Néna úni eskaksï tánguarhikuecha para uérani aianhpini marhuakuauaka erachichani

Tánguarhikuecharhu engaksï jindeeka para uérani aianhpini, májkueni eska máteru tánguarhikuecha engachi jatsiajka kúnguarhikuarhu, jindeesti intsïmperata ma engajtsïni Jeoba íntskujka parajtsïni jarhuatani uékperakua xarhatatspeni ka parachi ambakiti ambe úni (Eb 10:24, 25). I tánguarhikua, jatsisti para de 5 a 7 minutu durarini ka ixú inchasïndia arhiani erachichani nénksï jingoni uéraa aianhpini, naniksï aianhpia ka kómarhikua. Enga i tánguarhikua úkuarhiaka enga na kʼamakurhiaka tánguarhikua ma engachi jatsijka kúnguarhikua jingoni, jatsisti para útasï menusi durarini. Ima enga orhejtsïkuaka ini tánguarhikuani, jatsisti para imani ambe arhiani erachichani enga jarhuatauaka aianhpikuarhu ima jurhiatikua. Pori ejemplu, sábaduechani engaksï uánikua erachicha uérajka engaksï interu semana no újka uérani, sési jauati eska imajku ambe arhiauaka enga jarhuatauaka aianhpikuarhu. ¿Ambeerichi uaa uandani ini tánguarhikua jimbo?

• Uaakachi exeni partini ambechi uaa uandontskuarheni enga Programa para ánchikuarhini tánguarhikuarhu Kristianuecheri Irekua ka Aianhpikua jimbo jaka.

• Néna úrani ambe enga no ióni úkuarhika iretarhu o máteru naniisï para ueenani uandontskuarheni kʼuiripu ma jingoni.

• Ambechi uaa úni enga kʼuiripu ójkutakua ma peerajka.

• Néna mókukuni nemani enga no jakajkujka Tata Diosïni, enga ebolusionini jakajkujka o kʼuiripuni ma enga máteru idioma uandajka o nemani enga ma relijioni jimbo jauaka enga no káni mítekuarhika jima engachi jucha irekaka.

• Néna úrani sitiu jw.org, aplikasioni JW Library^® o Bibliani.

• Néna úraani publikasionichani engachi úraajka para jorhentpini.

• Néna aianhpini telefonu, karta jimbo, jimeesïsï engaksï uánikua kʼuiripuecha jarhajka, pʼorhembintani nemani o jorhendani nemani Biblieri ambe.

• Nénachi jatsiski para jingontku jámani, sési kámpini, sési uandajpini, tsípikua jingoni aianhpini ka máteru ambe.

• Jorhenguarhikua ma o bideu ma foietueri Ju je sánderu sési arhintani ka jorhentpini.

• Néna uinhaperantani ka jarhuatani imani engachi jingoni uérani jaka aianhpini.

• Karakata ma enga uandaaka aianhpikueri ambe o ambakiti eksperiensia ma enga uinhaperantaaka máteruni.