Тәҗрибәлерәк вәгазьчеләрдән өйрән
Без җыелышларыбызда булган тәҗрибәле вәгазьчеләрне кадерлибез. Аларның кайберләре Йәһвәгә инде күп еллар тугры хезмәт итә. Башкалар исә күптән түгел генә хезмәттә файдалы осталыклар үстергән. Бу бар вәгазьчеләр соңгы көннәрдә Гайсәнең вәгазь һәм шәкертләр әзерләү эшен киңәйтеп мәсихче җыелыш белән җитәкчелек иткәненә инанган (Мат. 28:19, 20). Бу эштә катнашып, алар авырлыклар һәм сынаулар белән очрашканда «кеше көченнән өстенрәк кодрәт» ала (2 Көр. 4:7). Шул тәҗрибәле вәгазьчеләрдән күп нәрсәләргә өйрәнеп була. Җае чыкканда, алар үзләре дә тәҗрибәләрен теләп уртаклаша (Мәд. 70:18). Шуңа күрә безгә алардан өйрәнер өчен җаен эзләргә кирәк. Моны ничек эшләп була?
Хезмәттә. Уңышлы вәгазьли белер өчен, яңалар һәм тәҗрибәсезрәк вәгазьчеләр өйрәтүгә мохтаҗ. Тәҗрибәле вәгазьчеләрнең ничек хезмәт итүләрен күзәтеп күп нәрсәгә өйрәнеп була. («Басынкы һәм кызганучан Гайсәдән үрнәк алыгыз» (bw555) дигән брошюраның «Хезмәттә ашкынучан булып калыгыз» мәкаләсендәге «Тәҗрибәләре әз булган кардәшләргә ярдәм итегез» дигән өстәмә исем астындагы 3 нче абзацны кара.) Андый вәгазьчеләр белән хезмәттәшлек итеп, син нәрсәгә өйрәндең?
Берәр тәҗрибәле вәгазьче белән хезмәткә сөйләш. Аның сәламәтлеге начар булса, аның өендә вакыт-вакыт Изге Язмалар өйрәнүен үткәрә аласыңмы? Өйрәнүне үткәргәч, аңардан берәр киңәш сора.
Алар белән вакыт уздыр. Тәҗрибәле вәгазьчеләр белән аралашып, аларны якыннан белеп була. Аларның берсен гаилә белән гыйбадәт кылуыгызга чакырып аңардан интервью ал. Сәламәтлеге начар булса, гаилә белән гыйбадәт кылуны аның өендә үткәрә аласыңмы? Аның хакыйкать белән ничек танышканы турында белеш. Ул нинди фатихалар татыган? Территориягездә нинди үсеш күргән? Йәһвәгә хезмәт итеп, ул нинди шатлык кичергән?
Зирәклек күрсәт һәм артык таләпчән булма. Бар вәгазьчеләрнең — тәҗрибәләре зур булса да — хезмәт иткәндә алган бүләкләре төрле (Рим. 12:6—8). Моннан тыш, олы яшькә җиткән кайбер вәгазьчеләр безнең белән әллә ни күп вакыт үткәрә алмый. Шулай да алардан Йәһвәгә күп еллар тугры хезмәт иткәнгә күп нәрсәгә өйрәнеп була.