Abakristaayo Basemeriire Kwejumbira omu Bulemu?—Baibuli Ekibazaaho Ki?

Nk’oku kyeyolekere omu bulemu obuli omu Ukraine, abebembezi b’amadiini ag’Ekikristaayo baingi basagikire obulemu. Wetegereze omulingo abamu basagika orubaju orumu, n’omulingo abandi basagika orubaju orundi:

• “Nituhaisaniza kandi nitusiima muno abarwani baitu emanzi abarukurwanirra ihanga lyabo erya Ukraine hali omunyanzigwa . . . Nitwija kwikara nitubasagika kuruga ha mutima kandi nitubasabira.”—Metropolitan Epiphanius I owa Kyiv, bya The Jerusalem Post, Maaci 16, 2022.

• “Kiro kya Sande, omukuru w’ekanisa ey’aba Orthodox omu Russia akebembera misa ey’embaganiza ey’okusabira amahe ga Russia, nambere yabekambisiize kurwanirra ihanga lyabo ngu habwokuba ‘nubo bonka basobora’ kulirwanirra nk’oku orubuga rwa Moscow ruliyo nirugumizaamu na kampeini ey’okurwanisa Ukraine.”—Reuters, Apuli 3, 2022.

Abakristaayo basemeriire kwejumbira omu bulemu? Baibuli egamba ki?

Baibuli eky’egamba

Baibuli eyoleka ngu abahondezi ba Kristo ab’amananu tibejumbira omu bulemu.

• “Empirima yawe ogigarre omu kiikaro kyayo; baitu bona abakwata empirima balifa empirima.”—Matayo 26:52.

  Omuntu arukusagika obulemu rundi ow’arukubwejumbiramu mali naaba n’ayorobera ebigambo bya Yesu?

• “Ekiragiro ekihyaka nimbaha ngu mugonzanganege. Nukwo bona balimanya muli begeswa bange, obumurabaga nokugonzangana inywenka.”—Yohana 13:34, 35.

  Omuntu arukusagika obulemu, aba n’ayoleka okugonza Yesu okuyabalizeeho ngu kulyolekwa abahondezi be, rundi abegeswa be ab’amananu?

Kumanya ebirukukiraho, soma ekicweka “Obulemu n’Obukristaayo Nibikwatagana?”

Omulingo Abakristaayo baroramu obulemu kasumi kanu

Kihikire Abakristaayo kutejumbira omu bulemu kasumi kanu? Ego. Baibuli ekaranga ngu omu kasumi kaitu, akarukwetwa “ebiro ebya ha mpero,” hakubaireho abantu kuruga omu mahanga goona abarukuhondera enyegesa za Yesu ‘abatalyega obundi okurwana.’—Isaya 2:2, 4.

• Kumanya ebirukukiraho, soma ebicweka bya Watchtower hansi y’omutwe “Ruhanga Arora Ata Obulemu?”

Omu kasumi akatali ka hara, Yahwe,a “Ruhanga owobusinge,” naija kukozesa gavumenti ye ey’omu iguru kujuna abantu kuruga “omu kwenderezebwa nitima.”—Abafiripi 4:9; Zabuli 72:14.

• Kurora omulingo arakikora, rora vidiyo Obukama bwa Ruhanga Nikyo Kiki?