Kasi Caru Cose Cingaŵa Cakukolerana?

KASI uko caru cithu cikulazga kuli mtende panji citimbaheti? Vikuwoneka kuti cingazakaŵa pa mtende panji citimbaheti.

Mwakupambanako, ŵalongozgi ŵanji ŵa caru ŵakuyowoya na mtima wose kuti caru cose cingaŵa pa mtende. Panji ŵakuyowoya nthena cifukwa ca kopa kuti usange ŵangaleka kuyowoya nthena, mbwenu pa caru pangaŵa kawemi yayi. Ndipouli, ŵanandi ŵakopa para ŵajifumba kuti: Kasi ni vyaru wuli ivyo vili na vilwero vyakofya? Kasi ŵavigwiliskirenge nchito? Kasi cingacitika nchivici usange ŵangavigwiliskira nchito?

Mdauko ukulongora kuti mphindano na kusankhana mitundu ndivyo vyapangiska ŵanthu kuleka kukolerana, ndipo m’malo mwakuti cisopa cimazge mikhaliro iyi, kanandi ndico cikusonkhezga moto. James A. Haught, uyo ni mutolamakani, wakalemba kuti: “Cinthu cilicose ico cikucitiska ŵanthu kugaŵikana cingacitiskaso kutinkhana, ndipo cisopa nchimoza mwa vinthu ivyo vyacitiska comene kuti ŵanthu ŵagaŵikane. Nangauli ŵanandi ŵakugomezga kuti cisopa cikovwira ŵanthu kuŵa ŵawemi, kweni nchakuwonekerathu kuti cikucitiska ŵanji kucita vinthu viheni comene.” Mulembi Steven Weinberg nayo wakuwona mwakuyana waka. Wakuti: “Ŵanthu ŵawemi ŵangacitira ŵanyawo viheni pekha para ŵagaŵikana cifukwa ca cisopa.”

Kasi pali cigomezgo cakuti caru cithu cizamuŵa cakukolerana? Enya. Kweni nga umo tiwonerenge, mbanthu yayi awo ŵangacitiska kuti ici cicitike, nesi visopa.

[Mazgu Ghakukhozgera pa peji 3]

Kasi caru cili nga ni bomba ilo liri pafupi kuphuntha?