Juliu

Enga nema petanhantajka kúnguarhikuarhu, jindeesti ambe ma enga Tata Diosï Jeoba uékperakua jimbo uaxastaka ka enga sési úkuajka iáminduechani, asta imani jamberi enga no sési úka. Jamberi nema úpirindi uandani eskaksï orhejtsïkutiicha no sési úska engaksï ísï petantaka imani, peru miá je eskaksï orhejtsïkutiicha no méni uandantaaka no sési jásï ambe enga ima úka, ka ístu jucha no iámindu ambe míteska. Ísï jimbo, méntkisï sánderu sésisti mintsikani eskaksï orhejtsïkutiicha engaksï komite judisialirhu japka, úskaksï ambe enga Bibliarhu uandajka ka eskaksï míteska eskaksï jusgarixaka para Tata Diosï Jeoba (2 Crón. 19:6). Engajtsï jiókuarhiska engaksï orhejtsïkutiicha erakuka petantani chaari familiarini, i ambe jarhuataati paraka ima kʼuanhatsentaaka ménderu. Elizabeth uandasïndi: “Kánikua úkua exespka nóteruni uandajpania juchiiti sapini enga kʼériipkia. Peru enga ima kʼuanhatsentapka Tata Diosï Jeoba jingoni, uandaspti eska sési jarhaspka engaksï petantaka. Ka sánisï tátsekuarini arhispti eska uánikua ambe jorhenguarhispka”. w21.09 29 párr. 11, 12

Ju je eratsentani uarhiiti tsïndiiri ambe. Ima uékapirindi sánderu ambe íntskuni Jeobani. Joperu íntskuspti na enga xáni úpka; sánderu ambakiti ambe íntskuspti Jeobani. Ka Jesúsi mítespti eska inde ambe enga ima íntspipka, kánikua jukaparhakua ambeespka para imeeri Taati. Í ambejtsïni ambakiti ambe jorhendasïndi: eska Jeoba kánikua jaiapanhentasïnga engachi sánderu ambakiti ambe íntskuaka, eskachi marhuakuaka iámu juchaari mintsita ka tsípikua jingoni (Mat. 22:37; Kol. 3:23). Jeoba sési pʼikuarherasïndi engachi jánguarhintajka íntskuni xáni eskachi xáni uaaka. Ka engachi úrajka juchaari tiempu ka juchaari uinhapikua para imani k’éri ambe arhini, pori ejemplu aianhpikuarhu ka engachi nirajka tánguarhikuecharhu. ¿Nénachi uaa úrani ambe engachi jorhenguarhika ima uarhiitiiri enga tsïndiipka? Ju je eratsentani nénachi uaa jarhuataani máteruechani engachi arhiaska eska Jeoba jaiapanhentasïnga ima ambe engaksï úni jaka. Úpiringachi eratseni pirenchini ma enga jatiriikia ka enga no sési pʼikuarherajka jimboka nóteru úsïngia xáni ambe úni eska na ueenga aianhpikuarhu. w21.04 6, 7 párr. 17, 19, 20

Tata Diosï Jeoba mítesti na enga jatini sánderu sésiuaka para kʼamajkuni iámindu no sési jásï ambe parhakpinirhu. Jimboka ima tekaantaxaka, iásïksï jarhasti uánikua kʼuiripuecha engaksï marhuakuni jaka ka kómarhini. Iámindu inde kʼuiripuechaksï kánikua agradesidu jarhasti Tata Diosï Jeoba jingoni enga xáni ióni tekaantaka parakaksï úpiringa andajpenuni, jorhenguarhini ka xénchani imani ka paraksï aiakuni imeecheri tsípikuani. Engachi iáminduecha intsïnhaakia kóntperata jimbokachi tekaantaska asta kʼamarhukuni jamberi, xarharaati eska Tata Diosï Jeoba sési úska enga ísï tekaantani jaka. Tata Diosï Jeobajtsïni jorhendasïndi imeeri ejemplu jingoni tsípikua jingoni tekaantani, ima seguirixati ‘Tata Diosï máeni enga felisiika’ nájkiruka Satanási úka eska xáni no sési nitamakuarhinhaaka (1 Tim. 1:11, TNM). Juchajtuchi uaaka seguiriini tsípikua jingoni irekani engachi jamberi erokuarhini jauaka tekaantskua jingoni paraka Tata Diosï Jeoba pímbinhajkuntaaka imeeri nombrini, xarhataaka eska imajkusï sésikua jatsika para juramuni, kʼamajkuaka no sési jásï ambe ka juchaari problemechani. Ju je eratsetini jarhani tekaantani ka miáni eska ístu juchaari Taati auandarhu anapu ístu tekaantaxaka. w21.07 13 párr. 18, 19

Uánikua primeru siglurhu anapuechaksï no jiókuarhispi Jesúsini. Para ima kʼuiripuecha, karpinteru uájpa májkuespti. Ístu Nasareti anapuespti, ireta ma engaksï máru no kʼéri ambe exenga. Asta Natanaeli enga tátsekua niárapka Jesúsiiri chúxapatiini, ueenani jámani uandaspti: “¿Andi Nasareti uaa uérani ma ambakiti ambe?”. Jamberi ima miántapti ambe enga arhijka Miqueas 5:2, eska Mesíasi Beléni andajpenupiringa ka no Nasareti. Profeta Isaíasi uandaspti eskaksï Jesúsiiri ikiatspitiicha no uékapiringa míteni “neespiksï imeeri ióntki anapu parienticha”, o Mesíasiri ambe (Is. 53:8; nota). Engaksï jánguarhintapiringa míteni ini ambe, mítepirindiksï eska Jesúsi Beléni andajpenuspka ka eska rei Dabidiiri parientispka (Luk. 2:4-7). Ísï jimbo, nani enga Jesúsi andajpenupka terukuntasïndi profesia jingoni enga Miqueas 5:2 arhijka. Jiájkani, ¿andiksïsï no jiókuarhipi Jesúsini ka imeeri chúxapatiini? Jimbokaksï no iámindu ambe sési mítespka. w21.05 2, 3 párr. 4-6

Bibliarhu, jarhastiksï kʼuiripuecheri ejempluecha engaksï jiókuarhiapka konsejuechani ka Tata Diosï újchakurhaaspti. Ju je exeni Jobueri ejempluni. Nájkiruka ima uékeenga jaiapanherantani Tata Diosïni, no iámindu ambe sési úsïreendi. No sési ambe uandaspti jiáni enga no sési nitamakuarhini japka. Ka indeni ambe jimbo, Eliú ka Tata Diosï Jeoba konsejuechanksï íntskuaspti. ¿Ambe úspi Jobu? Uandaspti: “No eratseparini uandaspka”. Ka ístu uandaspti: “No ísïisti ambe engani uandaka ka móantasïnga tʼupuri ka tʼupuri jápu jingoni” (Job 42:3-6, 12-17). Kaxumbikua xarhataspti ka jiókuarhiaspti konsejuechani enga Eliú íntsaapka nájkiruka Eliú sánderu sapichuepka (Job 32:6, 7). Ka juchantsïntu kaxumbikuajtsïni jarhuataati jiókuarhiani konsejuechani nájkirukachi eratseaka eskachi no uétarhinchaxapka o nájkiruka ima engajtsïni íntskuaka konseju ma, sánderu sapichueuaka eska jucha. Iáminduechachi uétarhinchasïnga ambakiti kualidadichani jatsiani ka seguiriini sánderu sési jorhentpini. w22.02 11 párr. 8; 12 párr. 12

Iáminduechachi uaaka úni eska kúnguarhikuarhu sési pájperanhaaka ka xénchperanhani. Ísï, no nema jandiajku pʼikuarheraati. Ambe engachi uandaaka ka úni, uaati eskaksï máteruecha sési pʼikuarheraaka. ¿Ambechi uaa úni parakaksï imeecha engaksï jandiajku jaka jurhimbikuarhu sési pʼikuarheraaka kúnguarhikuarhu? Ju je jánguarhintani amigu úkuarhi jimbanhiicha jingoni. Uaakachi ísï úni engachi sési erokaaska jimbanhiichani kúnguarhikuarhu (Rom. 15:7). Joperu no nomasi uétarhisïndi sési uandajpaani, sino niárani imeecheeri amiguecheeni. Ísï jimbo, ju je sési kaani ka xarhatani eskachi uandanhiasïnga imeecha jimbo ka jánguarhintani kurhangukuani ambe engaksï nitamakuarhini jaka, peru jingontku parachi no jámani inchaakukuani imeecheeri irekuarhu. Máruksï úkua jukanchasïndi uandani na engaksï pʼikuarherajka. Ísï jimbo, jingontkuchi jámaaka paraksï no ísï pʼikuarherani eskachi jucha afuersa uékasïnga eskajtsïni aianguaka ambe engaksï pʼikuarherajka. Sánderu sési, ju je uékperakua jingoni kurhamarhikuechani úkuani ka jingontku kurhajchani. Úpiringachi ueenani kurhamarhiani nénaksï niáraski ima míteni Tata Diosï Jeobani. w21.06 11 párr. 13, 14

¡Na engachi xáni jukaparharajka “májku úkuarhintatini” jarhani ka Tata Diosï Jeobani marhuakuni enga jindeeka “solu máechakua karichi eranguti”! (Juanu 10:16). Libru Organizados para hacer la voluntad de Jehová, pájinarhu 165, uandasïndi: “Juchaari responsabilidadi jindeesti úni eskaksï erachiicha márku úkuarhintatini jauaka”. Ka ístu uandasïndi: “Sánderuchi sési pájperaaka juchaari erachiicha jingoni engachi jánguarhintaska méntkisï ísï exeani eska Jeoba na exeajka”. Imajtsïni iáminduechani ísï exesïndi komueska ʻsapichituʼ ka kánikuajtsïni jukaparharasïndi. Ka ísïchisï jatsika para exeani juchaari erachiichani. Ima exesïndi ka jukaparharasïndi iámu ambe engachi újka para jarhuataani ka kuidariuani (Mat. 10:42). Kánikuachi xénchaasïnga juchaari erachiichani. Ísï jimbo, sésichi eratsekata jatsiska “jánguarhini no ma ambe jimbo ikiatani ma ermanuni o pekadu úrani” (Rom. 14:13). Ju je méntkisï eratseni eskaksï juchaari erachiicha sánderu kʼériiska eska jucha ka mintsita jingoni tekaakuantani. Ju je no jurajkuni eska ambe enga uaaka erachi ma, uaaka úni eskachi jucha jurajkuaka Tata Diosï Jeobani. Sánderu sési, ju je “méntku jauenani úni jarhani ambe engachi jimbo sési pájperani jauaka ka uinhaperperantanchi” (Rom. 14:19). w21.06 24 párr. 16, 17

Engachi sési jorhenguarhiska Tata Diosïiri Karakatani ka engachi ísï úska eska jimini na arhijka ka ambe engajtsïni arhijka imeeri kúnguarhikua, sánhani arhiakachi ísïini eska Kristu ka sánderuchi sési míteaka Tata Diosïni. Ejemplu ma jingoni, Jesúsi terukutantaspti ambe engachi aianhpijka Reinueri ambe, semiia ma jingoni enga sánhani arhijka kʼéni kʼuiripueri mintsitarhu. Uandaspti: “Peru [ima enga semiia jatsikujka] no sáni mítesïndi aberi nanina uérasïni ka kʼuiripeni inde semiia, jimboka echeri jindeeska enga kʼuiriperajka indeni semiiani, ueenani uitsakueni jásï ka tátsekua espiga jukasïndi, ka sánderu tátsekua jukasïndia trigu espigarhu” (Mar. 4:27, 28). Jesúsi arhikuekaxapti eska ima kʼuiripu engachi aiangujka Reinueri ambe, sáno májkueni kʼuiripesïnga eska planta ma: sánhani arhini. Úsïngachi i ambe exeni engachi jorhendajka nemani Biblieri ambe na enga sánhani arhijka andarhierani Tata Diosï Jeobani ka engachi exejka eska ueenasïnga mójtakuni ambe ma imeeri irekuarhu (Efes. 4:22-24). Joperuchi no jatsiska para mirikurhini eska Tata Diosï Jeobasï újka eska ima semiia kʼuiripeaka. w21.08 8, 9 párr. 4, 5

Engachi uéjka tsípikua jingoni irekani, jatsiskachi para úni ambe ma. Kʼuiripu enga tsípijka ‘imani ambe jingoni enga újka exeni’ méntkisï sési pʼikuarherasïndi imani ambe jingoni enga jatsika, komu na enga nitamakuarhini jaka iáiasï. Joperu ima kʼuiripu enga “jini ka jini jámani jarhajka imani ambe uékani” enga tsitijka méntkisï imani ambe uékani jarhasïndi enga no uaaka jatsini. ¿Ambechi jorhenguarhisïni? Eska engachi uéjka tsípikua jingoni irekani, jatsiskachi para eratseni imani ambe engachi jatsika, ka no imani ambe engachi no uaaka jatsini. ¿Uaachi meru tsípikua jingoni irekani imani ambe jingoni engachi jatsikia? Uánikua kʼuiripuechaksï uandasïndi eska nómbe, jimbokachi tsitisïnga jimbanhi ambe jorhenguarhini jarhani. Joperuchi uaaka ísï úni. Uaakachi sési pʼikuarherani imani ambe jingoni engachi jatsikia. ¿Néna? Para míteni, exe je ejempluni enga Jesúsi uandapka talentuecheeri enga Mateu 25:14-30 jimbo jaka ka jorhenguarhi je ambechi uaa úni parachi sánderu tsípikua jingoni jámani ka astachi sánderu tsípini imani ambe jimbo engachi nitamakuarhini jaka. w21.08 21 párr. 5, 6

Tata Diosï Jeoba kánikua uandanhiasïndi imeechani jimbo engaksï “kánikua kómu pʼikuarherani jaka”. Iáminduecha ka no solu orhejtsïkutiicha uaakachi uinhaperantaani juchaari erachiichani engaksï ísï pʼikuarherani jaka. Uaakachi mintsita jingoni xarhatakuani eskachi pendienti pásïnga imeechani jimbo. Tata Diosï Jeoba uékasïndi eskachi xarhatakuauaka eska ima xénchaasïnga imeeri karichichani (Prov. 19:17). Ístuchi uaaka jarhuataani engachi jucha kaxumbitiiska ka no kʼéramakuarhini imani ambe jimbo engachi újka úni parakaksï máteruecha no jámaaka enbidia pʼikuarherani. Sánderu sési, úraakachi imani ambe engachi jorhenaka ka imani ambe engachi xáni míteka parachi uinhaperperantani (1 Ped. 4:10, 11). Uaakachi jorhenguarhini néna kaani máteruechani engachi exeska na enga Jesúsi kaapka imeeri chúxapatiichani. Nájkiruka ima sánderu kʼéri ambeepka ima ‘kaxumbitiispti ka no teparakuarhisïreendi’ (Mat. 11:28-30). Enga jorhentpienga, imani uandakuechani úraasïreendi enga kʼuiripu kurhanguauenga ka imani ejempluechani enga mintsitarhu niárakuauenga imani kʼuiripuechani engaksï kaxumbitiipka (Luk. 10:21). w21.07 23 párr. 11, 12

Ju je jucha ueenani uandontskuarhekuani erachiichani engaksï jatiriikia. Ísïisti, jamberiksï iásï nóteru xáni sési exejtia eska ióntki ka jamberiksï iásï sánderu iatsitakuarhu xanharajtia oksï nóteru xáni uinhachania. Joperu uékasïndiksï seguiriini úni ambe ma ka “ambakiti arhinhakuaksï ma jatsisti” Jeobaeri orhepani jimbo (Ecl. 7:1, nota). Ju je miáni andisï Tata Diosï Jeoba jukaparharaajki ka ju je juchajtu májkueni úni. Ju je ísïini eska Eliseu, enga últimu jurhiatikua jimbo enga Elíasini jingoni japka méntku úndapka arhini eska ima uékasïreenga imani jingoni jarhani. Tanimu xanhari arhispti: “Nókini jurajkuaka” (2 Rey. 2:2, 4, 6). Engachi imani ambe kurhamarhiaska enga no no sési pʼikuastauaka erachiichani engaksï jatiriikia, xarhatanchi jarhasïnga eskachi sési jimbo uandanhiasïnga imeechani jimbo (Prov. 1:5; 20:5; 1 Tim. 5:1, 2). Úpiringachi kurhamarhiani: “Engajtsï tumbiipka, ¿ambe úspi eskajtsï seguru japiringa eskajtsï exentaspkia jurhimbikuani?”, “¿Ambe úspi eskajtsï sánderu andarhierapiringa Jeobani?”, “¿Ambeksïni jarhuataspi parajtsï seguiriini jarhani tsípikua jingoni marhuakuni Tata Diosï Jeobani?” (1 Tim. 6:6-8). Tátsekua, kurhaa je ambe engaksïni aianguaka. w21.09 5 párr. 14; 7 párr. 15

Engachi jánguarhintajka xáni eskachi xáni uaaka para aianhpini ka Jesúsiiri chúxapatiichani uaani ísï eskachi na juramuminhaka, xarhatasïngachi eskachi xénchasïnga Tata Diosïni (1 Juanu 5:3). Ju je ini ambe eratseni: úskachi kʼumanchikuechani jimbo nirani aianhpini jimbokachi xénchasïnga Tata Diosï Jeobani. ¿Fásiliispi ísï úni? Jamberi nómbe. Seguru eskachi chépka engachi primeru xanhari uámutapka kʼumanchikuarhu ma para aianhpini. Joperuchi úspka indeni ambe úni jimbokachi míteska eska Jesúsi i ambesï uékajka. Jamberichi nóteru chéjkia uérani aianhpini. Joperu jorhendani nemani Biblieri ambe jamberi újti eskachi chéni pʼikuarheraaka. Engachi kurhakuska Tata Diosï Jeobani eskajtsïni jarhuataaka parachi no chéni ka balori jukani parachi arhini nemani eskachi uaaka jorhendani Biblieri ambe, imajtsïni uaati jarhuatani parachi uékani Jesúsiiri chúxapatiichani uaani. w21.07 3 párr. 7

Ióntki, jántspiriichaksï mínda ma jatsikunhasïreendi paraksï xarhatani né jindeespi imeecheri patroni. Májkueni, ini jurhiatikuecha jimbo, kʼuiripuechaksï mínda ma jukaxati jájkirhu o tsʼérukuarhu. I ambe arhikuekasïndi eskaksï iámindu kʼuiripuecha jatsiska para xarhatani imeecheri jángua ka eratsekua jingoni eskaksï i parhakpini anapu juramuticheeriiska ka eskaksï apoiariuasïnga. Ka juchaia, ¿ambechi uaa? ¿Jukaachi indeni míndani ka i parhakpini anapu juramutiicha jingoni úkuarhini? Imeecha engaksï no jiókuarhiaka indeni míndani, no sésiksï nitamakuarhiati ka peligrurhuksï jauati. Librurhu Jaŋaskuecha jimbo, uandasïndi eska no nema “uaaka piáni ka ni íntspikuarhini” enga no jukaaka míndani (Jaŋ. 13:17). Joperu Tata Diosïiri marhuariichaksï mítesti ambe enga Tata Diosï úkuauaka imeechani engaksï indeni míndani jukarini jauaka (Jaŋ. 14:9, 10). Jiájkani, enbesi deksï indeni míndani jukani, ísïisti enajkiksï arini ambe karajkurhatini japirini: “Tata Diosï Jeobaeriska” (Is. 44:5). Iásïisti parachi eratsetini jarhani eskachi no méni jurajkuaka Tata Diosï Jeobani. Engachi ísï úska, ima kánikua tsípikua jingoni uandaati eskachi imeeriska. w21.09 18 párr. 15, 16

Parachi úni sési aianhpini, ju je jurajkuni eskajtsïni máteruecha jarhuataaka. Primeru siglurhu, Pablu jorhendaspti Timoteoni néna sánderu sési aianhpini ka jorhentpini ka ístu arhispti Timoteoni eska imajtu májkueni úpiringa para máteruechani jarhuataani (1 Kor. 4:17). Ísï eska Timoteo, juchajtuchi uaaka jorhenguarhini kúnguarhikuarhu anapu erachiicheeri ambe engaksï sánderu míteka eska jucha. Ístu, ju je kurhakuni Jeobani eskajtsïni jarhuataaka. Méni engachi niuaka aianhpini, ju je kómarhini Jeobani parajtsïni jarhuatani. Jimbokachi no ma ambe úpiringa úni engajtsïni imeeri espiritu santu enga xáni uinhapitiika, nójtsïni jarhuatapiringa (Sal. 127:1; Luk. 11:13). Engachi kómarhiaka Jeobani ju je kurhakuni ambe engajtsïni jimbo jatsika para jarhuatani. Pori ejemplu, úpiringachi kurhakuni eskajtsïni jarhuataaka ambakiti kʼuiripuni ma exentani engajtsïni uékaaka kurhajchani. Ka ju je arhutani tiempu parachi jatsini máeri jorhenguarhikua. Tata Diosïiri Karakata uandasïndi: “Parajtsï ísï úni jánhaskani ambe enga jindeeka enga Diosï uékajka eskajtsï uaaka enga ambakitiika ka enga jaiapanhinhantajka ka enga no ma ambe jimbo kueratajka jurhimbikueni” (Rom. 12:2). Engachi sánderu jakajkujka eska ísïiska ambe engachi jorhenguarhijka Tata Diosïiri ambe, nóchi xáni chéparini aianguasïnga kʼuiripuechani indeeri ambe. w21.05 18 párr. 14-16

¿Ka engachi jorhendani jaka nemani Biblieri ambe, joperu ima no úni jarhani ambe enga jorhenguarhini jaka nájkirukachi jucha kánikua jánguarhintani jaka sési jorhendani ka últimuchi jatsini para nóteru jorhendania? O ¿engachi no méni jorhendaka nemani enga niáraka itsï atakuarhini? ¿Jatsipirinchi para no sési pʼikuarherani ka eratseni eska Tata Diosï Jeoba no újchakuraxaka juchaari ánchikuarhitani? Tata Diosï Jeoba exesïndi na engachi xáni jánguarhintajka ka na engachi xáni tekaantani jaka. Para Tata Diosï, sésijtsïni nichesïndi aianhpikuarhu engachi jucha jánguarhintajka aianhpini ka engachi uékperakua jimbo ísï újka, no arhiparini engaksï kʼuiripuecha kurhauaka o nómbe. Pablu i ambe karaspti: Tata Diosï jurhimbitku úsïndi “ísï jimbo ima no mirikurhiauati chaari úkuechani ka nijtu indeni ambe engajtsï úni jaka xarhataparini eskajtsï uékasïnga Diosïni, jimbokajtsï jarhuataska imeeri míndakatechani ka útasïjtsï jarhuataaxaka” (Ebr. 6:10). Tata Diosï Jeoba no mirikurhisïndi na engachi xáni jánguarhintani jaka ka eskachi uékperakua jimbo úsïnga, nájkiruka no ma kʼuiripu uékaaka kurhaani. Ísï jimbo, ari ambe enga Pablu uandapka ístu jindeesti para jucha. w21.10 25 párr. 4-6

Jesúsi sési kaaspti imeeri chúxapatiichani ka xénchaasïreendi. Mítespti eskaksï no iáminduecha májkueni ambe jorhenhaspka úni ka eskaksï táchani jásï ambe nitamakuarhixapka, ísï jimbo, nóksï úpirindi májkueni járhati ánchikuarhiteechani intsïnhaani nijtuksï úni xáni aianhpini. Joperu, Jesúsi jukaparharaasïreendi jimbokaksï mándani arhini mintsita jingoni jánguarhintasïreenga. Ka xarhataspti i ambe jiáni enga talentuecheeri ejempluni uandapka. Ini ejemplu jimbo, patroniiri ma uandaspti enga ánchikuarhita íntsaapka imeeri jántspiriichani seguni na eskaksï xáni úpiringa úni. Ísïisti, nájkirukaksï ima tsimani jántspiriicha úpka imeecheri ánchikuarhitani, ma sánderu andaspti eska máteru. Joperu, patroni felisitariuaspti ini mismu uandakuecha jingoni tsimarhani: “Sési jarhasti, ambakiti jántspiriskari ka mintsinharhikuendi” (Mat. 25:14-23). Ístujtsïni Jesúsi xénchasïndi ka sésijtsïni kámani. Mítesti eskachi no iáminduecha májkueni ambe jorhenaska ka eskachi táchani jásï ambe nitamakuarhixaka ka kánikua tsípisïndi engachi mándani arhini jánguarhintajka na engachi xáni uaaka para marhuakuni Tata Diosïni. Ju je májkueni úni eska Jesúsi. w21.07 23 párr. 12-14

Rei Dabidi no méntkisï pʼamojperata jingoni kámpispti. Ma xanhari enga Nabali —enga jindeepka achamasï ma enga no sáni jánhaskakua jingoni jámeenga— no sési arhipka Dabidini enga no uékapka t’irekua íntskuni imani ka imani acheetiichani engaksï imani jingoni jámani japka, Dabidi kánikua ikiaspti ka uandaspti eska uándikupiringa Nabalini ka iámindu imeechani engaksï imeeri kʼumanchikuarhu irekapka. Nabaliri témba, Abigaíli, pʼamojperata ka tekaantskua jingoni niraspti exeni Dabidini ka jimbosï Dabidi no nemani uándikupti (1 Sam. 25:9-22, 32-35). Enga Dabidi kánikua ikiapka, uandaspti eska Nabali ka ima kʼuiripuecha engaksï imeeri kʼumanchikuarhu anapuepka jatsipiringaksï para uarhini. Ka tátsekua no sáni chéparini uandaspti eska ima kʼuiripu enga Natáni uandapka jatsispka para uarhini. Ini últimu ejemplu jimbo, úpiringachi jamberi kurhamarhikuarhini andisï kʼuiripu ma enga xáni pʼamojpitiipka xáni no sési uandani japi. Joperu, ju je eratsentani ambe enga nitamakuarhini japka Dabidi. Dabidi no sési niátaspti ka no jatsispti pímbinhasï konsiensia ma. Ísï jimbo enga nema jukari no sési jusgariauaka máteruechani, xarhatani jarhasïndi eska no jatsiska ambakiti pájperakua ma Tata Diosï Jeoba jingoni. w21.10 12 párr. 17, 18; 13 párr. 20

¿Ambejtsïni jorhendasïni iásï anapu tekstu? Eskachi uaaka májkueni úni eska Tata Diosï Jeoba, enga kánikua pímbinhasïika. Jatsiskachi para pímbinhasïini imani ambe jingoni engachi újka nájkiruka ísï xarharaaka eskachi no uaaka ísï úni jimbokachi pekadoriiska. Apostoli Pedrujtu uánikua uelta no úspti sési úni ambe ma, peru imeeri ejemplujtsïni xarhatachesïndi eskachi uaaka pímbinhasïini. Uánikuechaksï eratsesïndi eska pímbinhasïini jindeeska ima kʼuiripu enga relijioniiri anapu ambe xukuparhantajka ka enga no sáni tsípinharhijka, peru pímbinhasïini no indeni ambesï arhikuekajti. Biblia uandasïndi eska Jeoba enga pímbinhasïika, jindeeska ‘Tata Diosï ma enga felisiika’ (1 Tim. 1:11, TNM). Ístu arhisïndi eska ima ireta enga imani kómarhijka felisiiska (Sal. 144:15). Jesúsi no sési uandaspti imeecheeri engaksï kʼérati xukuparhakua jukeenga ka engaksï ambakiti ambe ueenga parakaksï máteruecha exeapiringa (Mat. 6:1; Mar. 12:38). Kristianuechachi míteska ambe enga arhikuekajka pímbinhasïini imani ambe jimbo enga Biblia uandajka. Ka míteskachi eska juchaari Tata Diosï uékpiti, nójtsïni méni úrapiringa imani ambe engachi no uaaka úni. w21.12 2 párr. 1, 3

Iámindu regaluecheri engajtsïni Tata Diosï xénchperakua jingoni íntskuka, jamberi ma enga sánderu kʼéri ambeeka, jindeesti eskachi úsïnga kómarhini. Engachi kurhajchaska imeeri juramukuechani, xarhatakunchi jarhasïnga eskachi xénchasïnga (1 Juanu 5:3). Ma juramukua engajtsïni Jesúsi íntskuka jindeesti para imeeri chúxapatiichani uaani ka itsï ataani (Mat. 28:19). Ístujtsïni Jesúsi juramuchisti eskachi iáminduecha xénchperaaka (Juanu 13:35). Tata Diosï Jeoba jiókuarhiauati imeeri familiarhu imeechani engaksï kurhajchajka (Sal. 15:1, 2). Ju je xénchaani máteruechani. Uékperakua jindeesti ambe ma enga Tata Diosï sánderu xarhatajka (1 Juanu 4:8). Imajtsïni tʼuini xénchasptia ante de juchachi míteni imani (1 Juanu 4:9, 10). Engachi xénchajka máteruechani, májkuenchi úni jarhasïnga eska ima (Efes. 5:1). Uaakachi xarhatani eskachi xénchaasïnga kʼuiripuechani engachi jarhuataaska paraksï míteni Tata Diosï Jeobani, iásï enga útasteru tiempu jaka (Mat. 9:36-38). Ísïchi jarhuataasïnga parakaksï uaaka jarhani Tata Diosï Jeobaeri familiarhu sánderu orhepatini. w21.08 5, 6 párr. 13, 14

Jesúsi xáni xénchasïreendi Tata Diosï Jeobani enga uékapka uánikua ambe úni imani jimbo ka ístu juchantsïni jimbo (Juanu 14:31). Enga Jesúsi Echerirhu japka, xarhataspti na enga xáni xénchauenga kʼuiripuechani imani ambe jimbo enga úpka. Méntkisï sési kaaspti kʼuiripuechani ka pʼamojkuaspti asta imeechani engaksï no sési kámeenga. Xarhataspti eska xénchaasïreenga kʼuiripuechani jimboka aianguaspka Tata Diosïiri Reinueri ambe (Luk. 4:43, 44). Ístu, xarhataspti eska kánikua xénchasïreenga Tata Diosïni ka kʼuiripuechani jimboka jurajkuspka eska no sési kánhapiringa ka eskaksï no sési úricha uándikupiringa. Ka enga Jesúsi indeni ambe úpka, iásïchi iáminduecha uaakia irekani para méntkisï. Jimbokachi xénchasïnga juchaari Taati auandarhu anapuni, aiakukuarhespkachi imani ka itsï atakuarhini. Ka ísï eska Jesúsi, jatsipiringachi para xénchaani kʼuiripuechani. Apostoli Juanu karaspti: “Ima enga no uékajka ermanu jémbani enga exejka, ¿néna uaa uékani Diosïni enga no méni exeka?” (1 Juanu 4:20). w22.03 10 párr. 8, 9

Nájkirukachi tsitijka Tata Diosï Jeoba jingoni jarhani, no méntkisï fásiliisti ísï úni jimbokachi mámaru ambe úkua jatsisïnga ka nóteruchi pakatania tiempu parachi Tata Diosïiri ambe úni. Pori ejemplu, ánchikuarhita ka familia ka máteru ambe engachi jatsika para úni, úsïndi eska nóteru pakaraakia tiempu parachi kómarhini ka jorhenguarhini Biblieri ambe ka eratsentani. Joperu jarhasti peligru ma engachi no exejka ka jatsiskachi para jingontku jámani. Jarhasti máru ambe engachi jucha újka enga no no sési jaka, joperu enga úpiringa eskachi nóteru jatsipiringia tiempu para Tata Diosï Jeoba jingoni jarhani. Pori ejemplu, iáminduechachi uétarhinchasïnga tiempu parachi mintsikuarhini sáni ka tsípikuarhini. Joperu engachi jukari tiempu úraska indeni ambe jimbo, nóteruchi jatsiakia tiempu parachi Tata Diosïiri ambe úni. Jatsiskachi para miáni eska tsípikuarhini no sánderu jukaparhakua ambeeska (Prov. 25:27; 1 Tim. 4:8). w22.01 26 párr. 2, 3

Enga Tata Diosï Jeoba juramukuapka israeliteechani eskaksï xénchaapiringa máteruechani, no arhikuekaxapti solu xénchaani imeechani engaksï israeliteepka. Sino ístu arhiaspti eskaksï xénchaapiringa máteru nanisï anapuechani engaksï jima mismu irekani japka. Ísï uandasïndi Levítico 19:33, 34. Uérakua anapunksï ma jatsipirindi para ísï exeni “eska imani paisi anapuni ma” ka xénchani ísï eskaksï imajkumindu na xénchakuarhienga. Pori ejemplu, jatsisptiksï para jurajkuani uérakua anapuechani ka pobrichani parakaksï úksïmapiringa ambe engaksï pʼikuntapiringa (Lev. 19:9, 10). Kristianuechajtuksï jatsisti para ísï úni ka xénchaani uérakisï anapuechani (Luk. 10:30-37). ¿Néna? Parhakpinirhu, uánikua kʼuiripuechaksï jarhasti engaksï mótseka paraksï máteru paisi jimbo irekani ka máruksï jamberi jimeesïsï irekani jati engachi jucha irekaka. Jatsiskachi para sési kaani ini kʼuiripuechani ka respetu jingoni. w21.12 12 párr. 16

Engachi iásï sánderu mintsinharhiska Tata Diosï Jeobani, sánderuchi seguru jauaka eskajtsïni jarhuataaka sánderu orhepani. Uétarhisïndi mintsikani Tata Diosï Jeobani parachi úni arhini juchaari patronini eskajtsïni íntskuaka permisu parachi nirani k’éri tánguarhikuarhu ma o tánguarhikuecharhu ka parachi sánderu aianhpini. Eranhaska je eskajtsïni no sésikua íntskusïnga ka eskajtsïni euantasïnga ánchikuarhitani. ¿Mintsikaachi eskajtsïni Tata Diosï Jeoba no méni jurajkuaka nijtsïni jandiajku jurajkuni ka eskajtsïni méntkisï íntskuaka ambe engachi uétarhinchaaka? (Ebr. 13:5). Uánikua erachiicha engaksï tiempu kompletueri marhuani jaka uandantasïndiksï na enga Tata Diosï Jeoba jarhuataapka jiáni engaksï uétarhinchani japka. Tata Diosï Jeoba no méni jurajpisïndi. Enga Tata Diosï Jeoba juchantsïni jingoni jauaka, nóchi jatsiska para chéni imani ambe jimbo enga úkuarhiaka sánderu orhepani. Engachi orheta peeraska imeeri ambe juchaari tsípikuarhu, imajtsïni no méni jurajkuati. w22.01 7 párr. 16, 17

Enga nema petanhantajka kúnguarhikuarhu engachi jingoni sési pájperajka, jamberichi no xáni mintsikapiringa ambe engaksï orhejtsïkutiicha úka. Ístu, jamberichi eratsepiringa eskaksï no iámindu ambe mítespka o eskaksï no ísï jusgarispka eska Tata Diosï Jeoba na uéjka. ¿Ambejtsïni jarhuata parachi jiókuarhini ambe engaksï orhejtsïkutiicha erakuaka úni? Jatsiskachi para miántani eska enga nema petanhantajka, jindeeska jimboka Tata Diosï Jeoba uékasïnga eska kúnguarhikua sési jauaka ka ístu ima enga no sési niátaka. Enga no petanhantapiringa ima enga no sési ambe úka, úpirindi úni eskaksï ístu máteruecha no sési ambe niátapiringa (Gal. 5:9). Ístu, no úpirindi exeni eska ima ambe enga úka, no sési jarhaska ka eska jatsiska para mójtakurhini para úni ménderu sési pájperantani Tata Diosï Jeoba jingoni (Ecl. 8:11). Uaakachi seguru jarhani eskaksï orhejtsïkutiicha kánikua jánguarhintasïnga paraksï úni uandani sini nema jatsiski para petanhantani kúnguarhikuarhu o nómbe. w22.02 5, 6 párr. 13, 14

Kánikua jukaparhakuesti tekaantstini ka xénchperakua xarhatani enga nema ueenakuarhu no jiókuarhiska konseju ma enga Bibliarhu pʼitakata jauaka o enga ióndaska úni ambe enga arhinhajka. Orhejtsïkutiichaksï no jatsisti para ikiani engaksï erachiicha ísï uaaka. Ísï jimbo, orhejtsïkuti ma uaati kómarhini Tata Diosï Jeobani eska jarhuataaka kʼuiripuni kurhanguni andisï uétarhinchajki konsejuni ka eska uaaka ambe enga arhinhaaka. Jamberi ima kʼuiripu tiempu uétarhinchaati para eratsentani ambe enga arhinhaka. Enga orhejtsïkuti tekaantstiuaka ka xénchperakua xarhatani, kʼuiripu jiókuarhiati konsejuni ka no eratsentani pakaraati na engaksï íntskuka konsejuni. Ísïisti, méntkisï konseju ma jatsisti para Tata Diosïiri Karakatarhu pʼitakata jarhani. Ju je miáni eska ambe engachi uéjka, jindeeska ambakiti konsejuechani íntspiani ka eskaksï sési pʼikuastpentaaka (Prov. 27:9). w22.02 18 párr. 17, 19

Engachi kurhakuska Tata Diosïni eskajtsïni íntskua uinhapikua parachi úni orhepani uérakuani uandanhiateechani o parachi nóteru úni imani ambe enga no sési jaka, jamberichi ísï exejka eska ima ióndaxaka mókuantani juchaari kómarhikuechani. ¿Andisï Tata Diosï Jeoba no jirejiresï mókuantajki iámindu juchaari kómarhikuechani? Ma ambe jindeesti jimboka ima ísï úsïnga exeni na engachi xáni mintsikajka (Ebr. 11:6). Ístu, uékasïndi exeni sinchi jucha ísï uékasïni irekani eskachi na kurhakujka ka sinchi uékasïni úni ambe enga ima uéjka (1 Juanu 3:22). Ísï jimbo, engachi jucha kurhakuska Tata Diosï Jeobani eskajtsïni jarhuataaka jurajkuni ambe ma enga ima no jaiapanhentajka, jamberi uétarhiati eskachi tekaantstiuaka ka eskachi jánguarhintaaka ísï jámani eskachi na kurhakuka. Jesúsi uandaspti eska Tata Diosï no méntkisï jirejiresï mókuantasïnga kómarhikuechani enga i ambe uandapka: “Kurhajkuarhi je ka intsïnhaakajtsï. Jirinha je ka exentaakajtsï. Tentenasta je ka uéraminhaakajtsï, jimboka nákinterku nema enga kurhajkuarhijka, intsïnhasïnga. Ka ima enga jirinhajka, exentasïndi. Ka ima enga tentenastajka uéraminhasïndi” (Mat. 7:7, 8). w21.08 8 párr. 1; 10 párr. 9, 10

Jatsiskachi para seguiriini jorhenguarhini ambe enga Biblia jorhentpijka parachi sánderu jakajkuni Kuerajpirini (Jos. 1:8). Ju je exeni eska úkuarhisïnga ambe enga uandajka ka eska iámu ambe terukuntasïnga. I ambejtsïni jarhuataati parachi sánderu mintsikani eskajtsïni Kueraajpiri ma úska enga kánikua jánhastiika ka xénchpetiini ka eska imasï kararkuarhika Bibliani (2 Tim. 3:14; 2 Ped. 1:21). Engachi jorhenguarhiaaka Tata Diosïiri Karakatani, ju je exeni eskaksï meru marhuasïnga Biblieri konsejuecha. Pori ejemplu, Biblia ióniistia enga uandapka eskajtsïni no sési úchiaka sánderu sentabu uékani jatsini ka uaati eskachi uánikua uandanhiateechani jatsiauaka (1 Tim. 6:9, 10; Prov. 28:20; Mat. 6:24). Ambe enga Biblia uandajka para ma no jámani sánderu tsitini sentabuni, merujtsïni marhuachesïnga. ¿Miáxakichi máteru Bibliarhu anapu karakatani engajtsïni jarhuataka? Engachi sánderu jukaparharaaska Biblieri konsejuechani, exeakachi eska juchaari Kueraajpiri enga xáni uékpitiika míteska ambe enga sánderu sésiska para jucha ka méntkisïchi jirinhantauaka imeeri konsejuechani (Sant. 1:5). Ka ísïchi sánderu tsípikua jingoni irekaaka (Is. 48:17, 18). w21.08 17, 18 párr. 12, 13

Enga chá jatiriini jakaia, uaakajtsï seguru jarhani eska Tata Diosï Jeoba no mirikurhisïnga ambe engajtsï úkia. Tsípikua jingontsï jarhuajpesïnga aianhpini. Tekaantaskajtsï tsʼéjkukuechani —máru engaksïni kánikua no sési pʼikuastapka—, úskajtsï ambe enga Biblia juramujka, kʼérati responsabilidadichantsï jatsiaspka ka jorhendaaskajtsïa máteruechani. Kánikuajtsï jánguarhintasïnga úni ambe enga Tata Diosï Jeobaeri ireta mójtakuntajka. Ístujtsï jarhuataaskia ka uinhaperaantani imeechani engaksï tiempu kompletu marhuani jaka. Tata Diosï Jeobaksïni kánikua xénchasïndi jimbokajtsï no méni jurajkuska, ka ima aiatspesïndi eska “no méni jurajkuauaka imeechani engaksï no méni jurajkuaka imani” (Sal. 37:28). Ístuksïni aiachisïndi: “Nájkirukari iámu t’upuntsïakia, jíkeni seguiriini jauaka jarhuatani” (Is. 46:4). Peru asï eratsi je eska jimbokajtsï jatiriiskia, nóterujtsï jukaparhakueskia Tata Diosïiri kúnguarhikuarhu. ¡Kánikuajtsï jukaparhakueska! w21.09 3 párr. 4

Tata Diosï Jeoba xarhatatspesïndi pʼamojperakua jimboka kánikua jánhaskatiiska. Biblia uandasïndi eska ‘eratsekua enga karhakua uératini jurhajka, pʼamojpesïnga ka ambakiti ambe útspini’ (Sant. 3:17). Májkueni eska taati uékpiti ma, Tata Diosï Jeoba mítesti na enga xáni marhuakuajka pʼamojperakua xarhatakuani imeeri uájpeechani (Is. 49:15). Erokuarhikua ma íntsaasïndi nájkirukaksï imperfektueka, imeeri kánikua jánhaskakua jimbo pʼamojperakua xarhatakuasïndi méntkisï enga uaaka ísï úni. Joperu ístu mítesti káni no xarhatani pʼamojperakua. Tata Diosï Jeoba kánikua jánhaskatiisti jimbosï no méni pʼamojperakua xarhatapirindi enga indeni ambe jimbo jaiapanhentani japiringa no sési járhati úkuechani. Ju je eratseni eska nema enga marhuakuni jaka Tata Diosïni ueenasïnga pekaduechani uáni. Jimajkani ¿ambe jatsiski para úkuarhini? Tata Diosï arhispti apostoli Pabluni eska karakupiringa kúnguarhikuani eskaksï “no kúnguarhipiringa” imani jingoni (1 Kor. 5:11). Ima kʼuiripuecha engaksï pekadu újka ka no móantani jatsistiksï para petanhantani kúnguarhikuarhu uératini. Jatsisti para i ambe úkuarhini para kuájchakuani erachiichani engaksï sési marhuakuni jaka Tata Diosïni ka para xarhatani eska Tata Diosï Jeoba pímbinhasïiska. w21.10 9, 10 párr. 7, 8

Kʼéri ambechi arhisïnga Tata Diosï Jeobani engachi juchaari donasioniicha jingoni jarhuajpejka Reinueri ánchikuarhitani. Israeliteechaksï jatsisïreendi paraksï pákuni ambe ma Tata Diosïni engaksï kʼuínchikuecharhu nireenga (Deut. 16:16). Jatsisïrendiksï para páni ambe engaksï imeecha úpiringa. Ísïksï xarhatasïreendi eskaksï jukaparharasïreenga iámindu kóntperatechani enga Tata Diosï Jeoba íntsauenga. ¿Ka juchachi néna uaa xarhatani eskachi xénchasïnga ka eskachi jukaparharasïnga kóntperatechani engajtsïni ima íntskuajka? Ma ambe engachi uaaka úni jindeesti donasioni íntspini juchaari kúnguarhikuarhu ka para ánchikuarhita enga interu parhakpinirhu úkuarhijka seguni na engachi xáni uaaka. Apostoli Pablu, i ambe uandaspti: “Jimboka [Tata] Diosï jaiapanhentasïnga ima kʼuiripuni enga tsípikua jingoni íntspijka eska xáni uaaka, ka no uinhamarhitspisïndi eska íntspiaka ma ambe enga no jatsiaka” (2 Kor. 8:4, 12). Tata Diosï Jeoba jukaparharasïndi donasioniichani engachi mintsita jingoni íntspiajka, no arhiparini enga no kánikueuaka (Mar. 12:42-44). w22.03 24 párr. 13

Orhejtsïkutiichajtsïni no uaati jarhuatani iámindu juchaari uandanhiateechani jingoni. Joperu Tata Diosï Jeoba uékasïndi eskaksï jánguarhintaaka para uinhaperantaani ka kuidariuani imeeri karichiichani. Míteparini eskaksï orhejtsïkutiicha uánikua úkua ambe jatsiska, ¿nénaksï uaa tiempu jatsini paraksï jarhuataani erachiichani? Engaksï seguiriska Pablueri ejemplu. Ima méntkisï exeni jarhasïreendi ambe enga jimbo úpirini sési arhiani erachiichani ka uinhaperantaani. Orhejtsïkutiichaksï uaati májkueni úni eska Pablu engaksï xénchperakua jingoni kaaska erachiichani (1 Tes. 2:7). Pablu arhiaspti erachiichani eska ima ka Tata Diosï Jeoba kánikua xénchaasïreenga (2 Kor. 2:4; Efes. 2:4, 5). Ísï kaasïreendi eska imeeri amiguechani ka imeecha jingoni jarhasïreendi. Xarhatakuasïreendi eska mintsikaasïreenga jimboka aianguasïreenga ambe enga uandanhiateenga ka ambe enga no ueenga sési úni (2 Kor. 7:5; 1 Tim. 1:15). Joperu ístu, no xáni pendienti pásïreendi imeeri uandanhiateechani jimbo, sánderu sési jarhuatasïreendi erachiichani. w22.03 28 párr. 9, 10