“Wize Uŵe Mulondezgi Wane”
1. Kasi mu myezi yikwiza tizamusambira vici pa Sambiro la Baibolo la Mpingo?
1 Mabuku gha Mateyu, Mariko, Luka, ndiposo Yohane ghakutiphalira vinandi vyakukhwaskana na Mwana wa Ciuta apo wakaŵa pa caru capasi. Pakuti Taŵakhristu tikwenera “kulondezga mendero ghake mwakugomezgeka,” tikwenera kuzakanozgekera makora na kutegherezga comene apo tizamusambira buku la “Wize Uŵe Mulondezgi Wane” pa Sambiro la Baibolo la Mpingo, kwambira sabata ya Janyuwale 10, 2011. (1 Pet. 2:21; Mrk. 10:21) Mu buku ili tizamusambira ivyo Yesu wakacita apo wakaŵa pa caru capasi, ivyo vingatikhozga para tili mu uteŵeti.
2. Kasi kuzizipizga uko Yesu wakalongora kungatisambizga vici?
2 Ivyo Tingasambira kwa Yesu: Kasi muli kuzgorekapo uheni apo mukapharazganga ku nyumba na nyumba? Para ŵanthu ŵatizgora uheni, tingakumbukira mazgu gha Yesu ghakuti: “Usange ŵakanitambuzga ine, ŵatambuzgenge na imwe wuwo.” (Yoh. 15:20) Mbunenesko kuti ni nyengo zose yayi para ŵanthu ŵatizgora uheni ndikuti ŵakutitambuzga. Ndipouli, Yesu wakazizipizga viyezgo vyose cifukwa ca cimwemwe ico cikaŵikika panthazi pake. Nase tingazizipizga usange tikukumbuka kuti tikukondweska Yehova ndiposo kughanaghanira vitumbiko ivyo wazamutipa cifukwa ca kugomezgeka kwithu. Kucita nthena kutovwirenge kuti ‘tileke kuvuka na kuthika lusoko.’ (Heb. 12:2, 3; Zinth. 27:11) Kweniso para tikufwilirapo mu uteŵeti, tingaŵa na cigomezgo cose kuti Khristu Yesu watovwirenge.—Mat. 28:20.
3. Kasi tingacitaci kuti tiwonenge uteŵeti nga umo Yesu wakauwoneranga?
3 “Ndico Nkhatumikira”: Yesu wakaŵika pakwamba mulimo wa kupharazga Ufumu. (Luka 4:43) Wakajipeleka comene pakucita uteŵeti. Wakawonanga kuti ukwenera kucita mwaluŵiro, ndipo nyengo zose wakapenjanga mipata yakuti wapharazge vya Ufumu. Pakuti ndise ŵalondezgi ŵake, kasi ivyo wakacita vikutikhuŵilizga kuti ticiteci? Apo tikucita milimo yithu ya zuŵa na zuŵa, kasi ŵalipo ŵanthu awo tingaŵapharazgira makani ghawemi? Mphanyi citemwa ico Khristu wali naco caticicizga kuti tipharazge makani ghawemi ku ŵanthu ŵanandi.—2 Kor. 5:16.
4. Ni vici vingatovwira kuti ticite makora uteŵeti withu?
4 “Nanga Ni Kale, Palije Munthu Uyo Wali Kuyowoyapo Ntheura”: Ŵanthu awo ŵakategherezganga Yesu ŵakazizikikanga na umo wakasambizgiranga. (Yoh. 7:46; Mat. 7:28, 29) Cifukwa wuli wakaŵa wakupambana na ŵasambizgi ŵanyake? Wakatemwanga unenesko uwo wakasambizganga, wakatemwanga ŵanthu awo wakaŵasambizganga, ndipo wakaŵa waluso pakusambizga ŵanthu mu nthowa zakupambanapambana. Para tingalondezga Msambizgi Waluso, tingacita makora uteŵeti withu.—Luka 6:40.
5. Kasi tikwenera kuŵa na cilato wuli apo tizamusambira buku la “Wize Uŵe Mulondezgi Wane”?
5 Ivi ni vinthu vicoko waka vyapadera comene ivyo tingasambira kwa Yesu. Ni vinthu wuli vinyake ivyo mungasambirako kwa Yesu? Apo muzamusambira za umoyo wa Yesu pa Sambiro la Baibolo la Mpingo, muzakaŵe na cilato cakuti “mumanye citemwa ca Khristu” mwa kulondezga mazgu ghake na ivyo wakacita.—Efe. 3:19