Abrili

Ju je kurhamarhikuarhini: “¿Ambe úsïni engareni nema konseju ma íntskujka? ¿Jiókuarhisïni eskani no sési úska, o kuájpikuarhisïni? ¿Jirejiresï máteruechani kulpariuasïni?”. Engachi jorhenguarhini jauaka ima achamasïicheeri o nanakecheeri enga Biblia uandaajka ka engaksï sési marhuakupka Tata Diosïni, ju je eratseni ambeksï úspi imeecha paraksï orhepani uérani. Ka ju je eratsentani: “¿Néna uaa májkueni úni eska i kʼuiripu enga xáni sési marhuakupka Tata Diosï Jeobani?”. Ístu jarhasti uánikua ambe engachi uaaka jorhenguarhini erachiicheeri ambe nájkirukaksï sapichku jauaka oksï jatiriinia. Jamberi juchaari kúnguarhikuarhu jati erachi ma enga uandanhiateechani jatsiaka máteru tumbiicha jimbo, familia jimbo o pʼamenchakua ambe jimbo. ¿Náki kualidadichani xarhataaxaki inde erachi engachi juchajtu úpiringa xarhataani? Engachi exeska imeeri ambakiti ejempluni, uánikua ambe jimbojtsïni jarhuataati parachi úni orhepani uérakuani uandanhiateechani. ¡Kánikuachi jukaparharasïnga erachiicheeri ejempluni engaksï sési marhuakuni jaka Tata Diosïni! Inde ambe úsïndi eskachi kánikua sési pʼikuarheraaka (Ebr. 13:7) w22.04 13, 14 párr. 13, 14

Engachi no sési nitamakuarhini jarhajka, kánikuachi sési pʼikuarherantasïnga engajtsïni orhejtsïkuti ma kurhajchajka ka uinhaperantajka. Ka engachi uétarhinchajka eskajtsïni nema jarhuataaka jorhentpini Biblieri ambe, kánikuajtsïni jarhuatasïndi prekursoricha engaksï eksperiensierika parajtsïni pámbetani ka arhini ambechi uaa úni parachi sési jorhentpini. Iámindu i erachiichaksï sési pʼikuarherasïndi engajtsïni jarhuatajka ka juchajtuchi uaaka májkueni pʼikuarherani engachi jarhuajpeska. Engachi uéjka ísï marhuakuni Tata Diosï Jeobani o máteru ambe úparini, ¿ambejtsïni jarhuataa parachi úni ísï úni? Ju je sési eratsetini jarhani ambe engachi meru uéjka úni. Jamberichi úpiringa eratseni: “Uékapiringa sánderu jarhuajpeni kúnguarhikuarhu”. Peruchi jamberi úkua jukanchaaka exeni nénachi uaa ísï úni ka nichi uaa kuenta íntskukuarheni sinchi meru jarhuajpexaki. Ísï jimbo, sánderu sési jarhasti eskachi meru eratseaka ambe engachi uéjka úni. Úpiringachi karani ambe engachi uéjka úni ka ístu ambe engachi uaaka para ísï úni. w22.04 25 párr. 12, 13

Ini jurhiatikuecha jimbo, Tata Diosï Jeoba tánaantaxati “uánikua kʼuiripuechani” ka jorhendaaxati parakaksï uaaka jima irekani nani enga imeeri Reinu juramuaka (Apok. 7:​9, 10). Nájkirukaksï kʼuiripuecha no sési pájperajka jimbokaksï kurhunhperasïnga ka guerreecha jimbo, ima grupu uánikua kʼuiripuecheeri jánguarhintaxati nóteru kurhunhpinia. Pori ísï arhini, imeecheri espadeechanksï tarherakuaksï uántaaxati (Miq. 4:3). Nóksï jámasïndi guerreecharhisï uarhipeni nani engaksï xáni uánikua kʼuiripuecha uarhijka, sánderu sési, jarhuataasïndiksï kʼuiripuechani paraksï imani “tsípikua jatsini enga sési jimbo tsípikueka”, jorhendaasïndiksï kʼuiripuechani Tata Diosï jurhimbitiiri ambe ka ambe enga ima eratseni jaka úni (1 Tim. 6:19). Jimbokaksï i kʼuiripuecha apoiarisïnga Tata Diosïiri Reinuni, imeecheri familiechaksï úpirindi no sési kaani oksï no sési nitamakuarhini sentabu ambe jimbo, peru Tata Diosï Jeoba jingontku jarhasïndi paraksï no ma ambe kueratanchani (Mat. 6:​25, 30-33; Luk. 18:​29, 30). Iámindu i ambejtsïni xarhatachesïndi eska Tata Diosïiri Reinu meru jarhaska ka eska seguiriini jauaka úni imani ambe enga Tata Diosï Jeoba eratsetini jaka. w22.12 6 párr. 13

Enga na kʼamaraakia Mili Uéxurhini, iámindu imeecha engaksï echerirhu irekaaka perfektueuatiksïa. Nóteru nema kómu nitamakuarhiatia Adániiri pekadu jimbo (Rom. 5:12). Nóteru ambe ma jauatia enga iásï Adániiri pekadu jimbo jaka. Uaakachi uandani eska enga na kʼamaraakia Mili Uéxurhini, iámindu imeecha engaksï Echerirhu irekaaka, perfektueuakaksï (Apok. 20:5). Míteskachi eska Jesúsi no méni jurajkuspka Tata Diosïni nájkiruka Noambakiti tsʼéjkupka. Joperu, ¿májkuenksï uaa kʼuiripuecha engaksï perfektueuakia enga Satanási tsʼéjkuauaka? Mándani arhinksï mókuntaati ini kurhamarhikuani enga na kʼamaraakia Mili Uéxurhini, jiáni enga Satanási ménderu petanhantaaka jima uératini enga ónhakata jauaka (Apok. 20:7). Imeecha engaksï no méni jurajkuaka Tata Diosïni engaksï últimuterku tsʼéjkunhaakia, intsïnhaatiksï tsípikua para méntkisï ka niáraatiksï sési jimbo libreeni (Rom. 8:21). Imeecha engaksï no uékaaka kurhajchani Tata Diosïni, kʼamajkunhaatiksï para méntkisï (Apok. 20:​8-10). w22.05 19 párr. 18-20

I profesia jiáni úkuarhispti enga Noambakiti úpka eskaksï judiuecha ka romanuecha uándikupiringa Tata Diosïiri Uájpani (Luk. 23:​13, 20-24). Enga nema irandurakuarhu atakuarhijka no úsïndi xanharani ma tiempu. Sáno májkueni, ma tiempu jimbo Jesúsi no ma ambe úspti úni jimboka uarhirixapka ka sáno tanimu jurhiatikua jarhaspti tumbarhu (Mat. 16:21). Paraka úkuarhipiringa ambe enga Génesis 3:15 uandajka, Jesúsi jatsipirindi para tsípiti jarhani jimboka profesia uandasïreenga eska uarhiitiiri desendensia chʼatajtsïkupiringa akuitsini. Ísï jimbo, Jesúsi tsítanhantapirindi. ¡Ka ísï úkuarhispti! Tanimu jurhiatikua tátsekua enga Jesúsi uarhipkia, tsítanhantaspti komueska espiritu ma enga nóteru méni uarhipiringia. Ka enga niáraakia ima jurhiatikua enga Tata Diosï uandakia, chʼatajtsïkuati Noambakitini, kʼamajkuati para méntkisï (Ebr. 2:14). Imeecha engaksï tata Jesukristuni jingoni juramuaka, jarhuataatiksï kʼamajkuani imeechani engaksï xáni ikiakujka Tata Diosïni, imeechani engaksï akuitsiri desendensiani arhikuekajka (Apok. 17:14; 20:​4, 10). w22.07 16 párr. 11, 12

Taatiicha, jarhuataa je chaari sapiichani parakaksï ambakiti amiguechani jatsiauaka. Tata Diosïiri uandakua jurhimbitku uandasïndi eska amiguechajtsïni uaaka pájtamani para sési úni ambe ma o para no sési úni. ¿Míteskijtsï neeskiksï chaari sapiicheeri amiguecha? ¿Ambejtsï uaa úni parakaksï chaari sapiicha imeecheri amigueuaka engaksï xénchajka Tata Diosï Jeobani? (1 Kor. 15:33). Engajtsï uaaka ambe ma chaari sapiicha jingoni, pʼímarhia je ima kʼuiripuechani engaksï sési pájperakua ma jatsika Tata Diosï Jeoba jingoni (Sal. 119:63). Taati ma enga Tony arhinhajka uandasïndi: “Juchiiti uarhiiti ka ji desde iónisïchi pʼímarhiaskia erachiichani ka pirenchichani engaksï mámaru jatiriika ka mámaru pʼindekuechani jatsiani. Tʼiresïngachi ka sésichi pʼikuarherasïnga májku kʼéri jatsini familieri jorhenguarhikuani. Kánikuachi sési exesïnga ísï úni parachi úni míteani imani kʼuiripuechani engaksï xénchajka Tata Diosï Jeobani ka tsípikua jingonksï marhuakuni. Exeskachia eskaksï i erachiicheeri eksperiensiecha, na engaksï xáni tsípikua jingoni marhuakujka Tata Diosïni ka ambe engaksï xáni újka, kánikua marhuakuastia juchaari sapiichani ka ústi eskaksï sánderu andarhieraaka Tata Diosï Jeobani”. w22.05 29, 30 párr. 14, 15

Engaksï orhejtsïkutiicha uandontskuarhejka nemani jingoni enga no sési ambe niátaka, ambe engaksï uéjka jindeesti ísï úni eska Tata Diosï Jeoba na uandakia eska úkuarhiaka imani kʼuiripu jingoni. ¿Néna marhuakusïni i ambe kúnguarhikuani? Enga pekadori no móantajka nóteru úsïndia kúnguarhikuarhu jarhani. Ka enga petanhantajka, Tata Diosï Jeobaeri marhuariichaksï kuájchakunhasïndi (1 Kor. 5:​6, 7, 11-13; Titu 3:​10, 11). Ístu, i ambe jarhuatasïndi imani enga pekadu úka para móantani ka paraka uaaka ambe ma para Tata Diosï puákuntani (Luk. 5:32). Orhejtsïkutiichaksï kómarhijpikusïndi imani kʼuiripuni enga móantajka ka kurhakusïndiksï Tata Diosïni eska jarhuataaka para ménderu sési pájperantani imani jingoni (Sant. 5:15). Ju je eratsentani nemani enga no sési ambe niátaka ka enga no móantajka enga orhejtsïkutiicha jingoni uandontskuarhejka. Enga inde ambe úkuarhiska, petanhantaati kúnguarhikuarhu. Joperu enga ima kʼuiripu kuenta íntskukuarhejka eska no sési jarhaska ambe enga úka ka mintsita jingoni móantani ka ménderueni eratsenia ka jámani, Tata Diosï Jeoba puákuntaati (Luk. 15:​17-24). Ka ísï uaati nájkiruka kʼérati pekaduechani uaaka (2 Crón. 33:​9, 12, 13; 1 Tim. 1:15). w22.06 9 párr. 5, 6

Interu parhakpinirhu, uánikua erachiichaksï jarhasti engaksï úkia orhepani uérakuani kʼérati uandanhiateechani ka Tata Diosï Jeobaeri jarhuajperata jingoni únksï andani Noambakitini (1 Ped. 5:9). Chájtujtsï uaaka májkueni úni. Nóteru ióni jimbo, Tata Diosï Jeoba arhiati Jesúsini ka imeechani engaksï imani jingoni juramuni jauaka eska niáraskia ora para “xereantani Noambakitiiri úkuechani” (1 Juanu 3:8). Enga i ambe na úkuarhiakia, Tata Diosïiri marhuariicha engaksï Echerirhu irekaaka, exeatiksï na enga úkuarhiaka i profesia: ʻNókini ambe ma chéraati, nijtu jaua ambe ma engari jimbo chéakaʼ (Is. 54:14; Miq. 4:4). Enga jamberi niáraaka ima jurhiatikua, ju je jánguarhintani parachi orhepani uérakuni imani ambe engajtsïni chérajka. Jatsiskachi para sánderu mintsikani eska Tata Diosï Jeoba xénchaasïnga ka eska kuájchakuasïnga imeeri marhuariichani. ¿Ambejtsïni jarhuata parachi ísï úni? Eratsentani na enga Tata Diosï Jeoba kuidarikia imeeri marhuariichani ka indeeri ambe uandontskuarheni máteruecha jingoni. Ístu, ju je méntkisï miáni jarhani na engajtsïni Tata Diosï Jeoba jarhuatakia engachi kʼérati uandanhiateechani jatsiapka. Imeeri jarhuajperata jingoni uaakachi orhepani uérakuni imani ambeni engajtsïni chérajka (Sal. 34:4). w22.06 19 párr. 19, 20

Kʼéri juramukua ma ixú Echerirhu enga jindeeka monumentueri jantsiriicha ka engaksï tiámu ka atsïmueriika, ueenasti juramuni Primera Guerra Mundiali jimbo jiáni enga Reino Unido ka Estados Unidos márku úkuarhintapka. Monumentu enga Nabukodonosori exepka, tsimani ambe jimbo xarhatasïndi eska í k’éri juramukua ménderueniiska ióntki anapu juramukuecha jingoni. Ma ambe enga xarhatajka eska i kʼéri juramukua, enga Reino Unido ka Estados Unidosini arhikuekajka, no májkueniiska eska máteru juramukuecha, jindeesti jimboka no oru o plata jingoni úkata jarhaska, sino tiámu ka atsïmu jingoni jeuekuarhitixati. Atsïmu kʼuiripuni arhikuekasïndi (Dan. 2:​43, nota). Juchachi exesïnga eskaksï kʼuiripuecha botarisïnga, kʼérati marchechanksï uaasïndi, kurhajkuarhisïndiksï eskaksï respetarinhaaka imeecheri derechuecha ka sindikatuechanksï jatsiasïndi, ka ini ambe jingoni nóksï jurajkusïndi eska í kʼéri juramukua uaaka ambe enga uékaaka. w22.07 4 párr. 9, 10

Engajtsï útasï no míteka sintsï itsï atakuarhia, kurhamarhikuarhi je: “¿Amberini pʼínguxaki? (Úku. 8:36). Jesúsi uandaspti eska úni ambe enga imeeri Taati uéjka, ísïispka komueska tʼireni. ¿Andi? Jimbokajtsïni tʼirekua sési úchisïnga. Jesúsi mítespti eska iámindu ambe engajtsïni Tata Diosï Jeoba kurhachejka marhuachesïnga. Ka imajtsïni no kurhachesïndi ambe ma engajtsïni uaaka no sési úchini. Ísï jimbo, ambe enga Tata Diosï Jeoba uéjka, jindeesti eskajtsï itsï atakuarhiaka (Úku. 2:38). Uaakajtsï seguru jarhani eska kurhajchani juramukuani enga uandajka eskajtsï jatsiska para itsï atakuarhini kánikuaksïni marhuacheaka. Engaksïni íntskupiringa tʼirekua ma enga kánikua áspika, ¿a no eskajtsï no ióni eratsentani pakarapiringa sintsï aua o nómbe? Sáno májkueni, asï ióni eratsentani pakara je sintsï itsï atakuarhia o nómbe. Máru kʼuiripuechani, ¿ambe pʼínguasïni paraksï niárani itsï atakuarhini? Jamberiksï ísï pʼikuarherajti enajkiksï útasï nótki listu jaki. Aiakukuarheni Tata Diosïni ka itsï atakuarhini, jindeesti sánderu jukaparhakua ambe engajtsï uaaka úni. Ísï jimbo, arhuta je tiempu parajtsï sési eratsentani ka kánikua jánguarhinta je parajtsï itsï atakuarhini. w23.03 7 párr. 18-20

Jiáni enga Jesúsi erakunhapka, jiáni niáraspti jindeeni uarhiitiiri desendensia, ima enga sánderu jukaparhakuepka. Enga Jesúsi na uarhipkia ka tsíntani, Tata Diosï íntskusti tʼíntskua ka úspti “eska kʼéri ambe arhinhapiringa”, íntskuspti juramukua “auandarhu ka ístu parhakpinirhu” ka ístu íntskuspti juramukua para xereantani “Noambakitiiri úkuechani” (Ebr. 2:7; Mat. 28:18; 1 Juanu 3:8). Joperuksï ístu uarhiitiiri desendensiarhu japirindi máteru kʼuiripuecha. Enga apostoli Pablu karakuapka kristianu erakukateechani engaksï judiuepka ka máteru nasionirhu anapuechani, uandaspti neechaksï jindeepirini i kʼuiripuecha engaksï ístu uarhiitiiri desendensiepiringa, arhiaspti: “Engajtsï kristueriika, sési jimbo jindeeskajtsï Abraániiri desendienti jémbeecha ka chaariisti erensia eskajtsï na aiaminhapka” (Gal. 3:​28, 29). Enga Tata Diosï erakujka kristianuni ma espiritu santu jimbo, ima kʼuiripu niárasïndi kuenta úkuarhini uarhiitiiri desendensia jingoni. Jimajkani, uarhiitiiri desendensia jindeesti tata Jesukristu ka 144,000 kʼuiripuecha engaksï imani jingoni juramuaka (Apok. 14:1). Iámindu iicha, jánguarhintasïndiksï ísï eratseni ka ísï jámani eska Tata Diosï Jeoba enga jindeeka imeecheri Taati. w22.07 16 párr. 8, 9

Iáminduechachi míteska eskachi jatsiauaka uandanhiateechani últimu jurhiatikuecha jimbo (2 Tim. 3:1). Engachi indeni ambe nitamakuarhini jarhajka úpiringachi kánikua no sési pʼikuarherani ka ísïchi pʼikuarherani enajkichi nóteru uaaia orhepani uérani ka sánderia engachi uánikua uandanhiateechani jatsiajka májku tiempu jimbo. Joperu ju je miáni eska Tata Diosï Jeoba jingontku jarhaska juchantsïni jimbo ka eska imajtsïni jarhuataaka orhepani uérakuni náki uéjki uandanhiatani. Ju je exeni Jobueri ejempluni. I ambakiti acheeti májku tiempu jimbo kʼérati uandanhiateechani jatsiaspti. Ma jurhiatikua jimbojku uarhiranchaaspti ka sïpakuasptiksï animaliichani ka uándikuasptiksï imeeri jántspiriichani ka sánderu no sési jásï ambe, uarhiranchaaspti imeeri uájpeechani enga xáni xénchauenga (Job 1:​13-19). Sánisï tátsekua enga útasï no sési pʼikuarherani japka indeni ambe jimbo, Jobu kʼéri pʼamenchakua ma pʼiraspti enga jamberi nóteru mítentskuarhipkia (Job 2:7). Tata Diosï Jeoba exexapti ambe enga Jobu nitamakuarhini japka. Ka jimboka xénchasïreenga, iámindu ambe íntskuspti enga uétarhincheenga para úni tekaantani ka para no méni jurajkuni. w22.08 11 párr. 8-10

Úpiringachi no sési pʼikuarherani engachi jurhimberanhantaaka. Jamberichi no exeaka na enga xáni uétarhienga eskajtsïni nema jurhimberantapiringa ka eratsenchi eskachi no uétarhinchaxapka eskachi jurhimberanhantapiringa. Ístu, nóchi úpiringa kurhanguni eskajtsïni Tata Diosï Jeoba jimbosï jurhimberantajka jimbokajtsïni xénchasïnga (Ebr. 12:​5, 11). Ísï jimbo, ju je jiókuarhini engachi jurhimberanhantaaka ka ju je sési peentani ambe ma. Jesúsi no ma xanharkusï jurhimberantapti Pedruni apostoliichani japarini (Mar. 8:33; Luk. 22:​31-34). ¡Pedru kánikua kʼuratsepti! Joperu no jurajkuspti Jesúsini ka jorhenguarhispti ima ambeeri enga no sési úpka. Ka indeni ambe jimbo Tata Diosï Jeoba kóndentaspti jimboka no jurajkuspka imani ka sánderu kʼérati ánchikuarhiteechani íntskuaspti kúnguarhikuarhu (Juanu 21:​15-17; Úku. 10:​24-33; 1 Ped. 1:1). Kánikuajtsïni marhuachesïndi juchantsïni ka máteruechani engachi jiókuarhijka parachi jurhimberanhantani ka engachi sési peentajka ambe ma. Engachi ísï úska, sánderuchi sési marhuakuaka Tata Diosï Jeobani ka juchaari erachiichani. w22.11 21, 22 párr. 6, 7

Abraáni mítespti eska Tata Diosï no méni úpiringa ambe ma enga no sési jaka o enga no sési pʼikuastpepiringa. Ka apostoli Pablu uandaspti eska Abraáni niáraspka kurhanguni eska Tata Diosï úpiringa tsítantani imeeri uájpa Isaakini (Ebr. 11:​17-19). Ka i ambe meru ísï úkuarhipirindi, jimboka Tata Diosï aiakuspti Abraánini eska kʼéri ireta ma japiringa Isaakini jimbo ka enga i ambe úkuarhipka, Isaaki nótki kánguarhiaxapti sapiichani. Jimboka Abraáni kurhajchasïreenga Tata Diosï Jeobani, seguru jarhaspti eska Tata Diosï méntkisï úpiringa ambe enga sési jaka. Mintsikaparini kurhajchaspti imeeri Taatini, nájkiruka i ambe enga arhipka no fásiliipka (Gén. 22:​1-12). ¿Nénachi uaa májkueni úni eska Abraáni? Jatsiskachi para sánderu sési míteni Tata Diosï Jeobani. Engachi ísï úska sánderuchi sési pájperaaka imani jingoni ka sánderuchi xénchaaka (Sal. 73:28). Ístu, jorhendani jauakachi juchaari konsiensiani parachi májkueni eratseni eska Tata Diosï (Ebr. 5:14). Ka engajtsïni nema méntku arhini jauaka parachi úni ambe ma enga no sési jaka, i ambejtsïni jarhuataati parachi no ísï úni. Nóchi méni uékapiringa imani ambe úni enga no sési pʼikuastapiringa juchaari Taatini ka enga úpiringa eskachi nóteru sési pájperapiringia imani jingoni. w22.08 28, 29 párr. 11, 12

Engaksï apostoli Pablu ka Bernabé, kʼuanhatsentapka Listra, Ikoniu ka Antiokía, “erakuasptiksï arhistatspitiichani [o orhejtsïkutiichani] mándani kúnguarhikuarhu” (Úku. 14:​21-23). Ísïisti, imeecha engaksï erakunhapka uinhaperantaasptiksï kúnguarhikuechani, májkueni eskaksï na újka iásï anapu orhejtsïkutiicha. Orhejtsïkutiicha, jingontku ja je parajtsï uinhaperantaani ambakiti uandakuecha jingoni imeechani engaksï uétarhinchani jauaka. Pablu miátantaaspti erachiichani eskaksï “uánikua testiguecha” úspka tekaantani Tata Diosï Jeobaeri jarhuajperata jimbo mámaru járhati tsʼéjkukuechani engaksï jatsiapka (Ebr. 12:1). Mítespti eska ambe engaksï ióntki anapu Tata Diosïiri marhuariicha nitamakuarhipka jarhuataapiringa paraksï balori jukani ka eskaksï eratsentani japiringa imani “iretani enga [Tata] Diosïiriika enga tsípitiika” (Ebr. 12:22). Kánikuajtsïni jarhuatasïndi engachi arhintajka na enga Tata Diosï jarhuatapka Gedeónini, Barakini, Dabidini, Samuelini, ka uánikua máteruechani (Ebr. 11:​32-35). w22.08 21 párr. 5, 6

¿Náki “úkuechani” jimboksï jusgarinhaa imeecha engaksï tsíntaaka? ¿Imani ambe jimboeua engaksï úka ante de uarhini? Nómbe. Ju je miántani eskaksï imeecheri uarhikua jimbo maianhpentaskia imeecheri pekaduechani. Ísï jimbo, imeecheri ʻúkuechaʼ no jindeesti ima ambe engaksï úka ante deksï uarhini. Sánderu sési, arhikuekasïndi sinksï uaa o nómbe imani ambe engaksï jorhendanhaaka jimbanhi parhakpinirhu. Asta imeecha engaksï no méni jurajkuka Tata Diosïni, komu Noé, Samueli, Dabidi ka Danieli, jatsiatiksï para jorhenguarhini tata Jesukristueri ambe ka xarhatani eskaksï mintsikasïnga imeeri uarhikuani. ¡Engaksï i kʼuiripuecha jatsiaka para jorhenguarhini ini ambe, sánderia imeecha engaksï no káni sési jámaka! ¿Ambeksï úkuarhinchaa imeecha engaksï no jiókuarhiaka ambe engaksï jorhendanhaaka? Apokalipsisi 20:15 arhisïndi: “Imeecha engaksï no exenhantaka karakata libru tsípikueri jimbo, imeechajtuksï kʼuanijpanhasti japondarhu enga méntku kurhini jaka chpiri”. Jo, kʼamajkunhaatiksï para méntkisï. ¡Kánikua jukaparhakuesti eskachi jánguarhintaaka parakaksï juchaari nombriicha karakata jauaka libru tsípikueri jimbo ka eska karakata pakaraaka! w22.09 19 párr. 17-19

Sáno méntkisï engachi exeni jarhajka náki tratamientu úrani engachi pʼamenchani jarhajka úrasïngachi ambe engachi jorhenguarhikia Bibliarhu (1 Tim. 3:9). Ísï jimbo, engachi eratsejkia ambe engachi uaaka ka uandontskuarheni máteruecha jingoni indeeri ambe, sési jauati eskachi jánguarhintaaka ísï úni eska na arhijka Filipusï 4:5 “Eskaksï iámindu kʼuiripuecha exeaka eskajtsï chá kurhangusïnga”. Engachi no jámaska jukari kuidarikuarhini parachi no pʼamenchani, xarhatani jarhasïngachi eskachi ima jásï kʼuiripueska engaksï kurhangujka. Xénchaasïngachi ka janhanharhiasïngachi juchaari erachiichani, nájkirukaksï imeecha no májkueni ambe erakuaka úni eska jucha (Rom. 14:​10-12). Ísï eskachi ueenakuarhu na uandaka, Tata Diosï Jeoba jindeesti enga újka eska tsípikua jauaka. Ka uaakachi xarhatakuni eskachi agradesidu jarhaska engachi kuidariiska juchaari tsípikuani, enga Tata Diosïiri intsïmperakua máeka, ka engachi sánderu ambakiti ambe íntskuska imani (Apok. 4:11). Ísïisti, iásïksï uánikua pʼamenchakuecha jarhasti ka uandanhiateecha, joperu Tata Diosï Jeoba no uékasïreendi eskachi jucha ísï irekapiringa. Sánderu sési, ima no ióni jimbo uaati eskachi jucha irekaaka parhakpini ma jimbo enga nóteru jauakia kómu nitamakua ambe ni uarhikua (Apok. 21:4). Enga jamberi niáraaka ima jurhiatikua, ju je jukaparharani juchaari tsípikuani ka ju je úrani parachi marhuakuni imani engajtsïni tsípikua íntskuka, juchaari Taati auandarhu anapuni enga kánikua xénchpetiika, Tata Diosï Jeoba. w23.02 25 párr. 17, 18

Tata Diosï Jeoba xarhatastia eska ima jindeeska enga sánderu kʼéri ambeeka iámindu imeechani jingoni “engaksï juramukua jatsika” (Rom. 13:1). Ju je exeani tanimu ejempluechani. Ejiptu anapu faraoni, uinhamu ánchitarasïreendi Tata Diosïiri iretani ka méntku no uékasïreendi jurajkuani. Peru Tata Diosï pʼímutantaspti imeeri iretani ka úspti eska faraoni uarhimepiringa mari Charhapitirhu (Éx. 14:​26-28; Sal. 136:15). Ístu rei Belsasari Babilonia anapu, úspti kʼuínchikua ma ka no janhanharhispti “Tatani auandarhu anapuni” ka ʻkómarhiaspti diosïichani engaksï plateriipka ka orueriʼ ka no Tata Diosï Jeobani (Dan. 5:​22, 23). Peru Tata Diosï úspti eska i acheeti enga xáni kʼéramakuarhienga kʼuratsekua jingoni pakarapiringa. “Ima mismu chúrikua” Belsasari uándikunhaspti, ka meduecha ka persecha intsïnhasptiksï imeeri juramukuani (Dan. 5:​30, 31). Ka rei Erodesi Agripa I, Palestina anapu, uándikuspti apostoli Santiaguni ka ístu tátsekua ónhatarkuarhispti apostoli Pedruni jimboka uékasïreenga uándikuni. Peru Tata Diosï no jurajkuspti paraka i ambe úpiringa. “Tata Diosï Jeobaeri ánjeli ma úsp[ti] eska Erodesi jirejiresï pʼamenchapiringa”, ka Erodesi uarhispti (Úku. 12:​1-5, 21-23). w22.10 15 párr. 12

Engachi arhintaska na enga ióntki Tata Diosï Jeoba kuidariuapka imeeri marhuariichani, sánderuchi mintsikasïnga eska úkuarhiaka ambe enga ima aiatspejka. Iámindu ambe enga Tata Diosïiri Karakatarhu jaka ‘karakata jarhasti parajtsïni jorhendani, para eska Diosïiri karakateechani jimbo jucha tekaantskua jatsiaka ka uinhapini korokanchi ka ísï ambakiti ambe erokanchi’ (Rom. 15:4). Ju je eratsentani na enga Tata Diosï Jeoba ísï úka eska na aiatspipka. Ju je eratsentani ambe enga úka Abraáni ka Sarani jimbo. Jimbokaksï imeecha jatiriispkia, nóteruksï úpirindia kánguarhiani sapiichani, joperu Tata Diosï aiakuaspti eskaksï kámapiringa sapini ma (Gén. 18:10). ¿Ambe úspi Abraáni? Biblia uandasïndi eska ima jakajkuspka “eska ima jindeepiringa uánikuecheeri taati jémba” (Rom. 4:18). Jamberi para Abraáni úpirindi ísï xarharani eska Tata Diosï no úpiringa ísï úni eska na aiakuni japka, joperu Abraáni seguru jarhaspti eska Tata Diosï Jeoba meru ísï úpiringa eska na aiakupka. Ka i ambakiti Tata Diosïiri marhuari úspti exeni eska ísï úkuarhispka (Rom. 4:​19-21). I járhati ejempluechajtsïni jorhendasïndi eskachi uaaka méntkisï mintsikani eska Tata Diosï ísï uaaka eska na uandajka. w22.10 27 párr. 13, 14

I uandakuechaksï niáraspti ísï úkuarhini engaksï judiuecha petanhantapka Babilonia uératini. Tata Diosï Jeoba xarhataspti eska ima jindeespka imeecheeri sánderu Ambakiti Jorhentpiri. Jimboka ima arhistakuaspka, judiuechaksï úspti ménderu ísï kómarhini eska ima na jaiapanhintajka. Ini jurhiatikuechani jimbo, Jeoba ístu jindeesti juchaari sánderu Ambakiti Jorhentpiri ka inde ambe úsïndi eskachi kánikua sési pʼikuarheraaka. Kʼéri kóntperata máesti eskajtsïni Tata Diosï Jeoba jorhendaaka. Ini bersikuluecha jimbo, Isaíasijtsïni terukutantasïndi máru jorhenguarhiricha jingoni enga Tata Diosï Jeoba tsimani ambe jásï jorhendaajka. Orheta, Isaíasi uandasïndi: “Exeakari chiiti Ambakiti Jorhentpirini chiiti éskuecha jingoni”. Ini ejemplu jimbo, jorhentpiri imeeri jorhenguarhiricheri orhepani jimbo jarhasti. ¿Nénajtsïni jorhendasïni Tata Diosï Jeoba iásï? Imeeri kúnguarhikuani úraparini. Kánikuachi agradesidu jarhaska engajtsïni xáni ambakiti ambe jorhendajka úrapariani tánguarhikuechani, publikasionichani, programeechani engaksï JW Broadcasting^® jimbo jaka ka uánikua máteru ambe jingoni. Iámindu i ambejtsïni jarhuatasïndi tsípikua jingoni tekaantani engachi no sési nitamakuarhini jauaka. w22.11 10 párr. 8, 9

Jesúsi no solu uandaspti eska Jerusaléni ka imeeri templu kʼamajkunhapiringa, sino ístu uandaspti ambe enga úkuarhini japiringa enga kʼamarani japiringia i tiempu engachi jimbo irekani jaka. Uandaspti: “Ka ima jurhiatikua ka ima ora, no nema mítesti ni sikiera ánjeliicha engaksï auandarhu jaka ka nijtu Diosïiri Uájpa sino solu Diosï Taati”. Ka tátsekua arini konseju íntsaaspti: “Jingontku ja je” (Mar. 13:​32-37). Engaksï primeru siglurhu anapu kristianuecha engaksï judiuepka uékapiringa tsípiti pakarani, jatsisptiksï para méntkisï jingontku jarhani. Jesúsi arhiaspti imeeri chúxapatiichani: “Engajtsï chá exeaka ireta Jerusalénini sondaduecha uirhiperatini jarhani, jimajkani míte je eska ora niáraskia para ima xerenhantani”. Ka engaksï exepiringa eska i ambe úkuarhixapkia, jatsipirindiksï para juáteecharhisï nirani sïpakuarhini ísï eska Jesúsi na arhiapka (Luk. 21:​20, 21). Imeecha engaksï úpka ambe enga Jesúsi arhiapka, sïpakuarhisptiksï ante de Roma anapuechaksï kʼamajkuni Jerusalénini ka tsípitiksï pakaraspti. Juchachi irekaxaka últimu jurhiatikuechani jimbo i parhakpiniiri enga xáni no sési jánhaskuarhini jaka. Ísï jimbo, májkueni eskaksï primeru siglurhu anapu kristianuecha, juchajtuchi jatsiska para sési eratsentani ambe ma ka jingontkuchi jarhani. w23.02 14 párr. 1, 2; 16 párr. 3

Tata Diosï Jeoba jorhendaasïndi imeeri marhuariichani paraksï no chkuanderani ka paraksï jurhimbitku jámani, engaksï ísï újka, imeechajkuminduksï janhanharhikuarhisïndi ka sésiksï pʼikuarherasïndi (Prov. 13:​5, 6). ¿Exeskijtsïa néna engaksïni Biblia jarhuatani jaka desde engajtsï ueenaka jorhenguarhini Biblieri ambe? Jorhenguarhiskajtsïa eskajtsïni kánikua marhuachesïnga iáminduechani ambe engajtsïni jorhendajka Tata Diosï (Sal. 77:13). Ísï jimbo, uékasïngajtsï kurhajchaani Tata Diosï Jeobaeri juramukuechani (Mat. 6:33). Ístu, uékasïngajtsï kuájpini imani ambe enga jurhimbitkueka ka xarhatantsï eska iámindu ambe enga Satanási uandaka Tata Diosïiri ambe, chkuanderakua ambeeska. Peru, ¿nénajtsï uaa ísï úni? Imani ambe jingoni engajtsï uaaka, xarhataakajtsï eskajtsï no jiókuarhiasïnga Satanásiiri chkuanderakuechani, eskajtsï kuájpisïnga imani ambe enga ísïika, eskajtsï uékasïnga eska Tata Diosï Jeoba jindeuaka chaari juramuti ka eskajtsï mintsika jingoni uékasïnga kurhajchaani imeeri juramukuechani. Ka parajtsï xarhatani eskajtsï uékasïnga ísï úni, jatsiskajtsï para kómarhikua jimbo aiakuni Tata Diosï Jeobani eskajtsï marhuakuaka para méntkisï. Tátsekuajtsï jatsiska para itsï atakuarhini parajtsï xarhatakuani máteruechani eskajtsï aiakukuarheskia Tata Diosïni. Ísïisti, tsitini imani ambe enga ísïika ka jurhimbitku jámani, jindeesti ambe ma engaksïni jarhuataaka parajtsï niárani itsï atakuarhini. w23.03 3 párr. 4, 5

Jarhasti pínandikua ma engaksï kʼuiripuecha no míteka: ʻTata Diosïiri pínandikuestiʼ, enga jindeeka na engachi xáni sési pʼikuarherajka engachi ambakiti pájperakua ma jatsika juchaari Taati auandarhu anapu jingoni. Engachi Tata Diosïiri pínandikua jatsijka, nóchi ambe ma jimbo chésïnga (Filip. 4:​6, 7). Ka sésichi pájperasïnga imeecha jingoni engaksï xénchajka Tata Diosï Jeobani ka ístuchi sési pájperasïnga Tata Diosï jingoni “enga pínandikua íntspijka” (1 Tes. 5:23). Úsïngachi jatsini Tata Diosïiri pínandikuani engachi sési mítejka imani, mintsikani ka kurhajchani. Inde pínandikua úsïndi eskachi no xáni uandanhiauaka ka eskachi uaaka orhepani uérani engachi uandanhiateechani jatsiauaka. ¿Meruchi uaa Tata Diosïiri pínandikua jatsini engachi no sési nitamakuarhini jauaka? ¿Uaachi no xáni uandanhiani engaksï epidemiecha jauaka, enga no sési ambe úkuarhiaka, engaksï kʼuiripuecha arhirperaaka o engachi no sési kánhaaka? Né uéjki uaati chéni ini ambe jimbo. Uánikua erachiicha ka pirenchichaksï ísï ústia eska Jesúsi na uandapka, ísï eska na arhijka iásï anapu tekstu. Ka Tata Diosïiri jarhuajperata jingoni pínandikuaksï jatsisïndi engaksï kʼérati uandanhiateechani jatsiajka. w22.12 16 párr. 1, 2

Nóchi míteska ambe uaa úkuarhini juchaari tsípikua jingoni. Ísï jimbo, jukaparhakuesti eskachi miáuaka eska Tata Diosï Jeobajtsïni jukaparharasïnga peru no imani pribilejiuechani jimbo engachi jatsiajka. Ístuchi no jatsiska para terukutantani ambe engaksï máteruecha újka imani ambe jingoni engachi jucha újka (Gal. 6:4). Ísï jimbo, uaakachi jirinhakuntani néna engachi uaaka sánderu sési marhuakuni Tata Diosï Jeobani ka jarhuataani máteruechani. Engachi arisku sáni irekaska ka engachi jánguarhintaska no kántspeni, uaakachi aiakukuarheni parachi sánderu ánchikuarhiteechani intsïnhaani Tata Diosïiri kúnguarhikuarhu. Ju je eratsentani ambechi uaa úni iásï engajtsïni jarhuataaka para ísï úni eskachi na eratsetini jaka. Pori ejemplu, engajtsï chá uéjka prekursori regulariini, ¿úpirintsï marhuani ma tiempu komu prekursori auksiliari? O, engajtsï uékani jaka orhejtsïkutiiri jarhuajpirini, ¿úpirintsï sánderu aianhpini? Iámindu ambe engajtsï uaaka jorhenguarhini iásï, jarhuataatiksïni parajtsï máteru ánchikuarhiteechani jatsiani sánderu orhepatini. Jánguarhinta je sési úni imani ambe engajtsï eratsetini jaka parajtsï marhuakuni Tata Diosï Jeobani. w22.04 26 párr. 16, 17

Engachi kómarhijka juchaari Tata Diosïni ambe máeri engachi uandanhiani jarhajka, jamberi imajtsïni orheta uinhaperantaati parachi úni tekaantani indeni uandanhiatani. Joperu engachi no jurajkuska uandanhiani ísï eskachi na uékapiringa, jamberichi jatsiaka para uánikua uelta kómarhini parakajtsïni íntskuaka uinhapikua parachi úni tekaantani. Ka ima mismujtsïni arhisïndi eskachi indeni ambe uaaka. Ka Isaíasijtsïni pʼímarhisïndi: “Asï jurajku je eska ima mintsikuarhiaka”, para Tata Diosï Jeobani arhikuekani (Is. 62:7). ¿Ambe arhikuekasïni i ambe? Eskachi no kuatantaaka kómarhini imani, i ambe arhikuekasïndi no jurajkuni eska Tata Diosï Jeoba mintsikuarhiaka. I ambejtsïni miátantasïndi ambe ma enga tata Jesukristu uandapka kómarhikueri ambe ixú Lukasï 11:​8-10, 13 jimbo. Úrapariani uánikua ejempluechani, pʼímarhisptijtsïni parachi seguiriini espiritu santu kurhakuni. Ístuchi uaaka kurhakuni Tata Diosï Jeobani eskajtsïni arhistachiaka parachi imani ambe erakuni úni enga sési jaka. w22.11 9 párr. 5, 6

Desde iásï chá ka chaari familia uaakajtsï prepararikuarhini para jiáni engachi no sési kánhaaka. Asï eratsi je iámindu imani ambe enga úpiringa úkuarhini. Sánderu sési, jánguarhinta je sánderu sési pájperani Tata Diosï Jeoba jingoni ka jarhuataa je chaari uájpeechani paraksï májkueni úni. Ka engajtsï ma repentku niáraska kánikua uandanhiani, aiangukuarhi je Tata Diosï Jeobani na engajtsï pʼikuarherajka (Sal. 62:​7, 8). Uandontskuarhi je chaari familia jingoni iámindu ima ambeeri engachi jimbo mintsikajka Tata Diosï Jeobani. Ísï eska na uétarhijka preparariuani sapiichani para jiáni enga no sési ambe úkuarhiaka, ístu uétarhisïndi preparariuani para jiáni engachi no sési kánhaaka ka jorhendaani mintsikani Tata Diosï Jeobani. Ísïksï uaati balori jukani ka no xánksï uandanhiani. Tata Diosïiri pínandikua úsïndi eskachi ísï pʼikuarheraaka eskachi kuájchakukata jarhaska (Filip. 4:​6, 7). Inde pínandikua engajtsïni Tata Diosï Jeoba íntskujka jarhuatasïndijtsïni parachi no xáni uandanhiani jiáni engaksï epidemiecha jarhajka, enga no sési ambe úkuarhijka o engachi no sési kánhani jarhajka. Tata Diosï úraasïndi orhejtsïkutiichani engaksï jánguarhintajka sési kuidariuani karichiichani, ka sésikuajtsïni íntskusïndi iáminduechani parachi úni jarhuajperani. Tata Diosïiri pínandikuajtsïni jarhuatasïndi parachi preparadu jarhani jiáni engachi sánderu kʼéri tsʼéjkukuechani jatsiauaka ka ístu enga “kʼéri mískuarhita” úkuarhini jauaka (Mat. 24:21). w22.12 27 párr. 17, 18

Jatsiskachi para jánguarhintani nóteru no sési pʼikuarherania kʼérati pekaduechani jimbo engachi úka. Ísïisti, i ambe no arhikuekasïndi eskachi ʻuékaparini pekaduʼ ambe uaaka, uandaparini eska tata Jesukristu uarhiska juchantsïni jimbo (Ebr. 10:​26-31). Joperu engachi meru móantakia kʼéri pekadueri ma engachi úka, engachi arhikia Tata Diosï Jeobani ka orhejtsïkutiichani eskajtsïni jarhuataaka ka engachi mójtakukuarhikia, uaakachi seguru jarhani eskajtsïni Tata Diosï mintsita jingoni puáchentaskia (Is. 55:7; Úku. 3:19). Ísïisti, iámindu juchaari pekaduechani uaakachi puáminhantaani jimboka tata Jesukristu uarhiska juchantsïni jimbo. Paraisurhu nóchi méni kuatantaaka. Méntkisïchi jatsiaka né jingoni uandontskuarheni ka ambakiti ánchikuarhita ma engajtsïni kánikua sési pʼikuastaaka. Ka sánderu ambakiti ambe, jindeesti eskachi pauani pauani uaaka sánderu sési míteni juchaari Taati auandarhu anapuni ka sésichi pʼikuarheraaka imani ambe jingoni engajtsïni ima íntskuaka. Nóchi méni kʼamaraaka jorhenguarhini imeeri ambe ka imeeri kueraakateeri ambe. w22.12 13 párr. 17, 19

¿Úpirini jindeeni Eba ima ʻuarhiiitiʼ? Nómbe. Profesia uandasïreendi eska uarhiitiiri desendensia chʼatajtsikupiringa akuitsini. Akuitsi jindeesti Noambakiti. Ísï jimbo, Ebaeri desendienti ma, kʼuiripu no perfektu ma, no úpirindi uándikuni Noambakitini. Jimajkani, máteru nemani arhikuekeendi. Últimu libru Biblieri, aiangusïndijtsïni né jindeeski uarhiiti enga Génesis 3:15 uandajka (Apok. 12:​1, 2, 5, 10). No jindeesti uarhiiti ma enga kʼuiripueka. Luna imeeri jantsirirhu kétsekua jarhasti ka imeeri éjpurhu korona ma jukarixati enga 12 jóskuechani jukaaka. Ístu, sapini ma kánguarhisïndi enga kánikua jukaparhakueka, enga arhikuekajka Tata Diosïiri Reinuni. Jimboka Tata Diosïiri Reinu auandarhu jarhaska, jimajkani uarhiitijtu auandarhu jarhasti. Ísï jimbo, i uarhiiti arhikuekaasïndi ánjeliichani engaksï no méni jurajkujka Tata Diosïni ka engaksï auandarhu irekaka (Gal. 4:26). Tata Diosïiri Karakatajtsïni ístu jarhuatasïndi kurhanguni né jindeeski sánderu jukaparhakua uarhiitiri desendensieri. I desendensia Abraánini jimbo jupirindi (Gén. 22:​15-18). w22.07 15, 16 párr. 6-8

Tata Diosï Jeobajtsïni íntskusti Bibliani enga xarhatajka na enga xáni jánhastiika Tata Diosï, ka imeeri konsejuecha kánikua marhuakuasïndi kʼuiripuechani. Ísï jimbo, Biblia úsïndi mójtakuni kʼuiripuecheri tsípikuani. Enga Moisési karapka orheta libru Biblieri, ini ambe arhiaspti israeliteechani engaksï Tata Diosïiri ireteepka: “Íksï uandakuecha no ísku ambeesti para chá, sinoksï chaari tsípikuanisï arhikuekajti” (Deut. 32:47). Ísï jimbo, imeecha engaksï kurhajchapiringa ambe engaksï uandeenga ima karakateecha, tsípikua jingonksï irekapirindi ka sési nikuapirindi (Sal. 1:​2, 3). Nájkiruka ióniikia enga Biblia karanhaka, útasï jarhuataaxati kʼuiripuechani paraksï mójtakuni imeecheri tsípikuani. Biblieri ambakiti konsejuechaksï méntkisï marhuasïndi ka jarhuatastia ióntki anapu ka iásï anapu kʼuiripuechani. Engachi arhintajka i Tata Diosïiri libruni ka eratsentani imeeri konsejuechani, Tata Diosï úrasïndi imeeri espiritu santuni parajtsïni jarhuatani ísï úni eskachi na jorhenguarhini jaka (Sal. 119:27; Mal. 3:16; Ebr. 4:12). Ísïisti, ima enga Bibliani kararkuarhika uékaxatiksïni mintsita jingoni jarhuatani. ¿A no eska i ambe úsïnga eskachi pʼindeaka Bibliani arhintani? w23.02 3 párr. 5, 6

Kapitulu 13 libru Apokalipsisi, aiangusïndijtsïni na enga jámajka septimu éjpu enga kánikua juramukua jatsika enga jindeeka Reino Unido ka Estados Unidos. Máteru animalini arhisïndi ka i ambe uandasïndi: “Tsimani sïuangua jukaaspti xárhati eska ma karichiiri, peru ísï uandasïreendi eska ma dragoni”. I animali “kʼérati míndeechani uaasïndi, asta úni jamberi eska auandarhu uératini kétseaka parhakpinirhu chpiri kʼuiripuechani japarini” (Apok. 13:​11-15). Ka Apokalipsisi kapitulu 16 ka 19 jimbo, arhisïndi eska jindeeska “uandajtsïkpiti kʼarapiti” o enga chkuanderatspijka (Apok. 16:13; 19:20). Ka sáno májkueni ambe uandaspti Danieli enga uandapka ambe enga újka kʼéri juramukua enga jindeeka Reino Unido ka Estados Unidos, Danieli uandaspti eska ‘kánikua no sési ambe úpiringa’ (Dan. 8:​19, 23, 24, nota). Ka inde ambesï úkuarhipti Segunda Guerrarhu enga interu parhakpinirhu úkuarhipka. Tsimani bomba atomikecha jimbo, únhaspti eska kʼamakurhipiringa guerra ka ini bombechani Gran Bretaña ka Estados Unidos anapu sientifikuechaksï uaaspti. Engaksï ísï úpka, Reino Unido ka Estados Unidos engaksï kánikua juramukua jatsika, ústiksï eska “auandarhu uératini kétse[piringa] parhakpinirhu chpiri”. w22.05 10 párr. 9