Oktubri

Ambe engachi jorhentpijka ka jakajkuni, Bibliarhu jupindaskuarhisïndi. Ka nájkiruka i ambe ísïika, iásï uánikua kʼuiripuechajtsïni no sési exesïndi jimbokaksï eratsesïnga eskachi no kʼéri ambe úsïnga para Tata Diosïni kómarhini ka jimboka ambe engachi jorhentpijka no terukuntasïnga imani ambe jingoni engaksï kʼuiripuecha uéjka kurhaani. ¿Ambejtsïni jarhuataa parachi no ma ambe no sési exeni? Apostoli Pablu arhiaspti Roma anapu kristianuechani: “Ma niárasïndi mintsikani imani ambe jimbo enga kurhaajka, ka niárasïndi kurhaani enga nema aianhpijka Kristueri ambe” (Rom. 10:17, TNM). Niáraakachi sánderu mintsikani Tata Diosïni engachi jorhenguarhiska Bibliani ka no jimbokachi kʼérati kʼuínchikuecharhu nirasïnga engaksï no Bibliarhu jupindaskuarhijka. Jatsiskachi para jurhimbikua ambe míteni parachi úni mintsikani Tata Diosïni, jimboka enga nema “no mintsikaska Diosïni, nómindu uaati jaiapanhetarantani” (Ebr. 11:1, 6). Ísï jimbo, paraka nema seguru jauaka eska jurhimbikuarhu jarhaska, no uétarhisïndi eska exeranhaaka auandarhu anapu seniali ma. Solu uétarhisïndi sési jorhenguarhini ambe enga Biblia jorhentpijka, i ambe uaati eska ma sánderu mintsikaaka Tata Diosïni ka seguru jarhani eska jurhimbikuarhu jarhaska. w21.05 4, 5 párr. 11, 12

Apostoli Pablu uánikua ambe nitamanchaspti enga kánikua úkua jukapka. Kánikua uinhapikua uétarhinchaspti engaksï atapka tsakapkuerantani ka engaksï ónhapka (2 Kor. 11:23-25). Ka uandakuarhintaspti eska ménisï niárasïreenga chkétakuarhini (Rom. 7:18, 19, 24). Ístu, mintsita jingoni kómarhispti Tata Diosïni eska kénditakupiringa ambe ma enga ísïipka eska “chekamita ma” enga no sési pʼikuasteenga (2 Kor. 12:7, 8). Jeoba uinhaperantaspti Pabluni paraka aianhpepiringa nájkiruka uandanhiateechani jatsiapka. Ju je eranhaskani ambe enga xáni úpka. Pori ejemplu, enga ónhakuarhetini japka Roma, kʼumanchikua ma jimbo, tsípikua jingoni aianguaspti ambakiti aianhperakuani judiuecheri orhejtsïkutiichani ka jamberi máru imeechani japarini engaksï juramukuarhu ánchikuarhienga (Uku. 28:17; Filip. 4:21, 22). Ístu, uandontskuarhekuaspti sondaduechani ka imeechani engaksï jurheenga pʼorhembini (Uku. 28:30, 31; Filip. 1:13). Ima mismu tiempu jimbo, Tata Diosï úraspti Pabluni paraka karaapiringa máru kartechani enga kánikua marhuakuapka jiáni anapu kristianuechani ka ístu iásï anapuechani. w21.05 21 párr. 4, 5

Judá anapu rei Usíasi niáraspti kʼéramakuarhini enga no jiókuarhipka ambe engaksï máteruecha arhipka ka niáraspti úni ambe ma enga no sésikua jatsipka. Usíasi uánikua ambe sési úspti, andaaspti uánikua guerreechani, úspti eskaksï japiringa máteru ireteecha ka ístu uánikua animaliichani jatsiaspti. “Tata Diosï jurhimbiti úspti eska sési nikupiringa” (2 Crón. 26:3-7, 10). Joperu Biblia uandasïndi, eska enga na uinhapikua jatsipkia, imeeri mintsitani niáraspka xáni kʼéramakuarhini enga jamberi no sési ambe úkuarhinchapka. Tata Diosï Jeoba uandaspti eskaksï saserdotiichajkusï úpiringa kéjtsïtani insiensu templurhu. Jimboka xáni kʼéramakurhisïreenga, rei Usíasi insiensu uékasïreendi kéjtsïtani templurhu, ambe ma enga no sésikua jatsipka. Indeni ambe jimbo, Tata Diosï Jeoba úspti eska lepra pʼamenchapiringa (2 Crón. 26:16-21). ¿Juchajtuchi uaa kʼéramakuarhini ka ísï no sési ambe niátani eska rei Usíasi? Jo. Engachi juchaari ambejkusï eratseni jauaka, úpiringachi májkueni úkuarhinchani. Ísï jimbo, ju je méntkisï miáni eska iámindu ambe engachi jorhenaka úni ka iámindu ánchikuarhita engachi kúnguarhikuarhu jatsika, Tata Diosïni jimboeska (1 Kor. 4:6). Joperu engachi kʼéramakuarhiaka, Tata Diosï Jeobajtsïni no úraati parachi marhuakuni. w21.06 16 párr. 7, 8

Jesúsi mítespti eska imeeri disipuluechani no méntkisï sési nikuapiringa aianhpikuarhu. Nóchi míteska namuni ima kʼuiripuecheri engaksï Jesúsiiri chúxapatiicha aianguapka niárapi marhuakuani Tata Diosï Jeobani. Joperu Jesúsiiri chúxapatiichaksï jatsipirindi para sési pʼikuarherani, no solu jimbokaksï kʼuiripuecha sési kurhaapiringa, sino jimboka Tata Diosï Jeoba jaiapanhentapiringa na engaksï xáni jánguarhintapiringa. Engachi seguiriska aianhpini, jatsiakachi tsípikua para méntkisï. Engachi jánguarhintajka aianhpini ka jorhentpini Reinueri ambe, ístuchi úni jarhasïnga “ambe enga espiritu santu uékajka”. ¿Nénachi úsïni i ambe? Engachi jurajkutakuarhejka eskajtsïni espiritu santu jarhuataaka. Engachi ‘no kuatantaska’ Tata Diosï Jeobajtsïni aiachisïndi eskachi jatsiaka tsípikua para méntkisï, nájkirukachi no nemani jarhuataaka para itsï atakuarhini (Gal. 6:7-9). w21.10 26 párr. 8, 9

Ma xanhari, Jesúsi ka imeeri chúxapatiichaksï kánikua kuataratixaptia jimbokaksï chúskutaspka aianhpini, ísï jimboksïsï jirinhapti nani engaksï úpiringa mintsikuarhini. Joperu uánikua kʼuiripuechaksï jima eroaxaptia. Jimboka Jesúsi pʼamojkuaspka, “seguirispti mámaru ambe jorhendaani”. Jesúsi xáni jánguarhintaspti jimboka exespka na engaksï jánguarhintani japka ima kʼuiripuecha ka uékasïreendi jarhuataani. Mítespti eskaksï kánikua kómu nitamakuarhixapka ka eskaksï uétarhinchaxapka kurhaani eska jarhaspka ambakiti erokuarhikua ma. Iásïjtuksï kʼuiripuecha uétarhinchaxati erokuarhikua ma nájkirukaksï ísï xarharaaka eskaksï tsípixaka. Ísïistiksï eska karichicha engaksï tsïnchetini jámani jaka ka engaksï no nemani jatsika para eranguani. Apostoli Pablu, uandaspti eskaksï no Tata Diosï jingoni jarhaska ka eskaksï no jatsiska erokuarhikua ma (Efes. 2:12). Engachi eratsentajka na engaksï xáni uétarhinchajka kʼuiripuecha míteni Tata Diosïiri ambe, uékperakua ka pʼamojperakua úsïndi eskachi jarhuatauaka. Ka sánderu ambakiti ambe engachi uaaka úni imeechani jimbo jindeesti Biblieri ambe jorhendaani. w21.07 5 párr. 8

Enga nema kʼéramakuarhijka, sánderu kʼéri pʼikuarherasïndi eska máteruecha ka no uandanhiasïndi máteruechani jimbo. Ístu, ima enga enbidiariuajka máteruechani, tsitisïndi imani ambe jatsini engaksï máteruecha jatsijka, joperu ístu uékasïndi eskaksï máteruecha no ma ambe ma jatsiaka. Ísï jimbo, enbidiarini nemani arhikuekasïndi eskachi kurhunhisïnga. Kʼéramakuarhini ka enbidia pʼikuarherani, úpirindi ísïini eska ima basura enga jánharhitajka gasolina enga abioni ma jatantajka, abioni úpirindi kárani, peru ima basura úpirindi sánhani arhini míkaani manguerechani nani enga ísï nirajka gasolina. I ambe úpirindi úni eska abioni uekorhentaaka. Sáno májkueni, jamberi nema úpirindi sáni ióni páni jarhania marhuakuani Tata Diosï Jeobani, joperu úpirindi no sési úkuarhinchani enga enbidia pʼikuarherapiringa ka kʼéramakuarhini (Prov. 16:18). Jurajkupirindi Tata Diosï Jeobani, no sési úkuarhinchapirindi ima ka máteruechantu no sési úkuapirindi. Uaakachi no kʼéramakuarhini engachi úska ambe enga apostoli Pablu uandapka: “Asï jáma je úni ni ma ambe enbidia jimbo o teparakuarhikua jimbo, sino kaxumbikua jingoni, ka sánderu kʼéri ambe exeani máteruechani ka eska chájkumindu” (Filip. 2:3). w21.07 15, 16 párr. 6-8

Jarhastiksï kʼuiripuecha engaksï uandajka eska relijioni jurhimbiti jatsipiringa para iámindu kurhamarhikuechani mókuantani, asta imeechani engaksï no jaka Bibliarhu. Peru, ¿sési jarhaski ísï eratseni? Ju je exeni apostoli Pablueri ejempluni. Ísïisti eska ima arhiaspka Korintu anapu kristianuechani “Tsʼéjkua je iámindu uandakuechani”, peru ístu, jiókuarhispti eska ima uánikua ambe no úsïreenga kurhanguni (1 Tes. 5:21). Ima uandasti eskachi “kueratasïnga míteni iámindu ambe” ka eska “iásïchi ísï exesïnga [...] komueska ma espeju metaliiri jimbo no káni sési” (1 Kor. 13:9, 12). Pablu no iámindu ambe mítespti ka juchajtuchi nómbe. Joperu ima kurhangusïreendi uánikua ambe Tata Diosï Jeobaeri ambe ka uánikua ambe mítespti para úni seguru jarhani eska ima ambe enga ima jakajkuenga jurhimbikuespka. ¿Nénachi uaa sánderu seguru jarhani eskachi exentaskia jurhimbikuani? Ma ambe engajtsïni jarhuataaka jindeesti terukutantani na enga Jesúsi kómarhipka Tata Diosï Jeobani ka na engachi kómarhijka iásï Jeobaeri testiguecha. w21.10 18, 19 párr. 2-4

Erachiicha engajtsï jatiriikia, iasea engajtsï tiempu kompletueri marhuani jaka o nómbe, uaakajtsï kánikua jarhuataani máteruechani. ¿Néna? Engajtsï sési pʼikuarheraska imani ambe jimbo engajtsï jatsika, engajtsï eratseska ambejtsï uaa úni ka engajtsï imani ambe úska engajtsï uaaka. Rei Dabidi uékasïreendi úkuni Tata Diosï Jeobani kʼumanchikua ma. Joperu enga Tata Diosï Jeoba uandapka eska Salomónisï úkupiringa, Dabidi sési exespti ka úspti ambe enga xáni uétarhipiringa paraka úkuarhipiringa inde ánchikuarhita (1 Crón. 17:4; 22:5). No uandaspti eska imasï jatsipka para úni jimboka Salomóni sapichku jarhaspka ka eska no xáni ambe mítespka (1 Crón. 29:1). Dabidi mítespti eska ánchikuarhita sési uérapiringa enga Jeoba újchakurapiringa ka no na engaksï xáni jatiripiringa o na engaksï xáni mítekupiringa imeecha engaksï úpiringa. Májkueni eska Dabidi, erachiicha engaksï jatiriikia seguirixatiksï kánikua ánchikuarhini, nájkirukaksï iásï máteru ambe újkia kúnguarhikuarhu. Ka mítestiksï eska Tata Diosï Jeoba újchakurauaka imeechani engaksï sánderu sapichku jaka ka engaksï iásï imeecheri ánchikuarhiteechani uaajkia. w21.09 9, 10 párr. 4, 5, 8

Engachi eratseaka ambe ka ambechi uaa úni parachi marhuakuni Tata Diosï Jeobani, jarhuataatijtsïni parachi sési pʼikuarherani ka sési eratsetini jarhani ambe engachi uéjka úni juchaari tsípikua jingoni. Joperuchi jatsiska para imani ambe erakuni úni ambe engachi jucha uaaka úni ka seguni ambe engachi nitamakuarhini jauaka ka no ambe engaksï máteruecha újka úni. Jimboka engachi no ísï úska, nóchi sési pʼikuarheraaka ka chkétakuarhiakachi (Luk. 14:28). Iáminduechachi kánikua jukaparhakueska Tata Diosï Jeobaeri familiarhu ka no jarhasti máteru enga májkueniika eska jucha. Tata Diosï Jeobajtsïni no erakusti jimbokachi jucha sánderu sési úsïnga ambe ma eska máteruecha. Sánderu sési, ima exesti eska juchaari mintsita kaxumbitiiska ka eskachi jurajkutakuarhisïnga parajtsïni jorhendani ka mójtakuni. Uaakachi seguru jarhani eska ima kánikua tsípisïnga engachi jánguarhintajka xáni eskachi xáni uaaka para marhuakuni. Ístu, engachi tekaantajka ka no jurajkuni, xarhatanchi jarhasïnga eskachi “ambakiti mintsita” ma jataska (Luk. 8:15). Ísï jimbo, ju je seguiriini sánderu ambakiti ambe íntskuni juchaari ambe. Engachi ísï úska, tsípinchi jauaka imani ambe jimbo engachi jucha úka úni (Gal. 6:4). w21.07 24 párr. 15; 25 párr. 20

Uétarhisïndi eskachi tekaantskua xarhataaka engachi no sési kánhajka. Engaksï orhejtsïkutiicha mítejka eska nema kʼéri pekadu ma úska, Tata Diosï Jeobanksï kurhakusïndi “ambakiti eratsekua enga karhakua uératini jurhajka” paraksï ísï exeni ambe ma eska ima na exejka (Sant. 3:17). Ambe engaksï uéjka orhejtsïkutiicha engaksï uaaka ísï úni, jindeesti kʼuanhaskuntani imani enga pekadu ma úka jima enga no sési nirani jauaka (Sant. 5:19, 20). Ístu, jánguarhintasïndiksï ambe engaksï xáni uaaka úni paraksï kuájchakuni kúnguarhikuani ka paraksï sési pʼikuastantani imeechani engaksï no sési pʼikuarherani jauaka ini ambe jimbo enga pekadori úka (2 Kor. 1:3, 4). Ka engaksï orhejtsïkutiicha jarhuatani jarhajka nemani enga kʼéri pekadu ma úka, jatsistiksï para míteni ambesï meru úkuarhi ka para i ambe úni tiempu uétarhisïndi. Tátsekuaksï jatsisti para kómarhini Tata Diosï Jeobani, Biblia jingoni konseju íntskuni ka jurhimberantani nani engaksï jamberi uaaka (Jer. 30:11). Orhejtsïkutiichaksï no jirejiresï exesïndi ambeksï uaa imani jingoni enga no sési úka, joperuksï ístu no ióndaati ini ambe úni. Engaksï orhejtsïkutiicha ísï újka ambe ma eska Jeoba na uandajka, kánikua sésiisïndi para kúnguarhikua. w21.08 11 párr. 12, 13

Ma tiempu, no jarhaspti t’irekua Israeli, ísï jimbosï Noemí, uámba ka imeecheri tsimani uájpeecha, Moabiksï mótsispti. Jima uarhispti uámba. Ka imeeri uájpeechaksï tembuchaspti, joperuksï imeechajtu uarhispti (Rut 1:3-5). Inde xáni no sési jásï ambe, úspti eska Noemí niárapiringa kánikua kómu pʼikuarherani. Xáni no sési pʼikuarherasïreendi enga niárapka ísï uandani eska Tata Diosï Jeoba nóteru imani jingoni jarhaspkia. Ju je exeni ambe enga uandapka Tata Diosïiri ambe: “Tata Diosï Jeobaeri jájki úxati eskarini no sési nicheaka, [...] Tata Diosï enga Iámindu ambe Újka úni ústi eska juchiiti tsípikua kánikua kʼameriuaka”. Ístu uandaspti: “Tata Diosï Jeobasï úni ja[ti] eskani xáni no sési nitamakuarhiaka. Ima enga Iámindu ambe Újka úni ústi eskani kánikua kómu nitamakuarhiaka” (Rut 1:13, nota, 20, 21). Tata Diosï Jeoba kurhangusïndi ‘eska kómu nitamakua úsïnga eska no sési nitamakua uaaka eska kʼuiripu ma enga jánhastiika no eratsekua jingoni uandaaka’ (Ecl. 7:7). Ruti xarhatakuspti Noemíni ambakiti uékperakua. Xénchperakua jingoni jarhuataspti tarhambani paraka sési pʼikuarherantapiringa ka paraka ísï eratsepiringa ménderu eska Tata Diosï na eratsejka. w21.11 9 párr. 9; 10 párr. 10, 13

Engachi jánguarhintani jakaia xáni eskachi xáni uaaka para Tata Diosï Jeobani marhuakuni, ¿arhikuekasïni i ambe eskachi nóteru uaakia sánderu ambe úni? Nómbe. Uaakachi ka jatsiskachi para jatsikukuarhiani metechani engajtsïni jarhuataka sánderu sési aianhpini, jorhentpini ka engaksï uaaka úni eskachi jarhuatauaka juchaari erachiichani. Uaakachi ísï úni engachi jánhaskatiiska ka kaxumbitiini ka engachi jánguarhintaska máteruechani jarhuataani enbesi de juchajku pendienti pákuarhini (Prov. 11:2; Uku. 20:35). ¿Náki metechanchi uaa jatsikukuarhiani? Ju je kurhakuni Tata Diosï Jeobani eskajtsïni jarhuataaka exeni ambechi uaa úni (Prov. 16:3). ¿Úpirinchi metechani jatsikukuarhiani kómu prekursori auksiliariini o regulariini, Beteli o konstruksionirhu marhuani? ¿Uaachi jorhenguarhini máteru idioma parachi úni sánderu kʼuiripuechani aianguani o parachi imani lugaricha jimbo mótsini nani enga sánderu aianhpiricha uétarhini jaka? w21.08 23 párr. 14, 15

Tata Diosï Jeoba kánikua jukaparharasïndi ambakiti uékperakuani (Os. 6:6). Profeta Mikeasini úraparini, juchaari Tata Diosïjtsïni juramuchisïndi eskachi kánikua jukaparharaaka ambakiti uékperakuani (Miq. 6:8, nota). Ka parachi úni ini ambe, orhetachi jatsiska para míteni ambeeski ambakiti uékperakua. Uandakua “ambakiti uékperakua”, ma 230 xanhari jarhasti Bibliarhu, La Biblia. Traducción del Nuevo Mundo. Nema ambakiti uékperakua xarhatasïndi enga kánikua xénchajka máteru kʼuiripuni ka enga no méni jurajkujka jimboka mintsita jingoni xénchasïnga. Tata Diosï Jeoba jindeesti sánderu kʼéri ejemplu enga xarhatajka i jásï uékperakua. Jimbosï rei Dabidi uandapti: “Oh, Tata Diosï Jeoba, chiiti uékperakua auandarhu jamberi niárasïndi [...]. Oh, Tata Diosï, ¡na enga xáni jukaparhakueka chiiti ambakiti uékperakua!” (Sal. 36:5, 7). ¿Ka juchaia? ¿Ísïchi jukaparharasïni ambakiti uékperakuani ísï eska Dabidi? w21.11 2 párr. 1, 2; 3 párr. 4

Tata Diosï Jeoba jatsikuarhesti k’éri familia ma engaksï imani marhuakujka. Ixú kuenta úkuarhisïndi Jesúsi “enga tʼuini jindeepkia enga nótki ambe kueraakateepka” ka ístu uánikua ánjeliicha (Kol. 1:15; Sal. 103:20). Enga Jesúsi Echerirhu jámani japka, xarhatakuaspti imeechani engaksï no méni jurajkupka Tata Diosï Jeobani eskaksï uaaka ísï exeni Tata Diosï, komueska Taati ma. Ma xanhari, enga uandontskuarheni japka imeeri disipuluecha jingoni, uandaspti Tata Diosï Jeobaeri ambe: “Juchiiti Taati ka chaari Taati” (Juanu 20:17). Ístu, engachi aiakujka juchaari tsípikuani Tata Diosï Jeobani ka engachi itsï atakuarhijka, niárasïngachi kʼéri familia ma jingoni úkuarhini, pirenchicheri ka erachiicheeri engajtsïni kánikua sési kámajka (Mar. 10:29, 30). Jeoba, Taati uékpiti máesti ka Jesúsi uékasïndi eskachi ísï exeaka jucha eska ima na exejka: komueska Taati ma enga uékpitiika ka engachi uaaka uandajpani méntkisï engachi jucha uékaaka, no komueska nema enga no uékpijka ka engajtsïni nomasi juramuchini jarhajka. Jesúsi ísï ueenaspti kómarhini: “Juchaari Taati”. Jesúsi úpirindi arhiani imeeri chúxapatiichani eskaksï ísï uandajpapiringa Jeobani komueska: “Ima enga iámu ambe Újka Úni”, “Kueraajpiri” o “Enga méntkisï jindeeka Rei”, jimboka sési jarhaska ísï uandajpani ka Bibliarhuksï jarhasti i títuluecha (Gén. 49:25; Is. 40:28; 1 Tim. 1:17). Peru Jesúsi úrasti uandakua “Taati” para xarhatani eska Tata Diosï Jeoba uékpitiiska. w21.09 20 párr. 1, 3

Rei Manasési no kasu úspti ambe enga Tata Diosï Jeoba arhipka imeeri profeteecha jimbo. Últimu, “Tata Diosï Jeoba úspti eskaksï Siria anapu reiri ejersituecha jupiringa paraksï uarhipeni” Judá jingoni. “Jupikasptiksï Manasésini ganchuecha jingoni ka kobriiri kadeneecha jingonksï jóndukuspti ka Babiloniaksï páspti”. Péringa enga Babilonia japkia jupikakata, eratsentapka ambe enga xáni úpka. “Kánikua kaxumbikua xarhataspti imeeri ióntki anapu parienticheri Tata Diosïiri orhepani jimbo”. Joperu sánderu ambe úspti: “Mintsita jingoni kómarhispti imeeri Tata Diosï Jeobani” ka “seguirispti kómarhini”. Ima kʼuiripu enga xáni no ambakepka ueenaspti mójtakurhini. Ueenaspti ísï exeni Tata Diosï Jeobani komueska imeeri “Tata Diosï” ka mémindu kómarhispti (2 Crón. 33:10-12). Sánderu orhepani, Tata Diosï Jeoba mókukuntaspti Manasésini. Exespti eska imeeri mintsita mójtakurhispkia ka i ambe xarharaspti imeeri kómarhikuecha jimbo. Tata Diosï Jeoba pʼamojkuspti enga ima ísï kómarhipka ka úspti eska ima ménderu reipiringa. Manasési kánikua jánguarhintaspti para xarhatani eska sési jimbo móantaspkia. w21.10 4 párr. 10-11

Ákila ka Prisila jatsisptiksï para jurajkuni jima engaksï irekani japka, máteru kʼumanchikua jirinhani ka máteru ireta jimboksï jatsini imeecheri negosiuni enga jindeepka kʼumanchikua sïkuiriri uaani. Engaksï Korintu japkia ueenasptiksï jarhuatani kúnguarhikuani ka jarhuataasptiksï apostoli Pabluni uinhaperantaani erachiichani. Sánderu tátsekua, mótsisptiksï máteru ireteecha jimbo nani enga uétarhini japka eska aianhpinhapiringa (Uku. 18:18-21; Rom. 16:3-5). ¡Uánikua ambeksï úspti úni ka seguru eskaksï tsípikua jingoni irekapka! Iásï anapu temungurhiriicha, uaatiksï májkueni úni eska Prisila ka Ákila engaksï orheta peeraaska Tata Diosïiri ambe. Sánderu sési jarhasti eskaksï uandontskuarheaka íri ambe, jiáni engaksï nobiueuaka. Enga temungurhiri ma sési eratsekata jatsijka ambe enga uaaka para sánderu marhuakuni Tata Diosïni Jeobani ka enga jánguarhintajka ísï úni, úsïndi exeni na enga jarhuajpejka espiritu santu (Ecl. 4:12). w21.11 17 párr. 11, 12

Jatsiskachi para kurhajchani Tata Diosïiri juramukuani enga uandajka eskachi jatsiska para janhanharhiani juchaari taatiichani. Ju je miántani ménderu eska juramukua enga Levítico 19:3 jimbo jaka para janhanharhiani taatiichani, ísï tátsekua jarhaska ari uandakuecheeri “Jatsiskajtsï para pímbinhasïini jimbokani ji, Jeoba chaari Tata Diosï, pímbinhasïiska” (Lev. 19:2). Iámindu kristianuechaksï jatsipirindi para kurhamarhikuarhini: “¿Janhanharhiaxaki juchiiti taatiichani ísï eskarini Tata Diosïni na arhijka?”. Engachi exeska eskachi no úxapka iámindu ambe engachi jatsika para úni, ju je jánguarhintani ísï úni. Ísïisti eskachi no uaaka mójtakuni ambe engachi úkia, peru iásï para orhepani uaakachi jánguarhintani parachi úni ambe ma imeecha jingoni ka imeecha jimbo. Jamberichi uaaka sánderu imeecha jingoni jarhani. ¿Uaachi jarhuataani paraksï sánderu sési pájperani Tata Diosï jingoni, paraksï sési pʼikuarherani o sentabu ambe jingoni? Engachi ísï uaaka, úni jauakachi ambe engajtsïni juramuchijka Levítico 19:3. w21.12 4, 5 párr. 10-12

Rei Dabidi niáraspti kánikua no sési ambe úni. Ima ísku jándikua ambe niátaspti Bat-Seba jingoni ka asta úspti eskaksï uándikupiringa acheeti jémbani (2 Sam. 11:2-4, 14, 15, 24). Ini ambe jimbo, no solu imajku no sési úkuarhinchaspti, ístu no sési úkuspti imeeri familiani ka máteru imeeri uarhiiti jémbeechani (2 Sam. 12:10, 11). Máteru xanhari, no xarhataspti eska mintsikasïreenga Tata Diosï Jeobani, jimboka sénsu ma úspka enga no Tata Diosï arhipka eska úpiringa para Israeli anapu ejersituni miiuni. ¿Ka ambe úkuarhispi? Eskaksï 70,000 israeliteecha uarhispka pʼamenchakua ma jimbo (2 Sam. 24:1-4, 10-15). ¿Jusgaripirinchi Dabidini ka arhini eska no jukanchaspka eska Tata Diosï pʼamojkupiringa? Tata Diosï Jeoba no ísï eratsespti. Sánderu sési, exespti eska Dabidi méntkisï kurhajchaspka imani ka eska mintsita jingoni móantaspkia. Jimbosï puákuntapti imeeri pekaduechani. Mítespti eska Dabidi kánikua xénchasïreenga imani ka eska uékasïreenga imani ambe úni enga sési jaka. ¿A no eskachi agradesidu jarhaska Tata Diosï jingoni enga imani ambe exejka engachi sési újka? (1 Rey. 9:4; 1 Crón. 29:10, 17). w21.12 19 párr. 11-13

Jesúsi pʼamojperakua jingoni kaaspti imeechani engaksï uánikua ambe nóteru ueengia úni. Ju je miáni ambe enga uandakua axakupka Juanuni enga itsï atauenga kʼuiripuechani, arhispti: ‘Sieguechaksï éskataranhantaxati, ka imeecha engaksï no ueenga xanharani, úsïngaksïa xanharani, ka ístu imeecha engaksï lepra pʼamencheenga, ambakeranhantaxati, ka imeecha engaksï no ueenga kurhandini, úsïngaksïa kurhandini, ka uarhiriicha tambientu tsítanhantaxati’. Ka engaksï exeapka Jesúsiiri milagruechani, “iámindu kʼuiripu [...] úndaspti kʼéri ambe arhini Diosïni” (Luk. 7:20-22). Kristianuechachi tsípikua jingoni ísï úsïnga eska Jesúsi ka sésichi kaasïnga ka pʼamojkuani imeechani engaksï uánikua ambe nóteru újkia úni. Ísïisti eskajtsïni Tata Diosï Jeoba no íntskuska uinhapikua parachi milagruechani uáni, perujtsïni íntskusti sésikua parachi ambakiti ambe aianguani imeechani engaksï siegueka ka engaksï no ma ambe míteka Tata Diosïiri ambe, arhiani: eska nóteru ióni jimbo jauaka paraisu ma nani enga nóteru nema pʼamenchakia ka engaksï uaaka sési pájperani Tata Diosï jingoni (Luk. 4:18). I ambakiti aianhperakua úxati eskaksï uánikuecha kʼéri ambe arhiaka Tata Diosïni. w21.12 9 párr. 5

Santiagu úraspti Tata Diosïiri Karakatani para jorhentpini ka úraspti para jarhuataani kʼuiripuechani exeni eska Tata Diosï Jeoba méntkisï kóndeantasïnga imeechani engaksï no méni jurajkujka ísï eska Jobu. Santiagu jorhentpispti indeni ambe úrapariani uandakuechani ka ejempluechani engaksï no úkua jukapka kurhanguni. Ísï, kʼuiripuechaksï úpirindi exeni eska no imasï ísï uandeenga sino Tata Diosï Jeoba. ¿Ambejtsïni jorhendasïni i ambe? Ju je úni eska ima ambe engachi jorhentpiaka no úkua jukaaka kurhanguni ka úrani Tata Diosïiri Karakatani. Nóchi uékasïnga eska kʼuiripu exeaka na engachi xáni jorhenaka jucha, sino na enga xáni jorhenaka Tata Diosï Jeoba ka na enga xáni uandanhiajka imeecha jimbo (Rom. 11:33). Uaakachi ísï úni engachi méntkisï úraska Bibliani. Pori ejemplu, enbesi de arhiani juchaari jorhenguarhirichani ambe engachi úpiringa jucha engachi imeecheepiringa, ju je jarhuataani Biblieri ejempluecha jingoni parakaksï imeecha uaaka exeni na enga exejka Tata Diosï Jeoba ambe ma ka na enga pʼikuarherajka. Jiájkani uékaatiksï ísï úni eskaksï na jorhenguarhini jauaka jimbokaksï uékaaka Tata Diosï Jeobani jaiapanherantani ka no juchantsïni. w22.01 10, 11 párr. 9, 10

Tata Diosï Jeoba no solujtsïni arhisïndi eskachi no no sési úkuauaka máteruechani. Ima enga uéjka Tata Diosïni jaiapanherantani jatsisti para uékaani máteruechani ísï eska imajku na uékakuarhijka. Ju je exeni ambe enga Jesúsi uandapka na enga xáni jukaparhakueka ambe enga uandajka Levítico 19:18. Ma xanhari fariseu ma kurhamarhispti: “¿Nákiski sánderu kʼéri mandamientu Leiiri?”. Jesúsi arhispti “i jindeesti primeru mandamientu ka enga sánderu kʼéri ambeeka” xénchani Tata Diosï Jeobani iámindu mintsita jingoni, iámindu alma jingoni ka iámindu eratsekua jingoni. Ka tátsekua arhispti ambe enga uandajka Levítico 19:18: “Ka ístu máteru sáno májkueni jásï terukuntasïndi enga arhijka: ‘Uékaakari máteruni eska tʼujkumindu na uékakuarhijka’” (Mat. 22:35-40). Uánikua ambe jimbochi uaaka xarhatakuani máteruechani eskachi xénchaasïnga. Uaakachi xénchperakua xarhatakuani máteruechani engachi ísï úska eska na arhijka Levítico 19:18: “Asï no sési úkuantaa chiiti iretarhu anapu uájpeechani nijtu jatanhekuani”. w21.12 11 párr. 11-13

Jesúsi “ióxurhantaspti” ka pʼímantaspti apostoli Pedruni. Enga ima Jesúsinku eraani japka, úspti itsïrhisï xanharani nájkiruka uinhamu tarhiani japka, peru enga ueenapka exeni na enga xáni uinhamu tarhiani japka chéspti ka ueenaspti inchameni (Mat. 14:24-31, TNM). Inde ambe jingoni enga apostoli Pedru nitamakuarhipka, ambakiti ambejtsïni jorhendasïndi. Enga Pedru kétsepka barkurhu ka ueenani itsïrhisï xanharani no eratsespti eska chépiringa ka inchameni. Ima uékasïreendi niárani jima enga Jesúsi japka, peru no úspti ísï úni jimboka chéspka enga xáni uinhamu tarhiani japka. Ísïisti, juchachi no úsïnga itsïrhisï xanharani, peruchi jatsiska para mintsikani Tata Diosïni parachi úni orhepani uérakuani uandanhiateechani. Engachi nóteru eratseni jauakia ambe enga xáni úkia Tata Diosï Jeoba juchantsïni jimbo ka ambe engajtsïni ima aiachini jaka, ueenakachi nóteru xáni mintsikania Tata Diosï Jeobani. Na uéjki járhati uandanhiateechanchi jatsiani, ju je seguiriini mintsikani eskajtsïni Tata Diosï Jeoba uaaka jarhuatani. w21.12 17 párr. 6; 18 párr. 7

K’éri ambechi arhini jarhasïnga Tata Diosïini engachi kómarhijka, jorhenguarhijka ka engachi eratsentajka. Engachi kómarhijka juchaari Taati auandarhu anapuni engajtsïni xáni xénchajka, imani jingonchi uandontskuarheni jarhasïnga. Engachi jorhenguarhijka Biblieri ambe, jorhenguarhini jarhasïngachi “Tata Diosïiri mímixekua[ni]”, enga sánderu jánhastiika (Prov. 2:1-5). Ka engachi eratsentajka, exeanchi jarhasïnga Tata Diosï Jeobaeri sési járhati kualidadichani ka ambe enga eratsetini jaka úni para jucha ka para iámindu kʼuiripuecha. Ísï úparini, sánderuchi sési úrani jauaka juchaari tiempuni. Ísïisti eskachi no xáni tiempu jatsisïnga, joperu ¿ambejtsïni jarhuataa sési úrani tiempuni? Engachi úska, ju je jirinhani lugari ma nani engachi uaaka jandiajku jarhani. Ju je eratseni na enga ísï úpka Jesúsi. Enga ueenapka aianhpini Echerirhu, 40 jurhiatikua jarhaspti desierturhu (Luk. 4:1, 2). Jima úspti kómarhini Tata Diosïini ka eratsentani ambe enga Taati jémba uékeenga para ima. Inde ambe meru jarhuatapti paraka úpiringa orhepani uérakuani tsʼéjkukuechani enga jatsiapiringa. w22.01 27, 28 párr. 7, 8

Orhejtsïkuti ma o erachi ma enga sési marhuakuni jaka Tata Diosïni, úpirindijtsïni konseju ma íntskuni engaksï exeaka eskachi jatsiska para sánderu sési úni ambe ma. Engajtsïni nema íntskujka konseju ma enga Bibliarhu pʼitakata jauaka, jindeesïndi jimbokajtsïni xénchasïnga. Ísï jimbo, ju je ísï úni eskajtsïni na arhiaka. Ísïisti, sánderuchi úkua jukanchasïnga jiókuarhiani kʼuiripuecheri konsejuechani ka astachi niárapiringa no sési exeni. ¿Andi? Nóchi úkua jukanchasïnga jiókuarhini eskachi imperfektueska, joperuchi úkua jukanchasïnga engajtsïni nema arhijka eskachi no sési úxaka ambe ma (Ecl. 7:9). Jamberichi máteru ambe arhiperatapiringa ka eratseni eskachi no uétarhinchaxapka eskajtsïni konseju ma íntskupiringa, ochi no sési exeni na engajtsïni íntskuka konsejuni. Ochi niárani eratseni eska ima kʼuiripu no jatsispka parajtsïni konseju ma íntskuni jimboka imajtu no sési ambe úsïnga. Ka engachi no tsitiaka konsejuni, jamberichi no kasu úkuaka ochi máteruechani aianguani parakajtsïni arhiaka ambe engachi uéjka kurhaani. w22.02 8, 9 párr. 2-4

¿Jimbanhi parhakpinirhu jaua ambe ma enga uaaka úni eskachi no mintsikaaka na enga újka ambe ma Tata Diosï Jeoba? Ju je eratsentani ambe enga úkuarhipka sánisï tátsekua enga Tata Diosï Jeoba petaantapka israeliteechani Ejiptu uératini. Máruksï ueenaspti no sési uandani jimbokaksï jirinhantasïreenga Ejiptu anapu tʼirekuani ka nóksï uékasïreendi arhani maná (Núm. 11:4-6; 21:5). ¿Úpirinchi májkueni jámani enga na nitamaakia kʼéri mískuarhita? Nóchi míteska na xánchi tiempu úraa parachi sési jájkuntani Echerini astaka paraisu máeuaka. Jamberichi jatsiaka para kánikua ánchikuarhini ka ueenani jámani jamberi no xáni fásiliuati. ¿No sésichi uandaa imani ambe jingoni engajtsïni Tata Diosï Jeoba íntskuaka? Engachi iásï sési pʼikuarheraska imani ambe jingoni engajtsïni Tata Diosï Jeoba íntskujka, jamberichi májkueni uaaka sánderu orhepani. w22.02 7 párr. 18, 19

Profesiarhu enga Zacarías 8:23 jaka, uandakuecha “judiuni ma” ka “chánksïni”, mismu grupuni arhikuekasïndi: erakukateecha engaksï útasï Echerirhu jaka (Rom. 2:28, 29). “Diesi acheetiichaksï iámindu idiomeecheeri engaksï ireteecharhu uandanhajka” jindeestiksï máteru karichiicha. Uinhamuksï jupikakuasïndi xukuparhakua erakukateechani —i ambe arhikuekasïndi eskaksï no méni jurajkuauaka— ka májku kʼériksï sési marhuakusïndi Tata Diosï Jeobani. Ka ístu, eska na uandajka profesia enga Ezequiel 37:15-19, 24, 25 jimbo jaka, Tata Diosï Jeoba ísï ústi eskaksï erakukateecha ka máteru karichiicha májku kʼériksï ánchikuarhipiringa. Profesia tsimani chkariri uandasïndi. Imeecha engaksï erokuarhini jaka auandarhu irekani, ísïistiksï komueska chkari “para Judá” (ima tribu engaksï erakunheenga reiicha para Israeli). Ka imeecha engaksï erokuarhini jaka Echerirhu irekani, ísïistiksï komueska “Efraíniiri chkari”. Tata Diosï Jeoba ini tsimani grupuechani márku uántapirindi parakaksï niárapiringa “májku chkari” úkuarhintani. I ambe arhikuekasïndi eskaksï májku k’éri marhuakupiringa imeecheeri Reini, tata Jesukristuni (Juanu 10:16). w22.01 22 párr. 9, 10

Jesúsi uandaspti eska imeecha engaksï limosna íntsauenga pobrichani, ísïksï úsïreenga nomasi paraksï máteruecha exeani. Nájkiruka ísï xarhareenga enajkiksï ambakiti ambe úni jarheeni, Tata Diosï Jeoba no jaiapanhentasïreendi indeni ambe (Mat. 6:2-4). Juchachi uaaka ambakiti kʼuiripu máeni solu engachi mintsita jingoni úska ambakiti ambe para máteruechani jarhuataani ka no parachi juchajkumindu sési pakarani. Úpiringachi ini ambe eratsentani: “¿Míteski ambe enga sési jaka ka ístuni ísï úsïni? ¿Andisïni újki ambakiti ambe?”. Tata Diosï Jeoba méntkisï ánchikuarhini jarhasïndi ka úrasïndi imeeri uinhapikuani parajtsïni jarhuatani xarhataani imeeri kualidadichani (Gén. 1:2). I ambe arhikuekasïndi eska mándani kualidadi enga espiritu santu úrpijka, úsïndi ka jarhuatasïndijtsïni parakachi ambakiti ambe uaaka. Pori ejemplu, Santiagu karaspti eska “jakajkukua, no jindeesïnga jakajkukua enga nómbe úkuechani jingoniijka” (Sant. 2:26). Ka májkueni úkuarhisïndi máteru kualidadicha jingoni enga Tata Diosïiri espiritu santu úrpijka. Engachi xarhataajka indeni kualidadichani, xarhatani jarhasïngachi eskajtsïni espiritu santusï jarhuatani jarhajka. w22.03 11 párr. 14-16

Kristianuechachi uánikua ambe úsïnga para Tata Diosïni marhuakuni ka jarhuataasïngachi máteruechantu. Peru apostoli Pedru máechakueri ambe uandaspti. Ante dejtsïni pʼímarhini parachi pímbinhasïini, uandaspti: “Jingontku ja je, ka miákua juka je” (1 Ped. 1:13, TDU). ¿Ambe arhikuekaxapti? Ima uandaspti eskaksï Kristueri ermanuecha engaksï erakukateeka, iápurisï uandantapirindi na enga xáni kʼéri ambeeka ima enga erakuapka (1 Ped. 2:9). Ini jurhiatikuechani jimbo, iámindu kristianuechachi kʼéri kóntperata ma jatsiska para úni ini xáni ambakiti ánchikuarhitani enga sánderu marhuakuajka kʼuiripuechani. Xáni kʼéri kóntperata ma enga jatsika Tata Diosïiri ireta enga pímbinhasïika para tsípikua jingoni ka no kuatantaparini aianhpini ka jorhentpini (Mar. 13:10). Jimajkani ju je jánguarhintani ísï úni, ka ísïchi xarhatani jauaka eskachi xénchasïnga juchaari Tata Diosïni ka ístu máteru kʼuiripuechani, ka eskachi uékasïnga pímbinhasïini iámindu ambe jimbo. w21.12 13 párr. 18

Apostoli Pablu méntkisï ambakiti ambe eratsesïreendi erachiicheeri ambe. Ka mítespti eska enga nema no sési ueenga ambe ma, no arhikuekasïreenga eska noambakiti kʼuiripu máespka. Xénchaasïreendi erachiichani ka jánguarhintasïreendi imani ambe exeni engaksï sési ueenga. Ka enga exenga eska nema úkua jukanchasïreenga sési úni ambe ma joperu eska jánguarhintani jarhasïreenga, eratsesïreendi eska ambakiti kʼuiripu máespka ka eska solu uétarhinchasïreenga eska nema jarhuatapiringa. Ju je exeni na enga Pablu jarhuataapka tsimani pirenchichani engaksï Filipusï anapu kúnguarhikuarhu japka (Filip. 4:1-3). Péringa Ebodia ka Síntike nóteruksï sési pájpereengia. Peru Pablu no xukaaspti, nijtu no sési eratsepi imeecheeri ambe. Sánderu sési, exespti eskaksï ambakiti kualidadichani jatsiaspka ka eskaksï sési marhuakuxapka Tata Diosï Jeobani. Ístu mítespti eska Tata Diosï Jeoba xénchaasïreenga. Pablu ambakiti ambe eratsesïreendi inde pirenchicheri ambe, ísï jimbo arhiaspti eskaksï sési pájperantapiringa. Jimboka Pablu sési exeasïreenga erachiichani inde ambe jarhuataspti paraka sési pʼikuarherapiringa ka paraka úpiringa sési pájperani imani kúnguarhikuarhu anapu erachiicha jingoni. w22.03 30 párr. 16-18

Pínandikua engajtsïni Tata Diosï Jeoba íntskujka, úsïndi eskachi no jukari uandanhiauaka ka eskachi sési eratseaka ambe ma. Ísïsï pʼikuarherapti pirenchi ma enga Luz arhinhajka. Ima uandasïndi: “Ménichani jandiajkuni pʼikuarherasïnga ka inde ambe úsïndi eskani eratseaka eskarini Tata Diosï Jeoba no xénchasïnga. Engani ísï pʼikuarherani jarhajka, jirejiresï aiangusïnga Tata Diosï Jeobani na engani pʼikuarherajka. Kómarhikua jimbo, úsïnga sési pʼikuarherantani”. Ambe enga nitamakuarhika Luz, xarhatasïndi eska kómarhikuajtsïni jarhuatasïnga parachi pínandikua jatsini (Filip. 4:6, 7). Mintsikasïngachi eskajtsïni Tata Diosï Jeoba ka Jesúsi jarhuataaka jiáni engachi uarhiranchaaka nemani engachi jucha xénchajka. Ístujtsïni jarhuatasïndi parachi pʼamojperakua jingoni aianhpini ka jorhentpini jimboka Tata Diosï Jeoba ka Jesúsi ísï uékasïnga. Ka enga Jesúsi uerapka, sésijtsïni pʼikuastasïndi, jimboka xarhatasïnga eska ima ka imeeri Taati jémba kurhangusïngaksï eskachi no uinhapitiiska ka uékasïndijtsïni jarhuatani parachi úni tekaantani. Ju je eranhaskani ima jurhiatikua enga Tata Diosï Jeoba ísï uaaka eska na aiatspika eskajtsïni ‘kutsunharhikuaka iámindu uekua’ (Jaŋ. 21:4). w22.01 15 párr. 7; 19 párr. 19, 20

Jesúsi uandaspti eskaksï tsimani puerteecha jarhaska ka eskaksï táchani xanharuecharhu pájpesïnga, ma xanharu, ‘kórhurasti’ ka máteru ‘no kórhurasti’ (Mat. 7:14). Nóksï jarhasti máteru xanharuecha. Mándani kʼuiripu jatsisti para erakuni náki jimbo niua. Kánikua jukaparhakuesti eskachi sési erakuaka náki jimbochi niua engachi uékajka irekani para méntkisï. Uánikua kʼuiripuechaksï erakusïndi xanharuni enga “kórhuraka” jimboka no úkua jukaska jimeesïsï nirani. Ka xáni no sési engaksï uánikuecha chúngumaajka indeni xanharu jimbo. Nóksï kuenta íntskukuarhesïndi eska Satanásisï uéjka eskaksï imani xanharu jimbo niuaka enga uarhikuarhu pájpejka (1 Kor. 6:9, 10; 1 Juanu 5:19). Máteru xanharu ‘no kórhurasti’ ka Jesúsi uandaspti eskaksï namunitkueska engaksï exentajka. ¿Andi? Exe je eska máteru bersikulu jimbo, Jesúsi arhiaspka imeeri chúxapatiichani eskaksï jingontku jámapiringa profeta no jurhimbitiicha jingoni (Mat. 7:15). w21.12 22, 23 párr. 3-5