Yahwe Akatukoonyera Kuhindahinduramu n’Okutunga Okusemererwa Hoona Nambere Twagendaga

Ow’oruganda na Munyaanya Itwe Kassholm bakagenda omu Isomero erya Gilead omu 1979 kandi kumara emyaka nyingi, baheeriize omu biikaro ebirukwahukana omu Iran, Mauritius, Myanmar, Tanzania, Uganda na Zaire. Obu bakaba bali omu Isomero lya Gilead, Ow’oruganda Jack Redford, akabaha amagezi agabakoonyiire buli murundi baatungaga obujunaanizibwa obuhyaka. Leka batusoborre omulingo gaabakonyiiremu.

Mutugambire omulingo mwayegere amananu.

Mats: Isenyowe obu akaba naikara omu Poland omu Bulemu obw’Ensi Yoona Obwakabiri, akarora obugobya bwingi obukaba buli omu Keleziya. Baitu nabwo yaikaraga naagamba ngu, “Aine kuba haliyo ediini ey’erukwegesa amananu!” Obwire bukahika nakyetegereza ngu akaba ahikire. Nkagura ebitabu bingi ebikaba bikozesiibweho. Kimu ha bitabu ebi, kikaba ky’erangi eya bbururu kandi kikaba kiine omutwe The Truth That Leads to Eternal Life. Omutwe ogu gukankwataho muno kandi nkasoma ekitabu eki kyona ekiro nakitungiiremu. Obu namazire kusoma ekitabu kinu, nkaba ninkigumiza kimu ngu nkaba nzoire amananu!

Kuruga Apuli 1972, nkatandika kusoma ebitabu bingi eby’Abakaiso ba Yahwe kandi nkatunga eby’okugarukamu bingi eby’ebikaguzo byange ebirukukwata ha Baibuli. Nkasisana nk’omusuubuzi ow’omu kyokurorraho kya Yesu ayazoire eruuru ey’omuhendo omwingi kandi hanyuma yagenda yatunda buli kimu kyona eki akaba aine kugigura. Nanyowe nkahinduramu ekigendererwa kyange eky’okugenda ha yunivasite n’okufooka dakitaali kandi nagura “eruuru” ey’amananu aga nkaba nzoire. (Mat. 13:45, 46) Nkabatizibwa omu Desemba 10, 1972.

Omu mwaka gumu gwonka, bazaire bange na mugenzi wange omwojo omuto bakaikiriza amananu kandi babatizibwa. Omu Julaayi 1973, nkatandika obuheereza obw’akasumi koona. Omu kitebe kyaitu hakaba harumu bapayoniya baingi abeekambi, kandi omu hali bo akaba munyaanya itwe omurungi muno kandi ow’eby’omwoyo ow’arukwetwa Ann-Catrin. Tukagonzangana kandi twataaha obuswere omu 1975, kandi twamara emyaka ena omu rubuga rwa Strömsund Sweden, orukaba rulimu abantu baingi abakaba nibagonza kwega amananu.

Ann-Catrin: Isenyowe akeega amananu obu akaba ali haihi kumaliiriza yunivasite omu Stockholm. Omu kasumi ako nkaba nyine emyezi esatu, baitu yantwaraga omu nsorrokano n’omu buheereza. Nyinanyowe atakigonze, kandi akaikara naalengaho kwoleka ngu Abakaiso ba Yahwe bakaba batahikire. Baitu akaba ataine obwakaiso bwona, nahabweki obwire bukahika na uwe yabatizibwa. Nkabatizibwa nyine emyaka 13, kandi nkatandika kuheereza nka payoniya nyine emyaka 16. Kandi obu nkaba nimpereza omu Umeå, nambere hakaba hali obwetaago bw’abatebezi b’Obukama, nkafooka payoniya ow’embaganiza.

Hanyuma y’okutaaha obuswere, tukatunga okusemererwa kuruga omu kukoonyera abantu baingi kwega amananu. Omu hali bo akaba omwisiki omuto ow’arukwetwa Maivor, ayalekere omulimo ogw’okuzaana emizaano kusobora kuheereza Yahwe omu bwijwire, kandi hanyuma akatandika kuheereza nka payoniya ali hamu na mugenzi wange omuto omwisiki. Bakagenda omu isomero lya Gilead omu 1984 kandi hati nibaheereza nk’abamiisani omu Ecuador.

Kiki ekyabakoonyiire kuhinduramu n’okwikara mwine okusemererwa omu buheereza bwanyu nk’abamiisani”?

Mats: Baikaraga nibatuha obujunaanizibwa obuhyaka. Ekintu kimu ekyatukoonyiire kumanyiira empindahinduka, kikaba kwikara nitulengaho kukora kyona ekirukusoboka kwegera hali Yesu kukira muno obwebundaazi bwe. (Bak. 2:6, 7) Ekyokurorraho, omu kiikaro ky’okunihira ab’oruganda n’abanyaanya itwe ab’omu kiikaro kumanyiira omulingo tukoramu ebintu, twalengahoga kumanya ensonga habwaki bakora ebintu omu mulingo gwabo. Twagonzaaga kumanya enteekereza yabo n’obuhangwa bwabo. Obu twayegiire hali Yesu kikatwanguhira kuhindahinduramu n’okutunga okusemererwa omu buheereza bwaitu.—Zab. 1:2, 3.

Ann-Catrin: Buli murundi twatungaga obujunaanizibwa obuhyaka, twasisanaga nk’ekimera ekihyaka ekirukwetaaga ekyererezi eky’izooba kusobora kukura. Kandi Yahwe akaikara ali nk’izooba haliitwe. (Zab. 84:11) Akatuha eka ey’eby’omwoyo ey’ab’oruganda na banyaanya itwe, abakaba baine okugonza. Ekyokurorraho, omu kitebe kyaitu ekitaito eky’omu Tehran, Iran, ab’oruganda na banyaanya itwe bakaba bagabi kandi b’amakune, kinu kikatwijukya bimu ha byokurorraho eby’abantu abaayolekere amakune aba tusomaho omu Baibuli. Tukaba nitugonza kwikara omu Iran, baitu omu Julaayi 1980, omulimo gw’Abakaiso ba Yahwe gukatangwa kandi baaturagira kurugamu omu saaha 48 zonka. Tukasindikwa omu Zaire (hati ey’erukumanywa nka Congo) omu Afrika.

Obu nakyetegeriize ngu nitwija kuheereza omu Afrika, nkarra. Nkatiina muno obu nahuliire ngu omu Afrika haliyo enjoka n’oburwaire. Baitu ow’oruganda na mukazi we abakaba bamazire akasumi nibaheereza omu Afrika bakatugambira bati: “Mutatiina, timukagendaga omu Afrika! Baitu itwe tukimanyire ngu nimwija kwegonza.” Kandi mali bakaba bahikire! Ab’oruganda na banyaanya itwe bakatwoleka okugonza okw’amaani. Tukagonza muno Zaire kuhika ha rulengo ngu obu tukaba twine kurugamu habw’omulimo gwaitu kutangwa hanyuma y’emyaka mukaaga, nkesekereza habwokuba nkakyetegereza ngu nkaba ndiyo ninsaba Yahwe nimmugamba ngu, “Caali, leka twikale omu Afrika.”

Migisa ki ei mutungire omu buheereza bwanyu hali Yahwe?

Mats: Gumu ha migisa nubo abanywani abamiisani aba twatungire kuruga omu biikaro ebirukwahukana. Ekindi, omu bujunaanizibwa obumu, tukatunga okusemererwa okw’okuba n’abeegi ba Baibuli baingi muno, obwire obumu, buli omu yabaga aine abeegi nka 20! Ekindi, nyikara niinyijuka okugonza n’amakune ag’ab’oruganda na banyaanya itwe ab’omu Afrika. Twaraaraga omu motaka yaitu obu twabaga tubungiire ebitebe, kandi ab’oruganda na banyaanya itwe, baakoraga kyona ekirukusoboka kurora ngu twatunga kyona eki turukwetaaga noobu kiraaba ngu bakaba bali banaku. (2 Kol. 8:3) Ekintu ekindi eki twakiraga kugonza nuko akaire ak’okubalizangana ebintu ebyabaga bibaireho ekiro eki. Buli ha kumalirra kw’ekiro, nyowe na Ann-Catrin twaikarraga hamu nitubazaaho ebintu ebibaireho, kandi tusiima Yahwe habw’okwikara ali hamu na itwe.

Ann-Catrin: Nyowe ekikizire kundeetera okusemererwa, nukwo kumanya kurungi ab’oruganda na banyaanya itwe kuruga omu nsi yoona. Tukeega endimi empyaka ezirukutwarramu Farsi, Orufaransa, Luganda, hamu na Kiswahili, kandi twayegondeza omu buhangwa oburukwahukana. Tukakoonyera kutendeka ab’oruganda na banyaanya itwe abahyaka, twatunga abanywani abarungi, kandi twayegondeza omu kuheereza Yahwe tuli na bo.—Zef. 3:9.

Ekindi, tukeegondeza omu kurora ebyahangirwe bya Yahwe ebirukwahukana ebisemiire. Buli murundi twatungaga obujunaanizibwa obuhyaka, twasisanaga nk’abagenzere na Yahwe obu naatwebembera. Atwegeseze ebintu ebi tukaba tutasobora kweyegesa itwenka.

Bizibu ki ebi mutungire kandi kiki ekibakoonyiire kubigumira?

Mats: Tukatunga endwaire nyingi muno otwaliiremu n’omuswija gw’emibu. Kandi Ann-Catrin akatunga okusemezebwa oku tukaba tutarukunihira. Ekindi, tukaba tweraliikiriire habw’abazaire baitu abakaba bakuzire omu myaka; baitu nitusiima muno bagenzi baitu abaabaireho kubarolerra. N’okugumiisiriza, bakahikiriza kurungi obujunaanizibwa obu, baine okusemererwa n’okugonza. (1 Tim. 5:4) Noobu kiraaba ngu tukakora kyona ekirukusoboka kubakoonyera obu tuli hara na bo, obwire obumu twayehurraga kubi habwokuba tukaba tutasobora kubakoonyera tuli na bo.

Ann-Catrin: Omu 1983, obu tukaba nituheereza omu Zaire, nkakwatwa oburwaire obwa kolera. Dakitaali akagambira Mats ati, “Mwihe omu ihanga linu kiro kinu!” Tukagenda ekiro ekyahondiireho, baitu enyonyi yonka ei twasoboire kutunga, ekaba enyonyi ey’ehimba emigugu eyatutwaire omu Sweden.

Mats: Tukaba tumanyire ngu obuheereza bwaitu nk’abamiisani buhoireho, nahabweki tukarra muno. Noobu kiraaba ngu dakitaali akaba agambiire Ann-Catrin ngu tarukwija kwongera kuba kurungi, akamara yaba kurungi. Kandi hanyuma y’omwaka gumu, tukasobora kugaruka omu Zaire, baitu ha murundi gunu tukagenda omu kitebe ekitaito ekirukubaza Kiswahili ekiri omu Lubumbashi.

Ann-Catrin: Obu tukaba tuli omu Lubumbashi, nkatwara enda baitu yarugamu. Noobu kiraaba ngu tukaba tutaine ekiteekerezo eky’okuzaara omwana, nkasaasa muno, omwana waitu obu yafiire. Baitu omu kasumi ako akagumangaine, Yahwe akatuha ekisembo eki tukaba tutarukunihira. Tukatunga abeegi ba Baibuli baingi muno kukira na kara. Omu myezi nke, ekitebe kikakurakurana kuruga h’abatebezi 35 kuhika ha 70, kandi omuhendo gw’abo abarukwija omu nsorrokano gukaruga ha 40 gwahika ha 220. Tukeemarra omu kutebeza kandi emigisa ya Yahwe ekandeetera okuhuumuzibwa okw’amaani. Baitu nabwo, tukira kuteekerezaaho n’okubazaaho omwana waitu omugonzebwa. Tulindiriire n’ekihika akasumi Yahwe obu alihuumuliza kimu emitima yaitu omu nsi empyaka.

Mats: Haroho akasumi Ann-Catrin obu yatandikire kwehurra acekere kandi ajwahire. Kandi na nyowe bakaba bansangiremu oburwaire bw’ekookoro kandi nkaba niinyetaaga kusemezebwa. Baitu hati ndi kurungi, kandi na Ann-Catrin naakora kyona ekirukusoboka kuheereza Yahwe.

Tukakyetegereza ngu tali niitwe itwenka abarukugumira ebirengo. Hanyuma y’ekiita abantu ekyabaire omu Rwanda omu 1994, tukabungira ab’oruganda na banyaanya itwe omu nkambi z’abasuuhuuki. Obu twarozere okwikiriza kwabo, okugumiisiriza kwabo, hamu n’amakune gaabo, kikatwegesa ngu Yahwe aine amaani ag’okukoonyera abantu be kugumira buli kirengo kyona.—Zab. 55:22.

Ann-Catrin: Ekizibu ekindi ekyatuhikireho kikabaho obu twagenzere omu Uganda omu mwaka gwa 2007 obu baali nibahayo ofiisi y’itaagi. Hanyuma ya puroguraamu kuhwa, tukatemba bbasi ey’ekaba erumu Ababeseeri hamu n’abamiisani nka 25 obu nitugenda Nairobi, Kenya. Obu tukaba tutakahikire ha mutaano gwa Kenya, ekiroole kikahaba kuruga omu mukono gwakyo kandi kyatomera bbasi ei tukaba turumu. Omuvugi wa bbasi hamu n’ab’oruganda na banyaanya itwe bataano bakafeeraho aho naaho; kandi munyaanya itwe omu akafeera omu irwarro. Mali tulindiriire n’ekihika kwongera kurora banywani baitu abo!—Yob. 14:13-15.

Nkamara nakira ebihuta byange. Baitu nyowe na Mats hamu n’abandi abake, tuli bamu h’abaagumiizeemu nitwetuntura habw’obutandwa obwabaireho. Nyowe okwetuntura oku kwabahoga omu bwire obw’ekiro, kandi kwandeeteraga kwehurra nk’ow’aine oburwaire obw’omutima. Mali eki kikaba nikitiinisa. Baitu kusaba Yahwe hamu n’okusoma Ebyahandiikirwe kikankoonyera kuhurra nteekaine. Kandi tukatunga n’obukoonyezi bw’abadakitaali obwatukoonyiire muno. Hati titukyayetuntura ekihinguraine, kandi nitusaba Yahwe kutukoonyera kuhuumuza abo abarukuhikwaho okwetuntura okw’amaani.

Obu mubairege nimusoborra omulingo musoboire kugumira enyikara ezigumire, mugambirege ngu Yahwe akabahimba “nk’amahuli amabisi.” Kiki eki mumanyisizeege?

Mats: Ebigambo ebi nibiruga omu bigambo ebya Kiswahili “Tumebebwa kama mayai mabichi,” ebirukumanyisa “Tukahimbwa nk’amahuli amabisi.” Nkooku omuntu ahimba amahuli amabisi n’obwegendereza nukwo gataatika, nukwo Yahwe aikaire naatusagika omu mulingo ogw’okugonza, omu buli bujunaanizibwa obu tutungire. Aikaire naatuhikyaho ebyetaago byaitu obundi n’okukira hali ebi ebi turukwetaaga. Omulingo ogumu ogu turozeremu okugonza kwa Yahwe hamu n’obusagiki bwe nukwo kuraba omu mbabazi ezitwolekerwe ab’oruganda abali h’Akatebe Akalemi.

Ann-Catrin: Haroho ekyokurorraho ekimu eki ndukugonza kubazaaho ekirukwoleka omulingo Yahwe yatusagikiremu omu mulingo ogw’embabazi. Kiro kimu bakanterra esimu nibangambira nkooku isenyowe akaba ali omu irwarro ali kubi muno omu Sweden. Mats nubwo akaba yaakaruga kukira omuswija ogw’emibu. Tukaba tutaine sente ezirukutusobozesa kutemba enyonyi kugaruka omuka, nahabweki tukaba tucwiremu kutunda motoka yaitu. Hanyuma bakatuterra esimu zindi ibiri; emu ekaba neeruga hali ow’oruganda na mukazi we abaahuliire ha nyikara yaitu kandi bakaba nibagonza kusasurraho omuntu omu. Kandi endi ekaba neeruga hali munyaanya itwe ow’akuzire omu myaka, ow’akaba ayahwire sente ze omu kasanduuko kandi akaba ahandiikireho, “Z’okukoonyera ogu weena ow’ali omu bwetaago.” Omu dakiika nke, Yahwe akaba atukoonyiire kutunga sente ezi tukaba nitwetaaga kugenda!—Baheb. 13:6.

Biki ebi mwegere omu myaka 50 ei mumazire omu buheereza obw’akasumi koona?

Ann-Catrin: Nyegere ngu, amaani gaitu garuga omu ‘kuteekaana n’omu kwoleka okwesiga.’ Obu twesiga Yahwe, aturwanirra. (Is. 30:15; 2 Byom. 20:15, 17) Tutungire emigisa nyingi muno kuruga hali Yahwe obu nitukora kyona ekirukusoboka omu buli bujunaanizibwa bwaitu, kukira ei twakutungire obu twakubaire nitukora ekintu ekindi.

Mats: Isomo erikuru eri nyegere niryo kwikara niinyesiga Yahwe omu buli nyikara yoona, n’okurora omulingo ankoonyeramu. (Zab. 37:5) Aikaire naankoonyera nkooku yaraganiize. Kandi nitukyarora omulingo aliyo naatukoonyera omu buheereza bwaitu ha Beseeri omu Myanmar.

Nitunihira ngu abato baingi abarukugonza kwongera ha buheereza bwabo na bo nibaija kwerorra okugonza kwa Yahwe okutalekera. Nitukigumya ngu nibaija kutunga emigisa enu obu baraikiriza Yahwe kubakoonyera kumanyiira empindahinduka, n’okutunga okusemererwa hoona nambere baraasindikwa kuheereza.