úraani ka kuidariuani. Ju je kurhamarhikuarhini: “¿Jukarini tsitisïni indeni ambe engani jatsikuarheka?”. Miá je eska Tata Diosï Jeoba uékasïnga eskachi ánchikuarhiriuaka imeeri familiarhu. Ísï jimbo, ju je no jurajkuni eska jauaka ambe ma engajtsïni támisï páaka. Méntkuchi no uékasïnga ísïini eska ima kʼuiripu enga Jesúsiiri jurhiatikuecha jimbo irekapka enga no uékapka Tata Diosï Jeobani marhuakuni ka ni imeeri uájpa máeni para sánderu orhepani. ¿Ka andisï ísï úpi? Jimboka sánderu tsitisïreenga imani sánititu ambe enga jatsikuarhepka (Mar. 10:17-22). w21.08 6 párr. 17

Engachi jorhenguarhini jauaka Bibliani, exeakachi na enga járhati kualidadichani jatsiajka Tata Diosï Jeoba ka enga xarhataajka imeeri kueraakatarhu. Engachi niáraska jorhenguarhiani imeeri kualidadichani, jarhuataatijtsïni parachi jucha seguru jarhani eska Tata Diosï Jeoba meru jarhaska (Éx. 34:6, 7; Sal. 145:8, 9). Engachi sánderu sési míteaka Tata Diosï Jeobani, sánderuchi mintsikaaka, xénchani ka sánderuchi sési pájperaaka imani jingoni. Ju je uandontskuarhekuani máteruechani eskachi jakajkusïnga Tata Diosïni. I ambe uaati eskachi sánderu jakajkuaka Tata Diosïni. ¿Ka engajtsïni nema kurhamarhiska sini meru jarhaski Tata Diosï ka jucha no míteni ambe mókukuntani? Ju je jirinhantani juchaari publikasionicharhu mókuntskuani enga Bibliarhu pʼitakata jauaka ka tátsekua exerani kʼuiripuni ambe engachi exentaaka. Ístuchi uaaka arhini erachini ma enga sánderu mítekia eskajtsïni jarhuataaka. Iá sea enga kʼuiripu jiókuarhiaka ambe enga Biblia uandajka o nómbe, kánikuajtsïni marhuacheati engachi jucha jirinhantaska sánderu informasioni, jimbokachi niáraaka sánderu jakajkuni Tata Diosïni. w21.08 18 párr. 14, 15

Parachi marhuakuni Tata Diosï Jeobani no uétarhisïndi jurajkuni iámindu imani ambe engajtsïni sési pʼikuastajka (Ecl. 5:19, 20). Joperu engachi no jánguarhintani japiringa sánderu marhuakuni Tata Diosïni, solu jimbokachi no uékapiringa jurajkuni imani ambe engachi tsitijka. Úpiringachi ísï no sési úni jarhani eska ima kʼuiripu enga Jesúsi uandapka eska sési irekaxapka joperu eska mirikurhispka Tata Diosïni (Luk. 12:16-21). Engachi uandanhiateechani jatsiajka, kómarhisïngachi Tata Diosï Jeobani ka eratsesïngachi néna orhepani uérani (Prov. 3:21). Tata Diosï Jeobajtsïni mámaru újchakurasïndi. Uaakachi xarhatakuni eskachi agradesidu jarhaska engachi jánguarhintaska na engachi xáni uaaka parachi kʼéri ambe arhini (Ebr. 13:15). Komu jirinhakuntani nénachi uaa sánderu aianhpini. Engachi ísï úska Tata Diosï Jeobajtsïni sánderu újchakuraati. Ísï jimbo, ju je exeni pauani pauani néna engachi uaaka tsʼéjkuni ka exeni eska Tata Diosï Jeoba sési kámpisïnga (Sal. 34:8). Ísï, ísïiuakachi eska Jesúsi enga uandapka: “Juchiiti tʼirekua jindeesti eskani uaaka ambe enga jaiapanhentajka ima engareni axaka, ka eskani kʼamakuaka úni imeeri úkuani” (Juanu 4:34). w21.08 30, 31 párr. 16-19

Satanási uékasïndi eskachi kʼéramakuarhiaka, jimboka míteska eska engachi sánderu ísï jámaaka ísïiuakachi eska ima ka nóchi uaaka irekani para méntkisï. Jimbosï Pablu uandapti eska enga nema niáraska kʼéramakuarhini májkueni ‘jusgarinhaati eska Noambakiti’ (1 Tim. 3:6, 7). Ka iáminduechachi uaaka niárani ísï jámani, no arhiparini na engachi xáni ióni páani jauakia marhuakuni Tata Diosï Jeobani. Kʼuiripu ma enga kʼéramakuarhijka imajku pendienti pákuarhisïndi. Satanási jánguarhintasïndi parachi juchajku pendienti pákuarhini ka no Tata Diosï Jeobani, sánderia jiáni engachi uandanhiateechani jatsiajka. Pori ejemplu, ¿ménisïchi kulparinhaski ambe ma jimbo engachi jucha no úka? ¿Nóchi jurhimbikua jingoni kánhaski? Satanási kánikua tsípipirindi engachi Tata Diosï Jeobani jingoni ikiapiringa o juchaari erachiicha jingoni. Ístu uékasïndi eskachi eratseaka eska sánderu sési jauaka ísï sési peentani uandanhiateechani na engachi jucha sánderu sési exeaka ka no ísï eskajtsïni Tata Diosï Jeoba na arhijka imeeri Karakatarhu (Ecl. 7:16, 20). w21.06 15 párr. 4, 5

Tata Diosï Jeoba kʼéri ánchikuarhita ma íntskuspti profeta Ageoni. Jamberi Ageo kʼuanhatsentapti imani kʼuiripuecha jingoni engaksï Babilonia uératini nintapka Jerusaléni uéxurhini 537 ante de Jesúsi. Ísï tátsekua engaksï na niántapkia Jerusaléni, ima ambakiti Tata Diosïiri marhuariichaksï no ióndaspti jatsiantani templurhu anapu pítsekuechani (Esd. 3:8, 10). Joperuksï ueenaspti no sési kánhani, chkétakuarhisptiksï ka jurajkusptiksï ánchikuarhitani (Esd. 4:4; Ageo 1:1, 2). Ísï jimbo, uéxurhini 520 jimbo, Tata Diosï Jeoba arhisti Ageoni eska uinhaperaantapiringa ka eskaksï tsípikua jingoni kʼamarapiringa templuni (Esd. 6:14, 15). Ima ambe enga Ageo arhiapiringa judiuechani, jindeespti parakaksï sánderu mintsikapiringa Tata Diosï Jeobani. Uandakuecha “Tata Diosï Jeoba enga orhekupaajka ejersituechani” kánikua uinhaperaantapti. Engaksï imeecha uékapiringa kʼamarani templuni, jatsisptiksï para mintsikani Tata Diosï Jeobani enga kʼéri ejersituni ma jatsika ánjeliicheeri. w21.09 14, 15 párr. 4, 5

Ini jurhiatikuechani jimbo, Jeobaeri testiguechachi xénchperasïnga ka márkuchi jarhaska juchaari erachiicha jingoni interu parhakpinirhu. Nóchi ísïisïnga eska máteru relijionicha, juchachi meruchi xénchperasïnga no arhiparini nanichi anapueski, náki pʼindekuechanchi jatsiaski o na jásïchi koloriski. Ka exesïngachi eska i ambe ísïiska jimboka xarharasïnga tánguarhikuecharhu ka kʼéri tánguarhikuecharhu. I ambe úsïndi eskachi jucha sánderu seguru jauaka eskachi juchajkusï jindeeka engachi kómarhijka Tata Diosï Jeobani ísï eska ima na uéjka (Juanu 13:34). Biblia uandasïndi: “Joperu enga sánderu uétarhijka jindeesti eskaksï kánikua uékperaaka” (1 Ped. 4:8). Ma ambe engachi jimbo xarhatajka uékperakua, jindeesti engachi tekaatsperantajka ka engachi jánguarhintajka sési pájperani iáminduecha jingoni nájkirukachi pekadoriika. Ístuchi jánguarhintasïnga íntskuani ambe ma erachiichani ka pʼímarhiani juchaari kʼumanchikuarhu asta imeechani engajtsïni ménisï niáraka no sési pʼikuastani (Kol. 3:12-14). Joperu ísï xénchaani erachiichani, jindeesti enga xarhatajka eskachi jucha jindeeska kristianu jurhimbitiicha. w21.10 22, 23 párr. 13, 14

Enga nema pekadu ma újka ka no móantani ka enga petanhantajka kúnguarhikuarhu, ¿jarhuatasïni i ambe? Jo. Uánikua engaksï k’éri pekadu ma úpka ka petanhantanksï, kuenta íntskukuarhesptiksï eska i ambe engaksï orhejtsïkutiicha úka jarhuataska imeechani parakaksï sési eratsentapiringa, móantani ka paraksï kʼuanhatsentani Tata Diosï Jeoba jingoni (Ebr. 12:5, 6). Ju je eratsentani ini ejempluni. Eratsenta je eska karichi eranguti ma kuenta íntskukuarhesïnga eska karichi ma pʼamenchaxaka. Ima mítesti eska para úni karichi sési pʼikuarherantani jatsiska para támu peerani. Joperuksï karichicha tsitisïndi márku jámani ka kánikuaksï uerasïndi engaksï jandiajku jarhajka. Jimajkani enga karichi eranguti támu peerajka karichini para i úni sési pʼikuarherantani, ¿arhikuekasïni eska no pʼamojkuxaka? Nómbe. Ima mítesti eska enga jurajkuska eska i karichi máteruecha jingoni jauaka, i karichi uaati kéritaani pʼamenchakua. Ísï jimbo, enga támu peerajka karichini, kuájchakuani jarhasïndi máteru karichichani. w21.10 10 párr. 9, 10

Kʼéri kóntperata máesti jarhani ini familia jingoni enga interu parhakpinirhu jaka ka engachi xénchperajka. Ka uékasïngachi úni eskachi sánderu uánikua kʼuiripuecha juuaka paraksï májku kómarhini Tata Diosï Jeobani juchantsïni jingoni. Ísï jimbo, nóchi uékasïnga no sési pakatani juchaari Taati auandarhu anapueri nombrini o imeeri ireteeri. Méntkisïchi uékasïnga sési jámani parakaksï kʼuiripuecha tsitiaka kurhaani ambakiti aianhperakua Tata Diosïiri Reinueri. Ménisï, márujtsïni no sési kámaati ojtsïni no xénchani jimbokachi jucha kurhajchasïnga juchaari Taati auandarhu anapuni. Peru, ¿ambechi uaa engachi ma repentku chéska uandontskuarhekuani máteruechani ambe engachi jakajkujka? Ju je miáni eska Tata Diosï Jeoba ka imeeri Uájpajtsïni jarhuataaka. Jesúsi arhiaspti imeeri chúxapatiichani eskaksï no jámapiringa uandanhiani ambe engaksï uandapiringa o na engaksï uandapiringa. Ima mismu uandaspti: “Imani mismu ora jimbo intsïnhaakajtsï uandakua engajtsï jatsiaka para uandani, jimboka no chámindusï uandaaka, sino chaari Taatiiri espiritusï uandaati chánksïni jimbo” (Mat. 10:19, 20). w21.09 24 párr. 17, 18

Moisési sáno májkueni ambe uandaspti (Sal. 90:1, nota). Sánisï ante de uarhini, uandaspti ambe ma engajtsïni mintsitarhu niárachejka. Karaspti: “Tata Diosï jindeesti kuájchakukua ma desde iónisï; imeeri jájkiicha engaksï méntkisï jauaka, chiiti kétsekua jimboksï jarhasti” (Deut. 33:27). ¿Ambejtsïni jorhendasïni Tata Diosï Jeobaeri ambe uandakuecha “imeeri jájkiicha engaksï méntkisï jauaka, chiiti kétsekua jimboksï jarhasti”? Engachi kuájchakukuarhiska Tata Diosï Jeobani jingoni, seguruchi pʼikuarheraaka. Joperu útasï ísï, jauati jurhiatikuecha engachi útasï kómu pʼikuarherani jauaka ka chkétakuarhitini. Engachi ísï pʼikuarherani jauaka, ¿ambe uaa Tata Diosï Jeoba juchantsïni jimbo? (Sal. 136:23). Imeeri jájkiichani juchaari kétsekua jimbo jatsiauati ka uékperakua jingontsïni jarhuataati parachi nóteru kómu pʼikuarherani (Sal. 28:9; 94:18). Míteni eska Tata Diosï méntkisï juchantsïni jingoni jauaka, jarhuataatijtsïni miántani tsimani kóntperatechani engachi jatsiaka. Orheta, eska no arhiparini nani engachi jauaka, eskajtsïni Tata Diosï Jeoba méntkisï kuájchakuaka. Ka máteru, eska juchaari Taati auandarhu anapu, kánikua uandanhiasïnga juchantsïni jimbo. w21.11 6 párr. 15, 16

Jesúsi mítespti eska engaksï imeeri chúxapatiicha no sési kánhapiringa, úpiringa úni eskaksï nóteru xáni mintsinharhipiringia Tata Diosïni. Para jarhuataani, Jesúsi aianguaspti uarhiiti tsïndiiri ma enga méntku úndani japka kurhakuni juesiini ma enga no jurhimbitku jámeenga, eska jarhuatapiringa. Ima tsïndi seguru jarhaspti eska enga no kuatantapiringa, juesi jarhuatapiringa. Ka ísï úkuarhispti. ¿Ambechi jorhenguarhisïni? Tata Diosï Jeoba jurhimbitku úsïndi iámindu ambe. Jimbosï, Jesúsi uandaspti: “¿Jimajkani [Tata] Diosï no jarhuataa iámindu imeeri erakukateechani engaksï chúrikua ka jurhiakua uandajpani jauaka?” (Luk. 18:1-8). Ístu tátsekua uandaspti: “Enga Uájpa acheetiiri junguaka, ¿chájtsï tantiarisïni eska ini parhakpinirhu exeantauaka imeechani engaksï mintsikani jauaka imani?”. Uaakachi xarhatani eskachi májkueni mintsinharhisïnga Tata Diosïni eska uarhiiti tsïndi, engachi tekaantskua xarhataska ka engachi no kuatantaska. Inde mintsinharhikuajtsïni jarhuataati parachi seguru jarhani eskajtsïni Tata Diosï Jeoba jarhuataaka. Ístuchi jatsiska para jakajkuni eska kómarhikua kánikua uinhapikua jatsiska. w21.11 23 párr. 12; 24 párr. 14

Tumbi, ¿exesïniri eskaksïni Tata Diosï Jeobaeri juramukuecha no jurajkusïnga iámindu ambe úni engari uékapiringa? Indeni ambesï uékajti Satanási eskari eratseaka. Jánguarhintasïndi parakari exeaka eska imeecha engaksï imani xanharu jimbo nirani jaka enga kórhuraka, kánikuaksï tsípikuarhisïnga. Uékasïndi eskari eratseaka eskari no xáni tsípikuarhixaka eska chiiti kompanieruecha eskuelarhu anapu ka eska imeecha engari internetirhu exeajka ka eskaksïni Tata Diosï Jeobaeri juramukuecha no jurajkusïnga eskari sési nitamakuarhiaka. Peru miá eska Satanási no uékasïnga eskari exeaka na engaksï kʼamarhukuaka imeecha (Mat. 7:13, 14). Joperu Tata Diosï Jeobakini exerasïndi náki kóntperatechandi jatsiaua engari seguiriska indeni xanharu jimbo nirani enga tsípikuarhu pájpejka (Sal. 37:29; Is. 35:5, 6; 65:21-23). w21.12 23 párr. 6, 7

Míteskachi eskachi jatsiska para tekaatsperantani, jimboka i ambesï jurhimbikueka. Peru ménisï útasï ísï úkua jukaati ísï úni. Ménisï apostoli Pedrujtu niáraspti ísï úkuarhinchani (Mat. 18:21, 22). ¿Ambejtsïni uaa jarhuatani? Orheta, eratsentani na engajtsïni xáni uánikua xanhari Tata Diosï Jeobajtsïni tekaachentakia juchantsïni (Mat. 18:32, 33). Nóchi jukanchaska eskajtsïni tekaachentaaka, perujtsïni ima méntkisï tekaachintasïndi (Sal. 103:8-10). Ístu, “uétarhisïndi eskachi juchajtu ísï uékperaaka máteru ka máteruni jingoni”. Ísï jimbo, tekaatsperantani no jindeesti ambe ma engachi uaaka erakuni sini ísï úni o nómbe; jatsiskachi para ísï úni juchaari erachiicha jingoni (1 Juanu 4:11). Máteru ambe engajtsïni jarhuataaka jindeesti eratsentani ambe úkuarhisïni engachi tekaatsperantajka. Jarhuatasïngachi imani kʼuiripuni engajtsïni no sési kámaaka, jarhuajpesïngachi parachi márku jarhani kúnguarhikuarhu, kuájchakusïngachi juchaari pájperakua Jeoba jingoni ka sésichi pʼikuarherantasïnga (2 Kor. 2:7; Kol. 3:14). Máteru ambe engajtsïni jarhuataaka, jindeesti kómarhini Tata Diosï Jeobani, jimboka Tata Diosï Jeobasï uéjka eskachi jucha sési pájperantaaka. Ju je no jurajkuni eska Noambakiti uaaka eskachi jucha no uaaka sési pájperani juchaari erachiicha jingoni (Efes. 4:26, 27). Uétarhinchasïngachi Tata Diosï Jeobaeri jarhuajperatani parachi no jámani imani ambe úni enga Noambakiti uéjka. w21.06 22 párr. 11; 23 párr. 14

Dabidi sïpakuarhixapti jimboka Saúli rei Israeli anapu, uékaxapka uándikuni. Ima no ma ambe jatsispti para tʼireni, jimbosï anhaxurhipti imani ireta jimbo enga Nobi arhinheenga ka jima kurhajkuarhispti eskaksï íntskupiringa iúmu kurhindechani (1 Sam. 21:1, 3). Ka tátsekua ima ka imeecha engaksï imani jingoni jámeenga kuebarhuksï ma kuájchakukuarhispti (1 Sam. 22:1). ¿Andisï Dabidi ísï nitamakuarhini japi? Enga Saúli exepka eska Dabidi kánikua mítenhaxapka ka eska uánikua guerrechani andaaspka, kánikua enbidia pʼikuarherasïreendi imani jimbo. Ístu Saúli mítespti eska Tata Diosï Jeoba, Dabidini erakuspka paraka ima Israeliiri reipiringa (1 Sam. 23:16, 17). Peru Saúli seguirixapti Israeliiri juramutini ka k’éri ejersitu ma jatsispti ka uánikuechaksï apoiarisïreendi, ísï jimbosï Dabidi jatsipti para sïpakuarhini paraka Saúli no uándikupiringa. ¿Meru eratsesïreeni Saúli eska úpiringa mójtakuni ambe enga Tata Diosï Jeoba uandapka Dabidiiri ambe? (Is. 55:11). Biblia no uandasïndi, joperuchi uaaka seguru jarhani eska kánikua no sési úxapka. Jimboka imeecha engaksï Tata Diosï jingoni uarhipejka méntkisïksï tsïtasïndi. w22.01 2 párr. 1, 2

Jesúsi kánikua jánguarhintaspti aianhpini. Jesúsi jánguarhisïreendi iápurisï aianhpini jimboka xénchaasïreenga kʼuiripuechani (Luk. 19:47, 48). Ístu, pʼamojkuaspti kʼuiripuechani. Ménichani, uánikuechaksï uékasïreendi kurhaani Jesúsiiri uandakuani ka nóksï jurajkusïreendi eska Jesúsi ka imeeri chúxapatiicha úpiringa tʼireni (Mar. 3:20). Ka enga achamasï ma nípka exeni chúrikua, Jesúsi uékaspti uandontskuarheni imani jingoni. Ísïisti eskaksï uánikua kʼuiripuecha engaksï kurhajchapka Jesúsini, nóksï niáraspti imeeri chúxapati úkuarhini, joperuksï iáminduecha niáraspti míteni ambe enga ima aianhpienga. Ini jurhiatikuecha jimbo juchajtuchi uékasïnga eskaksï iámindu kʼuiripuecha uaaka kurhaani ambakiti aianhperakuani (Uku. 10:42). Parachi ísï úni, jamberichi jatsiaka para mójtakuni na engachi aianhpijka. Enbesi de ima jandora aianhpini engachi jucha uaaka, ju je aianhpini jiáni engaksï kʼuiripuecha imeecho jauaka. Engachi ísï úska, uaakachi seguru jarhani eska Tata Diosï Jeoba sési pʼikuarheraaka. w22.01 17 párr. 13, 14

Iásï uánikuechaksï úkua jukanchasïndi mintsikaani imeechani engaksï juramukua jatsika, jimbokaksï exesïnga eska juramukuecha ka gobiernuecha, sánderuksï jarhuataasïnga rikuechani ka pobrichani nómbe. Ístu, máru relijionirhu orhejtsïkutiicha nóksï sési ambe úsïndi ka indeni ambe jimbo, uánikua kʼuiripuechaksï nóteru mintsikasïndia Tata Diosïni. Ísï jimbo, jatsiskachi para jarhuataani imeechani engachi jorhendaajka Biblieri ambe paraksï mintsikani Tata Diosïni ka imeechani enga ima erakuaka parajtsïni orhejtsïkuni ixú Echerirhu. Joperu no solu jorhenguarhirichaksï jatsisti para mintsikani Tata Diosï Jeobani ka imeeri kúnguarhikuani. Engachi ióni páni jakaia Tata Diosïiri kúnguarhikuarhu, jatsiskachi para seguiriini mintsikani eska na enga Tata Diosï Jeoba újka ambe ma, méntkisï sési jarhasïnga. w22.02 2 párr. 1, 2