Үз максатына ирешә торган вәгазь очрашулары

1. Вәгазь очрашуларның максаты нинди?

¹ Бер тапкыр Гайсә үзенең 70 шәкерте белән аларны вәгазьләргә җибәргәнче очрашкан (Лүк 10:1—11). Ул аларга шуны искә төшергән: алар вәгазьгә барганда берүзләре түгел, аларга «ашлык Хуҗасы» Йәһвә ярдәм итә. Нәтиҗәдә, шәкертләр дәртләнеп киткән. Гайсә аларга шулай ук вәгазь эшен башкару күрсәтмәләрен биргән һәм аларны «икешәр-икешәр» җибәргән. Бүген дә без вәгазьгә барыр алдыннан вәгазь очрашуларын үткәрәбез. Аларның максаты шул ук — дәртләндерү, үгет-нәсыйхәт бирү һәм оештыру.

2. Вәгазь очрашуы күпме дәвам итәргә тиеш?

² Әлеге вакытта вәгазь очрашулары 10—15 минут дәвам итә. Аларда вәгазьчеләргә хезмәттәшне билгелиләр, участок бирәләр һәм дога кылалар. Хәзер вәгазь очрашуына үзгәрешләр кертелә. Апрельдән башлап, вәгазь очрашуы 5—7 минуттан артык сузылмас. Аны җыелыш очрашуыннан соң үткәрсәгез, тагы да кыскарак вакытта үткәрегез, чөнки очрашуда Изге Язмаларга нигезләнгән дәртләндергеч фикерләр инде яңгыраган. Кыска вәгазь очрашулары вәгазьчеләргә хезмәттә күбрәк вакыт үткәрергә мөмкинлек бирә. Моннан тыш, пионерлар яисә вәгазьчеләр вәгазь очрашуы алдыннан инде вәгазьли башласа, вәгазьләүләрен озакка туктатырга кирәк булмас.

3. Вәгазь очрашуларын вәгазьчеләргә күбрәк файда китерсен өчен ничек оештырырга кирәк?

³ Вәгазь очрашулары вәгазьчеләргә күбрәк файда китерсен өчен яхшырак оештырылачак. Күп җыелышлар вәгазь очрашуларын бөтен җыелыш белән бергә түгел, ә төркем-төркем үткәрергә булган. Нәтиҗәдә, вәгазьчеләргә вәгазь очрашуы урынына һәм участокка барып җитү җиңелрәк булыр. Өстәвенә, вәгазьчеләрне оештыру һәм вәгазь төркемнәренең күзәтчеләренә үзләренә ышанып тапшырылган «сарыкларны» кайгырту ансатрак. Өлкәннәр советы җирле шартларга карап иң яхшы карар кабул итәр. Очрашуны кыска гына дога кылып тәмамлаганчы, вәгазьчеләр кая һәм кем белән барачакларын белергә тиеш.

4. Ни өчен вәгазь очрашулары башка очрашулар кебек мөһим?

⁴ Башка җыелыш очрашулары кебек мөһим. Вәгазь очрашулары вәгазьгә җыенучылар өчен үткәрелгәнгә, аларга, күрәсең, бөтен җыелыш түгел, ә кайберәүләр генә килә. Ләкин моннан вәгазь очрашуларына бармак аша карап була яисә алар башка очрашулар кебек мөһим түгел дигән нәтиҗә ясау дөрес булмас иде. Башка очрашулар кебек алар да — Йәһвәнең бүләге. Алар ярдәмендә без «бер-беребезне мәхәббәт һәм игелекле эшләргә дәртләндерә» алабыз (Евр. 10:24, 25). Шуңа күрә аларны үткәрүче яхшы әзерләнергә тиеш. Шулай итеп, фикер алышу Йәһвәгә — дан, ә вәгазьчеләргә файда китерәчәк. Вәгазьгә җыенучылар бар тырышлыкларын куеп вәгазь очрашуына килергә тырышсын.

5. а) Хезмәт күзәтчесе вәгазь очрашуын ничек оештырырга тиеш? б) Апа-кардәш вәгазь очрашуын ничек үткәрергә тиеш?

⁵ Үткәрүче ничек әзерләнә? Җыелыш очрашуында яхшы чыгыш ясасын өчен, кардәшкә йөкләмәне алдан бирергә кирәк. Вәгазь очрашуы белән шундый ук хәл. Төркем-төркем үткәрелсә, аны вәгазь төркеменең күзәтчесе я аның ярдәмчесе үткәрә. Әмма бөтен җыелыш өчен үткәрелсә, үткәрүчене хезмәт күзәтчесе сайлый. Кайбер җыелышларда хезмәт күзәтчесе очрашуларының графигын бар үткәрүчеләргә өләшә һәм графикның копиясен белдерүләр тактасына элә. Хезмәт күзәтчесе үткәрүчене сайлаганда акыл белән эш итәргә тиеш, чөнки вәгазь очрашуының сыйфаты кардәшнең өйрәтү һәм оештыру сәләтләреннән тора. Берәр көнне очрашуны өлкән дә, хезмәттәш ярдәмче дә, суга чумдырылган башка берәр төпле абый-кардәш тә үткәрә алмаса, хезмәт күзәтчесе суга чумдырылган берәр сәләтле апа-кардәшне үткәрергә кушыр. («Очрашуны апа-кардәш үткәрә» дигән рамканы кара.)

6. Ни өчен үткәрүче яхшы әзерләнергә тиеш?

⁶ Теократик хезмәт мәктәбендә яки Хезмәт очрашуында берәр йөкләмә бирелсә, без аңа җитди карыйбыз һәм яхшы әзерләнәбез. Җыелыш алдыннан беркем дә йөкләмәсен әзерләп бармыйдыр. Вәгазь очрашуын үткәрү йөкләмәсе дә алдан әзерләнергә тиеш. Вәгазь очрашуының вакыты кыскартылганга, яхшы әзерләнү тагы да әһәмиятлерәк: кардәш әзерләнеп килсә, очрашу эчтәлеклерәк булыр һәм вакытында тәмамланыр. Моннан тыш, яхшы әзерләнү — вәгазь участокларын алдан әзерләп кую дигән сүз.

7. Үткәрүче нәрсә турында фикер алыша ала?

⁷ Нәрсә турында фикер алышырга? Җирле шартлар төрле булганга, акыллы хезмәтче һәрбер вәгазь очрашуының планын бирми. «Вәгазь очрашуында менә нәрсәне карап чыгып була» дигән рамкада кайбер вариантлар тәкъдим ителә. Гадәттә, очрашу фикер алышу формасында үтәргә тиеш. Кайвакыт яхшы әзерләнгән демонстрацияне күрсәтеп яисә туры килгән берәр видеороликны уйнатып була. Вәгазь очрашуына әзерләнгән чакта үткәрүче дәртләндерерлек һәм вәгазьчеләргә хезмәттә ул көнне файда китерерлек нәрсәләрне эзләп табарга тырышыр.

8. Ял көннәрне вәгазь очрашуында нәрсә турында фикер алышып була?

⁸ Күп вәгазьчеләр, мәсәлән, таратыр өчен брошюраны шимбә көнне тәкъдим итә. Аларның күбесе атна уртасында вәгазьгә чыкмый. Андый вәгазьчеләргә Гаилә белән гыйбадәт кылу кичендә репетиция үткәрелгән кереш сүзне атна азагында искә төшерү авырдыр. Шуңа күрә үткәрүче, бәлки, «Безнең изге хезмәтебез»нең соңгы битендәге кереш сүзләрнең берсен кабатлап чыгарга булыр. Моннан тыш, таратыр өчен брошюраны берәр җирле яңалыкны, вакыйганы яисә бәйрәмне искә алып территориягезгә җайлаштыру я кеше басмаларыбызны алса, киләсе тапкырга ачык сорау калдыру турында фикер алышып була. Вәгазь очрашуына килгән кардәшләр брошюраларны инде тәкъдим итеп караган булса, үткәрүче аларны тәҗрибәсен уртаклашырга яисә кызык очраклар сөйләргә сорарга мөмкин. Якшәмбе көнне дә үткәрүче, бәлки, шундый ук чараны бу айда таратыла торган басмага карата кулланырга булыр. Өйрәнү өчен басмаларны теләсә кайсы көнне тәкъдим итәргә була, шуңа күрә үткәрүче бу басмаларның берсен тарату буенча киңәшләрне кыска вакыт эчендә карап чыга ала.

9. Җыелыш берәр тарату кампаниясендә катнашса, ял көннәрне нәрсә турында фикер алышып була?

⁹ Җыелыш берәр тарату кампаниясендә катнашса, үткәрүче ял көннәрне бу айда таратыла торган брошюраны чакыру кәгазе я буклет белән бергә ничек тәкъдим итәргә икәне яисә кеше кызыксынса, нинди чаралар күреп булганы турында фикер алыша ала. Моннан тыш, андый кампаниядә катнашуның файдасын ассызыклаучы очракларны уртаклашып була.

10, 11. Ни өчен вәгазь очрашуының файдалы булуы килгән вәгазьчеләрдән дә тора?

¹⁰ Вәгазьчеләр ничек әзерләнә? Вәгазь очрашуының файдалы булуына вәгазьчеләр дә үз өлешен кертә. Бәлки, алар хезмәткә алдан, мәсәлән, гаилә белән гыйбадәт кылу вакытында әзерләнә. Алай эшләсәләр, аларның башкалар белән уртаклашырлык фикерләре булыр. Яхшы әзерләнер өчен, аларга өйдән чыгып китәр алдыннан шулай ук брошюралар һәм җитәрлек басмаларны әзерләп куярга кирәк. Шулчак һәркем вәгазь очрашуыннан соң шунда ук хезмәткә чыгарга әзер булыр.

¹¹ Моннан тыш, вәгазь очрашуына берничә минут алдан килергә планлаштырыгыз. Әлбәттә, без һәр җыелыш очрашуына вакытында килергә тырышабыз. Шулай да вәгазь очрашуына берәрсе соңласа, өстәмә авырлыклар туарга мөмкин. Нинди? Вәгазьчеләрне оештырыр алдыннан, үткәрүче берничә якны исәпкә ала. Очрашуга берничә вәгазьче генә килсә, ул, бәлки, барысын өлешчә вәгазьләнеп эшкәртелгән участокка җибәрергә булыр. Участок ерак булса, ул очрашуга җәяү килгән кайбер вәгазьчеләрне машинада килгән вәгазьчеләр белән бергә җибәрер. Участок җинаятьчелек киң таралган районда урнашкан булса, ул, бәлки, абый-кардәшләрне апа-кардәшләр белән бергә яки аларга якында гына хезмәт итәргә кушар. Ә сәламәтлекләре начар вәгазьчеләрне ул менеп төшәргә кирәк булган урамнарга һәм күп баскычлы йортларга җибәрмәс. Яңа вәгазьчеләрне ул, бәлки, тәҗрибәлерәк кардәшләр белән билгеләргә булыр. Әмма вәгазьчеләр соң килсә, берәр нәрсәне чак кына яисә бөтенләй үзгәртергә кирәк булыр. Кайчак безнең, бәлки, соңга калыр өчен җитди сәбәп бардыр. Шулай да еш соңласак, сәбәпләр өстеннән уйлану яхшырак булыр иде: бәлки, без вәгазь очрашуларын кадерләп бетермибездер яисә үз эшләребезне яхшы планлаштырмыйбыздыр.

12. Вәгазьгә алдан сөйләшергә яратасың икән, нинди максатлар кую мөһим?

¹² Кайчак вәгазь очрашуына килгән вәгазьчеләр бер-берсе белән алдан сөйләшә, ә кайчак аларга хезмәттәшне үткәрүче билгели. Алдан сөйләшергә яратасың икән, якын дуслардан тыш башкалар белән дә хезмәт итеп, йөрәгеңне «киң итеп ача» алмассыңмы? (2 Көр. 6:11—13) Яңа вәгазьчеләр белән вакыт-вакыт хезмәттәшлек итеп, аларга өйрәтү осталыкларын үстерергә ярдәм итә алмассыңмы? (1 Көр. 10:24; 1 Тим. 4:13, 15) Үткәрүче күрсәтмәләр биргәндә, мәсәлән, кайда вәгазьләргә икәнен аңлатканда, аны игътибар белән тыңла. Очрашудан соң билгеләнгән хезмәттәшең урынына башканы сайлама һәм билгеләнгән участогың урынына башканы сорама. Хезмәткә вакыт сузмыйча бар.

13. Һәркем вәгазь очрашуларының кадерен белсә һәм аларга әзерләнеп килсә, бу очрашулар нинди файда китерәчәк?

¹³ Гайсә вәгазьгә җибәргән 70 шәкерте «шатлана-шатлана әйләнеп кайткан» (Лүк 10:17). Гайсә биргән күрсәтмәләр аларга, һичшиксез, уңышка ирешергә булышкан. Бүген дә вәгазь очрашулары зур файда китерергә мөмкин. Һәркем вәгазь очрашуларының кадерен белсә һәм аларга әзерләнеп килсә, бу очрашулар дәртләндерерлек, үгет-нәсыйхәт бирерлек һәм оештыра алырлык булыр. Шул чак без «бар халыкларга шаһитлек бирү» эшен уңышлы башкарырбыз (Мат. 24:14).