Kasi Visopa Vikucita Wuli pa Nkhani ya Ndalama?

Nyengo zose Esiterea wakalutanga ku chalichi pamoza na ŵana ŵake 7. Iyo wakati: “Nkhaphalira mulongozgi kuti nkhakhumbanga kusambira Baibolo.” Kweni wakakhumba yayi kuti wamusambizge. Paumaliro Esitere wakaleka kuluta ku chalichi. Iyo wakayowoyaso kuti: “Ŵalara ŵa chalichi ŵakanilembera kalata ndipo ŵakati para nakhala ku chalichi, nitumenge waka ndalama. Nkhamba kuwona kuti, ‘Nanga ningakhala ku chalichi ŵakaŵavya navyo nchito, iwo ŵakakhumbanga waka ndalama zane.’”

Angelina uyo waŵa mu cisopa kwa nyengo yitali wakati: “Ku chalichi kwithu ŵakendeskanga basiketi katatu pa nyengo ya kusopa, ndipo ŵakakhumbanga kuti nyengo yiliyose tiponyengemo ndalama. Ŵakakhaliranga waka kupempha ndalama. NKhawona kuti ŵanthu aŵa wakulongozgeka na Ciuta yayi.’”

Kasi visopa ivyo vili mu cigaŵa cinu vikucicizga ŵanthu kuti ŵapelekenge ndalama? Kasi kacitiro aka kakukolerana na ivyo Baibolo likuyowoya?

KASI BAIBOLO LIKUSAMBIZGACI?

Yesu, uyo wakambiska Cikhristu wakati: “Mukapokera kwawanangwa, pelekani kwawanangwa.” (Mateyu 10:8) Uthenga wakuzirwa wa mu Baibolo ngwakugura na ndalama yayi ndipo ukwenera kufikira ŵanthu wose awo ŵakuwukhumba.

Kasi Ŵakhristu ŵakwambilira ŵakasanganga wuli ndalama zakovwilira mpingo?

Waliyose wakapelekanga “umo wadumulira mu mtima wake, mwakukwenyelera cara panji mwakucicizgika, cifukwa Ciuta wakutemwa uyo wakupeleka mwakukondwa.” (2 Ŵakorinte 9:7) Mpositole Paulosi wakati: “Pakugwira nchito usiku na muhanya, mwakuti tileke kuŵika mphingo yikuru pa yumoza wa imwe, tikapharazga makani ghawemi gha Ciuta kwa imwe.” (1 Ŵatesalonika 2:9) Paulosi wakagwiranga nchito yakusona mahema kuti wajiwovwirenge pakucita mulimo wa kupharazga.—Milimo 18:2, 3.

KASI ŴAKABONI ŴA YEHOVA ŴAKUCITA WULI?

Kanandi Ŵakaboni ŵa Yehova ŵakucitira maungano ghawo mu Nyumba za Ufumu. Kasi ndalama ŵakuzisanga nkhu? Ŵakwendeska mbale yayi nesi kupeleka manevulupu kuti ŵanthu ŵaŵikengemo vyakupeleka. M’malo mwake, pa Nyumba ya Ufumu pakuŵa bokosi la vyakupeleka ndipo waliyose uyo wakukhumba kuwonga vinthu vyauzimu wangaŵikamo mwacisisi cawanangwa cake.

Pakupurinta na kutumizga magazini pakuluta ndalama zinandi. Ndipouli, muzamuŵapulikapo yayi kuti ŵakupempheska ndalama. Cilato cawo cikuru nkhupharazga unenesko wa mu Baibolo.

Mukuwona wuli, kasi nthowa yakusangira ndalama iyi, yikukolerana yayi na mazgu gha Yesu kweniso ivyo Ŵakhristu ŵakwambilira ŵakacitanga?