Abo ‘Abaine Omutima Omurungi’ Nibaija Kwikiriza

1. Abantu nibasobora kwetwaza bata obu tubatebeza amakuru amarungi? (Ebik. 13:​47, 48; 16:​14, 15)

ABANTU baingi ab’omu kyasa eky’okubanza obu baahuliire amakuru amarungi agarukukwata hali Yesu ahonaaho bakagaikiriza. (Soma Ebikorwa by’Abakwenda 13:​47, 48; 16:​14, 15.) Na kasumi kanu abamu basemererwa obu bahurra amakuru amarungi habw’omurundi gwabo ogw’okubanza. N’abo abataikiriza amakuru amarungi ag’Obukama ha kubanza, hanyuma y’obwire nibasobora kugagonza. Kiki eki tusobora kukora kakuba tutangatangana abo ‘ab’omutima omurungi’ omu buheereza?

2. Omulimo gwaitu ogw’okutebeza nigusisana guta n’ogw’omulimi?

² Teekerezaaho ekyokurorraho kinu. Omulimo gwaitu ogw’okufoora abantu abeegeswa nigusobora kulengesanizibwa n’ogw’omulimi. Kakuba ekijuma kimu kyenga ebindi bitakengere, omulimi akinoga kandi agumizaamu naalima kandi naarolerra ebitakengere. Omu mulingo nugwo gumu, obu tutangatangana omuntu ow’arukugonza obutumwa bwaitu tusemeriire kumukoonyera kufooka omwegeswa wa Yesu ahonaaho. Baitu nabwo, tugumizaamu nitugarukira abo abarukwetaaga obwire kurora omugaso ogw’ebibarukwega. (Yoh. 4:​35, 36) Okwetegereza nikwija kutukoonyera kukomamu enyanjura ey’erakwataho abarukutuhuliiriza. Leka turole eki tusobora kukora ha murundi ogw’okubanza kukoonyera abarukugonza kuhuliiriza. Ekindi, nitwija kubazaaho omulingo tusobora kubakoonyera kugumizaamu nibakurakurana.

OMULINGO TUSOBORA KUKOONYERA ABO ABARUKUGONZA AMANANU

3. Kiki eki tusemeriire kukora obu turaatunga abantu abarukugonza amananu? (1 Abakolinso 9:26)

³ Obu turatunga abantu abarukugonza kumanya amananu, ahonaaho nitugonza kubakoonyera kwega hali Yahwe n’okumwirra haihi. Ahonaaho tusemeriire kubagambira ha nteekaniza ey’okwega na bo Baibuli kandi tubaraalize kwija omu nsorrokano zaitu.—Soma 1 Abakolinso 9:26.

4. Bazaaho ekyokurorraho eky’omuntu ow’akaba ayetekaniize kwega Baibuli ahonaaho.

⁴ Kugambiraho abantu ha nteekaniza y’okwega Baibuli. Bamu h’abantu aba tubaza na bo baba beetekaniize kutandika kwega Baibuli ahonaaho. Ekyokurorraho, kyakana kimu, omukazi omu Canada akagenda h’akagaali kandi yakomamu burocuwa Wegondeze omu Bwomeezi Ebiro n’Ebiro!. Munyaanya itwe ow’akaba ali h’akagaali akamusoborra ngu burocuwa niiziraho n’okwegesebwa Baibuli hataroho kusasura sente. Omukazi akasemererwa kandi yaha munyaanya itwe enamba ye y’esimu. Kiro eki kyonyini, omukazi akasindikira munyaanya itwe obutumwa kandi yamukaguza ni di obu baraatandika kwega. Munyaanya itwe obu yamugambiire ngu naija kugendayo ha wiikendi, omukazi akamukaguza ati: “Habwaki otaija nyenkya? Nyine obwire.” Kyakataano bakatandika kwega. Omukazi akaija omu nsorrokano ha wiikendi kandi yagumizaamu naakurakurana.

5. Kiki eki tusemeriire kukora obu turora ngu omuntu takagondeze kwega na itwe Baibuli? (Rora n’ebisisani.)

⁵ Amananu gali, tikiri ngu buli omu weena naija kuhuliiriza amakuru amarungi n’ekihika nkooku omukazi ogu yakozere. Abamu nikisobora kubatwarra obwire bwingi. Obwire obumu, nikisobora kutwetaagisa kutandika nitubazaaho ensonga ey’erukusemeza omuntu. Baitu nabwo, kakuba twikara twine enteekereza ey’ehikire kandi tukagumizaamu nitwoleka ngu nitumufaaho, omu bwire buke naasobora kutandika kwega Baibuli. Nitusobora tuta kugambiraho omuntu ha nteekaniza y’okwegesa Baibuli? Leka turole amagezi ab’oruganda na banyaanya itwe abaine obukugu obw’okutandikaho abeegi ba Baibuli aga barukutuha.

6. Nitusobora tuta kugambira omuntu ha nteekaniza yaitu ey’okwegesa Baibuli?

⁶ Abatebezi hamu na bapayoniya abaakaguziibwe bakasoborra nibagamba ngu omu nsi ezimu, obu tuba nitubazaaho enteekaniza y’okwega Baibuli, kirungi kwetantara ebigambo nka “kwegesa.” Bakagamba ngu kirungi kukozesa ebigambo nka “kuleeta hamu ebiteekerezo” rundi “kumanya kurungi Baibuli.” Nitusobora kugambira omuntu ow’arukugonza kugumizaamu naabaza na itwe ha nteekaniza enu obu nitugamba tuti, “Nikihuniiriza omulingo Baibuli egarukamu ebikaguzo ebikuru ebirukukwata ha bwomeezi” rundi “Baibuli tikiri kitabu ky’ediini kyonka, baitu etukoonyera n’omu miringo endi.” Noosobora kugumizaamu noogamba oti: “Enteekaniza egi terukutwara obwire bwingi; nitusobora kukozesa edakiika 10 rundi 15 kandi omu dakiika ezi enke, noija kuba oyegere ekintu ekisobora kukukoonyera omu bwomeezi bwawe.” Nikisobora kutakwetaagisa kukozesa ebigambo nka “buli kiro” rundi “buli wiiki,” habwokuba nikisobora kuleetera omuntu kuteekereza ngu kiragiro kukuha obwire obw’okumwegesa.

7. Ni di abamu obu bakyetegereza ngu ebi barukwega mananu? (1 Abakolinso 14:​23-25)

⁷ Baraalize kwija omu rusorrokano. Nikizooka ngu omu kasumi k’omukwenda Paulo, abamu bakabanza kwetegereza amananu kuruga omu byahandiikirwe obu baagenzere omu nsorrokano. (Soma 1 Abakolinso 14:​23-25.) Ekintu nikyo kimu ekikira kubaho na kasumi kanu. Abantu abarukukira obwingi bakurakurana bwangu obu batandika kwija omu nsorrokano. Ni di obu osemeriire kubaraaliza? Omu isomo 10 ery’ekitabu Wegondeze omu Bwomeezi Ebiro n’Ebiro!, harumu okuraalizibwa okw’okwija omu nsorrokano, baitu tosemeriire kulinda kuhikya obu muraahika omu isomo eri nubwo oraalize omwegi waawe kwija omu nsorrokano. Omurundi ogw’okubanza kubaza n’omuntu noosobora kumuraaliza kwija omu nsorrokano eza ha wiikendi obundi noomugambira omutwe gw’orubazo, rundi ensonga kuruga omu Omunaara gw’Omulinzi ogu muraayega.

8. Nsonga ki enkuru ezi tusobora kugambira omuntu obu turukuba nitumuraaliza omu nsorrokano? (Isaaya 54:13)

⁸ Obu oraaba nooraaliza omuntu omu nsorrokano, musoborre omulingo ensorrokano zaitu z’embaganiza ha z’amadiini agandi agaamanyire. Omwegi omu ayabaireho omu kicweka eky’okwega Omunaara gw’Omulinzi akakaguza omwegesa we ati: “Nikiija kita ngu ow’arukwebembera omunaara amanyire ibara lya buli omu?” Munyaanya itwe akamusoborra ngu tulengaho kumanya amabara g’abo abali omu kitebe kyaitu nkooku tumanya amabara ag’ab’omu maka gaitu. Omwegi akagamba ngu nambere asabira abantu tibarukumanyangana. Omu mulingo nugwo gumu, nitusobora kusoborra omuntu omulingo ogundi ensorrokano zaitu ziri z’embaganiza. (Soma Isaaya 54:13.) Tusorrokana hamu kuramya Yahwe, kumwegeraho, n’okugarranganamu amaani. (Baheb. 2:12; 10:​24, 25) Egi niyo ensonga habwaki ensorrokano zaitu ziteekaniziibwe kurungi, nizeegesa kandi tizirumu emigenzo. (1 Kol. 14:40) Ekindi, ebiikaro ebi tusorrokaniramu byombekerwe kurungi ekitukoonyera kwega tuteekaine. Ekindi, titukurakuraniza ebitebe by’obulemi habwokuba titugwera rubaju kandi titwetaahya omu nsonga ezirukwetaagisa omuntu kwecweramu. Kirungi kwoleka omuntu vidiyo Biki Ebikolebwa omu Kingdom hall? Omu mulingo ogu, naija kumanya kara ekiraabayo.

9-10. Obu turaaba nituraaliza omuntu kwija omu nsorrokano, kiki eki tusemeriire kumugambira kurora ngu tiyatiina kwija? (Rora n’ekisisani.)

⁹ Abamu batiina kwija omu nsorrokano nibateekereza ngu nibaija kuhambirizibwa kuhindura ediini yabo rundi kufooka bamu h’Abakaiso ba Yahwe.” Koonyera omuntu kwetegereza ngu twegondeza omu kutunga abagenyi baitu titubahambiriza kutweteranizaaho rundi kwejumbira omu nsorrokano. Ab’omu maka nibaraalizibwa kandi nibasobora kwija n’abaana baabo. Omu nsorrokano zaitu, abaana tibegesebwa bonka. Oihireho, abazaire baikarra hamu n’abaana baabo kandi boona beegera hamu. Kinu kikoonyera abazaire kumanya abaana baabo nambere bali, n’ebintu ebi barukwegesebwa. (Bir. 31:12) Titusorooza bisembo rundi kurabyamu ebbahaasa, rundi obwibo. Oihireho tuhondera ekiragiro kya Yesu ekirukugamba kiti: “Mukaheebwa busa na inywe mugabire busa.” (Mat. 10:8) Noosobora kugambira omuntu ngu tikirukwetaagisa kujwara orugoye orwa sente nyingi kusobora kwija omu nsorrokano. Ruhanga arora omutima hatali enzooka y’omuntu eya haruguru.—1 Sam. 16:7.

¹⁰ Kakuba omuntu aija omu nsorrokano, kora kyona ekirukusoboka kumuleetera kwehurra ateekaine. Mwanjule hali abagurusi hamu n’ab’oruganda na banyaanya itwe. Obu arayehurra ateekaine, nikiija kumuleetera kugonza kugaruka. Orusorrokano obu ruraaba ruliyo nirugenda omumaiso, obu araaba ataine Baibuli, mukozese hamu eyaawe, kandi omukoonyere obu noomwoleka enkarra ezirukusomwa, nukwo asobole kuhondera orubazo obu ruraaba niruheebwa.

OBU TUTANDIKA KWEGA N’OMUNTU BAIBULI

11. Noosobora ota kwoleka ngu obwire omwegi akuhaire n’obutwara nk’ekikuru?

¹¹ Bintu ki ebi tusemeriire kwijuka obu turukuba nitwegesa omuntu Baibuli? Yoleka ngu oyeteekaniize kwega na uwe omu bwire obu arukuba akuhaire. Ekyokurorraho, obu oraaba okozere na uwe enteekaniza, linda obwire noobu kiraaba ngu abantu ab’omu kiikaro kyanyu tibakira kulinda obwire. N’ekindi, tutatwara obwire bwingi ha murundi gw’okubanza kwega. Ab’oruganda na banyaanya itwe abamu abamazire obwire nibeegesa abantu Baibuli nibagamba ngu kirungi ha murundi ogw’okubanza kumara kara kwega noobu kiraaba ngu omwegi naakyagonza kumanya ebirukukiraho. Kandi kikuru muno kutabaza muno. Leka omwegi nuwe abaze omulingo arukwehurra.—Nfu. 10:19.

12. Ekigendererwa kyaitu kisemeriire kuba nikiha obuturukuba nitutandika kwegesa omuntu Baibuli?

¹² Kurugira kimu ha kutandika, ekigendererwa kyawe kisemeriire kuba ky’okukoonyera ow’arukuhuliiriza kumanya Yahwe na Yesu, n’okweyongera kubagonza. Kinu noosobora kukikora kuraba omu kumwoleka Baibuli eki erukugamba omu kiikaro ky’okumugambira ebi omanyire. (Ebik. 10:​25, 26) Omukwenda Paulo obu yabaga naayegesa abantu, yataga omutima hali Yesu Kristo, Yahwe ou yasindiikire kutukoonyera kumumanya n’okumugonza. (1 Kol. 2:​1, 2) Ekindi, Paulo akooleka kurungi obukuru obw’okukoonyera abeegeswa abahyaka kukurakuraniza emiringo enungi ey’erukulengesanizibwa n’efeeza, ezaabbu hamu n’amabaale ag’omuhendo. (1 Kol. 3:​11-15) Emiringo egi enungi n’etwarramu okwikiriza, amagezi, okwetegereza hamu n’okutiina Yahwe. (Zab. 19:​9, 10; Nfu. 3:​13-15; 1 Pet. 1:7) Yegera ha mulingo Paulo yayegesaamuga kuraba omu kukoonyera abeegi baawe kukurakuraniza okwikiriza okugumire n’okutunga enkoragana enungi na Isebo ow’omu iguru ow’okugonza.—2 Kol. 1:24.

13. Nitusobora tuta kwoleka okugumiisiriza n’okwetegereza obu turukuba nitukoonyera abo abarukugonza kwega amananu? (2 Abakolinso 10:​4, 5) (Rora n’ekisisani.)

¹³ Yegera ha mulingo Yesu yayegesaamuga kuraba omu kwoleka okugumiisiriza n’okwetegereza. Wetantale kukaguza ebikaguzo ebisobora kuleetera omuntu kwehurra atateekaine. Obu haraaba haroho ekintu omwegi eki atarukwetegereza kurungi, nimusobora kugumizaamu, nukwo muraakibazaaho hanyuma y’okwega. Omu kiikaro ky’okuhambiriza omwegi kwetegereza ekintu, muhe obwire akiteekerezeeho nukwo asobole kuhinduramu enteekereza ye. (Yoh. 16:12; Bak. 2:​6, 7) Baibuli erengesaniza enyegesa ez’ebisuba ezi tulengaho kuhindura n’ebintu ebigumire kandi ebihamire muno nk’emihama. (Soma 2 Abakolinso 10:​4, 5.) Nikisobora kutanguhira omwegi kuleka enyegesa ezi ezihamire muno, nahabweki tusemeriire kumukoonyera kwesiga Yahwe.—Zab. 91:9.

OMULINGO TUSOBORA KUKOONYERA ABAHYAKA ABAIJA OMU NSORROKANO

14. Tusemeriire kutwaza tuta abahyaka abaija omu nsorrokano zaitu?

¹⁴ Yahwe naagonza tutwaze abantu boona omu mulingo ogw’embabazi kababe nibaruga nkaha, b’obuhangwa bwa mulingo ki, baguuda rundi banaku. (Yak. 2:​1-4, 9) Nitusobora tuta kwoleka okugonza abahyaka abaija omu nsorrokano zaitu?

15-16. Nitusobora tuta kukoonyera abahyaka kwehurra bateekaine obu barukuba baizire omu nsorrokano zaitu?

¹⁵ Abamu baija omu nsorrokano zaitu n’ekigendererwa eky’okumanya kiki ekibayo rundi habwokuba omuntu ow’omu kiikaro ekindi abeekambisize kugendayo. Nahabweki obu turaarora abahyaka baizire omu nsorrokano leka tubaze na bo. Batangirre, baitu otabaleetera kwehurra batateekaine habw’amasemererwa maingi. Basabe kwikarra na iwe. Mukozese hamu Baibuli yaawe hamu n’ekitabu ekindi kyona eki murukusomaho rundi obahe ebyabo. Ekindi teekerezaaho enyehurra zaabo. Omusaija omu ayaizire ha Kyombeko ky’Obukama akagambira ow’oruganda ayamutangiriire ngu akaba atiinire habwokuba akaba atajwaire kurungi nk’abandi aba yasangireyo. Ow’oruganda akamuleetera kwehurra ateekaine kandi yamusoborra ngu Abakaiso ba Yahwe na bo bali bantu aba buli kiro. Omusaija ogu akahika yabatizibwa. Baitu ateebwe omulingo ow’oruganda yamuleetiire kwehurra ateekaine. Baitu haroho ekintu eki tusemeriire kwegendereza: Obu oraaba noobaza n’abahyaka abaizire omu nsorrokano, yoleka ngu noobafaaho, baitu wetantale kubakaguza ebikaguzo ebiraabaleetera kwehurra batatekaine.—1 Pet. 4:15.

¹⁶ Haroho omulingo ogundi ogu tusobora kuleetera abahyaka kwehurra bateekaine. Ekyokurorraho, obu turukuba nitubaza na bo, nituha ebicweka rundi nituhayo eby’okugarukamu, tusemeriire kwegendereza kutabazaaho kubi enyikiriza zaabo. Twetantale ebigambo ebisobora kubatabaijura rundi kubabiihiza. (Tit. 2:8; 3:2) Ekyokurorraho tusemeriire kwetantara kubazaaho enyikiriza zaabo omu mulingo ogutali gw’ekitiinisa. (2 Kol. 6:3) Obu kirukuhika ha nsonga enu, ab’oruganda abarukuha embazo basemeriire kwegendereza. Ekindi, basemeriire kuteekerezaaho abahyaka abarukuhuliiriza obu nibabasoborra ebigambo rundi enyegesa ei batarukwetegereza.

17. Tusemeriire kuba na kigendererwa ki kakuba tutangatangana abantu ‘abaine omutima omurungi’ omu buheereza?

¹⁷ Omulimo gwaitu ogw’okufoora abantu abeegeswa gusemeriire kukorwa omu bwangu kukira muno kasumi kanu, kandi nitugumizaamu kuserra abantu ‘abaine omutima omurungi ogweteekaniize kutunga obwomeezi obutahwaho.’ (Ebik. 13:48) Kandi obu turaaba nitutebeza, tutatiina kugambira abantu ha nteekaniza yaitu ey’okwega na bo Baibuli, rundi kubaraaliza omu nsorrokano zaitu. Obu turaakora eki, nitwija kubakoonyera kuba omu muhanda oguraabahikya omu bwomeezi obutahwaho.—Mat. 7:14.