Җитәкче булып Ешуа билгеләнә

МУСА исраиллеләр белән бергә Кәнган җиренә керергә тели. Һәм Аллаһыга болай ди: «Йәһвә, миңа Үрдүн елгасы аша үтеп, бу гүзәл җирне күрергә рөхсәт ит». Әмма Йәһвә: «Җитте! Башка бу турыда исемә төшермә!» — ди. Ни өчен Йәһвә алай дип әйткән? Син беләсеңме?

Исеңдәме: Муса таягы белән кыяга суга һәм алар Һарун белән Йәһвәгә дан китермиләр. Алар халыкка суны кыядан Йәһвә чыгарды дип әйтми. Шуңа күрә Йәһвә алар Кәнганга кермәячәк дип әйтә.

Һарун үлгәч берничә ай үтә. Йәһвә Мусага: «Ешуаны ал да, аны рухани Елиазар һәм халык алдына бастыр. Һәм барысы каршында Ешуаның җитәкче булачагын игълан ит»,— дип әйтә. Рәсемгә кара: Муса нәкъ Йәһвә әйткәнчә эшли.

Аннан соң Йәһвә Ешуага болай ди: «Нык бул һәм курыкма. Син Исраил халкын мин вәгъдә иткән Кәнган җиренә алып керәчәксең, һәм мин синең белән булам».

Шуннан соң Йәһвә Мусага Нево тавына менәргә куша. Бу тау Моав җирендә урнашкан. Тауга менгәч, Муса Үрдүн елгасы аръягындагы гүзәл Кәнган җирен күрә. Йәһвә болай ди: «Менә, бу җирне мин Ибраһим, Исхак һәм Ягъкуб балаларына вәгъдә иттем. Син аны күрдең, әмма бу җиргә кермәячәксең».

Муса Нево тавында үлә. Аңа 120 яшь булса да, ул әле дә нык, һәм аның күзләре дә яхшы күрә. Муса үлгәнгә халык бик нык кайгырып елый. Шулай да алар үзләренең яңа җитәкчесе Ешуа булганга шатланалар.