Obworukuba Oine Oburwaire obw’Amaani

Omukazi arukwetwa Linda ow’emyaka 71 nagamba ati: “Obunakimanyire ngu nyine ekookoro ey’ebihaha hamu n’ey’ebyenda, nkasisana oti rundi bancweriire ogw’okufa. Baitu obunatahire omuka, nkagamba nti, KALE, tikiri nikyo mbaire ninihira baitu nyine kutunga omulingo ogw’okukigumira.”

Omukazi ou barukwetwa Elise anyakwine emyaka 49 nagamba ati: “Nyine oburwaire obw’amaani obundetera kusaasa muno ha rubaju orw’emoso orw’amaiso gange. Obumu, obusaasi bunu bundetera oburwaire obw’okwenuuba. Emirundi enyingi mpurra amasu kandi ngonza n’okweyita.”

Omusaija omurwaire aikaliire omu kagaali k’abalema kandi ayetoroirwe abanyabuzaale be

OBWORAABA wakebiirwe wasangwamu oburwaire obw’amaani obutarukukira rundi babusangamu omuntu ow’orukugonza, omanyire nk’oku kirukutuntuza. Oihireho kutalibanizibwa oburwaire, otunga n’ebitekerezo bingi. Kutiina n’okwetuntura byeyongera habw’okwikara nogenda omu irwarro kutunga obujanjabi, kugumanganirwa kutunga obujanjabi rundi kusasurra emibazi hamu n’ebizibu ebiretwa emibazi ey’amaani ey’orukukozesa. Okweralikirra okw’otunga obworukuba oine oburwaire obw’amaani nikusobora kukuhinguranaho.

Ninkaha nambere tusobora kwiha obukonyezi? Baingi bakyetegeriize ngu okuhumuzibwa okw’amaani kuruga hali Ruhanga obubamusaba kandi bakasoma ebigambo ebirukuhumuza kuruga omu Baibuli. Ekintu ekindi ekisobora kutukonyera nubwo obusagiki obw’abanyabuzaale hamu n’enganjani zaitu.

EBIKONYIRE ABAMU KUGUMA

Robert ow’eine emyaka 58 nagamba ati: “Ikiririza omuli Ruhanga naija kukukonyera kugumira oburwaire bwawe. Saba Yahwe kandi omugambire nk’oku orukwehurra. Musabe akuhe omwoyo ogurukwera. Musabe akuhe amaani osobole kwikara oine okunihira, n’ogarramu abeka yaawe amaani kandi n’okugumira oburwaire bwawe.

Robert nayongera nagamba ngu: “Mali kikonyera muno eka yaawe obwekusagika kandi ekafaaho enyehurra yaawe. Buli kiro banywani bange kuruga omu biikaro ebirukwahukana banterra amasimu kumanya nk’oku ndi. Kinu kingarramu muno amaani, kindetera kwehurra kurungi kandi kinkonyera kutetamwa obwomeezi.”

Obworaaba ogenzere kurora omurwaire, wetegereze Linda ekyarukutwijukya: “Omurwaire nauwe nagonza kuba n’obwomeezi oburungi nk’obwawe, nahabweki tarukugonza buli kaire koona kwikara n’obazaaho oburwaire, nimusobora kubazaaho ebintu ebindi ebya buli kiro.”

Obukonyezi kuruga hali Ruhanga, Ekigambo kye, obusagiki kuruga omu banyabuzaale hamu n’abanywani, nibisobora kutukonyera kwikara nitukigumya ngu obwomeezi bwaitu bukyaine omugaso n’obuturaaba twine oburwaire obw’amaani.

Ebyahandiikirwe Ebisobora Kukukonyera

Wesige Ruhanga.

“Nkaserra Mukama, yangarukamu, yanjuna omu kutina kwange kwona. Omunaku onu akakunga, Mukama yamuhu’ra.”—Zabuli 34:4, 6.

Linda ou tusangirwe tubalizeeho nagamba ati: “Tinsaba Ruhanga kunkiza. Baitu nyikara nimusaba ampe amaani kandi ankonyere kugumira oburwaire bwange.”

Soma Ekigambo kya Ruhanga nukwo kikukonyere kuguma.

“Anyakuikarayo taligamba ati Ndi murwaire.”—Isaya 33:24.

Wecumitirizeeho ebintu Ruhanga araganiize kutukorra omu kasumi ak’omu maiso, kinu nikiija kukuha okunihira okurakukonyera kugumiisiriza.

Saba abanyabuzaale hamu n’abanywani baawe kukukonyera.

‘Enganjani negonza obusumi bwona, afooka mugenzi wawe ayazairwe habw’obujune.’—Enfumo 17:17.

Elise ou tusangirwege tubalizeeho nagamba: “Otecwaho abantu, ikiriza abanywani baawe bakukonyere. Haroho obwire nambere osobora kwehurra oli wenka kandi okatekereza ngu na Ruhanga tarukukuhurra, baitu eki tikisemeriire kukuletera kwecwaho abantu.”