“Ghanaghana Makora na Mendero gha Malundi Ghako” Kuti Ucite Makora

APO ŵanthu ŵa Ciuta ŵakafumanga ku Babuloni kuya ku Yerusalemu mu 537 B.C.E., Yehova wakaŵalongozganga nthowa. Wakaŵaphalira kuti: “Nozgani nthowa ya ŵanthu; undilirani, undilirani gurwe, wuskanipo malibwe.” (Yes. 62:10) Ghanaghanirani umo Ŵayuda ŵanyake ŵakeneranga kucitira pakupulikira languro ili. Ŵakadangirako kuti ŵakanozge nthowa, panji kuwunda mabuwu na kuwuskamo malibwe. Ivi vikwenera kuti vikawovwira ŵabali ŵawo awo ŵakizanga mumanyuma kuti ŵende makora pakuluta ku caru cawo.

Ntheura pera, ivyo tikucita pakufiska vilato vithu vyauzimu tingaviyaniska na kwenda pa nthowa. Yehova wakukhumba kuti ŵateŵeti ŵake wose ŵendenge mu nthowa iyi kwambura vyakujandizga. Mazgu ghake ghakuticiska kuti: “Ghanaghana makora na mendero gha malundi ghako [‘Skesketezgera nthowa malundi ghako,’ NW]; ndipo kwenda kose kwako tikuŵenge kwakunyoloka.” (Zinth. 4:26) Kwali ndimwe muwukirano panji yayi, ulongozgi uwu ungamovwirani.

SANKHANI VINTHU MWAMAHARA KUTI MUNOZGE NTHOWA

Baibolo likuti: “Ucindami wa ŵapungwe ndi nkhongono zawo.” (Zinth. 20:29) Ŵawukirano ŵanandi ŵali na nkhongono, mahara, ndiposo khumbo lakuti ŵacite makora pa umoyo wawo. Kanandi ŵalaraŵalara ŵakuwona kuti ŵawukirano ŵali na maluso ndipo ŵakukhumba kuti ŵawukirano ŵacite vinandi. Muwukirano uyo wakugwiliskira nchito maluso na nkhongono zake pakuteŵetera Yehova, wangafiska vilato vyauzimu na kusanga cimwemwe ceneko.

Ndipouli, caru cikuwona kuti maluso gha ŵawukirano ŵithu ngakuzirwa comene. Para muwukirano uyo ni Kaboni wakucita makora mu kilasi, ŵasambizgi, mwana munyake wa sukulu, panji ŵanthu ŵanyake, ŵangamucicizga kuti wasambire masambiro ghapacanya kuti vinthu vimwendere makora mu mgonezi uwu. Panyake para mubali panji mudumbu muwukirano wali na maluso pa vyamaseŵero, ŵanji ŵangamunyengelera kuti wazakagwirenge nchito iyi. Kasi namwe ivi vili kumucitikiranipo, panji mukumanyapo munyake uyo vili kumucitikirapo? Kasi nchivici ico cingawovwira Mkhristu kuti wasankhe vinthu mwavinjeru?

Ivyo Baibolo likusambizga vingatovwira kuti tende pa nthowa yiwemi. Lemba la Mupharazgi 12:1 likuti: “Kumbuka Mlengi wako mu mazuŵa gha uphya wako.” Kasi imwe panji muwukirano, ‘mungakumbuka wuli Mlengi winu’?

Ghanaghanirani ivyo vikacitikira Erica wa ku West Africa. Iyo wakatemwanga comene kutimba bola. Apo Eric wakaŵa na vyaka 15, wakaŵa kuti wanjira kale mu timu iyo yikwimira caru. Ici cikang’anamuranga kuti wakakhala pacoko kuti wakasambire kutimba bola ku Europe, panji nanga nkhwamba kugwira nchito iyi. Kweni kasi wakate walondezgenge wuli ulongozgi wakuti, “Kumbuka Mlengi wako”? Ndipo kasi imwe panji muwukirano, mungasambirapo vici?

Pa nyengo iyo wakaŵa ku sukulu, Eric wakamba kusambira Baibolo na Ŵakaboni ŵa Yehova. Ntheura wakamanya kuti Mlengi ndiyo wazamumazgirathu masuzgo gha ŵanthu. Eric wakamba kuwona kuti nchakuzirwa kumalira nyengo na nkhongono zake pa kucita khumbo la Ciuta. Ntheura, Eric wakaleka nchito ya kutimba bola. M’malo mwake, wakabapatizika ndipo wakalimbikiranga pakucita vinthu vyauzimu. Pakati pajumpha nyengo, wakimikika kuŵa muteŵeti wakovwira, ndiposo wakacemeka ku Sukulu Yakusambizga Baibolo ya Ŵabali Ŵambura Kutora.

Eric walutilirenge nchito ya kutimba bola mphanyi wakaŵa munthu musambazi ndiposo wakumanyikwa. Kweni wakamanya kuti fundo ya mu Baibolo iyi njaunenesko, yakuti munthu musambazi wakughanaghana kuti usambazi wake “ndi muzi wake wakukhora, uli nga ndi linga litali kumusungilira.” (Zinth. 18:11) Nadi, civikiliro ico munthu wakuwona nga wali naco cifukwa ca usambazi, nchanadi yayi. Nakuti awo ŵakuŵikapo mtima pa kupenja usambazi, ‘ŵakujilasa bwekabweka na vyakuŵinya vinandi.’—1 Tim. 6:9, 10.

Cakukondweska nchakuti ŵawukirano ŵanandi ŵamba uteŵeti wanyengozose ndipo ŵakusanga cimwemwe na civikiliro canadi. Eric wakati: “Nanjira mu ‘timu’ yikuru ya ŵateŵeti ŵanyengozose ŵa Yehova. Timu iyo nilimo sono ndiyo njiwemi comene, ndipo nkhuwonga Yehova kuti wali kunilongora nthowa iyo yanovwira kusanga cimwemwe ceneko kweniso yanovwira kuti vinthu vinenderenge makora pa umoyo.”

Imwe ke? M’malo mwa kuŵikapo mtima kuti mufiske vilato ivyo caru cili navyo, mwalekeraci kwamba uteŵeti wa upayiniya kuti munozge ‘kwenda kwinu kose’ pamaso pa Yehova?—Wonani bokosi la mutu wakuti “Nasanga Vyandulo Ivyo ku Yunivesite Kulije.”

WUSKANIMO VYAKUJANDIZGA MU NTHOWA YINU

Apo mbumba yinyake yikaluta ku ofesi ya munthavi ya ku United States, yikawona kuti awo ŵakuteŵetera Yehova pa malo agha mbakukondwa. Nyengo yikati yajumphapo, mudumbu wakalemba kuti: “Tikawona kuti tikacitanga vinandi yayi pakuteŵetera Yehova.” Ntheura mbumba iyi yikaghanaghana vya kusintha vinthu vinyake kuti yiŵe na nyengo ndiposo nkhongono kuti yicite vinandi mu uteŵeti.

Pa nyengo yinyake, mbumba iyi yikawonanga kuti vinthu ivyo yikakhumbanga kusintha vikaŵa vyakusuzga comene. Kweni zuŵa linyake, yikaghanaghanirapo comene pa lemba la mu Baibolo la zuŵa ilo. Likaŵa la Yohane 8:31, apo Yesu wakati: “Usange mukukhalilira mu mazgu ghane, muli ŵasambiri ŵane nadi.” Na fundo iyi mu maghanoghano, ŵakati: “Cilicose ico tingacita kuti tiŵe na umoyo wambura kukhumba vinandi, nchakuzirwa comene.” Ŵakaguliska nyumba yawo yikuru, ŵakawuskako mphingo zinyake, na kusamira ku mpingo uwo ukakhumbikwiranga wovwiri. Pasono ŵakucita upayiniya, kweniso ŵakovwira pakuzenga Nyumba za Ufumu ndiposo ŵakujipeleka kucita milimo yakupambanapambana pa maungano gha cigaŵa. Kasi iwo ŵakuti wuli? Ŵakati: “Tili ŵakukondwa comene cifukwa cakuti tili na umoyo wambura kukhumba vinandi, nga umo gulu la Yehova likuticiskira.”

KHALILIRANI MU NTHOWA

Solomoni wakalemba kuti: “Maso ghako ghalaŵiskenge kunthazi; vikopi vyako vilaŵiske panthazi pako dodoli.” (Zinth. 4:25) Nga ni dilayivala uyo wakulaŵiska dodoli panthazi para wakwendeska galimoto, nase tikwenera kugega vinthu ivyo vingatitondeska kuŵa na vilato vyauzimu na kuvifiska.

Kasi imwe mungajiŵikira na kufiska vilato wuli vyauzimu? Cingaŵa ciwemi comene usange mungamba uteŵeti wanyengozose. Kweniso mungateŵetera mu mpingo wapafupi uwo ukukhumbikwira ŵapharazgi ŵaluso ŵanandi kuti ufiske kupharazga cigaŵa cake cose. Usange ndimwe mubali, mungakateŵetera mu mpingo unyake uwo uli na ŵapharazgi ŵaluso ŵanandi, kweni uli na ŵalara na ŵateŵeti ŵakovwira ŵacoko. Fumbani mulaŵiliri wa dera kuti wamuphalirani uko kukhumbikwira wovwiri. Usange mukukhumba kukawovwira mipingo yakutali, mungafumba kuti mumanye mipingo iyo yikukhumba wovwiri.b

Tiyeni tiwoneso ivyo vili pa Yesaya 62:10. Ŵayuda ŵanyake ŵakwenera kuti ŵakafwilirapo kunozga nthowa mwakuti ŵanthu ŵa Ciuta ŵakafike makora ku caru cawo. Usange mukufwilirapo kuti mufiske vilato vinu pakucita uteŵeti wakupatulika, kugongowa yayi. Na wovwiri wa Ciuta, mungafiska vilato ivi. Apo mukufwilirapo kuwuskamo vyakujandizga mu nthowa, lutilirani kulomba Yehova kuti wamupani vinjeru. Para mucitenge nthena, muwonenge umo iyo wamovwiliraninge kuti ‘mughanaghane makora na mendero gha malundi ghinu,’ panji kuti muskesketezgere nthowa malundi ghinu.—Zinth. 4:26.