Seguiri je “uinhaperperantani máteru ka máteruni jingoni”

1. Eska na arhijka 1 Tesalonika 5:11, ¿ambechi jánguarhintasïni úni iáminduecha?

¿CHAARI kúnguarhikua niáraski jarhuajpeni konstruksionirhu o para ménderu únhantani kʼumanchikua Reinueri ma? Enga ísïika, seguru eskajtsï miántajka primeru tánguarhikuani enga úkuarhipka imani Kʼumanchikua Reinuerini jimbo. Kánikuajtsï agradesidu japka Tata Diosï Jeobani jingoni. Jamberijtsï xáni sési pʼikuarherani japka engajtsï jamberi no ueenga pireni jimbokajtsï uenhenchaxapka. Ísïisti, juchaari sési járhati Kʼumanchikuecha Reinuericha kʼéri ambeksï arhisïndi Tata Diosï Jeobani. Peruchi sánderu kʼéri ambe arhisïnga Tata Diosïni engachi uinhaperantaaka imani kʼuiripuechani engaksï jurhajka tánguarhini ini Kʼumanchikua Reinuericha jimbo. Apostoli Pablu ini ambe eratsexapti enga uandapka ini uandakuechani engaksï 1 Tesalonika 5:11 jimbo jaka (arhinta je).

2. ¿Ambechi exeni jaua ini jorhenguarhikua jimbo?

² Parachi úni uinhaperantaani juchaari erachichani, uaakachi apostoli Pablueri ejempluni exeni. Ima kurhangukuasïreendi máteruechani. Ini jorhenguarhikua jimbo, exeakachi néna jarhuataaspi erachichani paraksï tekaantani tsʼéjkukuechani, paraksï sési pájperani iáminduecha ka paraksï sánderu mintsikani Tata Diosï Jeobani. Ju je exeni nénachi uaa májkueni úni eska ima (1 Kor. 11:1).

PABLU JARHUATAASPTI ERACHICHANI TSʼÉJKUKUECHANI TEKAANTANI

3. ¿Pablu néna exesïreeni ánchikuarhitani ka Tata Diosïni marhuakuni?

³ Pablu kánikua xénchaasïreendi erachichani. Imajtu uánikua tsʼéjkukuechani nitamakuarhiaspti, jimbosï ueendi kurhangukuani máteruechani ka pʼamojperakua jingoni kaani imeechani engaksï tsʼéjkukuechani jatsiauenga. Ma xanhari, Pablu no jatsispti sentabu ka ánchikuarhita jirinhaspti para úni jatsini ambe enga uétarhincheenga ima ka imeeri kompanieruecha (Uku. 20:34). Kʼumanchikua sïkuiririchani uaasïreendi. Enga Korintu nípka, ánchikuarhispti Ákila ka Prisila jingoni engaksï májkueni ambe ánchikuarhienga. Joperu “mándani sábadu” aianguasïreendi judiuechani ka grieguechani tata Jesukristueri ambe. Ka engaksï niárapka Silas ka Timoteu, “Pablu incharhetakuspti aianhpini Tata Diosïiri uandakuani” (Hech. 18:2-5, TNM). Jimajkani, apostoli Pablu no méni mirikurhispti ambe enga sánderu jukaparhakueka, marhuakuni Tata Diosï Jeobani. Pablu kánikua ánchikuarhisïreendi ka ambakiti ejemplu máespti para iáminduecha, jimbosï úpti uinhaperantaani erachichani ka konsejuechani íntsaani parakaksï no jurajkupiringa eskaksï uandanhiatecha engaksï jatsiapka ka para familiani kéndani, úpiringa eskaksï nóteru jukaparharapiringia ambe enga sánderu jukaparhakueka, marhuakuni Tata Diosï Jeobani (Filip. 1:10).

4. ¿Ambeksï úspi Pablu ka Timoteu parakaksï erachicha úpiringa tekaantani engaksï no sési kánhani japka?

⁴ Sánisï tátsekua enga Tesalonika kúnguarhikua ma úkuarhipkia, jimbanhi kristianuechaksï ueenaspti no sési kánhani. Máru kʼuiripuecha engaksï kánikua no sési jámani japka, nóksï exentaspti Pabluni ka Silasini, jimboksïsï antsikupaapti “máru erachichani paraksï iretarhu anapu juramuticha jingoni paani”, uinhachasïrendiksï: “I achamasïchaksï no úxati ambe enga Roma anapu juramuti uandajka” (Hech. 17:6, 7, TNM). ¿Úsïnchi eranhaskani na engaksï xáni chéni japka ima kristianuecha engaksï exepka eskaksï mismu iretarhu anapuecha uékaxapka no sési úkuani? I ambe úpirindi úni eskaksï nóteru xáni tsípikua jingoni marhuakupiringia Tata Diosïni ka Pablu no uékasïreendi eska inde ambe úkuarhipiringa. Nájkiruka ima ka Silasi nóteruksï úpiringia jima jarhani, úsptiksï ambe ma parakaksï erachicha sési japiringa. Sánisï tátsekua, apostoli Pablu arhiaspti Tesalonika anapuechani: “Jimboksïnisï axachepka [...] Timoteuni, paraksïni inde uinhaperantani ka sésiksïni pʼikuastantani parajtsï chá sánderu mintsikani, paraka no nema chkéaka ini uandanhiata ambe jimbo” (1 Tes. 3:2, 3, TNM). Jamberijtu Timoteu no sési kánhapti enga Listra irekani japka ka exepti na enga Pablu uinhaperantaapka jima anapu erachichani ka na enga Tata Diosï Jeoba jarhuataapka. Ísï jimbo, Timoteu úpirindi arhiani erachichani eskaksï seguru japiringa eska iámindu ambe sési niántapiringa (Uku. 14:8, 19-22; Heb. 12:2, TNM).

5. ¿Néna jarhuataspi Ramónini enga orhejtsïkuti ma uinhaperantapka?

⁵ ¿Pablu ambe máteru ambe úspi para uinhaperantaani erachichani? Enga ima ka Bernabé, kʼuanhatsentapkaksï Listra, Ikoniu ka Antiokía, “erakuasptiksï arhistatspitiichani [o orhejtsïkutichani] mándani kúnguarhikuarhu” (Uku. 14:21-23). Ísïisti, imeecha engaksï erakunhapka uinhaperantaasptiksï kúnguarhikuechani, májkueni eskaksï na újka iásï anapu orhejtsïkuticha. Ju je exeni ambe enga uandantajka erachi ma enga Ramóni arhinhajka: “Engani 15 jatiripka, juchiiti taatijtsïni jurajkuspti ka juchiiti nándi petanhantaspti kúnguarhikuarhu. Ísï pʼikuarherasïreenga enajkini nóteruni nemani jatsikuarhepia ka enajkini nóteruni úpirinia orhepani uérani”. ¿Ambe jarhuataspi enga i ambe nitamakuarhini japka? Ima uandantasïndi: “Orhejtsïkuti ma enga Tony arhinhajka uandontskuarhisïreendi jíndeni jingoni tánguarhikuecharhu ka ístu máteru naniisï. Aiangusïrendirini na engaksï máru erachicha engaksï kʼérati tsʼéjkukuechani jatsiauenga, ueenga seguirini tsípikua jingoni irekani. Arhichintasïrendirini Salmo 27:10 ka mémindurini uandontskuarhechisïreendi Esekíasiri ambe, enga méntkisï marhuakupka Tata Diosï Jeobani nájkiruka imeeri taati jémba no ambakiti ejemplu máepka para ima”. ¿Néna pʼikuarheraspi Ramóni enga ísï jarhuatanhapka ? Ima uandantasïndi: “Engareni Tony jarhuatapka, kánikuarini marhuachespti, jimbokani sánisï tátsekua úspka tiempu kompletueri marhuani ka ísï úxaka kánikua tsípikua jingoni irekani”. Orhejtsïkuticha, jingontku ja je parajtsï uinhaperantaani ambakiti uandakuecha jingoni imeechani engaksï májkueni pʼikuarherajka eska Ramóni (Prov. 12:25).

6. ¿Néna úraspi Pablu ióntki anapu Tata Diosïiri marhuaricheri ejempluechani para máteruechani uinhaperantaani?

⁶ Pablu miátantaaspti erachichani eskaksï “uánikua testiguecha” úspka tekaantani Tata Diosï Jeobaeri jarhuajperata jimbo mámaru járhati tsʼéjkukuechani engaksï jatsiapka (Ebr. 12:1). Mítespti eska ambe engaksï ióntki anapu Tata Diosïiri marhuaricha nitamakuarhipka jarhuataapiringa paraksï balori jukani ka eskaksï eratsentani japiringa imani “iretani enga [Tata] Diosïriika enga tsípitiika” (Ebr. 12:22). Kánikuajtsïni jarhuatasïndi engachi arhintajka na enga Tata Diosï jarhuatapka Gedeónini, Barakini, Dabidini, Samuelini, ka uánikua máteruechani (Ebr. 11:32-35). Ka májkuentsïni jarhuatasïndi iásï anapu erachicheeri ejemplu. Beteli, nani engaksï Jeobaeri ánchikuarhitani exejka, uánikuaksï kartecha niárasïndi erachicheeri engaksï uandajka eska kánikua uinhaperantaaska eksperiensiechani arhiantani erachicheeri engaksï no méni jurajkuka Tata Diosïni.

PABLU JORHENDAASPTI ERACHICHANI NÉNA SÉSI PÁJPERANI MÁTERUECHANI JINGONI

7. ¿Ambejtsïni jorhendasïni inde konseju enga Pablu uandapka Roma 14:19-21 jimbo?

⁷ Máteru ambe engachi jimbo uaaka uinhaperantaani juchaari erachichani, jindeesti engachi jánguarhintajka úni ambe ma parakaksï iáminduecha sési pájperaaka kúnguarhikuarhu. Nóchi jurajkusïnga eskajtsïni arhukuaka na engaksï máteruecha eratsejka. Ka enga úkuarhini jauaka ambe enga Biblia uandajka, nóchi inchandimentasïnga paraka ambe ma ísï úkuarhiaka eskachi jucha na eratsejka. Ju je exeni ambe enga úkuarhipka Roma anapu kúnguarhikuarhu ióntki, nani engaksï kristianu judiuecha japka ka ístu máteru paisi anapuecha. Jimbokaksï nóteru Moisésiri Lei jimbo jarhaspkia, úpirindiksïa arhani máru tʼirekuechani engaksï antesi no ueenga arhani (Mar. 7:19). Máru kristianu judiuechaksï no no sési exesïreendi iámindu jásï tʼirekua arhani. Joperuksï máteruecha eratsesïreendi eska no sési jarhaspka. Ka i ambe úspti eska kúnguarhikua arhukurhipiringa. Pablu uandaspti na enga xáni jukaparhakueka eskaksï iáminduecha sési pájperapiringa ka arhiaspti: “Sánderu sésisti no arhani kʼuiripeta ka nijtu binu ka ni ma ambe enga pekadu úraaka chiiti ermanutini” (arhinta je Roma 14:19-21). Enga ísï arhiapka, Pablu jarhuataaspti erachichani exeni eska inde ambe úpirindi no sési úkuani imeechani ka ístu kúnguarhikuani. Pablu jamberi nóteru úsïrendia máru ambe para no no sési pʼikuastaani máteruechani (1 Kor. 9:19-22). Májkueni eska ima, uaakachi uinhaperantaani máteruechani ka sési pájperani imeecha jingoni engachi no arhirperaaka imani ambe jimbo enga mándani kʼuiripu tsitijka.

8. ¿Ambe úspi Pablu enga kúnguarhikuarhu japka ambe ma engaksï jimbo úpiringa nóteru sési pájperania?

⁸ Pablu ambakiti ejemplu máesti para sési pájperani imeecha jingoni engaksï no deakuerdu jarhajka máru ambe jimbo. Primeru siglurhu anapu kúnguarhikuarhu, jarhasptiksï máru engaksï uandeenga eskaksï imeecha engaksï no judiuepka ka kristianuksï úkuarhini, jatsispkaksï para sirkunsidarikuarhini, jamberi paraksï kʼuiripuecha no arhinchaani (Gal. 6:12). Nájkiruka Pablu no xáni deakuerdu japka ini ambe jingoni engaksï iicha eratseenga no uékaspti eska ambe ma ísï úkuarhipiringa eska ima na eratseenga, sino kaxumbikua jingoni kurhamarhiaspti apostolichani ka orhejtsïkutichani engaksï Jerusaléni japka ambe engaksï jatsipka para úni (Uku. 15:1, 2). Enga Pablu ini ambe úpka, jarhuajpespti parakaksï kúnguarhikuarhu iáminduecha sési pájperapiringa ka tsípikua jingonksï jámani (Uku. 15:30, 31).

9. ¿Ambechi uaa úni parachi májkueni úni eska Pablu?

⁹ Enga kʼéri arhirperata ma jauaka uaakachi úni eskaksï iáminduecha sési pájperaaka, engachi kurhakuaska jarhuajperata imeechani enga Tata Diosï Jeoba erakuaka paraksï kúnguarhikuani kuidarini parakajtsïni arhiaka ambechi uaa úni. Sáno méntkisï, exentaakachi informasioni enga Bibliarhu pʼitakata jaka juchaari publikasionicharhu ka instruksionicharhu engajtsï Tata Diosïiri kúnguarhikua íntskujka. Engachi jánguarhintaska úni ambe engajtsïni jima arhijka ka no ambe engachi jucha eratsejka, jarhuajpeakachi parakachi iáminduecha sési pájperaaka kúnguarhikuarhu.

10. ¿Ambe máteru ambe úspi Pablu paraka sánderu sési pájperanhapiringa kúnguarhikuarhu?

¹⁰ Pablu úspti máteru ambe parakaksï iáminduecha sési pájperapiringa. No exesïreendi imani ambe engaksï erachicha no sési ueenga, sánderu sési exeasïreendi imeecheri sési járhati kualidadichani. Pori ejemplu, ante de kʼamarani kartani enga Roma anapuechani karakuapka, uandaaspti máru erachichani ka pirenchichani ka sési ambe uandaspti mándani imeecheri ambe. ¿Nénachi uaa májkueni úni eska Pablu? Engachi arhiaska máteruechani imani sési járhati kualidadichani engaksï máteruecha xarhataajka. Engachi ísï úska, jarhuajpenchi jauaka parakaksï erachicha sánderu xénchperaaka ka sánderuksï ambakiti amigueni.

11. ¿Nénachi uaa sési pájperantani enga arhirperakua ambe jauaka?

¹¹ Ménisï asta ima kristianuecha engaksï sési marhuakuni jaka Tata Diosïni, uaatiksï arhirperata ma jatsini máteruecha jingoni. I ambe úkuarhispti Pablu ka Bernabé jingoni engaksï ambakiti amiguepka. Imaksï uénaspti arhirperani jimboka ma uékasïreenga pájtani Markusïni ka máteru nómbe, engaksï ménderu nipiringia aianhpini máteru nanisï. ¿Néna kʼamaraspti i arhirperata? Biblia uandasïndi: “Xáni engaksï arhirperapka Pablu ka Bernabé mejori jarharperasptiksï” (Uku. 15:37-39). Peru tátsekua, Pablu, Bernabé ka Markusï, jánguarhintasptiksï sési pájperantani. Ini ambe úparini, xarhatasptiksï eskaksï uékasïreenga sési pájperani ka eska kánikua jukaparhakuespka paraka sési pájperanhapiringa kúnguarhikuarhu. Sánisï tátsekua, Pablu sési ambe uandaspti Bernabéri ka Markusïri ambe (1 Kor. 9:6; Kol. 4:10). Juchajtuchi jatsiaka para sési peentani náki uéjki jásï arhirperata engachi jatsiaka kúnguarhikuarhu anapu erachichani jingoni, ka ístuchi jatsiska para exekuani imeecheri sési járhati kualidadichani. Engachi ísï úska, jarhuajpenchi jauaka paraka no jauaka arhirperakua ambe ka jarhuajpeakachi parakaksï iáminduecha sési pájperaaka kúnguarhikuarhu (Efes. 4:3).

PABLU JARHUATAASPTI ERACHICHANI PARAKAKSÏ SÁNDERU MINTSIKAPIRINGA TATA DIOSÏNI

12. ¿Na járhati tsʼéjkukuechanksï jatsiasïni juchaari erachicha?

¹² Ístuchi uinhaperantauaka juchaari erachichani engachi jarhuataaska parakaksï sánderu mintsikaaka Tata Diosï Jeobani. Máruksï tekaantaxati engaksï imeecheri familiariicha engaksï no testigueka o engaksï ánchikuarhitarhu o eskuelarhu anapu kompanieruecha teresmarhuajka. Máteruechaksï uinhamu pʼamenchaxati oksï no sési pʼikuarherani jarhani imani ambe jimbo engaksï máteruecha arhika. Ka máteruechaksï jamberi ióni páni jatiia engaksï itsï atakuarhika ka seguirixatiksï erokuarhini eska kʼamaraaka i parhakpini. Iámindu i ambe uaati úni eska kristianu ma nóteru xáni mintsikaakia Tata Diosïni. Primeru siglurhu anapu kristianuechaksï májkueni ambe nitamakuarhispti. ¿Ambe úspi Pablu para uinhaperantaani?

13. ¿Néna jarhuataaspi Pablu imeechani engaksï teresmarhunheenga jimbokaksï kristianuespka?

¹³ Pablu úraspti Tata Diosïiri Karakatani parakaksï erachicha sánderu mintsikapiringa Tata Diosïni. Pori ejemplu, kristianu judiuechaksï jamberi no mítepti ambe arhiani imeeri familiarichani, engaksï imeecha arhiauenga eska Judá anapu relijioni sánderu sésispka ka eska kristianuecheri, seguru eska karta enga Pablu karakuapka judiuechani kánikua uinhaperantaapka (Ebr. 1:5, 6; 2:2, 3; 9:24, 25). Ima kristianuechaksï úsïreendi úrani ambe enga Pablu karakuapka paraksï úni mókukuantani imeechani engaksï arhinchauenga. ¿Ka juchaia? ¿Nénachi uaa jarhuataani erachichani engaksï máteruecha teresmarhuajka? Engachi jorhendaaska sési úraani publikasionichani parakaksï uaaka uandantani ambe engaksï jakajkujka. Pori ejemplu, foietuecha jingoni ¿Es la vida obra de un Creador? ka El origen de la vida. Cinco cuestiones dignas de análisis, uaakachi jarhuataani tumbiichani parakaksï imeecha uaaka aianguani máteruechani andiksïsï jakajkujki eska Tata Diosï kueraaska iámindu ambe enga tsípiti jaka.

14. Nájkiruka Pablu kánikua ánchikuarhita jatsipka para aianhpini ka jorhentpini, ¿ambe úspi para máteruechani jarhuataani?

¹⁴ Apostoli Pablu pʼímarhiaspti erachichani paraksï uékperakua xarhatatsperani ‘ambakiti ambe úparini’ (Ebr. 10:24). No solu jarhuataaspti uandakuecha jingoni, sino úkuecha jingoni. Pori ejemplu, engaksï Judá anapu kristianuecha kʼéri kʼarhingua ma nitamakuarhipka, Pablu jindeespti ma ima erachi enga pákuapka ambe ma imeechani engaksï uétarhinchani japka (Uku. 11:27-30). Ka nájkiruka Pablu kánikua ánchikuarhita jatsipka para aianhpini ka jorhentpini, méntkisï jirinhakuntasïreendi para jarhuataani erachichani engaksï no kánikua jatsikuarhepka (Gal. 2:10). Enga ísï ueenga jarhuataasïreendi erachichani parakaksï imeecha mintsikapiringa eska Tata Diosï Jeoba méntkisï kuidariuapiringa. Iásï ini jurhiatikuechani jimbo, juchajtuchi uaaka jarhuataani erachichani parakaksï uaaka sánderu mintsikani Tata Diosïni. Engachi úraska juchaari tiempuni, uinhapikuani ka ambe engachi jorhenaka parachi jarhuajpeni jima enga no sési ambe úkuarhijka ka engachi donasionichani íntspiajka paraka seguiriuaka aianhpinhani iámu parhakpinirhu. Ini ambe jimbo ka engachi máteru ambe úska, uaakachi jarhuataani erachichani parakaksï mintsikaaka eska Tata Diosï Jeoba no méni jurajkuauaka.

15, 16. ¿Nénachi jatsiski para kaani imeechani engaksï nóteru xáni sési marhuakuni jakaia Tata Diosïni?

¹⁵ Pablu seguirispti uinhaperantaani imeechani engaksï nóteru xáni sési marhuakuni japkia Tata Diosïni. Pʼamojperakua xarhatakuaspti ka sési jásï ambe arhiaspti para uinhaperantaani (Ebr. 6:9; 10:39). Pori ejemplu, indeni karta jimbo enga ebreuechani karakuapka uánikua xanhari uandaspti “jucha” ka no, “chá”, ini ambe jingoni xarhataspti eska imajtu jatsispka para imani konsejuechani úraani enga ima íntspiauenga (Ebr. 2:1, 3). Májkueni eska Pablu, juchajtuchi seguirisïnga uinhaperantaani imeechani engaksï nóteru xáni sési marhuakuni jakaia Tata Diosïni. Engachi ini ambe újka, xarhatakuasïngachi eskachi uandanhiasïnga imeecha jimbo ka eskachi kánikua xénchaasïnga. Ju je miáni eskaksï uandakuecha engachi arhiauaka máteruechani uaaka uinhaperaantani, joperu sánderu jarhuajpesïndi engachi xénchperakua jingoni arhiauaka.

¹⁶ Pablu miátaantaspti erachichani eska Tata Diosï Jeoba no mirikurhispka ima ambakiti ambe engaksï úpka (Ebr. 10:32-34). Juchajtuchi uaaka májkueni úni engachi uékani jaka jarhuatani erachini ma enga nóteru xáni sési marhuakuni jakaia Tata Diosïni. Uaakachi arhini eskajtsïni aianguaka néna ueenaski jorhenguarhini Biblieri ambe o jarhuatani para miántani na enga xáni jarhuatakia Tata Diosï Jeoba. Engachi imani jingoni uandontskuarheni jauaka, ju je miátantani eska Tata Diosï Jeoba no mirikurhixaka na enga xáni xénchajka ka eska ima no méni jurajkuaka (Ebr. 6:10; 13:5, 6). Engachi ini ambe úska, uaakachi jarhuataani juchaari erachichani parakaksï imeecha uékaaka seguirini marhuakuni Tata Diosï Jeobani.

‘UINHAPERPERANTA JE MÁTERU KA MÁTERUNI JINGONI’

17. ¿Ambe ka ambechi uaa úni parachi máteruechani uinhaperantaani?

¹⁷ Ísï eska nema enga konstruksionirhu ánchikuarhijka, tiempu jingoni na sánderu sési újka imeeri ánchikuarhitani. Juchajtuchi sánhani arhiaka jorhenguarhini máteruechani uinhaperantaani. Uaakachi uandontskuarhekuani juchaari erachichani máteru Tata Diosïiri marhuaricheri engaksï úka tekaantani parakaksï imeechajtu uaaka májkueni úni. Ístu, parachi úni eskaksï iáminduecha sési pájperaaka, uaakachi ambakiti ambe uandani máteruecheri ambe, no úni ambe ma engachi jimbo nóteru úpiringuia sési pájperani máteruecha jingoni ka sési peentani ambe engachi jatsika máteruecha jingoni. Ka ju je seguirini jarhuatani erachichani parakaksï mintsikaaka Tata Diosïni, uaakachi ísï úni engachi aianguaska jukaparhakua ambe Biblieri, engachi jarhuataska ka engachi úska ambe ma parachi jarhuataani imeechani engaksï nóteru xáni sési marhuakuni jakaia Tata Diosïni.

18. ¿Ambejtsï eratsetixakiia úni chá?

¹⁸ Kánikuaksï sési pʼikuarherasïndi imeecha engaksï jarhuajpejka paraksï kʼumanchikuechani uaani, nani engaksï kʼéri ambe arhijka Tata Diosïni. Juchajtuchi uaaka májkueni sési pʼikuarherani engachi jarhuataaska juchaari erachichani parakaksï sánderu mintsikaaka Tata Diosïni. Ambe engachi jucha újka para máteruechani uinhaperantaani, marhuasïndi para méntkisï ka no komueska kʼumanchikua ma enga tiempu jingoni niárajka xerekuarhentani. Ísï jimbo, ju je jánguarhintani parachi úni ambe enga arhijka 1 Tesalonika 5:11: “Uinhaperperantani máteru ka máteruni jingoni”.