Ensi Kweyongera Kwokya—Baibuli Ekibazaaho Ki?

Omu Julaayi 2022, ebiikaro bingi kwetoroora ensi yoona bikahikwaho obutagasi obuhinguraine:

• “Abakuru omu ihanga lya China nibatererra abantu kwerinda habwokuba omu bibuga ebirukuhika 70, nihaija kubayo ekirro ekihinguraine habw’omurundi gwakabiri omu kwezi kunu.”—Julaayi 25, 2022, CNN Wire Service.

• “Omu Bulaaya, ebibira bingi nibyokebwa omurro, habw’ekirro ekihinguraine.”—Julaayi 17, 2022, The Guardian.

• “Kiro kya Sande, ebibuga bingi omu United States bikaba nibyokya muno kukira na kara kandi ekirro nikiija kuhika n’omu bicweka ebya ha mwaro ogwa buturukaizooba, omu masirimuka n’abugwaizooba.”—Julaayi 24, 2022, The New York Times.

Kinu nikimanyisa ki? Akasumi kalihika kibe kitakyasoboka kwikara omu nsi? Baibuli n’ekibazaaho ki?

Ensi kweyongera kwokya, nikihikiiriza obunabbi bwa Baibuli?

Ego. Ensi kweyongera kwokya nikikiranganiza n’ebintu Baibuli yarangire ngu biribaho omu kasumi akaturumu. Ekyokurorraho, Yesu akaranga ngu twakurozere ‘ebirukukanga,’ rundi “ebirukutiinisa.” (Luka 21:11; Good News Translation) Ekirro ekirukweyongera omu nsi yoona kiretiire abantu baingi kutiina ngu ensi niija kuhwerekerra.

Akasumi kalihika ensi ebe etakyaikarwamu?

Nangwa. Ruhanga akahanga ensi abantu bagiikalemu ebiro n’ebiro. (Zabuli 115:16; Omugambizi 1:4) Talireka abantu kugihwerekereza oihireho n’araganiza ngu naija ‘kuhwerekereza abo abahwerekereza ensi.’—Okusuku’rwa 11:18.

Wetegereze obunabbi obw’emiringo ebiri oburukwoleka ebintu ebindi Ruhanga ebyalikora omu nsi:

• “Irungu nensi eyomere birisemererwa; ibuga lirikyanganuka, liryakya ebyakyo.” (Isaya 35:1) Ruhanga talireka ensi kufooka irungu, oihireho aligarra buhyaka ebiikaro ebisiisirwe.

• “[Orolerra kurungi] ensi, noginagira enjura, ogitungisa itungo lingi.” (Zabuli 65:9) Ruhanga naija kufoora ensi orugonjo orurungi.

Kumanya ebirukukiraho ha mulingo enyikara y’obwire kweyongera kuhinduka kihikiiriza obunabbi bwa Baibuli, soma ekicweka “Empindahinduka y’Obwire n’Obusumi Bwaitu obw’Omu Maiso—Baibuli eky’Egamba.”

Kumanya ebirukukiraho ha murago gwa Baibuli ogw’okugarra buhyaka eby’obuhangwa, rora ekicweka “Nooha Alijuna Ensi?”