LAYIBULARE YA PA INTANETI ya Watchtower
Watchtower
LAYIBULARE YA PA INTANETI
Chitumbuka
  • BAIBOLO
  • MABUKU
  • MAUNGANO
  • w08 1/1 pp. 4-5
  • Ŵanthu Ŵanandi Ŵakulomba Cinthu Cimoza pa Caru Cose

Vidiyo palije.

Phepani, pali suzgo linyake.

  • Ŵanthu Ŵanandi Ŵakulomba Cinthu Cimoza pa Caru Cose
  • Gongwe la Mulinda Likupharazga Ufumu wa Yehova—2008
  • Mitu Yichoko
  • Nkhani Zakuyanako na Iyi
  • Ŵanthu Awo Mbavisopa Ivyo Ni Vyacikhristu Yayi Nawo Ŵakulomba
  • Kasi Mukuchita Ivyo Yesu Wakayowoya?—Chigaŵa 1
    Gongwe la Mulinda Likupharazga Ufumu wa Yehova—2015
  • “Fumu, Mutisambizge Kuromba”
    Gongwe la Mulinda Likupharazga Ufumu wa Yehova—2004
  • “Ufumu Winu Wize”—Ŵanthu Ŵanandi Ŵakulomba Lurombo Ulu
    Gongwe la Mulinda Likupharazga Ufumu wa Yehova (Lakugaŵira)—2020
  • Kasi Malurombo Ghinu Ghakukolerana na Ivyo Yesu Wakayowoya?
    Gongwe la Mulinda Likupharazga Ufumu wa Yehova—2009
Wonani Vinyake
Gongwe la Mulinda Likupharazga Ufumu wa Yehova—2008
w08 1/1 pp. 4-5

Ŵanthu Ŵanandi Ŵakulomba Cinthu Cimoza pa Caru Cose

YELEZGERANI kuti ŵanthu ŵakujumpha 2 biliyoni ŵakulomba cinthu cimoza. Wose ŵakulomba munthu wa mazaza pa cilengiwa cose kuti waŵape cinthu cinyake. Ndipouli, mbanthu ŵacoko comene mwa ŵanthu aŵa, awo ŵakumanya makora cinthu ico ŵakulomba. Kasi ivi vingacitika nadi nthena? Enya vingacitika, nakuti ndivyo vikucitika zuŵa lililose. Kasi ŵanthu wose aŵa ŵakulomba vici? Ŵanthu wose aŵa ŵakulomba kuti Ufumu wa Ciuta wize.

Mwakuyana na umo ŵanthu ŵanyake ŵakasandira, pali visopa pafupifupi 37, 000 ivyo vikuti ni Vyacikhristu, ndiposo vikugomezga kuti Yesu ni Mulongozgi wawo. Pali ŵanthu ŵakujumpha 2 biliyoni awo ŵali mu visopa ivi. Ŵanandi mwa ŵanthu aŵa ŵakulomba Lurombo lwa Fumu. Kasi mukulumanya lurombo ulu? Nga ni umo Yesu wakasambizgira ŵalondezgi ŵake, lurombo ulu lukwamba na mazgu ghakuti: “Ŵadada ŵithu mwa ŵa kucanya, litumbikike zina linu. Ufumu winu wize. Khumbo linu licitike pano pasi, nga nkhucanya.”—Mateyu 6:9, 10.

Kwa vilimika vinandi comene, ŵanthu awo ŵakusopa ŵakuyowoya mazgu agha para ŵakulomba mu machalichi ghawo. Ŵakusunga pamtima mazgu agha na kughayowoya para ŵali na mbumba zawo ndiposo para ŵali ŵekha. Ŵakughayowoyaso para ŵali pa mtende ndiposo para ŵakumana na masuzgo. Ŵakuyowoya mazgu agha na mtima wose ndipo ŵakukhwaskika nagho comene. Kweniso ŵanthu ŵanandi ŵakusunga waka pamtima mazgu agha na kughayowoya kwambura kumanya ng’anamuro lake. Ni ŵanthu awo ŵali mu visopa Vyacikhristu pera yayi awo ŵakulindizga ndiposo kulomba Ufumu wa Ciuta.

Ŵanthu Awo Mbavisopa Ivyo Ni Vyacikhristu Yayi Nawo Ŵakulomba

Pali lurombo lwakumanyikwa comene lwa cisopa ca Ŵayuda ulo ŵakulomba zuŵa lililose mu sunagoge, panji pa nyifwa ya ŵabali ŵawo. Nangauli mu lurombo ulu ŵakuzunura yayi vya nyifwa panji citima, kweni kanandi ŵakuluyowoya pa nyifwa. Lurombo ulu lukuti: “Mphanyi [Ciuta] wakhazikiska Ufumu wake mu nyengo ya umoyo winu, . . . ndiposo mwaluŵiro.”a Lurombo lunyake lwakale ulo ŵakalombanga mu sunagoge lukuyowoya za cilindizga ca Ufumu wakuwusika na Mesiya kufuma mu mphapu ya Davide.

Ŵanji awo ŵali mu visopa ivyo ni Vyacikhristu yayi ŵawona kuti nkhani ya Ufumu wa Ciuta njakukondweska comene. Mwakuyana na nyuzipepara ya The Times of India, mulongozgi wa cisopa wakumanyikwa comene wa mu vilimika vya m’ma 1800, wakakhumbanga kumanya kuyana kwa vigomezgo vya Cihindu, Cisilamu na Cikhristu. Iyo wakati: “Ŵanthu ŵangamanya unenesko wakukhwaskana na Ufumu wa Ciuta pekha para vyaru vya kuzambwe na kumafumiro gha dazi vyakolerana.” Mulara wa pa koleji ya Cisilamu ku Strathfield, mu caru ca Australia, sonosono apa wakalemba mu nyuzipepara kuti: “Mwakuyana na Ŵasilamu wose, nane nkhugomezga kuti Yesu wizenge na kuzakakhazikiska Ufumu weneco wa Ciuta.”

Mwambura kukayika, awo ŵakulindizga ndiposo kulomba Ufumu wa Ciuta ni ŵanthu ŵanandi comene. Kweni ghanaghanirani fundo iyi.

Mukwenera kuti mukumanya kuti ise Ŵakaboni ŵa Yehova, ndise tikusindikizga magazini iyi. Tikwenda nyumba na nyumba mu cigaŵa cinu kuti tidumbiskane na ŵanthu Baibolo. Tikucita mulimo uwu pa caru cose mu vyaru vyakukwana 236, ndiposo mu viyowoyero vyakujumpha 400. Fundo yikuru ya upharazgi withu ni Ufumu wa Ciuta. Wonani kuti mutu ukuru wa magazini iyi ngwakuti, Gongwe la Mulinda Likupharazga Ufumu wa Yehova. Kanandi tikufumba ŵanthu usange ŵakulomba Ufumu uwu. Ŵanandi ŵakuzgora kuti ŵakulomba Ufumu uwu. Ndipouli, para tikuŵafumba kuti Ufumu uwu ni vici, ŵanandi ŵakuzgora kuti, “Nkhumanya yayi.” Nyengo zinyake zgoro lawo likupulikikwa makora yayi.

Cifukwa wuli ŵanthu ŵanandi ŵakulomba cinthu ico ŵakucimanya yayi? Kasi nchifukwa cakuti Ufumu wa Ciuta tingaupulikiska makora yayi? Ndimo viliri yayi. Ufumu uwu uli kulongosoreka mwakupulikikwa makora comene mu Baibolo. Kusazgirapo apa, uthenga uwo uli mu Baibolo wakukhwaskana na Ufumu ungamupani cilindizga ciwemi mu mazuŵa gha masuzgo agha. Mu nkhani yakulondezgapo, tizamuwona umo Baibolo likulongosolera cilindizga ici. Tizamuwonaso umo lurombo lwa Yesu lwakukhwaskana na Ufumu luzamuzgolekera.

[Mazgu ghamusi]

a Nga ni umo luliri lurombo lwa Fumu, lurombo lwa Ŵayuda nalo lukuyowoya za kutuŵiskika kwa zina la Ciuta. Kwali lurombo lwa Ŵayuda lukambika mu nyengo ya Khristu, panji pambere wandize, kweni tileke kuzizwa kuti lurombo ulu lukuyana na lurombo lwa Fumu. Lurombo lwa Yesu lukaŵa lwacilendo yayi. Cilicose ico cikuzunulika mu lurombo ulu cikalembeka mu Malemba agho ghakaŵako mu nyengo ya Ŵayuda. Yesu wakaciskanga Ŵayuda kuti ŵalombenge vinthu ivyo iwo ŵakalombanga kale pambere iyo wandize pa caru capasi.

    Mabuku gha Chitumbuka (1982-2023)
    Fumani
    Njirani
    • Chitumbuka
    • Tumizgani
    • Ivyo Mukukhumba
    • Copyright © 2025 Watch Tower Bible and Tract Society of Pennsylvania
    • Malango
    • Phangano
    • Privacy Settings
    • JW.ORG
    • Njirani
    Tumizgani