¿Jaki ambakiti gobiernu ma enga uaaka sési juramuni Echerirhu? | ¿Ambe uandasïni Biblia?

Asta ima gobiernuecha engaksï sési marhuani jaka, niárastiksï uandanhiani jimbokaksï uánikua gobiernuecha no sési juramuxaka. Kʼuiripuechaksï no konformi jarhasti politikuecha jingoni, marcheechanksï uaasïndi ka no sésiksï kámberasïndi.

Jamberijtsï chá kurhaakia eska jarhaska gobiernu ma enga sési juramujka. Jindeesti ima gobiernu enga Biblia uandajka, jo, ima Reinu enga tata Jesukristu uandapka padrenuestru jimbo.

• “Chájtsï jatsiska para ísï kómarhini: ‘Juchaari Taati engari auandarhu jaka, eska niáraaka mítenhani eska chiiti nombri pímbinhasïiska. Eska juuaka chiiti Reinu. Eska úkuarhiaka ambe engari tʼu uéjka, jini auandarhu ka ístu echerirhu” (Mateu 6:9, 10).

¿Chá uékapirini míteni ambe xáni uandasïni Biblia indeni Reinueri ambe?

Tata Diosïiri Reinu, ambakiti gobiernu ma

I Reinu juramuxatiia auandarhu.

• Jesúsi uandaspti eska i gobiernu jindeeska “auandarhu anapu Reinu” (Mateu 4:17; 5:3, 10, 19, 20). Jimbosï uandapti: “Juchiiti Reinu no ini parhakpini anapuesti” (Juanu 18:36).

I Reinu kénditauati iámu parhakpini anapu juramutiichani.

• Biblia uandasïndi: “I gobiernu purundurhiauati ka kʼamajkuauati iámindu ini [parhakpini anapu] gobiernuechani, ka íjkusï jauati para méntkisï” (Daniel 2:44).

I Reinu no méni kʼamajkunhaati ka Jesúsi juramutiisti.

• Biblia uandasïndi: “Imeri juramukua, juramukua máesti enga jindeka para méntkisï, enga no méni kʼamakurhiaka, ka imeri gobiernu no méni kʼamajkunhaati” (Daniel 7:13, 14).

I Reinu uaati eska no nema chéaka ka eska pínandikua jauaka Echerirhu.

• Biblia uandasïndi: “Mándani kʼuiripuechaksï uaxandukuati jima enga ubasï jukajka ka jima enga jigusï jukajka, ka no nema chérauati (Miqueas 4:4).

Uaakajtsï sánderu ambe jorhenguarhini ini Reinueri ambe

Jiáni enga Jesúsi Echerirhu jámani japka, “aianhpisïreendi ambakiti aianhperakua Tata Diosïiri Reinueri ambe” (Mateu 9:35). Ístu uandaspti eska i ambe úkuarhipiringa:

• “Ambakiti aianhperakua Tata Diosïiri Reinueri, iámu parhakpinirhu uandanhantaati paraksï iámindu ireteecha mítetini jarhani ka jimajkani kʼamajkunhaati parhakpini” (Mateu 24:14).

I ambakiti aianhperakua Tata Diosïiri Reinueri ambe, uandanhantaxati jukari 240 paisiicha ka territoriuecha jimbo. ¿Chá uékapirini míteni náki máteru kóntperateechaksï jaua ini Reinu jimbo? ¿Uékapirintsï jima jarhani nani enga i Reinu juramuaka? Pʼímarhisïngaksïni jorhenguarhini sánderu ambe ini Reinueri.

Uaakajtsï exeni ini bideuni ¿Ambeski Tata Diosïri Reinu?