Upharazgi Wakunozgeka Makora Ukupambika Vipambi

María Isabel ni mupharazgi wamwamphu muwukirano mu msumba wa San Bernardo mu caru ca Chile ico cili ku South America. Iyo na ŵamumbumba yakwake mba mtundu wa Mapuche. Mbumba yose yawovwira mwamwamphu kuti paŵe mpingo uphya wa ciyowoyero ca Mapuche, ico cikucemekaso kuti Cimapudunguni.

Apo ŵakapharazga kuti Cikumbusko ca nyifwa ya Khristu cicitikengeso mu ciyowoyero ca Mapudunguni ndiposo mathirakiti 2,000 ghakucemera ŵanthu ku Cikumbusko mu ciyowoyero ici ghakaŵapo kuti ghagaŵike, vikapangiska kuti María Isabel waghanaghanirepo. Kasi wakacita vici kuti wawovwirepo? Wakakumbuka vyakucitika mu uteŵeti vya Ŵakaboni ŵanyake ŵawukirano awo ŵakatumbikika apo ŵakapharazgiranga ŵanyawo ŵa ku sukulu ndiposo ŵasambizgi. Wakadumbiskana na ŵapapi ŵake cilato cake, ndipo wose pamoza ŵakati María Isabel wayezge kughanaghanirapo umo wangakagaŵilira tumapepara twakucemera ŵanthu ku Cikumbusko, ku sukulu. Kasi wakacita wuli?

Cakwamba, María Isabel wakafumba awo ŵakulaŵilira sukulu kuti ŵamuzomerezge kuŵika kapepara pa geti likuru la sukulu. Ŵakamuzomerezga ndipo ŵakamulumba cifukwa ca kucita nthena. Zuŵa linyake mulenji, msambizgi mulara wa pa sukulu iyi wakapharazga pa vyakukuzgira mazgu vya nchemo ya ku Cikumbusko iyi.

Kufuma apo, María Isabel wakapempha kuti wendere makilasi ghose. Ŵasambizgi ŵakati ŵamuzomerezga, wakafumba ŵana ŵa sukulu mu kilasi lililose usange ŵakaŵapo ŵa mtundu wa Mapuche. Iyo wakati: “Nkhaghanaghananga kuti panji paŵenge ŵana ŵa sukulu 10 panji 15 ŵa mbumba za Mapuche pa sukulu yose, kweni pakaŵa ŵanandi, ndipo nkhagaŵira tumapepara 150.”

“WAKAKHAZGANGA KUWONA MUNTHU MULARA”

Mwanakazi munyake wakati wawona kapepara kakucemera ŵanthu ku Cikumbusko pa geti la sukulu, wakafumba vya uyo wangamufumba vya ungano uwu. Ghanaghanirani waka umo wakazizwira apo ŵakamulongozgera kwa msungwana wa vyaka 10. Uku wakumwemwetera, María Isabel wakayowoya kuti: “Mwanakazi uyu wakakhazganga kuwona munthu mulara.” Wakati wamupa kapepara na kumulongosolera mwakudumura, María Isabel wakamufumba mwanakazi uyu adiresi yake mwakuti iyo na ŵapapi ŵake ŵalute ku nyumba yake kuti ŵakamuphalire vinandi vyakukhwaskana na Ufumu wa Ciuta. Ŵapharazgi 20 awo ŵakuteŵetera mu cigaŵa ico ŵakuyowoya Cimapudunguni, ŵakakondwa comene kuwona mwanakazi uyu pamoza na ŵakunweka 26 ŵa mtundu wa Mapuche awo ŵakiza pa Cikumbusko. Pasono gulu ili ni mpingo ukuru.

Kwali muli ŵa msinkhu wuli, kasi mwalekeraci kuti namwe mucite nthena pakucema awo mukusambira nawo sukulu panji awo mukugwira nawo nchito kuti ŵize ku Cikumbusko, ku nkhani yacisanisani, panji ku ungano wa cigaŵa? Mwalekeraci kuti mupenjerezge mu mabuku ghithu vyakucitika ivyo vingamovwirani kuti mumanye umo mungacitira makora mulimo uwu? Kweniso, lombani mzimu utuŵa wa Yehova kuti umovwirani kuti muŵe na cikanga pakuyowoya vya iyo. (Luka 11:13) Usange mucitenge nthena, namwe mukondwenge comene ndiposo mukhozgekenge na viwemi ivyo viŵengepo cifukwa ca kunozgekera makora.