Septiembri

Jesúsiiri jurhiatikuecha jimbo, uánikua kʼuiripuechaksï sési exesïreendi na enga ima jorhentpienga, joperuksï sánderu ambe uékasïreendi. Joperu jimboka Jesúsi no uékaspka milagruni úni engaksï kʼuiripuecha kurhakupka, imeechaksï no sési exespti ka nóksï jiókuarhispti (Mat. 16:4). ¿Ambe uandasïni Biblia? Isaíasi arini ambe uandaspti para Mesíasini arhikuekani: “No uinhachaati ni xanharu jimbo uandaparini jámaa” (Is. 42:1, 2). Jesúsi úspti imeeri ánchikuarhitani no para ima kʼéri ambe arhinhani. No úraspti imeeri tiempuni para kʼérati templuechani uáni, no ísï xukuparhasïreendi eska relijionirhu anapuecha ka no uékasïreendi eskaksï kʼuiripuecha kʼéri títulu ma jingoni uandajpapiringa. Ka enga jusgarinhani japka, no uékaspti imani milagruni úni enga rei Erodesi arhipka nájkiruka no sési nitamakuarhini japka (Luk. 23:8-11). Ísïisti, enga ima aianhpini jámani japka, uaaspti máru milagruechani, joperu ambe enga sánderu jukaparhakua ambeepka para ima, jindeespti ambakiti ambe aianhpini. Arhiaspti imeeri chúxapatiichani: “Jimbokani indeni ambe únisïni juka” (Mar. 1:38). w21.05 4 párr. 9, 10

Jirinhaantaxakachi imeechani engaksï ‘tsípikua jingoni xarhatajka eskaksï uékasïnga irekani para méntkisï’ (Hech. 13:48, TNM). Parakaksï niáraaka Jesúsiiri chúxapatiini, jatsiskachi para jarhuataani 1) kurhanguni, 2) jiókuarhini ka 3) eskaksï ísï uaaka eskaksï na jorhenguarhini jaka Bibliarhu (Kol. 2:6, 7; 1 Tes. 2:13). Iámindu kúnguarhikuarhu anapuechaksï uaati jarhuataani engaksï xarhatakuaska eskaksï xénchaasïnga ka engaksï sési eroaska tánguarhikuecharhu (Juanu 13:35). Ístu, jorhentpiri jatsisti para úrani tiempu ka uinhapikua para jarhuatani jorhenguarhirini jurajkuni jakajkukua ambe ka pʼindekuechani enga kánikua jakajkuajka ka uaani (2 Kor. 10:4, 5). Jarhuatani nemani para jurajkuni iámindu i ambe paraka niáraaka itsï atakuarhini kánikua tiempu pásïndi, joperuchi no tsïtani uéraaka. w21.07 3 párr. 6

¿Seguruchi jarhaski eskaksï Jeobaeri testiguechaksïsï jorhentpijka jurhimbikuani ka eskaksï imasï ísï kómarhini jaka Tata Diosïni eska ima na jaiapanhintajka ini jurhiatikuechani jimbo? Apostoli Pablu seguru jarhaspti eska ima ambe enga ima jakajkuenga jurhimbikuespka (1 Tes. 1:5). Ka enga ísï jakajkuenga, no ískuespti. Ima kánikua sési jorhenguarhispti Tata Diosïiri Karakatani. Jakajkusïreendi eska “iámindu Diosïiri karakata, Diosïni jimboes[ka]” (2 Tim. 3:16). Enga jorhenguarhipka Tata Diosïiri Karakatani, Pablu uánikua ambe exentaspti enga xarhateenga eska Jesúsi jindeespka Mesíasi enga Tata Diosï axapka. Joperu, judiuecheri relijioniiri orhejtsïkutiicha, nóksï uékaspti ini ambe jakajkuni. Ima ísku apariicha, uandasïreendiksï eskaksï marhuakuxapka Tata Diosïni peru imeeri úkuechaksï xarhatasïreendi eska no ísïispka (Titu 1:16). Joperu, apostoli Pablu no erakuspti ambesï jakajkupirini Tata Diosïiri Karakatarhu ka ambe nómbe. Sánderu sési, uékaspti jorhentpini ka úni “iámindu ambe enga Tata Diosï tantiarika [o uékani]” (Uku. 20:27). w21.10 18 párr. 1, 2

Nájkirukachi jucha ikarajka ka itsï jatsikuni, jatsiskachi para miáni eska Tata Diosïiska enga újka eska kʼuiripeaka (1 Kor. 3:6, 7). Jimboka Tata Diosï Jeoba kánikua jukaparharasïnga kʼuiripuecheri tsípikuani, íntskustijtsïni sésikua parachi imeeri Uájpani jingoni ánchikuarhini ka iápurisï anapu kʼuiripuechani tánantani imeeri iretarhu ante de i parhakpini kʼamajkunhani (Ageo 2:7). Engachi aianhpini nirajka, ísïiskachi komueska ima kʼuiripuecha engaksï juátarhisï nirajka jirinhantaani ima kʼuiripuecha engaksï juátarhisï tsïnchejka. Ka nájkirukaksï no iáminduecha engaksï nirajka jirinhaantani újka exeantani kʼuiripuechani, kánikua jukaparhakuesti ambe engaksï újka iáminduecha. Májkueniisti aianhpikua jingoni: nóchi míteska namuni kʼuiripuechaksï útasï uaa pʼímutantskata uérani Noambakitiiri parhakpini jimbo, joperu Jeoba uaati né uéjki juchantsïni axani parachi jarhuatani. Andreas enga Bolivia irekani jaka, uandasïndi: “Míteska eska uánikua kʼuiripuecheri jarhuajperata jingoni, nema niárasïnga míteni jurhimbikuani ka itsï atakuarhini”. Ísï jimbo, ju je jánguarhintani méntkisï tsípikua jingoni aianhpini. Ka engachi ísï úska, Jeobajtsïni újchakuraati ka sánderuchi tsípikua jingoni irekaaka engachi niraska aianhpini. w21.05 19 párr. 19, 20

Ima enga animaliichani jupiani jámajka, uékasïndi uándikuni o jupikani animalini ma, ka para ísï úni mámaru járhati trampechani úraasïndi, komu ima járhati enga Jobueri amigu arhikata ma uandaapka (Job 18:8-10). ¿Ka ambe úsïni paraka animali ma tramparhu niáraaka? Exesïndi nani enga ísï jámajka, ambe enga tsitijka, ambe enga uaaka úrani para jupikani. Satanási májkueni úsïndi juchantsïni jingoni. Exesïndi nani engachi ísï jámajka, ambe engachi tsitijka ka tátsekuajtsïni imani trampa jatsikuchisïndi engachi jucha no erokuarhini jarhajka. Joperujtsïni Biblia arhisïndi ambe engachi uaaka úni parachi kéndikukuarhini imeeri tramparhu. Ka engajtsïni niáraska jupikani, néna engachi uaaka uéntani tramparhu. Tsimani trampecha engaksï kánikua marhuajka Satanásini desde iónisï, jindeestiksï enga nema niárajka kʼéramakuarhini ka enga jukari uékajka jatsini ambe ma. Ima ísïisti eska ima enga pájaruechani trampechani jatsikukuajka (Sal. 91:3). Joperuchi no jatsiska para jurajkutakuarheni parajtsïni Noambakiti támisï jánhastani imani ambe jingoni enga úrajka, jimbokajtsïni Tata Diosï Jeoba aianguskia ambe enga úrajka (2 Kor. 2:11). w21.06 14 párr. 1, 2

Erachiicha engaksï jatiriikia ka engaksï sési marhuakuni jaka Tata Diosïni, kánikuaksï jukaparhakua ambeesti. Tata Diosïiri Karakata terukutantasïndi imeecheri tʼupuntsïkuani korona ma jingoni (Prov. 20:29). Peru no xáni fásiliisïndi exeni na engaksï xáni jukaparhakueka. Tumbiicha engaksï jukaparharajka erachiichani engaksï jatiriikia, sánderuksï ambakiti ambe jatsisti ka eska tesoru ma. Tata Diosï Jeoba kánikua jukaparharaasïndi erachiichani engaksï jatiriikia. Sési mítesti na engaksï jásï kʼuiripueka ka jukaparharaasïndi imeecheri kualidadichani. Kánikua tsípisïndi exeani engaksï jorhendaajka tumbiichani iámindu imani ambe engaksï desde iónisï jorhenguarhikia (Job 12:12; Prov. 1:1-4). Ístu, kánikua jukaparharasïndi na engaksï xáni tekaantajka (Mal. 3:16). Nájkirukaksï jatsiajka uandanhiateechani, méntkisïksï xarhatasïndi eskaksï kánikua mintsikasïnga Tata Diosï Jeobani. Iásïksï sánderu mintsikasïndia imani ambe engaksï erokuarhini jaka para sánderu orhepatini eska jiáni engaksï mítepka jurhimbikuani. Ka Tata Diosï Jeoba xénchaasïndi jimboka “nájkirukaksï jatiriikia”, seguiriisïngaksï uandantani imeeri nombriiri ambe (Sal. 92:12-15). w21.09 2 párr. 2, 3

Sési jarhasti eskachi someni exekuarhini jauaka, ambe jimbochisï újki ambe ma. Uaakachi kurhamarhikuarhini: “¿Jatsiski parani máteruecha jingoni terukukuarhintani parani sési pʼikuarherani? ¿Ambesï újki eskani uékaaka marhuani kúnguarhikuarhu? ¿Jindeeski parani xarhatani eskani sánderu kʼéri ambeeska eska máteruecha o sánderu kʼéri ambeeni eska erachi o pirenchi ma? ¿O jindeeski parani úni sánderuni sési marhuakuni Tata Diosï Jeobani?”. Bibliajtsïni arhisïndi eskachi no jámaaka máteruecha jingoni terukukuarhintani. ¿Andi? Jimboka engachi terukukuarhintaska máteruecha jingoni, uaakachi sánderu kʼéri pʼikuarherani ka í ambe uaati eskachi kʼéramakuarhiaka. Ka engachi menusi pʼikuarheraska, í ambe uaati úni eskachi chkétakukuarhiaka (Rom. 12:3). Ju je miáni eskajtsïni Tata Diosï Jeoba xénchasïnga jimbokachi jucha xénchasïnga imani ka jimbokachi kurhajchasïnga imeeri Uájpani ka no jimbokachi sési jáxeska, o jimbokachi úsïnga sési uandontskuarheni o sési pájperani máteruecha jingoni (Juanu 6:44; 1 Kor. 1:26-31). w21.07 14, 15 párr. 3, 4

Parachi úni ménderueni irekani, jatsiskachi para kómarhikua úni, jorhenguarhini ka eratsentani Tata Diosïiri Karakatani. Ju je méntkisï úni ini ambe ka kurhakuni Tata Diosï Jeobani eskajtsïni uinhapikua íntskuaka. Ka imeeri espiritu santujtsïni jarhuataati parachi no jámani terukukuarhintani máteruecha jingoni. Ístujtsïni jarhuataati parachi exekuarhini sinchi kʼéramakuarhixaki ochi enbidia pʼikuarherani ka parachi jirejiresï úni ambe ma parachi no ísï eratseni (2 Crón. 6:29, 30). Tata Diosï Jeoba sési mítesti juchaari mintsitani. Ístu mítesti eskachi jánguarhintaxaka parachi no ísï jámani eska parhakpini anapuecha ka parachi no úni ambe engachi pekadu jimbo újka. Enga exejka na engachi xáni jánguarhintani jarhajka parachi no indeni ambe úni, sánderujtsïni kánikua xénchasïndi. Para Tata Diosï Jeoba xarhatani ambe enga pʼikuarherajka juchantsïni jimbo, amambeeri ejemplu ma úrasïndi enga kánikua xénchajka imeeri charhakuni (Is. 49:15). Tata Diosï Jeobajtsïni kánikua xénchasïndi enga exejka eskachi kánikua jánguarhintani jarhasïnga parachi sési marhuakuni. ¿A no eska inde ambe míteni kánikuajtsïni sési pʼikuastantajka? w21.07 24, 25 párr. 17-19

Juchajtuchi uaaka sési pʼikuarherani engachi kánikua jánguarhintaska náki uéjki ánchikuarhitarhu engachi intsïnhaaka para Tata Diosï Jeobani marhuakuni. Ju je jánguarhintani aianhpini xáni eskachi na xáni uaaka ka jarhuajpeni kúnguarhikuarhu (Uku. 18:5; Ebr. 10:24, 25). Ju je sési prepararikuarhini parachi uinhaperantaani máteruechani juchaari komentariuecha jingoni. Ju je sési úni náki uéjki parti engachi jatsiaka tánguarhikuarhu entre semana anapuni. Engachi arhinhaska parachi jarhuajpeni ánchikuarhita ma úni kúnguarhikuarhu, ju je xarhentku niárani ka mintsinharhikueni. Nóchi jámaaka eratseni eska máru ambe engachi újka no xáni jukaparhakueska ka eska no uétarhisïnga eskachi tiempu úraaka para indeni ambe úni. Ju je jánguarhintani sánderu sési úni ambe ma (Prov. 22:29). Engachi sánderu marhuakuska Tata Diosï Jeobani, sánderuchi andarhieraaka ka sánderuchi tsípikua jingoni irekaaka (Gal. 6:4). Ka sánderuchi tsípiaka engaksï máteruecha imani ánchikuarhiteechani intsïnhaaka engachi jucha tsitipiringa jatsini (Gal. 5:26). w21.08 22 párr. 11

Ju je no kʼéramakuarhini ka ju je jurajkuni eskajtsïni Tata Diosï Jeoba jorhendaaka. Májkueni eska pʼamenchakua ma na újka eska mintsita nóteru uaakia sési ánchikuarhini, enga ma kʼéramakuarhijka úsïndi eska ma úkua jukanchaaka kurhajchani Tata Diosï Jeobani. Fariseuechaksï kánikua kʼéramakuarhisïreendi ka indeni jimbo imeecheeri mintsita úkua jukanchaspti exeni eska Jesúsi meru Tata Diosïiri Uájpeespka ka eska imeeri espiritu santu jimbosï úni japka ambe ma (Juanu 12:37-40). Jimbokaksï ísï jámaspka, tsïtakuarhisptiksï sésikua paraksï úni irekani para méntkisï (Mat. 23:13, 33). Kánikua jukaparhakuesti eskachi seguiriuaka jurajkuni eskajtsïni Tata Diosïiri Karakata ka imeeri espiritu santu seguiriuaka jarhuatani parakaksï juchaari eratsekuecha ka ambe engachi erakuaka úni, terukuntaaka imani jingoni enga ima uékajka. Santiagu kaxumbitiispti ka jurajkuspti eska Tata Diosï Jeoba jorhendapiringa. Ka kaxumbikua jimbo niáraspti ambakiti jorhentpiri máeni. w22.01 10 párr. 7

Engachi no kuatantaska kómarhini, uaakachi seguru jarhani eskajtsïni juchaari Taati auandarhu anapu kurhajchaaka ka mókuchintani (Kol. 4:2). Úpiringachi eratseni eska Tata Diosï Jeoba ióndaxaka mókuantani juchaari kómarhikuechani, joperu imajtsïni aiachisïndi eskajtsïni mókuchintaaka “imani tiempu jimbo engachi uétarhinchaaka” (Ebr.4:16). Ísï jimbo, nóchi méni jatsiaka para eratseni eska Tata Diosï Jeoba no sési úsïnga engajtsïni no mókuchintaaka jiáni engachi jucha uékajka. Uánikuechaksï ióni páxatiia kurhakuni eska jurajkuauaka paraksï exeni jiáni enga Tata Diosïiri Reinu kʼamajkuaka ini parhakpinini. Jesúsi mismu uandaspti eskachi jatsiska para kurhajkuarhini eska juuaka Tata Diosïiri Reinu (Mat. 6:10). Joperu kánikua no sési japirindi eskachi jucha nóteru mintsikapiringia Tata Diosïni jimboka nótki kʼamakurhixaka parhakpini anapu ambe jiáni engachi jucha uékapiringa (Hab. 2:3; Mat. 24:44). Ambe enga sánderu sési jaka, jindeesti eskachi erokuarhiaka eska Tata Diosï Jeoba uaaka ambe ma ka eskachi jucha seguiriuaka mintsinharhikua jingoni kómarhini. I parhakpini anapu ambe kʼamakurhiati “ima jurhiatikua ka ima ora” enga Tata Diosï Jeoba uaxastakata jatsikia. Ka jiáni ísï úkuarhiati enga sánderu sési jauaka para iáminduecha (Mat. 24:36; 2 Ped. 3:15). w21.08 10 párr. 10, 11

Erachiicha engaksï jatiriikia ka kaxumbitiinksï, kurhangusïndiksï eskaksï nóteru úsïngia xáni ambe úni eska antesi. Pori ejemplu, sirkuitueri orhejtsïkutiicha engaksï 70 jatiriijkia, máteru ánchikuarhitaksï intsïnhasïndi. Joperuksï imeecha eratsesïndi eska sánderu sési jarhaska eska nema enga sánderu sapichku jaka, uaakia indeni ánchikuarhitani. Ísïksï úsïndi eska ióntki anapu lebiteecha, engaksï nóteru ánchikuarhiengia tabernakulurhu engaksï na 50 jatiriengia. Imeecheri tsípikuarhita no indeni ánchikuarhita jimboesïreendi. Tsípikua jingonksï úsïreendi ambe engaksï xáni úpiringa ka jarhuatasïreendiksï sánderu sapichkuechani (Núm. 8:25, 26). Iásï, nájkirukaksï erachiicha engaksï sirkuitueri orhejtsïkutiipka, nóteru pʼorhembiajkia uánikua kúnguarhikuechani, kánikuaksï jarhuatasïndi ka uinhaperantani kúnguarhikuani engaksï imeecha marhuajka. w21.09 8, 9 párr. 3, 4

Jesúsi uandaspti ejemplu ma tumbiiri ma enga tsïnchepka ka engachi uaaka arhintani jimini Lukasʌ 15:11-32 jimbo. I tataka nóteru uékasptia kurhajchani taati jémbani ka uéntaspti imeo ka niraspti asta “máteru nasioni jimbo ísï”. Jimini kánikua no sési jásï ambe úspti. Joperu enga ueenapka problemechani jatsiani, ueenaspti eratsentani ka kuenta íntskukuarhespti eska sánderu sési irekaspka imeeri taati jémbeeri kʼumanchikuarhu. Ísï eska na uandapka Jesúsi, i tumbi eratsentaspti. Kʼuanhatsentaspti imeeri taati jémbeeri kʼumanchikuarhu ka arhisti taati jémbani eska puákuntapiringa. Kánikua jukaparhakuespti enga kuenta íntskukuarhepka eska no sési ambe úspka ka jatsispti para mójtakurhini. ¿Néna xarhataspi tumbi enga tsïnchepka eska meru móantaspkia? I ejemplu enga Jesúsi uandantapka no solujtsïni mintsitarhu niárachesïndi. Ambakiti ambe jorhendaasïndi orhejtsïkutiichani paraksï míteni sini sési jimbo móantaskia nema enga kʼéri pekadu ma úka. w21.10 5 párr. 14, 15

¿Ambesï no uaratanhaa o kʼamajkunhani? Apostoli Pablu karaspti: “Jimajkani iásï engachi niárakia indeni juramukuarhu enga no újka mójtakunhani [o uaratanhani], ju je marhuakuni Tata Diosïni, chérhiparini [o chénharhiparini] ka janhanharhiparini” (Ebr. 12:28). Ísï jimbo, enga na últimu uaratanhaakia iámindu ambe, Tata Diosïiri Juramukuajkusï pakaraati enga méntku no ma ambe uaaka manatani (Sal. 110:5, 6; Dan. 2:44). Nóteru tiempu jarhastia. Kʼuiripuechaksï jatsisti para erakukuarhini, ¿seguiriuaksï apoiarini ini parhakpinini ka kʼamajkunhanksï?, ¿oksï mójtakurhia paraksï ísï irekani eska Tata Diosï na uéjka ka tátsekuaksï intsïnhani tsípikua para méntkisï? (Ebr. 12:25). Engachi aianhpijka, jarhuataasïngachi kʼuiripuechani paraksï ini xáni jukaparhakua ambe erakuni úni. Ka ju je no mirikurhini tata Jesukristueri uandakuechani: “I ambakiti aianhperakua [Tata] Diosïiri Juramukueri, ainhpinhaati iápuru parhakpinirhu paraka iápuru anapu kʼuiripuecha mítetinksï jauaka, ka jimajkani kʼamaraati i tiempu” (Mat. 24:14). w21.09 19 párr. 19, 20

Orhejtsïkutiicha, chájtsï sánderu jatsiska responsabilidadi parajtsï uinhaperantaani imani erachiichani engaksï jatsikuarheka nemani enga jurajkuka Tata Diosï Jeobani (1 Tes. 5:14). Chá ueena je andarhieraani ka uandontskuarhekua je ante de ueenani tánguarhikua ka enga na kʼamaraakia. Pʼorhembia je ka kómarhijpikuani. Ístujtsï uaaka uérani aianhpini imeecha jingoni o ménichanisï pʼímarhiani chaari familieri jorhenguarhikuarhu. Orhejtsïkutiichaksï jatsisti para pʼamojperakua xarhatakuani ka uékperakua imani erachiichani engaksï no sési pʼikuarherani jaka (1 Tes. 2:7, 8). Tata Diosï Jeoba no uékasïndi eska nema “tsïncheaka sino eska iáminduecha andajkuarhiaka móantani” (2 Ped. 3:9). Nájkiruka kʼuiripu ma kʼéri pekadu ma uaaka, imeeri tsípikua útasï kánikua jukaparhakuesti para Tata Diosï. Ju je miáni eska Tata Diosï kánikua maiampiska mándani arhini juchantsïni jimbo: Imeeri Uájpeeri tsípikua jingoni enga ima xáni xénchajka. Tata Diosï uékperakua jingoni uékasïndi jarhuataani imeechani engaksï jarharika paraksï kʼuanhatsentani. Ka erokuarhisïndi eskaksï ísï uaaka, ísï eskachi na jorhenguarhijka ejemplurhu enga Jesúsi uandantapka sapiiri enga tsïnchepka (Luk. 15:11-32). w21.09 30, 31 párr. 17-19

¿Ka engajtsï nóteru xáni újkia aianhpini ka jorhentpini ísï eska antesi jimbokajtsï nóteru xáni uinhapiskia ojtsï pʼamenchani jarhani? Útasï ísï, uaakajtsï sési pʼikuarherani imani ambe jimbo engajtsï újka úni aianhpikuarhu. Ju je exeni ambe enga úpka rei Dabidi ka imeeri soldaduecha engaksï andaapka amalekitechani engaksï sïpatspeni jámeenga ka engaksï euantaapka imeecheri familiechani ka iámindu ambe engaksï sïpakuapka. Dosientu soldaduechaksï kánikua kuatarasptia ka nóksï niraspti uarhipeni, pakarasptiksï kuáni imeecheri ambe. Engaksï na andaapkia, Dabidi uandaspti eskaksï iáminduecha májkueni pʼipiringa imani ambe engaksï amalekitechani euapka (1 Sam. 30:21-25). Iásïjtu, sáno májkueni úkuarhisïndi engachi Jesúsiiri chúxapatiichani uaajka. Iáminduecha engachi jánguarhintajka xáni eskachi xáni uaaka Tata Diosï Jeobani marhuakuni, asta chá jamberi, uaakachi sési pʼikuarherani, méntkisï enga nema niáraka Tata Diosï Jeobani marhuakuni ka enga inchajka xanharurhu enga tsípikuarhu pájpejka para méntkisï. Tata Diosï Jeoba exesïndi na engachi xáni jánguarhintajka ánchikuarhini ka eskachi uékperakua jimbo úsïnga ka imajtsïni kóndentasïndi. Ístujtsïni jorhendasïndi parachi sési pʼikuarherani imani ambe jingoni engachi újka úni aianhpikuarhu (Juanu 14:12). Ju je seguru jarhani eskajtsïni Tata Diosï jaiapanhentaaka engachi jucha no kuatantaska. w21.10 28 párr. 15-17

Engachi jatiripani jarhajkia, úpiringachi chénisï pʼikuarherani engachi eratsejka eskachi nóteru uaakia xáni marhuakuni Tata Diosï Jeobani. Ísïisti eskachi nóteru xáni uinhapikua jatsisïngia, joperuchi uaaka úrani juchaari jánhaskakuani ka ambe engachi xáni jorhenguarhikia, para jarhuataani tumbiichani paraksï sánderu jarhuajpeni Tata Diosïiri kúnguarhikuarhu ka paraksï intsïnhaani mámaru járhati ánchikuarhiteechani. Engaksï jatiriicha uéjka jarhuataani tumbiichani, jatsistiksï para kaxumbitiini. Ima enga kaxumbitiijka, eratsesïndi eskaksï máteruecha sánderu kʼéri ambeeska eska ima (Filip. 2:3, 4). Imeecha engaksï jatiriikia ka kaxumbitiini, mítestiksï eska uaaka mámaru úkuarhini ambe ma enga terukuntajka Biblia jingoni ka enga sési jauaka. Ísï jimbo, nóksï erokuarhisïndi eskaksï máteruecha ísï uaaka ambe ma eskaksï imeecha na ueenga (Ecl. 7:10). Nájkirukaksï uánikua ambe míteka engaksï úpiringa máteruechani jorhendaani, mítestiksï eska iámindu parhakpini anapu ambe engachi iásï exeni jaka, mójtakukuarhipaxaka ka eska jamberi uétarhiaka eskaksï ísï uaaka ambe ma eska na úkuarhini jaka iásï (1 Kor. 7:31). w21.09 8 párr. 1, 3

Tata Diosï Jeobajtsïni no méni kurhachesïndi eskachi imani ambe uaaka engajtsïni no sési pʼikuastajka. Ima méntku iámindu ambe jimbo pímbinhasïisti. Para miátantaani israeliteechani indeni ambe, kʼéri saserdoti turbanti ma jukajtsïsïreendi enga plaka ma orueri jukapka, jima arhisïreendi: “Tata Diosï Jeobaeristi pímbinhasïikua” (Éx. 28:36-38). Náki uéjki kʼuiripu enga exeenga imani plakani, sési mítetini jarhasïreendi eska Tata Diosï Jeoba kánikua pímbinhasïiska. Peru, enga israelita ma no ueenga plakani exeni jimboka no úsïreenga andarhierani kʼéri saserdotini, ¿úpirini míteni eska Tata Diosï Jeoba pímbinhasïiska? Jo. Iámindu israeliteechaksï úsïreendi kurhaani indeni uandakuechani jiáni enga Lei arhinhanteenga achamasïichani japarini, uarhiitiichani ka sapiichani japarini (Deut. 31:9-12). Engachi jima japiringa kurhauapiringachi ini uandakuechani: “Ji jindeeska Jeoba chaari Tata Diosï, [...] ka chájtsï jatsiska para pímbinhasïini jimbokani ji pímbinhasïiska” ka “chájtsï jatsiska para pímbinhasïini jimbokani ji, Jeoba, pímbinhasïiska” (Lev. 11:44, 45; 20:7, 26). w21.12 3 párr. 6, 7

Jamberiksï uánikua erachiicha kánikua uandanhiajti paraksï jatsini ambe engaksï uétarhinchajka. Jamberijtsï jimeesïsï irekaka enga no fásiliika ánchikuarhita ma jatsini ka ini ambe jimbojtsï úkua jukanchani chaari familiani kéndani. O ima enga ánchikuarhienga para familiani kéndani, jamberi uarhinia ka ísï jimbo, nóteruksï jatsinia para ima ambe engaksï uétarhinchajka. Ambe ma engajtsïni jarhuataaka, jindeesti mintsikani Tata Diosï Jeobani enbesi de uandanhiani jarhani. Ju je miáni eska Tata Diosï Jeoba enga xáni uékpitiika aiachisïngajtsïni eska engachi mintsikaska imajtsïni iámindu ambe íntskuaka ambe engachi xáni uétarhinchajka (Mat. 6:32, 33). Jimboka desde iónisï ísï úskia (Deut. 8:4, 15, 16; Sal. 37:25). Enga Tata Diosï Jeoba kuidariuajka pájaruechani ka tsïtsïkiichani, nóchi jatsiska para uandanhiani ambechi tʼirea o ambechi xukuparhaa (Mat. 6:26-30; Filip. 4:6, 7). Ísï eska uékperakua na újka eskaksï taatiicha íntsauaka uájpeechani ambe engaksï xáni uétarhinchajka, májkueni uékperakua úsïndi eska juchaari Taati auandarhu anapu, íntsauaka imeeri marhuariichani iámindu ambe engaksï uétarhinchajka. w21.12 17 párr. 4, 5; 18 párr. 8

¿Ménisïksïni niáraski erachi ma no sési úchini kúnguarhikuarhu? Eratsenta je Joséeri ejempluni. Ima no ikiani pakaraspti imani no sési jásï ambe jimbo engaksï ermanu jémbeecha úkupka. Ima seguirispti marhuakuni Tata Diosï Jeobani ka ima újchakuraspti imeeri tekaantskua jimbo ka jimboka no kuatantaspka. Ísï tátsekua José úspti puákuantani ermanu jémbeechani ka exespti na enga Jeoba újchakuraapka (Gén. 45:5). Májkueni eska José, juchajtuchi uaaka sési pʼikuarherantani engachi andarhieraska Tata Diosï Jeobani ka engachi jurajkuska eska ima sési peentaaka ambe ma (Sal. 7:17; 73:28). Engajtsïni nema no sési kámani jaka o engachi máteru uandanhiata ambe jatsika engajtsïni no sési pʼikuastani jaka ka tekaantanchi jarhani, ju je miáni eska Tata Diosï Jeoba imeecha jingoni jarhaska “engaksï no sési pʼikuarhinhijka mintsitarhu” (Sal. 34:18). Imajtsïni xénchasïndi jimbokachi tekaantstiiska ka jimbokachi imani jurajkukuasïnga uandanhiateechani (Sal. 55:22). Ima jindeesti Juesi iámu Echerirhu ka iámu ambe exesïndi (1 Ped. 3:12). Ísï jimbo, engachi jucha jatsiaka problemechani engachi no uaaka sési peentani, ju je miáni eskachi jatsiska para Tata Diosï Jeobani jurajkukuni para ima úni ambe ma. w21.08 12 párr. 14, 16

Sánderu sési jarhasti eskachi imani ambe uaaka enga sési pʼikuastaaka Tata Diosï Jeobani. Jatsiskachi para imani ambe úni enga sánderu jukaparhakueka. Parachi úni sési úrani juchaari tiempuni, jatsiskachi para imani ambe erakuni enga sánderu jukaparhakueka. Inde ambesï úkuarhipti enga Jesúsi nípka pʼorhembini Maríani ka Martani. Jimboka Marta kánikua sési kámpisïreenga ka jimboka kánikua sési pʼikuarheraxapka enga Jesúsi imeecho japka, úmakuntaspti. Joperu María, Jesúsi jingoni uaxakaspti para kurhaani ambe enga ima uékeenga jorhendaani. Marta no no sési ambe úspti, joperu Jesúsi uandaspti eska ʻMaría sánderu ambakiti ambe erakuspkaʼ (Luk. 10:38-42). Jamberi María mirikurhipti ambe enga jiáni tʼirepka, joperu seguru eska no méni mirikurhipka ambe enga Jesúsi jorhendapka. María kánikua jukaparharaspti indeni tiempuni enga Jesúsi jingoni japka, juchajtuchi májkueni jukaparharasïnga indeni tiempuni engachi Tata Diosï Jeobani jingoni jarhajka. w22.01 27 párr. 5, 6

Nájkiruka Akabi kaxumbintapka Tata Diosï Jeobani japarini, tátsekua xarhataspti eska no meru móantaspka. No ma ambe úspti paraka nóteru kómarhinhapiringia Baali, ni arhipi ireta Israelini eska kómarhipiringa Tata Diosï Jeobani. Enga Akabi na uarhipkia, Tata Diosï Jeoba uandaspti ambe enga eratseenga imeeri ambe. Tata Diosï Jeoba axaspti profeta Jeúni para arhini eska no sési jarhaspka ambe enga úpka (2 Crón. 19:1, 2). Ju je eratseni ini ambe: enga Akabi sési jimbo móantapiringa, profeta no uandapirindi eska imajtu no sési úri máespka ka eska ikiakusïreenga Tata Diosï Jeobani. Ísï jimbo, nájkiruka Akabi no sési pʼikuarherapka imani ambe jimbo enga úpka, no meru móantaspti. ¿Ambechi jorhenguarhisïni Akabiiri ejemplueri? Enga Elíasi aiangupka ambe enga úkuarhinchapiringa imeeri familia, orheta Akabi kaxumbintaspti. Sési ueenaxapti, joperu ambe enga tátsekua úpka, xarhataspti eska no meru mintsita jingoni móantaspka. I ambejtsïni jorhendasïndi eska enga nema meru móantajka, no nomasi no sési pʼikuarherasïndi imani ambe jimbo enga úka, sino sánderu ambe arhikuekasïndi. w21.10 3 párr. 4, 5, 7, 8

Isaíasi profeteespti ka péringa imeeri témba sáno májkueni jásï ambe ueenga, jimboka Biblia arhisïnga “profetisa” (Is. 8:1-4). I temungurhiri sánderu jukaparharasïreendi kómarhini Tata Diosï Jeobani. ¿Ambeksï uaa úni temungurhiriicha paraksï májkueni úni eska Isaíasi ka imeeri témba? Jánguarhintani sánderu marhuakuni Tata Diosï Jeobani. Paraksï sánderu mintsikani Tata Diosïni, uaatiksï tsimarhani Biblieri profesiechani jorhenguarhiani ka exeni na engaksï ícha méntkisï úkuarhijka (Titu 1:2). Uaatiksï eratsentani na engaksï uaaka jarhuajpeni paraksï kumplirikuarhini profesiecha, komu ima enga Jesúsi uandapka eska ambakiti aianhperakua, aianhpinhapiringa interu parhakpinirhu ante de jurhani kʼamajkukua. Engaksï sánderu seguru jauaka eskaksï úkuarhixaka Biblieri profesiecha, sánderuksï uékaati marhuakuni Tata Diosï Jeobani. w21.11 16 párr. 9, 10

Jesúsi uékasïreendi eska imeeri naandi, enga jamberi tsïndiipkia, jatsipiringa ambe enga uétarhinchapiringa. Jimboka xénchasïreenga amambani ka uandanhiani imani jimbo, Jesúsi mintsikaspti Juanuni paraka ima kuidaripiringa, jimboka mítespka eska ima jarhuatapiringa paraka seguiripiringa Jeobani marhuakuni. Jiáni uératini, María ísï exespti Juanuni komueska imeeri uájpa ma ka Juanu ísï kuidarispti Maríani komueska imeeri amamba. Jesúsi kánikua uékperakua xarhatakuspti imani uarhiitini enga xáni xénchperakua jingoni kuidaripka desde jiáni enga andajpenupka ka enga iásï jima japka enga uándikunhapiringa. ¿Ambechi uaa jorhenguarhini? Jamberichi uaaka sánderu sési pájperani kúnguarhikuarhu anapuecha jingoni eska juchaari familia jingoni. Uaatijtsïni máru parienticha no sési kámani o astajtsïni jurajkuni. Peru, ísï eska Jesúsi na aiatspeka, engachi no jurajkuaka Jeobani ka imeeri kúnguarhikuani, “100 uelta sánderu ambechi intsïnaaka” ka eska ima ambe engachi tsïtaaka. Uánikuaksï niáraati ísïini para jucha komueska juchaari uájpeecha, juchaari naandiicha o juchaari taatiicha (Mar. 10:29, 30). ¿Nénachi pʼikuarherasïni familia ma jimbo jarhani enga májku kʼéri jaka jimbokaksï iáminduecha mintsikasïnga ka xénchani Jeobani ka erachiichani? (Kol. 3:14; 1 Ped. 2:17). w21.04 9-11 párr. 7, 8

Ambakiti uékperakua sánderu ambe úsïndi eska ambe enga ma erokuarhijka. Májkueni eska ióntki, iásï, uánikua Testiguechaksï uékasti ambakiti uékperakua xarhatakuani imeecheri erachiichani, asta imeechani engaksï no míteaka. Pori ejemplu, engaksï mítejka eska desastre naturali ambe úkuarhiska, jirejiresïksï kurhanguarhisïndi nénaksï uaa jarhuajpeni. O engaksï mítejka eska kúnguarhikuarhu anapu erachi ma no jatsiska sentabu, jánguarhisïndiksï exeni ambe enga uétarhinchajka ka jarhuatasïndiksï. Ísïksï úsïndi eska Masedonia anapu kristianuecha engaksï primeru siglurhu irekapka, imeechaksï no imani ambejkuksï íntspipti enga uétarhini japka “sino sánderu jamberi” (2 Kor. 8:3). Májkueni, iásï orhejtsïkutiichajtuksï sési arhiasïndi erachiichani engaksï jarhuajpejka kúnguarhikuarhu ka uékperakua jimbo engaksï xarhatakuajka máteruechani. Engaksï ísï arhiauaka, i ambe jarhuatauati paraksï uinhapikua jatsini ka paraksï úni orhepani uérani (Is. 32:1, 2). w21.11 11 párr. 14; 12 párr. 21

Iáminduechachi uétarhinchasïnga eskajtsïni nema ménisï konseju íntskuaka. Ménichani, arhisïngachi nemani engachi janhanharhijka eskajtsïni íntskuaka konseju ma. Peru ístu, jamberi erachi ma enga uandanhiajka juchantsïni jimbo, úpirindijtsïni arhini eskachi úxaka ambe ma engajtsïni úpiringa no sési úrani ka engachi jimbo no sési pʼikuarherapiringa (Gal. 6:1). O jamberichi konseju ma intsïnhajka ísï tátsekua engachi na no sési ambe niátajkia. Na uéjki jatini engachi intsïnhaaka konseju ma, jatsiskachi para kurhaani jimbokajtsïni marhuachesïnga ka jimbokaksï úsïnga eskachi tsípiti jauaka (Prov. 6:23). Iásï anapu tekstu, pʼímarhisïndijtsïni parachi kurhaani imeechani engaksï jánhastiika. No nema iámindu ambe mítesti; méntkisï jarhasïndi nema enga sánderu jánhastiuaka ka enga sánderu míteaka ambe ma eska jucha (Prov 12:15). Ísï jimbo, engachi kurhaaska ambe engachi arhinhajka, xarhatani jarhasïngachi eskachi kaxumbitiiska, eskachi míteska eskachi no uaaka iámindu ambe sési úni ka eskachi uétarhinchasïnga jarhuajperata para úni ambe engachi eratsetini jarhajka. Tata Diosï Jeoba úraspti rei Salomónini paraka karapiringa ini ambe: ‘Engaksï uánikuecha jarhajka engaksï konseju íntskujka sési uérasïndi ambe’ ma (Prov. 15:22). w22.02 8 párr. 1, 2

Ima pekadori enga xarhatajka eska sési jimbo móantaskia, no nomasi jatsisti para uandani eska no sési pʼikuarherasïnga imani ambe jimbo enga úka. Ístu, jatsisti para mójtakuni imeeri eratsekuani ka ambe enga pʼikuarherajka. Jatsisti para jurajkuni imani no sési jásï ambe enga úni japka ka ménderu kurhajchani Tata Diosï Jeobaeri juramukuechani (Ezeq. 33:14-16). Ambe enga jatsika para sánderu jukaparhakueni para ima, jindeesti sési pájperantani Tata Diosï Jeoba jingoni. ¿Ambechi jatsiski para úni engachi kuenta íntskukuarheska eska juchaari amigu ma kʼéri pekadu ma úska? Engachi jískaska ambe enga úka, no sésichi úkuni jauaka juchaari amiguni. Ístu, inde ambe, para no ma ambe marhuauati, jimboka Tata Diosï Jeoba iámu ambe exesïnga (Prov. 5:21, 22). Uaakachi jarhuatani juchaari amiguni engachi arhiska eskaksï orhejtsïkutiicha uékasïnga jarhuatani. Enga no uékaska aianguani orhejtsïkutiichani, juchachi jatsiska para uandontskuarheni imeecha jingoni. Ísïchi xarhatani jauaka eskachi meru uékasïnga jarhuatani. w21.10 7 párr. 19-21

Iáminduechachi uaaka májkueni úni eska Jesúsi enga uékapka jarhuataani máteruechani. Biblia uandasïndi eska ima ísï úkuarhintaspka komueska “jántspiri” ma (Filip. 2:7). Ambakiti jántspiri ma, jánguarhintasïndi paraka imeeri patroni jaiapanhentaaka. Jimbokachi Tata Diosï Jeobaeri jántspiriska ka ístu juchaari erachiicheeri, uékasïngachi jánguarhintani para sánderu sési marhuakuni Tata Diosïni ka ístu juchaari erachiichani. Uaakachi kurhamarhikuarhini: “¿Uékasïni jurajkuni juchiiti ambe para máteruechani jarhuataani? ¿Sóntkuni aiakukuarhesïni parani aseu úni jima enga kʼéri tánguarhikua úkuarhijka o parani máru ambe arreglarintani Kʼumanchikua Reinuerirhu?”. Engachi exeska eskachi jatsiska para sánderu sési úni ambe ma, peruchi no uékani ísï úni, ju je mintsita jingoni kómarhini Tata Diosï Jeobani. Ju je aiangukuarhini iámindu ambe, na engachi pʼikuarherajka ka kurhakuni eskajtsïni jarhuataaka indeni ambe úni ka ístu parakachi uékaaka ísï úni (Filip. 2:13). w22.02 22, 23 párr. 9-11

Jesúsi xénchaasïreendi kʼuiripuechani ka kurhangukuasïreendi (Mat. 11:29, 30). Pori ejemplu, enga Fenisia anapu uarhiiti ma kómarhipka Jesúsini eska ambakerantapiringa imeeri nanaka sapichuni, ima orheta no ísï úspti. Peru sési kámaspti uarhiitini ka ambakerantaspti nanaka sapichuni enga exepka na enga xáni mintsikeenga ima uarhiiti (Mat. 15:22-28). Joperu ístu Jesúsi xarhataspti eska sési kámpisïreenga enga jurhimberantaapka imeechani enga xénchauenga. Pori ejemplu, enga Pedru arhipka Jesúsini eska no úpiringa ambe enga Tata Diosï Jeoba uékeenga, Jesúsi jurhimberantaspti Pedruni máteru imeeri chúxapatiichani japarini (Mar. 8:32, 33). Jesúsi no úspti indeni ambe para Pedruni kʼuratsetani, sánderu sési, ísï úspti para jorhendani imani ka ístu máteru chúxapatiichani eskaksï no jámapiringa pʼínguni para ima no úni ambe enga Tata Diosï uéjka. Jamberi Pedru kʼuratsepti sáni, joperu inde ambe kánikua marhuakuspti. Para xarhatani eskachi sési kaasïnga imeechani engachi xénchaajka, ménichanchi jatsiska para konsejuechani íntskuani. Engachi ísï uaaka, ju je májkueni úni eska Jesúsi ka eskaksï konsejuecha Bibliarhu pʼitakata jauaka. w22.03 11 párr. 12, 13

Kʼéri ambechi arhisïnga Tata Diosï Jeobani engachi imeeri ambe aianguajka máteruechani (Sal. 34:1). ¿Ka nénachi úsïni indeni ambe? Engachi uandontskuarhekuajka máteruechani imeeri sési járhati kualidadicheeri ka engachi aianguajka ambe enga xáni újka ima. Engachi mintsita jingoni agradesidu jauaka imani jingoni, uánikua ambechi jatsiaka para aianguani máteruechani imeeri ambe. Ka engachi arhutaska tiempu parachi eratsentani ambe enga xáni úkia Tata Diosï Jeoba juchantsïni jimbo, méntkisïchi jatsiaka ambe ma engachi jimbo uaaka kʼéri ambe arhini imani. Engachi aianhpini jámajka, úsïngachi kéjtsïtakua úkuni Tata Diosïni “juchaari uandakuechani jimbo engaksï jindeeka para kʼéri ambe arhini”. Ísï eskachi na jatsika para sési eratsentani ambe engachi arhiaka Tata Diosï Jeobani juchaari kómarhikuecharhu, ístuchi jatsiska para sési eratsentani ambe engachi arhiauaka kʼuiripuechani aianhpikuarhu. Uékasïngachi sánderu ambakiti ambe íntskuni Tata Diosïni parachi “kʼéri ambe arhini”. Ísï jimbo, tsípikua jingonchi aianguasïnga máteruechani imeeri ambe. w22.03 21 párr. 8