Maiu

Jeobajtsïni kánikua xénchasïndi, ísï jimbosï Karakata jurajkuati tʼámu Ebanjeliuechani parachi jucha sánderu míteni imeeri Uájpani. Íksï Ebanjeliuecha uandantasïndi tata Jesukristueri irekueri ka imeeri aianhpikueri ambe. Ístu ambe enga úka, ambe enga uandaka ka na enga pʼikuarhereenga. I tʼámu libruechajtsïni jarhuatasïndi eratsentani Jesúsiiri ejempluni. Ícha jimbochi exesïnga na enga jámeenga Jesúsi. Engachi jucha niáraska jorhenguarhiani ini Ebanjeliuechani, uaakachi sánderu sési míteni Jesúsini ka uaakachi ísï jámani eska ima na jámapka. Parakajtsïni marhuacheaka ambe engachi arhintajka Ebanjeliuecharhu no solu uétarhisïndi arhiantani, sino ístu arhutani tiempu parachi sési jorhenguarhini ka eratsentani ambe engachi arhintajka (terukutanta je Josué 1:8 jingoni). Ju je eranhaskani ambe engachi arhintani jaka Ebanjeliuecharhu. Ju je juchaari eratsekuani úrani parachi exeni, kurhaani ka pʼikuarherani ambe enga úkuarhini japka imani tiempuni jimbo. Ístu, ju je jirinhantani informasioni publikasionicharhu engajtsïni Jeobaeri kúnguarhikua íntsaajka. w21.04 4, 5 párr. 11-13

Uánikua uéxurhini ante de Jesúsi Echerirhu jurhani, Jeoba tʼuini uandasptia imeeri Karakatarhu eskaksï Mesíasini traisionariipiringa 30 moneda plateri jimbo (Zac. 11:12, 13). Ka imeeri amigu máepirindi enga traisionariipiringa (Sal. 41:9). Sakaríasi, ístu karaspti: “Ata karichi erangutini, ka eskaksï karichicha etsandurhinhaaka” (Zac. 13:7). Ima kʼuiripuecha engaksï ambakiti mintsita ma jatapka, jiókuarhipirindiksï Jesúsini jimboka ísï úkuarhixapka ambe enga uandakata japkia Jesúsiiri ambe ka i ambe jarhuataapirindi paraksï sánderu mintsikani Tata Diosïni. ¿Májkueni úkuarhisïni iásï? Jo. Namunitu Jeobaeri testiguecha engaksï kánikua mítekateeka, jurajkustiksï jurhimbikuani, apostataksï úkuarhisti ka jánguarhintastiksï para máteruecha májkueni úni. Ka Interneti jimbo ka notisiecharhisï nóksï sési ambe uandantasïndi juchaari ambe, nóksï iámu ambe jurhimbitku uandantasïndi ka chkuanderakua ambejtsïni jauatachesïndi. Joperu ima kʼuiripuecha engaksï ambakiti mintsita ma jataka, nóksï jakajkusïndi ini ambe. Sánderu sési, mítestiksï eska Biblia uandaspkia eska i ambe úkuarhipiringa (Mat. 24:24; 2 Ped. 2:18-22). w21.05 11 párr. 12; 12, 13 párr. 18, 19

Biblia mismu uandasïndi eska Tata Diosï Jeobaeri ireta sánhani arhipiringa kurhanguni jurhimbikuani eska na nitamapiringa tiempu (Kol. 1:9, 10). Tata Diosï Jeoba sánhani arhixati mítetarpini jurhimbikuani ka jucha jatsiaka para erokuarhini eskachi sánhani arhiaka kurhanguni ambe enga jindeeka jurhimbikua. Engaksï erachiicha engaksï orhejtsïkujka juchaari kúnguarhikuani kuenta íntskukuarhejka eskachi jatsiska para ménderueni kurhanguni ambe ma, ochi mójtakuni ambe ma, sóntkuksï mójtakusïndi ambe enga uétarhiaka. Uánikua relijionicha engaksï kristianu arhikuarhijka, mójtakusïndiksï máru ambe para sési pʼikuastaani imeechani engaksï imeecha jingoni tánguarhijka o paraksï sési pakarani máteruecha jingoni. Joperu engachi Jeobaeri testiguecha mójtakujka ambe ma, jindeesïndi parachi sánderu andarhierani Tata Diosïni ka parachi ísï kómarhini eska Jesúsi na jorhentpika (Sant. 4:4). Engachi mójtakujka ambe ma, no jindeesïndi parachi ísï úni eskaksï kʼuiripuecha na eratsejka o parachi imani ambe úni eska na úkuarhini jaka iásï, sánderu sési, mójtakusïngachi ambe ma jimbokachi sánderu sési kurhangusïngia Bibliani. Kánikuachi jukaparharasïnga jurhimbikuani (1 Tes. 2:3, 4). w21.10 22 párr. 12

¿Ambejtsï uaa úni engajtsï niáraska jandiajku pʼikuarherani? Eratsentani na engajtsïni jarhuatani jaka Tata Diosï Jeoba (Sal. 55:22). I ambejtsïni jarhuataati parachi exeni eskachi no jandiajku jarhaska. Ístuchi uaaka eratsentani na enga Tata Diosï Jeoba jarhuataani jaka máteru erachiichani engaksï jandiajku pʼikuarherajka (1 Ped. 5:9, 10). Hiroshi, erachi ma enga iónisï imajku Jeobaeri testigueka imeeri familiarhu, uandasïndi: “Míteni eskaksï iáminduecha jánguarhintaxaka para sési marhuakuni Tata Diosï Jeobani, uinhaperantasïndijtsïni juchantsïni engachi no jatsika juchaari familiani jurhimbikuarhu”. Ju je pʼindeni kómarhini, arhintani Bibliani ka tánguarhini. Kánikua jukaparhakuesti eskachi uénhekuarhiaka ka eskachi aianguaka Tata Diosï Jeobani na engachi pʼikuarherajka. Ístu kánikua jukaparhakuesti pauani pauani arhintani Tata Diosïiri Karakatani ka eratseantani ejempluechani engajtsïni xarhatachejka na engajtsïni xáni xénchajka Tata Diosï Jeoba. Máru erachiichaksï memoria jimbo jorhenguarhiasïndi karakateechani engaksï uinhaperpintajka, komueska Salmo 27:10 ka Isaías 41:10. Máteruechaksï úraasïndi grabasionichani engaksï prepararikuarhini jauaka para tánguarhikuecha o Biblieri arhintskuani kurhaani. Exestiksï eska i ambe jarhuataasïnga paraksï no xáni jandiajku pʼikuarherani. w21.06 9, 10 párr. 5-8

¿Uarhiranchaskijtsï nemani? Parajtsï sánderu mintsikani eska jauaka tsíntskua, arhuta je tiempu parajtsï arhintani Bibliarhu ima kʼuiripuecheri engaksï tsítanhantapka. ¿Kómu pʼikuarheraxakijtsï jimboka chaari familiari ma petanhantaska kúnguarhikuarhu? Estudiari je parakajtsï seguru jarhani eska méntkisï sánderu sésiska na enga jurhimberpintajka Tata Diosï Jeoba. Náki uéjki uandanhiata engajtsï jatsika, ísï exe je komueska ambe ma engaksïni jarhuataaka parajtsï sánderu mintsinharhini Tata Diosïni. Aiangu je Tata Diosï Jeobani na engajtsï pʼikuarherajka. Asï jarharia je erachiichani (Prov. 18:1). Ú je imani ambe engaksïni jarhuataaka parajtsï tekaantani, nájkiruka jindeuaka ueparini (Sal. 126:5, 6). Asï kuerata je tánguarhikuecharhu, aianhpi je ka arhinta je Bibliani. Ka seguirii je eratseantani kóntperatechani enga Tata Diosï Jeoba aiatspeka eska juauaka. Engajtsï exeaka na engaksïni Tata Diosï Jeoba jarhuatani jaka, sánderu ka sánderujtsï mintsinharhiaka. w21.11 23 párr. 11; 25 párr. 17

¿Andiksïsï kʼuiripuecha ísï exeajki Jesúsiiri chúxapatiichani eska ʻma sapichuʼ? Kʼuiripu, ¿neechani exeasïni komu jukaparhakua ambe? Jatsikuarheriichani, imeechani engaksï kánikua mítekateeka ka imeechani engaksï uinhapikua jatsika. Peru sáno iámindu Jesúsiiri chúxapatiicha, nóksï ísïisti. Ísï jimbo, kʼuiripuechaksï ísï exeasïndi komu ʻma sapichuʼ, jo, komu nema engaksï no jukaparhakueka (1 Kor. 1:26-29). Peru Tata Diosï Jeoba, no ísï exeasïndi. ¿Andisï Jesúsi uandapi ʻma sapichueriʼ? Imeeri chúxapatiichaksï kurhamarhispti: “¿Né sánderu kʼéri ambeeski auandarhu anapu juramukuarhu?” (Mat. 18:1). Imani jurhiatikuecha jimbo, uánikua judiuechaksï kánikua jukaparharasïreendi enga mítekateepiringa ka jatsikuarheriini. Achamasï ma enga mítekuka uandasïndi: “Kʼuiripuechaksï kánikua tsitisïreendi eskaksï máteruecha míteapiringa, eskaksï sési kámaapiringa, eskaksï jaiapanheantaapiringa ka eskaksï janhanharhiapiringa”. Jesúsi mítespti eskaksï imeeri chúxapatiicha jatsispka para kánikua jánguarhintani paraksï no ísïini eskaksï náepka máru judiuecha. w21.06 20 párr. 2; 21 párr. 6, 8, 9

Apostoli Pablu, ambakiti ejemplu máesti para orhejtsïkutiicha. Jiáni enga uétarhipka, konseju íntsaaspti Tesalónika anapu erachiichani. Peru orheta, imeeri kartecharhu sési ambe arhiaspti imani ánchikuarhita jimbo engaksï úni japka ka jimbokaksï tekaantskua jingoni ísï úxapka. Ístu eratsentaspti na engaksï nitamakuarhini japka ka arhiaspti eska mítespka eskaksï no sési nitamakuarhixapka ka eskaksï no sési kánhaxapka (1 Tes. 1:3; 2 Tes. 1:4). Ka ístu arhiaspti eskaksï ambakiti ejemplu máespka para máteru erachiicha (1 Tes. 1:8, 9). ¡Kánikuaksï sési pʼikuarherapti enga Pablu xáni ambakiti ambe arhiapka! Seguruksï jarhaspti eska Pablu kánikua xénchaasïreenga. Ísï jimbo, konsejuecha enga Pablu íntskuapka imani tsimani kartecha jimbo enga karakuapka, kánikua jarhuataaspti (1 Tes. 4:1, 3-5, 11; 2 Tes. 3:11, 12). w22.02 15 párr. 6

Satanási úraasïndi no jurhimbiti relijioniiri orhejtsïkutiichani paraksï uandani eska Tata Diosï Jeoba no sési kámpisïnga. Ka eska imeeri kulpeeska enga xáni no sési nitamakuarhinhani jaka ka máruksï asta uandasïndi eska enga sapi ma uarhijka, eska Tata Diosï pʼikuntaska jimboka uétarhinchaxapka máteru ánjelini auandarhu. Engaksï ísï uandajka, ¡nóksï sáni janhanharhini jarhasïndi Tata Diosï Jeobani! Joperu juchachi míteska eska inde ambe no ísïiska. Jimbosï engachi pʼamenchani jarhajka o engachi uarhiranchajka nemani, nóchi uandasïnga eska Tata Diosïiri kulpeeska. Sánderu sési, juchachi mintsikasïnga eska ma jurhiani ima sési peentaaka iámindu imani ambe engajtsïni no sési pʼikuastajka. Uaakachi aianguani iámindu imeechani engajtsïni kurhajchaaka eska Tata Diosï Jeoba kánikua xénchpetiska. Ka ísï, Tata Diosï uaati mókukuni imani enga tsʼéjkuni jaka (Prov. 27:11). Tata Diosï Jeoba pʼamojpitiisti. Jimbosï no sési pʼikuarherajti, engachi no sési kánhaajka, engachi pʼamenchani jarhajka o imani ambe jimbo engachi no újka úni (Sal. 22:23, 24). Imajtsïni kurhanguchisïndi na engachi no sési pʼikuarherajka. Ka uaati eskachi nóteru méni ísï pʼikuarheraakia (terukutanta je Éxodo 3:7, 8; Isaías 63:9 jingoni). w21.07 9-10 párr. 9, 10

Kʼuiripuecha engaksï újka ambe enga Tata Diosï uéjka, jatsiatiksï ambe ma enga sánderu kʼéri ambeeka: Tata Diosï Jeobaeri uékperakua ka uaatiksï imani kómarhini para méntkisï. Jesúsi kʼamajkuati iámindu imani uandanhiateechani engaksï Adáni ka Eba juaapka engaksï Tata Diosïiri familiani jurajkupka. Ka Tata Diosï Jeoba tsítantauati uánikua kʼuiripuechani ka uaati eska imeechajtu uaaka irekani para méntkisï ka no ma pʼamenchakua jingoni enga Echeri Paraisu máeuakia (Luc. 23:42, 43, TNM). Enga Tata Diosï Jeobaeri familia enga ixú Echerirhu jaka perfektueuakia, mándani arini xarhataati tʼíntskua ka kʼéri ambeksï arhinhaati, ísï eska Biblia na uandajka. Engajtsï chá imeecha jingoni kuenta úkuarhijka engaksï ‘uánikua kʼuiripuecheka’, sési jásï erokuarhikuajtsï ma jatsiska (Jaŋ. 7:9). Tata Diosïksïni xénchasïndi ka uékasïndi eskajtsï imeeri familiarhu jauaka. Ísï jimbo, jánguarhinta je xáni eskajtsï xáni uaaka parajtsï jaiapanherantani. Méntkisï miáuanta je ka chaari mintsitarhu jatsia je indeni aiatsperakuechani engajtsïni Tata Diosï úchiajka. Jukaparhara je kóntperatani engachi jatsika para kómarhini juchaari Taati auandarhu anapuni enga xénchpetika ka ístu jukaparhara je kóntperatani engachi jatsika para méntkisï kʼéri ambe arhini. w21.08 7 párr. 18, 19

Profeta Jeremíasi ióni aianhpispti Tata Diosïiri ambe, nájkirukaksï máru kʼuiripuecha no uékeenga kurhaani ka máteruechaksï jamberi uékani pʼínguni. Xáni no sési pʼikuarheraspti imani ambe jimbo engaksï arhienga ka na engaksï teresmarhuenga, enga niárapka eratseni nóteru aianhpini (Jer. 20:8, 9). Joperu no kuatantaspti. ¿Ambe jarhuataspi para sési eratsentani ka tsípikua jingoni aianhpini? Tsimani ambe enga kánikua jukaparhakueka. Orheta, eska ima ambe enga aianhpini japka, úpiringa úni eskaksï kʼuiripuecha sánderu orhepani úpiringa sési irekani ka erokuarhikuaksï ma jatsini (Jer. 29:11). Ka máteru, Tata Diosï Jeoba Jeremíasini erakuspti paraka aianhpepiringa imeeri ambe ka ambe enga ima uéjka úni (Jer. 15:16). Juchajtuchi aianguaxaka ambe ma enga erokuarhikua ma íntskuajka kʼuiripuechani ini jurhiatikuecha jimbo enga xáni no sési jánhaskuarhini jaka. Ka aianhpisïngachi Tata Diosï Jeobaeri nombrini, jimbokachi imeeri Testigueska. Engachi méntkisï eratsentaska ini tsimani ambe, sánderuchi tsitiaka aianhpini no arhiparini ambe engaksï uaaka kʼuiripuecha. Joperu ju je no kuatantani enga jorhenguarhiri ma no jirejiresï úni jauaka imani ambe enga jorhenguarhini jaka. Para semiia jatsikuni ka para nemani jarhuatani Jesúsiiri chúxapati úkuarhini, uétarhisïndi tekaantskua jatsini (Sant. 5:7, 8). w21.10 27 párr. 12, 13

Na uéjkichi xáni ióni marhuakukia Tata Diosï Jeobani, jatsiskachi para seguiriini sánderu jakajkuni imani. ¿Andi? Engachi no ísï úska, uaakachi nóteru xáni jakajkunia. Ju je miáni eska jakajkuni arhikuekasïnga seguru jarhani imani ambe jimbo enga no xarharajka. Ka ambe enga no xarharajka, ma sóntku mirikurhisïndi. Ísï jimbosï apostoli Pablu uandapti eska enga ma no jakajkujka, ‘pekadueska’ engajtsïni “méntku jauenani jarhajka uékani terungutani”. Jimajkani, ¿ambechi uaa úni parachi seguiriini jakajkuni Tata Diosïni? (2 Tes. 1:3). Orheta, ju je someni kurhakuni Tata Diosï Jeobani eskajtsïni íntskuaka imeeri espiritu santu. ¿Andi? Jimbokachi espiritu santuni jimbosï újka jakajkukua jatsini (Gal. 5:22, 23). Enga no espiritu santu jimboeuaka, nóchi uaaka sánderu jakajkuni ka seguiriini jakajkuni Kuerajpirini. Ju je seguiriini kurhakuni Tata Diosï Jeobani eskajtsïni íntskuaka imeeri espirituni ka imajtsïni íntskuati (Luk. 11:13). Uaakachi arhini: “U eskachi jucha sánderu kánikua mintsikaaka” (Luk. 17:5). Ístu, ju je someni jorhenguarhini Tata Diosïiri Karakatani (Sal. 1:2, 3). w21.08 18, 19 párr. 16-18

Erachiicha engaksï jatiriikia uánikua ambe jimboksï uaati jarhuajpeni. Nájkirukaksï nóteru xáni uinhapikia, uánikua ambeksï jorhenguarhistia desde iónisï. Ka Tata Diosï Jeoba seguirixati mámaru ambe jimbo úraani. Pori ejemplu, Bibliarhu uandaasïndi ejempluechani imeecheri engaksï no méni jurajkupka marhuakuni Tata Diosï Jeobani nájkirukaksï tʼarhepipkia. Ma jindeesti Moisési, enga ma 80 jatiripkia enga profeta únhapka ka orhejtsïkuti ireta Israeliiri. Máteru jindeespti Danieli, jamberi jukari 90 jatiriiptia enga seguiriini japka marhuakuni Tata Diosï Jeobani komu profeta. Ka enga apostoli Juanu, Tata Diosïiri jarhuajperata jimbo karapka libruni Jaŋaskuecha, jamberi jukari 90 jatiriiptia. Biblia no xáni uandasïndi “Simeóniri acheeti ma enga meru jurhimbitku jámeenga ka Tata Diosïni janhanharhini”, joperu Jeoba k’oru sési mítespti ka k’éri kóntperata ma íntskuspti jimboka exespka Jesúsini enga charhakuepka ka ístu jimboka profesia ma uandaspka Jesúsiiri ka Maríeri ambe (Luk. 2:22, 25-35). w21.09 3, 4 párr. 5-7

Taatiichaksï no jatsisti para terukutantani uájpeechani ni kurhakuani ambe ma engaksï no uaaka úni. I ambe no sési jarhasti ka no sési pʼikuastasïndi sapiichani (Efes. 6:4). Pirenchi ma enga arhinhajka Sachiko, uandasïndi: “Juchiiti naandi uékasïreendi eska engani eksaminichani uántaapiringa no ma errori jatsipiringa, joperu inde ambe no úpirindi ísï úkuarhini. Nájkiruka ióniikia engani uéntaka eskuela, útasïni ménichani ísï eratsesïnga eska Tata Diosï Jeoba no jaiapanhentasïnga ambe engani újka, nájkirukani kánikua jánguarhintaaka”. Rei Dabidi uandaspti: “No uékasïnga kʼéri ambe jirinhani ni imani ambe engani no uaaka úni”. Jimboka Dabidi kaxumbitiispka, inde ambe úspti eska sési pʼikuarherapiringa (Sal. 131:2). I ambe jorhendaasïndi taatiichani eskaksï uaaka kaxumbitiini ka eskaksï no jámaaka sánderu ambe erokuarhini imeecheri ka uájpeecheeri ambe. Engaksï metechani jatsikukuauaka uájpeechani, jatsistiksï para exeni, ambeksï úsïni úni ka ambe nómbe parakaksï uájpeecha uaaka ísï úni. w21.07 21 párr. 5, 6

Tata Diosï Jeobajtsïni sésikua íntskusti iáminduechani parachi erakukuarhini ambe úni. Ísï jimbo, ma úsïndi erakuni marhuakuni Tata Diosï Jeobani o nómbe. Máru tumbiichaksï no méni jatsiaspti taatiicha engaksï jorhendapiringa Biblieri ambe, peruksï erakuska Tata Diosï Jeobani marhuakuni ka nóksï méni jurajkuxati. Máteruechaksï jatsiaspti taatiichani engaksï jánguarhintapka desde sapichu uératini jorhendaani Biblieri ambe, joperu engaksï kʼépkia, jurajkusptiksï Tata Diosï Jeobani. Ísï jimbo, mándani jatsisti para erakuni marhuakuni Tata Diosï Jeobani o nómbe (Jos. 24:15). Ísï jimbo, taatiicha, enga chaari sapi ma jurajkuaka Tata Diosï Jeobani, asï jáma je uandani eskajtsï chá kulpa jatsiska. Ménisï, jindeesïndi taati o naandi enga jurajkujka Tata Diosï Jeobani ka asta niárani jurajkuni familiani (Sal. 27:10). I ambe kánikua no sési pʼikuastaasïndi sapiichani engaksï ísï exeajka imeeri taatiichani komueska ejemplu ma. Tumbiicha, enga chaari taati o chaari naandi petanhantaaka kúnguarhikuarhu, seguru ja je eska Tata Diosï Jeoba exexaka na engajtsï no sési pʼikuarherajka. Imaksïni xénchasïndi ka sési pʼikuarherasïndi engajtsï chá seguiriini jaka marhuakuni. Miá je eskajtsï no chá kulpa jatsiska imani ambe jimbo engaksï chaari taatiicha úka. w21.09 27 párr. 5-7

Nema enga petanhantajka kúnguarhikuarhu uératini, sáno májkuenisïndi eska karichi ma enga pʼamenchakua ma kámajka ka enga uaaka máteru karichiichani kéritaani, jimboka imeeri pájperakua Tata Diosï Jeoba jingoni no sési jarhaska (Sant. 5:14). Májkueni eska pʼamenchati na úpiringa máteruechani kéritani pʼamenchakua ma, nema enga no ambakiti pájperakua jatsika Tata Diosï Jeoba jingoni ístu úpirindi úni eskaksï máteruechajtu no sési ambe uaaka. Jimbosï ménisï uétarhijti eska ma nóteru kúnguarhiaka imani jingoni. Enga nema petanhantajka kúnguarhikuarhu, ístu jindeesti para xarhatani na enga Tata Diosï Jeoba xáni xénchaajka imeechani engaksï sési marhuakuni jaka. Ístu úsïndi eska kʼuiripu móantaaka ka eska kʼuanhatsentaaka Tata Diosï Jeoba jingoni. Enga nema petanhantajka kúnguarhikuarhu útasï úsïndi nirani tánguarhikuecharhu, nani enga uaaka jorhenguarhini Tata Diosï Jeobaeri ambe ka ménderu niárani jatsini ambakiti pájperakua ma imani jingoni. Ístu, uaati jatsiani publikasioniichani para ima úraani ka exeni JW Broadcasting^®. Ka engaksï orhejtsïkutiicha exejka eska mójtakurhixakaia, ménichanisïksï úsïndi konsejuechani íntskuani paraka ima uaaka sési pájperantani Tata Diosï jingoni ka ísï ménderu úni jindeeni Jeobaeri testigu ma. w21.10 10 párr. 9, 11

Jarhasti máru ambe engachi jimbo sáno májkueni újka ambe ma eska primeru siglurhu anapu kristianuecha. Pori ejemplu, na enga uaxastakata jaka juchaari kúnguarhikua, sáno májkueniisti eskaksï na uaxastapka primeru siglurhu anapu apostoliicha, jarhasptiksï sirkuitueri orhejtsïkutiicha, orhejtsïkutiicha ka orhejtsïkutiicheri jarhuajpiriicha (Filip. 1:1; Titu 1:5). Ka májkueni úsïngachi uandani na engachi exejka jucha seksuni, temungurhiriikuani, na engachi xáni jukaparharajka iurhirini ka ambe engachi újka para kuájchakuni juchaari erachiichani imeecheri engaksï kʼérati pekaduechani uaajka ka engaksï no móantajka (Uku. 15:28, 29; 1 Kor. 5:11-13; 6:9, 10; Ebr. 13:4). Biblia sési uandasïndi eska “máechakua jakajkukua” jarhaska enga Tata Diosï jaiapanhentajka (Efes. 4:4-6). Úni Tata Diosïiri ireta jingoni jarhani ka míteni jurhimbikua Tata Diosï Jeobaeri ambe ka ambe enga eratseni jaka úni, kʼéri kóntperata máesti. Ju je seguiriini seguru jarhani eskachi jurhimbikuarhu jarhaska. w21.10 23 párr. 15-17

Rei Jeosafati kʼéri uandanhiata ma jatsispti. Imeeri familia ka ireta, úpirindiksï no sési úkuarhinchani, jimboka Ammóni anapuecha, Moabi ka Seíri anapuecha engaksï juátarhisï irekapka, uékasïreendiksï no sési úkuani (2 Crón. 20:1, 2). ¿Ambe úspi Jeosafati? Jarhuajperata kurhakuspti Tata Diosï Jeobani ka uinhapikua. Ima kómarhikua enga kaxumbikua jingoni úpka ka enga 2 Crónicas 20:5-12 jimbo jaka, xarhatasïndi na enga xáni mintsinharhienga Jeosafati imeeri Taati auandarhu anapuni enga xáni uékpitiika. Lebitani ma úraparini enga Jaasieli arhinheenga, Tata Diosï Jeoba mókukuspti Jeosafatini ka arhispti ambe enga uandajka iásï anapu tekstu. Jeosafati mintsinharhispti imeeri Tata Diosïni ka úspti ambe enga ima arhipka. Enga rei Jeosafati ka imeeri ireta nípkaksï uarhiperani imeeri enemiguecha jingoni, ima no orhepani peeraaspti sánderu ambakiti sondaduechani, sánderu sési, imeechani peeraspti engaksï no ma arma kámeenga ka engaksï pirepani japka. Ísï eska Tata Diosï Jeoba na aiakupka Jeosafatini, andaspti imeeri enemiguni (2 Crón. 20:18-23). w21.11 15, 16 párr. 6, 7

Jiáni engachi no sési nitamakuarhini jauaka uaakachi seguru jarhani eskajtsïni Tata Diosï Jeoba jarhuataaka ka eskajtsïni íntskuaka ambe engachi xáni uétarhinchaaka parachi no méni jurajkuni (2 Kor. 4:7-9). Uaakachi seguru jarhani eskajtsïni Tata Diosï Jeoba seguiriuaka xarhatacheni ambakiti uékperakua, jimboka eska na uandajka salmueri karari ma, “Tata Diosï Jeobaeri éskuechaksï imeechani exeaxati engaksï janhanharhijka, imeechani engaksï mintsikajka imeeri ambakiti uékperakuani” (Sal. 33:18-22). Ante dechi ueenani marhuakuni Tata Diosï Jeobani, imajtsïni tʼuini xénchasïreendia ísï eska na xénchaajka iámindu kʼuiripuechani. Peru engachi ueenaka imani marhuakuni, imajtsïni ueenasti xarhatacheni ambakiti uékperakua. Inde uékperakua úsïndi eskajtsïni ima uékaaka kuájchakuni. Tata Diosï méntkisï juchantsïni jingoni jauati ka uaati iámindu imani ambe engajtsïni xáni aiachikia. Uékasïndi eskajtsïni sési nicheaka juchaari tsípikuarhu (Sal. 46:1, 2, 7). Ísï jimbo, náki uéjki uandanhiateecha engachi nitamakuarhiani jauaka, Tata Diosï Jeobajtsïni méntkisï uinhapikua íntskuati parachi no méni jurajkuni. w21.11 7 párr. 17, 18

Sáno iáminduechachi míteska nemani enga jatanhekuka ánchikuarhitarhu anapu kompanieruni ma, o eskuelarhu anapuni ma, o familiarini ma, ménichani asta uánikua uéxurhini. Ju je miáni eskaksï Joséeri 10 mediu ermanuecha jatanhekuspka ka inde ambe úspti eskaksï kánikua no sési ambe úkupiringa (Gén. 37:2-8, 25-28). Peru ima no májkueni ambe úkuantaspti. Enga juramukua jatsipkia úpirindi bengarikuarhini, peru no ísï úspti, sánderu sési pʼamojperakua xarhatakuaspti. Enbesi de jatanhekuani úspti ambe enga sánderu tátsekua karanhapka Levítico 19:18 jimbo (Gén. 50:19-21). Ima kristianu enga uéjka jaiapanherantani Tata Diosïni, jatsisti para ísï úni eska José na úpka ka puátspentani ka no jámani jatanhetspini ni bengarikuarhini. Jesúsi uandaspti eskachi jatsiska para puákuantani imeechani engajtsïni no sési úchika (Mat. 6:9, 12). Ístu, apostoli Pablu arhiaspti kristianuechani: “Asï jáma je maiamukuarhintani” (Rom. 12:19). w21.12 11, 12 párr. 13, 14

Iauani chúrikua 14 de nisani uéxurhini 33 jimbo, Jesúsi niraspti jardini de Jetsemaní jimbo, ka jima mintsita jingoni kómarhispti Tata Diosï Jeobani (Luk. 22:39-44). Jiáni, “ueparini ka mískuarhiparini kómarhispti imani” (Ebr. 5:7). ¿Ambe kurhajkuarhispi Jesúsi ima chúrikua ante de uarhini? Kurhakuspti Tata Diosï Jeobani eska uinhaperantapiringa paraka no jurajkupiringa ka paraka imani ambe úpiringa enga Tata Diosï Jeoba uékeenga. Tata Diosï Jeoba kurhajchaspti imeeri Uájpani enga mintsita jingoni kómarhipka ka axaspti ánjelini ma paraka uinhaperantapiringa. Jesúsi sési mítetixapti eska kʼéri ánchikuarhita ma jatsispka: kuájpini imeeri Taati jémbeeri nombrini. Tata Diosï Jeoba kurhajchaspti imeeri Uájpani enga mintsita jingoni kómarhipka. ¿Andi? Jimboka ambe enga sánderu jukaparhakuepka para Jesúsi, jindeespka no jurajkuni ka kuájpini Taati jémbeeri nombrini. Engachi juchajtu sánderu jukaparharaska Jeobaeri ambe, imajtsïni mókuchintaati engachi jarhuajperata kurhakuaka (Sal. 145:18). w22.01 17, 18 párr. 15-17

Uánikuechaksï no sési exesïndi engachi no inchamukujka politikarhisï. Uandasïndiksï eskachi jatsipiringa para apoiarini partiduni ma, joperu engachi ísï úni japiringa nóchi jiókuarhini japiringa Jeobani (1 Sam. 8:4-7). Jamberi ístuksï eratsejti eskachi jatsipiringa para ospitaliichani uáni ka eskuelechani o iretarhu jarhuajpeni. Ka ístuksï no sési exesïndi jimbokachi sánderu aianhpini jámasïnga ka eska jánguarhintani sési peentani parhakpini anapu ambe. ¿Ambeksïni jarhuataa parajtsï no ma ambe no sési exeni? (Mat. 7:21-23). Ju je miáni eska sánderu jukaparhakua ambe, jindeeska úni ambe engajtsïni Jesúsi juramuchika. Asï jurajku je eskaksïni támisï páaka politikeeri ambe ka ambe enga úkuarhini jaka parhakpinirhu. Jeobaeri testiguechachi xénchaasïnga kʼuiripuechani, uandanhiasïngachi imeecheeri problemecha jimbo, joperuchi míteska eska sánderu sésiska jorhendaani Tata Diosïiri Juramukueri ambe ka jarhuataani paraksï imeeri amigueni. w21.05 7 párr. 19, 20

Nájkirukaksï máru juramutiicha uandajka eskaksï marhuakusïnga Tata Diosïni, nóksï uékasïndi jurajkuni imeecheri juramukuani. Májkueni eska Jesúsiiri jurhiatikuecha jimbo, iásïjtuksï no jiókuarhisïndi Tata Diosï Jeobaeri Erakukatani ka no sésiksï kaasïndi ambakiti Tata Diosïiri marhuariichani (Uku. 4:25-28). ¿Ambe úsïni Tata Diosï Jeoba? Salmo 2:10-12 uandasïndi: “Ísï jimbo, reiicha, jánhastii je; ka chá juesiicha jurajkukuarhi je parajtsï jurhimberanhantani. Marhuaku je Tata Diosï Jeobani kánikua janhanharhikua jingoni ka tsípikua jingoni chénharhi je. Janhanharhi je Uájpani, engajtsï no ísï úska, Tata Diosï ikiauati ka chájtsï xanharu jimbo uarhiaka, jimboka ima no ióndasïnga ikiani. ¡Tsípisïndiksï imeecha engaksï imani nirajka andarhierani paraksï kuájchakukuarhini!”. Tata Diosï Jeoba sési kámpisïndi, ísï jimbosï jurajkuni jati ma tiempu parakaksï kʼuiripuecha, mójtakukuarhiaka ka parakaksï jiókuarhiaka imeeri Juramukuani. Joperu tiempu kʼamaraxatia (Is. 61:2). Kánikua jukaparhakuesti eskaksï kʼuiripuecha míteaka jurhimbikuani ka eskaksï erakuaka Tata Diosï Jeoba jingoni úkuarhini. w21.09 15, 16 párr. 8, 9

Ambe enga apostoli Pablu arhikuekani japka jindeespti eskachi tsípini jauaka imani ambe jingontku engachi jatsikuarheaka (Filip. 4:12). Sánderu ambakiti ambe engachi jatsika, jindeesti juchaari pájperakua Tata Diosïni jingoni ka no jatsikuarhekua ambe (Hab. 3:17, 18). Ju je exeni ambe enga Moisési arhiapka israeliteechani, ísï tátsekua engaksï na jámapkia 40 uéxurhini desierturhisï: “Jeoba chiiti Tata Diosïkeni újchakuras[ti] iámindu ambe jimbo engari úka. [...] Ini 40 uéxurhiniicha jimbo, Jeoba chiiti Tata Diosï tʼungini jingoni jarhaspti ka nókini ma ambe kueratachispti” (Deut 2:7). Imani 40 uéxurhiniicha jimbo, Tata Diosï Jeoba maná jingoni tʼireraaspti. Ka ima takusï engaksï jingoni uéakuntapka Ejiptu no méni jiánguarhispti (Deut. 8:3, 4). Tata Diosï Jeoba sési pʼikuarheraati engachi tsípini jauaka imani ambe jingontku engachi jatsikuarheaka nájkiruka no kánikua ambeuaka ka ísïchi exeni komueska kóntperata ma ka diosmaiamukuachi arhini indeni ambe jimbo. w22.01 5 párr. 10, 11

Acheetiicha, chájtsï jatsiska para exeni eska chaari familia sési jauaka, jimbojtsïsï jánguarhintajka jarhuatani ka kuájchakuni. Ísï jimbo, engaksï uandanhiateecha jarhajka, jamberijtsï eratsejka eskajtsï uaaka jandiajku sési peuantani. Joperu asï méni eratsi je eskajtsï uaaka jandiajku orhepani uérani. Sánderu sési, jandiajku kómarhi je Tata Diosï Jeobani ka arhi je eskaksïni jarhuataaka. Ístu mintsita jingoni kómarhi je Tata Diosïni chaari uarhiiti jingoni. Exe je ambe enga uandajka Tata Diosï Jeoba Bibliarhu ka publikasionicharhu enga organisasioni petaajka ka tátsekua ísï ú je eska jimini na arhijka. Jamberiksï máru kʼuiripuecha no sési exeati engajtsï chá Bibliarhu jupindaskuarhiaka parajtsï exeni ambe engajtsï uaaka. Jamberiksïni arhiati eska sánderu jukaparhakua ambe engajtsï uaaka íntskuni chaari familiani, jindeeska sentabu ka jatsikuarhekua ambe. Joperu miá je rei Jeosafatiiri ejempluni (2 Crón. 20:1-30). Ima mintsikaspti Tata Diosï Jeobani ka úkuecha jingoni xarhataspti. Tata Diosï Jeoba no méni jurajkuspti ini xáni ambakiti acheetini ka ístuksïni no méni jurajkuati chánksïni (Sal. 37:28; Ebr. 13:5). w21.11 15 párr. 6; 16 párr. 8

Tata Diosïjtsïni ísï kueraasti eska ima na jásïika, ísï jimbo uékasïngachi eska iáminduecha jurhimbikua jingoni kánhaaka (Gén. 1:26). Joperu, jimbokachi imperfektueska, nóchi úsïnga sési jusgarpini nájkirukachi eratseaka eskachi iámindu ambe míteska. Pori ejemplu, ju je miántani ambe enga úkuarhinchapka Jonási. Ima kánikua ikiaspti enga Tata Diosï Jeoba pʼamojkuapka Nínibe anapuechani (Jon. 3:10–4:1). Joperu ambe enga Tata Diosï Jeoba erakupka úni, úspti eska 120,000 ninibiteecha no uarhipiringa. Ísï jimbo, Jonasisï no sési jusgariuapti Nínibe anapuechani ka no Tata Diosï Jeoba. Tata Diosï Jeoba no jatsisti parajtsïni aianguni andisï ísï újki ambe ma. Ióntki, Tata Diosï Jeoba jurajkuspti eska máru imeeri marhuariicha uandapiringa ambe engaksï eratseenga ima ambeeri enga ima úpiringa (Gén. 18:25; Jon. 4:2, 3). Ka ménichani Tata Diosï aianguaspti andisï ísï úpi ambe ma (Jon. 4:10, 11). Peru ima no uétarhinchasïndi eskachi arhiaka sini sési jarhaski ambe enga erakujka úni (Is. 40:13, 14; 55:9). w22.02 4 párr. 5, 6

Parachi ísï jámani eska ima enga sánderu “sapichitu” ambeeka, jatsiskachi para eratsentani eskaksï máteruecha sánderu kʼéri ambeeska eska jucha (Filip. 2:3). Engachi sánderu jánguarhintaska ísï eratseni, menusichi no sési pʼikuastauaka máteruechani. Iámindu erachiicha ka pirenchicha sánderuksï kʼéri ambeesti juchantsïni jingoni, ambe ma jimbo. Ka i ambe fásiliisti para exeni engachi imani ambe exekuauaka enga ambakiti ambeeka. Jatsiskachi para kánikua jukaparharani ambe enga apostoli Pablu arhiapka Korintu anapuechani: “¿Néndi tántiarisïni tʼu eskakeni sánderu kʼéri ambe exesïnga ka eska máteruni? ¿Ori ambe jatsiski tʼu engari no intsïnhaka? Jimajkani engari intsïnhaka, ¿andisïri teparakuarhijki komusiekari no intsïnhapiringa?” (1 Kor. 4:7). Ísï jimbo, ju je no uékani eska juchajku exenhaaka o sánderu kʼéri pʼikuarherani eska máteruecha. Enga erachi ma ambarhati arhijtsïkperatechani nitamataraajka o pirenchi ma uánikuechani jorhendaani jarhani Biblieri ambe, Tata Diosï Jeobasï jatsiti para kʼéri ambe exenhani ini ambe jimbo. w21.06 21, 22 párr. 9, 10

Para uánikua Testiguecha sánhani arhisïndi úkua jukani uandontskuarheni kʼuiripuecha jingoni imeecho. Máruksï jimeesï irekasïndi engaksï kʼérati edifisiuecha jaka ka enga no jiáratperanhajka para né uéjki inchaakuni jimboka kʼuiripu ma jarhasïnga enga kuáni jarhajka ka imantkusï jiárhitajti inchaakuni enga sésikua jatsika o enga pʼímarhinhajka. Ka máteru nanisï, erachiichaksï no uánikua kʼuiripuechani exeantasïndi oksï jimeesïsï aianhpini nani enga namunitu kʼuiripu irekaka. Jamberiksï iauani xanharajti paraksï úni uandontskuarheni nemani jingoni ka engaksï na niárajkia, no nema jarhasïndi kʼumanchikuarhu. Engachi ménisï niáraska ini ambe nitamakuarhini, ju je no kuatantani. Ju je máteru ora jimbo nirani aianhpini. Sánderuchi uáni kʼuiripuecha jingoni uandontskuarheaka engachi ima jandora niraska aianhpini engaksï kʼuiripuecha imeo jauaka. Ka nóchkandi kʼuiripuechaksï jatsisïndi para imeo niántani. Uánikua erachiichaksï aianhpisïndi inchatirisï o enga na chúrini jarhajkia jimbokaksï sánderu uáni kʼuiripuechani exeantasïnga kʼumanchikuarhu. Ístu, inde jandorisï jamberiksï kʼuiripuecha mintsikuarhini jarhajtia ka jamberiksï uékani sánderu uandontskuarheni. w21.05 15 párr. 5, 7

¿Májkueni úkuarhisïni iásï? Jo. Máru kʼuiripuechaksï ikiasïndi, jimbokachi Jeobaeri testiguecha no uántasïnga imani kʼuínchikuechani enga Biblia uandajka eskaksï no sési jarhaska, komu kumpleaniuechani ka Nabidadini. Máteruechaksï ikiasïndi jimbokachi no partisiparisïnga kʼuínchikuecharhu engaksï paisini jimbo únhantajka. Nijtuchi chúngumajki imani pʼindekuechani engaksï jiáni únhajka enga nema uarhijka ka enga Biblia uandajka eskaksï no sési jarhaska. Jamberiksï i kʼuiripuecha jakajkujti ka eratseni eska Tata Diosï jaiapanhentasïnga ambe engaksï úni jarhajka. Joperu engaksï sánderu tsitiska parhakpini anapu pʼindekuechani eska ambe enga Biblia jorhentpijka, Jeoba no jaiapanheantauati (Mar. 7:8, 9). ¿Ambeksïni jarhuataa parajtsï no ma ambe no sési exeni? Jánguarhintani ísï úni eskaksï na uandajka Jeobaeri juramukuecha ka imeeri konsejuecha (Sal. 119:97, 113, 163-165). Engajtsï xénchaska Jeobani, nójtsï úntaaka náki uéjki kʼuínchikuani enga ima no jaiapanhentajka. Asï jurajku je eska máteru ambe sánderu jukaparhakueuaka ka eska xénchani Jeobani. w21.05 6 párr. 15, 16

¿Nénajtsï uaa ísï úni eska apostoli Pablu na uandapka? Seguirii je jorhenguarhini Bibliani parakajtsï sánderu mintsikaaka Tata Diosïni, méntkisï kómarhi je ka méntkisï jánguarhinta je imani ánchikuarhitani úni engajtsïni Tata Diosï íntskuka (2 Tim. 4:4). Engajtsï mintsikaska Tata Diosïni, nójtsï chéaka engajtsï no sési jásï ambe kurhaaska Jeobaeri marhuariicheeri ambe (Is. 28:16). Na engajtsï xáni uékajka Jeobani, imeeri Karakatani ka erachiichani, jarhuataatiksïni parajtsï no jakajkuni imani chkuanderakua ambe engaksï uandajka imeecha engaksï jurajkukia jurhimbikuani. Primeru siglurhu, uánikua kʼuiripuechaksï niáraspti no sési exeni ka nóksï jiókuarhini Jesúsini. Joperu, ístuksï uánikuecha jiókuarhispti. Asta acheeti ma enga Sanedrinirhu japka ka ístu “uánikua saserdotiicha” (Uku. 6:7; Mat. 27:57-60; Mar. 15:43). Sáno májkueni, iásïksï uánikuecha erakustia Jesúsini chúxapani, jimbokaksï míteska Biblieri jurhimbikua ambe ka jukaparharasïndiksï. Tata Diosïiri Karakata arhisïndi: “Kánikuaksï pínandikua jatsisïndi imeecha engaksï jukaparharajka chiiti Leini; no ma ambe ójkutauaka imeechani” (Sal. 119:165). w21.05 13 párr. 20, 21

Apostoli Pablu mítespti eska no imeeri uinhapikua jimbosï ueenga aianhpini, sino Jeobaeri uinhapikua jimbo. Jeoba imeeri espiritu santuni jimbo uinhaperantaspti Pabluni paraka úpiringa aianhpini nájkiruka uandanhiateechani jatsiapka, no sési kánhani ka ónhanhani. Timoteo enga tumbi máepka, ístu uétarhinchaspti Tata Diosïiri uinhapikuani para sési úni imeeri ánchikuarhitani. Pori ejemplu, pámbetaspti Pabluni enga ima iauanisï nireenga aianhpini. Apostoli Pablu ístu axaspti Timoteoni paraka nipiringa pʼorhembiani ka uinhaperaantani máru kúnguarhikuechani (1 Kor. 4:17). Jamberi Timoteo ísï pʼikuarhereendi enajki no úpirini úni indeni ánchikuarhitani. Jamberi jimbosï Pablu arhipti: “Asïkini nema no janhanharhie jimbokari nótki jatirisïnga” (1 Tim. 4:12). Ístu, imani tiempuni jimbo, Biblia uandasïreendi eska Timoteo someni pʼamenchasïreenga ka eska inde ambe ísïispka komueska chekamita ma enga no sési pʼikuasteenga (1 Tim. 5:23). Joperu Timoteo mítespti eska Jeobaeri espiritu santu uinhaperantapiringa paraka úpiringa aianhpini ambakiti aianhperakuani ka marhuakuani erachiichani (2 Tim. 1:7). w21.05 21 párr. 6, 7

Ambe enga uandajka Santiagu 1:19 kánikua marhuakuasïndi imeechani engaksï konseju íntspijka. Santiagu karaspti: “Jorhenguarhi je iáminduecha sóntku kurhandini peru ióndantsï mókukuarhini ka ístu ióndantsï ikiani”. Orhejtsïkuti ma no jatsipirindi para eratseni eska iámindu ambe míteska ambe enga jimbo nitamakuarhini jaka erachi enga konsejuni íntskuaka. Proverbios 18:13 miátantasïndijtsïni: “Enga nema mókuntajka ante de kurhaani ambe ma, inde ambe tontuesti ka kʼuratsekua ma”. Sánderu sésisti kurhamarhini kʼuiripuni ambe enga jimbo nitamakuarhini jaka, ka parachi míteni, jatsiskachi para kurhajchani ante de arhini ambe ma. Orhejtsïkuti úpirindi kurhamarhini “¿nájtsï jarhaski?”, “¿nájtsï pʼikuarheraxaki?”, “¿nénaksïni uaa jarhuatani?”. Engaksï orhejtsïkutiicha jánguarhintaaka míteni ambe engaksï nitamakuarhini jaka erachiicha, sánderuksï uaati jarhuataani ka sési pʼikuastantaani. Parachi úni ambakiti konseju ma íntskuni nemani, no solu uétarhisïndi uánikua tekstuechani arhikuantani ka máru konsejuechani íntsaani. Erachiichaksï jatsisti para exeni eskachi uandanhiasïnga imeechani jimbo, eskachi kurhangukuasïnga ka eskachi uékasïnga jarhuataani. w22.02 17 párr. 14, 15