Ulongozgi kwa Awo Ŵakuyowoya Nkhani mu Ungano wa Uteŵeti

Kwambira mu Uteŵeti Withu wa Ufumu uwu, mazgu gha pa ndondomeko ya Ungano wa Uteŵeti ghalongosolekaso makora. Ulongozgi wakulondezgapo ulongosorenge makora ivyo vikalembeka mu Uteŵeti Withu wa Ufumu wa Meyi 2009 pa mutu wakuti “Kasi Tinganozgekera Wuli Ungano wa Uteŵeti?”

◼ Nkhani: Tikumanyiskika uko nkhani iyi yikufuma ndipo yikuŵa yakudumbiskana yayi. Muyowoyi wakwenera kuyowoya vinthu ivyo ni vyakuzirwa comene ku mpingo.

◼ Mafumbo na Mazgoro: Nkhani iyi yikucitika mwakuyanako na Sambiro la Gongwe la Mulinda, pakuŵa mazgu ghafupi ghakwamba na ghaumaliro ndipo mafumbo ghose ghakwenera kufumbika. Muyowoyi waleke kuyowoya vinandi. Malemba agho ghakukhozgera fundo ghangaŵazgika para nyengo yilipo. Ndime zingaŵazgikanga yayi, pekhapekha para mwapika ulongozgi wakuti muŵazge.

◼ Kudumbiskana: Mu nkhani iyi ŵategherezgi ŵakuzgorapo. Yikuŵa nkhani yakuti muyowoye mwekha yayi, ndipo yikuŵaso yakudumbiskana mwa mafumbo na mazgoro yayi.

◼ Viyezgelero Ndiposo Mafumbo: Apo pali ulongozgi wakuti “paŵe ciyezgelero” pakung’anamura kuti mbali uyo wapika nkhani iyi wakwenera kunozga viyezgelero ndipo wangacitanga ndiyo yayi ciyezgelero, kweni wasange awo ŵazamucita. Ndipo awo ŵamovwirenge kucita viyezgelero ŵakwenera kuŵa ŵaluso ndiposo ŵankharo yiwemi, ndipo para nchamacitiko ŵakwenera kuphalilikirathu kuti ŵazamucita ciyezgelero. Nchiwemi comene kuleka kusankha ŵapharazgi ŵaphya panji ŵambura luso kuti ŵayezgelere upharazgi na cilato cakuti waka ŵalutepo pa pulatifomu, ndipouli ŵanyake ŵangaŵa mweneko nyumba. Ŵapharazgi awo ŵacitenge ciyezgelero ŵakwenera kulaŵiska ŵategherezgi. Awo muŵafumbenge mafumbo ŵakwenera kuzgolera pa pulatifomu m’malo mwa kuzgolera apo ŵakhala. Mukwenera kuyezgelerathu viyezgelero ndiposo mafumbo. Para nyengo yake yamara, mbali uyo wakuyowoya nkhani iyi wakwenera kuyowoya mwakudumura mwakuti waleke kuwuskamo viyezgelero ndiposo cigaŵa ca mafumbo. Ŵateŵeti ŵakovwira ŵakwenera kukumana na mulaŵiliri wa milimo ya wupu wa ŵalara panji mulara munyake pambere ŵandasankhe awo ŵacitenge ciyezgelero panji kufumbika mafumbo.

Para cigaŵa cinyake cili na ulongozgi wapadera, ukwenera kulondezgeka mwakupwelelera. Para nkhani mu Ungano wa Uteŵeti yayowoyeka mwakulondezga ulongozgi uwo walembeka pacanya apa, ŵabali ŵazamovwira kuti Ungano wa Uteŵeti ucitike “mwakwenelera ndiposo mu ndondomeko.”—1 Kor. 14:40.