Kaŋ ɗiggi ɓo ti naw maa peel maaga bas de koɗ ga mono.

1. Wer mayse ga à wãã ga gorge maa ni Abraham hay ti ngeel ɓe là?

JEOFA hay wãã ne bar ɓe Abraham ga jar maa ti tamsir wo la ɓuy da’ wo bosa’ yaŋ wer ɓe (Tĩĩ. 15:5; 22:18). Wer maaga Abraham hay de hã ɓil kwũy ti Baa so mono, se hay go de bawge jag jiili ɓe ga fẽẽre maaga á wãã ra joŋ ge wo yaŋ cwãy. Koh de maaga kiŋgi Abraham hay go 100, lan ga kiŋgi wãy ɓe hay go 90 lay mono, saara hay bay de da’ mbarga wa ɗa (Tĩĩ. 21:​1-7). Amaa, Bible wãã ga: “Abraham raw hã ɓil ɓe go ne Baa, laa fer ɗiggi ɓe blam ga, gor desãy debaŋ. Blam sen á raw kolge diŋ pan wer jar ngaɓa debaŋ doo maga Baa hay wãã ne hẽn” ne no (Rom. 4:18). Naa de koge ɓuy ga fẽn maaga Abraham hay gorge ɓe bag jag go cwãy. Á kol pan mbarga maaga á hay gorn debaŋ mono. Wer mayse ga Abraham hay kaŋ ɗiggi ga Jeofa bag ge jag wããre ɓen yaŋ go là?

2. Wer mayse ga Abraham hay go de bawge jag jiili ɓe ga fẽẽre maaga se de gor ra ge do Baa bag wo jag yaŋ go cwãy là?

² Wer ga Abraham go de ko Jeofa de woore so mono, se hay go de bawge jag jiili ɓe cwãy ga wããre maaga Baa wãã ne se, á de kããge ma bag jag ɓe go (Rom. 4:21). Jeofa kee Abraham day se raw wããge ga á de deele wer hãge ɓil ɓe ti se (Jag 2:23). Doo maaga naa da’ ɓil Rom wo 4:18 ne mono, Abraham hay de hã ɓil lan de kaŋ ɗiggi ɓe ti naw maa peeln lay. Naa ko maaga Paul wãã ti kaŋge ɗiggi ti naw maa peel wo ɓil Rom wo 5 mo ɗa.

3. Pol naa wer gorgen ga hãylà?

³ Pol wãã ga naa mo hay go de bawge jag jilli naa ga: “Gorge desãy naan bas de koɗ ga” (Rom. 5:5). Á hay kay naa pa maa ko ɗeŋ maaga kaŋge ɗiggi naa ti naw maa peeln mo hay gẽẽ ciŋ ni mono. Doo maaga naa da’ ɓil Rom wo 5:​1-5 ne mono, ɗig ti re maa see ɓon ɗa lay. De joŋge doo sen ne kay, naa ko ge yaŋ de maaga naw go de hresge ga kaŋge ɗiggi naa ti naw maa peeln kol kwũy debaŋ. Hadge sen ngaɓ fẽn maaga naa joŋ maaga kaŋge ɗiggi naa ti naw maa peeln gẽẽ yaŋ ciŋ ni de daŋ maa patalan mono. Taŋgu ɗa, naa ko kaŋge ɗiggi maa de woore ti naw maa peeln ga Pol wãã ga bas ge de koɗ ga mo ɗa.

KAŊGE ƊIGGI NAA MAA DE WOORE TI NAW MAA PEEL NO.

4. Rom wo 5:​1, 2 wãã ne naa ti mayse wo là?

⁴ Jaŋ Rom wo 5:​1, 2. Pol hay yer wããre sen wo ne tayge maa Rom no. Hẽẽrebe sen hay laa wo wããre ti Jeofa wo de Yeso. Á hay hã wo ɓil ti ɓaara, lan saara kol go kretiyẽ. Baa kal ‘ ‘kee ra ge de deele wer hãge ɓil ɓaara” lan se raw sreŋ ra ge de nenterse ɓe maa bay ɗag no. Á hay wo gor poɗge maa de woore, day saara hay go de bawge jag jiili ɓaara ga saara da’ ne lay.

5. Kretiyẽ maa de sreŋge de nenterse wo de gor may laylà?

⁵ Pol yer ne kretiyẽ maa Efes wo blam ti fẽn maaga Baa de gor ra ge de ɓe ti naw maa peeln mono. Á hay da’ wo ‘ ‘fẽẽre ma de woore debaŋ [ga] Á wo de yoŋ ra ge ne jar ɓe maa bay ɗagn wo wo ciŋ mono” (Efe. 1:18). Day Pol ngaɓ ngeel maaga jar Kolos da’ wo poɗge maa ɓaaran ni ne hara lay. Á ɗen ga “fen maga le de gor nday le ciŋ” (Kol. 1:​4, 5). Krétiyẽ maaga wo de sreŋge de nenterse hay wo gorge diŋ tenen ɓaara maa tum wo ciŋ, ngeel maaga á lag ge wo wo tum ti joŋre ti jeŋ Yeso ni mono—1 Tes. 4:​13-17; Naa. 20:6.

6. Hẽnbe po de sreŋge de nenterse wãã ti fẽn maaga se de gorge ɓe ga hãylà?

⁶ Krétiyẽ maaga wo de sreŋge de nenterse wo de fruygi debaŋ maa woge ciŋ. Jobo maa po yoo ɓaara boŋ ga á ɗen ga Frederik Fraŋz, wãã go de jiili ɓe ɓuy ga: “Fẽn maaga wùr de gorge ɓe diŋ mopo maa cwãy, day se bag ge jag go nen wosela boŋ boŋ ɓuy yoo jar maa 144 000 ga wo ti tamsir la ɗa, nen maaga wosela ɓuy yoo jar maa me’ wo mo joŋ de fruygi.” Nen kiŋgi 1991 mono, blam maaga á joŋ joŋre go ne Jeofa de deele nen kiŋgi pur mono, hẽn naa Fraŋz wãã ga: “[Wùr] tum de fruygi debaŋ ti fẽn maaga wùr de gorge ɓe mono . . . . Wùr ya’ wer fruygi ti ɓe de peel ni de maaga wùr gor ne debaŋ mono. Day á diŋ mopo maaga à nen gorge ɓe, koh á mo a ba kiŋgi 1000 laybla’. Gorge sen de cõõre jag ɓi de daŋ maa ɓaan ɓuy.”

7-8. Fẽn maa hõn ga ndo hay gorge ɓe debaŋ ne? (Rom wo 8:​20, 21)

⁷ Daŋge jar maaga wo de goŋ Jeofa wara, ngeel lagge maa ɓaaran sara. Á diŋ tenen maa tum ti tamsir la—ga Abraham de gorge ɓe wer Twãywaŋ maa ni Baan mono (Heb. 11:​8-10, 13). Pol yer ti fẽn maa de woore maaga jar maaga lag ge wo gesiŋ la wo de gorge ɓe lay mono (Jaŋ Rom wo 8:​20, 21). De maaga ndo too laage taŋgu ti fẽẽre maaga Baa de ngaɓge ga se joŋ ra yaŋ ne naa mono, maa hõn co jag ɓo debaŋ yoo ɓaara là? Diŋ maaga wur po ndo joŋ go keɗed, ga ndo joŋ ɓlagge ga so mo yaw? Noga diŋ maaga ndo laa ga jar ɓo maaga wo go de húulí fer wo yaŋ go birgi tenen ti paradis gesiŋ la mono? Wer fẽẽre maaga Jeofa de kaŋ ra ge ne naa ciŋ mono, naa gor fẽẽre maa de woore wo ngaɓa debaŋ.

⁸ koh naa mo hay ba gor tenen maa tum wo ciŋ noga gesiŋ la laybla no, naa de gorge diŋ fẽn maa de woore debaŋ ga hã fruygi ne naa. Lan fẽn maaga naa de gorge ɓe kol nen naa diŋ cwãy. Fẽn maaga Pol yern peel la ngaɓ ne naa ga á joŋ ge na joŋge là. Naa ko wee maaga á yer ti kaŋge ɗiggi naa gorge mo ɗa. Wããre ɓen kay maa kaŋ ɗiggi ga fẽẽre maaga naa de gor ra ge joŋge yaŋ wo cwãy.

KAŊGE ƊIGGI NAA TI NAW MAA PEELN GẼẼ CIŊ NA GẼẼGE LÀ

9-10. Doo maaga saɓlaŋ Pol ngaɓ ne naa ne mono, Krétiyẽ mo hay gor wo diŋ maylà? (Rom wo 5:3) (Ko foton lay)

⁹ Jaŋ Rom wo 5:3. Pol wãã ga de maaga naa jo bon we no, fẽẽre maaga naa de gor ra ge wo peel kol wo diŋ cwãy. Maapo ga sen ngel naa. Cwãyn so diŋ ga, jar maa wer Yeson wo ɓuy yiŋgi wo yaŋ de bone. Naa ko wee saɓlaŋ Pol ɗa. Á wãã ne jar tesalonig wo ga: “De maaga wùr hay le see ɓay, wùr hay riŋ wee we go peel bol ga à joŋ ge bon wùr yaŋ, day joŋ mo kay diŋ se so” (1 Tes. 3:4). Lan se yer ne jar korente wo ga: “Hẽẽre wùr no, wùr daga nday mo hay go de ko ree bon maga wùr soɗn [mono]. . . Wùr hay bay de ɗiggi ga wùr joŋ yaŋ tenen ti’ wa so”—2 Kor. 1:8; 11:​23-27.   

¹⁰ Krétiyẽ maa waran wo de gor bon maa wer sar sar wo lay. (2 Tim. 3:12). Ndo lay, ndo hay yiŋ de bon de maaga ndo tĩĩ wer hã ɓil ti Yeso, lan maŋ glog ɓe mo yaw? Maapo ga bar ɓo wo de jar maa liŋ ni ɓay ɗar wo ndo. Maapo ga saara joŋ ndo de baywoore. Maapo ga jee maaga ndo joŋ joŋre ni ɓe noga kan ɓo maa ti ngeel joŋre joŋ bon ɓo werga ndo de deele (Heb. 13:18). Ngomna de joŋ bon ɓo werga ndo de sii wããre Baa yawlà? Ndo mo hay ba yiŋgi diŋ de bon maa hõnlà ɓuy, Pol wãã ga ndo mo hay de fruygi. Wer mayse là?

11. Wer mayse ga naa hay lag go ngiŋ maa soɗ re maaga daɗ wo naa ɓuy mo là?

¹¹ Naa joŋ de fruygi koh naa mo hay ba nen bon maa hõnlà, werga naa de koge ga á kay naa maa had joŋre maa de woore. Doo maaga Rom wo 5:3 wãã ga: “Joŋge bon hã ɗawge see ngiŋ ne naa”. Krétiyẽ wo ɓuy yiŋ wo de bone, day saara de hay ɗaw see ɓaara ngiŋ jag ɓe. Naa de hay go de bag jag see naa maa soɗ bon maa hõnlà ɓuy. Naa da’ fẽẽre maaga naa de gor ra ge, say diŋ ga naa soɗ bon maaga naa yiŋ de ɓaara mono. Naa bay de sãy joŋge doo jar maaga Yeso wãã ti ɓaara de maaga á maŋ saɓlaŋ mbeere mopo maaga laa go yoo je’ãy no wa. Á yãã wo wããren de fruygi taŋgu, amaa “re maa de gaali” da’ ra we no, saara men Baa go (Mat. 13:​5, 6, 20, 21). Naa go de koge ɓuy ga yiŋgi de bon bay diŋ mopo maa gus wa, lan bay de cõõre jag jobo wa pa. Amaa soɗge ɓe kay naa debaŋ. De ɗeŋ maa hõnlà?

12. De maaga naa soɗ re wo mono, naa da’ wer ɓe diŋ maylà?

¹² Jag wãã ti da’ge maaga naa da’ wer soɗge bon wo mono. Á yer ga: “Hay we go de pũygi nen maga lagge ngiŋn ɓay mo hay go ti ngel ɓe keɗede, mopo mo hay go de gwa’ge see ɓay wa hase” (Jag. 1:​2-4). Jag ngaɓ lagge ngiŋ doo mopo maaga de joŋre do maa joŋge nono. Joŋre maa hõn ga lagge ngiŋ nen joŋge ɓe là? Á kay mo maa gẽẽge ciŋ ti joŋre po wo doo gorge desãy, hãge ɓili, lan kaŋge ɗiggi ti Baa. Day, naa da’ fẽẽre maa de woore wo yaŋ debaŋ pa, hayga naa lag we ngiŋ jag ren wo no.

13-14. Naa da’ mayse wer soɗge gayrin wo là, day mayse tab ra de gorgen là? (Rom wo 5:4)

¹³ Jaŋ Rom wo 5:4. Pol wãã ga ɗawge see ngiŋ hãã ẽgre ne naa maaga naa mo hay go “de deele ti ngeel ɓe”. Naa yaŋ ɗaw see naa jag re wo no, naa co jag Jeofa. Sen bay da wããge ga á co jag Jeofa de maaga naa ti bon noga nen re mo wa. Diŋ ndo ga de cõõre jag Baa. Soɗge bon joŋ ga ndo mo co jag Jeofa. Sen diŋ bosa’ maa hõn de woore see ɓay mo hã’ ne!—Sin. 5:13.

¹⁴ Fer ba mbo ɗiggi ti bon maaga Abraham joŋ mo ɗa. De maaga á soɗn de fruygi mono, se co jag Jeofa debaŋ. Jeofa kon doo bar Ɓe, lan keen ga á diŋ jee maa de deele (Tĩĩ. 15:6; Rom. 4:​13, 22). Jeofa joŋ see naa na dosen ne lay. Bay diŋ werga naa joŋ joŋre debaŋ noga naa de joŋre do debaŋ ga naa joŋ de cõõre jag Jeofa wa. Naa co yaŋ jag Jeofa de maaga naa lag we de deele nen re wo no. Naa de kããge maa ooge ngiŋ, koh kiŋgi naa mo hay ba gãyla, naa mo hay ba nen re maa hõnla, noga de ẽgre gemãyla. Ndo patala de soɗ bon po ga ndo de oole de deele goŋ Jeofa yaw? Hayga yaŋ no, hay de coɓge wer ga ndo de cõõre jag Baa. De maaga naa ko ga naa de cõõre jag Jeofa mono, sen kay naa debaŋ. Fẽẽre maaga naa de gor ra ge kol wo go nen naa diŋ fẽẽre maaga joŋ ge wo yaŋ cwãy. Lan se coɓ naa maa gor naw maa peeln dewoore.

GORGE NAW MAA PEEL MAAGA DE ẼGRE

15. Pol wãã mayse maa tigriŋ pa là, day wer mayse ga á hãy ɗiggi jar là?

¹⁵ Pol wãã ga ɓil Jeofa joŋ go ne naa ti feh de maaga naa oo peel ɓe de deele, lan soɗ re maa de gayri wo lay mono. Ko maaga Pol wãã wo de peel ni mo ɗa pa: “de deele ti ngeel ɓen kaŋ wer naa kaŋ ɗiggi naa gorge desãy. Gorge desãy [naa] bas de koɗ ga” (Rom. 5:​4, 5). Sen ngel jar maa po wo. Wer maylà? Werga ɓil Rom wo 5:2 mono, Pol wãã ni ga krétiyẽ maa Rom hay wo gorge maa woge ciŋ, gorge maa “gragge go de togoɗge see Baa”. Wersen, jar maa po wii wo jag see ɓaara ga: ‘Hayga krétiyẽ sen hay wo we go de ko ngeel maaga saara de gorge ɓe no, wer mayse ga Pol fer wããge ti fẽn maaga á wo de gorge ɓe tigriŋ pa là ?’

16. Gorge fẽn po maa de el tõõ wer gẽẽge ne jobo ɓil na tõõge là? (Ko foto wo lay)

¹⁶ Naa laa wer fẽn maaga Pol wãã ti ɓe diŋ de maaga naa ko ga gorge diŋ mopo maaga gẽẽ ciŋ mono. Ko ba ɗa: Ndo mbo de ferge ɗiggi ti maaga ndo tõõ laage taŋgu ti fẽẽre maa de woore ɓil wããre Baa ga joŋ ge wo yaŋ mo yaw? Maapo ga ndo hay bay go de bawge jag jiili ɓo ga á joŋ yaŋ cwãy wa. Amaa, blam maaga ndo frug nen wããre Baa de woore mono, ndo kol ɗiggi ga joŋge ti tamsir la tenen tum diŋ mopo maaga joŋ ge yaŋ cwãy.

17. Gorge mopo maa de el ya’ wer gẽẽge ne ndo ɓil blam batem ɓo na ya’ge là?

¹⁷ Koh blam maaga ndo joŋ batem go laybla mono, ndo ya’ wer ko Jeofa, lan dage ɓe de peel ni. Blam ndo joŋ yaŋ go de bawge jag jiili ɓo ga fẽẽre maaga ndo de gor ra ge joŋ ge wo yaŋ cwãy (Heb. 5:13–6:1). Maapo ga ndo yaŋ go de yiŋgi de re maaga naa da’ ɓil Rom wo 5:​2-4 mono. Re hay da’ wo ndo wer ngaɓa, amaa ndo soɗ ra ɓuy, lan ndo hay ko do Jeofa see ɓo. Werga ndo de koge ga ndo de cõõre jag Baa so mono, ɓil ɓo raw joŋge go patala feh maa gor fẽẽre maaga á wãã ga se joŋ ra yaŋ mono. Á kol diŋ cwãy nen ɓo. Sen du’ jiili ɓo debaŋ. Ti ngeel maa po, se coo fẽẽre ngaɓa nen naw ɓo, lan ɗeŋ maaga á coo joŋre ɓo see jar maa liŋ ni ɓay wo, ɗeŋ maaga ndo maŋ ɗiggi, lan ɗeŋ maaga ndo joŋ joŋre de wur maa do ɓon mono.

18. Bawge jag jiili maa hõn ga Jeofa hãn là?

¹⁸ Apotre Pol wãã mopo de woore debaŋ ti fẽẽre maaga ndo hay go gor ra ge de woore blam maaga ndo kol de cõõre jag Baa mono. Á hã bawge go ne ndo jag jiili ga fẽẽre maaga ndo de gor ra ge bag ge wo jag yaŋ go cwãy. Wer mayse ga ndo mo hay go de bawge jag jiili ɓo là? Pol ɓo’ nen ɗawge se maa ni Baan go ne krétiyẽ wo ga: “Gorge desãy naa bas de koɗ ga, werga nenterse ɓe maaga á hãn ne naa go de baa ɓil naa go de dage maa ni Baa no” (Rom. 5:5). Á mbe ti ngeel ɓe ti maaga nday go de bawge jag jiili ɓay ti gorge—fẽẽre maaga nday de gor ra ge mono.

19. Ti mayse ga nday hay joŋ go de bawge ti gorge ɓayn là?

¹⁹ Ɗig ti fẽn maaga Jeofa wãã ga se joŋ ne Abraham mono, ti ɗeŋ maaga Baa hay ɓo’ nen ne hẽn ga á de cõõre jag se, lan de koge ɓe doo bar ɓe ne mono. Abraham hay bay gorge diŋ ngeel de koɗ wa. Bible wãã ga: “Abraham raw hayge gor re sen mbe desãy ngiŋi, wer sen á raw da’ fen maaga Baa hay riŋ ti ɓe mono” (Heb. 6:15; 11:​9, 18; Rom. 4:​20-22). Sen go tinoo tu ga á hay bas de koɗ ga. Hay go de bawge jag jiili ɓo lay ga ndo oo we de deele lay no, ndo da’ge fẽẽre maaga ndo de gor ra ge yaŋ lay. Fẽẽre maaga ndo de gor ra ge joŋ wo yaŋ cwãy; á wo diŋ fẽẽre maaga hã wo fruygi, basge de koɗ bay ni wa (Rom. 12:12)! Pol hay yer ga : “Daga Baa maa ni jar gor do ɓen mo bag ɓil ɓay go de fruygi, mo hã jam ne nday ti hãge ɓil ɓay ne hẽn no, nen maaga nday mo hay de lagge gor Kris de ẽgre Nenterse ma bay ɗag no”—Rom. 15:13.