Sánderu ambakiti premiu ma andaska

NA ENGANI IREKAPKA IÓNTKI

Tʼarhexeska lugari ma jimbo enga xuxunhandeka ka pínandeni, Tampere uéramanisï jini Finlandia. Juchiti familia no xáni tsitisïrendi relijioniri ambe, peru jukaparharasïrendiksï parachi eskuela jámani ka ambakiti kʼuiripu máeni. Juchiti nándi Alemania anapuesti, ísï jimbo engani sapichuepka, ma tiempu jimbo nirasïrenga Alemania, nani engaksï juchiti tatitecha irekapka.

Méntkisï tsitiaska deportiichani, ka desdekani sapichuepka uánikua ambe chʼanasïrenguia. Peru engani 14 jatiripka, erakuspka tenis chʼanani. Engani 16 jatiripka, tsimani o tanimu xanhari jorhenguarhisïrenga chʼanani pauani pauani. Tsimani xanhari intsïnhasïrenga klasi parani sési jorhenguarhini chʼanani ka xatinichani jandiajkuni jorhenguarhisïrenga. Indeni chʼanakueri, mámaru ambe tsitisïrenga. Exesïrenga eska tenis chʼanani, úsïrenga eskani kánikua manakuarhipiringa ka kánikua eratsini. Nájkirukani tsitienga uérani amiguencha jingoni ka ménisï arhani serbesa ma, no méni kámaska droga ambe o kauini. Ambe engani sánderu jukaparharenga, jindespti tenis.

Engani 17 jatiripka, inchamukuspka chʼanakuarhu ATP.a Uánikua kompetensiechani andaaspka ka sánhani arhispka mítikateni paisirhu. Engani apenasi 22 jatiripka, kuenta úkuarhisïrenguia 50 sánderu kʼérati chʼanaricha jingoni engaksï interu parhakpinirhu japka.

Iónisï, iauanisï biajariska komu ambakiti chʼanari ma. Kánikua sési jarhati lugaricharhu jámaspka, peru ístuni kuenta íntskukuarhispka eskaksï uánikua problemecha jarhaspka komu droga ambe jingoni, kontaminasioni ka sïpatspeni ambe. Por ejemplu, Estados Unidos arhisptijtsïni eskachi no jámapiringa nirani máru lugaricharisï máru siudadicheri, jimboka peligru jarhaspka. Iámindu inde amberini kómu pʼikuastasïrendi. Ístu, nájkirukani imani ambe uénga engani kánikua tsitienga, últimu ísï pʼikuarherasïrenga enajkini no ma ambe uéni.

NA ENGARINI BIBLIA MÓJTAKUCHEKA IREKUA

Juchiti nobia, Sanna, uénaspti Biblia estudiarini Jeobaeri testiguecha jingoni. Ískurini pakataspti enga ima tsitienga relijioniri ambe, peru no no sési exesïrenga enga ima estudiarini japka. Tembuchaspkachi 1990 jimbo, ka ísï máteru uéxurhini jimbo, Sanna Testigu ukuarhispti. Ji no xáni tsitisïrenga relijioniri ambe, nájkirukani jakajkuenga Tata Diosïni. Miásïnga eska juchiti nanita Alemania anapu arhintasïrenga Bibliani ka astarini jorhendaspti kómarhikua úni.

Ma jurhiatikua, temungurhiri ma engaksï Testigueka imechojtsïni pʼimarhispti jíndeni ka Sannani. Erachi Kari, Bibliaeri profesiauecheri amberini uandontskuarhichespti, últimu jurhiatikuecheri ambe (2 Timoteo 3:1-5). Ískurhini pakataspti, jimbokani kuenta íntskukuarhispka eska inde ambe xarhatasïrenga andisï xáni no sési ambe úkuarhini jaki parhakpinirhu. Imani jurhiatikuachi nóteru seguirispkia uandontskuarhini relijioniri ambe. Peru desde jiáni, uénaspka uandontskuarhini relijioniri ambe Kari jingoni. Iámindu ambe sési terokuntasïrendi ambe engani jorhenguarhienga. Komu méntkisï okupadu jarhaenga ka sáno méntksï biaji jámani jarhani, nochi úsïrenga someni exejperani. Peru Kari no méni kuatantaspti. Kartecha jingondirini mókuchiantasïrendi kurhamarhikuechani engani jiáni úkuauenga engachi jorhenguarienga Bibliaeri ambe. Exespka eskaksï iámindu kurhamarhikuecha enga ma úkuarhiajka, Biblia sési mókuantasïnga. Sánhani arhispka kurhanguni ambe enga Biblia sánderu uandajka: eska Tata Diosïri Reinu kumpliriuaka ambe enga Tata Diosï eratsitini jaka úni. Jorhenguarhini na enga arhinhajka Tata Diosï, Jeoba, ka exeni iámindu ambe enga úka juchantsïni jimbo, mintsitarhurini niárachespti (Salmo 83:18). Ambe engarini sánderu ísku pakatapka, jindespti pʼímutantskua enga no solu juramukua máepka, sino jindespti Tata Diosïri uékperakua (Juanu 3:16). Ístuni jorhenguarhispka eskani úpiringa Tata Diosïri amigueni ka irekani para méntkisï paraisuru ma nani enga pinandikua jauaka (Santiagu 4:8). Jimajkani, uénaspka kurhamarhikuarhini: “¿Néna uá xarhatani eskani jeinpanhintasïnga indeni ambe?”.

Uénaspka erantsintani ambe engani úni japka juchiti tsípikua jingoni. Bibliarhu jorhenguarhispka eska sánderu sési pʼikuarherakuarhisïnga íntspini ka jiájkani uékaspka aianguani máteruechani ambe engani jakajkujka (Ukuecha 20:35). Komu ambakiti chʼanari ma, ma uéxurhini jimbo 200 jurhiatikua ísï iauanisïni jámani jarhasïrenga kompetensiauecharu. Ambe enga juchiti familia uénga, jindespti apoiarindini: parani entrenari, ambe engani pauani pauani uénga ka juchiti ánchikuarhita jingoni. Kuenta íntskukuarhispka eskani jatsispka parani mójtakurhini.

Mítispka eska relijioni jimbo jurajkuni ambakiti ánchikuarhitani ma komu chʼanani, ambe máespka enga no iámindu kʼuiripu kurhangupiringa. Peru niárani sánderu sési mítini Jeobani ka úni irekani para méntkisï, jindespti ambe ma enga sánderu jukaparhakuepka eska náki uéjki premiu ma engani úpiringa andani chʼanakuarhu; ísï jimbo, sési mítispkia ambe úni. Eratsitixapkia eskani no nemani kasu úkupiringa ambe uéjkiksï uandani. Jísïni erakupiringa ambe úni. Bibliaeri karakata ma engarini jarhuatapka aguantarini ambe engajtsïni máteruecha arhienga, jindespti Salmo 118:6, enga arhijka: “Jeoba jíndeni jingoni jarhasti; no chéaka. ¿Amberini uá úchini kʼuiripu?”.

Imani tiempu jimbo, máru engajtsïni jarhuatenga, ambakiti chʼanakua májtsïni aiachespti engani úpiringa ambakiti chʼanaricha jingoni chʼanani ka uánikua uéxurhinichani jimbo no ma amberi uandanhiani. Peruni eratsispkia ambe engani úpiringa. No jiókuarhispka imani ánchikuarhitani ka últimu jurajkuspka ATP jingoni chʼanani. Seguirispka Bibliaeri ambe jorhenguarhini ka 2 de juliu de 1994 jimbo itsï atakuarhiska komu Testigu.

NÁKI KÓNTPERATECHANI INTSÏNHAASKIA

Ji no no sési ambe nitamakuarhispka parani uénani miáni Tata Diosïni. Níjtuni jirinhani japi ambesï jurhimbikue. Eratsisïrenga eskani sési irekaxapka ka eskarini no ma ambe kueratachisïrenga. Peru engani no erokuarhini japka, ísïspti enajki Bibliaeri jurhimbikua ambe erokuarhini japi eskani exentapiringa, kuenta íntskukuarhiska eskachi irekaxaka ambe ma jimbo. Iásï, sánderuni sési irekaxakaia engani no méni eranhaskapka. Juchiti familia sánderu májku kʼéri jarhastia. Ka kánikua sési pʼikuarherasïnga engaksï juchiti tanimu sapiicha májkueni úka eska ji, no komu chʼanaricha, sino komu kristianuecha.

Útasïni tsípikuarhisïnga tenis chʼanani. Ini chʼanakua jimbo, desde iónisï úska mantenerikuarhini. Ánchikuarhiska komu entrenadori ka orhejtsïkuni grupuni ma engaksï tenis chʼanajka. Nóteruni puru chʼanani jamasïnguia. Antesi, kánikua tiempu úrasïrenga mándani semani parani sánderu ambakiti chʼanari máeni, parani úni andani. Iásï, tiempu kompletueri aianhpisïnguia ka úrasïnga juchiti tiempu parani jarhuataani máteruechani jorhenguarhini ka úraani Bibliaeri prinsipiuechani engajtsïni jarhuataka mójtakurhini. Sánderu jukaparharani ambakiti pájperakua Jeoba jingoni ka aianhpini eska sánderu orhepani ambakiti ambe úkuarhiaka, úsïndi eskani meru tsípikua jingoni irekaaka (1 Timoteo 6:19).