Enyegesa za Baibuli​—Tizihwa ha Mulembe

TEKEREZAAHO KINU: Oliyo n’orambura eryahurro ery’ebintu ebyakara. Osanga ngu ebirukukira obwingi bikuzire kandi birumu ebihuru. Ebicweka by’ebintu ebimu bikacwekaho. Baitu kandi orora ekindi ekitaine kamogo koona, kiri nk’oku kyali kikozerwe. Hanyuma okaguza arukukurambuza oti: “Kinu kihyaka kukira ebindi byona?” Akugarukamu ati: “Nangwa, amananu gali, nikyo kirukukira obukuru ebindi byona kandi tibakakidabirazaaga.” Omukaguza oti: “Nikizooka mukakiriinda kurungi?” Arukukurambuza akugarukamu ati: “Nangwa, nikyo kikyakizireyo kuterwa enjura n’omuyaga kandi n’abantu balengereho kukisiisa.” Baitu hati, otandika kwekaguza, ‘Ekibumbe kinu kikakorwa omuli ki?’

Omulingo nugwo gumu, Baibuli nayo eri nk’ekibumbe ekibaziibweho ekitaine kamogo koona. Baibuli kitabu kyaira muno​—kukira ebindi byona. Baitu kandi, haroho n’ebitabu ebindi ebyaira. Nk’ebibumbe ebindi eby’asisikaire, ebitabu ebyahandiikirwe ira bikasiisikara hanyuma y’okumara obwire. Kandi n’ebintu ebirumu nk’ebirukukwata ha sayansi tibikyaikirizibwa omu kasumi kanu. Amagezi agali omu bitabu ebyo agarukukwata ha by’obujanjabi tigakyakonyera omu kasumi kanu kandi gakabi ha bwomeezi bw’abantu. Ebitabu ebirukukira obwingi ebyaira bikacweka kandi n’ebicweka byabyo ebindi byabura.

Baitu kandi Baibuli, y’embaganiza muno. Ekahandiikwa emyaka 3500 enyuma, baitu ebicweka byayo byona biroho. N’obukiraaba ngu balengereho kugihwerekereza emirundi nyingi​—kugyokya, kugitanga n’okugidibya​—obutumwa bwayo tibwine kamogo koona. Omu kiikaro ky’okuhwa ha mulembe habw’okumanya okuroho hati, Baibuli ebazaaho ebintu ebirukuhuniriza.​—Rora Akasanduuko “Ekahwa ha Mulembe Rundi Ehikire?”

EMIRINGO TURUKWETAAGA KASUMI KANU

N’osobora kwekaguza, ‘Enyegesa za Baibuli nizisobora kutukonyera kasumi kanu?’ Kusobora kugarukamu ekikaguzo kinu, banza oyekaguze: ‘Bizibu ki ebikizireyo kutalibaniza abantu kasumi kanu? Kandi nibiha ebirukukirayo kukutinisa?’ Tekerezaaho obulemu, kusiisa obuhangwa, obucwi bw’ebiragiro, hamu n’obulibwenguzi. Wetegereze hati emu ha misingi Baibuli erukwegesa. Obworaaba noyetegereza emisingi enu, wekaguze, ‘Abantu kakuba baali nibahondera emiringo enu, ensi tiyakubaire nungi?’

KUGONZA OBUSINGE

“Banyina omugisa abateraniza abantu omu businge: baitu abo balyetwa abana ba Ruhanga.” (Matayo 5:9) ‘Kiraba nikisoboka, muterane nobusinge nabantu bona.’​—Abarumi 12:18.

EMBABAZI N’OKUGANYIRA

“Banyina omugisa abembabazi; baitu abo baligirirwa embabazi.” (Matayo 5:7) “Mweyongere okugumisirizangana n’okuganyirangana obu haraaba haroho omuntu wena aine ensonga hali mutahi we. Nk’oku Yahwea yabaganyire nainywe nukwo mukole.”​—Abakolosai 3:13, NW.

OKUTASOROORA

Ruhanga “akakora okuruga hali omu amahanga gona agabantu okuikara hansi embaju zona.” (Engeso Ezabakwenda 17:26) “Ruhanga tasorora omu bantu; baitu, omu ihanga lyona lyona, anyakumutina nakora okuhikirra nuwe asiimwa.”​—Engeso Ezabakwenda 10:34, 35.

KUROLERRA KURUNGI ENSI

“[Yahwe] Ruhanga akatwara omuntu, yamuta omu rugonjo orwa Adeni okurulima nokurulinda.” (Okubanza 2:15) Ruhanga naija ‘kuhwerekereza abo abahwerekereza ensi.’​—Okusuku’rwa 11:18.

KUNOBA OMURURU HAMU N’OBUSIHANI

“Mwerindege okwegomba kwona: baitu obwomeezi bwomuntu tiriri itungolye eryayinalyo.” (Luka 12:15) “Obusihani nokutasemera kwona, nobukwakuba okwegomba, bitaligambwaho omulinywe, nkokukisemeriire abarukwera.”​—Abefeso 5:3.

OBWESIGWA N’OKUKORA N’AMAANI

“Nitugonza kuba besigwa omu byona.” (Abaheburaniya 13:18, NW ) “Omusuma aleke okuiba, baitu hakire atalibane nemikonoye nakora ebirungi.”​—Abefeso 4:28.

OBUKURU OBW’OKUKONYERA ABO ABALI OMU BWETAAGO

“Mwekambisege abobugara omu mutima, musagikege abatanyina amani, mugumisirizege bona.” (1 Abasesalonika 5:14) “[Murolerre] enfuzi nabafakati omu muhito gwabu.”​—Yakobo 1:27.

Baibuli tebazaaho emiringo enu kwonka baitu etwegesa n’omulingo tusobora kugita omu nkora omu bwomeezi bwaitu. Kakuba abantu abarukukira obwingi baali nibakorra ha nyegesa zinu, ensi tiyakubairemu ebizibu bingi. Mali, emisingi ya Baibuli y’omugaso muno hati, kukira obusumi obwakara! Baitu enyegesa za Baibuli, nizisobora kukukonyera zita omu kasumi kanu?

OMULINGO ENYEGESA ZA BAIBULI ZISOBORA KUKONYERA HATI

Omusaija owakaba n’akirrayo kimu amagezi akagamba: “Amagezi gaihwaho omusango obwemirimo yago.” (Matayo 11:19) Ago tigali mananu? Amagezi amarungi ogarorra hali ebi ebiba birugiremu obwoba ogahondiire. N’osobora kwekaguza, ‘Baibuli obweraaba eri y’omugaso, tesemeriire kunkonyera omu bwomeezi bwange? N’esobora eta kunkonyera omu bizibu ebi nyine hati?’ Tekerezaaho ekyokurorraho kinu.

Delphine,b akaba nahurra aine obwomeezi oburukusemeza kandi obw’ekigendererwa. Baitu kandi, akatunga ebizibu eby’amaani ebikaba bihonderaine. Muhara we akafa, amakage gaseseka, na sente zamuhwaho. Delphine nagamba ngu: “Nkaterwa ibumba kanwa habwokuba​—nkaba ntakyaine mwana, musaija, n’amaka. Nkehurra nkatakyaine mugaso​—n’obu kya kuba ekigendererwa kyona omu bwomeezi.”

Obu nubwo Delphine yagumize amananu g’ebigambo binu: “Ebiro ebyemyaka yaitu niyo myaka ensanju, rundi obwamani ehika emyaka kinana; baitu emyehembo yabu nukwo kutalibana nokutuntura kwonka; baitu ehwaho bwangu, naitwe tuhera.”​—Zabuli 90:10.

Delphine akatunga obukonyezi kuruga omu Baibuli omu bwire obw’akaba aine ebizibu. Obukonyezi obuyasangiremu bukamugasira muno. Ebicweka bisatu ebirahonderaho nibiija kutwoleka omulingo abantu abandi bagasiirwe, habw’okuhondera obuhabuzi kuruga omu Baibuli kusobora kujangurramu ebizibu byabo. Abantu banu bakigumize ngu Baibuli eri nk’ekibumbe ekibaziibwehoga ha kubanza. Baibuli tesisana n’ebitabu ebindi bingi ebikura kandi bikahwa ha mulembe. Tugambe ngu Baibuli ekakorwa omu kintu ekyembaganiza? Mali Baibuli kigambo kya Ruhanga rundi​—bitekerezo by’abantu kwonka?​—1 Abasesalonika 2:13.

Naiwe n’osobora kuba norora nk’oku obwomeezi buhwaho bwangu kandi burumu ebizibu bingi. Ebizibu obu bikuhinguranaho, nkaha nambere oiha kuhumuzibwa, obusagiki hamu n’obuhabuzi oburukwesigwa?

Katurole emiringo esatu enkuru erukwoleka omulingo Baibuli esobora kukugasira omu bwomeezi bwawe. N’esobora kukwegesa omulingo osobora

1. kweriinda ebizibu.

2. kumara ebizibu obu biraija.

3. kugumira enyikara ez’otasobora kuhindura.

Ebicweka ebirukwongeraho nibiija kusoborra emiringo enu esatu.