Juniu

Uarhiiti tsïndi kánikua úkua jukanchajti, jamberi no jatsiti sentabu ni para úni nitamakuarhini. Joperu jima andaparhakusïndi engaksï kʼuiripuecha tumina jatsirajka ka jánguarhintasïndi paraka no nema exeaka ka tsimani moneda sapirhatiichani jatsiraasïndi engaksï no jamberi kurhaakuarhijka engaksï andanhierajka. Joperu Jesúsi k’oru mítesïndi na enga xáni jatsirajka, tsimani leptoniichani. Imani tiempuecha jimbo, íksï jindeespti monedeecha engaksï no xáni jukaparhapka, no jamberi andangusïreendi ni ma pajarituni ma piáni enga sánderu no jukaparhapka para tʼireni. Jesúsi ísku pakarasïndi exeparini ambe enga újka uarhiiti tsïndi enga xáni pobriika. Ísï jimbo, uandajpaasïndi imeeri chúxapatiichani ka arhiasïndi: “Inde uarhiiti tsïndi enga xáni pobriika, sánderu kánikua jatsiras[ti] ka eska iáminduecha”. Tátsekua arhiasïndi: “Jimboka iáminduecha [ka sánderu imeecha engaksï rikueka] imanisï jatsirajka engaksï sobrarinchenga, peru inde uarhiiti nájkiruka xáni pobriika, jatsirasti iámindu eska xáni jatsikuarhepka para nitamakuarhitarani” (Mar. 12: 43, 44). Indeni jurhiatikua jimbo enga inde ambakiti uarhiiti iámu sentabu jatsirapka enga xáni kámani japka, xarhataspti eska mintsikasïrenga eska Jeoba kuidaripiringa (Sal. 26:3). w21.04 6 párr. 17, 18

Enga Jesúsi Echerirhu japka, méntkisï tsípikua jingoni aianhpispti ka uékasïndi eskaksï imeeri chúxapatiichaksï ístu tsípikua jingoni aianhpiaka (Juanu 4:35, 36). Jesúsiiri chúxapatiichaksï tsípikua jingoni aianhpisïreendi jimboka Jesúsi imeecha jingoni jarhaspka (Luk. 10:1, 5-11, 17). Joperu ma tiempu jimbo, chkésptiksï jiáni engaksï jupikapka ka uándikuni imeecheeri jorhentpirini (Juanu 16:32). Tátsekua enga Jesúsi na tsíntapkia, arhiaspti eskaksï jánguarhintapiringa aianhpini. Ka enga Jesúsi auandarhu japkia, imeeri chúxapatiichaksï xáni tsípikua jingoni aianhpisïreendi enga jamberi imeecheeri ikiatspitiichaksï uandapka ambe enga iásï anapu tekstu uandajka. Primeru siglurhu, Jesúsi orhejtsïkuaspti orheta kristianuechani paraksï aianhpini ka jimboka Jeoba jarhuataaspka, uánikua kʼuiripuechaksï kurhajchaaspti. Pori ejemplu, Pentekostesirhu uéxurhini 33 jimbo, ma 3,000 kʼuiripuechaksï itsï atakuarhispti (Uku. 2:41). Ka sánhani arhixaptiksï sánderu uánini Jesúsiiri chúxapatiicha (Uku. 6:7). Ka ístu, Jesúsi uandaspti eska últimu jurhiatikuecha jimbo, sánderu uánikua kʼuiripuechaksï jiókuarhipiringa ambakiti aianhperakuani (Juanu 14:12; Uku. 1:8). w21.05 14 párr. 1, 2

¿Miásïntsï na engajtsï pʼikuarherapka engajtsï exentapka jurhimbikuani? Eratsesïreengajtsï eskaksï iáminduecha uékapiringa míteni ini ambe. Segurujtsï jarhaspka eska ambe enga Biblia uandajka jarhuataapiringa kʼuiripuechani paraksï sési irekani iásï ka paraksï ambakiti irekua ma jatsini sánderu orhepani (Sal. 119:105). Kánikuajtsï tsípikua jingoni uénaspka aianguani chaari parientichani ka amiguechani ambe engajtsï jorhenguarhini japka. ¡Joperujtsï kánikua no sési pʼikuarherapka engaksïni no uékapka kurhajchani! Nójtsïni jatsisti para ísku pakatani engaksï kʼuiripuecha no jiókuarhijka ambe engachi aianhpijka. Enga Jesúsi Echerirhu japka, milagruechani uaaspti enga xarhateenga eska Jeoba jarhuataxapka. Nájkiruka ísï úpka nóksï iámindu kʼuiripuecha jiókuarhispti. Pori ejemplu, enga Jesúsi tsítantapka Lasaruni, milagru ma engaksï ni imeeri ikiatspitiicha úpka uandani eska no ísï úkuarhispka, relijioniiri orhejtsïkutiichaksï no jiókuarhispti eska ima jindeespka Mesíasi. Ka astaksï uékasïreendi uándikuni Jesúsini ka Lasaruni (Juanu 11:47, 48, 53; 12:9-11). w21.05 2 párr. 1, 2

Jatsiskachi para jánguarhintani parachi nirani tánguarhikuecharhu, jimbokajtsïni uinhaperantasïnga ka ístuchi úsïnga sési míteani erachiichani. Ju je ima erachiicheeri amigueni engaksï ambakiti ejemplu máeuaka para jucha, nájkirukaksï no májku jatiriuaka o májku lugari anapueni eska jucha. Bibliajtsïni miátantasïndi eskaksï “jatiriicha jánhastiiska” (Job 12:12). Peru ístu erachiicha engaksï jatiriikia uánikua ambeksï uaati jorhenguarhini tumbiicheri. Dabidi sánderu sapichuespti eska Jonatani, joperuksï niáraspti kánikua sési pájperani (1 Sam. 18:1). Tsimarhanksï jarhuajperaspti paraksï Tata Diosï Jeobani marhuakuni, nájkirukaksï kʼérati uandanhiateechani jatsiapka (1 Sam. 23:16-18). Irina, pirenchi ma enga imajku Testigueka imeeri familiarhu, uandasïndi: “Juchaari kúnguarhikuarhu anapu erachiicha uaatiksï niárani jindeeni komueska taatiicha o ermanuecha. Tata Diosï Jeoba uaati úraani parakaksï ísïiuaka eska juchaari familia”. Juchaari amiguechajtsïni uékasïndi uinhaperantani ka jarhuatani, joperuchi jatsiska para aianguani néna engajtsïni uaaka jarhuatani. w21.06 10, 11 párr. 9-11

Jesúsi uandantaspti uandantskua ma juramutiri ma imeeri jántspiri ma jingoni. Jántspiri kánikua kánguxapti juramutini enga no méni úpiringa maiamuntani, peru juramuti tekaakuntaspti jántspirini. Sánderu tátsekua, i mismu jántspiri no uékaspti tekaakuntani máteru jántspirini sáni enga kánguni japka. Jimbosï, juramuti ónhatarkuarhipti imani jántspirini enga no sáni pʼamojkpitiipka. Ambe enga ima jántspiri úpka no sési úkuspti imani, peru ístu máteruechani. Para ueenani, no sési kámaspti imeeri pámpirini ka “ónhatarkuarhini astaka maiamuntapiringa iámindu eska xáni kánguenga”. Ka, ístu, no sési úkuaspti máteru jántspiriichani engaksï exeni japka ambe úkuarhini japka. Jesúsi uandaspti: “Engaksï na exepka máteru jántspiriicha, kánikuaksï uandanhiaspti” (Mat. 18:30, 31). Májkueni, ambe engachi jucha újka, ístu uaati no sési úkuani máteruechani. Engajtsïni nema no sési kámaska ka juchachi no tekaakuntani, ¿ambe uaa úkuarhini? Orheta, no sésichi úkusïnga imani jimbokachi no tekaakuntasïnga ka nóchi xarhatakusïnga eskachi xénchasïnga, ka asta niáranchi jamberi nóteru uandajpania. Ka ístu, no sésichi úkuasïnga erachiichani kúnguarhikuarhu jimbokaksï ima no sési pʼikuarheraaka engaksï exeaka eskachi jucha no úsïnga sési pájperani imani jingoni engajtsïni no sési úchika. w21.06 22 párr. 11, 12

Kʼuiripuechachi ísï kueraanhaska eska Tata Diosï na jásïika, joperu Satanási úsïndi eskachi no sési jásï ambe niátaaka. Noéri jurhiatikuecha jimbo, enga “Tata Diosï Jeoba exepkia eska kʼuiripuecheri no sési úkuecha kánikuespkaksïa”, “no sési pʼikuarheraspti enga kueraapka kʼuiripuni ka kómu pʼikuarheraspti imeeri mintsitarhu” (Gén. 6:5, 6, nota, 11). Ka iásï, ¿parhakpinirhu sánderu sési jarhaskia desde jiáni uératini? Nómbe. Noambakiti kánikua tsitisïndi enga iásï sánderu ikichakueni jásï ambe niátanhajkia, kómu enga tataka ma ísku jándikua ambe niátajka máteru tataka jingoni, nanaka máteru nanaka jingoni, o nanaka ma tataka ma jingoni (Efes. 4:18, 19). Ka sánderu tsípisïndi enga Tata Diosï Jeobaeri marhuari ma pekadu ma újka. Noambakitiiri juramukua jimbo, aparte de enga “kʼuiripu juramukuni jaka máteru kʼuiripuni solu para no sési ambe úkuni”, ístu no kuidarixati Echerini ni animaliichani, ísï eska Tata Diosï Jeoba na uékeenga eska úpiringa (Ecl. 8:9; Gén. 1:28). Ísï jimbo, máru inbestigadorichaksï uandasïndi eska sánderu orhepatini kʼuiripu uaaka eska ma miioni plantecha ka animaliicha nóteru jauakia. w21.07 12 párr. 13, 14

Máru Tata Diosïiri marhuariichaksï kánikua no sési pʼikuarherasïndi no sési jásï ambe jimbo engaksï ióntki úpka. Imeecheri mintsita no sési pʼikuastaasïndi ka eratsetaraasïndi eska nájkirukaksï jánguarhintaaka móantani, eska Tata Diosï Jeoba no méni puákuantauaka. Engajtsï chá ísï pʼikuarherajka, kánikuaksïni marhuacheati kurhanguni eskaksïni Tata Diosï Jeoba uékaxaka xarhatacheni ambakiti uékperakua parajtsï úni kánikua tsípikua jingoni marhuakuni ka ambakiti konsiensia ma jingoni. ¿Andi? Jimboka “iurhiri Jesukristueri enga jindeeka [Tata] Diosïiri Uájpa pʼikurhiantasïn[ga]jtsïni iámindu pekaduechani” (1 Juanu 1:7). Engachi kómu pʼikuarherani jaka ambe ma jimbo engachi no újka sési úni, ju je miántani eskajtsïni Tata Diosï Jeoba uékaxaka puáchentani, iáminduechani engachi móantajka juchaari pekaduecheeri. Ju je exeni na enga salmista Dabidi terukutantapka ambakiti uékperakuani, puátsperantskua jingoni. Karaspti: “Ísï eska na xáni iauani jaka auanda echerirhu uératini, ísï xáni kʼériisti Tata Diosïiri ambakiti uékperakua imeecha jimbo engaksï janhanharhijka. Ísï eska na xáni iauani jaka nani enga uérajka jurhiata asta nani enga inchajtsïkujka, xáni iauani peeraasti juchaari pekaduechani” (Sal. 103:11, 12). w21.11 5, 6 párr. 12, 13

Acheetiicha engaksï kristianueka jatsistiksï para sési kaani ka janhanharhiani témbeechani (1 Ped. 3:7). ¿Nénaksï uaa ísï úni? Engaksï xarhatakuaska eskaksï jukaparharaasïnga, engaksï no kurhakuaska sánderu ambe ka eska xántku imeecha uaaka úni ka ístu engaksï no terukutaantaska máteru uarhiitiicha jingoni. ¿Andisï no sési japirini ísï úni? Ju je exeni ambe enga nitamakuarhika pirenchi ma enga Rosa arhinhajka. Imeeri uámba enga no Testigueka pʼindesti terukutantani máteru uarhiitiicha jingoni. No sési pʼikuastasïndi Rosani ambe enga uámba arhijka, peru ístu i ambe ústi eska Rosa iásï nóteru seguru jauakia eska nema meru xénchasïnga. Ima uandasïndi: “Uétarhinchasïnga eskajtsïni miátantani jauaka eskarini Tata Diosï Jeoba jukaparharasïnga”. Joperu ima acheetiicha engaksï kristianueka, sésiksï kaasïndi témbeechani jimbokaksï míteska eskaksï ísï uaaka sési pájperani tsimarhani ka ístu Tata Diosï Jeoba jingoni. Acheetiicha engaksï sési kaajka témbeechani, sési ambeksï uandasïndi imeecheri ambe, arhiasïndiksï eskaksï xénchaasïnga ka felisitariuasïndiksï. w21.07 22 párr. 7, 8

¿Nénachi pʼikuarherapirini engachi erokuarhini japiringa ambe ma engajtsïni nema axacheka, ambe ma engachi kánikua uétarhinchajka, joperu enga ióndani jaka janoni? ¿Nénachi pʼikuarherapirini? Jamberichi uandanhiapiringa. Joperu engachi kuenta íntskukuarhepiringa eska no janoxaka ambe ma jimbo enga kánikua jukaparhakueka, jiájkani tekaantskua jingonchi erokuarhipiringa. Proverbios 13:11 jimbo, jarhasti ejemplu ma enga xarhatajka andisï xáni jukaparhakue tekaantstini. Jimini uandasïndi: “Jatsikuarhekua ambe enga ma sóntku tánajka, kʼamakurhisïndi, joperu ima ambe enga ma sánhani arhijka tánani kánikuaksï úkuarhiati”. ¿Ambechi jorhenguarhisïni ini karakata jingoni? Eska sánderu sésiska sánhani arhini úni ambe ma, tekaantskua jingoni. Proverbios 4:18 arhisïndijtsïni eska “jurhimbitiicheeri xanharu” ísïiska “komueska enga jurhiata andarani jarhajka ka sánhani arhini uinhanharhini astaka sési erandeaka”. I uandakuechajtsïni sési xarhatachesïndi eska Tata Diosï Jeoba, sánhani arhisïnga jorhendani imeeri iretani ambe enga eratseni jaka úni. Joperu ístu, i bersikulu úpirindi úrakuarheni para xarhatani na enga kristianu ma sánhani arhijka mójtakurhini. I ambe jatsisti para sánhani arhini úkuarhini, no uaati mátirku úkuarhini. w21.08 8 párr. 1, 3, 4

I parhakpini no ióndani kʼamajkunhaati ka kánikuachi ánchikuarhita jatsiska para úni (Mat. 24:14; Luk. 10:2; 1 Ped. 5:2). Iáminduechachi uékasïnga marhuakuni Tata Diosï Jeobani xáni eskachi xáni uaaka. Uánikuechaksï sánderu marhuakuxatiia. Máruksï uékasïndi prekursoriini, máteruechaksï Beteli uékasïndi marhuani o konstruksionirhu jarhuajpeni para kʼumanchikuechani uaani engaksï jindeeka para Tata Diosï Jeobani kómarhini ka uánikua erachiichaksï jánguarhintaxati para jindeeni orhejtsïkutiiri jarhuajpiriicha o orhejtsïkutiicha (1 Tim. 3:1, 8). Seguruchi jarhaska eska Tata Diosï Jeoba tsípisïnga exeni engaksï imeeri marhuariicha uéjka jarhuajpeni (Sal. 110:3). Joperu, ¿chkétakukuarhitixakichi jimbokachi no úxaka úni ambe engachi uéjka? Enga ísïika, ju je aiangukuarhini Tata Diosï Jeobani na engachi pʼikuarherajka (Sal. 37:5-7). Ju je uandontskuarheni erachi ma jingoni enga ióni páni jakaia sési marhuakuni Tata Diosïni ka eskajtsïni arhiaka ambe engachi uaaka sánderu sési úni ka jánguarhintani imani ambe úni engajtsïni arhiaka. Engachi ísï úska, jamberichi niáraaka imani ambe úni engachi eratsekata jatsika. w21.08 20 párr. 1; 21 párr. 4

Uandakua pári ma enga Ana arhinheenga, méntkisï templurhu jarhasïreendi. Tata Diosï Jeoba kóndentaspti jimboka méntkisï sési marhuakusïreenga ka jurajkuspti eska exepiringa Jesúsini enga sapichuepka (Luk. 2:36-38). Iásï, uánikua erachiicha engaksï jatiriikia, ambakiti ejempluksï máesti para tumbiicha. Kánikuajtsïni marhuacheati engachi arhutaska tiempu parachi kurhamarhiani néna engaksï xáni tsípikua jingoni marhuakia kúnguarhikuarhu ka kurhaani ambe engajtsïni aianguaka. Juchaari erachiicha engaksï jatiriikia, jukaparhakua ambeestiksï Jeobaeri kúnguarhikuarhu. Exestiksï néna enga Tata Diosï Jeoba újchakuraaka imeechani ka imeeri kúnguarhikuani. Mámaru ambeksï jorhenguarhisti engaksï máru ambe niáraka no sési úni. Ísï jimbo, imajtsïni uaati kánikua jánhaskakua jingoni arhini ambe ma ka jorhendani ambe engaksï ima xáni jorhenguarhikia (Prov. 18:4). Engachi arhutaska tiempu parachi míteani erachiichani, sánderuchi mintsikaaka Tata Diosïni. w21.09 3 párr. 4; 4 párr. 7, 8; 5 párr. 11, 13

Tata Diosïiri ireta úrasïndi ambe engaksï jorhenaka úni paraka sánderu aianhpinhaaka. Isaíasi uandaspti eska inde ambe ísïiska eska “ireteecheeri lechi” (Is. 60:5, 16). Kʼuiripuecheri jarhuajperata jimbo engaksï inchani jaka Tata Diosïiri iretarhu ka engaksï uánikua ambe jorhenaka úni, aianhpinhaxanhati 240 paisiicha ka territoriuecha jimbo ka jukari 1,000 idiomecha jimboksï únhaxati publikasionicha. Iásï enga kʼamarani jakaia i tiempu, ka engaksï iámu ireteecha uaratanhani jaka, úxati eskaksï kʼuiripuecha erakuaka sinksï apoiariua Tata Diosïiri Reinuni oksï parhakpini anapu juramutiichani mintsinharhiaua. Nájkirukaksï Jeobaeri marhuariicha ísï újka eskaksï paisiiri anapu juramukuecha na uandajka jima engaksï irekaka, nóksï jámasïndi politikarhisï inchamukuni (Rom. 13:1-7). Mítestiksï eska Tata Diosïiri Juramukuajkusï uaaka eskaksï kʼuiripuecha nóteru ambe ma jimbo uandanhiauakia ka i Juramukua no i parhakpini anapuesti (Juanu 18:36, 37). w21.09 17, 18 párr. 13, 14

Enga nema engajtsï kánikua uékajka jurajkujka Tata Diosï Jeobani, kánikua jukaparhakuesti eskajtsï seguiriuaka uinhaperantani chaari pájperakua Tata Diosï Jeoba jingoni ka chaari familia jingoni. ¿Nénajtsï uaa i ambe úni? Ma ambe engaksïni jarhuataaka parajtsï sánderu mintsinharhini Tata Diosïni, jindeesti pauani pauani arhintani Bibliani ka eratsentani ambe enga ima uandajka, ístu no kueratani tánguarhikuechani. Ju je eratsentani Joannaeri ejempluni. Imeeri taati ka imeeri jingonikua jémba, jurajkusptiksï Tata Diosï Jeobani, ima uandasïndi: “Engani arhintajka máru kʼuiripuecheri enga Biblia uandajka komueska Abigaíli, Esteri, Jobu, José ka Jesúsi, sési pʼikuarherasïnga. Ambe engaksï ima úka, úsïndi eska juchiiti mintsita ka juchiiti eratsekua ambakiti ambe eratseni jauaka ka nóteruni xáni no sési pʼikuarherasïngia. Engajtsï no sési pʼikuarherani jauaka, kómarhi je Tata Diosï Jeobani. Kurhaku je eskaksïni jarhuataaka ísï exeni ambe ma eska ima na exejka, eskaksïni jánhaskakua íntskuaka ka eskaksïni arhiaka ambe úni (Sal. 32:6-8). Jamberi kánikuajtsï no sési pʼikuarheraaka engajtsï aiangukuarhini jauaka, peru Tata Diosï Jeobaksïni sési kurhanguchisïndi. Imaksïni pʼímarhisïndi parajtsï imani jingoni uénhekuarhini (Éx. 34:6; Sal. 62:7). w21.09 28 párr. 9, 10

Enga na nitamapkia kʼuínchikua Paskueri uéxurhini 32 jimbo, apostoli Pedru, Santiagu ka Juanu, exesptiksï jánhaskakua ma enga ísku pakataapka. Kʼéri juáta ma jimbo, jimeesïsï enga juáta Ermoni jaka, Jesúsi ménderueni jáxentaspti imeechani japarini. Biblia uandantasïndi: “Tʼíntskua jukanharhispti eska jurhiakua, ka xukuparhakua tʼuputʼupusïntaspti méntku eska tʼíntskua” (Mat. 17:1-4). Apostoliichaksï kurhaaspti Tata Diosïni uandani: “I jindeesti juchiiti uátsï engani ji xáni uékajka ka engani jimbo tsípikuarhijka, kurhajcha je”. Na engaksï irekapka i apostoliicha xarhatasptiksï eskaksï meru kurhajchasïreenga Jesúsini ka juchachi májkueni uékasïnga úni. Kánikuachi agradesidu jarhaska Tata Diosï Jeobani jingoni engajtsïni uékperakua jingoni arhistachijka Jesúsini úraparini, enga jindeeka juramuti jakajkutiicheeri (Efes. 5:23). Májkueni eska Pedru, Santiagu ka Juanu, ju je jingontku kurhajchani Jesúsini. Engachi seguiriska ísï úni, uánikua kóntperatechanchi jatsiauaka iásï ka tsípikua jingonchi irekaaka para méntkisï. w21.12 22 párr. 1; 27 párr. 19

Korintu anapu kristianu ma, ísku jándikua ambe úxapti jimboka irekaxapka taati jémbeeri témba jingoni. Apostoli Pablu arhispti Korintu anapu kúnguarhikuani eskaksï petantapiringa kúnguarhikuarhu. Ísku jándikua ambe enga i kʼuiripu úni japka no sési úkuxapti kúnguarhikuani. Máruksï jamberi niárasïreendi eratseni eska no xáni no sési jarhaspka i ambe enga i kʼuiripu úni japka (1 Kor. 5:1, 2, 13). Sánisï tátsekua Pablu mítespti eska ima kʼuiripu meru móantaspkia. Pablu arhiaspti orhejtsïkutiichani: “Jatsiskajtsïa [para] mejori puákuntani ka mintsita jatsikuntani”. Ka arhiaspti andiksïsï jatsipi para ísï úni: “Paraka no jukari uandanhiauaka”. Pablu pʼamojkuspti ini acheetini enga meru móantapkia. Pablu no uékasïreendi eska i xáni no sési pʼikuarherapiringa imani ambe jimbo enga úpka enga nóteru jánguarhintapiringia Tata Diosï Jeobaeri jarhuajperatani jirinhani (2 Kor. 2:5-8, 11). Ísï eska Tata Diosï Jeoba na újka, orhejtsïkutiichajtuksï tsitisïndi pʼamojperakua xarhatatspeni. Jiáni enga uétarhiaka, uinhamuksï jurhimberantasïndi nemani, peruksï pʼamojperakua xarhatasïndi jiáni enga jauaka ambe ma engaksï jimbo uaaka ísï úni. Engaksï no jurhimberantapiringa no sési úrini, nóksï pʼamojperata xarhatani japirindi, sánderu sési, jurajkuni japirindiksï pekadoriini eska uaaka ambe enga ima uékaaka. w21.10 11, 12 párr. 12-15

No sési pʼikuarhenhini ísïisti eska atakuarhini: ménichanisï sántkuesïindi ka ménichanisï kániini. Úpiringachi sántku uarhojkuni engachi sobreni ma mítani japiringa. Jamberi ueenani jámani kánikua pʼamepirindi, joperu no ióni jimbo, ambajkurhantanchia ka nóteruchi jamberi miáni nanichisï uarhojkupi. Májkueni, juchaari amigu ma úpirindi úni o uandani ambe ma engajtsïni no sési pʼikuastapiringa ka jamberichi no xáni úkua jukanchapiringa puákuntani. Joperu engachi kánikua uarojkupiringa, jamberi doktorijtsïni jatsipirindi para sïrimachintani ka irijkuni. Engachi méntku pʼajkuni japiringa ka pʼenomani, nóchi jurajkuni japiringa eska nimaaka. Sáno májkueni ambe úpirindi úni ima enga kánikua ikiani japiringa. Enga méntku miáni japiringa ambe enga úminhaka ka na enga xáni no sési pʼikuarherapka, jandiajku no sési úkuarhini japirindi. Ísï jimbo, sánderu sésisti úni ambe enga arhijka iásï anapu tekstu. w21.12 12 párr. 15

Ju je eranhaskani eska orhejtsïkuti ma uandanhiasïnga na enga mórhekuarhijka erachi ma. Úpirindi eratsentani: “¿Úxaki ambe ma enga Biblia uandajka eska no sési jarhaska?”. Jimboka no uékasïnga úni ambe enga ima eratsejka, úpirindi kurhamarhini máteru orhejtsïkutini o máteru erachini enga sési marhuakuni jaka Tata Diosïni. Uaatiksï májku kʼéri exeni ambe enga uandapka Pablu xukuparhakueri ambe (1 Tim. 2:9, 10). Pablu no meru uandaspti ambe engachi uaaka úni ka ambe nómbe. Sánderu sési, íntspiaspti máru konsejuechani engajtsïni jarhuatajka parachi sési xukuparhani, kaxumbikua jingoni ka ambakiti eratsekua jingoni. Ima mítespti eskaksï kristianuecha úpiringa erakuni néna xukuparhani joperu eska terukuntapiringa imani ambe jingoni enga Biblia uandajka. Orhejtsïkutiichaksï jatsisti para exeni sini ima erachi o pirenchi kaxumbikua ka ambakiti eratsekua jingoni jámasïnga. Jatsiskachi para miáni eskaksï tsimani erachiicha engaksï sési marhuakuni jaka Tata Diosïni, uaakaksï táchani jásï erakuni ambe ma. Peru inde ambe no arhikuekasïndi eska ma sési jarhaska ka máteru nómbe. Ísï jimbo, nóchi jatsiska para arhiani máteruechani ambe engachi jucha eratsejka eska sési jarhaska ka ambe nómbe. w22.02 16 párr. 9, 10

Ambakiti ambe jarhasti engachi jimbo jatsika para ambakiti uékperakua jingoni kámberani iáminduecha. Pori ejemplu, Bibliarhuksï jarhasti máru ejempluecha proberbiuecheeri engaksï arhijka: “Eskakeni ambakiti uékperakua ka jurhimbikua no jurajkuaka [...]; jiájkani Tata Diosï ka kʼuiripuechaksïni jaiapanhentaati ka mítekateuakari eskari kánikua jánhastiiska”; “ima kʼuiripu enga sési kámpijka ima mismu marhuanchasïndi” ka “ima enga jánguarhintajka jurhimbikua jingoni jámani ka ambakiti uékperakua jingoni, exentaati tsípikua” (Prov. 3:3, 4; 11:17, nota; 21:21). I proberbiuechaksï tanimu ambe uandasïndi engachi jimbo jatsika para ambakiti uékperakua xarhatatsperani. Orheta, jimboka úsïnga eskajtsïni Tata Diosï jukaparharaaka. Tsimani úni jámani, jimbokachi jucha mismu marhuanchasïnga. Pori ejemplu, jarhuatasïndijtsïni parachi sési pájperani máteruecha jingoni. Ka tanimu úni jámani, engachi ambakiti uékperakua jingoni kámpiska, jatsiauakachi kóntperatechani sánderu orhepani, komu irekani para méntkisï. Jiájkani ambakiti ambe jarhasti engachi jimbo jatsika para kurhajchani ini juramukuani engajtsïni Tata Diosï Jeoba íntskuka: “Ambakiti uékperakua jingoni kámbera je ka pʼamojperakua jingoni”. w21.11 8 párr. 1, 2

Asï chkétakuarhi je engajtsï exeska eska tsʼéjkukua ma jimbo engajtsï ióntki jatsipka o engajtsï iásï jatsini jaka, xarhatacheska eskajtsï uétarhinchasïnga sánderu mintsikani Tata Diosïni. Ísï exe je eska ambe ma engaksïni jarhuataaka parajtsï sánderu mintsikani. Mintsita jingoni kómarhi je Tata Diosï Jeobani ka sánderu jiáni engajtsï no sési nitamakuarhini jauaka. Ka jiókuarhi je jarhuajperata engaksïni Tata Diosï Jeoba íntskuaka úraparini chaari familiani o erachiichani. Engajtsï jurajkuska eskaksïni Tata Diosï Jeoba jarhuataaka parajtsï orhepani uérakuani uandanhiateechani, sánderujtsï mintsikaaka eskaksïni jarhuataaka sánderu orhepatini. Jesúsi uandaspti máru ambe nani engaksï imeeri chúxapatiicha jatsipka para sánderu mintsikani Tata Diosïni, joperu seguru jarhaspti eska Tata Diosï Jeobaeri jarhuajperata jimbo, úpiringaksï orhepani uérakuani uandanhiateechani engaksï jatsiapiringa (Juan 14:1, TNM; 16:33). Ístu seguru jarhaspti eskaksï japiringa uánikua kʼuiripuecha engaksï tsípiti pakarapiringa kʼéri mískuarhitarhu, jimbokaksï mintsikapiringa Tata Diosïni (Jaŋ. 7:9, 14). Chájtsï uaaka jima jarhani ini xáni uánikua kʼuiripuecha jingoni engajtsï jánguarhintaska sánderu mintsikani (Heb. 10:39, TNM). w21.11 25 párr. 18, 19

Juchachi no erokuarhisïnga eskajtsïni Tata Diosï Jeoba pʼímutaantaaka milagru ma jimbo. Joperu ambe engachi kʼóru míteka, jindeesti eska iámindu imeecha engaksï mintsikajka Tata Diosïni, nájkirukaksï niáraaka uarhini ima tsítantauati parakaksï uaaka irekani para méntkisï. No ióni jimbo, xarharaati na engachi xáni mintsinharhijka eskajtsïni Tata Diosï Jeoba uaaka kuájchakuni. Jiáni engaksï juramutiicha engaksï jindeuaka Gog de Magog kúnguarhintaaka parajtsïni no sési úchini, jamberichi eratseaka eskajtsïni uándikuaka. Ísï jimbo, jatsiakachi para seguru jarhani eskajtsïni Tata Diosï Jeoba uaaka pʼímutantani ka eska meru ísï uaaka. Para juramutiicha, ísïiuakachi komueska karichicha engaksï no újka kuájpikuarhini ka engaksï no nemani jatsijka enga kuájpiauaka (Ezeq. 38:10-12). Ísïjtsïni exeati enajkichi no uaa kuájpikuarhini jimbokachi no kaasïnga armeechani ka nichi jorhenani uarhipeni. Imaksï no exeati eskaksï ánjeliicha listu jauaka parajtsïni kuájpini jimbokaksï imeecha no mintsikasïnga Tata Diosïni ísï eskachi jucha na mintsikajka. ¡Ískuksï pakaraati engaksï Tata Diosï Jeobaeri ánjeliicha juuaka parajtsïni kuájpini! (Jan. 19:11, 14, 15). w22.01 6 párr. 12, 13

Enga Tata Diosï Jeoba xáni jukaparharaajka juchaari erachiichani juchajtuchi jatsiska para ísï úni. Jatsiskachi para jánguarhintani ambe uéjki úni parachi kuájchakuani juchaari erachiichani. Engachi kuenta íntskukuarhiska eskachi no sési pʼikuastaska erachini ma, nóchi jatsiska para eratseni eska jukari sóntku no sési exesïnga ambe ma ka eska jatsiska para mirikurhini. ¿Ambe úpirini úni eskaksï máru sóntku no sési exeaka ambe ma? Ménisï jindeesïndi na engaksï tʼarhexeranhaka ka jimbokaksï menusi pʼikuarherasïnga eska máteruecha. O ménisï, jindeesïndi jimbokaksï no kánikua ióni páxaka jorhenguarhini Biblieri ambe ka nóksï kurhangusïndi útasï eskachi no perfektueska. No arhiparini ambe enga jimboeuaka, jatsiskachi para jánguarhintani sési peentani ambe ma. Ístu, enga nema jukari sóntku no sési exejka ambe ma, jatsisti para jiókuarhini eska no sési jarhaska ka eska jatsiska para mójtakurhini. Kánikua jukaparhakuesti eska ísï uaaka para ima sési jarhani ka ístu máteruecha. w21.06 21 párr. 7

Jesúsi kurhangusïndi na engajtsï pʼikuarherajka. Engachi uandanhiani jarhajka, sésichi pʼikuarherasïnga amiguni ma jatsini engajtsïni kurhanguchiaka ka sánderia enga imajtu májkueni ambe nitamanchaka eska jucha. Jesúsi inde jásï amiguesti, jimboka ima míteska na enga pʼikuarherakuarhijka enga ma chkétakuarhitini jarhajka ka enga uétarhinchani jarhajka eska nema jarhuataaka. Ístu, mítesti na engachi úkata jaka ka uaati eskachi jarhuatanhaaka imani tiempu jimbo engachi uétarhinchaaka (Ebr. 4:15, 16). Májkueni eska Jesúsi na jurajkupka eska ánjeli ma jarhuatapiringa jardini de Jetsemaníirhu, juchajtuchi jatsiska para jurajkuni eskajtsïni Tata Diosï Jeoba jarhuataaka publikasioni ma jimbo, bideu ma jimbo, diskursuni ma jimbo o engajtsïni orhejtsïkuti ma o amigu ma pʼorhembiaka parajtsïni uinhaperantani (Luk. 22:39-44). Tata Diosï Jeobaksïni íntskuati imeeri pínandikua ka uinhaperantaatiksïni. Engachi kómarhijka, intsïnhasïngachi Tata “Diosïiri pínandikua enga no nema újka jánhaskani” (Filip. 4:6, 7). w22.01 18, 19 párr. 17-19

Tata Diosï Jeoba méntkisï sési úsïndi ambe ma. Peruchi úpiringa no xáni mintsikani imeechani enga ima erakuaka parajtsïni orhejtsïkuni ixú Echerirhu. Jamberichi eratsejka sinksï úxaki ambe ma eska Tata Diosï Jeoba na uéjka o ísï eska imeecha na uékajka. Nóchi uaaka uandani eskachi mintsikasïnga Tata Diosï Jeobani engachi no mintsikaaska imeechani enga ima úraajka parajtsïni orhejtsïkuni. Iásï, Tata Diosï Jeoba úrasïndi jántspirini “enga mintsinharhikueka” ka jánhastiini para orhejtsïkuni imeeri kúnguarhikuani ixú Echerirhu (Mat. 24:45). Májkueni eska primeru siglurhu anapu grupu enga orhejtsïkuenga iámindu kúnguarhikuechani, i jántspiri orhejtsïkuxati aianhperakuani ka arhiasïndi kúnguarhikuarhu anapu orhejtsïkutiichani ambe engaksï jatsika para úni. Ka orhejtsïkutiichaksï jánguarhintasïndi parakaksï kúnguarhikuecha ísï uaaka eskaksï na arhinhaka. Engachi ísï uaaka eskajtsïni Tata Diosïiri kúnguarhikua na arhijka ka ístu orhejtsïkutiicha, xarhatani jauakachi eskachi mintsikasïnga eska na enga Tata Diosï Jeoba újka ambe ma, sési jarhasïnga. w22.02 4 párr. 7, 8

¡Xáni engachi sési pʼikuarherajka Jeobaeri testigueni! Kánikuachi sési pʼikuarherasïnga jarhuatani nemani enga uékajka “tsípikua para méntkisï jatsini” para úni marhuakuni Tata Diosï Jeobani (Hech. 13:48, TNM). Ísïchi pʼikuarherasïnga eska Jesúsi enga “meru tsípini pʼikuarherapka espiritu santu jimbo” enga imeeri chúxapatiicha kʼuanhatsentapka jiáni engaksï nípka aianhpini ka engaksï aiangupka na enga xáni sési nikuapka (Luk. 10:1, 17, 21). Apostoli Pablu i ambe arhispti Timoteoni: “Jatsi kuidadu para tʼujkumindu ka ístu para inde ambe engari jorhentpijka”. Ka ístu arhispti: “Engari ísï úska, tʼuri mismu pʼimutanskateuaka ka ístu imeecha engaksïni kurhajchaaka” (1 Tim. 4:16). I uandakuechaksï xarhatasïndi eska aianhpikua jimbo, kʼuiripuechaksï uaaka tsípikua jatsini. Jánguarhintasïngachi méntkisï sési jámani jimbokachi Tata Diosïiri Reinurhu anapueska. Méntkisïchi uékasïnga eska juchaari jángua kʼéri ambe arhiaka Tata Diosï Jeobani ka eska xarhataaka eskachi jakajkusïnga ambakiti ambe engachi aianhpijka (Filip. 1:27). Ka jingontkuchi exesïnga imani ambe engachi jorhentpijka jimbochisï sési prepararikuarhijka parachi nirani aianhpini ka jimbochisï kurhakujka Tata Diosï Jeobani eskajtsïni jarhuataaka parachi úni aianguani máteruechani imeeri ambe. w21.10 24 párr. 1, 2

Nema enga jimbanhi kʼuiripu máejkia, ísï eratsesïndi ka ísï jámasïndi eska Tata Diosï Jeoba. Ka úsïngachi jimbanhi kʼuiripu máeni jimbokachi jurajkusïnga eskajtsïni Tata Diosïiri espiritu santu jarhuataaka; espiritu santu jimbo juchachi úsïnga ambakiti ambe eratseni, sési pʼikuarherani ka ístu ambakiti ambe úni. Pori ejemplu, kʼuiripu ma enga mójtakukuarhijkia, xénchasïndi Tata Diosï Jeobani ka imeeri marhuariichani (Mat. 22:36-39). Ka sési pʼikuarherasïndi nájkiruka no sési nitamakuarhini jauaka (Sant. 1:2-4). Úsïndi eskaksï iáminduecha sési pájperaaka (Mat. 5:9). Tekaantskua jingoni jámasïndi ka sési kaasïndi máteruechani (Col. 3:13, TNM). Tsitisïndi ambakiti ambe úni (Luk. 6:35). Imeeri jángua jingoni xarhatasïndi eska mintsikasïnga imeeri Taati auandarhu anapuni (Sant. 2:18). No sóntku ikiasïndi enga no sési kánhajka (Titu 3:2). Ka úsïndi pʼíngukuarhini enga tsʼéjkukuechani jatsiajka (1 Kor. 9:25, 27; Tito 3:2). Parachi jimbanhi kʼuiripu máeni, jatsiskachi para xarhataani imani kualidadichani engaksï Galasia 5:22, 23 jimbo jaka ka máteru kualidadichani enga ístu Biblia uandaajka. w22.03 8, 9 párr. 3, 4

Orhejtsïkutiichaksï uaati májkueni úni eska apostoli Pablu engaksï no solu kʼumanchikuecharhu aianhpiaka, sino nani uéjkisï engaksï jámani jauaka (Efes. 6:14, 15). Ka májkueni eska Pablu, orhejtsïkutiichaksï uaati jorhendaani máteruechani engaksï imeecha jingoni aianhpini jámani jauaka, komu orhejtsïkutiicheri jarhuajpiriichani ka ísïksï sési úrani jauati imeecheeri tiempuni (1 Ped. 5:1, 2). Joperu orhejtsïkutiichaksï no méni jatsipirindi para jukari okupadu jarhani engaksï jamberi nóteru pakaranchapiringia tiempu para aianhpini (Mat. 28:19, 20). Ménichantsï úpiringa no jiókuarhiani máru ánchikuarhita ambe engajtsï uéjka tiempu jatsini para máteru ambe úni. Jamberi engajtsï na kómarhiakia, úpiringajtsï exeni eska engajtsï jiókuarhiska ánchikuarhita ma, nóterujtsï úpiringia imani ambe enga sánderu jukaparhakueka, komu familieri jorhenguarhikua jatsini, uérani aianhpini máteruecha jingoni o jarhuataani chaari uájpeechani sési aianhpini. Uaakajtsï seguru jarhani eska Tata Diosï kurhangusïnga eskajtsï jimbosï ísï úni jaka jimbokajtsï uékasïnga iámu ambe sési úni. w22.03 27 párr. 4, 7; 28 párr. 8

Engachi miántajka jiáni engachi Biblieri ambe jorhenguarhini japka, ¿chésïrenchi Jeobaeri testigu úkuarhini? Jamberichi eratseenga eskachi no méni úpiringa kʼumanchikuecharhu aianhpini. O jamberichi cheenga engajtsïni juchaari familia o amiguecha niárapiringa no sési kámani. Enga ísïika, uaakachi kurhangukuni juchaari jorhenguarhirini jiáni enga imajtu májkueni pʼikuarheraaka. Jesúsi uandaspti eskaksï máru kʼuiripuecha niárapiringa ísï pʼikuarherani, joperu arhiaspti imeeri chúxapatiichani eskaksï no chépiringa marhuakuni Tata Diosï Jeobani (Mat. 10:16, 17, 27). Ju je sánhani arini arhistakuni Biblieri jorhenguarhirini paraka ima uaaka aianguani máteruechani ambe enga jorhenguarhini jaka. Seguru eskaksï Jesúsiiri chúxapatiicha chépka enga ima axaapka paraksï nirani aianhpini. Joperu ima jarhuataaspti enga arhiapka neechanksï aianguapirini ka ambe engaksï uandapiringa (Mat. 10:5-7). ¿Nénachi uaa májkueni úni eska Jesúsi? Engachi jarhuataska jorhenguarhirini exeni neechani uaa aianguani. Uaakachi kurhamarhini sini míti nemani enga marhuakuaka ambe ma enga Biblia jorhentpijka. Tátsekua, ju je jarhuatani jorhenguarhirini paraka uaaka sési aianguni kʼuiripuni indeeri ambe. w21.06 6 párr. 15, 16

Máru kʼuiripuecha engaksï tsípiti pakarapka jiáni enga Nepal uinhamu jenchepka 2015 jimbo, ari ambeksï uandaspti: “Sóntkuksï xerekuarhentaspti tiendeecha ka ióntki anapu kʼérati kʼumanchikuecha”. “Kʼuiripuechaksï kánikua chéxapti [...]. Uánikuechaksï uandaspti eska tsimani minutujkusï jenchepka, joperu para ji, ióni jenchespti”. Iásï úkuarhixati ambe ma enga ísïika komueska jencheni jarhani ka iámu ireteecharhisï úkuarhixati. Profeta Ageo ari ambe uandaspti: I ambeesti enga “uandajka Tata Diosï Jeoba enga orhekupaajka ejersituechani: ‘Ménderu —no ióni jimbo— uarataaka auandani ka echerini’” (Ageo 2:6). Enga Ageo uandajka eskaksï uaratanhaaka iámu ireteecha, arhikuekasïndi eska ambakiti ambe jauaka ka no ísï eska enga jenchejka ka enga iámindu ambe xerentajka. Tata Diosï Jeoba mismu uandaspti: “Uaratauaka iámindu ireteechani ka jukaparhakua ambe enga iámu ireteecharhu jaka inchaati ini kʼumanchikuarhu ka ji uaaka eska kánikua kʼéri ambeuaka”. w21.09 14 párr. 1-3

Engachi ueenajka amigu úkuarhini nemeeri, somenchi uandontskuarhesïnga imani jingoni ka aiangukuarhisïngachi ambe ma. Májkueniisti para Tata Jeobani jingoni. Engachi aiangukuarhijka na engachi pʼikuarhinhejka ka na engachi eratsejka ka ambe engajtsïni uandanhiatajka, xarhatasïngachi eskachi mintsikasïnga imani ka eskachi mítesïnga eskajtsïni xénchasïnga (Sal. 94:17-19; 1 Juanu 5:14, 15). Juchaari erachiichani jingoni jarhani, intsïmperata máesti Tata Jeobaeri (Sant. 1:17). Juchaari Taati auandarhu anapu xarhatasïndi eska pendienti pásïnga juchantsïni jimbo, jimbokajtsïni íntskuska erachiichani ka pirenchichani enga ísïika eska juchaari familia engajtsïni méntkisï xénchani jarhajka (Prov. 17:17). Enga apostoli Pablu Kolosasi anapuechani karakuapka, uandaaspti máru kristianuechani engaksï uinhaperantapka ka sési pʼikuastantani (Kol. 4:10, 11). Tata Jesukristu niáraspti uétarhinchani jarhuajperata ka kánikua jukaparharaspti ka agradeserini engaksï imeeri amigu jémbeecha jarhuatapka, komu ánjeliicha ka kʼuiripuecha (Luk. 22:43). Aiangukuarhini erachini ma ambe engajtsïni uandanhiatajka no arhikuekasïndi eskachi debiliiska. Sánderu sési, kuájchakukua máesïndi. w21.04 24, 25 párr. 14-16

¿Ambechi uaa enga erachi ma úska ambe ma engajtsïni kánikua no sési pʼikuastajka juchantsïni? Enga ísï úkuarhiaka, ju je jánguarhintani parachi seguiriini sési pájperani. Kómarhiakachi Tata Diosï Jeobani ka aiangukuarhiakachi na engachi pʼikuarherajka. Kurhakuakachi eska újchakuraaka imani engajtsïni no sési pʼikuastajka ka eskajtsïni jarhuataaka parachi imani ambakiti ambe exekuni enga Jeoba exekuka ka enga jimbo jukaparharajka (Luk. 6:28). Engachi no úska tekaakuntani, ju je eratsentani nénachi uaa sési uandontskuarheni imani jingoni. Méntkisï sánderu sésisti eratseni eska no uékaska merujtsïni no sési pʼikuastani (Mat. 5:23, 24). Engachi uandontskuarheni jauaka imani jingoni, ju je eratsentani eskajtsïni no meru uékaska no sési pʼikuastani. Peru ¿enga no uékaskia sési pájperantani juchantsïni jingoni? Bibliajtsïni arhisïndi: “Tekaatsperanta je ka puátsperantani”. Ju je no eratseni eskachi nóteru uaakia úni ambe ma (Kol. 3:13). Ka sánderu jukaparhakua ambe, ju je no jatanhekuni, jimboka i ambe úpiringa no sési úkuni juchaari pájperatani Tata Diosï Jeobani jingoni. Ju je no méni jurajkuni eska ambe ma uaaka úni eskachi jucha nóteru marhuakuakia Tata Diosï Jeobani. Ísïchi xarhataaka eska sánderu jukaparhakua ambe para jucha jindeeska xénchani Tata Diosï Jeobani (Sal. 119:165). w21.06 23 párr. 15