Cifukwa Wuli Pali Nthimbanizgo Yakukhwaskana na Mzimu Utuŵa?

KASI mzimu utuŵa ni vici? Fumbo ili lingawoneka nga ndipusu waka, kweni kusanga zgoro lipusu kungaŵa kwakusuzga. Papa Benedict XVI wakaphalira wumba ku Australia kuti: ‘Nchakusuzga comene kuti tipulikiske Mzimu utuŵa.’

Ŵanthu ŵali na maghanoghano ghakupambanapambana pa nkhani ya mzimu utuŵa. Zgoro ŵakulimanya makora yayi para ŵangafumbika kuti, Kasi mzimu utuŵa ni vici? Ŵanji ŵakuti:

• Mzimu utuŵa ni munthu uyo wakuŵa mukati mwa ŵasambiri ŵa Khristu.

• Mzimu utuŵa ni milimo ya Ciuta mu caru.

• Mzimu utuŵa njumoza wa ŵaciuta ŵatatu.

Cifukwa wuli pali nthimbanizgo yanthena? Ŵanthu ŵakamba kutimbanizgika mu vilimika vya m’ma 300 C.E. apo ŵakusanda vya ciuta ŵanji ŵakayowoya kuti mzimu utuŵa ni munthu uyo wakuyana na Ciuta. Ndipouli, Baibolo likusambizga nthena yayi. Ŵalondezgi ŵakwambilira ŵa Khristu nawo ŵandasambizgepo fundo iyi. Buku linyake likulongosora kuti: ‘Testamente la Kale likulongora makora kuti mzimu wa Ciuta ni munthu yayi, ni nkhongono ya Ciuta.’ Buku ili likutiso: ‘Malemba ghanandi gha mu Testamente la Sono ghakulongora kuti mzimu wa Ciuta ni munthu yayi, fundo iyi yikuwoneka para tikuyaniska mzimu na nkhongono ya Ciuta.’—New Catholic Encyclopedia.

Nchakusuzga comene kuti ŵanthu ŵaghanaghane kuti nkhongono ni munthu. Nakuti kusanda uko kwacitika sonosono apa ku United States kwalongora kuti ŵanthu ŵanandi ŵakususka kuti mzimu utuŵa ni munthu panji ‘cinthu cinyake camoyo.’ Kasi ŵakuneneska? Kasi tikwenera kugomezga ivyo ŵakusanda vya ciuta ŵakukosera kuti ‘Mzimu Utuŵa ni Munthu payekha padera pa Dada na Mwana’?

Kuti tisange zgoro leneko, tikwenera kupenja mu Baibolo, cifukwa ndilo likulongosora makora mzimu utuŵa. Mpositole Paulosi wakalemba kuti: “Malemba ghose ngakupelekeka na Ciuta mwa mzimu ndipo ngacandulo pa kusambizga, kucenya, kunyoloska vinthu, na kulanga mu urunji.”—2 Timote 3:16.

Cifukwa wuli mukwenera kumanya unenesko wakukhwaskana na mzimu utuŵa? Kumanya unenesko kungamupangiskani kuti mupokere wovwiri kwa Ciuta. Kasi nyengo zinyake mukuwona kuti mulije nkhongono zakuzizipizgira vinthu vinyake? Yesu wakalayizga ŵasambiri ŵake kuti: “Lutilirani kupenja, ndipo musangenge . . . Usange imwe . . . mukumanya kupeleka vyawanangwa viwemi ku ŵana ŵinu, ipo comene kwakuluska Ŵadada ŵakucanya ŵapelekenge mzimu utuŵa ku awo ŵakuŵalomba!”—Luka 11:9, 13.

Mu nkhani zakulondezgapo, Malemba ghativumbulirenge ng’anamuro la mzimu utuŵa. Tiwonengeso umo mzimu utuŵa ungatovwilira.

[Mazgu Ghakukhozgera pa peji 3]

Malemba ghakutivumbulira ng’anamuro la mzimu utuŵa