Ensi Eriyo n’Ehwerekerezebwa—Baibuli n’Ekibazaaho Ki?

“Abantu nibeyongera kusiisa eby’obuhangwa kandi kinu kitaire ensi omu kabi k’amaani. Nikitekerezebwa ngu ebibuga ebikooto nibiija kudikira, nihaija kubaho ekyanda ekitakabahoga, ihunga ery’amaani, ibura ly’amaizi omu biikaro bingi eby’ensi, n’okuhwerekerra kw’obukaikuru bw’emiringo y’ebimera n’ebisoro. Ebintu binu tiruli ruganikyo kwonka rundi kukihinguraniza. Abanyasayansi nibatugambira ngu ebi nibyo birukwija kubaho kakuba gavumenti zitahindura ha mulingo zirukukozesaamu eby’obuhangwa kutunga amasanyarazi.”—Bikagambwa António Guterres, omwebembezi w’Ekitebe eky’Amahanga Ageteraine, omu repooti eya Apuli 4, 2022 eyaturukiibwe ekitongole ekiseruliiriza ha mpindahinduka y’obwire, ekirukumanywa nka Intergovernmental Panel on Climate Change.

“Abanyasayansi nibeyongera kukyoleka ngu omu myaka erukwija empindahinduka ey’obwire n’esobora kuleetera amalindiro g’ebisoro agarukuhika omu 423 [omu United States] kuhwerekerra, habwekirro ekirukweyongera omu biikaro binu. Ebintu ebibi ebisobora kubaho nibisisana n’ebiturukusomaho omu Baibuli: nk’omurro, okusandaara kw’amaizi, kwaga kw’ebirika, kubooga kw’enyanja n’okweyongera kw’obutagasi.”—“Flooding Chaos in Yellowstone, a Sign of Crises to Come,” The New York Times, Juuni 15, 2022.

Ebizibu ebirukuleetwa okusiisa eby’obuhangwa nibisobora kuhwaho? Obukiraaba nukwo kiri, nooha arabimaraho? Wetegereze Baibuli ekyerukugamba.

Kusiisikara kw’obuhangwa kukarangwa kara

Baibuli egamba ngu Ruhanga naija ‘kuhwerekereza abo abahwerekereza ensi.’ (Okusuku’rwa 11:18) Orukarra runu nirutwegesa ebintu bisatu:

1. 1. Abantu nibiija kukora ebintu ebirukusiisa muno ensi.

2. 2. Okusiisa ensi nikwija kuhwaho.

3. 3. Ruhanga wenka, nuwe arukwija kumaraho ebizibu ebiruga omu kusiisa eby’obuhangwa, hatali abantu.

Ensi yaitu niija kuba nungi omu kasumi ak’omu maiso

Baibuli egamba ngu ‘ensi ikaraho ebiro byona.’ (Omugambizi 1:4) Nahabweki niija kwikarwamuga ebiro byona.

• “Abahikiriire baligweta ensi, baragiikaramuga ebiro nebiro.”—Zabuli 37:29.

Ensi yoona niija kugarurwa buhyaka.

• “Irungu nensi eyomere birisemererwa; ibuga lirikyanganuka, liryakya ebyakyo.”—Isaya 35:1.