Nyengo Zose Phalirani Ŵanthu za Sambiro la Baibolo
1. Nchivici ico tikwenera kucita kuti tifiske mulimo uwo Yesu wakatipa pa Mateyu 28:19, 20?
1 Yesu wakatipa mulimo wa ‘kuzgora ŵanthu kuŵa ŵasambiri na kuŵasambizga.’ (Mat. 28:19, 20) Ntheura, tikwenera kuphalira ŵanthu za sambiro la Baibolo pa zuŵa lakwambiskira masambiro gha Baibolo pera yayi, kweni nyengo zose. Masacizgo ghakulondezgapo agha ghangatovwira.
2. Mbanjani awo tingaŵafumba usange ŵangatemwa kusambira Baibolo?
2 Ŵaphalirani Ŵanthu: Para nyengo zose tikuphalira ŵanthu za sambiro la Baibolo, mwaŵi wa kusanga sambiro nawo uŵenge ukuru. (Muph. 11:6) Kasi mwayezgapo kwambiska sambiro la Baibolo pa ulendo wakwamba? Mpingo unyake ku United States ukayezgapo nthowa iyi kwa mwezi wose. Ŵabali na ŵadumbu ŵakakondwa comene apo ŵakambiska masambiro ghaphya gha Baibolo ghakukwana 42. Lekani kughanaghana kuti ŵakunweka awo mukuŵapharazgira ŵakumanya kale kuti mukusambira Baibolo na ŵanthu. Para mukuwelerako, mwalekeraci kukaŵaphalira kuti mungamba kusambira nawo Baibolo? Para ŵakana, vilije kanthu. Nyengo yinyake mungazakadumbiskana nawo kuti ŵanweke. Kasi muli kufumbapo ŵazengezgani ŵinu, ŵabali ŵinu, awo mukugwira nawo nchito, na awo mukusambira nawo sukulu usange ŵangatemwa kuti musambirenge nawo Baibolo? Mungafumbaso awo mukusambira nawo Baibolo para ŵali na ŵabwezi panji ŵabali ŵawo awo ŵangatemwa kusambira Baibolo.
3. Kasi tili na thirakiti wuli ilo lingatovwira kuti tambiskire masambiro, ndipo tingagaŵira nkhu?
3 Thirakiti Lakovwira: Thirakiti ilo lingatovwira kuti tambiskire masambiro gha Baibolo nda Kasi Mungatemwa Kumanya Unenesko? Mungapeleka thirakiti ili kwa ŵeneko nyumba kwali ŵazomera mabuku ghithu panji yayi. Mungagaŵiraso ŵanthu para mukupharazga ku msika, mu msewu, na kutumizgira awo mukuŵalembera makalata, ndipo mungapelekaso kwa awo mukuwelerako. Kweniso mungaŵika pa nyumba izo mundasangepo ŵanthu. Mwalekeraci kuyegha mathirakiti agha para muli paulendo, para mwamugura vinthu ku msika, ndiposo para mukuluta ku nchito? Kuumaliro kwa thirakiti ili kuli mazgu ghakudumura ghakulongosora kuti tikusambira Baibolo na ŵanthu ndiposo ghakuzunura buku la Baibolo Likusambizgaci?
4. Kasi mungambiska wuli sambiro la Baibolo na thirakiti la Kumanya Unenesko?
4 Para munthu mwamupa thirakiti ili, mungamulongora mafumbo agho ghali pa peji lakwamba na kumufumba kuti, “Pa mafumbo agho ghali apa, ni fumbo ndi ilo mukukhumba comene kumanya zgoro lake?” Pamanyuma, sangani zgoro lake mu thirakiti, ndipo ŵazgani panji kulongosora waka ivyo vili pa peji laumaliro, apo pakulongosora za sambiro la Baibolo. Kufuma apo, mungamujulira buku la Baibolo Likusambizgaci? na kumulongora apo pali fundo zinandi pa nkhani iyo. Mugaŵirani buku ili na kupangana nayo kuti mukawereso na kulutilira kudumbiskana.
5. Cifukwa wuli nyengo zose tikwenera kuphalira ŵanthu za sambiro la Baibolo?
5 Mu vigaŵa vithu mucali ŵanthu awo ŵakukhumba comene kumanya ivyo Baibolo likusambizga. Para nyengo zose tikuphalira ŵanthu za sambiro la Baibolo, tiŵenge na mwaŵi unandi wa kovwira ŵanthu kuti ŵende pa nthowa ya ku umoyo ndipo tiŵenge ŵakukondwa.—Mat. 7:13, 14.