“Jandiajkuni jirinhakuarhixapka uarhikua”

NA ENGANI IREKAPKA IÓNTKI

“Engari sési jimbo uéjka jorhenguarhini Tata Diosïri ambe, Jeobaeri testiguecha jingoni pakara”. Inde uandakuechajtsïni ísku pakataspti. Jiánisï, sáni ióni paxapkia jorhenguarhini Bibliaeri ambe Testiguecha jingoni. Joperu parajtsïni kurhanguchini andisïni ísku pakarapi, jurajkuksïni sáni aianguni juchiti ambe.

Ireta ma jimbo andajpenuska enga Quezaltepeque arhinhajka jini El Salvador. Tátichaksï 15 sapiichani káspti ka ji seisiru kuentukuarhisïnga. Juchiti tátichaksï jánguarhintaspti parajtsïni jorhendani méntkisï jurhimbitku jámani ka parani janhanharhiani juramukuechani. Ístu, Leonardo enga Jeobaeri testigu máepka ka máteru tsimani uarhiiticha engaksï imajtu Testiguepka, ménisïjtsïni pʼorhembisïrendi parajtsïni Bibliaeri ambe uandontskuarhicheni. Peruni ji no jukaparharaspka ambe engajtsïni jorhendapka ka someni imani ambe úsïrenga enga no sési jarhenga. Engani 14 jatiripkia, uénaspka kauini ka droga ambe úrani eskuela anapu amiguecha jingoni. Mándanksï arhispti nóteru nirani eskuela paraksï pandiiani ma kúrhini, ka jíjtuni májkueni úspka eskaksï imecha. Chúskutasïrengachi pauani pauani xanharu ísï jámani, uinhamarhikuasïrengachi kʼuiripuechani parajtsïni tumina íntskuni ka sïpani ambe ma parachi úni piáni imani ambe engachi pʼindepkia arhani.

Pandiia niáraspti juchiti familieni. Ka eratsisïrenga eskani no méni jatsipka para jurajkuni. Ísï jimbo, ma jurhiani, juchiti pandiiaru anapu ma enga drogadu japka, uénaspti atani juchiti besinuni ma. Engaksï uarhiperani japka, besinu úspti jupikani juchiti amiguni ka uandajpaspti polisiani. Kánikua ikiaparini, uénaspka chkari ma jingoni atani imeri karruni paraka jurajkupiringa juchiti amiguni. Besinurini kómarhisïrendini parani jurajkukuni karruni engani kʼepenharhikuani japka bentanechani ka ambendurhikuni karruni, peruni no kurhajchaspka.

Ma xanhari, juchiti pandiia polisia jingoni jupiperaspti. No sési mítiska néna, joperu bomba ma enga kʼumanchikuarhu úkuarhekatepka, juchiti jájkirhu charaspti engani kʼuaniraani jámenga polisiauechani. Ambe engani kʼóru miájka, jindesti na engani xáni no sési jájkurhapka jájki jurhijkandani jimbo ka tátsekua miripakurhispka. Engani tsínharhipkia ospitalirhu, arhisptijtsïni eskani nóteru jukaspkia jájki, no ma ambe kurhaasïrenga jurhijkandani ladu jimbo ka ístu mismu ladu jimbo éskuarhu, sáno siegu pakaraspka. Apenasi 18 jatirispka.

Nájkirukani ísï pakarapka, ménderuni kúrhintaspka pandiiani engani uéntapkia ospitalirhu. Ísï no ióni jimbo, polisiarini jupikaspti ka ónhasptijtsïni, jima sánderuni tsitisïrenguia pandiieruecha jingoni kúnguarhini. Chúskutasïrengachi márku jámani, desde engachi tsipa anapu tʼirenga —nani engachi uénenga mariuana itsutani— asta engachi nirenguia kʼuíni.

NA ENGARINI BIBLIA MÓJTAKUCHEKA IREKUA

Engani ónhakata japka, Leonardureni niraspti exeni. Engachi uandontskuarheni japka, tʼantsiraspti tatuajeni ma engani jurhijkandani jukaxurhapka ka kurhamarhisptirini: “¿Mítiskiri ambe engaksï arhikuekajka inde tanimu puntuecha engari jukaxurhaaka?”. Ka ji arhispka: “Jo: ísku jándikua, droga ka rock and roll”. Peru Leonardo uandaspti: “Sánderu sési, ji uandapiringa eskaksï arhikuekasïnga ospitali, kárseli ka uarhikua. Jarhaskaria ospitalirhu, iáiasïri ónhakata jarhaska. Mítiskaria ambe engari úkuarhinchaaka tátsekua”.

Ambe engarini Leonardo arhipka, úspti eskani eratsintapiringa. Ísïspti ambe enga uandenga: na engani irekani japka, jandiajkuni jirinhakuarhixapka uarhikua. Leonardurini pʼímarhispti Bibliani jorhenguarhini imani jingoni ka jiókuarhispka. Ambe engani jorhenguarhipka, úspti eskani mójtakurhipiringa. Por ejemplu, Biblia uandasïndi eska enga nema kúrhiauaka ‘no sési úrichani, ikichakua ukuarhisïngaksï imeri ambarhati úkuecha’ (1 Korintu 15:33). Ísï jimbo, ma ambe engani jatsipka para orheta úni, jindespti jimbanhi amiguechani jirinhaani. Parani indeni ambe úni, nóteruni niraspkia pandiiaeri tánguarhikuecharhu ka uénaspka nirani Jeobaeri testiguecheri tánguarhikuecharhu engaksï kárselirhu úauenga. Jima mítispka Andresini enga ístu ónhakata japka ka enga kárselirhu itsï atakuarhepka komu Jeobaeri testigu. Pʼímarhisptirini parachi márku tʼireni tsíperi. Jiájkani uératini, nóteruni tsípku uénasïrenguia mariuana itsutani. Sánderu sési, uandontskuarhesïrengachi Bibliaeri karakateri ma Andrési jingoni mándani tsípa.

No ióni jimbo, máteru pandiiaru anapuechaksï kuenta íntskukuarhispti eskani mójtakurhixapka. Ísï jimbo, ma enga orhejtsïkuenga pandiiani arhisptirini eska uékasïrenga jíndeni jingoni uandontskuarhini. Chéspka, jimbokani no mítispka ambe engarini úchepiringa enga niárapiringa míteni ambe engani eratsini japka úni, jimboka kasi no nema úsïnga jurajkuni pandiiani ma. Arhisptireni: “Exeskachia eskari nóteru jurhasïngia juchari tánguarhikuecharhu, ka eskari Jeobaeri testiguecheri jimbo niraxaka. ¿Amberi eratsisïni úni?”. Arhispka eskani uékasïrenga seguirini jorhenguarhini Bibliaeri ambe ka mójtakuni juchiti irekuani. Ískurini pakataspti engarini arhipka eskarini pandiia no ma ambe úchepiringa, peru engani xarhatapiringa eskani sési jimbo uékasïrenga Jeobaeri testigueni. Ka arhisptirini: “Engari sési jimbo uéjka jorhenguarhini Tata Diosïri ambe, Jeobaeri testiguecha jingoni pakara. Erokuarhesïngachi eskari nóteru no sési ambe niátaakia. Felisitarisïngakini. Ambakiti amberi úxaka. Testiguechaksïni uáti jarhuatani. Ji jorhenguarhiska imecha jingoni jini Estados Unidos, ka máru juchiti parientichaksï Jeobaeri testiguesti. Asï ché. Seguiri ísï úni”. Útasïni chéxapka, peruni ístu kánikua sési pʼikuarheraxapka. Diosmaiamukua arhispka Jeobani. Ísï pʼikuarheraspka eska pájaru ma engaksï jáularu petantajka, ka jiáni niáraspka kurhanguni ambe enga Jesusi uandapka: “Mítiakajtsï indeni ambe enga sési jimboeka [o jurhimbikua], ka inde ambe enga sési jimboeka, uáti eska cha nóteru jindeuaka jántspiricha” (Juanu 8:32).

Joperu, máru juchiti ióntki anapu amiguechajtsïni tsʼéjkusïrendi aiacheparini droga ambe. Jiókuarhisïnga eskani ménisï euasïrenga. Peru ióni jimbo, engani no kuatantapka kómarhini, úspka jurajkuani bisiuechani (Salmo 51:10, 11).

Engani uéntapkia kárselirhu, uánikuaksï eratsesïrendi eskani ménderu májkueni jámapiringa eska ióntki, peruni no ísï úspka. Sánderu sési, uánikua xanhari niraspka kárselirhu parani Bibliaeri ambe uandontskuarheni imecha jingoni engaksï ónhakata japka. Jiáni kʼóru, juchiti ióntki anapu amiguechaksï niáraspti exeni eskani mójtakurhispkia. Xáni no sési, engaksï imecha engani jingoni ióntki no pájperenga noksï májkueni exenga.

Ma jurhiani aianhpixapka máteru Testigu jingoni engajtsïni ma repentku uirhipandapka uánikua pandiiaru anapuecha engachi jingoni ióntki no pájperenga. Armechanksï kaasïrendi ka uékasïrendijtsïni uándikuni. Ima erachi enga jíndeni jingoni jámani japka iatsitakuarhu aianguaspti peru no sáni chéparini eskani ji nóteru ma pandiia jingoni jámasïrenguia. Ka ji jánguarhintaxapka pʼíngukuarheni. Engajtsïni na atapkia ka arhintsïni eskani nóteru kʼuanhatsepiringa jimesïsï, patsaantasptiksï armechani ka jurajkusptijtsïni parachi níntani. Biblia mójtakusti juchiti irekuani, jimboka na engani jasïpka ióntki, uékapiringa májkueni no sési úkuantani. Joperuni iásï úsïnguia ambe enga arhistatspejka 1 Tesalonika 5:15: “Xéparini eskajtsï no méni no sési úkuantauaka imechani engaksïni no sési úchiaka, sino jánguarhi je sési kámberani máteru ka máteruni jingoni, ka ísï para iáminduechani jingoni”.

Desdekani Jeobaeri testigueka, jánguarhintasïnga jurhimbitku úni ambe ma. Úkua jukasïndi. Peruni úska ísï úni Jeobaeri jarhuajperata jingoni, Bibliaeri konsejuecha ka juchiti jimbanhi amiguecheri jarhuajperata jingoni. No méni uékapiringa ménderuni ísï jámani eskani ióntki na jámenga (2 Pedru 2:22).

NÁKI KÓNTPERATECHANI INTSÏNHAASKIA

Ióntki tsitisïrenga uarhipeni ka sóntkuni ikiasïrenga. Seguru jarhaska eskani nóteru tsípiti japiringia engani seguiripiringa ísï irekani. Ambe engani Bibliarhu jorhenguarhika méntkurini mójtakusti. Jurajkuaska juchiti bisiuechani ka jorhenguarhiska nóteruni ikiakuania imechani engajtsïni ióntki ikiachienga (Lukasʌ 6:27). Iásï jatsiaskia amiguechani engajtsïni jarhuatajka ambakiti kʼuiripu máeni (Proverbios 13:20). Kánikua sési pʼikuarherasïnga tsípikua jingoni irekani ka ambe ma jimbo, jimbokani marhuakuxaka Tata Diosïni ma engarini uékaka puáchintaka iámindu no sési jásï ambe jimbo engani úka (Isaías 1:18).

Uéxurhini 2006 jimbo, niraspka jorhentperakuarhu ma enga jindepka solu para aianhpiricha engaksï no tembuchatini japka. Máru uéxurhini tátsekua, tembuchaska ambakiti uátsï ma jingoni, ka kánguarhiskachi nanaka sapichuni ma. Iásï kánikua tiempu úrasïnguia parani máteruechani jorhendaani Bibliaeri prinsipiuechani engajtsïni jíndeni jarhuataka. Ístuni orhejtsïkutiska juchiti kúnguarhikuarhu ka jánguarhintasïnga jarhuataani tumbiichani paraksï no imani ambe úni engani ji úpka. Iásï, nóteruni jirinhakuarhixakaia uarhikua, sánderu sési ánchikuarhixaka parani irekua ma jatsini sánderu orhepani para méntkisï, imani ambe enga Tata Diosï Bibliarhu aiatspika.