Kweyongera kw’Obwisi bw’Emundu omu Nsi—Baibuli n’Ekibazaaho Ki?

Omu kwezi kwa Julaayi 2022, omu biikaro bingi eby’ensi hakabayo obwisi bw’emundu oburukuhuniiriza:

• “Okwitwa kw’ow’eby’obulemi ruranganwa ow’omu Japan [ow’akaba ali Muhikirwa w’ihanga eri arukwetwa Shinzo Abe] kukatalibaniza ihanga eri kandi kwahuniiriza abantu baingi omu nsi, kukira muno nk’oku omu ihanga eri hatakira kubamu ebikorwa by’obucwi bw’ebiragiro eby’amaani kandi riine ebiragiro eby’amaani ebirukukwata ha kuba n’emundu.”—Julaayi 10, 2022, The Japan Times.

• “Abantu omu Denmark batiirwe ibumba kanwa omusaija owaine emundu obwataahire omu kyombeko nambere abantu bagenda kugura ebintu omu rubuga rwa Copenhagen kandi yaita abantu basatu.”—Julaayi 4, 2022, Reuters.

• “South Africa: Abantu 15 bafiire hanyuma y’abasaija abaine emundu kuteera amasasi omu bbara omu rubuga rwa Soweto.”—Julaayi 10, 2022, The Guardian.

• “Omu United States, abantu abarukuhingura omu 220 batiirwe amasasi baafa ha kujaguza ekiro kikuru ekibaireho ha wikendi eya Julaayi 4.”—Julaayi 5, 2022, CBS News.

Haroho okunihira ngu obutabanguko bwa mulingo gunu bulihwaho? Baibuli ekibazaaho ki?

Obutabanguko Bulihwaho

Akasumi akaturumu, Baibuli ekeeta “ebiro ebya hanyuma,” akasumi nambere abantu baakwetwaize omu mulingo gw’obukaali kandi omubi muno. (2 Timoseo 3:1, 3) Ebikorwa eby’obwisi nk’ebi biretera abantu kwikara nibatiina. (Luka 21:11) Baitu Baibuli n’eraganiza akasumi obutabanguko buliba buhoireho, ‘abantu baikale omu kiikaro eky’obusinge n’omu nju ezigumireho, n’omu bihuumuro ebiculiire.’ (Isaya 32:18) Obutabanguko bulihwaho buta?

Ruhanga aliihaho ababi kandi ahwerekereze eby’okurwanisa byona

• “Ababi balimarwa omu nsi.”—Enfumo 2:22.

• “[Ruhanga] amaraho obulemu okuhika ha mpero zensi; Acwa obuta, nasaramu habiri icumu; ayokya amagali omu murro.”—Zabuli 46:9.

Ruhanga naija kumaraho endugirro y’obutabanguko kuraba omu kwegesa abantu kuba b’obusinge.

• “Tiziriruma, kunu tiziriita ha rusozi rwange rwona orurukwera: baitu ensi eriijura okumanya [Yahwe], nkamaizi okugasweka enyanja.”—Isaya 11:9.

• Na kasumi kanu, Ruhanga aliyo nayegesa abantu omu nsi yoona kwetantara obwisi n’okukozesa eby’okurwanisa, kuraba omu kubeegesa ‘kuheesa empirima zaabu okuba nfuka, n’amacumu gaabu okuba ebisalizo.’—Mika 4:3.

Kumanya ebirukukiraho ha murago gwa Baibuli ogurukukwata ha nsi etarumu kutiina, soma ekicweka “Nikisoboka Kwikara omu Nsi Etarumu Ebirukututiinisa?”

Kumanya ebirukukiraho ha mulingo obutabanguko bulihweraho kimu, soma ekicweka “Halibaho Obusinge omu Nsi”