Marsu

Apostoli Pedru arhiaspti erachiichani eskaksï úrapiringa ambe engaksï jorhenapka úni paraksï máteru kristianuechani jarhuataani. Karaspti: “Nákinterku ma intsïmperakua engaksïni [Tata] Diosï íntskuaka, úra je para iáminduechani jarhuataani komueska ambarhati jántspiriicha engaksï sési etsakujka [Tata] Diosïiri kóntperatani” (1 Ped. 4:10). Nóchi jatsipiringa para pʼíngukuarhini ka nóchi úrani ambe engachi xáni jorhenaka eratseparini eskaksï máteruecha enbidia pʼikuarheraaka o eskaksï no sési pʼikuarheraaka. Joperu ju je jingontku jarhani parachi no jámani arhikuarhini (1 Kor. 4:6). Ju je miáni eska ambe engachi jorhenaka úni, Tata Diosïni jimboeska. Ísï jimbo, ju je úrani para kúnguarhikuani uinhaperantani ka no parachi jucha arhikuarhini (Filip. 2:3). Engachi úrajka juchaari uinhapikuani ka ambe engachi jorhenaka úni parachi úni ambe enga Tata Diosï uéjka, jatsisïngachi ambe ma engachi jimbo uaaka tsípini pʼikuarherani. ¿Andi? Jimbokachi úrani jarhasïnga ambe engachi xáni jatsika parachi kʼéri ambe arhini Tata Diosï Jeobani, no parachi ísï pʼikuastaani máteruechani eskachi jucha sánderu kʼéri ambeeska. w22.04 12 párr. 7-9

Jesúsi kánikua tsitisïreendi ambe enga Tata Diosïiri Karakata uandajka. Ka Salmo 40:8 uandasïndi na enga xáni jukaparharapiringa Tata Diosïiri Karakatani, jimini arhisïndi: “Úni ambe engari tʼu uéjka, oh, juchiiti Tata Diosï, kʼéri tsípikuarhita máesti para ji, ka chiiti juramukuani juchiiti mintsitarhu pásïnga”. Jimboka Jesúsi kánikua tsitisïreenga ambe enga Tata Diosïiri Karakata uandajka, inde ambe jarhuataspti tsípikua jingoni irekani ka seguiriini marhuakuni Tata Diosï Jeobani. Juchajtuchi uaaka tsípikua jingoni irekani engachi jánguarhintaska arhintani Tata Diosïiri Karakatani ka tsitini ambe enga arhijka (Sal. 1:​1-3). Jesúsiiri uandakuecha ka imeeri ejemplu, úsïndi eskachi sánderu sési arhintaaka ka jorhenguarhini Tata Diosïiri Karakatani. Parachi úni sánderu sési kurhanguni ambe engachi arhintaaka, ju je kómarhini Tata Diosï Jeobani, iatsitakuarhu arhintani, kurhamarhikuechani úkuarhiani ka ju je karani máru ambe. Para jánhaskani ambe engachi arhintani jauaka, ju je sési kurhanguni ambe engachi arhintani jauaka ka ístu ju je sánderu informasioni jirinhantani juchaari publikasionicharhu. Ka parachi jurajkuni eskajtsïni Tata Diosïiri Uandakua mójtakuaka, ju je méntkisï arhintani parachi jorhenguarhini ambe ma. Engachi iámindu ini ambe úska, sánderujtsïni marhuacheati ambe engachi Bibliarhu arhintaaka ka sánderuchi andarhieraaka Tata Diosï Jeobani (Sal. 119:17; Sant. 4:8). w23.02 13 párr. 15, 16

Ju je eratsentani ambechi uaa úni ka nanichi meru jatsiski para sánderu sési úni indeni ambe. Ju je jánguarhintani ísï úni. ¿Néna? Ju je eratsentani eskachi uékasïnga ambakiti jorhentpiri máeni. Uaakachi jorhenguarhini ambe enga arhijka foietu Ju je sánderu sési arhintani ka jorhentpini. Ka ante dechi nitamatarani parti ma tánguarhikuarhu enga entre semana jimbo úkuarhijka, úpiringachi arhini erachini ma enga sánderu mítekuka eskajtsïni kurhajchaaka ka arhintsïni ambechi uaa sánderu sési úni. Engachi tiempu jingoni prepararikuarhiska, sánderuchi ambakiti jorhentpiricheuaka ka máteruechaksï exeati eskachi ánchikuarhiriska ka mintsinharhikueni (2 Kor. 8:22). Ka engachi uéjka úni ambe ma engachi no újka sési úni, ju je seguiriini jánguarhintani parachi jorhenguarhini sési úni indeni ambe. ¿Timoteu niáraspi sési arhijtsïkpini ka ambakiti jorhentpiri máeni? Biblia no uandasïndi. Peru ambe engachi kʼóru míteka, jindeesti eska úspka ambe enga Pablu arhipka. Timoteu sánhani arhispti sánderu sési úni ambe ma ka ísï úspti sési úni imeeri ánchikuarhitani (2 Tim. 3:10). w22.04 24 párr. 8-11

¿Ambe arhikuekasïni animali enga siete éjpuechani jukaaka? Bibliajtsïni arhisïndi eska i animali ísï xarharasïnga eska leopardu ma ka eskaksï imeeri jantsiriicha ísï jáxeska komueska osueri ma ka eska leoniiri penchumikua jukaska ka diesi sïuanguechani. Tʼámu animaliicha enga Daniel kapitulu 7 uandaajka, sánoksï májkueni járhasti, joperu libru Apokalipsisi uandasïndi eska máechakuajku animali uánikua ambe jukaska máteru animaliicheeri. Ísï jimbo, i animali no arhikuekasïndi májku juramutini o kʼéri juramukuani ma. Libru Apokalipsisi uandasïndi eska juramukua jatsiska “iámindu tribuecharhu ka nasionicharhu ka iámindu kʼuiripuechani jingoni engaksï táchani jásï idioma uandajka, ka iámindu ambe jásï kʼuiripuni jingoni”. Ísï jimbo, imeeri juramukua iauani sánderu kʼériisti eska na uéjki paisirhu anapu juramukua ma (Apok. 13:7). Ísï jimbo, i animali iámindu juramukuechani arhikuekaasïndi desde engaksï ueenaka jarhani juramukuecha asta iásï jamberi (Ecl. 8:9). Máteru ambe enga xarhatajka eska ísïiska i ambe, jindeesti jimboka Bibliarhu, mémindu úrakuarhesïnga númeru diesi para arhikuekani ambe ma enga kompletu jarhajkia. w22.05 9 párr. 6

¿Neechaksï intsïnhaua indeni kóntperatechani? Orheta, ‘uánikua kʼuiripuecha’ engaksï tsípiti pakaraaka Armajedonirhu ka ístu sapiicha engaksï jimbanhi parhakpinirhu andajpenuaka. Joperuksï no imeechajkueuati. Jaŋaskuecha (Apokalipsisi) kapitulu 20 jimbo, aiatspesïndi eskaksï uarhiriicha tsíntaaka (Apok. 20:​11-13). ¿Néksï niára irekani ménderu Echerirhu? Imeecha engaksï “ambarhatiika”, engaksï jindeeka ambakiti Jeobaeri marhuaricha engaksï ióntki uarhika; ka ístuksï tsíntaati “maluecha”, o ima kʼuiripuecha engaksï no niáraka míteni Tata Diosï Jeobani (Úku. 24:15; Juanu 5:​28, 29). ¿Arhikuekasïni i ambe eskaksï iáminduecha tsíntaaka jiáni enga Jesúsi juramuni jauakia Mili Uéxurhini? Nómbe. Imeecha engaksï no uékaaka marhuakuni Tata Diosï Jeobani ante deksï uarhini, nóksï niáraati irekani jimbokaksï no uékaska ísï úni ka xarhatastiksï eskaksï no uékasïreenga irekani Paraisurhu (Mat. 25:46; 2 Tes. 1:9; Apok. 17:8; 20:15). w22.05 18 párr. 16, 17

Jesúsi úraxati ʻjántspirini enga mintsinharhikuekaʼ ka jánhastiini parakaksï imeeri chúxapatiicha niáraaka ambakiti kúnguarhikua máeni ixú Echerirhu ka para jarhuataani máteru kʼuiripuechani kómarhini Tata Diosïni ísï eska ima na uéjka (Mat. 24:45). ¿Nájtsï exesïni chá ini kúnguarhikuani? Jamberijtsï ísï pʼikuarherajka eska Pedru enga arhipka Jesúsini ambe enga iásï anapu tekstu uandajka. ¿Ambe úkuarhipirini juchantsïni jingoni engachi no mítepiringa Tata Diosïiri kúnguarhikuani? Tata Jesukristu ini kúnguarhikuani úrasïndi parajtsïni sési jorhendani Tata Diosïiri ambe ka parachi ambakiti jorhentpiricheni. Ístujtsïni jarhuatasïndi parachi jimbanhi kʼuiripu máeni ka úni eska Tata Diosï Jeoba tsípini pʼikuarheraaka (Éfes. 4:24). Engaksï kʼérati uandanhiateecha jarhajka, Jesúsijtsïni jánhaskakua jingoni arhisïndi ambe engachi jatsika para úni. Ka úskachi exeni eska i ambe meru ísïiska jiáni enga pandemia COVID-19 ueenapka jarhani. Parhakpinirhu, uánikua kʼuiripuechaksï no mítespti ambe úni, joperu Jesúsi úspti eskachi arhinhapiringa ambe engachi úpiringa para sési kuájchakukuarhini. w22.07 12 párr. 13, 14

Tata Diosï Jeoba arhiaspti Israeli anapu taatiichani eskaksï jatsispka para pauani pauani uandontskuarhekuani imeecheri sapiichani imeeri ambe (Deut. 6:​6, 7). Na uéjki jandoraksï úsïreendi uandontskuarheni imeecheri sapiicha jingoni ka jarhuataani parakaksï xénchapiringa Tata Diosï Jeobani. Pori ejemplu, tataka sapirhatiichaksï chúskutasïreendi jarhuatani imeeri taatini jatsintani ambe ma o pʼikuntani ambe ma. Nanaka sapirhatiichaksï úsïreendi jarhuataani amambeechani kʼumanchikuarhu, komu sïrikuni o máteru ambe úni. Engaksï márku ueenga ambe ma, úsïreendiksï ambakiti ambeeri uandontskuarheni. Pori ejemplu, na enga xáni sési kámpijka Tata Diosï Jeoba ka na enga kuidariuenga imeecheri familiani. Uánikua paisiicha jimbo taatiicha ka uájpeechaksï kasi no úsïndi májku kʼéri jarhani, jimbokaksï ánchikuarhini jarhasïnga o eskuela jarhani. Ísï jimbo, taatiichaksï jatsisti para exeni káni engaksï uaaka uájpeecha jingoni jarhani ka uandontskuarheni imeecha jingoni (Éfes. 5:​15, 16). w22.05 28 párr. 10, 11

Enga nema niátajka pekaduechani engaksï kánikua no sési jaka, xarhatasïndi eska no janhanharhisïnga Tata Diosïiri leini. Enga kristianu ma i járhati pekaduechani uaajka, jatsisti para kómarhini Tata Diosï Jeobani para kurhakuni eska puákuntaaka ka ístu aianguani kúnguarhikuarhu anapu orhejtsïkutiichani (Sal. 32:5; Sant. 5:14). ¿Ambeksï jatsiski para úni orhejtsïkutiicha? Tata Diosï Jeobajkusï újti puákuntani nemani enga pekadu ma újka ka Jesúsiiri uarhikua jimbo úsïndi ísï úni. Joperu Tata Diosï sésikua íntsaasti orhejtsïkutiichani paraksï Tata Diosïiri Karakata jingoni exeni sini ima enga pekadu ma úka uaa útasteru kúnguarhikuarhu jarhani o nóteria (1 Kor. 5:12). Aparte deksï máteru ambe exeni, orhejtsïkutiichaksï ístu arini ambe kurhamarhikuarhisïndi: ¿uékaspi no sési ambe niátani?, ¿jískaspi ambe enga úka?, ¿ióni no sési ambe niátaspia? Ka sánderu jukaparhakua ambe: ¿xarhataski eska meru móantaskia?, ¿ambe xarhatasïni eska Tata Diosï puákuntaskia? (Úku. 3:19). w22.06 9 párr. 4

Jesúsi xarhataspti na enga xáni jukaparhakueka jurhimbitku jámani (Mat. 5:6). I ambe arhikuekasïndi eskachi jatsiska para iámindu juchaari mintsita jingoni jánguarhintani imani ambe úni enga jurhimbitkueka, enga sési jaka ka enga pímbinhasïika Tata Diosïni japarini. ¿Chá tsitisïni imani ambe enga ísïika ka jurhimbitku jámani? Seguru eska jo. Ísï jimbojtsïsï no sáni tsitijka chkuanderakua ambe ka imani ambe enga no sési jaka (Sal. 119:​128, 163). Imeecha engaksï chkuanderajka ísïksï jámasïndi eska Satanási, enga i parhakpiniiri juramutiika (Juanu 8:44; 12:31). Noambakiti uékasïndi eska no sési uandanhaaka Tata Diosï Jeobaeri nombriiri ambe. Ima chkuanderakua ambe uandaxati Tata Diosïiri ambe desde jiáni enga Adáni ka Eba nóteru kurhajchapkia Tata Diosïni Jardini de Edénirhu. Jiáni, Satanási uékasïreendi eskaksï kʼuiripuecha eratsepiringa eska Tata Diosï juramuti máeska enga no uandanhiajka kʼuiripuecha jimbo ka eska chkuanderasïnga paraksï kʼuiripuecha no jatsini ambakiti ambe (Gén. 3:​1, 4, 5). Enga Satanási ísï chkuanderajka, uánikua kʼuiripu no sési ambe eratsesïndi Tata Diosï Jeobaeri ambe. Engaksï kʼuiripuecha no jiókuarhijka imani ambe enga ísïika, Satanási úsïndi eskaksï imani ambe uaaka enga no jurhimbitkueka ka eskaksï ikichakueni jásï ambe niátaka (Rom. 1:​25-31). w23.03 2 párr. 3

Jamberijtsï jánguarhintani jaka para jurajkuni ambe ma enga no sési jaka, joperujtsï ménichani niárasïnga ménderu indeni ambe úni. Ojtsï jamberi eratseni eskajtsï no méni uaaka itsï atakuarhini ka inde ambeksïni no sési pʼikuastani. ¿Ambeksïni jarhuataa parajtsï no kuatantani? Ambe ma enga kánikua jukaparhakueka, xénchani Tata Diosï Jeobani. Xénchani Tata Diosï Jeobani, jindeesti sánderu ambakiti ambe engajtsï uaaka úni (Prov. 3:​3-6). Engajtsï chá xénchaska Tata Diosï Jeobani iámindu chaari uinhapikua jingoni, uaakajtsï orhepani uérakuani uandanhiateechani engajtsï jatsiauaka. Biblia uánikua xanharu uandasïndi eska Tata Diosï Jeoba, ambakiti uékperakua xarhatakuasïnga imeeri marhuariichani. I ambe arhikuekasïndi eska no méni jurajkuasïnga ka eska méntkisï xénchaasïnga. Tata Diosïksïni ísï kueraasti eska ima na jásïika (Gén. 1:26). Jimajkani, ¿nénajtsï uaa xarhatani i jásï uékperakua? Orheta, jatsiskajtsï para agradesidueni (1 Tes. 5:18). Mándani pauani kurhamarhikuarhi je: “¿Iásï nénarini xarhatacheski Tata Diosï Jeoba eskarini xénchasïnga?”. Ka tátsekua, engajtsï kómarhini jauaka Tata Diosïni, grasiasi íntskunta je indeni ambe jimbo enga úka chánksïni jimbo. w23.03 12 párr. 17-19

Jesúsi sési kaaspti ka uékperakua jingoni 12 apostoliichani. ¿Ambechi jorhenguarhisïni? Uétarhisïndi eskachi exeaka na engachi jámajka jucha engaksï máteruecha no újka sési úni ambe ma. Ísï jimbo, engachi no sési pʼikuarherani jauaka jimbokajtsïni erachi ma úchiska ambe ma, ju je kurhamarhikuarhini: “¿Andisïni xáni ikiani jaki? ¿Jísïni jatsi parani sánderu sési úni ambe ma? ¿No sési nitamakuarhini jaki erachi? Nájkirukani jatsipiringa para ikiani jarhani, ¿no sánderu sési jarhaski eskani uékperakua jingoni kámaaka ka puákuntani?”. Engachi méntkisï uékperakua jingoni kaaska máteruechani, xarhatani jauakachi eskachi jurhimbiti kristianueska. Ístu, Jesúsiiri ejemplujtsïni xarhatachesïndi eskachi jánguarhintaaka kurhangukuani juchaari erachiichani (Prov. 20:5). Ísïisti, Jesúsi úsïreendi exeni ambe enga jarheenga kʼuiripuecheeri mintsitarhu, peruchi jucha no úsïnga ísï úni. Peru ambe engachi kʼóru uaaka úni jindeesti tekaakuantani juchaari erachiichani engaksï no uaaka sési úni ambe ma (Éfes. 4:​1, 2; 1 Ped. 3:8). Ka ambe ma engajtsïni jarhuataaka jindeesti sési míteani juchaari erachiichani. w23.03 30 párr. 14-16

Engachi jucha uinhamu pʼamenchani jauaka, Satanási uaati úrani indeni ambe parakachi jurajkuaka Tata Diosï Jeobani. Jamberijtsïni doktoriicha o juchaari familiariicha engaksï no Testigueka, méntkujtsïni arhini jauaka eskachi jatantaaka iurhiri, ambe ma enga Tata Diosï no jaiapanhentajka. O jamberijtsïni nema uaati méntku arhini jarhani parakachi jiókuarhiaka tratamientu ma enga kristianu ma no jatsika para jiókuarhini. No nema uékasïndi uarhini, peru engachi niárapiringa uarhini, míteskachi eskajtsïni Tata Diosï Jeoba seguiriini jauaka xénchani (Rom. 8:​37-39). Engaksï Jeobaeri amiguecha uarhijka, ima seguiriini jarhasïndi miáuani, ísï enajkiksï útasï tsípiti jaki (Luk. 20:37). Ka ima uékaxati tsítantaani (Job 14:15). Tata Diosï Jeoba kánikua maiampisti parachi úni jatsini tsípikua para méntkisï (Juanu 3:16). Sésichi mítetixaka na engajtsïni xáni xénchajka ka kuidarini. Ísï jimbo, nóchi jurajkusïnga Tata Diosï Jeobani nájkirukachi pʼamenchani jauaka ochi arhinhani eskachi uándikunhaaka. Sánderu sési, jurajkusïngachi eskajtsïni sési pʼikuastantaaka, eskajtsïni íntskuaka jánhaskakua ka uinhapikua (Sal. 41:3). w22.06 18 párr. 16, 17

Biblia uandasïndi: “Para jánhastiini orheta uétarhisïndi janhanharhini Tata Diosï Jeobani, ka engari míteska imani enga sánderu Pímbinhasïtiika niárakari kurhanguni” (Prov. 9:10). Ísï jimbo, engachi uékani jauaka úni ambe ma enga kánikua jukaparhakueka, jatsiskachi para míteni “imani enga sánderu Pímbinhasïtiika”, i ambe arhikuekasïndi míteni na enga eratsejka Tata Diosï Jeoba. Ka uaakachi ísï úni engachi arhintaska Bibliani ka publikasionichani engaksï jima pʼitakata jaka. Engachi ísï úska xarhatani jauakachi eskachi sési jimbo jánhaskatiiska (Prov. 2:​5-7). Tata Diosï Jeobajkusï íntspijti ambakiti jánhaskakua (Rom. 16:27). ¿Andichisï ísï uandajki? Primeru, jimboka ima jindeeska juchaari Kueraajpiri ka iámindu ambe mítesti imeeri kueraakateri ambe (Sal. 104:24). Segundu, jimboka iámindu ambe enga ima újka, xarhatasïndi eska jánhastiiska (Rom. 11:33). Ka terseru, jimboka imeeri ambakiti konsejuecha méntkisï marhuakuasïnga imeechani engaksï kurhajchaajka (Prov. 2:​10-12). Ísï jimbo, engachi uéjka sési jimbo jánhastiini, jatsiskachi para jakajkuni ini tanimu ambe ka jurajkuni eskajtsïni jarhuataaka engachi eratseni jauaka úni ambe ma. w22.10 19 párr. 3, 4

Imani uarhiperakuarhu enga Jaŋaskuecha (Apokalipsisi) kapitulu 12 uandapkia eska japiringa, Satanási tsïtaspti ka imeeri demoniuecha jingoni kʼuanijpanhaspti Echerirhu. Jimboka kánikua ikiaxapka, ueenaspti no sési kaani kʼuiripuechani. Jimbosï Biblia uandajti: “Lastima chá engajtsï parhakpinirhu ka kʼéri japondarhu irekani jaka” (Apok. 12:​9-12). ¿Nénajtsïni jarhuatasïni i profesiecha? Ambe enga xáni úkuarhini jaka parhakpinirhu ka na engaksï jámajka kʼuiripuecha, xarhatasïndiksï eska Jesúsi Reiiskia. Ísï jimbo, nóchi no sési pʼikuarherasïnga exeni engaksï kʼuiripuecha kurhunhperajka ka imeechajku pendienti pákuarhini. Sánderu sési, miántasïngachi eska na engaksï jámajka kumplirini jarhasïngaksï ambe enga Biblia uandajka. ¡Meru xarharasïndi eska Tata Diosïiri Reinu juramuxakaia! (Sal. 37:1). Ístu, erokuarhixakachi eska sánderu no sési jánhaskuarhipaaka enga na niárapani jauakia Armajedoni (Mar. 13:8; 2 Tim. 3:13). Juchaari Taati auandarhu anapu kánikuajtsïni xénchasïndi ka jarhuatasïndijtsïni kurhanguni andichisï irekani jaki tiempu ma jimbo enga kánikua no sési jánhaskuarhini jaka. ¿A no eskachi uánikua ambe jatsiska engachi jimbo diosmaiamukua íntskuntaaka? w22.07 3 párr. 7, 8

Uaakachi kurhakuni Tata Diosï Jeobani eska jarhuatauaka erachiichani parakaksï uaaka tekaantani engaksï pʼamenchani jauaka, engaksï desastre naturali ma nitamakuarhini jauaka, guerrecha jimbo o engaksï no sési kánhani jauaka. Ístuchi uaaka kómarhijpikuani erachiichani engaksï kánikua ánchikuarhijka para jarhuajpeni jimeesïsï enga no sési ambe úkuarhijka. Jamberijtsï chá míteka nemani enga i ambe nitamakuarhini jaka. ¿Andijtsïsï no uandajki imeeri nombrini engajtsï kómarhijpikuni jauaka? Engachi kurhakujka Tata Diosï Jeobani eska jarhuatauaka erachiichani, xarhatanchi jarhasïnga eskachi meru xénchaasïnga imeechani. Erachiicha engaksï orhejtsïkujka kúnguarhikuani ístuksï kánikua sési pʼikuarherasïndi engachi kómarhijpikuajka jimbokaksï i kómarhikuecha jarhuataasïnga. Ísï pʼikuarheraspti apostoli Pablu. Ima karaspti: “Kómarhijpechejtsïni [je] eskani intsïnhaaka uandakua para no sáni chéparini uandantani ini ambakiti aianhperakuani enga no nema mítepka” (Éfes. 6:19). Iásïjtuksï jarhasti uánikua erachiicha engajtsïni orhejtsïkujka ka engaksï uinhamu ánchikuarhijka. Engachi kurhakuska Tata Diosï Jeobani eska újchakuraaka ambe engaksï újka i erachiicha, xarhatanchi jarhasïnga eskachi xénchaasïnga. w22.07 23, 24 párr. 14-16

Sondadu ma, úrasïndi kájtsïkua tiámuerini paraksï no éjpurhu atani. Juchajtuchi jatsiska para kuájchakuni juchaari eratsekuani parakajtsïni Satanási no no sési jásï ambe eratsetaraaka. Imajtsïni mámaru ambe tsitirasïndi ka úrasïndi máru ambe parajtsïni no sési jásï ambe eratsetarani. Ísï eska kájtsïkua tiámueri na kuájchakujka sondadueri éjpuni, erokuarhikuajtsïni kuájchakusïndi parachi no no sési jásï ambe eratseni ka ísïchi úsïnga seguiriini sési marhuakuni jarhani Tata Diosï Jeobani. Peru engachi imani ambejku eratseni jauaka engachi jucha tsitijka, úpiringachi mirikurhini ambe engachi erokuarhini jaka. Ju je eratsentani ambe enga úkuarhipka máru kristianu Korintu anapuecha jingoni. Imeechaksï nóteru mintsikasïreendia eska Tata Diosï úpiringa tsítantaani uarhiriichani (1 Kor. 15:12). Pablu uandaspti eska imeecha engaksï no jakajkuenga tsíntskuani soluksï irekasïreenga para tsípikuarhini jámani (1 Kor. 15:32). Iásï, uánikua kʼuiripuechaksï no mintsikasïndi ambe enga Tata Diosï aiatspejka, jimboksïsï sánderu tsitijti tsípikuarhini jimbokaksï no ma erokuarhikua jatsiska. Peruchi jucha kʼóru mintsikasïnga ambe engajtsïni Tata Diosï aiachini jaka. w22.10 25, 26 párr. 8, 9

Tata Diosï Jeobajtsïni pʼímarhisïndi parachi kómarhikua jimbo aiangukuarhini na engachi pʼikuarherajka. Ima mítesti na engachi pʼikuarherajka ka arhisïndijtsïni eskachi uaaka na uéjki jatini kómarhini ka eskajtsïni kurhajchaaka. Ima kánikua tsitisïndi kurhaani imeeri marhuariichani (Prov. 15:8). ¿Ambechi uaa arhini Tata Diosï Jeobani engachi jandiajku pʼikuarherani jauaka? Uaakachi imani jingoni uénhekuarhini (Sal. 62:8). Ju je Tata Diosïni aiangukuarhini ambe engajtsïni uandanhiatajka ka na engachi pʼikuarherajka. Ístuchi uaaka kurhakuni eskajtsïni jánhastaaka parachi míteni ambe engachi jatsika para úni, eskajtsïni balori íntskuaka ka eskajtsïni jánhastaaka parachi úni respetu jingoni uandantani ambe engachi jakajkujka (Luk. 21:​14, 15). ¿Ka ambejtsï úpirini úni engajtsï kómu pʼikuarherani jauaka? Kurhaku je Tata Diosï Jeobani eskaksïni jarhuataaka uandontskuarheni erachi ma jingoni enga sési marhuakuni jaka ka eska jarhuataaka paraksïni kurhanguchini. Ju je jánguarhintani exeni na engajtsïni mókuchiantajka kómarhikuechani ka ju je jurajkuni eskajtsïni máteruecha jarhuataaka. w22.08 10 párr. 6

Enga Tesalónika kúnguarhikua ma úkuarhipkia, jimbanhi kristianuechaksï ueenaspti no sési kánhani. Máru kʼuiripuecha engaksï kánikua no sési jámani japka, antsikupaasptiksï “máru erachiichani paraksï iretarhu anapu juramutiicha jingoni paani” (Úku. 17:6). ¿Úsïnchi eranhaskani na engaksï xáni chéni japka ima kristianuecha? I ambe úpirindi úni eskaksï nóteru xáni tsípikua jingoni marhuakupiringia Tata Diosïni ka apostoli Pablu no uékasïreendi eska inde ambe úkuarhipiringa. Úspti ambe ma parakaksï erachiicha sési japiringa. Sánisï tátsekua, apostoli Pablu arhiaspti Tesalónika anapuechani: “Jimboksïnisï axachepka [...] Timoteuni, paraksïni inde uinhaperantani ka sésiksïni pʼikuastantani parajtsï chá sánderu mintsikani, paraka no nema chkéaka ini uandanhiata ambe jimbo” (1 Tes. 3:​2, 3). Jamberi Timoteu exepti na enga Pablu uinhaperantaapka Listra anapu erachiichani ka na enga Tata Diosï Jeoba jarhuataapka. Ísï jimbo, Timoteu úpirindi arhiani erachiichani eskaksï seguru japiringa eska iámindu ambe sési niántapiringa (Úku. 14:​8, 19-22; Ebr. 12:2). w22.08 21 párr. 4

Uéxurhini 1870 jimbo ísï, máru Biblieri jorhenguarhiriicha enga Charles Russell orhejtsïkuauenga, ueenasptiksï sési jorhenguarhini Tata Diosïiri Karakatani. Imeechaksï uékasïreendi míteni ambemindusï arhikuekeeni Jesúsiiri uarhikua ka míteni nénaksï jatsispi para miántani imeeri uarhikuani. ¿Nénajtsïni marhuachesïni iásï juchantsïni ambe engaksï ima jorhenguarhipka ióntki? Tata Diosï Jeoba újchakuraspti ambe engaksï imeecha úpka ka indeni ambe jimbochi úsïnga sési kurhanguni ambe enga arhikuekajka Jesúsiiri uarhikua ka néna engajtsïni marhuacheaka sánderu orhepani (1 Juanu 2:​1, 2). Ístuchi jorhenguarhiska eska Biblia tsimani ambe aiakuasïnga imeechani engaksï kurhajchajka Tata Diosïni: máruksï auandarhu irekaati para méntkisï ka uánikua máteruechaksï Echerirhu irekaati para méntkisï. Ka sánderuchi andarhierasïnga Tata Diosï Jeobani engachi eratsentajka na engajtsïni xáni xénchajka ka na engajtsïni xáni marhuachejka mándani juchantsïni Jesúsiiri uarhikua (1 Ped. 3:18). Ísï jimbo, májkueni eskaksï na úpka ióntki anapu erachiicha, juchajtuchi pʼímarhiasïnga máteru kʼuiripuechani paraksï juchantsïni jingoni Miántani Jesúsiiri uarhikuani ísï eska Jesúsi na uandapka eskachi úpiringa. w23.01 21 párr. 6, 7

Enga Jesúsi Echerirhu jámani japka aianhpini, jorhendaaspti kʼuiripuechani ambakiti ambe Tata Diosïiri Reinueri. Para jucha i ambe kánikua jukaparhakua ambeesti. Kánikuachi agradesidu jarhaska euajpintskua jimbo, jimboka úsïnga eskachi uaaka sési pájperani Tata Diosï Jeoba jingoni ka Jesúsini jingoni. Ka jucha engachi xarhatajka eskachi mintsikasïnga Jesúsini, ístuchi erokuarhixaka irekani para méntkisï ka ménderu exeantani imeechani engachi uarhiranchaakia ka engachi kánikua xénchauenga (Juanu 5:​28, 29; Rom. 6:23). Ísïisti, juchachi no ma ambe úska parachi ini kóntperateechani jatsiani. Ístuchi no méni uaaka maiamuntani Tata Diosïni ka Kristuni iámindu imani ambe jimbo engaksï úka juchantsïni jimbo (Rom. 5:​8, 20, 21). Peru, ¿nénachi uaa xarhatakuani eskachi kánikua agradesidu jarhaska? Pori ejemplu, uaakachi aiakukuarheni parachi jarhuajpeni konstruksionirhu ka imani lugaricha jimbo engachi úraajka parachi kómarhini Tata Diosï Jeobani. w23.01 26 párr. 3; 27 párr. 5

Imeecha engaksï Tata Diosïiri Reinurhu juramuni jauaka, iauani sánderu uánikua kʼuiripuechanksï juramukuauati iámu parhakpinirhu. ¡Tata Diosï Jeoba kʼéri kóntperata ma íntsaasti ini 144,000 erakukateechani! Májkueni eska Jesúsi, 144,000 erakukateechaksï reiuati ka saserdotiuati (Apok. 5:10). Moisésiiri Lei jimbo, saserdotiicheri ánchikuarhita enga sánderu jukaparhakuepka, jindeespti kuájchakuani kʼuiripuechani paraksï no pʼamenchani ka paraksï sési pájperani Tata Diosï jingoni. Jimboka Lei xarhatasïreenga “sánderu ambakiti ambe enga sánderu orhepani juuaka”, uaakachi uandani eska imeecha engaksï Jesúsi jingoni juramuaka, jarhuatauakaksï kʼuiripuechani paraksï ambakiti ambe jatsini: nóteru pʼamenchania ka sési jarhani Tata Diosïni jingoni (Ebr. 10:1). Ísïisti, útasïchi nótki míteska néna engaksï i reiicha ka saserdotiicha arhiauaka ambe engaksï jatsiaka para úni imeechani enga Tata Diosïiri Reinu juramukuauaka. Joperu néna uéjki enga Tata Diosï Jeoba uaaka ini ambe, uaakachi seguru jarhani eskaksï imeecha engaksï Paraisurhu irekaka arhistaminhaaka ambe engaksï jatsiaka para úni (Apok. 21:​3, 4). w22.12 11 párr. 11-13

Ma ambe jimbo engachi pʼímarhiajka máteruechani Miántskuarhu, jindeesti jimbokachi uékasïnga eskaksï míteaka ambe enga Tata Diosï Jeoba ka Jesúsi úkia juchantsïni jimbo (Juanu 3:16). Uékasïngachi eska ambe engaksï exeaka ka kurhaani Miántskuarhu, uaaka eskaksï uékaaka sánderu sési míteni Tata Diosï Jeobani ka imanksï marhuakuni. Ístuchi pʼímarhiasïnga imeechani engaksï nóteru marhuakuni jakaia Tata Diosïni ka ísïchi úsïnga para miátantaani eska Tata Diosï útasï xénchaasïnga. Kánikuachi sési pʼikuarherasïnga engachi exejka eskaksï uánikuecha uékasïnga nirani. Miántskua, miátantaasïndi imeechani na engaksï xáni tsípikua jingoni irekapka engaksï marhuakuni japka Tata Diosï Jeobani (Sal. 103:​1-4). No arhiparini engaksï kʼuiripuecha jiókuarhiaka pʼímarperakuani o nómbe, kánikuachi jánguarhintasïnga parachi pʼímarhiani jimbokachi míteska eska Tata Diosï Jeoba jukaparharasïnga mándani kʼuiripuni enga nirajka ka no na engaksï xáni nirajka (Luk. 15:7; 1 Tim. 2:​3, 4). Seguruchi jarhaska eska engachi nirajka pʼímarpini para Miántskuarhu nirani, Tata Diosï Jeobajtsïni jarhuatani jarhasïnga parachi imani kʼuiripuechani exeantani engaksï ambakiti mintsita ma jataka (Ageo 2:7). w23.01 20 párr. 1; 23 párr. 9-11

Ima chúrikua ante de Jesúsi uarhini, kurhakuspti imeeri Taati auandarhu anapuni ambe ma enga kánikua jukaparhakueka: eska kuájchakuapiringa imeeri chúxapatiichani (Juanu 17:​15, 20). Ísïisti, Tata Diosï Jeoba méntkisï kuájchakuasïndi ka kuidariuani imeeri marhuariichani. Joperu Jesúsi mítespti eska Satanási sánderu no sési kaapiringa imeeri chúxapatiichani, jimboksïsï uétarhincheendi eska Tata Diosï jarhuataapiringa. Ini parhakpini jimbo enga Satanási juramuni jaka, jurhimbiti kristianuechaksï uánikua uandanhiateechani jatsiasïndi ka ini ambe jimboksï úpirindi chkétakuarhitini pʼikuarherani ka astaksï jamberi uékani jurajkuni Tata Diosï Jeobani. Peru nóchi jatsiska para chéni, jimboka Tata Diosï exexaka iámindu ambe engachi nitamakuarhini jaka ka méntkisï listu jarhasïndi parajtsïni jarhuatani. Jo, Tata Diosï Jeobaeri éskuecha “imeechani exeaxaka engaksï janhanharhijka [...] paraksï pʼímutantaani” (Sal. 33:​18-20). w22.08 8 párr. 1, 2

Kristianuechachi kurhajchasïnga tata Jesukristueri juramukuani jimbokachi kánikua xénchasïnga (Juanu 14:15). Imani mesiicha jimbo enga Miántskua úkuarhijka, xarhatasïngachi na engachi xáni jukaparharajka tata Jesukristueri uarhikuani. Pori ejemplu, arhutasïngachi tiempu para kómarhini ka eratsentani ambe enga arhikuekajka tata Jesukristueri uarhikua. Ístuchi sánderu tiempu arhutasïnga parachi úni uánikua kʼuiripuechani pʼímarhiani parajtsïni pámbetani ini xáni ambakiti tánguarhikuarhu. Ka juchajtuchi kánikua jánguarhintasïnga parachi úni jarhani ini tánguarhikua jimbo. Engachi nirajka Miántskuarhu, kurhaasïngachi arhijtsïkperata ma enga Bibliarhu pʼitakata jaka ka enga sési mókuantajka máru kurhamarhikuechani. Pori ejemplu, andichisï uétarhinchajki eskachi pʼímutanhantaaka ka néna jimbo ma achamasïiri uarhikua úsïni eska uánikua kʼuiripuecha puáminhantaaka pekaduechani. Ístuchi miátanhantasïnga ambe enga arhikuekajka kurhinda ka binu ka neechaksï arhasïndi ini ambe (Luk. 22:​19, 20). Enga nitamataranhani jarhajka arhijtsïkperata, eratseantasïngachi imani kóntperateechani engaksï jatsiauaka imeecha engaksï erokuarhini jaka Echerirhu irekani (Is. 35:​5, 6; 65:​17, 21-23). Kánikua jukaparhakuesti sési kurhanguni ini ambe. w23.01 20 párr. 2; 21 párr. 4

Enga Tata Diosï íntspika imeeri Uájpani parajtsïni pʼímutantani ka ísïchi úni puáminhantani pekaduechani, íntskusïndijtsïni sésikua parachi úni irekani para méntkisï (Mat. 20:28). Apostoli Pablu i ambe uandaspti ima ambeeri enga Tata Diosï eratsetini jaka úni ka enga kánikua jukaparhakueka: “Jimboka eska na juka uarhikua parhakpinirhu ma kʼuiripuni jimbo, ístu ma kʼuiripuni jimbo jurhasti tsíntskua, jimboka eskaksï na uarhijka iámindu kʼuiripuecha Adánini jimbo, ístu iáminduecha tsíntaati Kristuni jimbo” (1 Kor. 15:​21, 22). Jesúsi jorhendaasti imeeri chúxapatiichani paraksï kurhajkuarhini kómarhikua jimbo eska juuaka Tata Diosïiri Reinu ka eska úkuarhiaka Echerirhu ambe enga imeeri Taati uéjka (Mat. 6:​9, 10). Ma ambe enga Tata Diosï eratsetini jaka úni, jindeesti eskaksï kʼuiripuecha irekaaka para méntkisï Echerirhu. Ka paraka ísï úkuarhiaka, Tata Diosï Jeoba Rei ústi imeeri Uájpani ka ístu tánaantaxati 144,000 kʼuiripuechani paraksï ánchikuarhini Jesúsi jingoni ka májku kʼériksï jarhuajperani paraka úkuarhika ambe enga Tata Diosï eratsetini jaka úni (Apok. 5:​9, 10). w22.12 5 párr. 11, 12

Engachi uarhiranchajka nemani engachi kánikua xéncheenga, kánikuachi jirinhantasïnga. Jamberi ueenani kánikuachi no sési pʼikuarherajka engachi miántajka imani jurhiatikuechani ante de ima uarhini, ka sánderia enga ima kʼuiripu kómu uarhika. Joperu jamberi tiempu jingoni miántaakachi ambe ma ima kʼuiripueri engajtsïni jarhuataaka sánderu sési pʼikuarherani, pori ejemplu, ambe ma engajtsïni jorhendapka, ambe ma enga úpka o uandani parajtsïni uinhaperantani o parajtsïni tsíperani. Ka májkuenchi no sési pʼikuarherasïnga engachi arhintajka na enga xáni kómu nitamakuarhipka ka uarhini Jesúsi. Imani mesiicha jimbo enga Miántskua úkuarhijka, arhutasïngachi tiempu parachi eratsentani na enga xáni jukaparhakueka Jesúsiiri uarhikua (1 Kor. 11:​24, 25). Peru engachi eratsentajka imani ambe enga Jesúsi úpka ka ambe enga uandapka enga Echerirhu jámani japka, kánikuajtsïni sési pʼikuastantasïndi. Ka ístujtsïni uinhaperantasïndi eratsentani ambe enga ima úni jaka iásï ka ambe enga uaaka sánderu orhepatini juchantsïni jimbo. w23.01 26 párr. 1, 2

Enga Jesúsi uarhipka, imeeri chúxapatiichaksï kánikua kómu pʼikuarheraspti. ¿Nájtsï pʼikuarherapirini chá engajtsï imeecheepiringa? Imeechaksï uarhiranchaspti amiguni ma engaksï kánikua xéncheenga ka ísïksï pʼikuarherasïreendi enajki nóteru nema úpirinia jarhuataani (Luk. 24:​17-21). Peru tátsekua, Jesúsi xarhakuaspti ka jarhuataaspti kurhanguni eskaksï Biblieri profesiecha uandasïreenga eska ima jatsispka para ísï nitamakuarhini. Ístu arhiaspti eskaksï kʼéri ánchikuarhita ma jatsispka para úni (Luk. 24:​26, 27, 45-48). Ka 40 jurhiatikua tátsekua Jesúsi karhanchentaspti auandarhu ka imeeri chúxapatiichaksï nóteru kómu pʼikuarheraxaptia, sinoksï kánikua tsípixapti. Imeechaksï kánikua sési pʼikuarheraxapti jimbokaksï mítespka eska Jesúsi tsípiti jarhaspka ka eska jarhuataapiringa paraksï úni imani kʼéri ánchikuarhitani. Engaksï ísï xáni sési pʼikuarherani japka, jarhuataaspti paraksï sánderu kʼéri ambe arhini Tata Diosï Jeobani (Luk. 24:​52, 53; Úku. 5:42). Parachi májkueni úni eska Jesúsiiri chúxapatiicha jatsiskachi para orheta peerani Tata Diosïiri Reinueri ambe. Ísïisti eskachi jatsiska para jánguarhintani parachi seguiriini jarhani marhuakuani Tata Diosï Jeobani, peru imajtsïni aiachisïndi eskajtsïni kánikua kóndentaaka engachi orheta peeraska Reinueri ambe (Prov. 10:22). w23.01 30, 31 párr. 15, 16

Nóchi uékasïnga májkueni no sési ambe niátani eska Adáni ka Eba. Ísï jimbo, jatsiskachi para sánderu sési míteni Tata Diosï Jeobani, jukaparharaani imeeri kualidadichani ka jánguarhintani májkueni eratseni eska ima. Engachi ísï úska, sánderuchi xénchaaka imani. Ju je exeni Abraániiri ejempluni, ima kánikua xénchasïreendi Tata Diosïni. Méntkisï kurhajchaspti, nájkiruka méni úkua jukanchapka kurhanguni ambe enga Tata Diosï ueenga. Pori ejemplu, enga Abraáni mítepka eska Tata Diosï Jeoba, “iámu parhakpinirhu anapu Juesi”, kʼamajkupiringa Sodoma ka Gomorrani, eratsespti eska jamberi kʼamajkuapiringa ambakiti kʼuiripuechani no sési úricha jingoni. Eratsesïreendi eska Tata Diosï no méni úpiringa inde jásï ambe. Ísï jimbo, kaxumbikua jingoni kurhamarhispti máru ambe ka Tata Diosï tekaantskua jingoni mókukuntaspti. Ísï tátsekua, Abraáni kurhanguspti eska Tata Diosï mintsitanisï exekuajka kʼuiripuechani ka eska no méni kastigariuasïnga ambakiti kʼuiripuechani no sési úricha jingoni (Gén. 18:​20-32). w22.08 28 párr. 9, 10

Uéxurhini 455 jimbo ante de Jesúsi, engaksï na únhantapkia Jerusaléniiri bardecha, juramuti Neemíasi erakuaspti máru achamasïichani engaksï mintsinharhikuepka. Ma jindeespti Ananíasi, enga orhejtsïkutiipka ima kʼumanchikueri engaksï soldaduecha jarheenga. Biblia uandasïndi eska Ananíasi “achamasï máespka enga kánikua mintsinharhikuepka ka sánderu janhanharhisïreendi Tata Diosï jurhimbitini eska uánikua máteruecha” (Neh. 7:2). Xénchani ka janhanharhini Tata Diosï Jeobani, jarhuataspti Ananíasini paraka kánikua jánguarhintapiringa sési úni náki uéjki ánchikuarhitani enga intsïnhapiringa. Ístu, inde mismu kualidadichajtsïni jarhuataati juchantsïni parachi mintsinharhikueni Tata Diosïiri kúnguarhikuarhu. Iásï ju je exeni Tíkikueri ejempluni, apostoli Pablueri kompanieru ma enga kánikua mintsinharhikuepka. Tíkiku jarhuataspti Pabluni, jimbosï Pablu uandapti eska kánikua “mintsinharhikue[sp]ka para juchaari Tatani jingoni” (Éfes. 6:​21, 22). Pablu no solu mintsikaspti imani paraka kartechani pákuapiringa erachiichani engaksï Éfesu ka Kolosasi japka, sino ístu paraka uinhaperaantapiringa ka sési pʼikuastaantani. Títikueri ejemplujtsïni eratsetarantaasïndi iásï anapu erachiichani, engaksï sési marhuakuni jaka Tata Diosïni, engaksï mintsinharhikueka ka engajtsïni jarhuatajka sési jarhani Tata Diosïni jingoni (Kol. 4:​7-9). w22.09 9,10 párr. 5, 6

José 13 uéxurhinisï kʼérati tsʼéjkukuechani nitamakuarhiaspti. Jamberi niárapti kurhamarhikuarhini sini Tata Diosï Jeoba útasï xéncheeni o sini mirikurhipia jiáni enga xáni no sési nitamakuarhini japka. Peru ima no ikiani pakaraspti. Sánderu sési, méntkisï sési eratsentaspti iámindu ambe ka no jukari uandanhiaspti. Ka enga úpiringa maiamukuarhintani ermanu jémbeecheeri, no ísï úspti. Sánderu sési, xarhatakuaspti eska xénchaasïreenga ka puákuantaspti (Gén. 45:​4, 5). ¿Andisï ísï úpi? Jimboka sési eratsentaspka iámindu ambe, no imeeri uandanhiateechantku, sino ístu ambe enga Tata Diosï Jeoba uékeenga úni (Gén. 50:​19-21). ¿Ambejtsïni jorhendasïni i ambe? Engajtsïni nema no sési kámaska, ju je no ikiani Tata Diosï Jeobani jingoni o eratseni eskajtsïni mirikurhiskia. Sánderu sési, ju je eratsentani néna engajtsïni ima jarhuatani jaka parachi orhepani uérakuni indeni uandanhiatani. Ístu, ju je puátspentani ka miáni eska ima enga uékpijka puátspeantasïnga uánikua pekaduechani. w22.11 21 párr. 4

Ima jánhaskuecha enga profeta Danieli exeapka xarhatastiksï eska Tata Diosï Jeoba sánderu juramukua jatsiska eska náki uéjki máteru juramuti ka eska sánderu kʼéri ambeeska. Orheta exeaspti tʼámu kʼérati animaliichani engaksï arhikuekajka kʼérati juramukuecha engaksï ióntki japka ka engaksï ístu iásï jaka: Babilonia, Medopersia, Gresia ka Roma, ka k’éri juramukua enga iásï juramuni jaka enga jindeeka Reino Unido ka Estados Unidos (Dan. 7:​1-3, 17). Tátsekua, Danieli exespti Tata Diosï Jeobani uaxakatini jarhani tronu ma jimbo auandarhu anapu tribunalirhu (Dan. 7:​9, 10). Danieli exesïndi eska Tata Diosï euantasïnga juramukua parhakpinirhu anapu juramutiichani ka íntsaasïndi imeechani engaksï jukanchaka intsïnhani ka engaksï sánderu juramukua jatsika. ¿Neeskiksï iicha? Jindeesti “nema enga ísïika eska acheetiiri uájpa ma”, enga jindeeka Jesukristu, ka “Tata Diosï sánderu kʼériiri pimbinharati erakukateecha”, engaksï jindeeka 144,000 engaksï juramuaka “para méntkisï” (Dan. 7:​13, 14, 18). Ísï jimbo, xarharasïndi eska Tata Diosï Jeoba jindeeska ima enga Sánderu K’éri Ambeeka. Ambe enga Danieli exepka indeni jánhaskua jimbo xarhatachesïndijtsïni ambe ma enga antesi uandapkia. Danieli uandaspti eska ʻTata Diosï auandarhu anapu […] kénditaasïndi reiichani ka peeraasïndi reiichaniʼ (Dan. 2:​19-21). w22.10 14, 15 párr. 9-11