Méntkisï chúxapa je Jesúsini engajtsï na itsï atakuarhiakia

1, 2. Ima enga itsï atakuarhijka, ¿náki kóntperateechani jatsiasïni?

KÁNIKUA tsípisïndi ima enga niárajka itsï atakuarhini jimboka niárasïnga kuenta úkuarhini Tata Diosï Jeobaeri familia jingoni. Kánikua sési pájperani Tata Diosï Jeoba jingoni, úsïndi eskachi májkueni eratseaka eska Dabidi enga uandapka: “Tsípisïndi ima achamasï engari t’u [Tata Diosï Jeoba] erakujka ka engari újka eskakeni andarhieraaka paraka irekaaka chiiti ekuaruechani jimbo” (Sal. 65:4).

² Joperu Tata Diosï Jeoba no uékasïndi eska né uéjkini jauaka imeeri ekuaruecha jimbo. Eskachi na exekia máteru jorhenguarhikua jimbo Tata Diosï Jeoba imeechanisï uéjti andarhieraani engaksï uéjka imeeri amigu úkuarhini (Sant. 4:8). Engaksï niárajka aiakukuarheni Tata Diosï Jeobani ka itsï atakuarhini, niárasïndiksï ambakiti pájperakua ma jatsini imani jingoni. Ka ini ambe aiakuasïndi: ‘Exeakajtsï na engaksïni [...] uánikua kóntperatechani íntsauaka astakajtsï nóteru ambe ma uétarhinchaakia’ (Mal. 3:10; Jer. 17:​7, 8).

3. ¿Ambechi jatsiski para úni iámindu kristianuecha engachi itsï atakuarhikia? (Eclesiastés 5:​4, 5).

³ Joperu engachi na itsï atakuarhijkia, apenasichi ueenani jarhasïnga marhuakuni Tata Diosïni. Iámindu kristianuechachi jatsiska para ísï irekani eskachi na aiakukia Tata Diosïni nájkirukachi tsʼéjkukua ambe jatsiaka ochi no sési nitamakuarhini jarhani (arhinta je Eclesiastés 5:​4, 5). Ístuchi jatsiska para méntkisï Jesúsiiri ejempluni chúxapani ka ambe enga ima juramujka (Mat. 28:​19, 20; 1 Ped. 2:21). Ka i jorhenguarhikuajtsïni kánikua jarhuataati parachi ísï úni.

MÉNTKISÏ CHÚXAPA JE JESÚSINI NÁJKIRUKAJTSÏ TSʼÉJKUKUA AMBE JATSIAKA KA NO SÉSIJTSÏ NITAMAKUARHINI JARHANI

4. ¿Andisï Jesúsi uandapi eskaksï imeeri chúxapatiicha páxaka “chkarini enga jindeeka para no sési nitamakuarhini”? (Lukasï 9:23).

⁴ Joperu engajtsï na itsï atakuarhiakia, asï eratsi je eskajtsï nóteru ma uandanhiata jatsiaka, jimboka Jesúsi mismu ini ambe arhiaspka imeeri chúxapatiichani eska “kʼuiripu mándani pauani paaka imeeri chkarini enga jindeeka para no sési nitamakuarhini” (arhinta je Lukasï 9:23). ¿Arhikuekaxapi Jesúsi eskaksï imeeri chúxapatiicha méntku no sési nitamakuarhini japiringa? Nómbe. Sánderu sési, arhikuekaxapti eskaksï imeeri chúxapatiicha kóntperateechani jatsiapiringa joperu eskaksï ístu no sési nitamakuarhipiringa ka ménichanksï no sési kánhani (2 Tim. 3:12).

5. ¿Náki kóntperatechani aiatspeaspi Jesúsi eskaksï jatsiapiringa imeecha engaksï sánderu jukaparharapiringa Tata Diosïiri Reinueri ambe?

⁵ Jamberiksïni chaari familia no sési kámajti ojtsï jamberi chá no sánderu jánguarhintani jaka sentabu ambe jirinhani jimbokajtsï uékasïnga orheta peerani Tata Diosïiri Reinueri ambe (Mat. 6:33). Enga ísïika uaakajtsï seguru jarhani eska Tata Diosï Jeoba míteska ambe engajtsï xáni úkia imani jimbo (Ebr. 6:10). Ka jamberijtsï chá mismu exekia eska ísïiska ambe enga Jesúsi uandapka: “Jíksïni sési jimbo arhisïnga eska no nema jarhaska enga jíndeni jimbo ka ístu ambakiti aianhperakua jimbo jurajkuka imeeri kʼumanchikuani, ermanu jémbeechani, pirembeechani, amambani, taati jémbani, uájpeechani o echeriichani enga no niáraaka iásï, ini jurhiatikuecha jimbo, 100 uelta sánderu intsïnhantani —kʼumanchikuechani, ermanu jémbeechani, pirembeechani, amambeechani, uájpeechani ka echeriichani, nájkiruka no sési kánhaaka— ka imani tiempu jimbo enga jurhani jaka tsípikua para méntkisï” (Mar. 10:​29, 30). Imani kóntperatechani enga chá intsïnhakia sánderuksï ambakiti ambeesti ka eska ima ambe enga chá jurajkuka parajtsï úni marhuakuni Tata Diosïni (Sal. 37:4).

6. Engajtsï na itsï atakuarhiakia, ¿andijtsïsï jatsi para seguiriini jarhani jánguarhintani no úni imani ambe enga “kuerpu tsitijka”?

⁶ Ísï tátsekua engajtsï na itsï atakuarhiakia, chájtsï seguiriini jauaka jánguarhintani parajtsï no úni imani ambe enga “kuerpu tsitijka” (1 Juanu 2:16). Miá je eskachi útasï no perfektueska. Jamberijtsï ménisï ísï pʼikuarheraaka eska apostoli Pablu na uandapka: “Ji tsitisïnga ambe enga Tata Diosï juramujka, joperu juchiiti kuerpurhu jarhasti máteru juramukua enga no terukuntajka imani juramukua jingoni engareni arhijka ambe engani jatsika parani eratseni ka inde ambe úsïndi eskani ji jántspiriuaka pekadueri enga juchiiti kuerpurhu jaka” (Rom. 7:​22, 23). Jamberijtsï kuatantaaka jimbokajtsï jánguarhintaxaka no no sési ambe niátani. Joperu engajtsï eratsentaaka ambe engajtsï arhipka Tata Diosï Jeobani jiáni engajtsï aiakupka chaari tsípikuani, inde ambeksïni íntskuati uinhapikua parajtsï no no sési ambe niátani. Jo, inde ambeksïni jarhuataati parajtsï orhepani uérani. ¿Néna?

7. Aiakukuarheni Tata Diosï Jeobani, ¿nénajtsïni jarhuataa méntkisï kurhajchani imani?

⁷ Jiáni enga kʼuiripu ma aiakujka Tata Diosï Jeoba imeeri tsípikuani, nóteru irekasïndia para imajkumindu. I ambe arhikuekasïndi eska no jámaaka tsitini ni úni imani ambe enga Tata Diosï Jeoba no jaiapanhentajka (Mat. 16:24). Ísï jimbo, jiáni engachi tsʼéjkukua ma jatsijka, nóchi jámasïnga eratseni ambechi uaa. Juchachi sési mítetini jarhasïngia ambechisï jatsi para úni: kurhajchani Tata Diosï Jeobani. Ka ísïchi úsïnga jimbokachi imantkusï uéjka jaiapanherantani. Jiáni engachi aiakupka juchaari tsípikuani Tata Diosïni, méntkuchi támu peeraspka imani ambe engachi uékeenga úni ka ísïchi májkueni úni jauaka eska Jobu. Ima no sési ambe nitamakuarhispti joperu méntku no sáni chéspti uandani: “Marhuakuaka Tata Diosïni iámu mintsita jingoni” (Job 27:5).

8. ¿Andijtsïnisï jarhuatajki eratsentani eskachi aiakuskia juchaari tsípikuani Tata Diosï Jeobani?

⁸ Eratsentani eskachi aiakuska Tata Diosï Jeobani, eskachi uaaka ambe enga ima uéjka, inde ambejtsïni jarhuataati parachi úni orhepani uérakuni náki uéjki tsʼéjkukuani. Pori ejemplu, ¿a no eskachi no jámaaka nínharhikuni o jukari sési uandontskuarhekuni imani enga tembuchatini jakaia o uambuchatini? Engachi na aiakujkia juchaari tsípikuani Tata Diosï Jeobani, nóteruchi eratseni jarhasïngia indeni ambe, jimbokachi no jurajkusïnga eska inde ambe juchaari mintsitarhu niáraaka. Jarhuatasïndijtsïni parachi no pʼindekua ma úni, méntkuchi jurajkusïnga indeni xanharuni “engaksï no sési úriicha jámajka” (Prov. 4:​14, 15).

9. Engachi eratsentaska ambe engachi aiakuka Tata Diosï Jeobani, ¿nénajtsïni jarhuataa orhetku peerani imeeri ambe?

⁹ Ka engajtsïni nema ánchikuarhita ma aiachipiringa engajtsïni no jurajkupiringa iámindu tánguarhikuechani nirani, ¿ambechi úpirini? Buenu mítetixakachia ambe úni. Ante dechi indeni ambe úkuarhinchani, juchachi tʼuini uandarixapkia eskachi no jámapiringa xásï ánchikuarhita ma jiókuarhini. Engachi ísï úska inde ambejtsïni jarhuataati parachi no tátsekua jámani jarhania exeni nénachi orheta peerani Tata Diosï Jeobani. Ka Jesúsiiri ejemplujtsïni kánikua jarhuataati, ima méntkisï eratsetixapti méntkisï sési pʼikuastani Taati jémbani, juchajtuchi uaaka májkueni úni engachi no jiókuarhiska imani ambe enga Tata Diosï no jaiapanhentajka (Mat. 4:10; Juanu 8:29).

10. Engajtsï na itsï atakuarhiakia, ¿nénaksïni jarhuataa Tata Diosï Jeoba parajtsï chá méntkisï Jesúsini chúxapani?

¹⁰ Ambe engachi nitamakuarhijka ka imani tsʼéjkukuechani engachi jatsiajka, úsïndi eskachi jucha xarhataaka eskachi méntkisï uékasïnga Jesúsini chúxapani ka míteskachi eskajtsïni Tata Diosï Jeoba jarhuataaka orhepani uérani, jimboka Biblia uandasïnga: “Ambe enga Tata Diosï uandajka, mintsinharhikuesti ka no jurajkuati eskajtsï chá jukari tsʼéjkunhaaka, sino xántku eskajtsï na xáni uaaka tekaantani. Ka engajtsï tsʼéjkunhani jauaka, imaksïni jarhuataati parajtsï chá úni tekaantani” (1 Kor. 10:13).

AMBEJTSÏ UAA PARAJTSÏ MÉNTKISÏ CHÚXAPANI JESÚSINI

11. ¿Ambejtsïni jarhuataa ísïini eska Jesúsi? (Ístu exea je imajeniichani).

¹¹ Jesúsi iámu mintsita jingoni marhuakuspti Tata Diosï Jeobani ka no méni jurajkuspti jimboka méntkisï kómarhisïreenga (Luk. 6:12). Engachi na itsï atakuarhijkia, ma ambe engajtsïni kánikua jarhuatajka ísïini eska Jesúsi, jindeesti seguiriini jarhani jánguarhintani imani ambe úni engajtsïni jarhuataaka sánderu andarhierani Tata Diosïni Jeobani. Biblia uandasïndi: “Na uéjkichi xáni eratsekua jukariinia, ju je seguiriini jarhani sési jámani indeni xanharuni jimbo” (Filip. 3:16). Ménisïjtsï kurhauaka na engaksï erachiicha úka ambe ma paraksï sánderu marhuakuni Tata Diosï Jeobani. Pori ejemplu máruksï nirasïndi Jorhentperakuarhu para Aianhpiriicha Reinueri, oksï mótsini imani lugari jimbo enga sánderu uétarhini jaka aianhpinhani Tata Diosïiri ambe. ¿Chá uaa ísï úni? Enga ísïika jánguarhinta je. Erachiichaksï jirinhakuntasïndi néna sánderu marhuakuni Tata Diosï Jeobani (Úku. 16:9). Ka engajtsï iáiasï no úska inde ambe úni, asï eratsi je eskajtsï no ma ambe úxaka. Ambe enga sánderu jukaparhakueka jindeesti seguiriini jarhani marhuakuni Tata Diosï Jeobani (Mat. 10:22). Asï mirikurhi je eska Tata Diosï Jeoba kánikua sési pʼikuarherasïnga enga chá jánguarhintajka sési marhuakuni imani ambe jingoni engajtsï uaaka. Ini ambe úparini, chájtsï méntkisï chúxapani jauaka Jesúsini engajtsï na itsï atakuarhiakia (Sal. 26:1).

12, 13. ¿Ambejtsï uaa úni engajtsï exeska eskajtsï nóteru xáni tsípikua jingoni marhuakuxakaia Tata Diosïni? (1 Korintu 9:​16, 17). (Ístu exe je rekuadruni “Asï jurajku je uiriini kristianuecheeri karrera jimbo”).

¹² ¿Ambejtsï uaa úni engajtsï exeska eskajtsï nóteru mintsita jingoni kómarhisïngia Tata Diosïni o eskajtsï nóteru xáni tsípikua jingoni aianhpisïngia nijtu arhintani Bibliani ísï eska antesi? Engajtsï niáraska ísï pʼikuarherani nájkirukajtsï itsï atakuarhikia, asï eratsi je eskaksïni Tata Diosï Jeoba nóteru jaiapanhentasïngia. Ménichanchi chkéni pʼikuarherasïnga jimbokachi no perfektueska. Ísï jimbo, engajtsï exeni jaka eskajtsï nóteru xáni tsípikua jingoni úsïngia ambe ma, eratsenta je apostoli Pablueri ambe. Nájkiruka ima jánguarhinteenga ísïini eska Jesúsi mítespi eska ménisï úkua jukanchapiringa imani ambe úni enga sési jaka (arhinta je 1 Korintu 9:​16, 17). Uandaspti: “Nájkirukani no uékani jauaka ísï úni, jatsiska parani ísï úni, jimbokani jísïni intsïnhaka ini ánchikuarhitani”. Ixú arhikuekaxapti eska jatsispka para ísï úni nájkiruka ménisï no káni sési pʼikuarherani japiringa.

¹³ Ka chájtujtsï uaaka májkueni úni. Méntkisï jánguarhinta je imani ambe úni enga sési jaka nájkirukajtsï ménisï no uékani jauaka ojtsï no sési pʼikuarherani jarhani. Ka engajtsï sési ambe úska, inde ambeksïni jarhuataati parajtsï sési pʼikuarherantani. Ísï jimbo, seguirii je Bibliani arhintani, kómarhini, no kueratani tánguarhikuecharhu ka uérani aianhpini. I ambeksïni jarhuataati méntkisï chúxapani Jesúsini engajtsï na itsï atakuarhiakia. Ka engaksïni máteru erachiicha exeska na engajtsï xáni jánguarhintani jaka marhuakuni Tata Diosï Jeobani, kánikuajtsï uinhaperantauaka (1 Tes. 5:11).

“SEGUIRI JE EXEKUARHINI”

14. ¿Ambejtsï jatsiski para úni ménisï ka andi? (2 Korintu 13:5).

¹⁴ Engajtsï na itsï atakuarhiakia, uétarhisïndi eskajtsï ménisï exekuarhiaka na engajtsï jámajka ka ambe engajtsï újka (arhinta je 2 Korintu 13:5). Pori ejemplu, exe je sintsï pauani pauani kómarhisïni Tata Diosïni, sintsï arhintaxaki ka jorhenguarhini Bibliani, tánguarhikuecharhu nirani ka aianhpini. Jirinhakunta je nénajtsï uaa sánderu sési úni indeni ambe ka tsípikua jingoni. Úpiringajtsï kurhamarhikuarhini: “¿Míteski néna aianguani máteru kʼuiripuechani ambe enga Biblia uandajka? ¿Ambe uaa úni parani sánderu tsípikua jingoni aianhpini? ¿Néna kómarhisïni Tata Diosïni ka xarhatasïni eskani meru mintsikasïnga? ¿Jánguarhintasïni méntkisï nirani tánguarhikuecharhu? ¿Ambe uaa úni parani sánderu jingontku kurhaani jarhani tánguarhikuecharhu ka sánderuni sési komentarini?”.

15, 16. ¿Ambejtsï jorhenguarhisïni Robertiiri ambe?

¹⁵ Ístu sési jauati engachi exeaka ambe engachi kueratanchajka. Ju je exeni eksperiensia ma enga xarhatajka eska jukaparhakueska indeni ambe úni. Erachi ma enga Robert arhinhajka uandantasïndi: “Ánchikuarhita ma jatsispka jiáni engani 20 jatiripka. Ma jurhiatikua engachi na kʼamarapkia ánchikuarhini juchiiti kompaniera ma jingoni, imarini imeo pʼímarhispti. Arhisptirini eskani nipiringa parachi sáni tsípikuarhini jimbokachi tsimarhantku japiringa. Ueenani jámani ji mámaru ambe arhixapka parani no nirani joperuni tátsekua mátirkuni arhispka eska nómbe ka ístuni arhispka andisïni no nipirini”. Robert úspti orhepani uérakuni imani tsʼéjkukuani ka sési úspti. Joperu tátsekua eratsentaspti ambe enga úpka ka exespti eska úpiringa sánderu sési úni ambe ma. Uandantasïndi: “No jirejiresï arhispka eska nómbe ísï eska José na úpka Potifariiri témba jingoni (Gén. 39:​7-9). No eratsesïreenga eskani xáni úkua jukanchapiringa arhini eska nómbe. Ambe enga úkuarhipka jiáni jarhuatasptireni parani ji exeni eskani jatsiska parani sánderuni sési pájperani Tata Diosï Jeobani jingoni”.

¹⁶ Ju je eranhaskani eskajtsï tsʼéjkukua ma jatsisïnga ka eskajtsï úsïnga orhepani uérakuni. Joperu ¿andijtsïsï no májkueni újki eska Robert? Ka eratseni: “¿Úkua jukanchaspi orhepani uérani?”. Engajtsï exeska eskajtsï jatsiska para máru ambe mójtakuni, asï no sési pʼikuarhera je. Sánderu sési, eratsi je eska kánikua sési jarhaska engajtsï exekia eskajtsï jatsiska para mójtakuni máru ambe. Aiangukuarhi je Tata Diosï Jeobani ka ú je ambe enga xáni uétarhiaka parajtsï méntkisï kurhajchani Tata Diosïni (Sal. 139:​23, 24).

17. Eska na xarhatajka Robertiiri ejemplu, ¿nénachi sési pakatasïni Tata Diosï Jeobaeri nombrini engachi méntkisï kurhandirajka?

¹⁷ Joperu no inde ambejkuesti. Robert ístu uandantasïndi: “Engani na arhipkia juchiiti kompanierani eskani no nipiringa, imarini arhispti: ‘Iásï k’oruni exekuarhiskia’. Ka ji kurhamarhispka andisï ísï uandapi. Ka imarini arhispti eska imeeri amigu ma enga antesi Testiguepka, arhispka eskaksï iámindu tumbiicha engaksï Testigueka ísïksï xarhatasïnga enajkiksï sési jámajki, joperu eska jiáni engaksï tsʼéjkukua ambe jatsijka nóksï sési ambe úsïnga sïpatikuarku. Ka ísturini arhispti eska ima jíndeni jingoni exepiringa sini inde ambe ísïispi o nómbe. ¡Kánikua sési p’ikuarheraspka engani no jiókuarhipka ambe engareni juchiiti kompaniera arhipka jimbokani no no sési pakataspka Tata Diosï Jeobaeri nombrini!”.

18. Engajtsï na itsï atakuarhiakia, ¿ambejtsï eratsetixaki úni? (Ístu exe je rekuadruni “Tsimani artikuluecha engaksïni kánikua jarhuataaka”).

¹⁸ Jiáni engajtsï aiakukuarhejka Tata Diosï Jeobani ka itsï atakuarhini, xarhatasïngajtsï eskajtsï méntkisï uékasïnga pímbinhajkuntani imeeri nombrini ambe uéjki úkuarhini. Ka uaakajtsï seguru jarhani eska Tata Diosï Jeoba pendienti jarhasïnga ambe engajtsï chá nitamakuarhini jarhajka ka ístu imani tsʼéjkukua ambe engajtsï jatsijka. Ima exesïndi na engajtsï xáni jánguarhintajka parajtsï méntkisï kurhajchani, ka imaksïni újchakuraati indeni jimbo. Asï mirikurhi je, imeeri espiritu santu jingontsï uaaka imani ambe úni enga sési jaka (Luk. 11:​11-13). Engajtsï na itsï atakuarhiakia, chájtsï uaaka méntkisï chúxapani Jesúsini Tata Diosï Jeobaeri jarhuajperata jingoni.